1, 2. a) Náa numuu rí xa̱bi̱i̱ Dios na̱nguá exuʼdámíjná náa xkujndu rí naʼni markuájinʼ xa̱bu̱ rá. (Atayáá timbá xtiʼkhu.) b) Ndiéjunʼ e̱ndxa̱ʼwa̱míjna̱ mbaʼin xa̱bu̱ ga̱jma̱a̱ numún xuajñún, rí naguʼún nuni ma̱ngaa numbañún equipo ndrígu̱ún rá. c) Ndiéjunʼ erígá índo̱ xa̱bu̱ nundxa̱ʼwa̱míjna̱ rí ni̱ndxu̱ún itháan míjínʼ ki xóo eʼwíínʼ rá.

RÍ MBIʼI xúgi̱, mbaʼin xa̱bu̱ na̱nguá kuwa kambáxu̱u̱n numuu rí nunimbaʼumíjna̱ ga̱jma̱a̱ numuu xuajin ndrígu̱ún, raza ndrígu̱ún ga̱jma̱a̱ rí naguʼún nuni. Mú xa̱bi̱i̱ Jeobá na̱nguá eʼni xúʼko̱ ga̱jma̱a̱ tsexuʼdámíjná náa xkujndu rí narkuájinʼ xa̱bu̱. Náa numuu rá. Numuu rí nandulúʼ kuʼyáá Jeobá ga̱jma̱a̱ nandulúʼ muʼnimbulúʼ kuʼyáá (1 Juan 5:3). Tséʼniuu má náa kuwáanʼ o náa nigumáanʼ, nuʼnimbulúʼ xtángoo ndrígóo. Mú ikháanʼ nduʼyáá rí itháan gíʼdoo numuu mumbayíí Jeobá ga̱jma̱a̱ Xa̱bu̱ Ñajunʼ ndrígóo (Mat. 6:33). Ikha jngó nandoo nuʼthá rí na̱nguá ni̱ndxu̱lú náa numbaaʼ rígi̱ (atraxnuu Juan 17:11, 15, 16; Is. 2:4).

² Mbaʼin xa̱bu̱ nundxaʼwamíjná rí xuajñún ga̱jma̱a̱ rí xóo eni nindxu̱u̱ itháan májánʼ. Eʼwíínʼ nakumu̱ún ikháá má ga̱jma̱a̱ numuu equipo ndrígu̱ún. Rúʼko̱ naʼni rí mbaʼin muxmijná kanikhiin, rí maguiñunʼ kuyamijná ga̱jma̱a̱ asndu nuradíin bi̱ tsindxaʼwamíjna̱ xóo ikhiin. Maski ajndu bi̱ ni̱ndxu̱ún xa̱bi̱i̱ Jeobá tsixuʼdámíjná náa xkujndu rúʼko̱, mbáa asndu maʼni gawúnlú ikháanʼ ga̱jma̱a̱ bi̱ kuwa náa  guʼwúlú. Mbáa asndu mugíʼnii dí ra̱májánʼ kayuʼ. Ga̱jma̱a̱ rúʼko̱ naʼni gawúnlú, numuu rí Jeobá niʼniáanʼ mu mbuʼyáá rí nindxu̱u̱ ra̱májánʼ (Gén. 1:27; Deut. 32:4). Ikha jngó, índo̱ mbáa Xa̱bu̱ Ñajunʼ naʼni mbá dí ra̱májánʼ mbáa asndu maʼndulú muʼthá dí ra̱májánʼ náa ikhaa. Ikhú mbiʼi rúʼko̱, lá nakuwáanʼ jmbu náa Dios ráʼ.

3, 4. a) Náa numuu rí cristianos tsexuʼdámíjnáxu náa política ga̱jma̱a̱ na̱nguá má e̱jkuáxu náa guerra rá. b) Ndiéjunʼ gúʼyáá náa artículo rígi̱ rá.

³ Mbaʼin xa̱bu̱ nuxuda̱mi̱jna̱ náa xkujndu dí narígá náa política numuu rí Xa̱bu̱ Ñajunʼ nutún dí rúʼko̱ gíʼmaa muni. Mu cristianos gajkhun na̱nguá exuʼdámíjná náa política na̱nguá má ejkuáxu náa guerra ma̱ngaa. Náa numuu rá. Numuu rí nduʼyaridáá Jesús (Mat. 26:52). Na̱nguá endxaʼwamíjna̱lú rí mbá tapha numbaaʼ ndrígóo Satanás nindxu̱u̱ itháan májánʼ ki xóo imbo̱o̱ (2 Cor. 2:11). Ikha jngó na̱nguá exuʼdámíjná náa xkujndu dí rígá náa numbaaʼ rígi̱ (atraxnuu Juan 15:18, 19).

⁴ Numuu rí ñajunlú xa̱bu̱ aʼkhá, mbáa nguáná maʼni rí tikuáanʼ xáʼndulú guʼñún eʼwíínʼ numuu rí ni̱ndxu̱ún mixtiʼkuiin (Jer. 17:9; Efes. 4:22-24). Náa artículo rígi̱ gúʼyáá xóo gándoo gambáyulú Biblia mu xundxa̱ʼwáá edxu̱lúʼ dí raʼkhí ga̱jma̱a̱ numún eʼwíínʼ xa̱bu̱. Ma̱ngaa mbuʼyáá xóo gándoo gájmañúlúʼ rí mbuʼñún eʼwíínʼ xóo eʼñún Jeobá ga̱jma̱a̱ Jesús. Rúʼko̱ mambáyulúʼ manindxu̱lúʼ jmbiin náa Xa̱bu̱ Ñajunʼ ndrígóo Dios.

5, 6. a) Ndiéjunʼ endxa̱ʼwáminaʼ Jesús ga̱jma̱a̱ numún xa̱bu̱ rá. b) Náa numuu rí xúʼko̱ nindxa̱ʼwáminaʼ Jesús rá.

⁵ Índo̱ gáʼniaʼ miʼskhoo matani rí jmbu, atraxi̱mínáʼ: “Á mu Jesús, ndiéjunʼ lá gáʼni ikhaa xá.” Índo̱ Jesús nixtáa náa tsu̱du̱u̱ Ku̱ba̱ʼ xa̱bu̱ Judea, Galilea ga̱jma̱a̱ Samaria na̱nguá embáxu̱u̱n májánʼ. Mbá xkri̱da, judíos gajmiún samaritanos na̱nguá etamijná (Juan 4:9). A̱jmi̱i̱n grupo judíos bi̱ nagumbiʼñún fariseos ga̱jma̱a̱ saduceos nagiʼdu̱u̱n má xúʼko̱ (Hech. 23:6-9). Judíos bi̱ ninigajmaa xtángoo ndrígóo Moisés nikumu̱ún rí ñajúnʼ itháan míjínʼ ki xóo bi̱ túnigajmaa (Juan 7:49). Ga̱jma̱a̱ judíos naguiñunʼ kuñún bi̱ nuruma impuesto gajmiún romanos (Mat. 9:11). Mú Jesús na̱nguá nikudaminaʼ náa xkujndu rúʼko̱. Gajkhun má rí ikhaa niyambáá náa rí gajkhun ga̱jma̱a̱ numuu Jeobá ma̱ngaa ndiʼyoo má rí Dios niraʼwíin judíos mu mani̱ndxu̱ún xuajñu. Mú nimbá miʼtsú na̱nguá niʼsngúún xa̱bi̱i̱ rí itháan guáʼdáá numún ki xóo eʼwíínʼ (Juan 4:22). Rí phú niʼsngúún rí maʼndún kuñún eʼwíínʼ xa̱bu̱ (Luc. 10:27).

⁶ Jesús ndiʼyoo rí xúgínʼ xa̱bu̱ mbeʼtín. Nimbáa na̱nguá ñajúnʼ itháan ki xóo eʼwíínʼ. Náa numuu rá. Numuu rí Jeobá niʼnii xa̱bu̱ numbaaʼ mu majtíin náa tsu̱du̱u̱ Ku̱ba̱ʼ asndu xú káʼnii raza (Gén. 1:27, 28). Ikha jngó Jeobá ga̱jma̱a̱ Jesús na̱nguá endxaʼwamíjna̱ rí mbá raza, xuajin o ajngáa nindxu̱u̱ itháan májánʼ ki xóo eʼwíínʼ (Hech. 10:34, 35; Rev. 7:9, 13, 14). Xúʼko̱ má gíʼmaa mundxaʼwamíjna̱ mangáanʼ (Mat. 5:43-48).

7, 8. a) Bi̱ ñajunlú cristianos, tsáa embayíí ga̱jma̱a̱ náa numuu rá. b) Ndiéjunʼ gíʼmaa marmáʼáan a̱jkiu̱lú ga̱jma̱a̱ numuu xkujndu dí rígá náa numbaaʼ rígi̱ rá.

⁷ Bi̱ ñajunlú cristianos na̱nguá embayíí nimbáa Xa̱bu̱ ñajunʼ náa numbaaʼ rígi̱. I̱ndó numbayíí Xa̱bu̱ Ñajunʼ ndrígóo Jeobá. Náa numuu rá. Numuu rí nundxa̱ʼwa̱míjna̱ rí itháan májánʼ Xa̱bu̱ Ñajunʼ nindxu̱u̱ ikhaa. Satanás niʼthí náa ixi̱ ri̱ʼi̱ Edén rí Jeobá na̱nguá ñajunʼ májánʼ Xa̱bu̱ Ñajunʼ mu maʼtáñajúúnʼ xa̱bu̱ numbaaʼ. Ikhaa naku̱mu̱u̱ rí itháan májánʼ rí naʼni ikhaa ki xóo rí naʼni Dios ga̱jma̱a̱ nandoo rí xa̱bu̱ makumún xúʼko̱ kaʼnii. Jeobá naniñuʼ rí mámbáa maraʼwíí tsáa Xa̱bu̱ Ñajunʼ gámbáyúu. Ikha jngó: “Lá nanimboʼ ka̱yo̱o̱ Jeobá numuu rí nda̱yo̱o̱ rí itháan májáánʼ Xa̱bu̱ Ñajunʼ nindxu̱u̱ xáʼ. Lá nda̱yo̱o̱ gajkhun rí Xa̱bu̱ Ñajunʼ ndrígóo Dios maʼngo̱o̱ maʼnimbánuu xúgíʼ xkujndu ráʼ. O lá nandxa̱ʼo̱o̱  edxu̱ʼ rí tséyóoʼ rí Dios maʼtáñajunʼlú ráʼ.” (Gén. 3:4, 5.)

⁸ Mbá xkri̱da, á mu rí mbáa naraxa̱ʼ, ndiéjunʼ tatsaʼwáminaʼ ga̱jma̱a̱ mbá partido político o ga̱jma̱a̱ numuu mbá organización, ndiéjunʼ gátriʼña̱a̱ rá. Gajkhun má rí tikhun grupos ñajúnʼ míjínʼ ga̱jma̱a̱ nandún mumbañún eʼwíínʼ xa̱bu̱. Mú garmáʼáan a̱jkiu̱lú rí i̱ndió xa̱bu̱ Ñajunʼ ndrígóo Jeobá maʼngo̱o̱ maʼnimbánuu xúgíʼ xkujndu dí rígá náa tsu̱du̱u̱ numbaaʼ ga̱jma̱a̱ maʼni gámbáa xúgíʼ dí ra̱májánʼ. Ikha jngó i̱ndó numbayíí Jeobá. Á mu tséʼni, xákuwaanʼ jnduʼ náa congregación.

9. a) Ndiéjunʼ xkujndu nirígá náa congregación ndrígóo Corinto rá. b) Ndiéjunʼ niʼthún Pablo cristianos bi̱ Corinto rá.

⁹ Nákha siglo timbá nirígá mbá xkujndu náa congregación náa xuajin Corinto. Tikhun cristianos kuwa rugi̱ʼdu̱u̱n numuu rí tikhun numbayíí Pablo, eʼwíínʼ Apolos, eʼwíínʼ Cefas ga̱jma̱a̱ eʼwíínʼ Cristo. Índo̱ Pablo ndiʼyoo rí narígá, nixmiéjunʼ wéñuʼ. Rígi̱ nindxu̱u̱ mbóo xkujndu gakhi̱i̱ wéñuʼ numuu dí rígi̱ maʼni rí xakuwá jnduʼ náa congregación Corinto. Ikha jngó Pablo niʼthún: “Xuriʼtamijna”. Ma̱ngaa niʼthún rí gíʼmaa makuwa mbá kambáxu̱u̱n ga̱jma̱a̱ muguaʼdáá “mbo ri nundxaʼjuamijna”. Rí xúgi̱ gíʼmaa muʼnimbánii xtága̱bu̱ rígi̱. Nimbá miʼtsú ragíʼmaa murkuajímíjná náa congregación (1 Cor. 1:10-13; atraxnuu Romanos 16:17, 18).

10. Ndiéjunʼ nindoo gáʼsngáa Pablo índo̱ niʼthí rí bi̱ kaxtaʼwíin ni̱ndxu̱ún xóo bi̱ kixunguinʼ rá.

¹⁰ Pablo niʼni rí marmáʼáan a̱jkiún cristianos bi̱ kaxtaʼwíin rí ikhiin kaʼñúún makuwá mekhuíí ga̱jma̱a̱ dí ragíʼmaa mundxa̱ʼwa̱a̱ edxu̱ún ga̱jma̱a̱ numuu dí rígá “naʼ numbaʼ ríguiʼ” (Filip. 3:17-20). * Ma̱ngaa niʼthí rí bi̱ kaxtaʼwíin ni̱ndxu̱ún xóo bi̱ kixunguinʼ o nuriʼkuriyaʼ Dios ga̱jma̱a̱ Cristo. Índo̱ mbáa embajador xtáa náa i̱mba̱ xuajin. Tsekudaminaʼ náa xkujndu ga̱jma̱a̱ náa política dí rígá ikhí. Xúʼko̱ má bi̱ kaxtaʼwíin tsexuda̱mi̱jna̱ náa xkujndu ga̱jma̱a̱ náa política ndrígóo numbaaʼ rígi̱ (2 Cor. 5:20). Mangiin cristianos bi̱ guáʼthi̱i̱n makuwá náa tsu̱du̱u̱ Ku̱ba̱ʼ na̱nguá má exudami̱jna̱ náa xkujndu dí rígá náa numbaaʼ rígi̱. I̱ndó numbayíí Xa̱bu̱ Ñajunʼ ndrígóo Dios.

11, 12. a) Ndiéjunʼ ragíʼmaa mundxaʼwamíjna̱ nditháan á mu nandulúʼ mumbáyii Xa̱bu̱ Ñajunʼ ndrígóo Dios rá. b) Ndiéjunʼ nikumu̱u̱ mbáa ndxájulú a̱ʼgu̱ ga̱jma̱a̱ numún mbá tikhun xa̱bu̱ rá. c) Ndiéjunʼ nimbáyúu ndxájulú bugi̱ mu maniñuʼ randxa̱ʼwáminaʼ xúʼko̱ rá.

¹¹ Mbaʼin xa̱bu̱ nambáxu̱u̱n májánʼ gajmiún eʼwíínʼ numuu rí mbóó náa nikuwa mbóó rí naguʼún nuni ga̱jma̱a̱ mbóó ajngáa ethi. Ma̱ngaa nunimbaʼumíjna̱ ga̱jma̱a̱ numuu país ndrígu̱ún, mú gíʼmaa muñeumíjna̱ ga̱jma̱a̱ xundxa̱ʼwa̱míjna̱ nditháan rí ni̱ndxu̱lú itháan ki xóo iʼwíínʼ. Á mu nundxa̱ʼwa̱míjna̱ xúʼko̱ kaʼnii gíʼmaa muriʼkhumijná. Rígi̱ mambáyulúʼ muguajún jmbu náa xúgíʼ xkujndu. Ndiéjunʼ imbo̱o̱ gambáyuluʼ rá.

¹² Guʼyáá xkri̱da ndrígóo ndxájulú bi̱ mbiʼyuu Mirjeta. * Ikhaa nixtáa náa xuajin mba̱a̱ Yugoslavia, nixtáa náa xuajin náa xa̱bu̱ naguiñunʼ kuñún bi̱ kuwa náa xuajin Serbia. Mú nijmañuu rí Jeobá tseʼyoo rí mbá raza gíʼdoo itháan numuu ki xóo imbo̱o̱ ga̱jma̱a̱ rí Satanás nandoo rí xa̱bu̱ maguiñunʼ kuyamijná. Ikha jngó ikhaa niʼni mbá tsiakii mu mariʼkuminaʼ. Mú índo̱ nigi̱ʼdu̱u̱ guerra náa xuajñu, Mirjeta nikumu̱u̱ rí naguiñunʼ kaʼñúún xa̱bu̱ serbios. Asndu ní tándoo maʼtáruʼun. Ikhaa ndiʼyoo dí ra̱májánʼ nindxu̱u̱ rí naku̱mu̱u̱, ikha jngó nindo̱ʼo̱o̱ Jeobá rí mambáyúu mu ní xáku̱mu̱u̱ xúʼko̱ kaʼnii. Ma̱ngaa nindo̱ʼo̱o̱ rí mambáyúu mu mani̱ndxu̱u̱ precursora. Ikhaa naʼthí rí índo̱ naʼni tsiakiminaʼ mu mbaʼyáridoo rí  nandoo kaʼyulúʼ Jeobá náa maʼtáraʼa, rígi̱ nambáyúu itháan mu xáku̱mu̱u̱ xúʼko̱ kaʼnii.

13. a) Ndiéjunʼ nigíʼnuu ndxájulú Zoila rá. b) Xú káʼnii nindxa̱ʼwáminaʼ ndxájulú bugi̱ rá. c) Ndiéjunʼ eʼsngúlúʼ rí nigíʼnuu Zoila rá.

¹³ Mbáa ndxájulú bi̱ xuajñu México, nagumbiʼyuu Zoila, ni̱jkha̱ gáxtáa náa Europa. Náa congregación ndrígóo kuwa a̱ngiu̱lú bi̱ naguwáʼ náa i̱mba̱ níʼkhá náa América Latina. Ikhaa naʼthí rí tikhun nutsijma país ndrígóo, rí naguʼún nuni ga̱jma̱a̱ ajmúú rí nudxawíín. Rúʼko̱ naʼni gawúunʼ wéñuʼ. Mú nindo̱ʼo̱o̱ Jeobá mambáyúu mu xandxaʼwáminaʼ xúʼko̱ kaʼnii. Ndiéjunʼ eʼsngúlúʼ rí nigíʼnuu Zoila rá. Rí mbáa tikhun a̱ngiu̱lú maʼniún mingíjyúuʼ rí xákiʼníin índo̱ mbáa naʼthí dí raʼkhí ga̱jma̱a̱ numuu xuajñún. Ikha jngó ragíʼmaa muʼthá nimbá miʼtsú o muʼni rí makujmaa rí mbá grupo nindxu̱u̱ itháan májánʼ ki xóo imbo̱ʼ. Na̱nguá eyulú markuájímíjná náa congregación ni má kaníí (Rom. 14:19; 2 Cor. 6:3).

14. Ndiéjunʼ gándoo gámbáyaʼ mu matañu̱u̱n eʼwíínʼ xó má Jeobá rá.

¹⁴ Xa̱bi̱i̱ Jeobá bi̱ kuwáanʼ náa xúgíʼ numbaaʼ kuwáanʼ jnduʼ. Ikha jngó nditháan ragíʼmaa mundxaʼwamíjna̱ rí itháan míjínʼ ñajúnʼ bi̱ kuwa náa mbá xuajin ki xóo imbo̱o̱. Mbáa maʼni rí bi̱ kuwa náa guʼúlúʼ o xa̱bu̱ bi̱ kuwáanʼ mijngii gajmiúlú nisngúlú rí maʼndulú kuʼyáá xuajñulú. Mbáa asndu xóó rígá ndiéjunʼ kumulúʼ ga̱jma̱a̱ numún iʼwíínʼ xa̱bu̱ bi̱ naguwáʼ i̱mba̱ níʼkhá, xóo rí naguʼún nuni, ajngáa o raza. Á mu xúʼko̱ tani, ndiéjunʼ gámbáyaʼ mu matriʼkuminaʼ rá. Atatsaʼwáminaʼ xú káʼnii eʼñún Jeobá xa̱bu̱ bi̱ nunimbaʼumíjna̱ ga̱jma̱a̱ numuu xuajñún ma̱ngaa nakumu̱ún rí ñajúnʼ itháan ki xóo eʼwíínʼ. Atayáá i̱yi̱i̱ʼ rí naʼthí ga̱jma̱a̱ numuu rígi̱ índo̱ gatanigajmaa mbáwiin o mbá guʼwáanʼ. Ga̱jma̱a̱ atanda̱ʼa̱a̱ Jeobá rí mambáyaʼ matañu̱u̱n eʼwíínʼ xó má eʼñún ikhaa (atraxnuu Romanos 12:2).

15, 16. a) Xú eni eʼwíínʼ índo̱ nduyáá rí ni̱ndxu̱lú mixtiʼkuáanʼ rá. b) Xú gándoo xa̱bu̱ bi̱ guáʼdiin e̱ji̱n mumbañún mu mani̱ndxu̱ún jmbiin náa Jeobá rá.

¹⁵ Numuu rí nuʼnimbulúʼ náa Jeobá nguáná xa̱bu̱ bi̱ kuwa mijngii náa kuwáanʼ, bi̱ kuʼñúún o xa̱bu̱ bi̱ nuñajunʼ mbóó gajmiúlú o náa escuela nduyáá rí ni̱ndxu̱lú mixtiʼkuáanʼ wéñuʼ  (1 Ped. 2:19). Jesús niʼthí rí asndu maguiñunʼ kuyulúʼ numuu rí ni̱ndxu̱lú xúʼko̱ kaʼnii. Garmáʼáan a̱jkiu̱lú rí mbaʼin rí ikhiin tséyáá nditháan ga̱jma̱a̱ numuu Xa̱bu̱ Ñajunʼ ndrígóo Dios. Ikha jngó tsíkru̱ʼu̱u̱n náa numuu rí ikháanʼ nduʼyáá rí gíʼdoo wéñuʼ numuu mumbayíí i̱ndó Xa̱bu̱ Ñajunʼ buʼko̱.

¹⁶ Á mu nandulúʼ manindxu̱lúʼ jmbii náa Jeobá, ndayóoʼ rí muʼnimi̱jna̱ muʼnimbulúʼ má xúʼko̱ maski ajndu eʼwíínʼ nuni i̱mba̱ núthu (Dan. 3:16-18). Mbáa maʼni rí e̱ji̱n maʼniún mingíjyúuʼ maʼni mixtiʼkuiin. Tikhun namiñun rí xúraxi̱i̱ bandera o muni gaʼduunʼ xúgíʼ rí kaʼyoo ikhí. Ikha jngó xa̱bu̱ bi̱ guáʼdiin i̱ji̱n ndayóoʼ rí mumbañún e̱jñún mu xamiñun náa escuela. Xú káʼnii rá. Índo̱ gúnigajmaa mbá guʼwíin ma̱ndoo mutamijná xóo eʼyoo Jeobá á mu nuʼni rígi̱. Ma̱ngaa, ma̱ndoo musngúún e̱jñún xú gúthi májánʼ wéñuʼ rí nakumu̱ún ga̱jma̱a̱ gamajkhu (Rom. 1:16). Ga̱jma̱a̱ á mu ndayóoʼ, ma̱ndoo mutamijná gajmiún bi̱ nusngáa mu mutún rí naku̱mu̱lú.

17. a) Ndiéjunʼ dí ragíʼmaa mundxa̱ʼwa̱míjna̱lu rá. b) Náa numuu dí ragíʼmaa mundxa̱ʼwa̱míjna̱lú dí nuʼni nindxu̱u̱ itháan májánʼ rá.

¹⁷ Nda̱a̱ má dí raʼkhí rí nanigulúʼ ganitsu, ajngáa, dí nagui̱i̱ dí rígá náa xuajñulú ga̱jma̱a̱ rí naguʼunlú nuʼni náa ndijáanʼlu. Mú ragíʼmaa mundxa̱ʼwa̱míjna̱lú rí nanigulúʼ ikháanʼ nindxu̱u̱ itháan májánʼ ki xóo rí nanigu̱nʼ eʼwíínʼ. Náa numuu rá. Numuu rí Jeobá niʼni mbaʼa enii mu makuwáanʼlu gagi ga̱jma̱a̱ (Sal. 104:24; Rev. 4:11). Ikha jngó na̱nguá kaʼyoo muʼthá rí nuʼni nindxu̱u̱ itháan májánʼ.

18. Xú káʼnii embáyuluʼ rí mbuʼñún eʼwíínʼ xó má eʼñún Jeobá rá.

¹⁸ Jeobá nandoo rí xúgínʼ xa̱bu̱ muniʼniiʼ, mbuyamajkuíí ga̱jma̱a̱ makuwíin kámuu mbiʼi (Juan 3:16; 1 Tim. 2:3, 4). Ikha jngó ndayóoʼ muʼdxawíín rí nuthi eʼwíínʼ. Ga̱jma̱a̱ á mu tsenujngurámúnʼ xóo eʼthí Jeobá ma̱ndoo mundrígúlú maski ajndu i̱mba̱ núthu endxaʼwamíjna̱ ikháanʼ. Á mu nuʼni, makuwáanʼ itháan májánʼ, makuwáanʼ tsímáá gajmiúlú a̱ngiu̱lú. Numuu rí i̱ndó numbayíí Jeobá ga̱jma̱a̱ Xa̱bu̱ Ñajunʼ ndrígóo, na̱nguá exuʼdámíjná náa xkujndu dí rígá náa numbaaʼ rígi̱ ní má tséʼthún eʼwíínʼ rí munimbaʼumíjna̱ ga̱jma̱a̱ rí mani̱ndxu̱ún itháan ki xóo eʼwíínʼ. Ma̱ndoo muxnáa núma̱aʼ Jeobá numuu rí ikhaa naʼsngúlúʼ rí maʼndulú kuʼñúún eʼwíínʼ mu marigá tsímáá ga̱jma̱a̱ manindxu̱lúʼ xa̱bu̱ guabáanʼ. Nakumulú xóo bi̱ niʼnirámáʼ Salmo 133:1, náa naʼthí: “¡Atayáá! Ra̱ʼkhá tháán májánʼ ga̱jma̱a̱ mitsaan rí a̱ngiu̱lú makuwa mbá kambáxu̱u̱n”.