ဂုာ်ကျဲးစၢးမၤဂ့ၤထီၣ် နီၢ်သးပၤရဒံစူးတက့ၢ်
“ယခီၣ်အလီၢ်န့ၣ် ယကမၤလၤကပီၤအီၤလီၤ.”—ယၡါယၤ ၆၀:၁၃.
တၢ်သးဝံၣ်– ၁၀၂, ၇၅
၁, ၂. လံာ်စီဆှံလၢဧ့ၤဘြံၤကျိာ်တကတြူၢ်အပူၤ တၢ်ကတိၤလၢအမ့ၢ် “ခီၣ်ယီၢ်အလီၢ်” န့ၣ် အခီပညီမ့ၢ် တၢ်မနုၤလဲၣ်.
ယဟိဝၤယွၤ စံးဝဲလၢ– “မူခိၣ်မ့ၢ်ယလီၢ်ပစိာ်, ဒီးဟီၣ်ခိၣ်မ့ၢ် ယခီၣ်ယီၢ်အလီၢ်လီၤ.” (ယၡါယၤ ၆၆:၁) ကစၢ်ယွၤတဲစ့ၢ်ကီး ဘၣ်ဃးအ “ခီၣ်ယီၢ်အလီၢ်” ဒီးအဝဲတဲဝဲလၢ “ယခီၣ်အလီၢ်န့ၣ် ယကမၤလၤကပီၤအီၤလီၤ.” (ယၡါယၤ ၆၀:၁၃) အဝဲမၤလၤကပီၤ မ့တမ့ၢ် မၤဃံမၤလၤ အခီၣ်ယီၢ်လီၢ်ဒ်လဲၣ်. ဒီးပှၤလၢအအိၣ်မူလၢ ကစၢ်ယွၤအခီၣ်ယီၢ်လီၢ် လၢအမ့ၢ်ဟီၣ်ခိၣ်န့ၣ် အဘျုးအိၣ်လၢ အဝဲသ့ၣ်အဂီၢ်ဒ်လဲၣ်.
၂ လံာ်စီဆှံလၢဧ့ၤဘြံၤကျိာ်တကတြူၢ်အပူၤ တၢ်ကတိၤလၢအမ့ၢ် “ခီၣ်ယီၢ်အလီၢ်” န့ၣ်တဘျီတခီၣ်အခီပညီမ့ၢ်စ့ၢ်ကီး တၢ်လုၢ်ဟံၣ်လၢပျၢၤလၢ အိၣ်ဝဲလၢကီၢ်အံၣ်စရ့လးအပူၤလီၤ. (၁ ကွဲးနီၣ်တၢ် ၂၈:၂; စံးထီၣ်ပတြၢၤ ၁၃၂:၇) လၢညါန့ၣ် တၢ်လုၢ်ဟံၣ် မ့ၢ်ဝဲဒၣ်တၢ်ဘူၣ်တၢ်ဘါအမ့ၢ်အတီ အလီၢ်ခၢၣ်သးအဃိ ဃံလၤဒိၣ်မးလၢယဟိဝၤယွၤအမဲာ်ညါလီၤ. ဒီးလၢဟီၣ်ခိၣ်ချၢန့ၣ် တၢ်လုၢ်ဟံၣ်ဘၣ်တၢ်သူအီၤလၢ တၢ်မၤလၤကပီၤ ယဟိဝၤယွၤအဂီၢ်န့ၣ်လီၤ.
၃. မုၢ်မဆါတနံၤညါအံၤ တၢ်ဘူၣ်တၢ်ဘါအမ့ၢ်အတီအလီၢ်ခၢၣ်သးန့ၣ် မ့ၢ်မနုၤလဲၣ်, ဒီးစးထီၣ်အသးလၢ ဆၢကတီၢ်ဖဲလဲၣ်.
၃ မုၢ်မဆါတနံၤညါအံၤ တၢ်ဘူၣ်တၢ်ဘါအမ့ၢ်အတီအလီၢ်ခၢၣ်သးန့ၣ် မ့ၢ်မနုၤလဲၣ်. တမ့ၢ်တၢ်သူၣ်ထီၣ်တဖျၢၣ် ဒ်တၢ်လုၢ်ဟံၣ်လၢပျၢၤအသိးဘၣ်. တၢ်အံၤမ့ၢ်ဝဲနီၢ်သးတၢ်လုၢ်ဟံၣ် လၢအမၤလၤကပီၤယဟိဝၤယွၤ ဒိၣ်န့ၢ်ဒံးတၢ်သူၣ်ထီၣ်တဖျၢၣ်လၢ်လၢ်န့ၣ်လီၤ. နီၢ်သးတၢ်လုၢ်ဟံၣ် မ့ၢ်တၢ်မနုၤလဲၣ်. တၢ်အဝဲအံၤ မ့ၢ်ကစၢ်ယွၤအတၢ်ရဲၣ်တၢ်ကျဲၤတခါလၢ ဒုးအိၣ်ထီၣ်ကျဲ ဒ်သိးပှၤဟီၣ်ခိၣ်ဖိတဖၣ် ကကဲထီၣ်အတံၤသကိးဒီး ဘူၣ်ထီၣ်ဘါထီၣ်အီၤအဂီၢ်န့ၣ်လီၤ. တၢ်ရဲၣ်တၢ်ကျဲၤတခါအံၤ စးထီၣ်ဖဲ ခ.န ၂၉ နံၣ်န့ၣ်လီၤ. ဖဲန့ၣ်အဆၢကတီၢ် ယ့ၣ်ၡူးဒိးဘျၢအသးလၢထံ ဒီးဘၣ်တၢ်ဃုထၢထီၣ်အီၤလၢ ပှၤလုၢ်တၢ်အခိၣ်လၢ နီၢ်သးတၢ်လုၢ်ဟံၣ်အဂီၢ်န့ၣ်လီၤ. မ့တမ့ၢ်လၢယ့ၣ်ၡူးအတၢ်ပှ့ၤက့ၤအဃိန့ၣ် တၢ်ရဲၣ်တၢ်ကျဲၤအံၤ ကဲထီၣ်အသးတသ့ဘၣ်လီၤ.—ဧ့ၤဘြံၤ ၉:၁၁, ၁၂.
၄, ၅. (က) ဒ်စံးထီၣ်ပတြၢၤ ၉၉ ပာ်ဖျါထီၣ်ဝဲအသိး ယဟိဝၤယွၤအခ့အပှၤလၢအမ့ၢ်အတီတဖၣ် အဲၣ်ဒိးမၤတၢ်မနုၤလဲၣ်. (ခ) ပကြၢးသံကွၢ်လီၤပသး တၢ်သံကွၢ်မနုၤလဲၣ်.
၄ ပစံးဘျုးဘၣ်ကစၢ်ယွၤ လၢအဒုးအိၣ်ထီၣ်ဝဲ တၢ်ရဲၣ်တၢ်ကျဲၤတခါအံၤ လၢတၢ်ဘူၣ်တၢ်ဘါ အမ့ၢ်အတီအဂီၢ်န့ၣ်လီၤ. ပပာ်ဖျါထီၣ် ပတၢ်စံးဘျုးစံးဖှိၣ်ခီဖျိလၢ ပတဲဘၣ်ပှၤဂၤဘၣ်ဃးဒီးကစၢ်ယွၤအမံၤ ဒီးအတၢ်ဟ့ၣ်လီၤလိၢ်လီၤလး လၢအမ့ၢ်တၢ်ပှ့ၤက့ၤန့ၣ်လီၤ. ခရံာ်ဖိနီၢ်နီၢ်တဖၣ် လၢအစံးထီၣ်ပတြၢၤ ယဟိဝၤယွၤကိးနံၤဒဲးန့ၣ် အိၣ်ဝဲဃိးကကွဲၢ်ဘျဲၣ်အဃိ ပသးခုဒိၣ်မးလီၤ. ပှၤလၢအအဲၣ်တၢ်ဘူၣ်တၢ်ဘါအါဂၤ ဆိကမိၣ်ကမၣ်ဝဲလၢ အဝဲသ့ၣ်မ့ၢ်သံဝံၤအလီၢ်ခံဒီး ကလဲၤထီၣ်စံးထီၣ်ပတြၢၤယွၤလၢ မူခိၣ်န့ၣ်လီၤ. ဘၣ်ဆၣ် ယဟိဝၤယွၤအပှၤဂီၢ်မုၢ်တဖၣ် သ့ၣ်ညါဝဲလၢတၢ်စံးထီၣ်ပတြၢၤယွၤ လၢဆၢကတီၢ်ခဲအံၤဒီး ဖဲပအိၣ်လၢဟီၣ်ခိၣ်ချၢအခါန့ၣ် မ့ၢ်တၢ်လၢအရ့ဒိၣ်ဒိၣ်မးန့ၣ်လီၤ.
၅ ဖဲပစံးထီၣ်ပတြၢၤ ယဟိဝၤယွၤအခါ မ့ၢ်ဒၣ်ပကွၢ်လိကစၢ်ယွၤ အခ့အပှၤလၢအတီအလိၤတဖၣ် ဒ်စံးထီၣ်ပတြၢၤ ၉၉:၁–၃, ၅ ပာ်ဖျါထီၣ်ဝဲအသိးလီၤ. (ဖး တက့ၢ်.) ပှၤတီပှၤလိၤလၢပျၢၤတဖၣ်ဒ်သိးဒီး စီၤမိၤၡ့, စီၤအၤဟရိၣ်, ဒီးစီၤၡမူၤအ့လးန့ၣ် ဆီၣ်ထွဲဝဲကစၢ်ယွၤအတၢ်ရဲၣ်တၢ်ကျဲၤ လၢတၢ်ဘူၣ်တၢ်ဘါအမ့ၢ်အတီအဂီၢ်လီၤ. (စံးထီၣ်ပတြၢၤ ၉၉:၆, ၇) ပှၤလၢအဘၣ်တၢ်ဒိးဖှူအီၤတဖၣ် မၤယဟိဝၤယွၤအတၢ်မၤလၢဟီၣ်ခိၣ်ချၢလၢ နီၢ်သးတၢ်လုၢ်ဟံၣ်ပူၤလီၤ. လၢခံန့ၣ် အဝဲသ့ၣ်ကလဲၤထီၣ်ဆူမူခိၣ် ဒီးကကဲထီၣ်ပှၤလုၢ်တၢ်အဒိၣ်ဃုာ်ဒီးယ့ၣ်ၡူးန့ၣ်လီၤ. “သိလၢအဂုၤအဂၤ” လၢအကကွဲၢ်တဖၣ် ဆီၣ်ထွဲမၤစၢၤအဝဲသ့ၣ် လၢတၢ်သးတီအပူၤစ့ၢ်ကီးလီၤ. (ယိၤဟၣ် ၁၀:၁၆) ပှၤခံဖုအံၤ ဘူၣ်ထီၣ်ဘါထီၣ် ယဟိဝၤယွၤ လၢတၢ်ဃူတၢ်ဖိးအပူၤန့ၣ်လီၤ. ဘၣ်ဆၣ်ဒီး ပကြၢးသံကွၢ်လီၤပသးလၢ ‘မ့ၢ်ယဆီၣ်ထွဲယဟိဝၤယွၤ အတၢ်ရဲၣ်တၢ်ကျဲၤ လၢတၢ်ဘူၣ်တၢ်ဘါအမ့ၢ်အတီအဂီၢ် လၢလၢပှဲၤပှဲၤစ့ၢ်ကီးဧါ.’
တၢ်သ့ၣ်ညါနီၤဖး ပှၤတဖၣ်လၢ မၤတၢ်လၢ နီၢ်သးတၢ်လုၢ်ဟံၣ်
၆, ၇. ခရံာ်ဖိလၢညါ အတၢ်အိၣ်ဖှိၣ်အပူၤန့ၣ် တၢ်ကီတၢ်ခဲမနုၤ ဟဲအိၣ်အသးဖဲ ၁၉၁၄ န့ၣ်လဲၣ်.
၆ ခရံာ်ဖိတၢ်အိၣ်ဖှိၣ်သူၣ်ထီၣ်အသး တချုးပှဲၤထီၣ်အနံၣ်တကယၤဒံးဘၣ်အခါ ပှၤလၢအသိၣ်ကမၣ်သီကမၣ်တၢ် ဟဲအိၣ်ထီၣ်ဝဲ ဒ်လံာ်စီဆှံတဲဆိပာ်ဝဲအသိးန့ၣ်လီၤ. (မၤတၢ် ၂၀:၂၈-၃၀; ၂ သ့းစၤလနံ ၂:၃, ၄) လၢတၢ်န့ၣ်အဃိ ဒ်တၢ်ဆၢကတီၢ်လဲၤပူၤကွံာ်အသိး တၢ်သ့ၣ်ညါနီၤဖး ပှၤလၢအဘူၣ်ထီၣ်ဘါထီၣ်ကစၢ်ယွၤနီၢ်နီၢ်န့ၣ် ဒံးယံာ်ဒံးကီထီၣ်ဝဲလီၤ. နံၣ်တဖၣ်ပူၤကွံာ်ဝဲအါမး ဒီးယဟိဝၤယွၤသူဝဲယ့ၣ်ၡူး ဒ်သိးကဒုးနဲၣ်ဖျါထီၣ်ဝဲ လၢမတၤတဖၣ်မၤကစၢ်ယွၤအတၢ်မၤ လၢနီၢ်သးတၢ်လုၢ်ဟံၣ်ပူၤလဲၣ်န့ၣ်လီၤ.
၇ ပှၤလၢကစၢ်ယွၤတူၢ်လိာ်ဝဲဒီး မၤဘၣ်တၢ်လၢ အနီၢ်သးတၢ်လုၢ်ဟံၣ်ပူၤတဖၣ်န့ၣ် အိၣ်ဖျါထီၣ်ဝဲဂ့ၤဂ့ၤဖဲ ၁၉၁၉ နံၣ်န့ၣ်လီၤ. ခီဖျိလၢအဝဲသ့ၣ် ဘၣ်တၢ်မၤကဆှီထီၣ်က့ၤအီၤလၢ နီၢ်သးတခီအဃိ ယဟိဝၤယွၤ ဘၣ်သူၣ်ဘၣ်သး အဝဲသ့ၣ် အတၢ်ဘူၣ်ထီၣ်ဘါထီၣ် အါန့ၢ်အလီၢ်လီၤ. (ယၡါယၤ ၄:၂, ၃; မၤလကံ ၃:၁-၄) လၢတၢ်န့ၣ်အဃိ တၢ်မၢဖိစီၤပီလူး အတၢ်ထံၣ်လၢညါခီ လၢပူၤကွံာ်အနံၣ် ၁,၈၀၀ ဘျဲၣ်န့ၣ် စးထီၣ်လၢထီၣ်ပှဲၤထီၣ်ဝဲလီၤ.
၈, ၉. “ပၤရဒံစူး” လၢစီၤပီလူးထံၣ်ဝဲလၢ အတၢ်ထံၣ်လၢညါခီအပူၤန့ၣ် မ့ၢ်တၢ်မနုၤလဲၣ်.
၈ စီၤပီလူးအတၢ်ထံၣ်လၢညါခီ ဘၣ်တၢ်ပာ်ဖျါထီၣ်အီၤဖဲ ၂ ကရံၣ်သူး ၁၂:၁–၄ န့ၣ်လီၤ. (ဖးတက့ၢ်.) တၢ်ထံၣ်လၢညါခီအံၤအပူၤန့ၣ် ယဟိဝၤယွၤ ဒုးထံၣ် စီၤပီလူး တၢ်လၢကဟဲကဲထီၣ်အသး လၢခါဆူညါတခါန့ၣ်လီၤ. “ပၤရဒံစူး” လၢစီၤပီလူးထံၣ်ဝဲန့ၣ် မ့ၢ်မနုၤလဲၣ်. တၢ်အံၤအဲၣ်ဒိးစံးဝဲ တၢ်ဂ့ၢ်သၢမံၤန့ၣ်လီၤ. အဆိကတၢၢ်တမံၤန့ၣ် အဲၣ်ဒိးစံးဝဲ ဟီၣ်ခိၣ်ပၤရဒံစူးလၢ ဘူးကဟဲကဲထီၣ်အသးလၢ ဟီၣ်ခိၣ်ချၢန့ၣ်လီၤ. (လူၤကၣ် ၂၃:၄၃) ခံမံၤတမံၤန့ၣ် အဲၣ်ဒိးစံးဝဲလၢ နီၢ်သးပၤရဒံစူး လၢပကဒိးန့ၢ်ဘၣ်အီၤလၢလၢပှဲၤပှဲၤ ဖဲကစၢ်ယွၤအတၢ်ရဲၣ်တၢ်ကျဲၤအသီပူၤန့ၣ်လီၤ. ဒီးသၢမံၤတမံၤန့ၣ် အဲၣ်ဒိးစံးဝဲ တၢ်အိၣ်သးအဂ့ၤလၢမူခိၣ်လၢ “ယွၤအပၤရဒံစူး” အပူၤန့ၣ်လီၤ.—လီၣ်ဖျါ ၂:၇.
၉ ဘၣ်မနုၤအဃိ စီၤပီလူးတဲဝဲလၢ အဝဲ “နၢ်ဟူတၢ်ကတိၤလၢ ပှၤစံးတသ့ဘၣ်, ဒီးတဂ့ၤကတိၤဘၣ်ပှၤကညီဘၣ်” န့ၣ်လဲၣ်. မ့ၢ်လၢ တၢ်ဆၢကတီၢ်တဘၣ်ဒံးလၢ အဝဲကတဲနၢ်ပၢၢ် အတၢ်ထံၣ်လၢညါခီအံၤ အခီပညီလီၤတံၢ်လီၤဆဲးအဃိန့ၣ်လီၤ. ဘၣ်ဆၣ် မုၢ်မဆါတနံၤအံၤ ယဟိဝၤယွၤ ပျဲပှၤလၢပကတဲဘၣ် ပှၤအဂၤ ဘၣ်ဃးတၢ်ဆိၣ်ဂ့ၤလၢ အပှၤဂီၢ်မုၢ် ဒိးန့ၢ်ဘၣ်ဝဲလၢဆၢကတီၢ်ခဲအံၤန့ၣ်လီၤ.
၁၀. ဘၣ်မနုၤအဃိ နီၢ်သးပၤရဒံစူးဒီး နီၢ်သးတၢ်လုၢ်ဟံၣ်န့ၣ် တဒ်သိးလိာ်အသးလဲၣ်.
၁၀ ညီနုၢ် ပနၢ်ဟူဘၣ် နီၢ်သးပၤရဒံစူးအဂ့ၢ်လီၤ. ဘၣ်ဆၣ် တၢ်န့ၣ်မ့ၢ်မနုၤလဲၣ်. တၢ်အံၤမ့ၢ်ဝဲ တၢ်မုာ်တၢ်ခုၣ် ဒီးတၢ်ဃူတၢ်ဖိးလၢ ယွၤဟ့ၣ်လီၤအပှၤဂီၢ်မုၢ်န့ၣ်လီၤ. လၢတၢ်န့ၣ်အဃိ နီၢ်သးပၤရဒံစူး ဒီးနီၢ်သးတၢ်လုၢ်ဟံၣ်န့ၣ် တဒ်သိးလိာ်အသးဘၣ်. နီၢ်သးတၢ်လုၢ်ဟံၣ်န့ၣ် မ့ၢ်ဝဲကစၢ်ယွၤအတၢ်ရဲၣ်တၢ်ကျဲၤလၢ တၢ်ဘူၣ်တၢ်ဘါအမ့ၢ်အတီအဂီၢ်န့ၣ်လီၤ. တၢ်မုာ်တၢ်ခုၣ် ဒီးတၢ်ဃူတၢ်ဖိးလၢ ပထံၣ်ဘၣ်လၢနီၢ်သးပၤရဒံစူးအပူၤန့ၣ် မၤစၢၤပှၤဒ်သိးပသ့ၣ်ညါနီၤဖး ပှၤလၢယွၤဘၣ်အသး ဒီးဘူၣ်ထီၣ်ဘါထီၣ်အီၤလၢ အနီၢ်သးတၢ်လုၢ်ဟံၣ် ကသ့အဂီၢ်န့ၣ်လီၤ.—မၤလကံ ၃:၁၈.
၁၁. မုၢ်မဆါတနံၤအံၤ ပအိၣ်ဒီးတၢ်ခွဲးတၢ်ယာ်မနုၤလဲၣ်.
၁၁ စးထီၣ်ဖဲ ၁၉၁၉ နံၣ်န့ၣ် ပသ့ၣ်ညါဘၣ်လၢ ယဟိဝၤယွၤ ပျဲပှၤဟီၣ်ခိၣ်ဖိလၢ အတလၢတပှဲၤဘၣ်သ့ၣ်တဖၣ် လၢကမၤဒိၣ်ထီၣ်အါထီၣ်, မၤဂၢၢ်ကျၢၤထီၣ်, ဒီးမၤဂုၤထီၣ်ပသီထီၣ် နီၢ်သးပၤရဒံးစူးအဃိ ပသူၣ်ပိၢ်သးဝးဒိၣ်မးန့ၣ်လီၤ. မ့ၢ်နပၣ်ဃုာ်လၢ တၢ်မၤအံၤအပူၤဧါ. မ့ၢ်နပာ်ဒိၣ်တၢ်ခွဲးတၢ်ယာ်လၢ နမၤသကိးဘၣ်တၢ်ဒီး ယဟိဝၤယွၤ ဒ်သိးကမၤလၤကပီၤအီၤ လၢဟီၣ်ခိၣ်အံၤဧါ.
ယဟိဝၤယွၤ မၤဃံမၤလၤဒိၣ်ထီၣ် အတၢ်ကရၢကရိ
၁၂. ဝံယၡါယၤ ၆၀:၁၇ လၢထီၣ်ပှဲၤထီၣ်ဝဲန့ၣ် ပသ့ၣ်ညါဘၣ်အီၤဒ်လဲၣ်. (ကွၢ်တၢ်ဂီၤလၢ တၢ်မၤလိအံၤအခီၣ်ထံးတက့ၢ်.)
၁၂ ဝံယၡါယၤ တဲဆိပာ်စၢၤဝဲလၢ တၢ်ဆီတလဲအသးလၢအဂ့ၤ ကအိၣ်ထီၣ်ဝဲအါမး လၢကစၢ်ယွၤ အတၢ်ကရၢကရိလၢဟီၣ်ခိၣ်ချၢန့ၣ်လီၤ. (ဖး ယၡါယၤ ၆၀:၁၇ တက့ၢ်.) ပှၤသးစၢ် မ့တမ့ၢ် ပှၤလၢကဲထီၣ်သီခရံာ်ဖိတဖၣ် ဖးဘၣ်ဝဲ မ့တမ့ၢ် နၢ်ဟူဘၣ်ဝဲ တၢ်ဆီတလဲသ့ၣ်တဖၣ်အံၤလီၤ. ဘၣ်ဆၣ်ဒီပုၢ်ဝဲၢ်အါဂၤ လဲၤခီဖျိဒီးထံၣ်ဘၣ်ဝဲ တၢ်ဆီတလဲသ့ၣ်တဖၣ်အံၤန့ၣ်လီၤ. ကစၢ်အခ့အပှၤလၢ အတီအလိၤတဖၣ်အံၤ နာ်သပှၢ်တၢၢ်လၢ ကစၢ်ယွၤသူဝဲပစီၤပၤ ယ့ၣ်ၡူးလၢ ကနဲၣ်လိဒီးပၢဆှၢ အတၢ်ကရၢကရိအဂီၢ်န့ၣ်လီၤ. ဖဲပနၢ်ဟူဘၣ် ပဒီပုၢ်ဝဲၢ်တဖၣ်အံၤ အတၢ်လဲၤခီဖျိအခါ ပတၢ်စူၢ်တၢ်နာ်ဒီး ပတၢ်နာ်ယဟိဝၤယွၤဆူၣ်ထီၣ်ဝဲန့ၣ်လီၤ.
၁၃. ဒ်စံးထီၣ်ပတြၢၤ ၄၈:၁၂-၁၄ ပာ်ဖျါထီၣ်ဝဲအသိး ပကဘၣ်မၤတၢ်မနုၤလဲၣ်.
၁၃ ခရံာ်ဖိလၢ အမ့ၢ်အတီတဖၣ် ကဘၣ်ဒုးသ့ၣ်ညါပှၤဂၤဘၣ်ဃးဒီး ယဟိဝၤယွၤ အတၢ်ကရၢကရိအဂ့ၢ်န့ၣ်လီၤ. ပအိၣ်ဘၣ်လၢ ဟီၣ်ခိၣ်လၢမုၣ်ကီၤလံၢ်ပၢဝဲ သနာ်က့ ပဒိးန့ၢ်ဘၣ် တၢ်သူၣ်မံသးမုာ် ဒီးတၢ်ဃူတၢ်ဖိးလၢ ပဒီပုၢ်ဝဲၢ်တဖၣ်အကျါအဃိ တၢ်အံၤမ့ၢ်ဝဲ တၢ်လီၤလးတခါလီၤ. ဖဲပဒိးန့ၢ်ဘၣ်တၢ်ခွဲးတၢ်ယာ်လၢ ပကတဲဘၣ် ‘ပှၤတစိၤလၢပလီၢ်ခံ’ ဘၣ်ဃးဒီး ယဟိဝၤယွၤ အတၢ်ကရၢကရိဒီး နီၢ်သးပၤရဒံစူးအဂ့ၢ်အခါ ပကဘၣ်သးခုလီၤ.—ဖး စံးထီၣ်ပတြၢၤ ၄၈:၁၂–၁၄ တက့ၢ်.
၁၄, ၁၅. ဖဲ ၁၉၇၀ ဝံၤအလီၢ်ခံ တၢ်ဆီတလဲမနုၤတဖၣ် ဟဲအိၣ်ထီၣ်ဝဲလဲၣ်. ပတၢ်ကရၢကရိ ဒိးန့ၢ်ဘၣ်အဘျုးဒ်လဲၣ်.
၁၄ ဒီပုၢ်ဝဲၢ်လၢအသးပှၢ်တဖၣ် လဲၤခီဖျိဘၣ်တၢ်ဆီတလဲ လၢတၢ်အိၣ်ဖှိၣ်ပူၤ ဒီးတူၢ်ဘၣ်ဝဲလၢ တၢ်ဆီတလဲတဖၣ်အံၤ မၤဃံမၤလၤဒိၣ်ထီၣ်ကစၢ်ယွၤ အတၢ်ကရၢကရိလၢ ဟီၣ်ခိၣ်ချၢန့ၣ်လီၤ. အဝဲသ့ၣ်တဖၣ် သ့ၣ်နီၣ်ထီၣ်က့ၤ တၢ်ဆီတလဲတဖၣ်လၢ ဘၣ်တၢ်ပာ်ဖျါထီၣ်အီၤ ဒ်လာ်အံၤအသိးန့ၣ်လီၤ. လၢအပူၤကွံာ်န့ၣ် တၢ်အိၣ်ဖှိၣ်တဖုစုာ်စုာ် အိၣ်ဒီးတၢ်အိၣ်ဖှိၣ်အခ့အပှၤထဲတဂၤ ဒီးမ့မ့ၢ်အခါခဲအံၤအိၣ်ဒီးတၢ်အိၣ်ဖှိၣ်သးပှၢ်ကရူၢ်လီၤ. လၢညါဝဲၤတြၢ်တဖၣ်အိၣ်ဒီး ဝဲၤတြၢ်အခ့အပှၤတဂၤ ဒီးတမ့ၢ်ဝဲၤတြၢ်ကမံးတံာ် ဒ်ပစိၤခဲအံၤအသိးဘၣ်. လၢအပူၤကွံာ်န့ၣ် တၢးထီခိးတၢ် တၢ်ကရၢကရိအခိၣ်တဂၤ ပၢဆှၢရဲၣ်ကျဲၤပတၢ်ကရၢကရိ ဘၣ်ဆၣ်ခဲကနံၣ်အံၤ ယဟိဝၤပှၤအုၣ်အသး အပှၤပၢဆှၢတၢ်ကမံးတံာ်အိၣ်ဝဲလီၤ. လၢညါ ဒီပုၢ်ဝဲၢ်ခွါတဖၣ်အံၤ အိၣ်ဒီးပှၤလၢအမၤစၢၤအီၤ သနာ်က့ အနီၢ်နီၢ်န့ၣ် ပှၤလၢအဆၢတဲာ်တၢ်လၢ တၢ်အိၣ်ဖှိၣ်တဖၣ်, ဝဲၤတြၢ် ဒီးဝဲၤလီၢ်ခိၣ်သ့ၣ်န့ၣ် မ့ၢ်ဒၣ်ထဲဒီပုၢ်ဝဲၢ်ခွါတဂၤန့ၣ်လီၤ. ဖဲ ၁၉၇၀ အလီၢ်ခံန့ၣ် ပတၢ်ကရၢကရိအတၢ်ရဲၣ်တၢ်ကျဲၤ ဘၣ်တၢ်ဆီတလဲအီၤအဃိ တၢ်အိၣ်ဖှိၣ်သးပှၢ်အကရူၢ်တဖၣ် ဒိးန့ၢ်ဘၣ်မူဒါလၢကဆၢတဲာ်တၢ်အဂီၢ်န့ၣ်လီၤ.
၁၅ ဘၣ်မနုၤအဃိ တၢ်ဆီတလဲတဖၣ်အံၤ ကဲဘျုးလၢပတၢ်ကရၢကရိအဂီၢ်လဲၣ်. မ့ၢ်လၢတၢ်ဆီတလဲတဖၣ်အံၤ ဟဲခီဖျိပဃုသ့ၣ်ညါနၢ်ပၢၢ်အါထီၣ် လံာ်စီဆှံအဃိန့ၣ်လီၤ. လၢအပူၤကွံာ် ပှၤဆၢတဲာ်တၢ်ထဲတဂၤလီၤ. မ့မ့ၢ်ခဲအံၤ ပတၢ်ကရၢကရိ ဒိးန့ၢ်ဘၣ်အဘျုးလၢ တၢ်အိၣ်ဖှိၣ်သးပှၢ်ကိးဂၤဒဲး အတၢ်သ့တၢ်ဘၣ်တဖၣ်အဃိန့ၣ်လီၤ. အဝဲသ့ၣ်မ့ၢ် “တၢ်ဘျုးတၢ်ဖှိၣ်လၢ ပှၤကညီ” လၢယဟိဝၤယွၤဟ့ၣ်လီၤဝဲလီၤ.—အ့းဖ့းစူး ၄:၈; ကတိၤဒိ ၂၄:၆.
ပှၤအိၣ်လၢဟီၣ်ခိၣ်ဒီဘ့ၣ်န့ၣ် ဒိးန့ၢ်ဘၣ် ယဟိဝၤယွၤ အတၢ်ဟံးစုနဲၣ်ကျဲလၢ တၢ်အိၣ်မူအဂီၢ် (ကွၢ်လံာ်အဆၢ ၁၆, ၁၇)
၁၆, ၁၇. တၢ်ဆီတလဲလၢ ဟဲအိၣ်ထီၣ်ဝဲတယံာ်ဒံးဘၣ်န့ၣ် တၢ်မနုၤထုးန့ၢ်နသးလဲၣ်, ဒီးဘၣ်မနုၤအဃိလဲၣ်.
၁၆ ဆိကမိၣ်ကွၢ် ပလံာ်ပလဲၢ် အတၢ်ဆီတလဲတဖၣ် လၢဟဲအိၣ်ထီၣ်ဝဲတယံာ်ဒံးဘၣ်န့ၣ်တက့ၢ်. ဖဲပစံၣ်တဲၤတဲလီၤတၢ်အခါ ပနီၤလီၤလံာ်လဲၢ်လၢထုးန့ၢ်ပှၤသး ဒီးကဲထီၣ်တၢ်မၤစၢၤလၢပှၤဂီၢ် လၢတၢ်သူၣ်ခုသးခုအပူၤလီၤ. ဆိကမိၣ်ကွၢ်ဘၣ်ဃးဒီး ပသူစဲးဖီကဟၣ်လၢ အလဲၤထီၣ်လဲၤထီဝဲ ဒ်သိးပကစံၣ်တဲၤတဲလီၤ တၢ်သးခုကစီၣ်ဒ်လဲၣ်အဂ့ၢ်န့ၣ်တက့ၢ်. အဒိ, ပှၤအါဂၤဒိးန့ၢ်ဘၣ်တၢ်မၤစၢၤ လၢအဝဲသ့ၣ်လိၣ်ဘၣ်ဝဲခီဖျိလၢ jw.org ပှာ်ယဲၤသန့န့ၣ်လီၤ. တၢ်ဆီတလဲသ့ၣ်တဖၣ်အံၤ ပာ်ဖျါထီၣ်ဝဲ ယဟိဝၤယွၤအတၢ်သးအိၣ် ဒီးတၢ်အဲၣ်နီၢ်နီၢ်လၢ ပှၤဟီၣ်ခိၣ်ဖိတဖၣ်အဂီၢ်န့ၣ်လီၤ.
၁၇ ပသးပှဲၤဒီးတၢ်စံးဘျုးစံးဖှိၣ် ခီဖျိလၢ ပတၢ်အိၣ်ဖှိၣ်ရိဖှိၣ် တၢ်ရဲၣ်တၢ်ကျဲၤ ဘၣ်တၢ်ဆီတလဲအီၤအဃိလီၤ. လၢတၢ်န့ၣ်အဃိ ပဒိးန့ၢ်ဘၣ်တၢ်ဆၢကတီၢ်လၢ ပကမၤဟံၣ်ဖိဃီဖိ တၢ်မၤလိလံာ်စီဆှံ မ့တမ့ၢ် နီၢ်ကစၢ်တၢ်မၤလိလံာ်စီဆှံအဂီၢ်န့ၣ်လီၤ. ပသးခုစ့ၢ်ကီးလၢ ကဝီၤတၢ်အိၣ်ဖှိၣ်ဒီး တၢ်အိၣ်ဖှိၣ်ဖးဒိၣ် တၢ်ရဲၣ်တၢ်ကျဲၤတဖၣ် ဆီတလဲအသးအဃိန့ၣ်လီၤ. တနံၣ်ဘၣ်တနံၣ် တၢ်အိၣ်ဖှိၣ်အတၢ်ရဲၣ်တၢ်ကျဲၤတဖၣ်အံၤ ဂ့ၤထီၣ်ကွ့ၢ်ကွ့ၢ်လီၤ. ပသးခုစ့ၢ်ကီးလၢပဒိးန့ၢ်ဘၣ် တၢ်သိၣ်လိနဲၣ်လိလၢ ပလံာ်စီဆှံကၠိတဖၣ်န့ၣ်လီၤ. ခီဖျိလၢ တၢ်ဆီတလဲတဖၣ်အံၤအဃိ ပထံၣ်ဘၣ်လၢ ယဟိဝၤယွၤဟံးစုနဲၣ်ကျဲ အတၢ်ကရၢကရိ ဒီးအဝဲမၤဃံမၤလၤဒိၣ်ထီၣ် နီၢ်သးပၤရဒံစူးန့ၣ်လီၤ.
ပဝဲသ့ၣ်တဖၣ် ပမၤဃံမၤလၤဒိၣ်ထီၣ် နီၢ်သးပၤရဒံစူးကသ့ဒ်လဲၣ်
၁၈, ၁၉. နီၢ်သးပၤရဒံစူး ကဃံလၤဒိၣ်ထီၣ်အဂီၢ် ပမၤစၢၤကသ့ဒ်လဲၣ်.
၁၈ ယဟိဝၤယွၤ ဟ့ၣ်လီၤပှၤ တၢ်ခွဲးတၢ်ယာ်လၢ ပကမၤဂ့ၤထီၣ် နီၢ်သးပၤရဒံစူးန့ၣ်လီၤ. ဘၣ်ဆၣ် ပမၤအီၤကသ့ဒ်လဲၣ်. ခီဖျိ ပစံၣ်တဲၤတဲလီၤဘီမုၢ်တၢ်သးခုကစီၣ် ဒီးဒုးကဲထီၣ်ပှၤဂၤလၢ ကစၢ်အပျဲၢ်အဘီၣ်န့ၣ်လီၤ. ဖဲပမၤစၢၤပှၤဂၤ ဒ်သိးကကဲထီၣ် ယွၤအခ့အပှၤအခါ မ့ၢ်ပမၤဃံမၤလၤဒိၣ်ထီၣ် နီၢ်သးပၤရဒံစူးန့ၣ်လီၤ.—ယၡါယၤ ၂၆:၁၅; ၅၄:၂.
၁၉ ဖဲပဂုာ်ကျဲးစၢး မၤဒိၣ်ထီၣ်အါထီၣ် ခရံာ်ဖိတၢ်ဂ့ၤတၢ်ဝါတဖၣ်အခါ မ့ၢ်စ့ၢ်ကီး ပမၤဃံမၤလၤနီၢ်သးပၤရဒံစူးန့ၣ်လီၤ. ပမ့ၢ်မၤဒ်န့ၣ်ဒီး နီၢ်သးပၤရဒံစူး ကထုးန့ၢ်ပှၤသးအါထီၣ်လီၤ. ပှၤအါဂၤဘၣ်တၢ်ထုးန့ၢ်အီၤဆူ ပတၢ်ကရၢကရိ, ယဟိဝၤယွၤ, ဒီးယ့ၣ်ၡူးအအိၣ်န့ၣ် တမ့ၢ်ထဲဒၣ်လၢ ပတၢ်သ့ၣ်ညါနၢ်ပၢၢ်လံာ်စီဆှံဂ့ၤဂ့ၤအဃိဘၣ်, မ့ၢ်လၢအဝဲသ့ၣ်ထံၣ်ဘၣ် ပသကဲာ်ပဝးလၢအဂ့ၤဒီး ပအိၣ်ဒီးတၢ်ဃူတၢ်ဖိးအဃိန့ၣ်လီၤ.
နီၢ်သးပၤရဒံစူး ကဒိၣ်ထီၣ်အဂီၢ် နမၤစၢၤသ့ (ကွၢ်လံာ်အဆၢ ၁၈, ၁၉)
၂၀. ဒ်ကတိၤဒိ ၁၄:၃၅ ပာ်ဖျါထီၣ်ဝဲအသိး ပသးအိၣ်မၤတၢ်မနုၤလဲၣ်.
၂၀ မုၢ်မဆါတနံၤအံၤ ယဟိဝၤယွၤဒီး ယ့ၣ်ၡူးထံၣ်ဘၣ်ဝဲ ပနီၢ်သးပၤရဒံစူးဃံလၤဝဲအဃိ အဝဲသ့ၣ် ကသးခုဒိၣ်မးလီၤ. တၢ်သးခု လၢပဒိးန့ၢ်ဘၣ်အီၤခီဖျိ တၢ်မၤဃံမၤလၤ နီၢ်သးပၤရဒံစူး လၢအခါခဲအံၤန့ၣ် မ့ၢ်ဒၣ်တၢ်အဒိ ဆံးဆံးဖိတခါလီၤ. တယံာ်လၢၤဘၣ် ဖဲပမၤကဲထီၣ်ဟီၣ်ခိၣ်ဒီဘ့ၣ်ဆူ ပၤရဒံစူးအခါ ပကသးခုထဲလဲၣ်. ပကဘၣ်သ့ၣ်နီၣ်ထီၣ်က့ၤ ကတိၤဒိ ၁၄:၃၅ စံးဝဲလၢ– “အခ့အပှၤလၢ အကူၣ်တၢ်သ့န့ၣ် ဘၣ်စီၤပၤအသးလီၤ.” မ်ပမ့ၢ်ပှၤကူၣ်တၢ်သ့ ဒီးမၤတၢ်ဆူၣ်ဆူၣ် ဒ်သိးပကမၤဃံမၤလၤ နီၢ်သးပၤရဒံစူးအဂီၢ်န့ၣ်တက့ၢ်.
