1, 2. a) Halía meha háhuduragua lubúeingu Bungiu ha lánina binadu dan lun? b) Ka meha lasaminarubei Hesusu tuagu ténpulu to Herusalénboun? c) Kaba wariha lidan arütíkulu le?

LÚMAGIÑE furumiñeti dan aniheingubeiñein aban fulasu le ñein lubéi háhuduragua lubúeingu Bungiu lun. Kéiburi dan le líchugunbei Aweli sákürifisiu lun Heowá, háfuga adügati meha aban latarü (Agumesehani 4:3, 4). Adugati meha giñe Noé, Abüraámü, Isaakü, Hakobu luma Moisesi latarü (Agumesehani 8:20; 12:7; 26:25; 35:1; Áfuriduni 17:15). Ariñagati giñe Heowá houn ísüraelina lun hadügün aban sanduariu lun háhuduragun lun (Áfuriduni 25:8). Dan lárigiñe, aba lariñagun houn lun hábunagun aban ténpulu (1 Urúeigu 8:27, 29). Dan le meha háfuridunbei ísüraelina Babilóniagiñe, aba hagumeserun óundaragua tidan haligilisin huríu (Márükosu 6:2; Huan 18:20; Adügaü 15:21). Ani óundaraguatiña meha furumiñetiña kristiánugu tidan burí muna (Adügaü 12:12; 1 Korintuna 16:19). Uguñe weyu, sun gefentiña luagu Heowá damuriguatiwa lun wáhuduragun lun Bungiu tidan saragu milu luban adamuridaguni to lídanboun sun ubóu.

² Inebetu meha ténpulu to Herusalénboun lun Hesusu. Dan le harihini lani Hesusu disipulugu ínsiñeni le lasandirubei tuagu ténpulu, aba haritaguni le lariñagubei aban sálumu: “Lagumuchaguagüdüñadina  nemeidin tau buban” (Sálumu 69:9; Huan 2:17). Furanguti mama lan ‘luban Heowá’ Luban Wadamuridagun, kei meha ténpulu (2 Krónikasi 5:13; 33:4). Gama lumoun, mosu inebe tan woun, ladüga ñein wadamuridagua lun wáhuduragun lun Bungiu. Lidan arütíkulu le warihibei le tariñagubei Bíbülia luagu ida luba lan wóuserun tidan luban wadamuridagun, ida luba lan wóunigirunu luma ida luba lan wídehan lun tábunawagun tanwoun luban adamuridaguni. *

3-5. a) Katoun san Luban Adamuridaguni? b) Ida luba warihini adamuridaguni?

³ Luban Adamuridaguni ligía fulasu le ñein lubéi wóundaragua lun wáhuduragun lun Heowá. Aban idewesei lúmagiñe Heowá wadamuridagun. Ka uagu? Lugundun íderagua lumutiwa lun wederebudagüdüni wamadagua luma Heowá. Ani yusu tumuti giñe lóundarun Heowá adamuridaguni lun tíchugun dǘgüdaguaü woun luma arufudahani le wemegeirubei. Ariñahani le weresibirubei lidan wadamuridagun ítara liña kei éigini le híchugubei Heowá luma Hesusu woun sagü dimaasu. Gúndaatiwa lau chansi le wibihibei lun hamisurahaniwa eiga lídangiñe ‘hadabulan’ (1 Korintuna 10:21).

⁴ Ariñagati Heowá woun tidan Bíbülia mosu lan woudin adamuridagua lun wáhuduragun lun luma lun wíchugun gurasu wóuniwagua (aliiha huméi Ebüréu 10:24, 25). Kei le inebe lubéi Heowá woun, mabusenruntiwa weferidirun ni aban adamuridaguni, ánheingubeirügü siñá lubéi woun. Arufuda wamuti weteingiradi luagu adamuridaguni dan le waranserun lubá woudin adamuridagua (Sálumu 22:22).

⁵ Ánhawa óusera buidu lidan adamuridaguni ani góunigi wamounme luban wadamuridagun, warufuduba inebe lan Bungiu woun. Lau ligaburi wóuserun busentiwa wadügün lun hayanuhan amu buidu luagu liri Heowá le aniheinbei luagu libe-agei tiri luban wadamuridagun (konparárü huméi luma 1 Urúeigu 8:17).

6. Ka hariñagubei fiú gürigia dan le houdin tidan luban wadamuridagun? (Ariha humóun iyawaü to lídanbei lagumeseha arütíkulu.)

⁶ Rútiña gürigia fe luagu inebe tan luban wadamuridagun woun. Ariñagati aban wügüri turquíana weiri tan lanigi lau larihini taruman luban wadamuridagun ani lídanñein lan lilugaarun sun katei. Ani wéiritu giñe lanigi ladüga buidu lan hasansiragun sun ha ñéinbaña ani busuguatiña lun lau ugundani. Aba lagumeserun wügüri ligía abasiiha lidoun adamuridaguni ani aba labadiseirun murusun dan lárigiñe. Lidan aban uburugu Indonesia aba tábunawagun aban iseri luban adamuridaguni. Aba hamisurahaniña íbirigu habesinanigu, gálidi hama amu gumadimatiña lun harihinu. Wéiritu lanigi gálidi dan le larihini buidu lan tábunawagun luma buidumeraü lan fuluri-agei. Ariñagati arufuda lani arumani le tídanbei luban wadamuridagun luagu gúnfuli wamani le wapurichihabei.

7, 8. Dan le tidan wamá Luban Adamuridaguni, ida liña warufuduni inebe lan Heowá woun?

⁷ Heowá amisurahabadiwa lidoun adamuridaguni. Ani súdiniti lun Heowá ida liña lan wasansiragun lubá woudin adamuridagua luma ida liña lan wóuserun lidan. Ligía busén wabéi wadügüni katei keisi lubudubu. Mabusenruntiwa wíchugun lanarime burí lúrudu luagu le gayarabei o le siñabei ladügǘn lidan adamuridaguni. Gama lumoun, moun lumuti giñe wóuserun kamá wábiñeñadiwa. Busenti Heowá lun sun lan ha ñǘdünbaña tidan luban adamuridaguni lun buidu lan hasandiragun houngua ñein. Gama lumoun, moun lumuti wóuserun lau minebenehabuni. Ligía wasansiragunbei buidu lubá  woudin. Móunahantiwa giñe uganu burí lau gágamuru, mayanuhan wagía hama amu, ani merederuntiwa eiga o ata lidan adamuridaguni. Ani arufudahatiña giñe agübürigu houn hasaanigu lun méibaagun hamá ani máhurerun hagía tidan luban adamuridaguni (Apurichihati 3:1).

⁸ Wóudiña tidan luban adamuridaguni lun wáhuduragun lun Heowá luma lun wafurendeirun luagu. Ligía metenirun wabéi lun bísinisi tidan luban adamuridaguni (konparárü huméi luma Neemíasi 13:7, 8). Haritagua waméi dan le lan larihinbei Hesusu fiú gürigia aluguraha ténpulurugu, aba lagañidun saragu ani aba labugaguniña ñéingiñe (Huan 2:13-17).

9, 10. a) Ka hadügübei gefentiña luagu Heowá lun hídehan lidan tábunawagun luban adamuridaguni? b) Ka resultóu ibihúbei lídangiñe sun áfaaguni le? c) Ida liña tíderaguni lóundarun Heowá sun damuriguaü le ñein lubéi maseinsun hamá íbirigu lun hábunagun aban luban adamuridaguni?

⁹ Gíbetiña gefentiña luagu Heowá nadagimeintiña saragu lidan tábunawagun luban adamuridaguni lidan sun ubóu. Adibuhatiña, bunaguatiña ani aranseha hagía luban adamuridaguni maguburahanga. Ítara liña tábunawagun kéiburi 5 luban adamuridaguni sagü weyu lidan lagumuhóun 15 irumu. Anhoun wabahüda súngubei bunawaguaaru tóugiñe 28,000 luban adamuridaguni.

¹⁰ Ariñagatu Bíbülia ha lan gíbebaña úmati lunti lan híderaguniña ha lóuguabaña úmati (aliiha huméi 2 Korintuna 8:13-15). Ligía teresibirunbalin lóundarun Heowá ídemuei le híchugubei ha gayarabei hídehan lidan wadagimanu burí le luma budagia le wíchugubei sun wagía lun tábunawagun luban adamuridaguni ñein lubéi temegeirúa. Seremei ídemuei le bunawaguaaru saragu luban adamuridaguni to buíduburitu lun damuriguaü le ídanbei maseinsun hamá íbirigu lun hafayeihan.

11. a) Ka hariñagubei fiú íbirigu tuagu iseri luban hadamuridagun? b) Ida liña hasandiragun hungua dan le hasaminarun hawagun íbirigu ha?

¹¹ Bunawaguatu aban luban adamuridaguni Kosu Rísiti lídanrügü widü weyu. Ariñagatiña íbirigu aban lan uénedü le gúnfulihali iseri luban adamuridaguni tuguya. Rútiña seremei lun Heowá, tun lóundarun luma houn íbirigu. Wéiriti heteingiruni Heowá luagu lubuidun idewesei ligía ani gúndaatiña giñe. Súngubei wagía gúndaatiwa dan le warihiniña wíbirigu íchiga seremei lun Heowá luagu sun le ladügübei hawagu. Gúndaatiwa anuheinharu lan luban adamuridaguni hama íbirigu lidan sun ubóu lun hadamuridagun. Furanguti labiniruñein lan Heowá tábunawagun luban adamuridaguni. Ka uagu? Ladüga dan le tábunawagun aban iseri luban adamuridaguni, aba hagumeserun iseri gürigia abasiiha lidoun adamuridaguni lun hafurendeirun luagu Heowá (Sálumu 127:1).

12. Ka gayarabei wadügüni lun wídehan lidan tábunawagun amu burí luban adamuridaguni?

 ¹² Ida luba san wídehan lidan tábunawagun iseri burí luban adamuridaguni? Añahein wádangiñe gayarati wídehan lau wawadigimaridun ñein. Ani súngubei wagía gayarati wíchugun seinsu lun wídehan. Anhein wadüga sun wayaraati lun wídehan, gúndaatimabadiwa. Le súdinitimabei wíchuguba lan uéiriguni lun Bungiu. Busentiwa wáyeihaniña lubúeingu Bungiu ha lánina binadu dan. Rútiña meha seinsu lau sun hagundan lun tábunawagun muna burí lun háhuduragun lun Heowá (Áfuriduni 25:2; 2 Korintuna 9:7).

13, 14. Según tariñaguni Bíbülia, ka uagu lunti lubéi wakipurunu luban wadamuridagun harumañu ani lun ua lan chagaguaü tidan?

¹³ Aban Bungiu sánduti ani harumati Heowá, ani mínsiñeti chagaguaü lun. Ligía lunti lubéi wakipurunu luban wadamuridagun harumañu ani lun lidan lan lufulasun sun katei (aliiha huméi 1 Korintuna 14:33, 40). Lun sandu wamá kei Heowá, mosu wasaminarun wóuserun ani hudugua wagíame lun lau arumani. Ani mosu giñe haruma lan wágubu (Arufudúni 19:8).

¹⁴ Anhoun wakipura luban wadamuridagun harumañu, buídubei wasandiragun woungua lun wamisurahaniña gürigia lidoun wadamuridagun. Ani harihibei gürigia inarüni lan busén wamá wawinwandun lidan aban iseri ubóu le harumati. Harihibei giñe wáhuduraguña lan lun aban Bungiu sánduti le lunbei ladügüni Ubóu ábanme paraísu (Isaíasi 6:1-3; Arufudúni 11:18).

15, 16. a) Ka uagu anihein lubéi dan hénrengu lan woun wakipurunu luban wadamuridagun harumañu? b) Ka uagu mosu lubéi wakipurunu luban wadamuridagun harumañu? c) Ida liña ladügǘn aransehani lun tarumadahóun luban adamuridaguni? d) Ka lubuidun chansi wibihibei sun wagía?

¹⁵ Anihein dan hénrengu lan wakipurunu luban wadamuridagun harumañu. Ka uagu? Ladüga ámuñegueinarügü lan hasaminan gürigia luagun arumani. Añahein awinwandutiña lidan fulasu le ñein lubéi saragu kaliki luma baribarabu. Añahein amu úati buídurügü lan hadunari lun harumadahan. Gayarati giñe gani lan ligaburi wagüriarunua efekütu luagu ida liña lan warihini arumani. Meberesenga  halía lan weredera o ka lan hasaminanbei gürigia ha geyegubaña wau, lunti wakipurunu luban wadamuridagun harumañu. Ka uagu? Ladüga ñein wáhuduragua lun Heowá (2 Lúrudu 23:14).

¹⁶ Anhein busén wabéi haruma tan luban wadamuridagun, mosu wasigirun aban programa lánina arumadahani. Adüga hamutu wéiyaaña lidan afiñeni programa tuguya ani aba hachoururuni lun ñein lan sun le mégeiwabei lun larumadahóun. Adügatiña giñe aransehani lun larumadahóun sun katei buidu. Anihein katei le lunti larumadahóun sagü lagumuchun adamuridaguni, ani anihein amu gayarati dísegua lan larumadahóun. Súngubei wagía gayarati wídehan lidan tarumadahóun luban wadamuridagun.

17, 18. a) Ka gayarabei wafurendeiruni hámagiñe lubúeingu Heowá ha lánina binadu dan? b) Ka uagu lunti lubéi buíduñu lan wakipurunu luban wadamuridagun?

¹⁷ Buíduñu liña meha hakipurunu lubúeingu Heowá ténpulu lidan binadu dan. Kei hénpulu, ruti meha urúei Hoasi gumadi houn fádirigu ha Hudábaña lun haransehanu ténpulu lau seinsu le híchugubei lílana ageiraü (2 Urúeigu 12:4, 5). Lóugiñe bián san irumu lárigiñe, yusu lumuti urúei Hosíasi budagia le híchugubei gürigia lun taransehóun ténpulu (aliiha huméi 2 Krónikasi 34:9-11). Ka gayarabei wafurendeirun lídangiñe le? Gayara lan giñe wakipurunu luban adamuridaguni harumañu ani aranseha wameime le mégeiwabei.

¹⁸ Ariha hamaali íbirigu ha arihibaña tau fiú sukursáli lidan fiú ageiraü luagu metenirúniwa lan buidu tun fiú luban adamuridaguni. Anihein dan susereti katei le ladüga mibe hamá subudihabutiña lun wadagimanu. Ani anihein dan ladüga maseinsun hamá lun haransehani. Gama lumoun, anhoun maransehan wamá luban wadamuridagun dan le mégeiwa lan, agadeireina tuba murusun murusun. Ani mabuidunbei hayanuhan gürigia wawagu. Ligía lunti lubéi wáfaagun lun wakipurunu luban adamuridaguni buidu. Ítara wíchuguba uéiriguni lun Heowá ani mawesirun wabéi seinsu le híchugubei wíbirigu.

19. Kaba san hadüga lun harufuduni inebe tan luban wadamuridagun hun?

¹⁹ Íderagua lumutiwa bérusu burí le warihibei lidan arütíkulu le lun warufudun inebesei tuagu luban wadamuridagun. Haritagua waméi lani lan Heowá sun luban adamuridaguni, mama lani ni aban gürigia ni lani somu damuriguaü. Anhein inebe lubéi Heowá woun, inebebei adamuridaguni woun inebeboun giñe muna to ñein lubéi wadamuridagua woun. Wíchuguba giñe seinsu lau sun wagundan lun tábunawagun luban adamuridaguni ani áfaagua wagíame lun wakipurunu harumañu. Ligíati, sigí waméi lani Hesusu hénpulu ani arufuda waméi inebe lan fulasu le ñein lubéi wáhuduragua lun Heowá woun (Huan 2:17).