1, 2. (a) Pe den diniman fu Yehofa fu fositen be e dini en? (b) Fa Yesesi be e si a tempel di be de aini Yelusalem? (c) Fu sowtu toli wi o taki aini a artikel ya?

LETI enke den diniman fu Yehofa fu fositen, a so den diniman fi en aini a ten ya abi wan peesi pe den e go dini en. Wan fu den man di be e dini Yehofa aini a ten di pasa a be Abel. A kan taki a be meke wan altari di a be e tyai ofaandi gi Yehofa (Genesesi 4:3, 4). Ala den man enke Nowa, Abalaham, Isaki, Yakopu anga Mosesi be meke altari tu (Genesesi 8:20; 12:7; 26:25; 35:1; Ekisodesi 17:15). Yehofa be taigi den Islayelisama fu den meke wan tabernakel (Ekisodesi 25:8). Bakaten a taigi den fu meke wan tempel (1 Kownu 8:27, 29). Baka di a foluku fu Gadu komoto a katibo a Babilon, den be abi a gwenti fu kon a makandii aini den keliki osu fu den Dyu (Malikisi 6:2; Yohanisi 18:20; Toli 15:21). Den Kelesten aini a ten fu den apostel be gwenti holi komakandaa aini a osu fu baala anga sisa (Toli 12:12; 1 Korentesama 16:19). Aini a ten ya, a foluku fu Yehofa e kon makandaa aini omen dunsu Kownukondee zaal a hii goontapu. Den e kisi leli fu Yehofa te den de aini den Kownukondee zaal. Den e dini Yehofa ape tu.

² Yesesi be abi lesipeki gi a tempel fu Yehofa di be de aini Yelusalem. Den disipel fu Yesesi be si a lobi di Yesesi be abi gi a  tempel. A sani de be membee den a san a psalm sikiifiman be taki: „A lobi di mi abi gi a osu fi i, de enke wan faya di e boon mi aini se” (Psalm 69:9; Yohanisi 2:17). Den Kownukondee zaal á de enke a tempel aini Yelusalem, di sama be sabi enke a „osu fu Yehofa” (2 Koloniki 5:13; 33:4). Ma winsi fa, u mu abi lesipeki gi a peesi pe wi e dini Yehofa. Aini a artikel ya, wi o taki fu wantu leli fu Beibel di o soi u fa u mu tyai useefi te u de a den Kownukondee zaal. Wi o luku tu fa u mu solugu den, anga fa u sa gi moni fu yeepi meke Kownukondee zaal. *​—Luku san sikiifi a ondoose.

3-5. San a wan Kownukondee zaal? Fa u mu si den komakandaa fu u?

³ Na a Kownukondee zaal sama gwenti kon a makandii fu dini Yehofa. Wan fu den gaan bun di Gadu gi u, a den komakandaa, bika den e taanga a biibi fu u. A olikanisâsi fi en e gi u taanga-sikin a den komakandaa. Den e gi u den leli di wi abi fanowdu tu. Yehofa anga a Manpikin fi en gi wi a gaandi fu kon nyan na ’a tafaa fi en’ ala wiki (1 Korentesama 10:21). Noiti u mu si a gaandi ya enke wan lawlaw sani.

⁴ Beibel e soi kiin taki Yehofa wani u go a den komakandaa fu go dini en. Ai soi u tu taki a wani u gi taawan taanga-sikin te u de ape. (Leisi Hebrewsama 10:24, 25.) Fu di wi e lesipeki Yehofa, meke u ná o puu dei fu go a komakandaa efu a á de taanga fanowdu. Wi e soi taki wi e teke den komakandaa fu bigi te wi e seeka useefi a fesi, anga te wi e meke moiti fu gi piki.​—Psalm 22:22.

⁵ A fasi fa wi e tyai useefi a den komakandaa anga a fasi fa wi e solugu den Kownukondee zaal, e soi efu wi e lesipeki Yehofa tuutuu. U wani gafa a nen fu Yehofa anga a fasi fa wi e tyai useefi. Son leisi a nen ya e sikiifi a fesise fu den Kownukondee zaal.​—Luku 1 Kownu 8:17.

6. San son sama taki fu den Kownukondee zaal fu u anga den sama di e go ape? (Luku a fowtow na a bigin.)

⁶ Sama di á de Kotoigi e si taki wi abi lesipeki gi den Kownukondee zaal fu u. Wan man aini Tolukukondee be taki: „Mi lobi a fasi fa den e du sani aini a Kownukondee zaal, anga a fasi fa ala sani de kiinkiin. Den sama be wei koosi di fiti, den be e lafu, den be e taki anga mi a wan switifasi tu. A sani ya be switi gi mi.” A man ya be bigin go na ala den komakandaa. A á teke langa seefi neen a dopu. Aini wan fu den foto fu Indonesia, den baala be kai wantu biitisama, a edeman fu a foto, anga wantu taa heiheiman fu kon luku a nyun Kownukondee zaal fu den. A edeman fu a foto be lobi a fasi fa den Kotoigi be meke a zaal. A be lobi den moin boomiki di den be paandi tu. A taki: „A fasi fa a Kownukondee zaal kiin e soi taki u biibi taanga tuutuu.”

7, 8. Fa wi e soi taki wi e lesipeki Yehofa te u de a den Kownukondee zaal?

⁷ A Yehofa na a sama di e kai u fu kon a den komakandaa. A fasi fa wi e wei koosi anga a fasi fa wi e tyai useefi te u de a den Kownukondee zaal pelensipali gi en. Efu wi e lesipeki Yehofa, da u ná o du enke u santa moo taawan efuso e suku fini tumisi a komakandaa. U ná o du enke u de a osu tu efuso wei koosi di á fiti gi komakandaa. Yehofa wani den baala anga sisa anga den sama di den e kai kon a komakandaa fii bun te den de ape. Ma tokuso a á wani den du sani di e soi taki den ná abi lesipeki gi den komakandaa. Wi á mu takitaki, nyan,  diingi efuso sende bosikopu a telefon gi taawan te a komakandaa e holi tu. Mama anga dada mu leli den pikin fu den taki den á mu lon pee te den de aini a Kownukondee zaal.​—Peleikiman 3:1.

⁸ Yesesi ati be boon di a si sama e seli sani aini a tempel fu Gadu. A sani de meke a poti den sama a doo (Yohanisi 2:13-17). Te wi e go a den komakandaa, a dini wi e go dini Yehofa. Boiti dati, wi e go teke den leli fi en tu. Neen ede meke a á be o fiti fu sete bisnis toli te u de ape.​—Luku Nehemiya 13:7, 8.

9, 10. (a) San e yeepi a foluku fu Yehofa fu meke Kownukondee zaal? San na a bakapisi? (b) Fa a olikanisâsi fu Yehofa yeepi omen kemeente di ná abi moni sai fu meke wan zaal?

⁹ Den diniman fu Yehofa e wooko taanga a hii goontapu fu meke Kownukondee zaal. Den e teken, meke efuso seeka den Kownukondee zaal di booko, sondee fu sama pai den. Neen meke aini den 15 yali di pasa, u meke moo enke 28.000 Kownukondee zaal a hii goontapu. Dati wani taki aini den 15 yali di pasa, den meke wan sani fu 5 Kownukondee zaal ala dei.

¹⁰ A olikanisâsi poti Kotoigi a wooko fu meke Kownukondee zaal a den peesi di abi wan fanowdu. Ná fu moni den Kotoigi ya e wooko. A den moni di sama e gi, a olikanisâsi e koboloiki fu meke den zaal ya. Den Kotoigi e du san Beibel taki. Den sama di abi, e yeepi den sama di ná abi. (Leisi 2 Korentesama 8:13-15.) San na a bakapisi? A olikanisâsi meke omen Kownukondee zaal gi den kemeente di á be abi moni sai fu meke wan zaal.

11. San wantu baala taki fu a nyun Kownukondee zaal di den fende? Fa a sani di den taki e meke i fii?

¹¹ Wantu baala fu wan kemeente a Kosta Rika sikiifi taki: „A be gei enke a deen wi e deen di u be taampu na a doomofu fu a Kownukondee zaal! Wi á be poi biibi. Aini aitin dei namo den meke a gendee Kownukondee zaal fu u. A fu di Yehofa holibaka gi u, fu di a olikanisâsi fi en be seeka sani, anga fu di den baala be wooko taanga, meke a Kownukondee zaal ya meke. A zaal ya de enke wan gaan gudu di Yehofa gi u. Ná pikin piisii wi e piisii.” Ai switi gi u te wi e si fa baala anga sisa e gi Yehofa daa gi den sani di Yehofa du gi den. Wi e piisii tu taki den baala anga sisa fu u a hii goontapu abi den eigi Kownukondee zaal. Wi e si kiin taki Yehofa e holibaka gi a meke di wi e meke Kownukondee zaal. Bika te den Kownukondee zaal ya meke, moo ipi sama e kon a den komakandaa fu leli sabi Yehofa.​—Psalm 127:1.

12. Fa i sa gi wan ana fu yeepi meke Kownukondee zaal?

¹² Somen baala anga sisa e piisii te den man gi wan ana fu yeepi meke Kownukondee zaal. Winsi wiseefi á poi go yeepi, tokuso u sa gi moni fu yeepi meke den  Kownukondee zaal ya. Te wi e du ala san u poi fu holibaka gi a wooko ya, da wi o fii bun. Ma ná dati wawan, wi o gi Yehofa gaandi tu. Boiti dati, wi o soi taki wi e waka a den Kelesten baka fu fositen di be lobi gi moni fu yeepi meke a osu pe den be e dini Yehofa.​—Ekisodesi 25:2; 2 Korentesama 9:7.

13, 14. Sowtu toli aini Beibel e soi u taki a Kownukondee zaal fu u mu de kiinkiin ala yuu?

¹³ Yehofa a wan santa Gadu di kiin. A á lobi te sani e waka buuya buuya. Neen ede wi e kiin a Kownukondee zaal fu u ala yuu. U mu poti ala sani a den peesi tu. (Leisi 1 Korentesama 14:33, 40.) Efu u wani santa enke Yehofa, efu u wani kiin enke en, da a fasi fa wi e dini en, a fasi fa wi e denki, anga a fasi fa wi e tyai useefi mu kiin. Boiti dati, u sikin mu kiin tu.​—Openbaring 19:8.

¹⁴ Te a Kownukondee zaal fu u kiin, da wi o piisii fu kai sama kon a den komakandaa. Den sama di wi o kai, o si taki a ná peleiki namo wi e peleiki taki a goontapu ya o kiin te a o toon wan paladeisi, ma den o si taki useefi kiin tu. Den o si tu taki a Gadu di wi e dini, a wan kiin Gadu di santa, wan Gadu di o meke a goontapu ya toon wan moin paladeisi. Efu u wani santa enke Yehofa, efu u wani kiin enke en, da a fasi fa wi e dini en, a fasi fa wi e denki, anga a fasi fa wi e tyai useefi mu kiin.​—Yesaya 6:1-3; Openbaring 11:18.

15, 16. (a) Saide meke a ná ala yuu a makiliki fu meke a Kownukondee zaal tan kiinkiin? Fu saide a mu de kiinkiin ala yuu? (b) Fa sani sete aini kemeente fi i fu kiin a Kownukondee zaal? Sowtu gaandi ala wi abi?

¹⁵ A ná ala sama kiin na aseefi fasi. Fu saide? Bika a ná ala sama kiya na aseefi fasi. Boiti dati, son sama e tan a peesi di lai fungi efuso peesi di abi tokotoko pasi.  Taawan ná abi wataa sai fu diingi efuso sani fu kiin osu. Ma a ná abi toobi pe wi e tan, efuso fa den sama aini a biiti fu u de, ala yuu a Kownukondee zaal mu de kiinkiin. Na ape wi e kon a makandii fu dini Yehofa.​—Deitolonomi 23:14.

¹⁶ Efu u wani a Kownukondee zaal fu u de kiinkiin, da u mu seeka sani fu kiin en. Den owluman mu poti a pampila tapu sama abi a gaandi fu kiin a Kownukondee zaal. Den e solugu tu taki sani de fu kiin a Kownukondee zaal. Den owluman mu sete sani taki den sama di abi a gaandi fu kiin a zaal, du a wooko de tu. Son sani mu kiin baka ibii komakandaa. Taa sani u sa kiin a wan taa ten. Ala wi abi a gaandi fu yeepi kiin a Kownukondee zaal.

17, 18. (a) San wi e leli fu a fasi fa den diniman fu Yehofa be e solugu a tempel fosi? (b) Fu saide meke u mu solugu a Kownukondee zaal fu u?

¹⁷ Wan taa fasi fa wi e solugu a Kownukondee zaal fu u, a te wi e seeka den sani di booko. Den diniman fu Yehofa fu fositen be e du a sani ya tu. A pisi ten di Kownu Yowas be e tii Yuda, sama be e tyai moni go poti aini a tempel. A kownu be taigi den pilisite fu den teke a moni de, da den seeka den pisi fu a tempel di be booko (2 Kownu 12:4, 5). Baka wan sani fu 200 yali, Kownu Yosiya be teke a moni di sama be tyai go poti aini a tempel tu fu seeka den pisi fu a tempel di be booko.​—Leisi 2 Koloniki 34:9-11.

¹⁸ Den baala di e teke fesi a son Beikantoo kon si taki den sama aini a kondee fu den á gwenti solugu osu efuso wooko sani. A kan taki gaanse fu den á sabi fa den mu solugu den osu. A kan tu taki den ná abi moni sai fu meke den sani di booko. Ma efu wi á gwenti seeka den sani fu a Kownukondee zaal di booko, da baka wan pisiten, taa sama o si taki a zaal fu u á moin moo. A sani de o gi Yehofa polinen. Ma te wi e du ala san u poi fu solugu a Kownukondee zaal fu u, da wi e gafa Yehofa. Wi o soi tu taki u nái poli a moni di den baala anga sisa fu u be poti aini a kemeente.

19. San yu o du fu soi taki yu e lesipeki a peesi pe yu e dini Yehofa?

¹⁹ A Kownukondee zaal a wan osu di u gi Yehofa. A ná wan sama efuso wan kemeente abi en. Enke fa u luku aini a artikel ya, da den leli fu Beibel e yeepi u fu si den peesi pe wi e dini Yehofa a wan bun fasi. Fu di wi e lesipeki Yehofa, meke wi e soi lesipeki gi den komakandaa anga den Kownukondee zaal fu u. Wi e piisii te wi e gi moni fu meke Kownukondee zaal. Wi e piisii tu fu du ala san u man fu solugu den, efuso fu meke den de kiinkiin ala yuu. Leti enke Yesesi, u wani soi taki wi abi lobi anga lesipeki gi a peesi pe wi e dini Yehofa.​—Yohanisi 2:17.