1, 2. a) ¿Baqui miʼ chʼujutesañob Dios jiñi i wiñicob ti wajali? b) ¿Bajcheʼ yilal tsiʼ qʼuele Jesús jiñi templo ti Jerusalén? c) ¿Chuqui mi caj laj qʼuel ti ili temaj?

TIʼ pejtelel ora jiñi i wiñicob Dios an baqui miʼ tempañob i bʌ chaʼan miʼ chʼujutesañob. Jumpʼejl ejemplo, tajol Abel tsiʼ pulbe i majtan Jehová ti jumpʼejl pulʌntib (Génesis 4:3, 4). Noé, Abraham, Isaac, Jacob yicʼot Moisés tsiʼ meleyob pulʌntib jaʼel (Génesis 8:20; 12:7; 26:25; 35:1; Éxodo 17:15). Cheʼ jaʼel, Jehová tsiʼ sube jiñi israelob chaʼan miʼ melob jumpʼejl pisil bʌ otot chaʼan yaʼʌch miʼ chʼujutesʌntel (Éxodo 25:8). Ti wiʼil tsaʼ subentiyob i mel jumpʼejl templo (1 Reyes 8:27, 29). Cheʼ bʌ jiñi israelob tsaʼ loqʼuiyob majlel yaʼ ti Babilonia, tsaʼ caji i tempañob i bʌ ti ajñibʌl tac i cʼabaʼ sinagoga (Marcos 6:2; Juan 18:20; Hechos 15:21). Jiñi ñaxam bʌ xñoptʼañob tsiʼ tempayob i bʌ jaʼel ti ototʌl tac (Hechos 12:12; 1 Corintios 16:19). Ili ora, jiñi i testigojonbʌla Jehová mi lac tempan lac bʌ tiʼ Yotlel Tempa bʌ am bʌ cabʌl mil tiʼ pejtelel pañimil (mulawil) chaʼan mi lac chʼujutesan Dios.

² Jesús tsiʼ wen qʼuele ti ñuc jiñi templo ti Jerusalén. Cheʼ bʌ jiñi xcʌntʼañob i chaʼan Jesús tsiʼ qʼueleyob chaʼan miʼ wen cʼuxbin jiñi templo, tsiʼ cʼajtesayob muʼ bʌ i yʌl jiñi salmo: «Mi caj c jisʌntel chaʼan c bʌxlel ti a wotot» (Salmo 69:9; Juan 2:17). Tiʼ sujm, jiñi i Yotlel Tempa bʌ tac mach jiñic «i yotot Jehová», bajcheʼ jiñi templo ti wajali (2 Crónicas 5:13; 33:4, TNM). Pero yom mi laj qʼuel ti ñuc come yaʼʌch baqui mi lac tempan lac bʌ chaʼan mi lac chʼujutesan Dios. Ti ili  temaj mi caj laj qʼuel bajcheʼ yilal yom lac melbal miʼ yʌl jiñi Biblia yaʼ tiʼ Yotlel Tempa bʌ, bajcheʼ yom mi laj cʌntan i bajcheʼ miʼ mejlel laj cʌcʼ laj coltaya chaʼan miʼ chʌn mejlel i Yotlel Tempa bʌ. * (Qʼuele jiñi nota.)

3-5. a) ¿Chuquiyes jumpʼejl i Yotlel Tempa bʌ? b) ¿Bajcheʼ yom mi laj qʼuel jiñi tempa bʌ tac?

³ Jiñi i Yotlel Tempa bʌ jiñʌch baqui mi lac chaʼlen chʼujutesaya wen ñuc bʌ i cʼʌjñibal. Jumpʼejlʌch lac majtan tilem bʌ ti Dios jiñi tempa bʌ tac. ¿Chucoch? Come miʼ coltañonla chaʼan ñumen pʼʌtʌl mi la cajñel tiʼ tojlel bajcheʼ la camigo. Cheʼ jaʼel, jiñʌch baqui miʼ pʼʌtʼesañonla jiñi i yorganización Jehová yicʼot baqui miʼ cʌntesañonla. Jiñi laj cʌntesʌntel muʼ bʌ i yʌqʼueñonla Jehová yicʼot Jesús ti jujumpʼejl semana yaʼ ti tempa bʌ lajalʌch bajcheʼ jiñi bʌlñʌcʼʌl. Miʼ yʌqʼueñonla lac tijicñʌyel cheʼ miʼ pʌyoñobla yaʼ tiʼ «mesa» (1 Corintios 10:21).

⁴ Jehová miʼ subeñonla yaʼ ti Biblia chaʼan yom miʼ majlel lac chʼujutesan ti tempa bʌ tac i chaʼan mi lac chʼejlʼesan lac bʌ yicʼot yañoʼ bʌ (pejcan Hebreos 10:24, 25). Mach la comic lac sʌt mi jumpʼejlic tempa bʌ come mi laj qʼuel ti ñuc Jehová, cojach mi wersa cʼʌñʌlʌch. Cheʼ mucʼʌch lac chajpan lac bʌ, mi lac pʌs chaʼan utsʼatʌch mi laj qʼuel jiñi tempa bʌ tac (Salmo 22:22).

⁵ Mi weñʌch bajcheʼ yilal lac melbal yaʼ ti lac tempa bʌ yicʼot mi laj cʌntan i Yotlel Tempa bʌ, woliyʌch (choncolʌch) laj qʼuel ti ñuc Dios. Jiñi wem bʌ lac melbal la com chaʼan wen miʼ yʌcʼ ti ajlel i cʼabaʼ Jehová, tsʼijbubil bʌ ti cabʌl i Yotlel Tempa bʌ tac (mi caj a taj cheʼ bʌ miʼ yʌcʼ ti ñaʼtʌntel cheʼ bajcheʼ jiñi yaʼ ti 1 Reyes 8:17).

6. ¿Chuqui an i yʌlʌyob jiñi ajñemoʼ bʌ i julaʼtan i Yotlel Tempa bʌ tac? (Qʼuele jiñi foto am bʌ tiʼ tejchibal.)

⁶ Jiñi wiñicob xʼixicob (quixtañujob) miʼ qʼuelob chaʼan mi lac wen qʼuel ti ñuc jiñi i Yotlel Tempa bʌ. Juntiquil wiñic am bʌ ti Turquía toj sajtel i pusicʼal cheʼ bʌ tsiʼ qʼuele chaʼan wen sʌc yicʼot wen chajpʌbil chuqui tac an yaʼ tiʼ Yotlel Tempa bʌ. Cheʼ jaʼel, tsiʼ qʼuele chaʼan wen jach i pislelob tiʼ pejtelel jiñi yaʼ bʌ añob yicʼot chaʼan tseʼecña tsaʼ tili i pejcañob. Jiñi wiñic tsaʼ caji ti majlel tiʼ pejtelel jiñi tempa bʌ tac i mach jalic tsaʼ cʼoti i chʼʌmjaʼ. Ti jumpʼejl tejclum am bʌ ti Indonesia tsaʼ waʼchoconti jumpʼejl tsijiʼ bʌ i Yotlel Tempa bʌ. Jiñi hermanojob tsiʼ pʌyʌyob i qʼuel jiñi lʌcʼʌl bʌ chumulob, jiñi presidente yicʼot yambʌ xʼeʼtelob. Jiñi presidente utsʼatax tsiʼ qʼuele bajcheʼ tsaʼ mejli yicʼot chaʼan wen utsʼatax tsaʼ cʌyli yaʼ baqui an ñichteʼ tac. Tsiʼ yʌlʌ chaʼan i sʌclel jiñi i Yotlel Tempa bʌ, miʼ pʌs chaʼan mucʼʌch lac mel tiʼ sujm cheʼ bajcheʼ mi lac sub.

7, 8. ¿Bajcheʼ mi lac pʌs chaʼan mi laj qʼuel ti ñuc Jehová yaʼ tiʼ Yotlel Tempa bʌ?

⁷ Jehová jiñʌch muʼ bʌ i pʌyonla ti jiñi tempa bʌ tac. Miʼ qʼuel ti ñuc bajcheʼ yilal mi lac lʌp (xoj) lac pislel yicʼot bajcheʼ yilal jiñi lac melbal. Jin chaʼan, i pʼisol jach bajcheʼ yom mi lac xoj lac pislel. Mach yomic mi lac ñumel ti pʼis chaʼan bajcheʼ yom lac pislel. Pero mach yomic mi caj lac pʌs jaʼel chaʼan cheʼ bajcheʼ añonla ti la cotot yubil. Jehová yom chaʼan jiñi yañoʼ bʌ yicʼot joñonla, utsʼat mi laj cubin lac bʌ cheʼ mi lac majlel tiʼ Yotlel Tempa bʌ. Pero mach la comic lac pʌs chaʼan maʼañic mi laj qʼuel ti ñuc. Jin chaʼan, maʼañic mi lac lʌp majlel lac pislel leco jax bʌ ti qʼuelol, wen mi lac chajpan bajcheʼ yilal mi lac majlel. Maʼañic mi lac choc majlel mensaje tac, maʼañic mi lac pejcan yañoʼ bʌ, maʼañic mi lac chaʼlen uchʼel yicʼot mi lac jap chuqui la com tiʼ yorajlel jiñi tempa bʌ. Jiñi tatʌlob miʼ ticʼ chaʼan maʼañic miʼ chaʼleñob ajñel yicʼot alas i yalobilob yaʼ tiʼ Yotlel Tempa bʌ (Eclesiastés 3:1).

⁸ Yaʼ tiʼ Yotlel Tempa bʌ mi lac majlel lac chʼujutesan Jehová yicʼot chaʼan mi laj cʌn. Jin chaʼan, maʼañic mi lac taj ti tʼan chaʼan bʌ la queʼtel (mi caj a taj cheʼ bʌ miʼ yʌcʼ ti ñaʼtʌntel  cheʼ bajcheʼ jiñi yaʼ ti Nehemías 13:7, 8). Laʼ laj cʼajtesan chaʼan cheʼ bʌ Jesús tsiʼ qʼuele jiñi xchoñoñelob yaʼ ti templo, tsaʼ wen michʼa i tsiʼ chocoyob loqʼuel (Juan 2:13-17).

9, 10. a) ¿Bajcheʼ miʼ yʌcʼob i coltaya jiñi i testigojob Jehová tiʼ melol i Yotlel Tempa bʌ tac? b) ¿Chuqui tajbil chaʼan jiñi? c) ¿Bajcheʼ an i mele jiñi i yorganización Jehová chaʼan miʼ coltan jiñi congregación tac mach bʌ wen añobic i taqʼuin chaʼan miʼ tajob i yotlel i tempa bʌ?

⁹ Cabʌl i testigojob Jehová miʼ chaʼleñob tsʌts bʌ eʼtel (troñel) tiʼ melol i Yotlel Tempa bʌ tac tiʼ petol pañimil. Miʼ melob i dibujolel, miʼ waʼchocoñob jiñi otot yicʼot miʼ chaʼ tsijibtesañob, i maʼañic miʼ cʼajtiñob i tojol. Cheʼ bajcheʼ jiñi, melbil ñumen ti 28,000 i Yotlel Tempa bʌ ti jiñi 15 jab ñumeñix bʌ, joʼpʼejl ti jujumpʼejl qʼuin.

¹⁰ Jiñi Biblia miʼ yʌl chaʼan jiñi wen añobʌch bʌ i chaʼan yom miʼ coltañob jiñi mach bʌ cheʼiqui (pejcan 2 Corintios 8:13-15). Jin chaʼan, jiñi i yorganización Jehová miʼ cʼʌn ti utsʼat jiñi taqʼuin muʼ bʌ la cʌcʼ chaʼan miʼ mejlel baqui yom to i Yotlel Tempa bʌ, cheʼ jaʼel jiñi testigojob mucʼoʼ bʌ ti eʼtel loqʼuemoʼ bʌ tiʼ pusicʼal. Wocolix i yʌlʌ jiñi coltaya muʼ bʌ i yʌcʼob, an melbil cabʌl i Yotlel Tempa bʌ yaʼ ti congregación tac baqui mach wen añobic i taqʼuin.

11. a) ¿Chuqui miʼ yʌl jiñi hermanojob tsaʼ bʌ melbentiyob tsijiʼ bʌ i Yotlel Tempa bʌ? b) Cheʼ maʼ ñaʼtan ili hermanojob, ¿bajcheʼ yubil maʼ wubin?

¹¹ Yaʼ ti Costa Rica, ti 8 qʼuin tsaʼ mejli jumpʼejl i Yotlel Tempa bʌ. Jiñi hermanojob miʼ yʌlob chaʼan tsaʼʌch mejli i tajob jiñi tsaʼ bʌ i wen ñaʼtayob tiʼ pusicʼal. Miʼ yʌqʼueñob wocolix i yʌlʌ Jehová, i yorganización yicʼot jiñi yambʌ hermanojob. Wen tijicñayob chaʼan jiñi majtañʌl wen utsʼatax bʌ tsiʼ yʌqʼueyob Jehová. Miʼ yʌqʼueñonla lac tijicñʌyel jaʼel cheʼ jiñi hermanojob miʼ yʌqʼueñob wocolix i yʌlʌ Jehová chaʼan muʼ bʌ i mel tiʼ tojlelob. Wen utsʼat mi laj qʼuel cheʼ bʌ jiñi hermanojob tiʼ pejtelel pañimil añob i yotlel i tempa bʌ. Wen tsiquil chaʼan Jehová woli (yʌquel) i yʌqʼuen i bendición jiñi eʼtel tiʼ melol i Yotlel Tempa bʌ tac. ¿Chucoch? Come cheʼ bʌ miʼ mejlel jumpʼejl tsijiʼ bʌ i Yotlel Tempa bʌ, cabʌl miʼ techob majlel ti tempa bʌ tac chaʼan miʼ cʌñob i chaʼan bʌ Jehová (Salmo 127:1).

12. ¿Bajcheʼ mi lac mejlel ti coltaya chaʼan miʼ ñumen mejlel i Yotlel Tempa bʌ tac?

¹² ¿Bajcheʼ mi lac mejlel ti coltaya chaʼan miʼ ñumen mejlel i Yotlel Tempa bʌ tac? An muʼ bʌ i mejlel laj cʌcʼ lac bʌ tiʼ melol jiñi eʼtel. Ti lac pejtelel miʼ mejlel la cʌcʼ lac taqʼuin chaʼan miʼ tojtʌl jiñi eʼtel tac. Tijicña mi caj la cubin lac bʌ mi mucʼʌch laj cʌcʼ laj coltaya jaʼel. Pero ñumen ñuc bʌ i cʼʌjñibal jiñʌch mi caj laj cʌqʼuen i ñuclel Jehová. La com lac tsajcan bajcheʼ tsiʼ mele jiñi i wiñicob Dios ti wajali. Tiʼ tijicñʌyel tsiʼ yʌcʼʌyob i taqʼuin chaʼan miʼ mejlel baqui miʼ chʼujutesʌntel Jehová (Éxodo 25:2; 2 Corintios 9:7).

13, 14. Cheʼ bajcheʼ miʼ yʌl jiñi Biblia, ¿chucoch yom utsʼat an tiʼ pejtelel chuqui an yicʼot yom sʌc i Yotlel Tempa bʌ?

¹³ Jehová chʼujul yicʼot sʌc, i maʼañic miʼ mulan jiñi pucuchejel bʌ. Jin chaʼan, yom utsʼat an tiʼ  pejtelel chuqui an yicʼot yom sʌc jiñi i Yotlel Tempa bʌ (pejcan 1 Corintios 14:33, 40 *). Chaʼan chʼujulonla bajcheʼ Jehová, yom sʌc chuqui mi lac ñaʼtan, chuqui mi lac mel yicʼot cheʼ mi lac chʼujutesan. Cheʼ jaʼel, yom chʌn sʌc miʼ yajñel jiñi lac bʌcʼtal (Apocalipsis 19:8).

¹⁴ Mi chʌn sʌc an i Yotlel Tempa bʌ, ti lac tijicñʌyel mi caj lac pʌyob tilel jiñi quixtañujob. Mi caj i qʼuelob chaʼan la comʌch chumtʌl ti jumpʼejl tsijiʼ bʌ pañimil sʌc bʌ. Cheʼ jaʼel, mi caj i qʼuelob chaʼan choncolʌch lac chʼujutesan jiñi chʼujul bʌ Dios muʼ bʌ caj i sujtesan ti utsʼatax bʌ paraíso ili Pañimil (Isaías 6:1-3; Apocalipsis 11:18).

15, 16. a) ¿Chucoch an i tajol wocol chaʼan chʌn sʌc miʼ yajñel i Yotlel Tempa bʌ? b) ¿Chucoch yom chʌn sʌc jiñi i Yotlel Tempa bʌ? c) ¿Bajcheʼ chajpʌbil chaʼan miʼ sʌqʼuesʌntel i Yotlel Tempa bʌ a chaʼan? d) ¿Chuqui ti utsʼat bʌ eʼtel an lac chaʼan ti lac pejtelel?

¹⁵ An i tajol wocolʌch chaʼan chʌn sʌc miʼ yajñel jiñi i Yotlel Tempa bʌ. ¿Chucoch? Come mach junlajalic bajcheʼ miʼ ñaʼtañob i chaʼan bʌ sʌclel jiñi quixtañujob. An chumuloʼ bʌ baqui wen cabʌl tsʼubejn yicʼot ocʼol. Yicʼot jeʼel an baqui mach wen añic jaʼ yicʼot jiñi i cʼʌjñibal tac bʌ chaʼan sʌconla. Tajol yʌñʌl bajcheʼ mi laj qʼuel jaʼel jiñi sʌclel tiʼ caj bajcheʼ tsaʼ cosʌntiyonla. Anquese mach junlajalic baqui chumulonla yicʼot yʌñʌl chuqui miʼ ñaʼtan jiñi yañoʼ bʌ, yom chʌn utsʼat chuqui an yicʼot yom sʌc jiñi i yotlel lac tempa bʌ. ¿Chucoch? Come yaʼʌch baqui mi lac chʼujutesan Jehová (Deuteronomio 23:14).

¹⁶ Mi la com chaʼan sʌc miʼ yajñel i yotlel lac tempa bʌ, yom an wem bʌ programa chaʼan miʼ sʌqʼuesʌntel. Jiñi ancianojob yom miʼ melob jiñi programa yicʼot miʼ qʼuelob chaʼan añʌch tiʼ pejtelel chuqui yom bʌ miʼ cʼʌjñel. Miʼ qʼuelob jaʼel bajcheʼ yom miʼ mel jiñi hermanojob chaʼan wen miʼ luʼ sʌqʼuesʌntel. An yom tacʌch bʌ miʼ sʌqʼuesʌntel ti jujumpʼejl tempa bʌ, pero an tac mach bʌ cheʼiqui. Ti lac pejtelel miʼ mejlel lac mel  ili utsʼatax bʌ eʼtel chaʼan chʌn sʌc miʼ yajñel i yotlel lac tempa bʌ.

17, 18. a) ¿Chuqui mi laj cʌn tiʼ tojlel i wiñicob Jehová ti wajali? b) ¿Chucoch chʌn utsʼat bajcheʼ yom an lac chaʼan jiñi i yotlel lac tempa bʌ?

¹⁷ Jiñi i wiñicob Jehová ti wajali chʌn utsʼat an i chaʼañob jiñi templo. Jumpʼejl ejemplo, jiñi rey Jehoás tsiʼ sube jiñi ñuc bʌ xmotomajob ti Judá chaʼan miʼ cʼʌñob jiñi taqʼuin tsaʼ bʌ i yʌcʼʌ jiñi tejclum chaʼan miʼ tojʼesʌntel jiñi templo (2  Reyes 12:4, 5). Cheʼ bʌ añix ñumen 200 jab, jiñi rey Josías tsiʼ cʼʌñʌ jaʼel i taqʼuin jiñi tejclum tiʼ tojʼesʌntel jiñi templo (pejcan 2 Crónicas 34:9-11). ¿Chuqui mi laj cʌn chaʼan iliyi? Yom wen mi lac chʌcʌ qʼuel jiñi i Yotlel Tempa bʌ yicʼot mi lac tojʼesan jiñi yom bʌ tojʼesʌntel.

¹⁸ An sucursal tac am bʌ i qʼuele chaʼan maʼañic miʼ wen cʌntʌntel cheʼ bajcheʼ yom jiñi i Yotlel Tempa bʌ tac ti jiñi país. An i tajol chaʼan mach cabʌlic yujilob i melol jiñi eʼtel. Yambʌ come maʼañic wen an taqʼuin chaʼan miʼ cʼʌjñel. Pero mi maʼañic miʼ tojʼesʌntel cheʼ yom miʼ mejlel, mi caj i ñumen asiyel majlel. Mach utsʼatic chuqui mi caj i ñaʼtan jiñi quixtañujob chaʼañonla cheʼ bʌ miʼ taj i qʼuelob jiñi. Jin chaʼan, yom mi lac chaʼlen wersa chaʼan chʌn utsʼat bajcheʼ yom an i yotlel lac tempa bʌ. Cheʼ bajcheʼ ili mi caj la cʌqʼuen i ñuclel Jehová yicʼot maʼañic mi caj laj cʼʌn i taqʼuin la quermañojob ti lolomjach.

19. Chaʼan maʼ pʌs chaʼan mucʼʌch a qʼuel ti ñuc jiñi i yotlel a tempa bʌ, ¿chuqui mi caj a mel?

¹⁹ Jiñi texto tac tsaʼ bʌ laj qʼuele ti ili temaj miʼ coltañonla chaʼan mi laj qʼuel ti ñuc jiñi i Yotlel Tempa bʌ tac. Yom mi laj cʼajtesan chaʼan tiʼ pejtelel i Yotlel Tempa bʌ mach i chaʼañic juntiquil quixtañu o jiñi congregación, i chaʼañʌch Jehová. Mi mucʼʌch laj qʼuel ti ñuc Jehová, mi caj laj qʼuel ti ñuc jiñi tempa bʌ tac yicʼot jiñi i Yotlel Tempa bʌ. Ti lac tijicñʌyel mi caj la cʌcʼ lac taqʼuin chaʼan miʼ mejlel yambʌ i Yotlel Tempa bʌ tac i mi caj lac chaʼlen wersa chaʼan chʌn sʌc yicʼot chʌn utsʼat bajcheʼ yom miʼ yajñel. Jin chaʼan, laʼ lac tsajcan bajcheʼ tsiʼ mele Jesús yicʼot laʼ lac pʌs chaʼan mi laj qʼuel ti ñuc yaʼ baqui mi lac chʼujutesan Jehová (Juan 2:17).