1, 2. Vovisonehua vio Heveru ondaka yokuti “ociliatelo colomãi,” yi tiamisiwila pi?

 YEHOVA SUKU wa popia hati: “Ilu ocalo cange, kuenje osi ociliatelo colomãi viange.” (Isaya 66:1) Suku wa tukulavo eci catiamẽla ‘kociliatelo colomãi’ viaye poku popia hati: “Ociliatelo colomãi viange ndi ci muisa ulamba.” (Isaya 60:13) Eye o pondola oku muisa ndati ulamba ociliatelo colomãi viaye ale oku ci posuisa? Olondaka viaco vi lomboloka nye komanu va kasi vociliatelo colomãi viaye okuti, palo posi?

² Vovisonehua vio Heveru ondaka “ociliatelo colomãi” yi tiamisiwilavo konembele va Isareli va enda oku fendelela kosimbu. (1 Asapulo 28:2; Osamo 132:7) Onembele yaco ya posokele calua ku Yehova momo ya kala ono yefendelo liocili. Ya kalavo ocitumãlo coku eca esivayo ku Yehova palo posi.

3. Koloneke vilo ono yefendelo liocili yi lomboloka nye, kuenda otembo yipi ya fetika?

³ Koloneke vilo ono yefendelo liocili yi lomboloka nye? Ka yi lomboloka onjo yimue yi kasi ndonembele. Pole, yi  lomboloka onembele yespiritu okuti yeca ulamba ku Yehova, kuenda ya velapo onjo yimue ya tungiwa. Onembele yespiritu yi lomboloka nye? Yi lomboloka esokiyo Suku a linga li ecelela omanu oco va linge akamba vaye okuti vo fendela. Tu kuatisiwa lika lesokiyo liaco omo liocisembi ca Yesu. Esokiyo liaco lia fetika kunyamo wa 29 eci Yesu a papatisiwa kuenje wa linga Ocitunda Cinene vonembele yespiritu ya Yehova.​—Va Heveru 9:11, 12.

4, 5. (a) Afendeli vocili va Yehova nye va yongola oku linga, ndomo ca sonehiwa kelivulu Liosamo 99? (b) Epulilo lipi tu sukila oku linga?

⁴ Tu eca olopandu omo liesokiyo Suku a linga liefendelo liocili. Tu lekisa olopandu vietu poku sapela lomanu ovina viatiamẽla konduko ya Yehova kuenda kombanjaile yaye yi komõhisa yocisembi. Tu kuete esanju lialua omo okuti palo posi pali eci ci pitahãla olohuluwa ecelãla Viakristão vocili va kasi oku sivaya Yehova eteke leteke! Ndaño omanu va kasi vatavo esanda va siata oku sima okuti va ka sivaya lika Suku kilu noke liolofa viavo, pole, afendeli va Yehova va kũlĩha esilivilo lioku eca esivayo kokuaye cilo palo posi.

⁵ Eci tu sivaya Yehova tu setukula ongangu yafendeli va Suku vakuekolelo ndomo ca sonehiwa kelivulu Liosamo 99:1-3, 5. (Tanga.) Alume vakuekolelo ndeci: Mose, Arone, kuenda Samuele, kosimbu va kuatisile kesokiyo Suku a lingile liatiamẽla kefendelo liocili. (Osamo 99:6, 7) Koloneke vilo, osimbu olombuavekua ka via fetikile upange wavo woku kala ovitunda kilu kumue la Kristu, vi kasi oku vumba Yehova lekolelo vonembele yaye yespiritu palo posi. Olohuluwa ‘violomeme vikuavo’ via siatavo oku va kuatisa. (Yoano 10:16) Ovimunga viaco vivali via siata oku fendelela kumuamue Yehova. Omo liaco, omunu lomunu o sukila oku li pula ndoco: ‘Nda siata hẽ oku kuatisa kesokiyo Yehova a linga liatiamẽla kefendelo liocili?’

6, 7. Ocitangi cipi ca kala pokati kekongelo liatete Liakristão vocili, kuenda nye ca pita oku upisa kunyamo wo 1919?

⁶ Osimbu ka pa pitile 100 canyamo noke yoku sokiyiwa kuekongelo Liakristão vocili, unanguluke wa fetika oku livokiya lonjanga ndomo ca popiwile. (Ovilinga 20:28-30; 2 Va Tesalonike 2:3, 4) Noke liotembo yaco ka ca lelukile oku limbuka afendeli vocili va Suku. Pole, peya oku pita anyamo alua osimbu Yehova Suku ka tumile Yesu oco a limbuke omanu va kala oku u vumba lutima wosi vonembele Yaye yespiritu.

⁷ Kunyamo wo 1919 omanu vana va taviwa la Suku okuti va kala oku u vumba vonembele yaye yespiritu va limbukiwa. Ovo va linga apongoloko oco efendelo liavo li taviwe la Yehova. (Isaya 4:2, 3; Malakiya 3:1-4) Omo liaco, ocinjonde cina upostolo Paulu a muile kosimbu ca fetika oku tẽlisiwa.

8, 9. “Ocumbo” Paulu a mola vocinjonde ci lomboloka nye?

 ⁸ Ocinjonde Paulu a kuata ca lomboluiwa vukanda 2 Va Korindo 12:1-4. (Tanga.) Vocinjonde caco, Yehova wa lekisa ku Paulu ocina cimue ca laikele oku iya kovaso yoloneke. “Ocumbo” Paulu a mola ci lomboloka nye? Catete, ci tiamisiwila kocumbo celau tu lavoka palo posi. (Luka 23:43) Cavali, ci tiamisiwila kocumbo celau ca lipua konepa yespiritu voluali luokaliye. Catatu, ci tiamisiwila kekalo li komõhisa lio kilu “vocumbo ca Suku.”​—Esituluilo 2:7.

⁹ Momo lie Paulu a popela hati, “wa yeva olondaka ka vi popaiwa, okuti omunu oku vi popia ci kola”? Momo ka ya pitĩlilepo otembo yoku lombolola ovina viosi vi komõhisa a muile vocinjonde. Pole, koloneke vilo Yehova wa tu ĩha epuluvi lioku sapuila komanu ovina viatiamẽla kasumũlũho afendeli vaye va kuete cilo!

10. Momo lie ocumbo cespiritu lonembele yespiritu ka vi kuetele elomboloko limuamue?

¹⁰ Pamue eci tu tukula ondaka ocumbo cespiritu, ci lomboloka nye? Ci lomboloka ekalo lilikasi liombembua Suku a siata oku eca kafendeli vaye. Omo liaco, ocumbo cespiritu ca litepa lonembele yespiritu. Momo, onembele yespiritu yi lomboloka esokiyo Suku a linga liatiamẽla kefendelo liocili. Pole, ocumbo cespiritu ci situlula omanu vana va taviwa la Suku okuti vo fendelela vonembele yespiritu.​—Malakiya 3:18.

11. Esumũlũho lipi tu kuete koloneke vilo?

¹¹ Tu sanjuka calua poku kũlĩha okuti, tunde kunyamo wo 1919 Yehova wa siata oku ecelela okuti omanu ka va lipuile va pamisiwa, kuenda ocumbo cespiritu camamako. Anga hẽ o kasi oku kuatisa kupange waco u komõhisa? Wa sanjukila hẽ esumũlũho lioku talavaya la Yehova oco ece esivayo kokuaye palo posi?

12. Tua kũlĩha ndati okuti olondaka vi sangiwa kelivulu lia Isaya 60:17 vi kasi oku tẽlisiwa? (Tala elitalatu kefetikilo liocipama cilo.)

¹² Uprofeto Isaya wa popele hati, vocisoko ca Yehova palo posi mua laikele oku lingiwa apongoloko alua a komõhisa. (Tanga Isaya 60:17.) Amalẽhe kumue la vana va fetika ndopo oku fendela Yehova va siata lika oku tanga ale oku yeva ovina viatiamẽla kapongoloko aco. Pole, kuli vamanji valua va kuata esumũlũho lioku mola eci kua lingiwa apongoloko aco a komõhisa! Vamanji vaco vakuekolelo va tava okuti Suku wa tuma Yesu Soma yetu oco a songuile ocisoko Caye! Eci tu yeva ovolandu a vamanji vaco ci pamisa ekolelo lietu kuenda ukamba wetu la Yehova.

13. Ndomo ca lekisiwa kelivulu Liosamo 48:12-14, nye tu sukila oku linga?

 ¹³ Akristão vosi vocili va sukila oku sapuilako omanu vakuavo ovina viatiamẽla kocisoko ca Yehova. Tu komõha calua poku limbuka okuti ndaño tu kasi voluali lulo lua vĩha lua Satana pole, tu kuete ombembua kuenda elitokeko la vamanji voluali luosi! Tu sukila oku sapuila lesanju “kocitumbulukila ci kuamamo” ovina viatiamẽla kocisoko ca Yehova, kuenda eci catiamẽla kocumbo celau konepa yespiritu!​—Tanga Osamo 48:12-14.

14, 15. Apongoloko api a lingiwa noke liunyamo wo 1970, kuenda ocisoko ca Yehova ca kuatisiwa ndati?

¹⁴ Vamanji valua va kuka va sangiwa vakongelo etu va mola apongoloko a lingiwa vocisoko ca Yehova palo posi oco camameko leposo. Ovo va ivaluka otembo akongelo a kuatele lika oñuatisi yimosi yekongelo okuti ka mua kalele ocimunga cakulu vekongelo. Handi vali, va ivalukavo eci vofeka lofeka mua kala o Betele ya enda oku songuiwa lika loñuatisi yimosi okuti, ka kua kalele ocimunga cimue cakulu va songuila o Betele yaco. Vamanji vaco va ivalukavo eci usongui wo Sociedade Torre de Vigia a ecele olonumbi okuti via sukilile oku eciwa Losungu Yolombangi Via Yehova. Ndaño okuti vamanji vaco va kuatele oloñuatisi viavo, pole, kua kala lika omunu umosi wa enda oku nõla onjila yi kuamiwa vakongelo, Kolobetele kuenda Kombala Yolombangi Via Yehova. Noke liunyamo wo 1970, kua lingiwa apongoloko akuavo okuti kua sokiyiwa ovimunga viakulu vekongelo va kuata ocikele coku nõla onjila yi kuamiwa, oco upange waco ka u ka lingiwe lika lomunu umosi.

 ¹⁵ Momo lie apongoloko aco a kuatisila ocisoko? Momo a kunamelẽle kelomboloko lia suapo Liovisonehua. Oco ka ku ka kale lika manji umosi o nõla onjila yi kuamiwa, ocisoko ca Yehova ca kuatisiwa lakulu vosi vekongelo va kuete ovituwa viwa okuti ‘olongavelo viomanu’ via eciwa la Yehova.​—Va Efeso 4:8; Olosapo 24:6.

16, 17. Apongoloko api a komõhisa a siata oku lingiwa, kuenda momo lie?

¹⁶ Sokolola apongoloko amue a lingiwa koloneke vilo atiamẽla kalivulu etu. Tua sanjukila oku kuatisa omanu loku eca alivulu etu kupange woku kunda. Sokololavo ndomo tua siata oku kuama ovoloño okaliye atiamẽla koku kunda olondaka viwa. Umue pokati kovoloño aco onumbi yetu yo jw.org okuti omanu valua va siata oku sangamo ekuatiso va sukila. Apongoloko aco a tu kuatisa oku limbuka ndomo Yehova a kapako afendeli vaye kuenda ocisola a va kuetele.

¹⁷ Tua sanjukilavo apongoloko a lingiwa kolohongele vietu, momo a tu ecelela oku kuata otembo yoku linga efendelo liepata ale elilongiso lio pokolika. Tu kuetevo esanju omo liapongoloko a lingiwa kohongele yimbo kuenda kovipama viohongele yofeka. Unyamo lunyamo olohongele viaco via siata oku lingiwa lonjila yimue okuti tu lilongisa ovina viokaliye! Tu ecavo olopandu omo liepindiso Liembimbiliya tua siata oku tambula kolosikola vietu. Apongoloko osi a lingiwa a  siata oku eca uvangi wokuti, Yehova eye o kasi oku songuila ocisoko caye kuenda o kasi oku amamako oku posuisa ocumbo celau konepa yespiritu!

18, 19. Tu pondola oku kuatisa ndati oco ocumbo celau konepa yespiritu camameko leposo?

¹⁸ Yehova wa tu ĩha esumũlũho lioku kuatisa koku posuisa ocumbo cetu celau konepa yespiritu oco camameko leposo. Pole, tu pondola oku ci linga ndati? Tu ci linga poku lekisa ombili kupange woku kunda olondaka viwa Viusoma kuenda oku longisa omanu oco va linge olondonge. Olonjanja viosi tu kuatisa omunu umue oco a linge ufendeli wa Suku ci lekisa okuti tu kasi oku kuatisa kocumbo celau konepa yespiritu oco camameko.​—Isaya 26:15; 54:2.

¹⁹ Tu kuatisavo keposo liocumbo celau konepa yespiritu, eci tu likolisilako oku lekisa ovituwa viwa Viakristão vocili. Nda tua ci linga, ci vetiya omanu oku lekisa onjongole kocumbo caco celau konepa yespiritu. Ukũlĩhĩso wetu Wembimbiliya hawoko lika u vetiya omanu, pole ovituwa vietu viwa lombembua tu kuete vi va kuatisavo oku iñila vocisoko oco va kuate ukamba la Yehova kuenda la Yesu.

20. Nye tu sukila oku linga ndomo ca lekisiwa kelivulu Liolosapo 14:35?

²⁰ Yehova kumue la Yesu va siata oku sanjuka calua poku mola ndomo ocumbo cetu celau konepa yespiritu ci kasi oku amamako leposo koloneke vilo. Esanju tu kuete cilo omo lioku posuisa ocumbo caco li eca uvangi wesanju tu ka kuata eci tu ka linga upange woku pongolola ongongo yosi oco yi linge yokaliye. Tu sukila oku ivaluka olondaka vielivulu Liolosapo 14:35 li popia ndoco: “Ukuenje ukualondunge o soliwa losoma.” Omo liaco, tu amamiko oku lekisa olondunge osimbu tu linga upange woku posuisa ocumbo celau konepa yespiritu!