1. C.E. 66-ah eng thil nge thleng? (A thupui chunga milem en rawh.)

C.E. 66-a Jerusalem-a awm Kristian pakhat angah han inchan teh. Thil tam tak a thleng a. Rom mi lian Florus-a chuan biak in sum talent 17 chu a ru a. Juda mite thin a thawk ta thut a. Rom sipai tam tak an that a, Rom-ho lakah zalênna an puang a ni. Rom chuan rang takin a bei lêt nghâl a. Thla thum pawh a liam hmain, Cestius Gallus-a hruai sipai 30,000 chuan Jerusalem chu an hual a. Juda helte chuan biak in kulh chu inhumhim nân an hmang a; mahse, Rom sipaite chuan a tâwpah biak in bang pâwn ta zâwk chu thlengin tihchhiat an tum ta a ni. Khawpui chhûnga awm zawng zawngte chu an thlabâr ta hle a. Hêng thilthleng zawng zawngte i hmuh chuan engtin nge i awm ang?

2. Rom sipaite’n khawipui an hualvêl an hmuh hun chuan Kristiante chuan eng nge an tih ngai a, engtin nge chutianga an tih theih?

² Kum tam tak kalta khân, Isua’n hêng thilthleng tûrte chungchângah a zirtîrte chu vaukhânin, kaihhruaina a pe a ni: “Sipaihoten Jerusalem khua an hual in hmuh hunah, a boral dâwn tih hria ang che u. Chutih hunah chuan Judai rama awmte chu tlângahte tlân bo rawh se; a chhûnga awmte chuan chhuahsan rawh se; rama  awmte chu a chhûngah lût suh se,” tiin. (Luka 21:20, 21) Sipaihote’n khawpui an hual laiin engtin nge Jerusalem chhuahsan tûra Isua kaihhruaina chu an zawm theih ang? Thilmak tak a thleng ta. Rom sipaite chu Jerusalem ata an kîr ta thut mai le! Isua sawi angin, beihna hun chu “tihtawi” a ni ta a. (Matthaia 24:22) Sipaite an kîr leh chuan, Kristian rinawmte tân hmanhmawh taka tlângahte tlân chhiaa Isua thusawi zawm theihna hun remchâng a inhawng a. * (Footnote en rawh.) A hnu, C.E. 70-ah Rom sipai dangte chu Jerusalem-ah rawn kîrlehin, khawpui chu an tichhe ta a. Mahse, Isua kaihhruaina zâwmtute chu an dam khawchhuak vek a ni.

3. Eng ang dinhmunah nge Kristiante chu an la awm ang a, he thuziakah hian eng nge kan sawiho vang?

³ Isua vaukhânna leh kaihhruaina chu kan tûn lai hun tân pawh a ni. Nakin lawkah chuan, chutiang dinhmunah kan la awm dâwn si a. Isua chuan kum zabi khatnaa thilthlengte chu “hrehawm nasa tak” a inṭan thut huna thil lo thleng tûrte hrilhfiah nân a hmang a. (Matthaia 24:3, 21, 29) Jerusalem tihchhiatnaa Kristian dam khawchhuak an awm ang bawkin, lo thleng tûr khawvêl pum huap chhiatnaah chuan “mipui tam tak” chu an dam khawchhuak ang. (Thu Puan 7:9, 13, 14 chhiar rawh.) Hêng nakin huna thil lo thleng tûrte chungchâng Bible sawite hriatthiam chu kan tân a pawimawh hle. Engvângin nge? Kan nun chu, chu mi kan hriatthiamnaah a innghah avângin. Chuvângin, hêng thilthleng tûrte’n a mi mal taka min nghawng theih dân chu ilo sawiho vang u.

4. Engtin nge hrehawm nasa tak chu a inṭan ang?

⁴ Engtin nge hrehawm nasa tak chu a inṭan ang? Sakhaw dik lo zawng zawngte tihchhiatna hmangin a inṭan ang a. Bible chuan sakhaw dik lo chu ‘Babulon Khaw ropui, nawhchizuarte nu,’ tiin a ko va. (Thu Puan 17:5-7) Engvângin nge sakhaw dik lo chu nawhchizuar tia koh a nih? A hruaitute Pathian chunga an rinawm loh vâng a ni. Isua leh a Lalram rinawm taka thlâwp aiin, thu neihna an chan lehzual theih nân mihring sawrkârte chu an thlâwp a, Bible zirtîrnate chu an pawisa lo. An Pathian biakna chu hriak thihte biakna thianghlim ang a ni ve lo. (2 Korinth 11:2; Jakoba 1:27; Thu Puan 14:4) Mahse, Babulon Khaw Ropui chu tuin nge tiboral ang? Jehova chuan “sakawlh sen tak” ‘ki sâwm nei’ chu ‘a duhzâwng tihna tûrin’ a hmang ang. “Sakawlh sen tak” chuan United Nations a entîr a, “ki sâwm” chuan a thlâwptu ramte a entîr bawk.—Thu Puan 17:3, 16-18 chhiar rawh.

5, 6. Engvângin nge Babulon Khaw Ropui tihchhiatnaah a mite zawng zawng tihboral an ni dâwn lo tih kan sawi theih?

⁵ Babulon Khaw Ropui tihchhiat a nih hunah sakhaw dik lo vuantu zawng zawngte chu tihboral vek an ni ang em? Ni lo vang. Jehova chuan zâwlnei Zakaria chu, chu mi huna thilthleng tûrte ziak tûrin a thâwk khum a. Chutih hunah chuan, sakhaw dik lo zînga tel tuemaw chuan heti hian a sawi ang: “Zâwlnei ka ni lo va, hlo thlo mi ka ni e, ka tleirâwl tirh ata bâwiha siam ka ni si a, a ti zâwk ang. Tin, mi tuin emaw a hnênah, i bân inkâra hliamte hi eng nge ni? a ti ang a, tin, anin, hêngte hi chu, ka ṭhiante ina ka hliam a nih hi, tiin a chhâng ang,” tiin. (Zakaria 13:4-6) Chuvângin, sakhaw hruaitute pawh sakhuaa inhnamhnawih lo ang leh sakhaw dik lo zînga tel ve lo angin an insawi dâwn a ni.

⁶ Chu mi hunah chuan Pathian mite chungah eng nge thleng ang? Isua chuan: “Tin, chûng nite chu tihtawi ni suh sela mihring rêng rêng damin an chhuak lo vang; nimahsela, thlante avâng chuan chûng nîte chu tihtawi a ni ang,” tiin a sawi. (Matthaia 24:22) Kum zabi khatnaah khân, Jerusalema hrehawm nasa tak  rei zâwng chu “tihtawi” a ni a. Hei hian “thlante,” hriak thih Kristiante tân tlân chhuahna hun a pe a ni. Chutiang bawkin, hrehawm nasa tak hmasa lam chu “thlante” avângin “tihtawi” a ni ang. ‘Ki sâwmin’ a entîr ramte’n Pathian mite a tihboral chu phal a ni lo vang a. Beihna a inṭan hnu lawkah rei lo te chhûng hun muanawm a lo awm ang.

7, 8. Sakhaw dik lo tihchhiat a nih hnuah eng hun remchâng nge awm ang a, chu mi hunah chuan engtin nge Pathian mite chu mi dangte laka an danglam ang?

⁷ Sakhaw dik lo tihboral a nih hnuah eng thil nge lo thleng ang? Chu chu kan rilrua thil awm dik tak târ lan theihna hun a ni ang. Chu mi hunah chuan, mi tam zâwkte chuan mihring inawpna pâwl, “tlângte leh lungpuite” hnênah vênhimna leh ṭanpuina an zawng dâwn a ni. (Thu Puan 6:15-17) Mahse, Jehova mite chuan a vênhimna an beisei ang. Kum zabi khatnaa beihna hun “tihtawi” a nih khân, Juda mi zawng zawngte chu vawilehkhatah Kristianah an inlet lo. Chu aimah chuan, Isua kaihhruaina pêk angin, Kristian lo ni tawhsate tân Jerusalem chhuahsan hun a ni. Chutiang bawkin, kan hmaa lo thleng tûr Babulon Khaw Ropui beihna “tihtawi” a nih hunah, mi tam tak chu vawilehkhata Kristian dika inlet tûrin kan beisei thei lo vang. Chu ai mahin, chu hun chu Pathian betu dik zawng zawngte tân Jehova an hmangaihzia leh hriak thihte an thlâwpzia târ lan theihna hun remchâng a ni zâwk ang.—Matthaia 25:34-40.

⁸ Chu fiahna hun chhûngin eng nge lo thleng dâwn tih kan hre chiang thei lo va. Mahse, nun chu a awlsam lo vang a, hrehawm tawrh pawh kan beisei thei a ni. Kum zabi khatnaah khân, Kristiante chuan an inte chhuahsanin, an dam khawchhuah nân harsatnate chu chhel takin an tuar a. (Marka 13:15-18) Heti hian kan inzâwt tûr a ni: ‘Tîsa lam thilte chân ka inhuam em? Jehova chunga rinawm reng tûrin a ṭûl ang apiang tih ka inhuam em?’ tiin. Han ngaihtuah teh! Chu mi hunah chuan, eng thil pawh thleng se, keini chauh hi zâwlnei Daniela anga Pathian betu kan ni ang.—Daniela 6:10, 11.

9, 10. (a) Hrehawm nasa tak chhûngin Pathian mite chuan eng thuchah nge an puan ang? (b) Engtin nge Pathian mite hmêlmate chuan an chhân lêt ang?

⁹ Hrehawm nasa tak chu “Ram chanchin ṭha” hrilhna hun a ni lo vang. Chu hunah chuan thu hrilhna a tâwp tawh ang a. “Tâwpna” lo thlen hun a ni ang! (Matthaia 24:14) Pathian mite chuan mi zawng zawngte chunga nghawng nei tûr rorêlna thuchah khauh tak chu huaisen takin an puang chhuak ang. Chu thuchah chu Setana khawvêl suaksual tihboral chimihna chungchâng a ni thei ang. Bible chuan chu thuchah chu rial nên a khaikhin a, heti hian a sawi a ni: “Rial lian tak talent tluk laia rit ṭheuh, vân aṭangin mihringte chungah a tla a: tin, mihringte chuan riala hremna avâng chuan Pathian an sawichhe ta a; chu hremna chu a nasa êm êm si a,” tiin.—Thu Puan 16:21.

¹⁰ Kan hmêlmate chuan he thuchah khauh tak hi an hria ang. Jehova chuan Bible-in Magog rama mi Goga tia a koh, hnamte inzawmkhâwmin a chhân lêt dân tûr hrilhfiah tûrin zâwlnei Ezekiela chu a thâwk khum a ni: “Tin, heti hian Lalpa PATHIAN chuan a ti a ni: Chumi nîah chuan heti hi a ni ang a, i rilruah thil a lo lût ang a, thil ṭha lo i suangtuah ang; tichuan, ‘Kulh nei lo khuate ram chu ka rûn ang a, mi him taka awm hle hle, an zaa kulh lova chêng, kulh kawngkhâr leh a kalhna thîr nei lohote chu ka bei ang,’ i ti rilru ang. Râllâk sum leh bungruate la tûr leh hmuna ṭiau hnu luah lehtute leh hnamte zîng ata hruai khâwm tawh, ran rual leh bungruate ngaha, lei lailuma chêngte chungah i kut lek i tum ang,” tiin. (Ezekiela 38:10-12) Pathian mite chu “lei lailuma chêngte” ang maiin, mi dangte lakah an langsâr hle ang. Hnamte chu an inthunun thei tawh lo vang a. Jehova hriak  thihte leh anmahni thlâwptute do chu an châk hle tawh ang.

11. (a) Hrehawm nasa tak chhûnga thil thlen dân tûr chungchângah eng nge kan hriat reng ngai? (b) Chhinchhiahna an hmuh hunah engtin nge mite chuan an chhân lêt ang?

¹¹ A dawtah eng thil nge lo thleng ang? Bible chuan a indawta thil thlen dân tûr chiah chu min hrilh lo mah se, thil ṭhenkhat chu a rualin a thleng ang. He khawvêl kalhmang tâwpna chungchâng a hrilh lâwknaah Isua chuan: “Niah te, thlaah te, arsiah te chhinchhiahna a awm ang a; tuifinriat rûm leh a fâwn avângin leiah pawh hnam tin hrehawmna leh manganna a thleng ang; thlabâr avâng leh khawvêla thil lo thleng tûr chu ngaihtuah avângin mite an thidang ang; vân thiltihtheihnate chu a nghîng dâwn si a. Chutih hunah chuan Mihring Fapa hi thiltihtheihna leh ropuina nasa tak nên chhûm zînga lo kal an hmu ang,” tiin a sawi. (Luka 21:25-27; Marka 13:24-26 chhiar rawh.) He hrilh lâwkna thlen famkimnaah hian vâna chhinchhiahna hlauhawm leh thil dang thlengte a tel ang em? Chu chu a hunah kan hria ang. Mahse, Pathian hmêlmate’n chhinchhiahnate an hmuh hunah, an hlauvin, an chiai dâwn a ni tih erawh kan hre chiang a ni.

12, 13. (a) Isua chu “a thiltihtheihna leh ropuina nasa tak nên” a lo kal hunah eng thil nge lo thleng ang? (b) Chu mi hunah chuan Pathian chhiahhlawhte chuan engtin nge an chhân lêt ang?

¹² Isua chu “thiltihtheihna leh ropuina nasa tak nên” a lo kal hunah eng thil nge lo thleng ang? Ani chuan mi rinawmte chu lâwmman a pe ang a, a rinawm lote chu a hrem ang. (Matthaia 24:46, 47, 50, 51; 25:19, 28-30) Isua chuan he thilthleng tûr hrilhfiah nân tehkhin thu a hmang a. Heti hian a sawi a ni: “Mihring Fapa hi chu, a vântirhkohte zawng zawng nên, a ropuinaa inthuama a lo kal hunah chuan, a ropuina  ṭhutphahah a ṭhu ang a; a hmaah chuan hnam tin an inkhâwm ang a: berâm vêngtuin kêl zîng ata a berâmte a hlîr angin anniho chu a hlîr ang a; berâmte chu a ding lamah a dah ang a, kêlte erawh chu a vei lamah a dah ang,” tiin. (Matthaia 25:31-33) Kêl leh berâmte chungah eng thil nge lo thleng dâwn? Anni chu rorêlsak an ni ang. Kêlte, a nih loh leh mi rinawm lote chu, “kumkhaw hremnaah an kal anga,” chu chu, kumkhaw boralna a ni. Mahse berâmte, a nih loh leh mi rinawmte chuan chatuana nunna an chang ang.—Matthaia 25:46.

¹³ Tihboral an ni dâwn tih an hriat hunah engtin nge kêlte chu an awm ang? Anni chuan “an âwmte an inchûm ang.” (Matthaia 24:30) Mahse, engtin nge hriak thihte leh anmahni thlâwptute chu an awm ang? Anni chuan Isua sawi angin an ti ang: “Chûng thil chu a lo thlen tirhin, en chho ula, dâk chhuak rawh u; in tlanna tûr chu a hnaih tâk avângin.”—Luka 21:28.

14, 15. Magog rama Goga beihna a inṭan hnuah eng lâk khâwmna nge thleng ang a, hei hi engtin nge a thlen ang?

¹⁴ Magog rama Goga’n Pathian mite a beih hnuah eng thil nge lo thleng ang? Bible chuan mihring Fapa chuan “vântirhkohte chu a tîr chhuak ang a, a thlante chu kâwl kil li ata—lei tâwp aṭanga vân tawp thlengin—a lâwr khâwm ang,” tiin a sawi a. (Marka 13:27; Matthaia 24:31) He lâwr khâwmna hian hriak thih Kristiante thlanna a kâwk lo va. Chu bâkah, leia la awm hriak thihte’n chhinchhiahna hnuhnûng ber an dawnna lah a kâwk hek lo. (Matthaia 13:37, 38) Chhinchhiahna hnuhnûng ber chu hrehawm nasa tak inṭan hma lawka thleng tûr a ni si a. (Thu Puan 7:1-4) A nih chuan, he lâwr khâwmna hi eng nge ni? Chu chu hriak thih leia la awmte’n an lâwmman dawnga vâna an kal hun sawina a ni. (1 Thessalonika 4:15-17; Thu Puan 14:1) He thil hi Magog rama Goga’n a beih ṭan hnu lama thleng tûr a ni. (Ezekiela 38:11) Tichuan, Isua sawi angin: “Mi felte chu an Pa ramah chuan ni angin an êng tawh ang.”—Matthaia 13:43. * (Footnote en rawh.)

¹⁵ Hei hi hriak thihte chu a nung chunga vâna lâk chhoh, “rapture” an ni dâwn tihna a ni em? Kristianna rama mi tam tak chuan Kristiante chu mihring taksa pu chunga vâna lâk chhoh ni tûrah an ngai a. Isua chu leia rorêl tûra hmuh theiha lo kal leh tûrah an ngai bawk. Mahse, Bible chuan Isua chu hmuh theih lohvin a lo kal dâwn tih chiang takin a târ lang a ni: “Mihring Fapa chhinchhiahna chu vânah a lang ang” tiin leh, Isua chu ‘vân chhûm chungah a lo kal ang,’ tiin. (Matthaia 24:30) Bible chuan “tisa leh thisen hian Pathian ram chu a luah thei lo” tih a sawi bawk. Chuvângin, vâna lâk chhoh tûrte chu “tawtawrâwt hnuhnûng ber rîk hunah chuan rei lo têah, mit khap kâr lovah tihdanglamin” an awm phawt ang. * (Footnote en rawh.) (1 Korinth 15:50-53 chhiar rawh.) Kristianna ram zirtîrna dik lo nêna inzawmna a neih avângin hetah hian “rapture” tih ṭawngkam kan hmang lo. Mahse, leia la awm hriak thih rinawmte lâk khâwmna chu chawplehchilhin a thleng ang.

16, 17. Berâm No nupui neih hmain eng thil nge lo thleng ang?

¹⁶ Hriak thih mi 1,44,000-te chu vâna an awm kim hunah, Berâm No nupui neihna atâna inpuahchahna hnuhnûng ber chu a inṭan thei ang. (Thu Puan 19:9) Mahse, chu thil phûrawm tak thlen hma chuan thil engemaw a thlen hmasak a ngai ang. Hriak thih a la bângte leia an awm laiin Pathian mite chu Goga’n a bei dâwn tih hre reng la. (Ezekiela 38:16) Engtin nge Pathian mite chu an awm ang? Anni chuan he kaihhruaina: “He indona hi in beih a ngai lo vang: inzâr ula, ding ngawt mai ula, in lama ṭang LALPA chhandamna chu en reng mai rawh u, . . . hlau  suh ula, zâm hek suh u,” tih hi an zâwm ang. (2 Chronicles 20:17) Goga beihna a inṭan hnuah, leia awm hriak thih a la bângte chu vânah lâk chhoh an ni ang. Thu Puan 17:14 chuan Goga beihna vân aṭanga chhân lêt a nih dân chu min hrilh a ni. Pathian mite hmêlmate chuan “Berâm No chu an do vang a, tin, Berâm No chu hotute Hotu leh lalte Lal a nih avângin anni chu a hneh ang a; tin, a hnêna awm, kohva te, thlana te, rinawma te chuan an hneh bawk ang.” Chuvângin, Isua leh hriak thih lal 1,44,000-te chuan vân aṭangin leia awm Pathian mite chu an rawn chhan chhuak ang.

¹⁷ Chu chhan chhuahna chuan Armageddon indona a tichhuak ang a, chu chuan Jehova hming thianghlim chu a chawimawi ang. (Thu Puan 16:16) Kêl anga rorêlsak zawng zawngte, a nih loh leh mi rinawm lote chu tihboral an ni ang a. Leiah hian suahsualna a awm tawh ngai lo vang a, Armageddon-ah chuan “mipui tam tak” chu an dam khawchhuak dâwn a ni. A tâwpah chuan, Thu Puan bu-a sawi tâwpna phûrawm tak, Beram No nupui neihna chu a lo thleng ang! (Thu Puan 21:1-4) * (Footnote en rawh.) Leia dam khawchhuak zawng zawngte chuan Pathian duhsakna an dawng ang a, a hmangaihna leh a thilphalna nasa tak chu an dawng bawk ang. Chu mi hun chu nghâkhlel takin kan thlîr reng a. Inneihna ruai ropui tak a va ni dâwn êm!—2 Petera 3:13 chhiar rawh.

18. Sawi lâwk thil lo thleng tûr phûrawm takte avângin, eng nge tih kan tum tlat ang?

¹⁸ Nakin lawkah he thil phûrawm tak hi a lo thlen dâwn avângin, tûnah eng nge kan tih ṭheuh vang? Jehova chuan tirhkoh Petera chu: “Chûng thilte chu chutianga boral vek tûr a ni tih in hriat avângin Pathian ni lo thlen hun tûr chu beisei leh ṭhahnemngai taka duhin, awm dân thianghlim leh Pathian ngaihsak kawngah chuan mi eng ang nge in nih tûr le? . . . Chuvângin duh takte u, chutiang thilte chu in beisei avângin bawlhhlawh kai lo leh sawisêlbovin, thlamuang taka in awm a hmuh theih nân che u, taihmâk chhuah rawh u,” tih hi ziak tûrin a thâwk khum a ni. (2 Petera 3:11, 12, 14) Chuvângin, sakhaw dik lo nêna inzawmna nei lova Pathian kan biakna tihthianghlim tum tlatin, Remna Lal, Isua Krista chu i thlâwp tlat ang u. (ws15-E 07/15)