Nˈokˈyaˈoytyëjkëm niˈigyë Diosë kyäjpn parë yˈitët tuˈugyë ets jotkujk
“Nyajmëjpëtsëmaambyëts ja lugäär mäjëts ja ndeky ngëxkapy.” (ISAÍAS 60:13)
1, 2. ¿Wiˈixë Escrituras Hebreas dyajtunyë tyäˈädë ayuk “mäjëts ja ndeky ngëxkapy”?
JYOBAA jyënany: “Ja tsäjp yëˈë mäjëts nyajkutuky ets ja Naxwinyëdë yëˈë mäjëts ja ndeky ngëxkapy” (Isaías 66:1). Ets nanduˈun jyënany: “Nyajmëjpëtsëmaambyëts ja lugäär mäjëts ja ndeky ngëxkapy” (Isaías 60:13). ¿Wiˈixë Jyobaa dyajmëjpëtsëmy o niˈigyë dyaˈoytyëkë ja lugäär mä tyeky tkëxkapy? ¿Ets wiˈixë tyäˈädë yajjaygyukëyaˈany?
2 Ko mä Escrituras Hebreas jyënaˈany “mäjëts ja ndeky ngëxkapy”, nan yëˈë tuump tyäˈädë ayuk ko yajmaytyaˈaky ja templë diˈib ijty jam Israel (1 Crónicas 28:2; Salmo 132:7). Tyäˈädë templë jantsy tsuj ijtyë Jyobaa tˈixy mët ko jam yˈawdatëdë ets myëjkumayëdë pënaty mëduunëdëp.
3. 1) ¿Mä tyam nˈawdäjtëmë Dios? 2) ¿Näˈä nyaxkëdaky ja templë diˈibë naxwinyëdë jäˈäy kyaj të tkojy?
3 Per tyam kyaj nëjkxëm Dios awdäjtpë mä tuˈugë templë extëm ijty ja israelitëty. Tyam nˈawdäjtëmë Dios mä tuˈugë templë diˈibë naxwinyëdë jäˈäy kyaj të tkojy. ¿Ti yˈandijpy? Yëˈë extëmë Dios të ttukniwitsë yˈawdatëdët ja naxwinyëdë jäˈäy ets myëwingonëdët, mët yëˈëgyëjxm ko Jesus ojts xyjuuybyëtsëˈëmëm. ¿Näˈä dyajnaxkëdaky? Mä jëmëjt 29 ko Jesus nyëbejty, ko yajwinˈijxy parë tyunët extëmë Saserdotë Wintsën mä ja templë diˈibë naxwinyëdë jäˈäy kyaj të tkojy (Hebreos 9:11, 12, TNM).
Tyamën mbäät nmëjkumäˈäyëmë Jyobaa
4, 5. 1) Extëm jyënaˈany mä Salmo 99, ¿ti mbäät ttundë Dios mëduumbë? 2) ¿Ti mbäät nnayajtëˈëwëm?
4 Mëjwiin kajaa nmëjjäˈäwëm extëmë Dios të ttukniwitsë wiˈix mbäät nˈawdäjtëm. ¿Wiˈix mbäät nyajnigëxëˈkëm ko nmëjjäˈäwëm? Ko ndukmëtmaytyakëmë jäˈäy ko Dios txëˈaty Jyobaa ets ko yëˈë Jesus kyajx parë ojts xykyuˈoˈkëm. Jantsy jotkujk nnayjäˈäwëm ko tyam tuktujk miyonk naxy jyaˈˈatyë Jyobaa tyestiigëty diˈib mëjkumääyëdëp. Mayë jäˈäy tmëbëktë ko jaanëmë Dios tmëjkumayäˈändë ko yˈooktët ets ko nyëjkxtët tsäjpotm. Per ëtsäjtëm nnijäˈäwëm ko kyaj tyëyˈäjtënëty, pes tyamën mbäät nmëjkumäˈäyëmë Jyobaa.
5 Ko nmëjkumäˈäyëmë Jyobaa, yëˈë nety nbanëjkxëm ja yˈijxpajtën pënaty tëëyëp Dios mëduundë (käjpxë Salmo 99:1-3, 5-7). * Extëmë Moisés, Aarón etsë Samuel, ojts tpudëkëdë Dios mä wiˈixë nety të ttukniwitsë yaˈˈawdatët. Tyam taaˈäjtp majtskë grupë diˈib tuˈugyë yˈawdäjttëbë Jyobaa. Pënaty nëjkxandëp tsäjpotm jam tyunäˈändë mëdë Jesus extëmë saserdotëty, per mientrës, ta tpudëkëdë wiˈixë Dios të ttukniwitsë ets yaˈˈawdatët yä Naxwiiny. Ets ja wiinkpë borreegëty yëˈë diˈib pudëjkëdëp (Fwank 10:16). Per niduˈuk niduˈuk mbäät nnayajtëˈëwëm: “¿Nbudëjkëbëts extëmë Dios të ttukniwitsë yaˈˈawdatët?”.
¿PËNATY TUUNDËP MÄ JA TEMPLË DIˈIBË NAXWINYËDË JÄˈÄY KYAJ TË TKOJY?
6, 7. 1) ¿Ti jotmay ok jamˈäjt mä ja naymyujkën? 2) ¿Ti tuun jäjtë mä jëmëjt 1919?
6 Apostëlë Pablo ojts tnaskäjpxë ko näägë Dios mëduumbë ttukpëtsëëmduˈudäˈändë ja relijyonk diˈib tëyˈäjtën ets dyajtëkëyäˈändë ja tukniˈˈijxën diˈib kyaj tyëyˈäjtënëty (Apostʉlʉty 20:28-30; 2 Tesalónikʉ 2:3, 4). Ko nyajxy naa 100 jëmëjtën, ta duˈun tyuun jyäjtë mä ja naymyujkën, ets ojts tsyiptaˈaky yaˈëxkapët pënaty jyantsy myëduundëbë Dios. Per ko nyajxy kanäk mëgoˈpx jëmëjt, ta Jyobaa dyajtuunyë Jesus parë yajxon yaˈëxkapët pënaty tuundëp mä ja templë diˈibë naxwinyëdë jäˈäy kyaj të tkojy.
7 Mä jëmëjt 1919 ja yajxon nyigëxëˈky pënaty tuundëp mä ja templë diˈibë naxwinyëdë jäˈäy kyaj të tkojy. Të nety dyajtëgatstë jyukyˈäjtën parë tmëdunäˈändë Jyobaa extëm ttukjotkëdäˈägët (Isaías 4:2, 3; Malaquías 3:1-4). Ta ogäˈän yˈadëëy diˈibë apostëlë Pablo yajtukˈijx. Min nˈokˈijxëm.
8, 9. ¿Ti yˈandijpy ja “itë oybyë tsujpë” diˈibë Pablo yajtukˈijx?
8 Jyobaa ojts ttukˈixyë Pablo diˈib jaˈˈatäämp mä tiempë myiny kyëdaˈaky (käjpxë 2 Corintios 12:2, 4, Tios yˈaaw yˈayuk [Ty]). * Diˈibë Pablo yˈijx, ja ojts ttijy “ja itë oybyë tsujpë”. ¿Ti yˈandijpy? Myëduˈuk, waˈan yëˈë tˈandijy ko tyäˈädë Naxwinyëdë tim tsojk jyëmbitäˈäny jantsy tsuj (Lucas 23:43, TNM). Myëmajtsk, waˈan yëˈë tˈandijy ko tyamë Diosë kyäjpn yajpääty tuˈugyë ets agujk jotkujk, diˈib mëjwiin kajaa yajtukˈoyˈatäämp mä jembyë jukyˈäjtën. Ets myëdëgëëk, waˈan yëˈë tˈandijy “ja lugäärë tsujpë diˈibë Dios jyaˈäjtypy” o ja tuk pëky njënäˈänëm, wiˈix jantsy oy jantsy tsuj yajpäättë mëdë Jyobaa pënaty jam tsäjpotm (Revelación 2:7, TNM).
9 ¿Tiko Pablo jyënany ko tijatyë nety të tmëdoy kyaj mbäät tnimaytyaˈaky? Yëˈko kyajnëmë nety tpääty ja tiempë parë tnimaytyaktäˈäyët ja oyˈäjtën diˈib yˈijx. Per ëtsäjtëm mbäät tyam ndukmëtmaytyakëmë jäˈäy tijaty oyˈäjtën nbatëm ko ndukˈijtëmë Diosë kyäjpn.
10, 11. ¿Ti tuunk tyam nmëjjäˈäwëm?
10 Tyam duˈun nyajpatëm extëmxyëp mä tuˈugë lugäärë tsujpë. Tyäˈädë yëˈë yˈandijpy ko Jyobaa tmoˈoyë kyäjpn ja agujkˈäjt jotkujkˈäjtën ets ja tuˈugyëˈäjtën. Ko duˈun nyajpatëm, yëˈë yajxon xytyukˈijxëm pënatyë Dios kupëjkëp ets pënaty awdäjtëp mä ja templë diˈibë naxwinyëdë jäˈäy kyaj të tkojy (Malaquías 3:18).
11 Desde 1919, Jyobaa yëˈë yajtuumbyë naxwinyëdë jäˈäy ets yajkuentˈatëdë kyäjpn parë yˈitët tuˈugyë ets agujk jotkujk. ¿Mbudëjkëp mijtsë Diosë kyäjpn parë duˈun yajpäädët? ¿Mëjjäˈäwëp ko mëdë Jyobaa mduunmuky parë xyajmëjpëtsëmët yä Naxwiiny?
JYOBAA YAˈOYTYËJKËP NIˈIGYË KYÄJPN
12. ¿Wiˈix nnijäˈäwëm ko ta tyam yˈadëy extëm jyënaˈanyë Isaías 60:17? (Ixë dibujë mä tsyondaˈaky.)
12 Nuˈun kujkë tiempë nyaxy, Jyobaa wyijtsˈoˈoyëp tijaty mä kyäjpn diˈib yä Naxwiiny ets niˈigyë dyaˈoytyëkë, extëm ojts tnaskäjpxë ja kugajpxy Isaías (käjpxë Isaías 60:17). * Pënaty jemy tëjkëdëp ëxpëjkpë o ënäˈktëjk, waˈan jeˈeyë të yajtukmëtmaytyäˈäktë o të tkäjpxtë mä ëxpëjkpajn tijatyë Diosë kyäjpn të twijtsˈoyë. Per ta nmëguˈukˈäjtëm diˈib jeky kujk ttukˈitëdë Diosë kyäjpn diˈib të tˈixtë wiˈix tijaty të yajwijtsˈoyë. Ets ijttëp seguurë ko Jyobaa yëˈë yajtuumbyë Jesus parë ttuˈumoˈoyë kyäjpn. Pën nmëdoowˈijtëm wiˈix tnimaytyäˈäktë, ta niˈigyë kyëktëkëyaˈanyë mëbëjkën mä Jyobaa.
Tyam nyajpatëm extëmxyëp mä tuˈugë lugäärë tsujpë ko Jyobaa tmoˈoyë kyäjpn ja agujkˈäjt jotkujkˈäjtën ets ja tuˈugyëˈäjtën
13. Extëm jyënaˈanyë Salmo 48:12-14, ¿ti mbäät nduˈunëm?
13 Jëjpˈam ets niˈamukë nimaytyakëm wiˈix yˈixëtyë Jyobaa kyäjpn. Jantsy axëëgë tyäˈädë tiempë diˈib ndukjukyˈäjtëm, pääty mbäät njënäˈänëm ko yëˈë tuˈugë miläägrë ko abëtsemy nyaxwinyëdë nyajpatëm tuˈugyë mëdë nmëguˈukˈäjtëm ets agujk jotkujk. Pääty jyëjpˈamëty ets tyäˈädë ndukmëtmaytyakëm “pënaty ok minan jäˈtandëp” o ja ënäˈktëjk o pënaty jemy tëjkëdëp ëxpëjkpë (käjpxë Salmo 48:12-14). *
14, 15. 1) ¿Tijaty tëgäjts ko nyajxyë jëmëjt 1970? 2) ¿Tiko Diosë kyäjpn ttukˈoyˈaty ko tijaty të yajwijtsˈoyë?
14 Taa nimayë nmëguˈukˈäjtëm diˈib jeky kujk ttukˈitëdë Diosë kyäjpn, diˈib të tˈixtë wiˈix niˈigyë të yˈoytyëkë Diosë kyäjpn. Extëm nˈokpëjtakëm, mä tuˈuk tuˈugë naymyujkën tap ijty tuˈuk diˈib yajtijp siervo de congregación, ets mä tuˈuk tuˈugë sukursal, tuˈuk diˈib yajtijp siervo de sucursal ets mä kyopkë Jyobaa tyestiigëty, tuˈuk diˈib yajtijp presidente de la Sociedad Watch Tower. Oyë nety tjamëdattë pyudëjkëbë, naytyuˈuk ijty ttukniwitsëdë wiˈix tijaty yajtunäˈäny mä ja naymyujkën, mä ja sukursal ets mä kyopkë Jyobaa tyestiigëty, per ta tyëgäjtsy ko nyajxyë jëmëjt 1970. Desde jaa, tuk grupë mëjjäˈäytyëjk ttukniwitsë tijaty yajtunäämp ets kyaj nyekynyaytyuˈugëty. Extëm tyam, mä tuˈuk tuˈugë naymyujkën tap tuk grupë mëjjäˈäytyëjk, mä tuˈuk tuˈugë sukursal tamë Komitee, etsë Diosë kyäjpn yëˈë tuˈumooyëdëp Diˈib wyooyoˈoytyëbë Jyobaa tyestiigëty.
15 Diosë kyäjpn tyukˈoyˈajtypy ko duˈun tijaty të yajwijtsˈoyë, ets duˈun yajtuny mët ko niˈigyë yajxon yajjaygyukë Biiblyë. Tyukˈoyˈajtypyë Diosë kyäjpn ko kyaj nyekynyaytyuˈugëtyë jäˈäy diˈib tyukniwijtsëp wiˈix tijaty yajtunäˈäny. Niˈamukë mëjjäˈäytyëjk diˈibë Jyobaa të xynyamoˈoyëm, mbäät tpudëkëdë Diosë kyäjpn mët ja oybyë jäˈäyˈäjtën diˈib myëdäjttëp (Proverbios 24:6; Efesios 4:8, TNM).
Jyobaa abëtsemy nyaxwinyëdë tyamë jäˈäy tmoˈoy ja naybyudëkë diˈib yajtëgoyˈajtypy (Ixë parrafo 16 etsë 17)
16, 17. Extëm tyam tijaty yajtuny mä Diosë kyäjpn, ¿ti diˈib niˈigyë mˈoyˈijxypy, ets tiko?
16 Min nˈokˈijxëm tuk pëky majtsk pëky tijaty näämnëm të tyëgatsy. Extëmë ëxpëjkpajn diˈib tyam nyajtuˈunëm jantsy tsuj tmëminyë dibujë. Nan nyajtuˈunëm tijaty jembyëtsëëmp parë ngäjpxwäˈkxëm, extëm ko nmëdäjtëmë sitio jw.org, ta mayë jäˈäy jap tyëkëdë parë tpäättë naybyudëkë diˈib yajtëgoyˈäjttëp. Tukëˈëyë tyäˈädë yëˈë xytyukˈijxëm ko Jyobaa tsyejpyë jäˈäy ets naytyukjotmaytyuunëp.
Nmëjjäˈäwëm tukëˈëyë diˈib yajtukniˈˈijxëm mä oytyim diˈibëtyë eskuelë diˈibë Diosë kyäjpn yajjaˈäjtypy
17 Nan mëjwiin kajaa nmëjjäˈäwëm ko tyam jeˈeyë nduˈukmujkëm majtskˈok mä tuˈukpë sëmään parë nmëdäjtëmë tiempë ets nDiosˈawdäjtëm mëdë familyë o nˈëxpëjkëm naytyuˈuk. Nan nmëjjäˈäwëm wiˈix të yajtukniwitsë yajtunäˈänyë asamblee. ¡Pes niˈigyë oy nyaxy tuˈuk tuˈugë jëmëjt! Nan nmëjjäˈäwëm tukëˈëyë diˈib yajtukniˈˈijxëm mä oytyim diˈibëtyë eskuelë diˈibë Diosë kyäjpn yajjaˈäjtypy. Ko tyam duˈun tijaty yajtuny, yëˈë xytyukˈijxëm ko Jyobaa yëˈë tyuˈumoopy ja nyax kyäjpn ets niˈigyë dyaˈoytyëkë ko dyaˈity tuˈugyë ets agujk jotkujk.
¿WIˈIX MBÄÄT NIˈIGYË NYAˈOYTYËJKËMË DIOSË KYÄJPN DIˈIB IJTP TUˈUGYË ETS JOTKUJK?
18, 19. ¿Ti mbäät nduˈunëm parë niˈigyë nyaˈoytyëjkëmë Diosë kyäjpn mä jyapˈatyë tuˈugyëˈäjtën etsë jotkujkˈäjtën?
18 Mëjwiin kajaa nmëjjäˈäwëm ko Jyobaa tnasˈixë parë niˈigyë nyaˈoytyëjkëmë kyäjpn diˈib ijtp tuˈugyë ets agujk jotkujk. ¿Wiˈix mbäät niˈigyë nyaˈoytyëjkëm? Ko ngäjpxwäˈkxëm xondaˈakyˈää xondaˈakyjyot ets ko nyaˈëxpëjkëmë jäˈäy. Pes ko tuˈugë jäˈäy jyaˈty Jyobaa tyestiigë, ta niˈigyë myëjwindëkë ja tuˈugyëˈäjtën ets ja jotkujkˈäjtën mä Diosë kyäjpn (Isaías 26:15; 54:2).
19 Ja tuk pëky wiˈix mbäät niˈigyë nyaˈoytyëjkëmë Diosë kyäjpn parë yˈitët tuˈugyë ets jotkujk, jaˈko nduˈunëmë mëjää parë mas oy njäˈäyˈäjtëm. Netë jäˈäy tˈoyˈixëdë Diosë kyäjpn mä wiˈix yˈity tuˈugyë ets agujk jotkujk. Pes diˈib niˈigyë jäˈäy pudëjkëp parë tyuˈukmukäˈänët mëdë Diosë kyäjpn ets tnijawëyäˈänët pënën Jyobaa ets Jesus, yëˈë wiˈix njäˈäyˈäjtëm, kyaj yëˈëjëty nuˈun tijaty njäjt nnijäˈäwëm.
Mijts mbäät xyajmëjwindëkë ja tuˈugyëˈäjtën ets ja jotkujkˈäjtën mä Diosë kyäjpn (Ixë parrafo 18 etsë 19)
20. Extëm jyënaˈanyë Proverbios 14:35, ¿ti mbäät nduˈunëm?
20 Seguurë ko Jyobaa mëdë Jesus jantsy jotkujk nyayjawëdë ko tˈixtë wiˈix tuˈugyë nnayaˈijtëm ets agujk jotkujk extëmxyëp nyajpatëm mä tuˈugë lugäärë tsujpë. Ets ëtsäjtëm nan jotkujk nnayjäˈäwëm ko duˈun nyaˈoytyëjkëm. Per mas niˈigyë agujk jotkujk nnayjawëyäˈänëm ko nety nyajjëmbijtëmë tyäˈädë Naxwinyëdë jantsy tsuj. Proverbios 14:35 jyënaˈany: “Yëˈë rey jotkujk nyayjawëty ko tmëdaty tuˈugë tyuumbë diˈib tijaty tyuumpy mëdë wijyˈäjtën”. Pääty, oy ko nˈijtëm wijy ets nduˈunëmë mëjää parë niˈigyë nyaˈoytyëjkëmë Diosë kyäjpn mä jyapˈatyë tuˈugyëˈäjtën etsë jotkujkˈäjtën.
^ parr. 5 Salmo 99:1-3, 5-7: “Jyobaa të jyaˈty Rey. Waˈan mëk ttsëˈëgëdë ja nax käjpn. Yˈuˈunyë mä kyutujktakn mä jyamˈatyë kerubingëty. Waˈan tˈyuˈkxy ja naxwinyëdë. Jyobaa yëˈë mëj jam Sión, ets yëˈë diˈib këjxm mä tukëˈëyë nax käjpn. Waˈan tmëjkumaytyë ja mxëë diˈib mëj, mët ko wäˈäts ets yajmëjˈijx yajmëjjäˈäwëp. Mëjkumaytyë miitsëtyë Jyobaa diˈib nDiosˈäjtëm ets niwindäˈäktë mä dyaˈity ja tyeky; wäˈäts yëˈë. Moisés mëdë Aarón yëˈë tuundë extëmë syaserdotëty, etsë Samuel yajpaty mä pënaty käjpxëdëbë xyëë. Ojts tmëgäjpxtë Jyobaa ets yëˈë atsoowëmbijtëdë. Jap ojts myëgäjpxëdë yootsoty. Ojts tkuytyundë wiˈix yˈanmääyëdë ets myëmëdoowdë ti yajtukˈanaˈamdë”.
^ parr. 8 2 Corintios 12:2, 4, Ty: “Nˈixyˈajtës tuˈuk ja jaˈay mëtiˈipë myëpëjkën ja Kristë, jam jajëmëjt nyijkxy majkmajktsën ma yajmëpaˈtëkën ma ja mëtëgëëkpë ja tsajpën. Kaˈapës nnijawë pën ojts mëët yajmënëjkxy ja nyiˈkx kyopk ëkë yiˈiyë ja jyaˈawën, Tios nyijaˈap. Jam ojts yajmënëjkxy ma ja itë oybyë tsujpë, ma tmëtooyën ja aaw ayuk mëtiˈipë kaˈap yajmëwinmaˈanypyäätyën ets kaˈap kyutukyëty ets yajnikajpxëty”.
^ parr. 12 Isaías 60:17: “En lugäärë koobrë, yëˈëts nyajminaambyë oorë, ets en lugäärë pujxn, yëˈëts nyajminaambyë platë, ets en lugäärë kepy, yëˈë koobrë, ets en lugäärë tsää, yëˈë pujxn, ets yëˈëts nikajpxpataampy ja tuˈugyëˈäjtën extëmë mwintsënëty, ets ja tëyˈäjtën extëm diˈib mduknipëjkëdëbë tuunk”.
^ parr. 13 Salmo 48:12-14: “Naˈˈawdittë Sión ets naˈˈawdittë pik, maytsyowdë näägë pyotsy tmëdaty. Pëjtäˈäktë mwinmäˈäny mä nyabots. Ixtë wiˈix tyäˈtspëkyëtyë pyotsy, parë miitsëty xytyukmëtmaytyäˈäktët pënaty ok minan jäˈtandëp. Mët ko tyäˈädë Dios, yëˈë duˈun nDiosˈäjtëm winë xëë ets xëmëkyëjxm. Yëˈë diˈib xytyuˈumoˈoyäˈänëm axtë ko nˈoˈkëm”.
