1, 2. I roto i te Tuatua Tapu Epera, eaa ta te kupu “takainga vaevae” e akataka maira?

AKAKITE te Atua ko Iehova e: “Ko te au rangi toku terono, e te enua nei ko toku takainga vaevae.” (Isaia 66:1) Te tuatua katoa ra te Atua no runga i tona “takainga vaevae” i te na ko anga e: “E akakakā au i toku takainga vaevae.” (Isaia 60:13) Akapeea aia i te akakakā anga me kore i te akamanea anga i tona takainga vaevae? Eaa te puapinga ka rauka mai no te aronga e noo ra i runga i tona takainga vaevae, koia oki te enua?

² I roto i te Tuatua Tapu Epera, kua taangaanga katoaia te “takainga vaevae” ei akataka i te iero i Iseraela i taito ra. (1 Paraleipomeno 28:2; Salamo 132:7) E manea tikai te iero i mua i te aroaro o Iehova no te mea ko te reira te ngai tikai o te akamorianga mou. Kua taangaanga katoaia te reira ei akakakā ia Iehova i te enua nei.

3. Eaa tikai te ngai o te akamorianga mou i teia tuatau, e inaea i akamata ai te reira?

 ³ Eaa tikai te ngai o te akamorianga mou i teia tuatau? Kare te reira i tetai are mei te iero rai. Mari ra, e iero pae vaerua te reira, e e maata atu to te reira akakakā anga ia Iehova i tetai ua atu are. Eaa te iero pae vaerua? E akanoonooanga na te Atua tei akatika i te tangata kia riro mai ei au oa nona e kia akamori iaia. Ka rauka anake teia akanoonooanga na roto i te atinga oko o Iesu. Kua akamataia teia akanoonooanga i te mataiti 29 i to Iesu papetito anga e tona akatainu anga ei Taunga Maata no to Iehova iero pae vaerua.​—Ebera 9:11, 12

4, 5. (a) Eaa ta te aronga e akamori ra ia Iehova e inangaro ra i te rave kia tau kia Salamo 99? (e) Eaa te uianga ta tatou ka ui kia tatou uaorai?

⁴ Te mataora tikai nei tatou i ta te Atua akanoonooanga no te akamorianga mou. Ka akaari tatou i to tatou tu mataora na te akakitekite anga i to Iehova ingoa e tana apinga aroa maata ko te atinga oko. E mareka ana tatou e kua tere atu ki te varu mirioni Kerititiano mou tei akapaapaa ia Iehova i te au rā ravarai! Noatu e e manganui te aronga aere pure e manako ra e ka akapaapaa ratou i te Atua i runga i te rangi i muri ake i to ratou mateanga, kua kite te iti tangata o Iehova e e puapinga rava i te akapaapaa iaia i teia taime tikai.

⁵ Me akapaapaa tatou ia Iehova, te aru ra tatou i te akaraanga o te au tavini tiratiratu o te Atua tei akatakaia i roto ia Salamo 99:1-3, 5. (E tatau.) Te aronga tiratiratu mei ia Mose, Aarona, e Samuela tei turuturu i ta te Atua akanoonooanga no te akamorianga mou i te tuatau i topa. (Salamo 99:6, 7) I teia tuatau, i mua ake ka akamata ai te aronga akatainuia i te tavini ei kau taunga ma Iesu i te rangi, te tavini tiratiratu nei ratou ia Iehova i roto i te tuanga o te enua o te iero pae vaerua. E mirioni ua atu o te “mamoe ke atu” te turuturu maroiroi ra ia ratou. (Ioane 10:16) Te akamori kapiti ra teia nga pupu ia Iehova. Inara, ka tau tatou kia ui i tetai uianga kia tatou uaorai e, ‘Te turuturu tikai ra ainei au i ta Iehova akanoonooanga no te akamorianga mou?’

6, 7. Eaa te manamanata tei tupu i te putuputuanga Kerititiano mua, e eaa tei tupu i te 1919?

⁶ I raro ua ake i te 100 mataiti i muri ake i te akatupuia anga te putuputuanga Kerititiano, kua tupu te au apiianga pikikaa mei tei totouia. (Angaanga 20:28-30; 2 Tesalonia 2:3, 4) I muri ake i te reira tuatau, kua ngata atu i te akataka e koai ma te aronga akamori mou o te Atua. E anere ua atu mataiti i topa i mua ake ka taangaanga ai a Iehova ia Iesu kia akataka e koai ma tikai te tavini ra i te Atua i ko i Tona iero pae vaerua.

⁷ I te 1919, kua akapapuia mai e koai ma tei ārikiia e te Atua e te tavini ra i ko i tona iero pae vaerua. Kua rave ratou i te au akatanotano anga e rauka ai ta ratou akamorianga kia āriki maataia e Iehova. (Isaia 4:2, 3; Malaki 3:1-4) I reira kua akamata te  orama ta te apotetoro ko Paulo i kite e anere ua atu mataiti i topa i te akatupuia.

8, 9. Eaa te “paradaiso” ta Paulo i kite i roto i te orama?

⁸ Kua akatakaia mai te orama a Paulo ia 2 Korinetia 12:1-4. (E tatau.) I roto i taua orama ra, kua akaari a Iehova kia Paulo tetai apinga te ka tupu i te tuatau ki mua. Eaa te “paradaiso” ta Paulo i kite? Te mea mua, te akataka maira i te Parataito tikai kare e roa atu ka tupu i te enua nei. (Luka 23:43) Te rua, te akataka maira i te parataito pae vaerua apa kore i roto i te ao ou. E te toru, te akataka maira i te au turanga umere i te rangi i roto “i te Paradaiso a te Atua.”​—Apokalupo 2:7.

⁹ Eaa ra a Paulo i karanga ai “kua akarongo [aia] i te tuatua, kare e tau kia tuatua, kare oki e tika i te tangata nei kia tuatua”? No te mea kare i tae ake ki te tuatau nona kia akamarama maata atu i te au mea umere tana i kite i roto i te orama. Inara i teia tuatau te akatika maira a Iehova ia tatou kia akakitekite ki tetai ke no runga i te au akameitakianga ta tona iti tangata i rauka mai i teia taime tikai!

10. Eaa te tumu kare e aiteitei ana te parataito pae vaerua e te iero pae vaerua?

¹⁰ E tuatua putuputu ua ana tatou no runga i te parataito pae vaerua, inara eaa te reira? Ko te turanga au tikai te reira ta te Atua e oronga ana ki tona iti tangata. No reira kare te parataito pae vaerua e te iero pae vaerua e aiteite ana. Te iero pae vaerua, ko te akanoonooanga ïa na te Atua no te akamorianga mou. Te akataka papu maira te parataito pae vaerua i te aronga tei marekaia e te Atua e tei akamori iaia i ko i tona iero pae vaerua.​—Malaki 3:18.

11. Eaa te akameitakianga no tatou i teia tuatau?

¹¹ E rekareka tikai i te kite e mei te 1919 mai, kua akatika a Iehova i te au tangata apa ua kia akono, akaketaketa, e te akamaata atu i te parataito pae vaerua. Te tauturu ra ainei koe i te rave i teia angaanga umere tikai? Te āriki ra ainei koe i te akameitakianga i te angaanga kapiti anga kia Iehova no te akakakā anga iaia i te enua nei?

12. Akapeea tatou i kite ei e kua akatupuia a Isaia 60:17? (Akara i te tutu mua o teia atikara.)

¹² Kua totou te peroveta ko Isaia i te au tauiui anga e te au akatanotano anga umere te ka tupu i roto i te tuanga o te enua o te akaaerenga a te Atua. (E tatau ia Isaia 60:17.) Kua tatau me kore kua akarongo ua ana te au mapu e te au Kerititiano ou i teia au tauianga. Inara e manganui te au taeake e te au tuaine tei rauka teia au akameitakianga no te kite anga i teia au tauianga umere! Kua papu i teia au tavini tiratiratu e te taangaanga nei te Atua i to tatou Ariki ko Iesu ei arataki e ei akatere i Tona akaaerenga! Me akarongo tatou i te au  tupuanga o teia au Kerititiano akaperepere, ka ketaketa atu to tatou akarongo e to tatou inangaro ia Iehova.

13. Kia tau kia Salamo 48:12-14, eaa ta tatou ka rave?

¹³ Ka anoanoia te au Kerititiano pouroa i te akakitekite ki tetai ke no runga i to Iehova akaaerenga. E mea umere i te kite e noatu te noo nei tatou i roto i to Satani ao kino, te rotai nei tatou ki tetai taokotaianga taeake e te au! Kia rekareka tatou i te akakitekite ki “tera atu uki” no runga i te akaaerenga a Iehova e te parataito pae vaerua!​—E tatau ia Salamo 48:12-14.

14, 15 Eaa te akatanotano anga tei raveia i muri ake i te 1970, e akapeea te akaaerenga i te puapinga anga?

¹⁴ E manganui te aronga pakarikari i roto i te putuputuanga tei kite i te au akatanotano anga tei akariro i te tuanga o te enua o ta Iehova akaaerenga kia manea atu. Te maara nei ia ratou i te tuatau na te au tavini putuputuanga e akono ana i te putuputuanga kare na te pupu aronga pakari, na te au tavini manga e akono ana i te au enua, kare na te Kumiti manga, me kore na te peretiteni o te Watch Tower Society e oronga ana i te aratakianga, kare na te Pupu Akaaere o te Au Kite o Iehova. Noatu e e au tauturu tiratiratu to teia au taeake, okotai rai tangata ka rave i te au tukuanga tika i roto i te au putuputuanga, te au opati manga, e te opati maata o teianei ao. Muri ake i te 1970, kua raveia te au akatanotano anga e na te pupu aronga pakari te apainga kia rave i te tukuanga tika i roto i te putuputuanga, kare na te tangata okotai.

 ¹⁵ Eaa ra teia au akatanotano anga i puapinga ai ki te akaaerenga? No te mea kua akatumuia te reira ki runga i te mārama meitaki atu anga i te au Tuatua Tapu. Kare na te tangata okotai e rave ana i te au tukuanga tika mari ra, te puapinga ia ra te akaaerenga no te au tu meitaki o te aronga pakari pouroa, me kore “te meitaki i te tangata nei” no ko mai ia Iehova.​—Ephesia 4:8; Maseli 24:6.

16, 17 Eaa te au akatanotano anga ou taau e mareka ra, e no teaa ra?

¹⁶ Akamanako ana i tetai au akatanotano anga ou no runga i ta tatou au puka. E mataora ana tatou i te oronga i te au puka meitaki ei tauturu i te tangata i roto i te angaanga orometua. Akamanako katoa e akapeea tatou i te taangaanga anga i te tekinoroti ou kia tutu aere i te tuatua meitaki. Ei akaraanga, te itae ra te web site jw.org i te au tangata e manganui kia rauka ia ratou tetai tauturu ta ratou e anoano tikai ra. I roto i teia akatanotano anga, te kite nei tatou i to Iehova manako oonu i te tangata e tona inangaro no ratou.

¹⁷ Te rekareka katoa nei tatou i te au akatanotano anga no te au uipaanga kia rauka ia tatou tetai tuatau no te akamorianga a te ngutuare me kore i te apii na tatou uaorai. Te rekareka katoa nei tatou i te au akatanotano anga no te au porokaramu o ta tatou au akaputuputuanga e te uruoaanga. I te akara anga te meitaki rava atura te reira i te au mataiti ravarai! Te reka katoa nei tatou i te terenianga tei orongaia mai mei ko mai i te au apii Pipiria. I roto i teia au  akatanotano anga, te taka meitaki ra e te arataki nei a Iehova i tana akaaerenga e te akariro nei aia i te parataito pae vaerua kia manea roa atu!

18, 19 Akapeea tatou te akariro anga i te parataito pae vaerua kia manea atu?

¹⁸ Kua oronga mai a Iehova i te tikaanga ngateitei no tatou kia akariro i to tatou parataito pae vaerua kia manea atu. Inara akapeea tatou me rave i te reira? Na te tutu maroiroi anga i te tuatua meitaki o te Patireia e te akariro anga i te tangata ei pipi. I te au taime ravarai me tauturu tatou i tetai tangata kia riro mai ei tavini no te Atua, te tauturu ra tatou i te akamaata atu i te parataito pae vaerua.​—Isaia 26:15; 54:2.

¹⁹ Ka tauturu tatou i te akamanea i te parataito pae vaerua me angaanga pakari tatou i te akameitaki mai i to tatou tu Kerititiano. Te riro ra teia i te akakeu i te aronga i vao kia kite mai i teia parataito pae vaerua. Te maata anga ra o te taime, kare no to tatou kite i te Pipiria, mari ra no to tatou tu mā e te au e arataki maira i te tangata ki te akaaerenga e kia Iehova e Iesu.

20. Kia tau kia Maseli 14:35, eaa ta tatou e inangaro ra?

²⁰ Papu e ka mataora tikai a Iehova e Iesu me kite mai raua i to tatou parataito pae vaerua manea i teia tuatau. Ko te mataora ta tatou e kite ra i teianei e iti ua te reira ki ta tatou ka kite atu a muri mai me angaanga tatou i te akariro anga i te enua ei parataito tika tikai. Ka tau tatou kia akamaara ua rai ia Maseli 14:35 te na ko ra e: “Te tavini pakari ra, te akaperepereia ra ïa e te ariki.” Kia pakari katoa tatou ia tatou e angaanga maroiroi ra i te akamanea atu i te parataito pae vaerua!