1, 2. a) Ka uagu mádaragun habéi gefentiña luagu Heowá houngua lidoun wuribu le afanreinragubaliña gürigia? (Ariha huméi dibuhu le lídanbei lagumesehan arütíkulu.) b) Ka hasaminarubei saragu gürigia luagu hageira, harasan, hanichigu luma hawagu lílana huraraü le hínsiñetimabei houn? c) Ka asuseredubei dan le hasaminarun gürigia buidu hamá hawéi ha híbiri?

UGUÑE weyu, anihein fánreinguaü hadan gürigia ladüga íñugu lan hasandiragun houngua luagu hageira, harasan luma hanichigu. Ánheinti lubúeingu Heowá aban labu warihiniña sun gürigia ani mádaraguntiwa woungua lidoun turóbuli le afanreinragubaliña gürigia. Ka uagu? Ladüga hínsiñe lan Heowá woun ani busentiwa gaganbadi wamá lun (1 Huan 5:3). Falá wamuti lilurudun Heowá meberesenga halía lan nasirua wamá o halía lan weredera. Le súdinitimabei woun, luéigiñe wamá lóubadina Heowá luma Larúeihan (Matéu 6:33). Ligía gayara lubéi wariñagun ‘mama lan lánigu ubóu wagía’ (aliiha huméi Huan 17:11, 15, 16; Isaíasi 2:4).

² Gíbetiña gürigia saminatiña buídutima lan hageira luma  harasan hawéi ha híbiri gürigia. Añahein giñe asaminarutiña ítara hawagun lílana somu huraraü le hínsiñetimabei houn. Adügati le lun ñein lan ásügüraguni, iyereehabuni o íbini lun háfaraguniña ha masaminarunbaña kei hagía. Íbini mádaragun wamá wagía, gefentiña luagu Heowá, woungua lidoun turóbuli burí le, gayarati gani lan efekütu wawagu luma hawagu waduheñu. Gayarati íbini wasufurirun marichaü. Ani gáriti katei le woun lugundun adüga lumutiwa Heowá lau ubafu lun wasubudiruni anhein richá lubéi aban katei o maricha lan (Agumesehani 1:27; 2 Lúrudu 32:4). Ligíati, dan le ladügün aban gumadimati somu katei le mabuidunti, gayarabei busén wamá wayanuhan wuriba luagu. Dan le lasuseredun ítara, áfaaguatiwa san lun úaragua wamá lidan wafiñen?

3, 4. a) Ka uagu mádaragun wabéi wagía kristiánugu woungua lidoun luáguti polítika ani midin wagía awuribuha? b) Kaba wariha lidan arütíkulu le?

³ Gíbetiña gürigia ádaragutiña houngua lidoun turóbuli le lánina polítika ladüga hariñagun gumadimatiña houn ligía lan lunbei hadügüni. Ánheinti kristiánugu ha inarünitiña mádaraguntiwa woungua lidoun luáguti polítika ani midin wagía awuribuha. Ka uagu? Ladüga áyeiha wamani lani Hesusu hénpulu (Matéu 26:52). Masaminaruntiwa anihein lan aban fánreinti buidutimaati luéi amu lidan ubóu le lábugiñebei lagumadihan Satanási (2 Korintuna 2:11). Ligía madan lubadiwa turóbuli le ubouagubei (aliiha huméi Huan 15:18, 19).

⁴ Kei le gafigoun wabéi, háfuga aniheingua somu katei mabuidunti tidan wanigi habá gürigia ha ámubei haríawagun wawéi (Heremíasi 17:9; Éfesuna 4:22-24). Lidan arütíkulu le warihibei ida liña lan gayara lan tíderaguniwa Bíbülia lun wáfaagun kóntüra katei burí le afanreinragubaliña gürigia. Warihiba giñe ida luba lan wafurendeirun arihaña amu kei larihiniña Heowá luma Hesusu. Líderagubadiwa katei le lun úaragua wamá lun larúeihan Bungiu.

5, 6. a) Ka meha lasaminarubei Hesusu hawagu ámuñegueinarügü hawuyeri gürigia? b) Ka meha uagu lasaminara Hesusu ítara?

⁵ Danme le hasandirun hénrengu lan hun lun midin humá luéigiñe lóubadina somu polítiku, álügüdagua humá hungua: “Kaba hamuga san ladüga Hesusu?”. Dan le meha ya lubéi Hesusu ubouagu, manaaguntiña meha huríu, galiléana hama samariana houngua buidu. Merereguntiña meha huríu hama samariana (Huan 4:9). Biámañein meha sétanu hadan huríu, fariséugu hama saduséugu ani súnwandan meha anihein lan sigenei hadan (Adügaü 23:6-9). Huríu ha meha aturiahabalin lilurudun Moisesi saminatiña buídutima hamá hawéi ha maturiahanbalin (Huan 7:49). Ani iyereegutiña meha aguburahatiña liseinsuna gumadi hama rómana houn  huríu (Matéu 9:11). Mádaragunti meha Hesusu lungua lidoun turóbuli ligía. Inarüni ayanuha lan lau ubebeni luagu Heowá ani luagu subudi lani anúadira laaña lan meha Heowá huríu lumutuniñame. Gama lumoun, mariñagunti houn lani disipulugu súdinitima hamá hawéi ha híbiri (Huan 4:22). Lubaragiñe lira, arufudahati houn lun hínsiñe hamá sun gürigia houn (Lúkasi 10:27).

⁶ Aban meha ligaburi larihiniña Hesusu sun gürigia. Úati meha ni aban sétanu buídutimati luéi amu. Ka uagu? Ladüga adüga lumutiña meha Bungiu gürigia lun habuinchagüdüni ubóu hau ámuñegueinarügü rasa (Agumesehani 1:27, 28). Masaminarunti Heowá ni Hesusu anihein lan aban rasa, aban ageiraü o aban iñeñein le buídutimati luéi le líbiri (Adügaü 10:34, 35; Arufudúni 7:9, 13, 14). Lunti giñe wasaminaruni ligiaméme (Matéu 5:43-48).

7, 8. a) Kaba uéigiñe óubadina houdin Kristiánugu, ani ka uagu? b) Ka lunbei waritaguni luagu turóbuli le ubouagubei?

⁷ Kei kristiánugu mídintiwa luéigiñe lóubadina ni aban gumadimati ubouaguna. Lúnrügüñein Heowá luma lun larúeihan úaragua wamá. Ka uagu? Ladüga subudi wamani ligía lan urúei le buídutimabei. Ariñagati Satanási lidan fuluri-agei Edén mama lan aban urúei buiti Heowá houn gürigia. Saminati buídutima lan ladügüni katei sügǘ lau Heowá ani busenti lun hafiñeruni gürigia ligiaméme. Ígirati Heowá lun desidírü lani kada gürigia kaba lan úmagiñe lidin. Ligíati, álügüdagua humá hungua: “Gaganbaditina san lun Heowá ladüga afiñe nan luagu ligía lan gumadimati le buídutimabei? Chouru numuti san larúeihanrügübei lan Bungiu gayara laransehani sun turóbuli? Odi saminatina memegeirun wamá lun ladundehaniwa Bungiu?” (Agumesehani 3:4, 5).

⁸ Ánhadün lálügüda somu gürigia ka lan hisaminanbei luagu somu óundaruni lánina polítika o luagu amu óundaruni, kaba hóunaba? Inarüni anihein lan fiú lídangiñe óundaruni burí le busentiña híderaguniña gürigia. Gama lumoun, lunti waritaguni larúeihanrügübei lan Bungiu aransehei katei ubouagu ani gidaleime marichaü. Ligía luéigiñeñadiwa lubéi lóubadina Heowá. Anhein madügün wamá ítara, aniheinbei fánreinguaü lidan damuriguaü.

9. a) Ka meha turóbuli lídanbei damuriguaü le Korintubei? b) Ka lariñagubei Pábulu houn kristiánugu korintuna?

⁹ Lidan furumiñeti sígulu anihein meha aban turóbuli lidan damuriguaü le uburugubei Korintu. Hasigenehaña meha fiú kristiánugu lugundun fiú hádangiñe ariñagatiña luéigiñeñanu lan lóubadina Pábulu, ha híbiri luéigiñe lóubadina Apolosu, ha híbiri luéigiñe lóubadina Séfasi ani ha híbiri luéigiñe lóubadina Kristu. Dan le líchugunbei Pábulu fe luagu  le asuseredubei, aba ladiheridun saragu. Aban meha turóbuli sériuti lira lugundun lídanñein meha peliguru úarani le lídanbei damuriguaü le Korintubei. Ligía lariñagunbei Pábulu: “Lun ua lan fánreinguaü hidan”. Ani ariñagati giñe lunti lan hawinwandun lidan úarani “lau ábanmeme luwuyeri saminaü”. Uguñe weyu lunti giñe wasigiruni ligiaméme adundehani le. Moun lumuti ñein lan fánreinguaü lidan damuriguaü (1 Korintuna 1:10-13; aliiha huméi Rómana 16:17, 18).

10. Ka labusenrubei Pábulu larufudahan dan le konparárü lániña kristiánugu anuadirúaaña hamoun gürigia ha óunahoubaña awadigimarida lidan liri hageira lidoun amu ageiraü?

¹⁰ Lidan amu ókaasion, haritaguagüda lumutiña Pábulu kristiánugu anuadirúaaña luagu siéluba lan hawinwanda ani moun lumuti lan hetenirun lun “katei ubouaguna” (Filipuna 3:17-20). * Ariñagati giñe ítara haña lan kristiánugu anuadirúaaña keisi lóunagüle Bungiu luma Kristu ha ayanuhabaña luagu lufulesein Larúeihan Bungiu ya ubouagu. Dan le lounahóun aban gürigia lidoun amu ageiraü awadigimarida lidan liri lageira, mádaragunti lungua lidoun turóbuli ni lidoun polítika le lídanbei ageiraü ligía. Ítarameme, mádaraguntiña kristiánugu anuadirúaaña houngua lidoun turóbuli ni lidoun polítika le lani ubóu (2 Korintuna 5:20). Kristiánugu ha agurabubaña hawinwandun ya ubouagu mádaraguntiña giñe houngua lidoun turóbuli le ubouagubei. Luéigiñeñanu lóubadina larúeihan Bungiu.

11, 12. a) Anhein busén wabéi luéigiñe wamá lóubadina larúeihan Bungiu, ka lunbei masaminarun wamani? b) Ka meha tasandirubei aban íbiri hawagu lílana aban ageiraü? c) Ka íderagubarun íbiri to agidarei luriban saminaü tuáriua?

¹¹ Lidan saragu fulasu ubouagu, buiti hasandiragun saragu gürigia houngua hama gürigia lídangiñeti harasan, o hama ha ayanuhabalin hañeñe. Liibe-agei dan pántatiña luagu hageira. Gama lumoun, lunti duari wamá lun masaminarun wamá buídutima wamá hawéi ha híbiri. Anhein saminatiwa lubéi ítara, mosu wasansirun. Líderagubadiwa katei le lun mádaragun wamá woungua lidoun luáguti ubóu le. Ka gayarabei líderaguniwa asansira?

¹² Wayanuha tuagu aban íbiri gíritu Mirjeta. * Yugoslavia nasirua tan. Lidan fulasu le ñein lubéi taweirida, sun gürigia ha ñéinbaña iyeeregutiña lílana ageiraü le gíribei Serbia houn. Gama lumoun, aba tafurendeirun luagu masaminarun lan Heowá buídutima hamá lílana aban ageiraü hawéi lílana amu ageiraü, ani busén lan Satanási lun ñein lan iyereehabuni hadan gürigia. Ligía aba lubéi táfaagun lun tasansirun. Dan le lagumeserunbei aban wuribu lidan ageiraü, ábaya tagumeserun Mirjeta asandira iyereehabuni hawagu sérbiana. Mabusenruntu meha ni lun tapurichihan houn. Subudi tumuti meha mabuidun lan lira, ligía aba lubéi tamuriahan luma Heowá lun líderagunu lun tagidaruni katei ligía tídangiñe tanigi. Amuriahatu giñe luma lun líderagunu lun prekursora tan. Ariñagatu íderagua lanu apurichihani saragu.  Aba agumuchagueina lan katei wuribati le meha tasandirubei lugundun dan le tapurichihan, áfaaguatu lun táyeihani línsiñehabu Heowá.

13. a) Ka asuseredubei tun aban íbiri gíritu Zoila? b) Ka tadügübei íbiri to? c) Ka larufudahabei le asuseredubei tun Zoila woun?

¹³ Aba táguyun aban íbiri gíritu Zoila Méhikugiñe lun Yuropoun. Lidan damuriguaü le ñein tubéi añahein íbirigu ha lídangiñetiña amu burí ageiraü. Ariñagatu añahein lan hádangiñe adügatiña bula tau luagu tageira, techun luma músika le lídangiñeti tageira. Ani gáritiha katei ligía tun. Aba tamuriahan luma Heowá lun líderagunu lun masandiragun tan tungua ítara. Ka larufudahabei le asuseredubei tun Zoila woun? Arufudahati woun gayarati lan hénrengu lan houn fiú íbirigu hárügüdagun houngua dan le layanuhan somu gürigia wuriba luagu hageira. Ligía moun lumuti lubéi wadügün o wariñagun somu katei le adügüti lun genege lan buidu lan aban rasa luéi amu. Mabusenruntiwa lun ñein lan fánreinguaü lidan damuriguaü ni bóugudi luéi (Rómana 14:19; 2 Korintuna 6:3).

14. Ka gayarabei líderagunün lun harihiniña sun gürigia kei larihiniña Heowá?

¹⁴ Sun lubúeingu Heowá ha lídanbaña sun ubóu lídanñadiwa aban. Ligía moun lumuti lubéi wasaminarun buídutima lan somu fulasu o ageiraü luéi amu. Háfuga arufudaha hamá wagübürigu o gürigia ha geyegubaña wau woun lun hínsiñe lan wageira woun. Ani háfuga aniheingua lan somu katei mabuidunti tidan wanigi habá lílana amu ageiraü, amu nechani, iñeñein o rasa. Anhein ítara liña lubéi, kaba íderaguaün lun hasansirun? Samina humá ida liña lan larihiniña Heowá gürigia ha wéiribei habulofun lau hageira ani saminatiña buídutima hamá hawéi ha híbiri. Áluaha humá  ariñahani luagu tema le danme le haturiahan hábugua o hama hiduheñu. Ani amuriaha humá luma Heowá lun líderagunün lun harihiniña sun gürigia kei larihiniña (aliiha huméi Rómana 12:2).

15, 16. a) Ka hadügübei fiú dan le harihin amu wamá? b) Ida luba híderaguniña agübürigu hasaanigu lun úaragua hamá lun Heowá?

¹⁵ Kei le gaganbadi wabéi lun Heowá, anihein dan harihini wabesinanigu, waduheñu hama wánigu paaná lidan wadagimanu o leskuelarugu luagu amu wamá hawéi ha híbiri (1 Féduru 2:19). Ariñagati Hesusu gayarabei lan íbini wayereegudun houn fiú gürigia ladüga amu wamá. Gama lumoun, lunti waritaguni ibidiñe lan ni kata luáguti larúeihan Bungiu houn hibe-agei. Ligía ua lubéi gunfuranda hamani ka lan uagu Larúeihanrügüñein lubéi Bungiu wafalara.

¹⁶ Anhein busén wabéi úaragua wamá lun Heowá, mosu wáfaagun lun gaganbadi wamá lun súnwandan meberesenga kaba lan hariñaga o kaba lan hadüga amu woun (Danieli 3:16-18). Háfuga henrengu lan houn nibureintiña harufuduni amu hamá hawéi ha híbiri. Háfuga hanufude hamá fiú hamahadun habusuragun lun fanidira o lun madan lániña somu fedu lánina ageiraü. Ligía mosu lubéi híderaguniña hagübürigu lun hóuserun lau ganigi leskuelarugu. Ida? Lidan háhuduragun kei iduheñu gayarati hayanuhan luagu ida liña lan larihini Heowá luáguti fanidira luma amu burí katei líbeina lira. Ani gayarati giñe harufudahan houn lun hafuranguagüdüni hafiñen lau inebesei (Rómana 1:16). Ani anhein megei hubéi hayanuhan hama máisturugu lun hafuranguagüdüni wafiñen houn, adüga huméi.

17. a) Ka katei lunbei masaminarun wamani? b) Ka uagu moun lumuti lubéi wasaminarun buídutima lan ligaburi wadügüni katei hawéi amu?

¹⁷ Agurabúati hínsiñebei lan éigini le lídanbei wageira woun, iñeñein le ayanuhóubei ñein, ligaburi laríawagun luma échuni le ñeinbei ladüga lidan wagüriara. Gama lumoun, moun lumuti wasaminarun buídutima lan le hínsiñebei woun luéi le hínsiñebei houn amu. Ka uagu? Ladüga adügati Heowá ámuñegueinarügü katei lun wagundaarun (Sálumu 104:24; Arufudúni 4:11). Ligíati, mabuidunti wasaminarun buídutima lan ligaburi wadügüni katei.

18. Ida liña lahuudun woun warihiniña amu kei larihiniña Heowá?

¹⁸ Busenti Heowá lun hasubudiruni sun hawuyeri gürigia, lun háhuduragun lun ani lun hawinwandun lun súnwandan (Huan 3:16; 1 Timotéu 2:3, 4). Ligía lunti lubéi aranseñu wamá lun waganbuni ka lan hasaminanbei wíbirigu. Ani anhein ua lubéi kóntüra lan luagu le lariñagubei Heowá, gayarati wánharun lun íbini múaran lan luma wasaminan. Anhein wadüga ítara, buídubei wabagari, gúndaabadiwa ani lídanbadiwa darangilaü hama wíbirigu. Kei aubei warihei, luéigiñerügüñein lóubadina Heowá luma larúeihan woudin. Ligía mádaragun wabéi wougua lidoun turóbuli le ubouagubei ani mínchahan wabaña giñe amu lun pantaü ni lun ásügüraguni. Gayarati wíchugun seremei luagu larufudahan Heowá ínsiñeni, darangilaü luma ǘnabuguni woun. Aba wasandiragun woungua kei abürühati Sálumu 133:1, le ariñagubei: “Ariha humá ida liña lan lubuidun lun haganóun íbirigu lidan aban hámagua!”.