1. ¿Kasa alataka Jerusalén soʼu juyakat 66? (Piirakaa sümüin tü ayaakuaakat.)

SOʼU juyakat 66 aʼluwajünüsü wainma nneerü suluʼujee tü aʼwaajüleekat Maleiwa chajatka Jerusalén. Chi aʼluwajakai tia nneetkat nia Floro, wanee shikiipüʼü surulaat roomajeʼewai. Jashichishii na judíokana saaʼujee tia, noʼutaka saaʼin watta saalii surulaat roomajeʼewalii. Shiasaʼa sutuma neʼrüliijaain wayumüin na judíokana, aluwataanüshii 30.000 surulaat süpüla nashutüinjanain saaʼu Jerusalén. Nümaajatüirua Cestio Galo tü surulaatkalüirua, chia nia wanee aluwataai chejeʼewaikai Roma. Ounjulaashii na judío eʼrüliikana wayumüin suluʼu tü aʼwaajüleekat. Nantapaataka na surulaatkana eemüin tü süsepükat tü pueulokot. Mmotchaanasü maʼin wayuu suʼunnaa tia. ¿Jamüsüjeʼe paaʼin chale pia chaa Jerusalén suʼunnaa tia?

2. (1) ¿Kasa naaʼinrajatka na nikirajüinkana Jesuu neʼrapa suukajünüin tü pueulokot Jerusalén natuma na surulaatkana? (2) ¿Jamüsü sukuwaʼipa süpüla naʼluwataain Jerusalénjee?

² Nüküjatüjülia Jesuu namüin na nikirajüinkana tü alatajatkat mapeena. Anuu nünüiki namüin: «Jiʼrapa suukajünüin tü pueulokot Jerusalén sutuma tü surulaatkalüirua, jütüjaajeerü aaʼu sünain sülüʼülüin süpüla sajaʼttinnüin. Na wayuu chakana Judea aʼluwataainjana saʼakamüin tü uuchikat jee na chakana Jerusalén aʼluwataainjana naya chejee» (Luc. 21:20, 21, TNM). ¿Kasa naainjüinjatka na  nikirajüinkana Jesuu süpüla naʼluwataainjanain? Nüküjatüjülia Jesuu namüin na nikirajüinkana naawalaainjanain na surulaatkana suulia ashutaa saaʼu wayuu chajatkat Jerusalén (Mat. 24:22). Soʼu wanee kaʼi, oʼunajaashii na romaanokana Jerusalénjee. Aʼluwataashiijeseʼe na nikirajüinkana Jesuu saʼakamüin tü uuchikat, oonooshii naya sümaa tü nümakat Jesuu namüin. * Soʼu juyakat 70, aleʼejüshii nachikuaʼa na romaanokana otta najaʼlajeʼerüin tü pueulokot Jerusalén sümaʼaleʼeya tü wayuuirua chajatkat napüla. Nayaʼala neʼe oʼttaakana na oonookana sümaa nünüiki Jesuu.

3. (1) ¿Kasa tü alateetkat soʼu palit kaʼi? (2) ¿Kasa wekirajaainjatka anain sünain ekirajaayakat tüü?

³ Alüʼütsü maʼin süpüla suʼttüin tü müliaa miyoʼusükat. Tia meemateerü aka saaʼin tü alatakat chaa Jerusalén. Antalaa meerü neʼe tia müliaakat. Tü nümakat Jesuu namüin na nikirajüinkana süchiki tü alatajatkat chaa Jerusalén jee tü naaʼinrajatkat süpüla noʼttaainjanain, sünainpünaasü tü alatajatkat maaʼutpünaa yaa (Mat. 24:3, 21, 29). Na nikirajüinkana Jesuu oonookana nümaa, oʼttaashii wanaa sümaa sajaʼlajeʼennüin Jerusalén. Akaʼaya najaʼlajeʼerapa Maleiwa tü kasa nuluwataakalü aaʼu Satanaa, watteena naalii na wayuu oʼttaajeenakana (paashajeʼera Alateetkat Mapeena 7:9, 13, 14). Müleka woʼttaweere süchikijee tü müliaa antajatkat, acheküsü watüjaainjatüin saaʼu jamüin sünüiki tü Wiwüliakat süchiki tia alatajatkat. Sünain ekirajaayakat tüü, wekirajaweerü anain tü alatajatkat soʼu palit kaʼi jee müsia wekirajaweerü anain tü waaʼinrajatkat.

4. ¿Joujeerü suʼttaka tü müliaa miyoʼusükat?

⁴ Soʼuleʼeya tü kaʼi sajaʼlajeʼennüinjatkalü oʼu tü iküleesiairua nnojotkat shiimain, oʼtteerü yalejee tü müliaa miyoʼusükat. Sünülia süpüshuaʼa tia iküleesiakalüirua sutuma tü Wiwüliakat shia «Babilonia, tü pueulo kojutkat sütüma wayuu, tü shiikat süpüshua wayuu maaʼinsat» (Alat. Map. 17:5-7). ¿Jamüsü «wayuu maaʼinsat» sümaka tü Wiwüliakat sümüin tia iküleesiakalüirua? Shia süka nnojoluin jüüjüüin nümüin Maleiwa na shikiipüʼükana tia iküleesiakalüirua. Nnojoliishii naya nümaain Jesuu jee nnojotsü kasajatüin namüin tü Nuluwataayakat, naya neʼe naʼyataajiraakana amaa na aluwataaliikana sainküin mmakat. Akaʼaya naya, nayouktüin wainma kasa shikirajaka anain tü Wiwüliakat shiiʼiree kapülainjanain naya saaʼin wayuu. Nnojotsü wulein nakuwaʼipa noʼuluʼu Maleiwa na shikiipüʼükana tü iküleesiairua nnojotkat shiimain. Aluʼujasaʼa na anoujashii chainjanakana chaa iipünaa, wulesü nakuwaʼipa noʼuluʼu Maleiwa (2 Cor. 11:2; Sant. 1:27, TNM; Alat. Map. 14:4). ¿Jaratka ajaʼlajeʼerüinjatüin tü iküleesiairua nnojotkat shiimain? Saashin tü Wiwüliakat, shieerü tü poloosükat nuʼuwa wanee «wanülüü ishotoi». Chia wanülüükai shia tü Naciones Unidas münakat. Jee müsia tü poloosükat nuʼuwa chia wanülüükai, naya na aluwataaliikana sainküin mma sümaakana tü Naciones Unidas münakat. Saashin tü Wiwüliakat, niʼitaajeerü Jeʼwaa suluʼu naaʼin naya aluwataaliikana süpüla najaʼlajeʼerüinjatüin tü iküleesiairua nnojotkat shiimain (paashajeʼera Alateetkat Mapeena 17:3, 16-18).

5, 6. ¿Jamüsü watüjaaka saaʼu nnojoleenain ouktüin napüshuaʼa na suluʼukana tü iküleesiairua nnojotkat shiimain nashutünapa aaʼu?

⁵ Sushutünapa aaʼu tü iküleesia nnojotkat shiimain, ¿ajaʼlajeʼenneenache eera napüshuaʼa na suluʼukana? Nnojo, nnojoleena ajaʼlajeʼennüin napüshuaʼa. Saashin tü Wiwüliakat, «nnojoishiisa waya namaain na wayuu suluʼukana tü iküleesia nnojotkat shiimain», meerü nanüiki noʼutku na shikiipüʼükana tü iküleesia nnojotkat shiimain. Shia nümaka Zacarías nüchiki wanee wayuu suluʼukai tü iküleesia nnojotkat shiimain. Anuu nünüiki chia wayuukai naashin Zacarías: «‹Nnojoishi taya nünüikimaajachin Maleiwa. Wayuu apünajüi neʼe taya. Ayaʼlajuushi taya jimaʼaliiwaʼaya taya›, meechi nia. ‹¿Jamüsü eʼikaajaka puʼluuwain sümaa püsapü?›, wameenaka nümüin. Nusoukteechikalaka sünain maa: ‹Naya kasitka taya na taʼaleewainkana›» (Zac. 13:4-6, TNM).

⁶  ¿Jameetche sukuwaʼipa nupueulose Maleiwa sushutünapa aaʼu tü iküleesiairua nnojotkat shiimain? Anuu nünüiki Jesuu süchiki tia: «Müleka nnojoruleje saawalaain tü müliaakat, ajaʼlajaweerü wayuu süpüshua sütüma. Akatsa naawaleʼereerüin shia Maleiwa naaʼujee na aneekuushikana nütüma» (Mat. 24:22). Wanaa sümaa sushutünüin aaʼu Jerusalén, naawaleʼerüin Jeʼwaa tia alatakat chayaa. Müshiijeseʼe naʼluwataain suʼunnaa tia na anoujashii «aneekuushikana» nutuma Jeʼwaa. Müinjatü sukuwaʼipa suʼunnaa tü müliaa miyoʼusükat, naawaleʼereerü Jeʼwaa tü müliaakat süpüla nnojoliinjanain najaʼlajeʼennüin na «aneekuushikana» nutuma. Jimatuuijetkalaka tü mmapaʼakat motsomüin neʼe sutuma naawaleʼereerüin Jeʼwaa tü müliaakat.

7, 8. (1) ¿Kasa waaʼinrajatka naawaleʼerapa Jeʼwaa tü müliaakat? (2) ¿Jamüsü waneejateetka wakuwaʼipa noulia na wanee wayuukana?

⁷ ¿Kaseerü alataka naawaleʼerapa Jeʼwaa tü müliaakat? Weeʼiyatüinjatü sünain shiimain alin wapüla Jeʼwaa. Watteena naalii wayuu achunteenaka kaaliinwaa sümüin «tü ipakalüirua». Tia shia tü organizaciones eekat sainküin mmakat (Alat. Map. 6:15-17). Aluʼujasaʼa wayakana, nieechi wachuntaka amüin kaaliinwaa Jeʼwaa. Suʼunnaa tia, nnojoleerü anoujayaa müin wayuu nünain Jeʼwaa. Majatüinka chaa Jerusalén, nnojoishii anoujayaa müin na judíokana suʼunnaa naawaleʼerüin Jeʼwaa tü müliaakat. Nayaʼala neʼe oonookana nümaa Jesuu na anoujatüjüliikana süpülapünaa tia müliaakat. Akaweeria neʼe sukuwaʼipa naawaleʼerapa Jeʼwaa tü müliaa miyoʼusükat. Soʼu tia, weeʼiyatüinjatü sükajee tü waaʼinrakat sünain alin Jeʼwaa wapüla jee namaain waya na nuwalayuukana Kürisüto (Mat. 25:34-40).

⁸ ¿Jameetche wakuwaʼipa soʼu kaʼikat tia? Nnojotsü maʼin watüjaain aaʼu jameerüin wakuwaʼipa soʼu tia. Eesüjaʼa süpüla kapüleejeerüin wousütüin sünain tü choʼujaakat wamüin jee shiale wooʼulaain tü kasa wamaʼanakat. Jamüshiijaʼa na anoujashii chajanakana Jerusalén, napütüin nepia otta alatitshii naya müliaa shiiʼiree noʼttaainjanain (Mar. 13:15-18). Anashii wasakireʼerüle waaʼin: «¿Iseetche taaʼin süchiirua tapütüin süpüshuaʼa tü korolo tamaʼanakat? ¿Taaʼinreetche eekai eein süpüla ayatüinjachin taya waneepiain nümaa Jeʼwaa?». Suʼunnaa tia, waneejateerü wakuwaʼipa noulia na wayuukana, süka jamüin, wayaʼaleenain neʼe aʼwaajaka Jeʼwaa. Waainjeerü tia jaʼitairü kasain maʼin alatüin maʼaka naainjüin shia Daniel (Dan. 6:10, 11).

9, 10. (1) ¿Kasa pütchi waküjeetka suʼunnaa tü müliaa miyoʼusükat? (2) ¿Kaseerü naainjaka na waʼünüükana waküjapa tia pütchikat namüin?

⁹ Suʼunnaa tü müliaa miyoʼusükat, nnojoleena waya aküjüin tü pütchi anasükat süchiki Nuluwataaya Maleiwa. Soʼu tia, ojoʼloojeena waya suulia tia aʼyatawaakat, süka jamüin, sünteerüin «sükalia sajaʼlajaainjatkat oʼu tü kasakat süpüshua» (Mat. 24:14). Shieerü waküjaka kasalajanainjatüin saainjala wayuu süpüshuaʼa sümüin. Eesüjaʼa shieerüle waküjüin sülüʼülüin sükalia süpüla sajaʼlajeʼennüin süpüshuaʼa tü kasa nuluwataakalü aaʼu Satanaa. Saashin tü Wiwüliakat, tia pütchi aküjüneetkat sümüin wayuu meerü aka saaʼin juya eekai kayeeloin süka aijeerüin shia namüin. Otta müsia airuʼuleerü sünüiki wayuu nümüin Maleiwa saaʼujee tia (Alat. Map. 16:21).

¹⁰ ¿Kaseerü naainjaka na waʼünüükana waküjapa tia pütchikat namüin? Oonooinjana shikiira nupueulose Maleiwa wanee sülaülashii mma otta na namaajanakana süpüla nashutüinjanain saaʼu. Gog chi chejeʼewaikai Magog nanülia naya wayuukana saashin tü Wiwüliakat. Anuu tü naainjüinjatkat Gog naashin Ezequiel: «Ashuteechi taya saaʼu tü mma eere eein pueuloirua maaʼinmajuukat, eere nnojoluin eein kasachiki, eere masepüin tü pueulokot, mapujeʼeyain supuettoʼuse jee mapuettoʼusein shia». Naashin Ezequiel, ashuteejeerü naaʼin Gog naaʼu na aʼyataashiikana nümüin Maleiwa saaʼu niʼrüin sainküinjeejanain naya mmakat süpüshuaʼa, wainmain korolo namaʼana jee müsia kepiain naya «pasanain sünain tü mmakat» (Ezeq. 38:10-12, TNM). Wanaa sümaa süküjüin  tü Wiwüliakat kepieenain na aʼyataashiikana nümüin Maleiwa «pasanain sünain tü mmakat», shia süküjeeka achiki neʼreerüin na wayuukana naatain nakuwaʼipa na aʼyataashiikana nümüin Maleiwa. Müshijeseʼe nushuteechin Gog naaʼu na anoujashii chainjanakana chaa iipünaa jee na aʼyataajiraakana namaa.

11. (1) ¿Kaseetche ekeraajaka palajana suʼunnaa tü müliaa miyoʼusükat? (2) ¿Jameerü naaʼin na nüʼünüükana Maleiwa neʼrapa tü alatajatkat «eejee chi kaʼikai, chi kashikai, je tü jolotsükalüirua süpüshua»?

¹¹ ¿Kaseetka alatüin süchikijee tia? Wainma kasa alatajatka saashin tü Wiwüliakat, nnojotpejeʼe süküjüin jaralüin alatajatüin palajana. Eesüjaʼa süpüla süntajaain uatuwoʼushi süpüshuaʼa tü süküjakat tü Wiwüliakat. Anuu nünüiki Jesuu süchiki tü alatajatkat: «Eeʼiyataajeerü tü shiyaawasekalüirua eejee chi kaʼikai, chi kashikai, je tü jolotsükalüirua süpüshua, süpüla sütüjaainjatüin saaʼu wayuu sünain teitaain. Ojunuwaajeerü tü jolotsükolüirua iipünaajee. Otta yaa mmoluʼu, koʼlotüinjeerü maʼi tü palaakat sümaa koʼontüin shia. Ayoʼujaajeerü saaʼin wayuu süpüshua sütüma, süka nnojolüin sütüjaain saaʼu tü oʼotaainjatkat yaa saaʼu mmakat. Otta soʼuweena kaʼikat tia, shiʼreechi taya wayuu, tayakai, chi Shipayakai Wayuu, sünain antaa saʼaka wane siruma. Anashaateerü maʼi tü tantiakat, süka tanteechin sünain pülashin je sünain eʼitaaushin nütüma Maleiwa süpüla aluwatawaa wanaa nümaa» (Luc. 21:25-27; paashajeʼera Marcos 13:24-26). ¿Shiʼreetche wayuu tü eeʼiyataainjatkat «eejee chi kaʼikai, chi kashikai, je tü jolotsükalüirua süpüshua»? Weʼreerüjaʼa neʼe kasain alatüin süntapa sükalia süpüla shikeraajüin tia. Tü watüjaakalü aaʼu shia shiyoʼujaajeerüin naaʼin na nüʼünüükana Maleiwa sutuma tü alatajatkat suʼunnaa tia.

12, 13. (1) ¿Kaseerü naainjaka Jesuu nüntapa «sünain pülashin» nia? (2) ¿Kaseerü naainjaka na aʼyataashiikana nümüin Maleiwa soʼu tia?

¹² ¿Kaseerü naainjaka Jesuu nüntapa «sünain pülashin» nia? Aneena nutuma na waneepiakana nümaa Maleiwa jee süsaleena nutuma na nnojoliikana waneepiain nümaa Maleiwa (Mat. 24:46, 47, 50, 51; 25:19, 28-30). Anuu nünüiki Jesuu süchiki  tia: «Soʼuweena tü kaʼi tanteetkat oʼu tayakai, chi Shipayakai Wayuu, sümaa eeinjanain napüshua na aapieekana tamaa, je sünain eʼitaaushin taya nütüma Maleiwa süpüla aluwatawaa wanaa nümaa [...], okotchojüneerü tamülatuʼumüin wayuu süpüshua sainküinjee mmakat süpüshua. Takatajeena na wayuukana maa aka nütüma wane anneetpüʼü sünain nükatajüin tü anneetkalüirua suulia tü kaaʼulakalüirua. Na wayuu eekai naaʼinrapüʼüin tü nüchekakat chi Maleiwakai napüleerua, takataleena naya yaa tekialuʼujee. Otta mushiʼiya na eekai nayouktapüʼüin tü nüchekakat chi Maleiwakai napüleerua, takataleena naya yaa tepeʼeruʼujee» (Mat. 25:31-33). Niainjachi Jesuu aküjaka jaralüin müin akuwaʼipa maʼaka saaʼin kaaʼula otta jaralüin müin akuwaʼipa maʼaka saaʼin anneerü. Jamüshiijaʼa na nnojoliikana waneepiain nümaa Maleiwa, najaʼlajeʼerüinjana naya Jesuu süka müin aka saaʼin kaaʼula. Jee müshiʼiya na waneepiakana nümaa Maleiwa, nuuʼulaajeena katüin noʼu waneepia süka müin aka saaʼin anneerü (Mat. 25:46, TNM).

¹³ Natüjaapa saaʼu na wayuu makana aka saaʼin kaaʼula sünain najaʼlajeʼennüinjanain «aʼwaateena naya» süka mmoleenain naya saashin tü Wiwüliakat (Mat. 24:30). ¿Jama na anoujashii chainjanakana chaa iipünaa jee na yaainjanakana yaa mmapaʼa? ¿Kaseerü naainjaka soʼu tia? Shieerü naainjaka tü nümakat Jesuu: «Anakaja eejeerüle jaaʼin sünain taleʼejüinjachin. Nnojolumaateerü mojuin jaaʼin, süka taashimaateenain jia» (Luc. 21:28).

14, 15. (1) ¿Kasa alatajatka nushutapa Gog chi chejeʼewaikai Magog saaʼu nupueulose Maleiwa? (2) ¿Jamaluʼulu nükotchojüinjanain Jesuu na aneekuushiikana?

¹⁴ ¿Kasa alatajatka nushutapa Gog chi chejeʼewaikai Magog saaʼu nupueulose Maleiwa? Saashin tü Wiwüliakat, nüjüteena Jesuu «na aapiee nümaʼanajeejanakana Maleiwa süpüla nakotchajüinjatüin tü wayuu aneekuushikalüirua nütüma sainküinjee tü mmakat süpüshuaʼale» (Mar. 13:27; Mat. 24:31). Soʼu kaʼikat tia, nnojoishii aneekünüinjanain waneeinnua anoujashii süpüla chainjanain naya chaa iipünaa. Jee müsia nnojotsü eʼitaanüinjatüin nejeetse na anoujashii chainjanakana chaa iipünaa soʼu kaʼikat tia, süka jamüin, kettaatüjülinkain paala nejeetse naya anoujashiikana süpülapünaachon süntüin tü müliaa miyoʼusükat (Mat. 13:37, 38; Alat. Map. 7:1-4). ¿Jamaluʼulu nükotchojüinjanain Jesuu na aneekuushiikana? Tü süküjeekat tü Wiwüliakat shia aneerüin nakuwaʼipa nutuma Jesuu naya anoujashiikana jee nümaajeena chaa iipünaa na yaajeenakana yaa Mmapaʼa soʼu tia (1 Tes. 4:15-17; Alat. Map. 14:1). Ekeraajeerü tüü nushutapa Gog chi chejeʼewaikai Magog saaʼu nupueulose Jeʼwaa (Ezeq. 38:11). «Soʼuweena kaʼikat tia, suluʼu nuluwataaya chi Nashikai, kawaraleena maʼin na lotushiikana akuwaʼipaa maʼaka naaʼin chi kaʼikai», müshi Jesuu nachiki naya anoujashiikana (Mat. 13:43). *

¹⁵ Naashin noʼutku na wayuukana, neʼrüinjachi Jesuu nüleʼejapa nüchikuaʼa sünain wayuuin nia süpüla aluwatawaa saaʼu tü Mmakat. Naashin nayakana, nümaainjana naya Jesuu chaa iipünaamüin. ¿Müinjatchejeʼeya nakuwaʼipa na aneekuushiikana yaajeenaka yaa Mmapaʼa suʼunnaa tü müliaa miyoʼusükat? Nnojo, nnojoleerü müin nakuwaʼipa. Saashin tü Wiwüliakat, anteechi Jesuu suluʼu meʼrujuin nia jee müsia eʼnneerü chaa sirumatuʼu wanee kasa atüjaaneetkat atuma saaʼu sünain nüntamaateechin «chi Shipayakai Wayuu» (Mat. 24:30). Saashin tü Wiwüliakat, eeʼiranajaainjatü nakuwaʼipa na anoujashii chainjanakana chaa iipünaa süpüla ayatüinjanain nümaa «chi Maleiwakai waneepia chaa eere nuluwataain». Süküjüin tü Wiwüliakat shiiʼiranajaa sümeerüin nakuwaʼipa naapapa «shiʼira wane jontoroyoi chajee iipünaajee» (paashajeʼera 1 Corinto 15:50-53). * Na aneekuushii yaajeenakana yaa  Mmapaʼa suʼunnaa tü müliaa miyoʼusükat, amaanamaateena naya chaa iipünaamüin suluʼu meʼrujuin naya.

16, 17. ¿Kasa alatajatka süpülapünaa saainjünüin «tü miʼiraa shikiirakat kaʼwayuusein chi Anneetchonkai»?

¹⁶ Kottapa na 144.000 anoujashiikana chaa iipünaa, ¿aainjüneetche «tü miʼiraa shikiirakat kaʼwayuusein chi Anneetchonkai»? (Alat. Map. 19:9). Nnojo, nnojoleerü aainjünüin, süka jamüin, sülatajatüin waneeirua kasa süpülapünaa tia. Nushutapa Gog saaʼu nupueulose Maleiwa, eejeena noʼuluku na anoujashii chainjanakana chaa iipünaa yaa Mmapaʼa (Ezeq. 38:16). ¿Kasaka waaʼinrüinjatüin nushutapa Gog? Anuu sünüiki tü Wiwüliakat: «Nnojoliinjana jia atkaain suʼunnaa tia. Jüchajaainjatü süchiki eeinjanale jia, jimatüinjana neʼe jia yala otta jiʼreerü tü naaʼinrajatkat Jeʼwaa süpüla nuʼtteʼerüinjanain jia [...]. Nnojo mmoluin jia jee nnojo jiyoʼujaain aaʼin» (2 Crón. 20:17, TNM). Suʼunnaa nushutüin Gog, amaaneena chaa iipünaamüin na aneekuushiikana yaajeenaka yaa Mmapaʼa. ¿Kaseetka alatüin süchikijee tia? Saashin tü Wiwüliakat, na süʼünüükana nupueulose Maleiwa atkaajeena nümaa chi Anneetchonkai, akanasaʼa nüyamüleenain naya. Akaʼaya «na eenakuushiikana, na aneekuushiikana, na waneepiakana nümaa Maleiwa», eejeena nümaa chi Anneetchonkai sünain ayamülaa na süʼünüükana nupueulose Maleiwa (Alat. Map. 17:14, TNM). Jesuu namaa na 144.000 anoujashii aluwataainjanaka nümaa chaa iipünaa, nayeena oʼtteʼerakana nupueulose Maleiwa yaaka yaa Mmapaʼa.

¹⁷ Kojuteerü maʼin nünülia Jeʼwaa sükajee tü atkawaa kanüliakat Armagedón (Alat. Map. 16:16). Soʼu tia, ajaʼttinneena na makana aka saaʼin kaaʼula, ajaʼttinneerü tü kasa mojusükat sainküinjee Mmakat süpüshuaʼa jee müsia oʼttaajeena na wattakana naalii wayuu. Shiasaʼa süchikijee Armagedón, ekeraajeerü tü sümakat tü karalouktakat Alateetkat Mapeena, aainjüneerü «tü miʼiraa shikiirakat kaʼwayuusein chi Anneetchonkai» (Alat. Map. 21:1-4). * Aijeena nüpüla Jeʼwaa napüshuaʼa na wayuu yaajeenakana apütaain süpaʼa tü Mmakat jee wainmeerü kasa anasü naapaka namüin. Waʼatapajashaanain maʼin kaʼikat tia süka aneerüin maʼin shia (paashajeʼera 2 Pedro 3:13, TNM).

18. Sutuma watüjaaitpain saaʼu tü alatajatkat soʼu palit kaʼi, ¿kasa waaʼinrüinjatka?

¹⁸ Sutuma watüjaaitpain saaʼu tü alatajatkat soʼu palit kaʼi, ¿kasa waaʼinrüinjatka? Nüküjüin chi aluwataaushikai Pedro tü wakuwaʼipainjatkat. Naashin niakai, wuleinjatü wakuwaʼipa, alinjachi wapüla Jeʼwaa sümaa waneepiainjanain waya nümaa jee müsia nnojotsü motuinjatüin waaʼin choʼujaʼalaain neʼe palit kaʼi süpüla tü nükaliakat Jeʼwaa. Anuu sooʼomüin nünüiki Pedro: «Tatünajutüirua, jia aishiikana tapüla, saaʼu eein jaaʼin sünain jaʼatapajüin tü kaʼi nüleʼejüinjatkat oʼu Cristo, anakaja müleka kachiiruale jaaʼin sünain wuleinjatüin jaaʼin sümaa lotüinjatüin jukuaippa noʼuluʼu Maleiwa sümaa wanaawajiraain jaaʼin nümaa» (2 Ped. 3:11, 12, 14). Waʼwaajeein Jeʼwaa sümaa wulein wanoula jee müsia aʼyataajiraainjana waya waneepia nümaa Jesuu, chi aluwataai eekai atuma anaa.