1, 2. Dîna “tshitekelu tshia muinshi mua makasa” didi dileja tshinyi mu Mifundu ya tshiena Ebelu?

YEHOWA NZAMBI wakamba ne: ‘Diulu didi nkuasa wanyi wa bukalenge ne buloba budi tshitekelu tshia muinshi mua makasa anyi.’ (Yeshaya 66:1) Wakamba kabidi bua “tshitekelu tshia muinshi mua makasa” ende ne: ‘Nemvuije tshidiatshilu tshia makasa anyi muaba wa butumbi.’ (Yeshaya 60:13) Mmunyi mudiye utumbisha anyi ulengeja tshitekelu tshia muinshi mua makasa ende? Bualu ebu budi ne mushinga kayi kudi bantu badi basombe pa buloba budi tshitekelu tshia muinshi mua makasa ende?

² Mu Mifundu ya tshiena Ebelu, badi benza kabidi mudimu ne dîna “tshitekelu tshia muinshi mua makasa” bua kuakula bua ntempelo wa kale wa mu Isalele. (1 Kulondolola 28:2; Musambu 132:7) Ntempelo eu uvua muimpe bikole ku mêsu kua Yehowa bualu uvua muaba wa ntendelelu mulelela. Uvua muaba uvuabu batumbishila Yehowa pa buloba.

3. Mmuaba kayi udi ntendelelu mulelela wenzekela lelu? Wakatuadija dîba kayi?

 ³ Mmuaba kayi udi ntendelelu mulelela wenzekela lelu? Ki mmu nzubu muibaka bu ntempelo to. Udi wenzekela mu ntempelo wa mu nyuma udi utumbisha Yehowa kupita nzubu kayi yonso muibaka. Ntempelo wa mu nyuma ntshinyi? Nndongoluelu udi wambuluisha bantu bua kulua balunda ba Nzambi ne bua kumutendelela. Ndongoluelu eu mmufike ku dikalaku anu ku diambuluisha dia mulambu wa Yezu. Ndongoluelu eu wakatuadija mu tshidimu tshia 29 pakatambula Yezu ne kumuelabu manyi bu Muakuidi munene wa mu ntempelo wa mu nyuma wa Yehowa.​—Ebelu 9:11, 12.

4, 5. a) Mmunyi mudi Musambu wa 99 uleja dijinga dinene didi nadi batendeledi balelela ba Yehowa? b) Ndukonko kayi lutudi ne bua kudiela?

⁴ Tudi ne dianyisha dia bungi bua malu adi Nzambi mulongolole bua ntendelelu mulelela. Tudi tuleja dianyisha dietu patudi tuambila bakuabu bua dîna dia Yehowa ne bua dipa diende dinene dia tshia kupikula natshi bantu. Bidi bienza disanka dia bungi bua kumanya ne: bena Kristo balelela bapite pa miliyo muanda mukulu badi batumbisha Yehowa dituku dionso. Bantu ba Yehowa bonso mbamone mudibi ne mushinga bua kutumbisha Nzambi pa buloba apa mpindieu, kadi bena mu bitendelelu bikuabu badi bobu badishima ne: nebatumbishe Nzambi pikalabu bumbuke pa buloba baye mu diulu.

⁵ Patudi tutumbisha Yehowa, tudi tulonda tshilejilu tshia batendeledi ba lulamatu ba Nzambi tshidi mu Musambu wa 99:1-3, 5. (Bala.) Bantu bavua ne lulamatu bu mudi Mose ne Alona ne Samuele bakatua malu avua Nzambi mulongolole bua ntendelelu mulelela nyama ku mikolo ne muoyo mujima mu tshikondo tshiabu. (Musambu 99:6, 7) Lelu, kumpala kua bela manyi batshidi pa buloba kuyabu mu diulu bua kuenza mudimu pamue ne Yezu bu bakuidi, badi benzela Yehowa mudimu ne lulamatu mu tshitupa tshia pa buloba tshia ntempelo wa mu nyuma. “Mikoko mikuabu” miliyo ya bungi idi ibambuluisha ne lulamatu luonso. (Yone 10:16) Bena mu bisumbu bionso bibidi ebi badi batendelela Yehowa mu buobumue. Kadi mbimpe yonso wa kutudi adiebeje ne: ‘Ndiku ntua malu adi Yehowa mulongolole bua ntendelelu mulelela nyama ku mikolo ne muoyo mujima anyi?’

6, 7. Ndutatu kayi luvua lumueneke mu tshisumbu tshia bena Kristo ba kumpala? Ntshinyi tshiakenzeka kutuadijila mu 1919?

⁶ Bidimu lukama kabiyi bianji kukumbana panyima pa dijadika dia tshisumbu tshia bena Kristo, butontolodi bukavuabu balaye buakatuadija. (Bienzedi 20:28-30; 2 Tesalonike 2:3, 4) Panyima pa matuku, biakakola menemene bua kumanya batendeledi balelela ba Nzambi. Bidimu nkama ya bungi bimane kupita, Yehowa wakenza mudimu ne Yezu bua kumanya bantu bavua bulelela benzela Nzambi mudimu mu ntempelo wende wa mu nyuma.

⁷ Kutuadijila mu 1919, bantu bavua Nzambi muanyishe ne bavua benza mudimu mu ntempelo wende wa mu nyuma bakamanyika patoke. Bavua bakaje amue malu  bua Yehowa kuanyishaye bikole ntendelelu wabu. (Yeshaya 4:2, 3; Malaki 3:1-4) Nunku, bualu buvua mupostolo Paulo mumone bidimu nkama ya bungi kumpala buakatuadija kukumbana.

8, 9. “Mmparadizu” kayi uvua Paulo mumone mu tshikena kumona?

⁸ Tshikena kumona tshia Paulo ntshileja mu 2 Kolinto 12:1-4. (Bala.) Yehowa uvua muleje Paulo mu tshikena kumona etshi bualu buvua ne bua kuenzeka mu matuku atshivua alua. “Mmparadizu” kayi uvua Paulo mumone? Tshia kumpala, mparadizu eu udi mua kuleja Mparadizu muena dîna utudi bindile pa buloba mu matuku makese emu. (Luka 23:43) Tshibidi, udi mua kuleja mparadizu wa mu nyuma mupuangane mu bulongolodi bupiabupia. Tshisatu, udi mua kuleja nsombelu muimpe mu diulu mu “mparadizu wa Nzambi.”​—Buakabuluibua 2:7.

⁹ Kadi bua tshinyi Paulo uvua muambe ne: uvua ‘mumvue mêyi adibu kabayi mua kuakula, adibu kabayi banyishile muntu bua kuamba’? Bualu katshivua tshikondo tshia yeye kumvuija malu a kukema avuaye mumone mu tshikena kumona to. Kadi lelu Yehowa mmutuanyishile bua kuambila bakuabu masanka adi nawu bantu ba Nzambi katshia ku mpindieu.

10. Bua tshinyi mparadizu wa mu nyuma ne ntempelo wa mu nyuma ki ntshintu tshimue?

¹⁰ Misangu ya bungi tutu tuakula bua mparadizu wa mu nyuma, kadi mparadizu eu ntshinyi? Nnsombelu muimpe wa ditalala udi Nzambi upetesha bantu bende. Nunku, mparadizu wa mu nyuma ne ntempelo wa mu nyuma ki ntshintu tshimue to. Ntempelo wa mu nyuma mmalu adi Nzambi mulongolole bua ntendelelu mulelela. Mparadizu wa mu nyuma udi wambuluisha bua kumanya bimpe bantu badi Nzambi wanyisha ne badi bamutendelela mu ntempelo wende wa mu nyuma.​—Malaki 3:18.

11. Ndiakalenga kayi ditudi nadi lelu?

¹¹ Bidi bienza disanka patudi tumanya ne: katshia mu 1919, Yehowa mmuanyishile bantu bapange bupuangane bua kuenza mparadizu wa mu nyuma, kumukolesha ne kumualabaja. Udiku pebe wambuluisha mu mudimu wa dikema eu anyi? Udiku wanyisha diakalenga diudi nadi dia kuenza mudimu pamue ne Yehowa bua kumutumbisha pa buloba anyi?

12. Ntshinyi tshidi tshituleja ne: mêyi adi mu Yeshaya 60:17 mmakumbane? (Tangila tshimfuanyi tshia ntuadijilu.)

¹² Muprofete Yeshayi uvua mudianjile kuleja ne: bavua ne bua kushintulula ne kuakaja malu a bungi mu tshitupa tshia bulongolodi bua Nzambi tshia pa buloba. (Bala Yeshaya 60:17.) Bena Kristo batshidi bansonga anyi batshidi bapiabapia mu bulelela bakadi babale anyi bumvue malu adibu bashintulule aa. Kadi kudi bana betu ba bungi badi bapete diakalenga dia kumona mudi mashintuluka mimpe aa menzeke. Bana betu aba mbatuishibue ne: Nzambi udi wenza mudimu ne Mukalenge wetu Yezu bua kuludika ne kulombola bulongolodi buende. Patudi tuteleja malu  adi bena Kristo netu aba bamba ne muoyo mujima, ditabuja dietu ne dieyemena dietu kudi Yehowa bidi bikola.

13. Musambu wa 48:12-14 udi utulomba bua kuenza tshinyi?

¹³ Bena Kristo balelela bonso badi ne bua kuambila bakuabu malu adi atangila bulongolodi bua Yehowa. Nansha mutudi basombe mu bulongolodi bubi bua Satana, ntshishima bua mutudi mu ditalala ne mu buobumue. Tudi ne bua kuikala ne disanka bua kuambila bantu ‘ba mu tshikondo tshidi tshilonda kunyima’ malu adi atangila bulongolodi bua Yehowa ne adi atangila mparadizu wa mu nyuma.​—Bala Musambu wa 48:12-14.

14, 15. Mmashintuluka kayi avua menzeke mu bulongolodi buetu panyima pa 1970? Mmunyi muvuawu mambuluishe bulongolodi buetu?

¹⁴ Bana betu bakulakaje badi mu bisumbu bietu mbamone mashintuluka adi malengeje bikole tshitupa tshia bulongolodi bua Yehowa tshia pa buloba. Badi bavuluka tshikondo tshivuabu balombola tshisumbu kudi musadidi wa tshisumbu pamutu pa kasumbu ka bakulu, pavuabu balombola filiale kudi musadidi wa filiale pamutu pa Komite wa filiale, ne pavuabu balombola Société Watch Tower kudi mulombodi pamutu pa kumulombola kudi Kasumbu Kaludiki ka Bantemu ba Yehowa. Nansha muvuabu bambuluisha bana betu ba balume aba kudi bana betu bakuabu ba lulamatu, muntu umue ke uvua nangananga wakangata mapangadika mu tshisumbu, ku filiale ne ku biro bietu bidi bilombola mudimu wa pa buloba bujima. Panyima pa 1970, bakashintulula malu bua kuteka kasumbu ka bakulu bua kulombolaku pamutu pa muntu umue.

 ¹⁵ Bua tshinyi mashintuluka aa mmambuluishe bulongolodi buetu? Bualu avua mimanyine pa ngumvuilu muimpe wa Mifundu minsantu. Pamutu pa muntu umue kuangataye mapangadika onso, ngikadilu mimpe ya bakulu bonso badi “bu mapa” badi Yehowa muteke mmiambuluishe bulongolodi buende.​—Efeso 4:8; Nsumuinu 24:6.

16, 17. Mmashintuluka kayi a mu matuku etu aa adi makusankishe bikole? Bua tshinyi?

¹⁶ Ela meji bua malu adibu bashintulule matuku mashale aa mu mikanda yetu. Tudi ne disanka dia kupesha bantu diambuluisha ne mikanda patudi tuyisha. Ela kabidi meji bua mudi bintu bidi bena siyanse bapatule bituambuluisha bua kuyisha lumu luimpe. Tshilejilu, site wetu wa jw.org, udi wambuluisha bantu ba bungi bua kupeta diambuluisha didibu nadi dijinga. Mu mashintuluka onso aa tudi tumona mudi Yehowa uditatshisha bikole bua bantu ne mudiye mubanange.

¹⁷ Tudi kabidi tuanyisha malu adibu bashintulule bua bisangilu bietu bua tumone mua kuenza Ntendelelu wa mu dîku anyi kuikala ne dîba dia kudilongela Bible. Tudi kabidi tuanyisha malu adibu bashintulule bua mpuilu ne mpungilu. Misangu ya bungi tutu tuamba ne: mpungilu itu ilengela tshidimu tshionso! Tudi tusanka bikole bua malongesha atudi tupeta mu tulasa tuetu tua bungi tua malu a mu Bible. Mashintuluka onso aa adi aleja patoke ne: Yehowa udi ulombola bulongolodi buende ne udi utungunuka ne kulengeja mparadizu wa mu nyuma bikole menemene.

18, 19. Ntshinyi tshitudi mua kuenza bua kulengeja bikole mparadizu wa mu nyuma?

¹⁸ Yehowa mmutupeshe diakalenga dia kuambuluisha mu mudimu wa kulengeja mparadizu wetu wa mu nyuma bikole menemene. Mmunyi mutudi tuenza nunku? Tudi tuenza nunku patudi tuyisha ne tshisumi lumu luimpe lua Bukalenge ne tuvuija bantu ba bungi bayidi. Misangu yonso itudi tuambuluisha muntu bua kulua mutendeledi wa Nzambi, tudi tuambuluisha bua kualabaja mparadizu wa mu nyuma.​—Yeshaya 26:15; 54:2.

¹⁹ Tudi kabidi tuambuluisha bua kulengeja mparadizu wa mu nyuma patudi tudienzeja bua kuakaja ngikadilu yetu ya buena Kristo. Kuenza nunku kudi kuambuluisha bakuabu bua bamone mudi mparadizu wa mu nyuma muimpe menemene. Misangu ya bungi, ki nganu dimanya dietu dia Bible ditu dikoka bantu to, kadi bukezuke buetu ne ditalala ditudi nadi ke bitu bianji kukoka bantu mu bulongolodi buetu ne pashishe kudi Yehowa ne Yezu.

20. Bilondeshile Nsumuinu 14:35, ndijinga kayi ditudi ne bua kuikala nadi?

²⁰ Yehowa ne Yezu badi basanka bikole padibu bamona mparadizu wetu muimpe wa mu nyuma lelu! Disanka ditudi nadi lelu dia kuenza mudimu bua kulengeja mparadizu eu nkadiosha patupu ka disanka dituikala nadi patuikala tuenza mudimu wa kuvuija buloba mparadizu muena dîna. Tuvulukayi misangu yonso mêyi adi mu Nsumuinu 14:35 a ne: ‘Muena mudimu udi ne meji udi upeta diakalengele kudi mukalenge wende.’ Tuenzayi malu ne meji patudi tudienzeja bua kulengeja mparadizu wa mu nyuma.