1, 2. (a) Jehova chunga rinawmna leh he khawvêl buainaa ṭan lam neih loh chu eng angin nge a inkûngkaih? (A thupui chunga milem en rawh.) (b) Mi tam tak chu eng atân nge an rinawm a, chu chuan eng nge a rah chhuah?

JEHOVA chhiahhlawhte chu an tualdâwih a, mite ṭhen hrangtu ram te, hnam te, leh hnam dân thilahte an inhnamhnawih ve lo. Engvâng nge? Jehova kan hmangaihin, a chungah kan rinawm a, a thu kan âwih bawk vâng a ni. (1 Johana 5:3) Kan awmna leh kan lo chhuahna chu eng pawh ni se, Pathian tehnate kan zâwm a. Pathian Jehova leh a Lalram tâna rinawm chu thil dang zawng aiin a pawimawh ber a. (Matthaia 6:33) Chuvângin, ‘khawvêla mi kan ni lo’ tih kan sawi thei a ni.—Johana 17:11, 15, 16 chhiar rawh; Isaia 2:4.

² Tûn lai khawvêla mi tam tak chu an ram, an hnam, leh an hnam dân mai bâkah, an infiamna team tân an rinawm hle a. Lungchhiatthlâk takin, hei hian an zînga tam tak chu a ineltîrin, a inhuattîr a, a châng chuan an lam ṭang lote thahna a thlen hial a ni. Hêng buainaah hian tel ve lo mah ila, keimahni leh kan chhûngte chungah nghawng a nei thei a, thil râpthlâk takte kan tawrh phah thei bawk. Pathianin thil dik leh dik lo hriat theihna neia min siam avângin,  sawrkârin hleih nei taka thu tlûkna a siam hian ṭan lam lo neih a awlsam hle thei a. (Genesis 1:27; Deuteronomy 32:4) Thil dik lo engemaw a thlen hian engtin nge i awm? Tualdâwihin i awm nge ni a, ṭan lam i lo nei zâwk?

3, 4. (a) Buaina a thlen hian engvângin nge ṭan lam kan neih loh? (b) He thuziakah hian eng nge kan ngaihtuah ang?

³ Mi tam tak chuan ram buaina a thlen hian, sawrkârin khua leh tui ṭha takte tih tûr chu ṭan lam neih hi a ni tia a hmin avângin ṭan lam an lo nei ṭhîn. Mahse, keini chuan Isua tih dân kan zui a. Chuvângin, politics-ah kan tel lo va, indonaah lah kan tel bawk hek lo. (Matthaia 26:52) Kristian dikte chuan Setana khawvêl pêng khat hi a dang aia ṭha zâwkah an ruat lo. (2 Korinth 2:11) He khawvêl buainaa inkûngkaihna neih kan duh rêng rêng lo a ni.—Johana 15:18, 19 chhiar rawh.

⁴ Ṭha famkim lo kan nih avângin, kan zînga ṭhenkhat chuan hnam dang mite chungah thlîr dân dik lo an la nei mai thei a. (Jeremia 17:9; Ephesi 4:22-24) He thuziakah hian, mite ṭhen hrangtu rilru put hmangte hneh tûra min ṭanpui thei thu bulte kan zir ang. Jehova leh Isua thlîr dân anga thlîr tûra mahnia inzîrna hmanga Lalram tâna kan rinawm theih dân kan ngaihtuah bawk ang.

5, 6. Isua leia a awm lai khân, engtin nge hnam chi hrang hrangte chu a thlîr a, engvângin nge?

⁵ Ṭan lam nei lo va tualdâwiha awm harsa i tih chuan heti hian inzâwt ang che, ‘Isua chu ni se eng nge a tih ang?’ tiin. Isua leia a awm lai khân, Judai ram te, Galili ram te, leh Samari rama awmte zîngah buaina leh inrem lohna a awm a. Entîrna ṭhenkhat lo ngaihtuah ta ila. Juda mite leh Samari mite chu an inbe lo va. (Johana 4:9) Pharisaite leh Sadukaite chu thil tam takah an inrem lo a ni. (Tirhkohte 23:6-9) Dân zirtu Judate chu zir lote aia ṭha zâwkah an inngai a. (Johana 7:49) Mi tam tak chuan chhiahkhawntute leh Rom mite chu an haw bawk. (Matthaia 9:11) Mahse, Isua chu chûng buainaah chuan a tel ve lo. Ani chuan Jehova chungchâng thutak chu vênghim rengin, Israelte chu Pathian hnam thlan an ni tih hre mah se, a zirtîrte chu mi dangte aiin an ṭha zâwk niin a zirtîr ngai lo. (Johana 4:22) Chu ai mah chuan, mi zawng zawng hmangaih tûrin a zirtîr zâwk a ni.—Luka 10:27.

⁶ Engvângin nge Isua’n hnam khat chu a dang aia chungnung zâwk anga a thlîr loh? A Pa nêna mite an thlîr dân vâng a ni. Pathian Jehova chuan mihringte hi hnam chi hrang hrang nia leilung hi luah khat tûrin a siam a. (Genesis 1:27, 28) Chuvângin, Jehova leh Isua chuan hnam chi khat leh ṭawng chi khat chu a dangte aia ṭha zâwkah an ngai lo. (Tirhkohte 10:34, 35; Thu Puan 7:9, 13, 14) An entawn tûr ṭha famkim chu kan zui tûr a ni.—Matthaia 5:43-48.

7, 8. (a) Tu lamah nge kan ṭan a, engvângin nge? (b) Mihringte harsatna chinfelna chungchângah eng nge kan hriat reng ang?

⁷ Engvângin nge mihring rorêlna leh sawrkâr a enga mah hi kan thlâwp loh? Pathian Jehova lama kan ṭan vâng a ni. Ani chu kan chunga Rorêltu a ni a. Eden huanah khân, Setana’n Jehova chu mihringte tâna rorêltu ṭha ber a ni lo tih a sawi a. A thil tih dân chu Pathian tih dân aiin a ṭha zâwk tih mihringte’n ring se a duh a ni. Jehova chuan kan duhna lama ṭang tûrin duh thlan theihna min pe a. Tu lamah nge i ṭan dâwn? Pathian Jehova thu i âwih chhan chu a thiltih dân chu i tih dân aiin a ṭha zâwk tih i rin vâng a ni em? A Lalram chauhvin kan harsatnate a chingfel thei tih i ring em? A nih loh leh, Pathian tel lovin mihringte chuan hlawhtling taka ro an inrêl theih i ring em?—Genesis 3:4, 5.

⁸ Entîr nân, tuemawin politics party a engemaw ber, hel pâwl emaw, chutiang pâwl a engemaw ber chungchânga i ngaih dân a zawh che chuan, engtin nge i chhân ang? Hêng pâwlte  zînga ṭhenkhat chuan tih tak zetin mite an ṭanpui duh mai thei a ni. Mahse, Pathian Jehova Lalram chauhvin mihringte harsatnate a sukiang theiin, rorêl dik lohna zawng zawng a nuaibo thei a ni tih kan hria a ni. Chu bâkah, thil ṭha ber nia kan hriat chu mahni ṭheuhva tih ai chuan, kohhran hmanga Jehova kaihhruaina chu kan zâwm a. Chuvângin, kohhranah inlungrualna a awm a ni.

9. Kum zabi khatnaa Kristian ṭhenkhatin eng buaina nge an neih a, eng nge an tih ngai?

⁹ Kum zabi khatnaah khân, Korinth khuaa Kristian ṭhenkhat chu: “‘Kei Paula pâwl ka ni,’ ‘Kei zawng Apollova pâwl ka ni,’ ‘Kei zawng Kiphaa pâwl ka ni,’ ‘Kei zawng Krista pâwl ka ni,’” tiin an inhnial tawn a. Chu mi chungchâng a hriat chuan Paula chuan mak a ti hle a. Kohhran chhûnga remna a lâk bo theih avângin, chu chu buaina lian tham a tling a ni. Chuvângin, a unaute chu: “Krista chu ṭhenin a awm em ni?” tiin a zâwt a. Anni chu: “Unaute u, in zain thu thuhmun in sawi a, in zînga inṭhenna rêng a awm lohna tûrin, rilru hmunkhat leh ngaihtuahna hmunkhata fel taka in inzawm tlat zâwkna tûrin kan Lalpa Isua Krista hmingin ka ngên a che u,” tiin a hrilh a ni. Tûn laiah pawh chutiang tho chu a ni a. Kohhranah inṭhen darhna engpawh a awm tûr a ni lo.—1 Korinth 1:10-13; Rom 16:17, 18 chhiar rawh.

10. Paula’n Kristiante chu eng nge a hriattîr a, chuta ṭang chuan eng nge kan zir theih?

¹⁰ Paula chuan hriak thih Kristiante chu vân khua leh tuite an nih avângin, ‘khawvêl thilte’ ngaihsak lo tûrin a hriattîr a. (Philippi 3:17-20) * (footnote en rawh.) Hriak thihte chu Pathian leh Isua aiawhtu palaite an ni. Ram danga palai tirhte chu an va kalna ram buaina leh politics-ah an tel lo. Chutiang bawkin, hriak thihte tân pawh khawvêl buaina leh politics-a inhnamhnawih chu a dik lo vang. (2 Korinth 5:20) Leia chatuana nun beiseitute pawh Lalram tân an rinawmin, khawvêl buainaahte chuan ṭan lam an nei lo bawk.

11, 12. (a) Pathian Lalram tâna rinawmna vawn kan duh chuan eng rilru put hmangte nge kan pumpelh ang? (b) Unaunu pakhat chuan mi ṭhenkhat chungah eng rilru nge a neih a, thlâkthleng tûrin engin nge ṭanpui?

¹¹ Khawvêl hmun tin deuhthawah chuan, mite chuan anni nêna hnam inang, ṭawng inang, leh chanchin inang neite nêna inkûngkaihna nei bîk niin an inhria a. An lo chhuahnate chu an chapopui hle ṭhîn. Mahse, chutiang rilru put hmangte chu kan nei ve tûr a ni lo. Chu ai mah chuan, thil engkima tualdâwiha kan awm theih nân kan thil ngaihtuah dânte thlâkthleng leh kan chhia leh ṭha hriatna sawizawi chu a ngai a ni. Engtin nge chu chu kan tih theih?

¹² Entîr nân, Mirjeta-i * (footnote en rawh) chu tûn hmaa Yugoslavia an tihna ramah chuan a piang a. A seilenna biala mite chuan Serbia mite chu an haw hle a. Jehova chungchâng a han zir chuan, Pathianin hnam duhsak bîk a nei lo tih leh mite inhaw tûra duhtu chu Setana a ni tih a hre ta a. A rilru put hmang chu a thlâk thei ta hrâm a ni. Mahse, a awmna biala hnam chi hrang hrangte inkâra indona a lo chhuah chuan, Mirjeta-i chuan Serbia mite huatna a nei ṭan leh ta a. An hnêna thu hrilh pawh a duh lo hial a. Chu chu thil dik lo a ni tih a hria a, a rilru put hmang chu thlâkthleng tûrin Jehova ṭanpuina a dîl ta a. Pioneer thawk thei tûrin a ṭanpuina a dîl bawk a ni. Mirjeta-i chuan heti hian a sawi a: “Rawngbâwlna chauh ngaihtuah chu ṭanpuitu ṭha ber a ni tih ka hre ta. Rawngbâwlnaah hian Jehova mize duhawm takte entawn ka tum a, ka rilru put hmang ṭha lote chu zâwi zâwiin ka paihbo thei ta a ni,” tiin.

13. (a) Zoila-i chungah eng thil nge thleng a, engtin nge a tih? (b) Zoila-i thiltawn aṭangin eng nge kan zir theih?

 ¹³ Unaunu Zoila-i chu Mexico aṭangin Europe-ah a insawn a. A lâwina kohhranah chuan Lantin America ram ṭhenkhata unaute pawh an awm a ni. Unau ṭhenkhat chuan a pianna ram te, a hnam dân te, leh rimawi te chu fiamthu thawh nân an hmang tih a sawi a. A lungnih loh êm avângin, inthunun thei tûrin Jehova hnênah a ṭawngṭai ta a. A dinhmun angah ding ta ila, engtin nge kan tih ang? Miin an pianna hmun chanchin a ṭha lo zâwnga an sawite an hriat hian unau ṭhenkhat tân an lungnih lohna thunun hrâm hrâm a la ngai a. Chuvângin, hnam pakhat chu a dang aia ṭha zâwk anga lantîr thei ṭawngkam leh thiltihte chu kan ti duh ngai lo vang. Kohhranah emaw, hmun dangah emaw inṭhen hranna awmtîr kan duh lo a ni.—Rom 14:19; 2 Korinth 6:3.

14. Mite chu Jehova thlîr dân anga thlîr ve tûrin engin nge ṭanpui thei che?

¹⁴ Jehova chhiahhlawhte chu mi pakhat angin an inlungrual tih kan hria a; chuvângin, hmun pakhat emaw, ram pakhat emaw chu a dang aia chungnung zâwk angah kan ngai tûr a ni lo. Mahse, i chhûngte leh i ṭhiante chuan i pianna hmun ngainatna an neihtîr che pawh a ni thei. Chuvângin, hnam dang te, ze dang te, ṭawng dang te, leh chi dangte chu i la hmusit deuh pawh a la ni mai thei a. Inthlâkthleng tûrin engin nge ṭanpui ang che? Pathian Jehova’n an ram chapo puitute leh mi dang aia ṭha zâwka inngaitute a thlîr dân chu ngaihtuah ang che. He mi chungchâng thu hi mi mala inzirna i neih hunah emaw, chhûngkuaa Pathian biakna in neih hunah emaw zir bingna nei rawh. Tichuan, Jehova thlîr dân anga mite thlîr tûrin a ṭanpuina dîl ang che.—Rom 12:2 chhiar rawh.

15, 16. (a) Kan danglam bîk avângin mi ṭhenkhatin engtin nge min tih mai theih? (b) Engtin nge nu leh pate’n an fate chu Jehova chunga an rinawmna vawng zêl tûra an ṭanpui theih?

¹⁵ Chhia leh ṭha hriatna thiang tak neia Jehova rawngbâwl kan duh avângin, a châng chuan kan hnathawhpui te, school kalpui te, ṭhenawm te, a nih loh leh chhûngkhat te lakah kan  danglam hle thei ang. (1 Petera 2:19) Kan danglam bîk avângin mite huat kan ni dâwn tih Isua chuan min hrilh a ni. Min dodâltu a tam zâwkte chuan Pathian Lalram chungchâng an hre lo tih hria ang che. Chuvângin, anni chuan mihring sawrkârna aia Lalram tâna rinawm chu kan tân a pawimawh zâwkzia an hre lo.

¹⁶ Jehova chunga rinawm tûr chuan mi dangte’n engpawh sawiin, engpawh ti se, a thu kan zâwm tlat tûr a ni. (Daniela 3:16-18) A bîk takin, ṭhalaite chuan mi dangte laka danglam tak nih chu harsa an ti hle thei a. Nu leh pate u, in fate chu school-ah huaisenna nei tûrin ṭanpui rawh u. In fate chuan flag chibai bûk loh emaw, hnam hmangaihna hun serh danga tel loh emaw chu an hrehin an hlau mai thei a. Chhûngkuaa Pathian biakna in neih hunah hêng chungchânga Pathian Jehova thlîr dân chu i zirpui thei a ni. An rinnate chu chiang tak leh zahthiam taka hrilhfiah dân zirtîr ang che. (Rom 1:16) A ṭûl a nih chuan, an zirtîrtute hnênah kan rinnate hrilhin in fate chu ṭanpui ang che u.

17. Eng ang ngaihtuahna nge kan pumpelh ang a, engvângin nge?

¹⁷ Kan seilenna rama ei leh in te, ṭawng te, ram awm dân te leh hnam dân te chu kan ngaina tlângpui ṭhîn a. Mahse, kan thil duh chu mi dangte thil duh aia ṭha zâwk tûrah kan ngai em? Jehova chuan a thil siam chi hrang hrangte kan hlimpui chu a duh a. (Sâm 104:24; Thu Puan 4:11) Chuvângin, engah nge thil tih dân kawng khat chu a dang aia ṭha zâwk anga kan thlîr tlat ang le?

18. Engvângin nge Jehova thlîr dân anga mi dangte thlîr chu kan tân a ṭhat?

¹⁸ Jehova chuan mi chi tinrêngte’n a chanchin an zîr a, amah biak a, chatuana an nun chu a duh a. (Johana 3:16; 1 Timothea 2:3, 4) Chuvângin, kan unaute ngaih dân leh kan ngaih dân a inan loh hunah pawh, an ngaih dân chu Jehova pawm tlâk a nih phawt chuan kan ngaihthlâksak tûr a ni. Chutianga kan tih chuan, kan nun chu a phûrawmin a hlimawm ang a, unaute nên inlungrual takin kan awm reng ang. Kan sawi tawh angin, Jehova leh a Lalram tâna kan rinawm avângin khawvêl buainaahte hian ṭan lam kan nei lo va. Setana khawvêla chapona leh inelnate chu kan hua a ni. Pathian Jehova’n hmangaihna te, remna te, leh inngaihtlâwmna te min zirtîr avângin kan va lâwm tak êm! “Ngai teh, unaute inngeih dial diala awm khâwm hi a va ṭhain, a va nuam êm!,” titu fakna hla phuahtu thusawi chu kan tawng ve thei a ni.—Sâm 133:1. (ws15-E 07/15)