1, 2. Outumbulilo “oshilyatelo sheemhadi” mOmishangwa dOshiheberi otau ulike kushike?

JEHOVA KALUNGA okwa ti: “Eulu olo olukalwapangelo lange, nedu olo oshipundi [ile oshilyatelo] sheemhadi dange.” (Jesaja 66:1) Kalunga okwa ti yo: “Oshilyatelo sheemhadi ohandi ke shi fimanekifa.” (Jesaja 60:13) Mbela ongahelipi ha fimanekifa oshilyatelo sheemhadi daye ile he shi ningi shi kale tashi monika nawa? Osho otashi ti shike kwaavo ve li kedu olo li li oshilyatelo sheemhadi daye?

² MOmishangwa dOshiheberi, outumbulilo “oshipundi sheemhadi” ile “oshilyatelo sheemhadi” owa longifwa yo tau ulike kotembeli yomuIsrael shonale. (1 Omafimbo 28:2; Epsalme 132:7) Otembeli oya li ya wapala neenghono momesho aJehova molwaashi oyo ya li ondingandinga yelongelokalunga lashili. Noya li hai longifwa okufimanekifa Jehova kombada yedu.

3. Ondingandinga yelongelokalunga lashili kunena oshike, noya hovela naini?

 ³ Ondingandinga yelongelokalunga lashili kunena oilipi? Kashi fi vali etungo ngaashi otembeli oyo ya li ko. Otembeli yopamhepo oyo tai tumbalekifa Jehova shi dulife etungo keshe la li hali mu fimanekifa. Otembeli yopamhepo oshike? Oyo elongekido laKalunga olo hali pitike ovanhu va ninge ookaume kaye noku mu longela. Elongekido olo ola ningwa ashike tali shiiva omolwekulilo laJesus. Ola hovela momudo 29 eshi Jesus a ninginifwa nokwa vaekwa e li Omupristeri Omukulunhu wotembeli yaJehova yopamhepo. — Ovaheberi 9:11, 12.

4, 5. (a) PaPsalme 99, oshike osho ovalongeli vaJehova vashili va hala okuninga? (b) Epulo lilipi tu na okulipula?

⁴ Otwa pandula neenghono omolwelongekido laKalunga lelongelokalunga lashili. Ohatu ulike olupandu letu mokulombwela vamwe kombinga yedina laJehova nosho yo oshali yaye ikumwifi yekulilo. Otwa hafa eshi pe na Ovakriste vashili ve dulife pomamiliyona ahetatu tava tange Jehova efiku keshe. Fimbo ovanhu vahapu vomalongelokalunga hava diladila papuko kutya otava ka tanga Kalunga meulu shimha va fi, oshiwana shaJehova oshi shii nghee sha fimana oku mu tanga shi li kombada yedu notashi shi ningi paife.

⁵ Ngeenge hatu tange Jehova, ohatu hopaenene oshihopaenenwa shovapiya vaKalunga ovadiinini ovo va popiwa mEpsalme 99:1-3, 5-7. (Lesha.) Ovalumenhu ovadiinini ngaashi Moses, Aron naSamuel ova li hava yambidida pauyadi elongekido laKalunga lelongelokalunga lashili. Kunena, fimbo ovavaekwa ovo ve li kombada yedu inava ya meulu va ka longe ve li ovapristeri pamwe naJesus, otava longele Jehova noudiinini motembeli yopamhepo kombada yedu. Omamiliyona “eedi” dimwe ohaa yambidida ovavaekwa noudiinini. (Johannes 10:16) Eengudu odo dopavali ohadi longele Jehova da hangana. Ashike otwa pumbwa okulipula kutya, ‘Mbela ohandi yambidida ngoo pauyadi elongekido laJehova lelongelokalunga lashili?’

6, 7. Oupyakadi ulipi wa li wa holoka meongalo lopaKriste lopefimbo lonale, noshike sha li sha ningwa po mo 1919?

⁶ Omido di fike hanga pefele konima eshi eongalo lopaKriste la totwa, opa li pa holoka ovashunimonima ngaashi sha li sha xunganekwa. (Oilonga 20:28-30; 2 Ovatessaloniki 2:3, 4) Lwanima osha ka kala shidjuu neenghono okudimbulula mo ovalongelikalunga vashili. Opa li pa pita omido omafele fimbo Jehova ina longifa Jesus a yoolole mo ovo va li tava longele Kalunga motembeli yaYe yopamhepo.

⁷ Momudo 1919, ovo va tambulwa ko kuKalunga notave mu longele motembeli yopamhepo ove ke limonikila mo nawa. Ova li va ninga omalunduluko opo elongelokalunga lavo li tambulwe ko kuJehova. (Jesaja 4:2, 3; Malakia 3:1-4) Onghee hano, emoniko  olo omuyapostoli Paulus a hangwa a mona konima yomido omafele ola li la hovela okuwanifwa.

8, 9. ‘Oparadisa’ oyo Paulus a mona memoniko oshike?

⁸ Emoniko laPaulus otali hangwa mo 2 Ovakorinto 12:1-4. (Lesha.) Memoniko olo, Jehova okwa li a ulikila Paulus oshinima osho sha li tashi ka ningwa monakwiiwa. ‘Oparadisa’ oyo ya monika kuPaulus oshike? Paulus okwa li ta popi oinima itatu ya yoolokafana. Shotete, oparadisa yo venevene oyo i li pokuuya kombada yedu. (Lukas 23:43) Oshitivali, oparadisa yopamhepo oyo tai ka hafelwa pauyadi mounyuni mupe. Oshititatu, onghalo ikumwifi yomeulu ‘moparadisa yaKalunga.’ — Ehololo 2:7.

⁹ Omolwashike Paulus a ti kutya “okwa uda eendjovo kadi shii kutumbulwa, omunhu ina itavelelwa oku di tonga”? Omolwaashi halo la li efimbo lokuyelifa moule oinima ihokwifa oyo a mona memoniko. Ashike kunena Jehova okwe tu pitika tu lombwele vamwe kombinga yomanangekonoupuna oo taa hafelwa koshiwana shaye paife.

10. Omolwashike oparadisa yopamhepo notembeli yopamhepo dihe fi oshinima shimwe?

¹⁰ Mbela oparadisa yopamhepo oyo luhapu hatu popi oshike? Oyo ombili noukumwe oo Kalunga ha pe oshiwana shaye. Onghee hano, oparadisa yomhepo notembeli yopamhepo kai fi oshinima shimwe. Otembeli yopamhepo oyo elongekido laKalunga lelongelokalunga lashili. Oparadisa yopamhepo oya holola pouyelele ovo va hokiwa kuKalunga nohave mu longele motembeli yaye yopamhepo. — Malakia 3:18.

11. Otu na oufembanghenda washike kunena?

¹¹ Oshitunhula okushiiva kutya mo 1919, Jehova okwa pitika ovanhu inava wanenena va longe, va pameke nova tamunune mo otembeli yopamhepo. Oto yambidida ngoo mokulonga oilonga oyo itunhula? Owa pandula ngoo koufembanghenda wokulonga naJehova oilonga oyo tai mu tumbalekifa kombada yedu?

12. Otu shi shii ngahelipi kutya Jesaja 60:17 okwa wanifwa? (Tala efano pehovelo loshitukulwa.)

¹² Omuprofeti Jesaja okwa xunganeka kutya moshitukulwa shehangano laKalunga shokombada yedu otamu ka ningwa omalunduluko mahapu mawa. (Lesha Jesaja 60:17.) Ovanyasha nOvakriste ovo vape ohava lesha ashike ile hava udu kombinga yomalunduluko oo. Ashike ope na ovamwatate novamwameme vahapu ovo va mona oufembanghenda wokumona omalunduluko oo mawa. Ovapiya vaKalunga ovo ovadiinini ova tomhwa kutya Kalunga ota longifa Ohamba yetu Jesus i wilike ehangano laYe. Ngeenge hatu pwilikine koimoniwa yOvakriste ovo ovaholike, eitavelo nelineekelo letu muJehova otali ka pamekwa.

13. Metwokumwe nEpsalme 48:13-15, oshike tu na okuninga?

 ¹³ Ovakriste aveshe vashili ove na okulombwela vamwe kombinga yehangano laJehova. Oshinima shikumwifi shili okukala mounyuni waSatana woukolokoshi, ndele otu na oumwainafana wa hangana nou na ombili. Otu na oku hepaululila ‘ovatekulu vetu’ nehafo shi na sha nehangano laJehova nosho yo shi na sha noparadisa yopamhepo! — Lesha Epsalme 48:13-15.

14, 15. Omalunduluko elipi a li a ningwa konima yo 1970, nehangano ola mona mo ouwa ngahelipi?

¹⁴ Ovanamido vahapu momaongalo etu ova mona omalunduluko oo a ningifa oshitukulwa shehangano laJehova shokombada yedu shi kale shiwa neenghono. Otava dimbuluka eshi omaongalo a li e na omupiya weongalo ponhele yolutu lovakulunhuongalo, eshi oilongo ya li i na omupiya woshitaimbelewa ponhele yOkomitiye yOshitaimbelewa, ile eshi omilandu da li hadi tulwa po komupresidente wehangano lo-Watch Tower ponhele yOlutuwiliki lEendombwedi daJehova. Nonande ovamwatate va tya ngaho ova li ve na ovakwafeli ovadiinini, omunhu umwe oye ashike a li ha ningi omatokolo momaongalo, moitaimbelewa nosho yo keembelewa da kula. Konima yo 1970, opa li pa ningwa omalunduluko opo omatokolo a kale haa ningwa kongudu yovakulunhuongalo ponhele yomunhu umwe.

¹⁵ Omolwashike omalunduluko oo a etela ehangano ouwa? Omolwaashi okwa kanghamena  keudeko lOmishangwa la pepalekwa. Ponhele yokukala ashike omunhu umwe oye ta ningi omatokolo, ehangano ohali mono ouwa momaukwatya mawa ovakulunhuongalo aveshe, ile “eeshali” di li ovanhu da yandjwa kuJehova. — Ovaefeso 4:8; Omayeletumbulo 24:6.

16, 17. Omalunduluko opo a ningilwe elipi e ku kumwifa, nomolwashike?

¹⁶ Diladila komalunduluko amwe oo opo a ningilwe e na sha noileshomwa yetu. Ohatu hafele okuyandja moukalele wetu oileshomwa tai kwafa notai hokwifa. Diladila yo kunghee hatu longifa oinima youteknologi yoshinanena opo tu udife onghundana iwa. Pashihopaenenwa, o-website yo-jw.org otai dulu okuhanga ovanhu vahapu neenghono opo va dule okumona ekwafo olo va pumbwa lela. Omalunduluko aeshe oo otaa ulike kutya Jehova oku na ko nasha novanhu neenghono noku va hole.

¹⁷ Otwa pandula omolwomalunduluko oo a ningwa shi na sha nokwoongala kwetu opo tu mone efimbo lelongelokalunga loukwaneumbo ile ekonakono lopaumwene. Otwa pandula yo omalunduluko oo a ningwa shi na sha noyoongalele yetu. Otu wete kutya otai ende tai xwepopala omudo keshe. Otwa pandula yo omolwedeulo olo hatu mono meefikola detu dihapu dopaMbibeli. Omalunduluko aeshe oo okwa ulika sha yela kutya Jehova ota wilike ehangano laye nosho yo kutya ota twikile okuninga oparadisa yopamhepo iwa neenghono.

18, 19. Ongahelipi hatu dulu okukwafela mokuweda ko kewapalo loparadisa yopamhepo?

¹⁸ Jehova okwe tu pa oufembanghenda wokuyambididida mokuningifa oparadisa yetu yopamhepo i kale ya wapala. Ndele mbela ongahelipi hatu dulu okuninga ngaho? Omokuudifa onghundana iwa yOuhamba nouladi nokuninga ovanhu vahapu ovahongwa. Alushe ngeenge hatu kwafele omunhu a ninge omulongeli waKalunga, ohatu weda ko ketamunukemo loparadisa yopamhepo. — Jesaja 26:15; 54:2.

¹⁹ Ohatu weda ko yo kewapalo loparadisa yopamhepo ngeenge hatu longo noudiinini tu xwepopaleke omaukwatya etu opaKriste. Osho otashi kwafele mokuningifa oparadisa yopamhepo i kale tai nane vamwe. Luhapu eshiivo letu lOmbibeli halo alike hali nane ovanhu, ndele elihumbato letu la koshoka nosho yo ombili oyo hai nanene tete ovanhu kehangano opo nee tava ka nanenwa kuJehova naJesus.

20. Metwokumwe nOmayeletumbulo 14:35, oshike tu na okukala twa halelela?

²⁰ Jehova naJesus ove na okukala hava kala va hafa kunena ngeenge tava tale oparadisa yetu yopamhepo ya wapala. Ehafo olo hatu mono paife eshi hatu weda ko kewapalo loparadisa yopamhepo itali xumbile mo mwaalo hatu ka mona eshi hatu ka longa nokuninga edu oparadisa yo venevene. Otu na alushe okudimbuluka Omayeletumbulo 14:35, oo taa ti: “Omupiya e nomayele ta hokiwa kohamba.” Onghee hano, natu kale ovanaendunge eshi hatu longo noudiinini tu wapeke oparadisa yopamhepo.