1, 2. ¿Keniuj itech Escrituras Hebreas mokui tajtolmej kampa se mometstajtalia?

 JIOVA kijtoj ke ompa iluikak motalia uan taixyekana uan ke taltikpak yejua imetstapech kampa mometstajtalia (Is. 66:1). Uan no kijtoj: “Nikueyitalis kampa nimometstajtalia” (Is. 60:13). ¿Keniuj Jiova kiueyitalia oso okachi kikualtsintilia kampa mometstajtalia? ¿Uan keyej moneki techyolnotsas nejin taman akin tinemij nikan taltikpak?

² Itech Escrituras Hebreas, tajtolmej kampa se mometstajtalia no mokui keman ika motajtoua templo tein moajsia itech ne uejkauj xolal Israel (1 Crón. 28:2; Sal. 132:7). Jiova kiitaya ke templo semi kualtsin katka, porin itekitikauan nikan taltikpak ompa ueliaj kiueyichiuayaj.

3. ¿Toni techpaleuia axkan maj tikueyichiuakan Dios, uan kemanian peuak moajsi?

³ ¿Toni techpaleuia axkan maj tikueyichiuakan Dios? Amo se kali, kemej katka templo. Axkan, Dios kiixtalij se taman tein kinpaleuia taltikpakneminij maj uelikan mochiuakan itasojikniuan  uan maj uelikan kiueyichiuakan. Nejin sayoj ueli mochiua porin Jesús kitemakak inemilis kemej netetayokolil. Nejin tein Dios kiixtalij kemej yeskia se templo, tein kiueyitalia Jiova. Peuak moajsi itech xiuit 29, keman Jesús moauij uan kiselij tekit kemej tayekankatiopixkat itech nejin templo tein Jiova kiixtalij (Heb. 9:11, 12).

4, 5. 1) Ijkon kemej kijtoua Salmo 99, ¿toni moneki kichiuaskej itekitikauan Jiova? 2) ¿Toni moneki timotajtaniskej?

⁴ Semi tiktasojkamatiliaj Jiova porin kiixtalij nejin taman tein techpaleuia maj tikueyichiuakan. Uan tiknextiaj ke tiktasojkamatiliaj keman tikintapouiaj taltikpakneminij ke Dios monotsa Jiova uan ke kiualtitanik Jesús maj toka momikiliki. Techyolpaktia tikmatiskej ke panoua chikueyi millones itaixpantijkauan Jiova mojmostaj kiueyichiuaj. Miakej kinemiliaj ke keman momikiliskej yaskej iluikak uan ijkuak kiueyichiuaskej Dios. Sayoj ke tejuan tikmatij ke nejon amo melauak, ta tikmatij ke nikan uan axkanya moneki tikueyichiuaskej.

⁵ Keman tikueyichiuaj Jiova, tikchiuaj kemej itekitikauan akin nenkej ne uejkauj uan amo keman kikaujkej (xikonixtajtolti Salmo 99:2, 3, 5). * Miakej itekitikauan Jiova, kemej Moisés, Aarón uan Samuel, ika nochi ininyolo kiueyichiujkej ijkon kemej Dios kiixtalij (Sal. 99:6, 7). Itech nejin tonalmej moajsij ome oloch taltikpakneminij akin kisenueyichiuaj Jiova. Yekinika oloch, yejuan tokniuan taixpejpenalmej, akin achto ke yaskej iluikak kampa tekitiskej kemej tiopixkamej iuan Jesús tapaleuiaj itech templo tein Dios kiixtalij tein moajsi nikan taltikpak. Uan ojpatika oloch, yejuan tel miakej ‘okseki ichkamej’ akin ika nochi ininyolo kinpaleuiaj tokniuan taixpejpenalmej (Juan 10:16). Sayoj ke tisejsemej moneki timotajtaniskej: “¿Nikueyichiua Dios kemej yejuatsin kiixtalij?”.

6, 7. 1) ¿Toni peuak mochiua tepitsin satepan keman peuak moajsi nechikol kampa kichiuaj kemej Cristo? 2) ¿Toni kichiuak Jiova itech xiuit 1919?

⁶ Tatitanil Pablo kijtojka ke sekin kiixnamikiskiaj taneltokalis tein melauak uan peuaskiaj tamachtiskiaj tein amo melauak itech nechikol (Hech. 20:28-30; 2 Tes. 2:3, 4). Nejin peuak mochiua keman nechikol kampa kichiuaj kemej Cristo ayamo kiajxitiaya 100 xiujmej keman peuak moajsi. Ijkuak, semi ouij katka se kimatis akonimej katkaj yekmelauj itekitikauan Dios. Sayoj ke tel miak xiujmej satepan, Jiova, itechkopa Jesús, kiyeknextij akonimej kitekitilijtoyaj itech templo tein yejuatsin kiixtalij.

⁷ Itech xiuit 1919 senkis moyeknextij akonimej kipiayaj itatiochiualis Dios uan kitekitilijtoyaj itech templo tein Jiova kiixtalij. Yejuan kipatakaj tein monekia itech inintaueyichiualis uan ijkon ueliskiaj kitekitiliskej Jiova kemej yejuatsin kiyolpaktia (Is. 4:2, 3; Mal. 3:1-4). Ijkuak,  peuak mochiua se taman tein Pablo kiitak miak xiujmej achto.

8, 9. ¿Toni kiixnextia xochital tein Pablo kiitak?

⁸ Ika ichikaualis, Jiova kichiuak maj Pablo kiitani se taman tein mochiuaskia satepan (xikonixtajtolti 2 Corintios 12:1-4). Pablo kiitak se taman tein kitokaytij “paraíso” oso xochital. ¿Toni nejon xochital? Xa kiixnextia eyi taman. Yekinika, yejua Xochital tein amo uejkaua mochiuas nikan taltikpak (Luc. 23:43, TNM). Ojpatika, yejua yolseuilis uan kuali uikalis tein kipiaj akin kichiuaj kemej Cristo tein senkis kuali yeski itech yankuik taltikpak. Uan expatika, yejua “kampa yetika Totajtsin Dios”, tein kijtosneki, kualtsitsin tatiochiualismej tein onkak ompa iluikak (Apoc. 2:7).

⁹ ¿Keyej kijtoj Pablo ke kikakik seki taman tein monekia amo kijtos? Porin ijkuak, ayamo monekia kimelauas keniuj yeskia nochi kualtsitsin taman tein kiitak. Sayoj ke axkan, tiitekitikauan Jiova kemaj tiuelij tikintapouiaj taltikpakneminij toni kualtsitsin tatiochiualismej tikpiaj itech ixolal Dios.

10. ¿Keyej moijtoua ke ixolal Dios moajsi itech se xochital, uan keniuj akin ompa pouij uelij kiueyichiuaj Dios?

¹⁰ Miakpa, itech toamaixuan moijtoua ke itech ixolal Dios kemej yeskia moajsij itech se xochital. ¿Keyej? Porin Jiova kinmaka yolseuilis akin ompa pouij. Nejin kiyeknextia ke sayoj yejuan kiueyichiuaj Dios kemej yejuatsin kiixtalij. Uan ueli kiueyichiuaj Dios porin imikilis Cristo kinpaleuia (Mal. 3:18).

11. ¿Toni ueyi tatiochiualis tikpiaj axkan?

¹¹ Semi techyolpaktia tikmatiskej ke itech xiuit 1919 uan hasta axkan, Jiova kinkauani taltikpakneminij tajtakouanij maj kiyekpiakan uan maj kipatauakan nejin xochital. ¿Tiontapaleuijtok tejuatsin maj ijkon mochiua? ¿Tikonpatiuita ueyi tatiochiualis tiontekitis iuan Jiova uan ijkon tikonueyitalis nikan taltikpak?

12. ¿Keniuj tikmatij ke mochiujtok tein kijtoua Isaías 60:17? (Xikonita taixkopin ipeujyan tamachtilis.)

¹² Ijkon kemej panouanij xiujmej, mopatani uan moyektaliani miak taman itech inechikol Dios tein poui nikan taltikpak. Uan tanauatijkej Isaías yejua nejon kijtojka ke panoskia (xikonixtajtolti Isaías 60:17). * Akin okachi telpochmej uan akin yankuixtok moauijkej xa kimatij ke mopatani miak taman porin aksa kintapouij oso porin kiixtajtoltijkej itech toamaixuan. Sayoj ke moajsij tokniuan akin uejkaujya kitekitilijtokej Jiova uan kipiakej ueyi tatiochiualis kiitaskej keniuj mopatani miak taman. Yejuan senkis kineltokaj ke Dios kiixyekana inechikol itechkopa tekiuaj Jesús. Komo tikakij tein techtapouiaj nejon tokniuan, okachi titakuaujtamatiskej iuan Jiova.

13. ¿Toni kijtoua Salmo 48:13 ke moneki tikchiuaskej?

 ¹³ Tinochin moneki tikintapouiskej oksekin tein mochiua itech inechikol Jiova. Itech nejin taltikpak kampa mochiua miak taman tein amo kuali, se kimoujkaita maj tel miakej tokniuan akin kayomej noyampa taltikpak yolpakikan itech nejin xochital kampa onkak yolseuilis uan nochin kuali mouikaj. Yejua ika moneki ika titajtoskej inechikol Dios uan nejin xochital iniuan “akin nemiskej satepan”, tein kijtosneki, akin okachi telpochmej uan akin yankuixtok moauijkej (xikonixtajtolti Salmo 48:13). *

14, 15. 1) ¿Toni mopatak satepan ke panok xiuit 1970? 2) ¿Keyej semi tapaleuij nejon tein mopatak?

¹⁴ Miakej itaixpantijkauan Jiova akin uejkaujya kitekitilijtokej, kiitanij keniuj mopatani seki taman tein kichiuani maj okachi mokualtsintili inechikol Dios tein poui nikan taltikpak. Kemej neskayot, miak xiujmej achto, itech sejse nechikol moajsia sayoj se taixyekankej uan amo se oloch tayekananij; itech sejse sucursal amo moajsiaj Taixyekananij itech Sucursal ta sayoj se taixyekankej, uan itech ueyi kali kampa techixyekanaj amo taixyekanayaj Oloch Taojtokaltianij ta sayoj taixyekankej itech Sociedad Watch Tower. Maski sejsemej nejin tokniuan kipiayaj akin kinpaleuiayaj, tein melauj, sayoj se tokniuj kiixpejpenaya tein mochiuaskia itech  sejse nechikol, itech sejse sucursal uan itech ueyi kali kampa techixyekanaj. Sayoj ke satepan ke panok xiuit 1970 mopatak seki taman uan ijkon amo sayoj se tokniuj taixpejpenaskia, ta miakej tayekananij.

¹⁵ Semi tapaleuij tein mopatak itech inechikol Dios, ta nochi mochiuak porin axkan okachi tikajsikamatij Biblia. Itech inechikol Dios tinochin tikseliaj nepaleuil porin axkan amo sayoj se tokniuj taixyekana, ta nochin tayekananij akin Jiova kintemakak kemej netetayokolilmej uelij tapaleuiaj porin kipiaj tataman kualneskayomej (Prov. 24:6; Efes. 4:8, TNM).

16, 17. ¿Toni tein mopatani seki xiujmej achto okachi tikonuelita, uan keyej?

¹⁶ Maj ika titajtokan seki taman tein mopatak seki xiujmej achto. Kemej neskayot, toamaixuan kualtsin chijchiujtokej uan tel tapaleuiaj. Uan no, keman titanojnotsaj tiktekitiltiaj yankuik taman tein tamatinij kichijchiuaj. Ika jw.org, okachi miakej taltikpakneminij kiselijtokej nepaleuil tein moneki. Nochi nejin tein mopatani kinextia ke Jiova kintasojta taltikpakneminij uan kiita tein kinpoloua.

¹⁷ No semi tiktasojkamatij maj mopatani kemej mochiuaj nechikolmej, tein techpaleuia maj okachi tikpiakan tiempo uan ijkon uelis timomachtiskej toselti oso iniuan tochankauan. Uan no, tiktasojkamatij maj mopatani kemej motamachtia itech uejueyi nechikolmej. ¡Okachi kuali kemej mochiua itech sejse xiuit! Uan no semi tiktasojkamatij tein timomachtiaj itech tataman tamachtilis tein onkak itech inechikol Dios. Nochi nejin tein mopatani kinextia ke Jiova kiixyekana inechikol  uan ke okachi kikualtsintilijtok xochital kampa moajsi ixolal yejuatsin.

18, 19. ¿Keniuj uelis titapaleuiskej maj okachi mokualtsintili xochital kampa moajsi ixolal Dios?

¹⁸ Jiova techmakatok ueyi tatiochiualis maj okachi tikualtsintilikan xochital kampa moajsi ixolal Dios. ¿Keniuj uelis tikchiuaskej? Se taman, keman titanojnotsaj uan titamachtiaj ika yolpakilis tein kijtoua Biblia. Nochipa keman tikpaleuiaj aksa maj mochiua itaixpantijkauj Jiova, tikchiujtokej maj mopataua nejon xochital (Is. 26:15; 54:2).

¹⁹ Keman timochikauaj okachi kuali tiknextiskej kualneskayomej tein kiyolpaktia Jiova no titapaleuiaj maj okachi mokualtsintili xochital kampa moajsi ixolal Dios. Ijkon tikchiuaj maj oksekin kinyolnotsa pouiskej itech nejin xochital. Tein melauj, taltikpakneminij amo sayoj kinyolnotsa taixmatilis tein tikpiaj, ta kemej kuali timonejnemiltiaj kinolinia maj motokikan itech nechikol uan maj kiixmatikan Jiova uan Jesús.

20. ¿Toni kijtoua Proverbios 14:35 ke moneki tikchiuaskej?

²⁰ Tikyekmatij ke Jiova uan Jesús semi yolpakij keman kiitaj kualtsin xochital kampa moajsi ixolal Dios. Uan tejuan no tiyolpakij porin titapaleuiaj maj mokualtsintili. Sayoj ke okachi tiyolpakiskej keman titapaleuiskej maj nejin taltikpak mochiua se xochital. Proverbios 14:35 kijtoua ke se tekiuaj yolpaki keman kipia se itekitikauj tamatkej. Yejua ika, maj tiknextikan tamatilis uan maj timochikauakan titapaleuiskej maj okachi mokualtsintili xochital kampa moajsi ixolal Dios.