Kä bä nuäre nikwe ja üaire ye mikadre bäri bä nuäre
“Tikwe kä ti ngoto kräke ye mikai ütiäte.” (ISAÍAS 60:13)
KANTIKO: 25, 28
1, 2. Biblia Tikani Kukwe Hebreore yebiti yekänti jondron ngoto mikara aune täkärä chi ngoto mikara nieta, ¿ye ngwane blitata drebätä?
NGÖBÖ Jehová tä niere: “Kä kwinta ye kürä tikwe aune Kä tibien ye abokän täkärä chi ngoto mikara tie” (Isaías 66:1). Ngöbö nämene blite “täkärä chi ngoto mikara” ie yebätä angwane, niebare kwe: “Tikwe kä ti ngoto kräke ye mikai ütiäte” (Isaías 60:13). ¿Ngöbö tä täkärä chi ngoto mikara ie ye mike ño bäri bä nuäre o ütiäte? Nitre tä nüne täkärä chi ngoto mikara ie yebiti o Kä tibien yete, ¿yei kukwe ye tä dre mike gare?
2 Biblia Tikani Kukwe Hebreore yebiti yekänti jondron ngoto mikara aune täkärä chi ngoto mikara nieta blitakäre templo kirabe nitre Israelkwe yebätä (1 Crónicas 28:2; Salmo 132:7). Templo ye nämene bä nuäre krubäte Jehová kräke, ñobätä ñan aune nämene nitre niara mikaka täte Kä tibienbätä ye tuenmetre ja mike täte aune ja käikitekä.
3. a) ¿Dre köböire nita Ngöbö mike täte kä nengwane? b) ¿Ñongwane templo ja üaire ye kömikani?
3 ¿Dre köböire nita Ngöbö mike täte kä nengwane? Ni ñaka tä nuainne ju sribebare metre templo kwrere ye köböire. Ñakare aune nita nuainne jondron bäri kwin Jehová mikakäre ütiäte yete, abokän nita kädeke “templo ja üaire”. ¿Templo ja üaire ye dre gärätä? Ye abokän Ngöbökwe kukwe ükaninte ne kwe nitre kä tibienbätä rabadre ja kete ben aune mike täte. Jesús ja biani murie ketadre ni kökatarikäre ye aibe köböire kukwe ye nemen bare. ¿Ñongwane templo ja üaire ye kömikani? Ye kömikani kä 29 yete, kä ye ngwane Jesús ja ngökani ñöte aune dianinkä sacerdote bäri ütiäte templo ja üaire Jehovakwe yete (Hebreos 9:11, 12).
Nitre Jehová mikaka täte rabadre käikitekä kä nengwane
4, 5. a) Salmo 99 tä kukwe niere ye erere, ¿nitre Jehová mikaka täte rabadre dre nuainne? b) ¿Ni rabadre kukwe meden ngwentari jai?
4 Jehovakwe kukwe ükaninte ne kwe nikwe niara mikadre täte yebätä nita debe bien krubäte ie. ¿Ni raba bämike ño? Nikwe Ngöbö kä Jehová ye mikadre gare nitre ie aune niarakwe Jesús juani ja nire bien ni kräke ye niedre ietre arato. Nitre Testiko millón 8 biti bäri tä Jehová käikitekä mantre jetebe ye käi juto nibätä. Nitre kwati tätre nütüre niaratre krütai ye bitikäre näin kä kwinbiti aune ye ngwane batibe Ngöbö käikitaikä kwetre. Akwa kukwe ye ñaka metre gare nie. Kä nengwane nikwe niara käikitadrekä yebrä gare nie.
5 Nita Jehová käikitekä ye ngwane, nita ja ngwen nitre kirabe käkwe niara mikani täte metre ye erere (ñäkädre Salmo 99:1-3, 5 yebätä). * Ngöbö kukwe ükaninte ne kwe niara mikadre täte ye nitre kwati käkwe dimikani, ñodre Moisés, Aarón aune Samuel (Salmo 99:6, 7). Kä nengwane nitre ketebu tä Jehová käikitekä gwairebe. Kena, nitre dianinkä nänkäre kä kwinbiti, niaratre rabadre sacerdotore Jesube ye känenkri tätre sribire templo ja üaire tä Kä tibienbätä yete. Aune ketebukäre, nitre kwati krubäte abokän “obeja mda mda” ye tätre nitre dianinkä nänkäre kä kwinbiti ye dimike käre (Juan 10:16). Akwa ni itire itire rabadre ngwentari jai: “¿Kukwe ükaninte Ngöbökwe ne kwe niara mikadre täte ye tita dimike?”.
¿NIRE NIRE TÄ SRIBIRE TEMPLO JA ÜAIRE YETE?
6, 7. a) ¿Konkrekasion kristiano ükaninte ye bitikäre dre jatani nemen bare? b) ¿Kä 1919 ye ngwane dre namani bare?
6 Apóstol Pablo mikani gare nitre ruäre jatai ja mike kukwe metre mika nämene täte ye rüere aune rabadi kukwe ngwarbe driere konkrekasionte (Hechos 20:28-30; 2 Tesalonicenses 2:3, 4). Konkrekasion kristiano ükaninte ye käi jämi niken 100 ta angwane kukwe ye jatani nemen bare. Aisete nire nire nämene Ngöbö mike täte metre ye ñaka namani nuäre rükadre gare. Akwa kä nikani kwati krubäte ta ye bitikäre, Jesús ye köböire Jehovakwe mikani gare metre nire nire nämene sribire templo ja üaire yete.
7 Kä 1919 yete namani gare metre nire nire nämene Ngöbö mike täte templo ja üaire yete. Niaratre ja töi ükaninte Jehová mikakäre täte Jehová tö ie ye erere (Isaías 4:2, 3; Malaquías 3:1-4). Ye ngwane Jehovakwe jondron mikani tuare Pablo ie ye jatani nemen bare. Apóstol Pablo dre tuani ye ani mike gare jai.
8, 9. ¿Jehovakwe “kä bä nuäre” mikani tuare Pablo ie ye dre gärätä?
8 Jondron rabai bare ja känenkäre ye Jehovakwe mikani tuare Pablo ie ja die yebiti (ñäkädre 2 Corintios 12:1-4 yebätä). * Jehovakwe jondron mikani tuare Pablo ie ye kädekani kwe “kä bä nuäre”. ¿Kä bä nuäre ye abokän dre? Ye jondron ketamä bämikani raba ruin nie. Kena, ye Kä Bä Nuäre metre rabai bare gwäune Kä tibienbätä (Lucas 23:43, TNM). Ketebukäre, ye kä bä nuäre ja üaire rabai kä mrä yete ye käi rabai juto nibätä. Aune ketamäkäre, ye “kä kuin [kä bä nuäre]” Ngöbökwe, ye abokän nitre rabai kä kwinbiti Jehovabe (Apocalipsis 2:7).
9 ¿Ñobätä Pablokwe niebare jondron ruäre kukwe nuabare kwe ye ñaka rabadre kädriere? Ñobätä ñan aune kä kukwe mikakäre gare jondron kwin krubäte tuani kwe yebätä ye käi nämene ja käne. Akwa kä nengwane, ni Jehová mikaka täte raba blite nitre madabe jondron kwin tä nikwe juta kwe yete yebätä.
10. ¿Kä bä nuäre ja üaire ye ja erebe templo ja üaire yebe?
10 Käre tärä aune täräkwata sribeta nikwe ye tä blite kä bä nuäre ja üaire yebätä. Akwa, ¿kä bä nuäre ja üaire ye ja erebe templo ja üaire yebe? Ñakare. Nibira gare nie ye erere, templo ja üaire ye abokän Ngöbökwe kukwe ükaninte ne kwe nikwe niara mikadre täte. Akwa, kä bä nuäre ja üaire ye abokän Jehová tä juta kwe mike nüne jäme aune keteitibe. Kä bä nuäre ja üaire ye köböire nemen gare metre nire nire tä sribire templo ja üaire yete (Malaquías 3:18).
11. ¿Sribi meden ütiäte tä nikwe kä nengwane?
11 Kä 1919 yete ja känenkäre Jehová tä nitre töi ngite tuenmetre kä bä nuäre ja üaire ye ngübarebiti aune mike nirien bäri bätä mike dite, ye käi rabadre juto nibätä. ¿Mätä siba kukwe ye mike nemen bare? ¿Mätä sribire Jehová käikitakäre Kä tibienbätä ye ütiäte mä kräke?
JEHOVATA JUTA ÜKANINTE KWE YE MIKE BÄRI BÄ NUÄRE
12. ¿Kukwe niebare Isaías 60:17 tä nemen bare ye ñokänti gare nie? (Üai bämikani kena mikadre ñärärä.)
12 Juta ükaninte Ngöbökwe Kä tibienbätä ye tä mekerabe kukwe keta kabre ükete bäri kwin. Isaías ni Ngöbö kukwe niekä käkwe kukwe ye mikani gare (ñäkädre Isaías 60:17 yebätä). * Kukwe ükaninte ye gare monsotre bati Testiko ie o nitre tä krire kukwebätä yei, ñobätä ñan aune mikani gare ietre o ñäkäbare kwetre tärä aune täräkwata sribeta nikwe yebätä. Akwa kukwe ükaninte mrä ye ja mräkätre ie kukwe gare ye käkwe tuani. Rei Jesús yebiti Ngöbö tä juta ükaninte kwe jie ngwen ye gare metre niaratre ie. Ja mräkätre Ngöbö mikaka täte metre käkwe kukwe ye mikadre gare nie ye nikwe kukwe nuai angwane, ni rabai tö ngwen bäri Jehovai.
Kä bä nuäre ja üaire ye abokän Jehová tä juta kwe mike nüne jäme aune keteitibe
13. Salmo 48:12-14 tä kukwe niere ye erere, ¿nikwe dre nuaindre?
13 Ni jökrä rabadre blite nitre madabe juta ükaninte Jehovakwe yebätä. Nitre kä nebätä töi käme ye ngätäite ja mräkätre kä jökräbiti tibien tä kä bä nuäre ja üaire yete nüne jäme aune keteitibe, ye abokän jondron ñan tuabare tä nemen bare. Ye medenbätä, ni rabadre blite Gobran Ngöbökwe aune kä bä nuäre ja üaire yebätä ni “mräkätre rabadi jatäri ja känenkäre yebe”, ye abokän blitadre monsotre bati aune nitre tä krire mrä kukwebätä yebe (ñäkädre Salmo 48:12-14 yebätä). *
14, 15. a) ¿Kä 1970 ye bitikäre kukwe meden ükaninte? b) ¿Ñobätä kukwe ükaninte ye namani kwin krubäte?
14 Nitre Testiko kwati krubäte ie kukwe gare ye okwäbiti kukwe keta kabre ükaninante ruäre, abokän tä juta ükaninte Ngöbökwe Kä tibienbätä ye mike bäri bä nuäre. Ñodre, mekerabe konkrekasion jene jene yete ni itibe nämene ji ngwen aune sukursal jene jene yete ni itibe nämene ji ngwen aune central mundial yekänti ni itibe nämene ji ngwen Sociedad Watch Tower yete. Ja mräkätre ye itire itire dimikaka nämenena käre, akwa itibe nämene kukwe ükete nuaindre konkrekasion jene jene yete, sukursal jene jene aune central mundial yete. Kä 1970 ye bitikäre kukwe keta kabre ükaninte ne kwe nitre umbre käkwe kukwe ükadrete nuaindre aune ñaka ni itibe käkwe nuaindre. Kä nengwane, konkrekasion jene jene yete nitre umbre tä ji ngwen, aune nitre Sukursal Jie Ngwanka tä sukursal jene jene yete. Aune nitre umbre braibe dianinkä nänkäre kä kwinbiti tä nitre testiko Jehovakwe ye jie ngwen, nitre ye abokän Nitre Braibe Konkrekasion Jökrä Ngübabitikä.
15 Kukwe ükaninte ye namani kwin krubäte juta ükaninte Ngöbökwe ye kräke. ¿Ñobätä? Ñobätä ñan aune kukwe nieta Bibliakwe ye nüke gare bäri kwin nie kä nengwane ye ererebätä kukwe ye ükaninte. Kukwe kwin nemen bare juta ükaninte Ngöbökwe yete ñobätä ñan aune ni itibe ñaka tä kukwe ükete nuaindre. Ñakare aune, Jehovakwe nitre umbre mikani ni jie ngwankäre ye jökrä raba kukwe kwin niere ni dimikakäre (Proverbios 24:6; Efesios 4:8).
Nitre kä jökräbiti tä ja di ribere ye Jehová tä dimike (Párrafo 16 aune 17 mikadre ñärärä)
16, 17. Kukwe keta kabre ükaninante bitinkä jatäri, ¿ye meden abokän tuin bäri kwin mäi aune ñobätä?
16 Ani blite kukwe ruäre ükaninte bitinkä jatäri yebätä. Ñodre, tärä aune täräkwata sribeta nikwe ye sribeta bä nuäre aune kwin krubäte. Ne madakäre, tecnología keta kabre mrä yebiti nita kukwe driere. Internet käi jw.org ye köböire, nitre kwati bäri dimikata ja üaire. Kukwe jökrä ükateta ye tä bämike Jehová tä nitre tarere aune töitabätä.
Kwela jene jene te ni tötikata Bibliabätä yete nita kukwe mike gare jai yebätä nita debe bien
17 Kukwe ükaninte gätä yebätä arato, ne kwe kä rabadrete nie ja tötikakäre kaibe o ni mräkä yebe. Ne madakäre, nita debe bien kukwe ükaninte kädriedre gätä krite yebätä. ¡Kä kwatire kwatire gätä ye nuainta bäri kwin! Aune kwela jene jene te ni tötikata Bibliabätä yete kukwe nemen gare nie yebätä nita debe bien arato. Kukwe jökrä ükaninte ye tä mike gare Jehová tä juta ükaninte kwe ye jie ngwen aune tä kä bä nuäre ja üaire ye mike batire batire bäri bä nuäre.
KÄ BÄ NUÄRE NIKWE JA ÜAIRE YE NI RABA MIKE ÑO BÄRI BÄ NUÄRE
18, 19. ¿Ni raba dre nuainne kä bä nuäre ja üaire ye mikakäre bäri bä nuäre?
18 Jehová tä ni tuenmetre siba kä bä nuäre ja üaire ye mike bäri bä nuäre. ¿Ni raba nuainne ño? Nikwe kukwe driedre nitre madai aune tötikadre Bibliabätä kä jutobiti. Batire batire nita nitre dimike nemen testiko Jehovakwe ye ngwane, nita kä bä nuäre ja üaire ye mike nirien bäri (Isaías 26:15; 54:2).
19 Kukwe mada nuain raba nikwe kä bä nuäre ja üaire mikakäre bäri bä nuäre, ye abokän nikwe ja di ngwandre ja töi mike bäri kwin ni kristiano erere. Ye köböire nita kä bä nuäre ja üaire ye mike bäri kwin nitre mada ye kräke. Erametre, ¿dre tä nitre töi mike nüke juta ükaninte Ngöbökwe yete aune ja kite Jehová bätä Jesús yebätä? Kukwe gare nie ye ñan ai köböire, ñakare aune nita ja ngwen kwin ye köböire.
Mä raba kä bä nuäre ja üaire ye mike nirien bäri (Párrafo 18 aune 19 mikadre ñärärä)
20. Proverbios 14:35 tä kukwe niere ye ererebätä, ¿nikwe dre nuaindre?
20 Kä bä nuäre nikwe ja üaire ye Jehová aune Jesús tä tuin angwane käita nemen juto krubäte bätätre. Aune nita mike bäri bä nuäre ye käita juto nibätä arato. Akwa nikwe Kä tibien metre kwitai bä nuäre ye ngwane kä rabai bäri juto nibätä. Proverbios 14:35 tä niere rei yebätä kätä nemen juto ni sribikä töbätä tä kwe yebätä. Ye medenbätä, nikwe ja ngwandre töbätä aune nikwe ja di ngwandre kä bä nuäre ja üaire ye mike bäri bä nuäre.
[Notas]
^ párr. 5 Salmo 99:1-3, 5: “Jehová ye rei. Nitre rabadre grükekä. Niara tä täkäni angeletre querubine yebiti. Kä tibien rabadre ngerenkä. Jehová ye kri krubäte Sión yekänti. Niara ye mente kuin juta jene jene ye jökräbiti ta. Niaratre mä kä ye mikadre gare. Mä kri krubäte aune jürä ngwandre jabätä bätä deme. ...Jehová Ngöbö nikwe ye munkwe käikitaka, aune munkwe ja mikate kuintubu jondron ngoto mikara ie ye känenkri; niara ye deme”.
^ párr. 8 2 Corintios 12:1-4, Ngöbö Täräe, (tärä okwä ükaninte): “Ti rikadi blite kwin akwle jabätä, akwa nebrä ñansi kwin ti kräke. Ti bike blite jondron tua näin nikwe ñakarebätä, angwane jondron mika näin tuadre Ji dokwäte krikwe ni ie ñäre ñakarebätä. Ni gare iti tie tä Gobran kri mike täte; ne nie kä kräjätä biti kräbokärä jänikani kä bämäkäre biti ta kä kwinbätä. Ni ne jänikani ja ngätäbiti ya, ja üaibiti ya, ñakare gare tie. Ngöbö ie gare. Gare tie, ni ye jänikani kä bä nuäre Ngöbökwe känti, ja ngätäbiti ya, ja üaibiti ya, ñakare gare tie. Ngöbö ie gare. Yete kukwe kaibe gore kukwe nuani kwe. Kukwe nebrä ñakare kädrie raba ni ño kwa kwe”.
^ párr. 12 Isaías 60:17: “Ti ñan jatai cobre ngwena, ñakare aune ti jatai oro ngwena, ti ñan jatai hierro ngwena ñakare aune ti jatai jondron ngwiane ngwena, ti ñan jatai kri ngwena, ñakare aune ti jatai cobre ngwena aune ti ñan jatai jä bätäkä träte ngwena, ñakare aune ti jatai hierro ngwena, aune erametre tikwe kä jäme ye kädekai mun jie ngwankäre aune kukwe ükateta metre ye tikwe kädekai ne kwe sribi biandre kwe munye”.
^ párr. 13 Salmo 48:12-14: “Munkwe nän bolore ta Sión ye bäre, aune mun rika bäre ta, torre kräbe ye munkwe täin. Ja brukwä mike ki munkwe yebätä. Torre dite munkwe ye munkwe tuate, ne kwe mun rabadre kädriere mun mräkätre rabadi jatäri ja känenkäre yebe. Ñobätä ñan aune Ngöbö ne Ngöbö nikwe kärekäre. Niarakwe ni jie ngwandi kärekäre”.
