1, 2. (1) ¿Jalapuʼushi naʼwaajüin Maleiwa na aʼyataapuʼukana nümüin sümaiwa paala? (2) ¿Kojutapuʼusüche nümüin Jesuu tü aʼwaajülee Maleiwa chajatkat Jerusalén? (3) ¿Kasa wekirajaajeetka anain sünain ekirajaayakat tüü?

SÜMAIWA PAALA, akumajapuʼushii aʼwaajülee na aʼyataapuʼukana nümüin Maleiwa. Jamüshijaʼa Abel, eeshijaʼa süpüla nüpaaʼuwajüin ipa süpüla naʼajüinjachin anneerü nümüin Jeʼwaa (Gén. 4:3, 4). Akaʼaya Noé, Abraham, Isaac, Jacob otta Moisés, apaaʼuwajüshii naya ipa süpüla naʼajüinjatüin mürüt nümüin Maleiwa (Gén. 8:20; 12:7; 26:25; 35:1; Éx. 17:15). Nuluwataain Jeʼwaa na israeliitakana süpüla nakumajüinjatüin wanee aʼwaajülee (Éx. 25:8). Kakalia mapa süchikijee tia, nukumajirüin naya wanee piichi aʼwaajülee (1 Rey. 8:27, 29). Süchikijee nojuʼitüin na israeliitakana Babiloniajee, outkajaʼawaishii naya suluʼu piichi ekirajülee (Mar. 6:2; Juan 18:20; Aluw. 15:21). Na nikirajüinkana Jesuu, outkajaʼawaishii suluʼu piichi (Aluw. 12:12; 1 Cor. 16:19). Maaʼutpünaa yaa, outkajaashii na aküjüliikana pütchi nüchiki Jeʼwaa suluʼu Piichi Outkajaalee. Watta maʼin saalii Piichi Outkajaalee sainküin mmakat.

² Kojutapuʼusü nümüin Jesuu tü aʼwaajülee Maleiwa chajatkat Jerusalén. Neʼraiwaʼaya na nikirajüinkana Jesuu kojutüin nümüin Jesuu tü aʼwaajüleekat, sotojoosü naaʼin tü pütchi sümakat salmo: «Keeʼireeshaatasü taaʼin kojutüin pipia sutuma wayuu» (Sal. 69:9, TNM; Juan 2:17). Maaʼulu yaa, «nipia Jeʼwaa» nnojotsü münüin tü Piichi  Outkajaaleekat (2 Crón. 5:13; 33:4, TNM). Kojutüinjatpejeʼe wamüin tü Piichi Outkajaaleekat süka woutkajaain suluʼu süpüla aʼwaajaa Jeʼwaa. Sünain ekirajaayakat tüü, wekirajaajeerü anain tü sümakat tü Wiwüliakat süchiki tü wakuwaʼipainjatkat sünain tü outkajawaakat, tü waaʼinrajatkat süpüla waaʼinmajüin tü Piichi Outkajaaleekat jee müsia tü waaʼinrajatkat süpüla sukumajünüinjatüin sooʼomüin Piichi Outkajaalee. *

3-5. (1) ¿Kasapülajatü tü Piichi Outkajaaleekat? (2) ¿Jamüsü kojutüinjatka wamüin tü outkajawaakat?

³ Suluʼu tü Piichi Outkajaaleekat, waʼwaajüin Maleiwa. Talatüsü waaʼin sutuma woutkajaain, süka jamüin, aleewain maʼin waya nümaa Maleiwa sutuma. Nikirajüin waya Jeʼwaa sükajee tü nupueulosekat jee nütütüleʼerüin waaʼin. Katsüinsü waaʼin sutuma tü eküütkat, akaataajaʼa neʼe tü pütchi ekirajünakalü anain waya sünain tü outkajawaakat, katsüinsü wanoula sutuma. Anashaatashii maʼin waya süka müin nuunejaain waya Jeʼwaa nümaa Jesuu sünain ekawaa saaʼu nemeesain (1 Cor. 10:21, TNM).

⁴ Nüküjüin Jeʼwaa wamüin woutkajaainjanain süpüla waʼwaajüin nia jee süpüla watütüleʼerajiraain waaʼin namaa na wawalayuukana (paashajeʼera Hebreokana 10:24, 25). Sutuma kojutüin wamüin Jeʼwaa, nnojoishii waya makatüin suulia tü outkajawaakat, aluʼusaʼa kasale maʼin alatüin wamüin. Yapale watuma tü pütchi wekirajaainjatkalü anain sünain tü outkajawaakat, weeʼiyatüin sünain kojutüin wamüin shia. Kojuteerü shia wamüinya wasouktüle shiʼipajee tü asakinnakalü anain (Sal. 22:22).

⁵ Akaʼaya laülaale waaʼin sünain tü outkajawaakat jee waaʼinmajüle tü Piichi Outkajaaleekat, weeʼiyateerü sünain kojutüin wamüin Maleiwa. Waaʼinrüle tia, aneerü sünüiki wayuu nüchiki Jeʼwaa. Soto waaʼin shiʼitaanüin nünülia Jeʼwaa sünain tü Piichi Outkajaaleekat (anasü paashajeʼerüle 1 Reyes 8:17).

6. Püküja jamüin nanüiki waneeinnua wayuu süchiki tü Piichi Outkajaaleekat neʼrapa shia. (Piirakaa sümüin tü ayaakuaa suluʼukat süpana 27.)

⁶ Shiʼrüin wayuu sünain kojutüin maʼin wamüin tü Piichi Outkajaaleekat. Jamüsüjaʼa chaa Turquía, ponoshootosü naaʼin wanee wayuu sutuma niʼrüin wulein maʼin tü Piichi Outkajaaleekat sümaa nnojoluin walakatüin kasa suluʼu. Wanee kasa ponoko atuma naaʼin shia anain naʼanaaya na wayuu eejanakana sünain tü outkajawaakat jee sutuma kamaneein naya nümüin. Soʼujeʼereʼeya tia, waneepiashi oʼunüin chia wayuukai sünain tü outkajawaakat, woutiisaka nia mapa. Akaataajaʼa suluʼu wanee pueulo chaka Indonesia, akumajünüsü wanee Piichi Outkajaalee, nayasaʼa na wawalayuukana nounejaain na wayuu kepiakana pejepünaa sünain tia Piichikat, nounejaain chi alcaldekai namaʼaleʼeya waneeinnua wayuu aʼyataakana niʼipajee süpüla neʼrüinjatüin joo tü Piichikat. Ponusü naaʼin chi alcaldekai anashaatain sukumajia tü piichikat jee anachoin maʼin tü maatairua apünajünakat chayaa. Naashin chi alcaldekai, weʼitaain suluʼu wakuwaʼipa tü kasa wekirajakat, süka jamüin, wulein tü Piichi Outkajaaleekat watuma.

7, 8. ¿Kasa waaʼinrajatka süpüla weeʼiyatüin sünain kojutüin wamüin Jeʼwaa woʼunapa suluʼumüin tü Piichi Outkajaaleekat?

⁷ Nia Jeʼwaa ounejaaka waya süpüla woutkajaainjanain, makalaka anainjatüin waʼanaaya otta laülaainjatü waaʼin sünain tü outkajawaakat. Nnojotpajaʼa wapülajayaa wamüinjatüin joo wainma kasa noulia na wawalayuukana sünain tü outkajawaakat. Keeʼireesü naaʼin Jeʼwaa anainjatüin waaʼin sünain tü outkajawaakat, nnojotpejeʼe mojutüyaainjatüin shia wamüin sükajee tü wakuwaʼipakat. Sutuma tia, waʼatüinjatü wanain washeʼin eekai anainjatüin aluʼu wayolojo sünain tü outkajawaakat. Akaʼaya waya suʼunnaa tü outkajawaakat, nnojoishii waya aluwanaajakuʼu müinjanain mensaaje, nnojoishii waya ejejiraakuʼu müinjanain, nnojoishii waya ekaakuʼu müinjanain  jee nnojoishii waya asaakuʼu müinjanain wanee kasayaakejeʼe. Na wayuu kachonshiikana, nekirajüinjana nachonnii süpüla nnojoliinjanain türüttaain namüinjanain suluʼu tü Piichi Outkajaaleekat jee süpüla nnojoliinjanain nashaittüin suluʼu (Ecl. 3:1).

⁸ Oʼunüshii waya suluʼumüin tü Piichi Outkajaaleekat süpüla waʼwaajüin Jeʼwaa jee süpüla wekirajaain nüchiki. Müshiijeseʼe nnojoliin oikkaain, ojuyaajirüin jee ayaʼlajüin waya wanee kasa suluʼu tü Piichi Outkajaaleekat (anasü paashajeʼerüle Nehemías 13:7, 8). Wanaa sümaa niʼrüin Jesuu na wayuu oikkaakana suluʼu tü aʼwaajüleekat, jashichishaanashi maʼin nia otta nüjünajaain naya chejee (Juan 2:13-17).

9, 10. (1) ¿Kasa naaʼinraka na wawalayuukana süpüla sukumajünüinjatüin Piichi Outkajaalee? (2) ¿Kasa anasü eeka sutuma naainjain tia? (3) ¿Kasa saainjaka tü nupueulosekat Jeʼwaa süpüla eeinjatüin Piichi Outkajaalee namaʼana na wawalayuu nnojoliikana amaʼana nneerü?

⁹ Watta naalii wawalayuu aʼyataakana maʼin sünain akumajaa Piichi Outkajaalee sainküin mmakat. Nadibujaajüin palajana jamüinjatüin sukumajia wanee Piichi Outkajaalee, süchikijee tia, nakumaja namüsia tü piichikat. Jee müsia laülaachonle wanee Piichi outkajaalee, nanoukteʼerüin shia. Nnojoishii naya achekajüin saaʼu tia. Soʼujee juyakat 2000, akumajünüsü maʼaka jaʼraisü Piichi Outkajaalee soʼu wanee kaʼi sainküin mmakat. Alatüirü suulia 28.000 Piichi Outkajaalee akumajünaka soʼujeʼereʼeya tia.

¹⁰ Saashin tü Wiwüliakat, na wainmakana amaʼana kasa, nakaaliinjainjana na palitchonkana amaʼana kasa (paashajeʼera 2 Corinto 8:13-15). Aainjünashaatasü Piichi Outkajaalee eere choʼujaain shia sutuma nasülajüin na wawalayuukana süpüshi nanneetse jee sutuma wainmain na wawalayuu aʼyataakana sünain. Sutuma tia, wainmairü Piichi Outkajaalee akumajünaka namüin na wawalayuu mamaʼanakana nneerü süpüla nawalaajüin tia.

11. (1) ¿Jamüsü nanüiki waneeinnua wawalayuu sutuma sukumajünüin namüin wanee Piichi Outkajaalee? (2) ¿Jamüsü paaʼin sutuma talatüin naaʼin naya wawalayuukana?

¹¹ Chayaa Costa Rica akumajünüsü wanee Piichi Outkajaalee soʼu mekiisat kaʼi. Naʼatapajashaatain na wawalayuukana eeinjatüin namaʼana wanee Piichi Outkajaalee. Naapüinjeseʼe analuʼut nümüin Jeʼwaa jee namüin na wawalayuukana saaʼujee tia. Talatashaanashii maʼin naya saaʼu nüsülajüin Jeʼwaa namüin tia piichikat. Akaʼaya wayakana, talatüshii maʼin waya saaʼu weʼrüin na wawalayuukana sünain aapaa analuʼut nümüin Jeʼwaa sutuma tü naainjakat napüleerua. Anashaatasü maʼin süka eein piichi eere noutkajaainjanain na wawalayuukana. Watüjaa aaʼu niain Jeʼwaa oʼunirüin sukuwaʼipa tü aʼyatawaa sünainpünaakat akumajaa Piichi Outkajaalee. Wanaa sümaa sukumajünüin wanee Piichi Outkajaalee, wainma na wayuu oʼunakana sünain tü outkajawaakat süpüla nekirajaain nünain Jeʼwaa (Sal. 127:1).

12. ¿Kasa waaʼinrajatka süpüla sukumajünüinjatüin sooʼomüin Piichi Outkajaalee?

¹² ¿Kasa waaʼinrajatka süpüla sukumajünüinjatüin  sooʼomüin Piichi Outkajaalee? Eeshii süpüla waʼyataain sünain akumajaa tia piichikalüirua jee müsia eeshii süpüla wasülajüin süpüshi wanneetse süpüla awalaajia tia piichikat. Waainjüle tia, weeʼiyateerü nujutü Jeʼwaa nümüin otta talateena maʼin waya. Anasü washatüle nakuwaʼipa na wayuu aʼyataapuʼukana nümüin Jeʼwaa sümaiwa paala, asülajüshii naya nneerü süpüla sukumajünüinjatüin tü aʼwaajüleekat Jeʼwaa (Éx. 25:2; 2 Cor. 9:7).

13, 14. ¿Jamüsü wuleinjatka watuma tü Piichi Outkajaaleekat sümaa nnojoluin walakatüin kasa suluʼupünaa?

¹³ Wuleinjatü watuma tü Piichi Outkajaaleekat sümaa nnojoluin walakatüin kasa suluʼupünaa, süka jamüin, wulein nukuwaʼipa Jeʼwaa (paashajeʼera 1 Corinto 14:33, 40). Akaʼaya wayakana, wuleinjatü wakuwaʼipa maʼaka naaʼin Jeʼwaa, müsüjeseʼe jülüjüinjatüin waaʼin kasa anasü, wuleinjatü wanoula jee wuleinjatü watapaʼa (Alat. Map. 19:8).

¹⁴ Müleka wulere watuma tü Piichi Outkajaaleekat, nnojoleena waya japülin seema ounejawaa wayuu sünain tü outkajawaakat. Neʼreerü na wayuukana sünain shiimain keeʼireein waaʼin suluʼuin waya tü Paʼaraiisükat. Jee müsia neʼreerü sünain wulein nukuwaʼipa Jeʼwaa, chi Maleiwa waʼwaajakai (Is. 6:1-3; Alat. Map. 11:18).

15, 16. (1) ¿Jamüsü nnojoluwaika suʼwulejünüin tü Piichi Outkajaaleekat? (2) ¿Jamüsü wuleinjatka watuma tü Piichi Outkajaaleekat? (3) ¿Kasa aainjünaka yaʼayaa süpüla suʼwulejünüinjatüin piichikat tüü? (4) ¿Kasa eeka süpüla waaʼinrüin wayakana wapüshuaʼa?

¹⁵ Eesü nnojorüle suʼwulejünüin tü Piichi Outkajaaleekat süka eein wawalayuu eekai «aneerü neʼe maaʼaya», namüin. Müsü mojutüyaakai saaʼin namüin aʼwulejaa tü Piichi Outkajaaleekat. ¿Jamüshiiche maka naya? Shia süka kiʼrainnain naya sünain yarüttüin nepia sutuma sükalira mma jee shiale sutuma poopooin mmakat eere kepiain naya. Eeshii eekai kepiain suluʼu wanee mma eere alin shiiʼiree wüin jee eesü nnojorüle namaʼana tü choʼujaakat süpüla naʼwulejüin nepia. Akaʼaya naya, eeshii nnojorüle nekirajünüin tepichijaiwaʼaya naya sünain wuleinjatüin nepia natuma. Wuleinjatpejeʼe watuma  tü Piichi Outkajaaleekat jaʼitainna jalain kepiain waya otta jaʼitairü meisalain na kepiakana pejepünaa sünain tü Piichi Outkajaaleekat. Makaʼa wuleinjatüin shia watuma shia süka waʼwaajüleein shia Jeʼwaa (Deut. 23:14).

¹⁶ Akumajüneesü sukuwaʼipa süpüla wepitajawalinjatüin tü Piichi Outkajaaleekat. Naya akumajüinjanaka sukuwaʼipa tia na laülaashiikana otta nachajaainjatü sukuwaʼipa süpüla eeinjatüin tü choʼujaakat süpüla suʼwulejünüinjatüin tü piichikat. Akaʼaya naya, nakumajüinjatü sukuwaʼipa naʼyataain na wawalayuukana süpüla wuleshaatainjatüin tü piichikat natuma. Eesü tü aʼwulejünüinjatkat süchikijee tü outkajawaakat jee eesü tü nnojotkat choʼujaain suʼwulejünüinjatüin semaanawai. Wayakana wapüshuaʼa eeshii süpüla waʼyataain sünain aʼwulejaa tü Piichi Outkajaaleekat.

17, 18. (1) ¿Kasa shikirajaka anain waya tü naainjakat na aʼyataashiikana nümüin Jeʼwaa sümaiwa paala? (2) ¿Jamüsü sukumajünüinjatka tü eekai sumojujaain sünain tü Piichi Outkajaaleekat?

¹⁷ Na aʼyataapuʼukana nümüin Jeʼwaa sümaiwa paala, naʼwulejapuʼuin tü aʼwaajüleekat. Süka tü nneerü nasülajakat na judíokana, nukumajirüin Jehoás tü amojujaakat sünain tü aʼwaajüleekat. Nuluwataain na sacerdoote chajanakana Judá süpüla naainjüin tia (2 Rey. 12:4, 5). 200 juya süchikijee tia, chi aluwataaikai Josías, nunoukteʼerüin tü aʼwaajüleekat süka tü nneerü nasülajakat na wayuukana (paashajeʼera 2 Crónicas 34:9-11). Tü shikirajakalü anain waya tia, shia wanoukteʼerawalinjatüin tü kasa amojujaakat sünain tü Piichi Outkajaaleekat.

¹⁸ Naashin waneeinnua wawalayuu aʼyataakana suluʼu Weteet, nnojotsü aaʼinmajünüin tü Piichi Outkajaaleekat jee nnojotsü anain sukuwaʼipa sunoukteʼeria tü kasa mojukat sünain. Alatüsü tia süka eein na matüjüinkana süpüleerua tia. Eesüjaʼa süpüla nnojoluin eein nneerü namaʼana süpüla nanoukteʼerüin tü kasa mojukat sünain tü Piichi Outkajaaleekat. Müleka nnojorüle sukumajünüin tü mojukat sünain tü Piichi Outkajaaleekat, amojujaajeerü shiʼipaʼaya. Neʼrüle müin tia na wayuu antakana sünain tü outkajawaakat, mojeerü nanüiki wachiki. Choʼujaasia maʼin anainjatüin watuma tü Piichi Outkajaaleekat. Waainjüle tia, aʼwaajüneechi Jeʼwaa jee weisatteerü tü nneerü nasülajakat na wawalayuukana.

19. ¿Kasa paaʼinrüinjatka süpüla piiʼiyatüin sünain kojutüin pümüin tü Piichi Outkajaaleekat?

¹⁹ Wekirajaaitpa anain kojutüinjatüin wamüin tü Piichi Outkajaaleekat süka niain kakoroloin shia Jeʼwaa. Müleka kojutüle wamüin Jeʼwaa, kojuteerü wamüin tü outkajawaakat jee tü Piichi Outkajaaleekat. Jee müsia wuleerü shia watuma, wakumajeerü tü eekai sumojujaain sünain otta asülajeena waya nneerü süpüla sukumajünüinjatüin Piichi Outkajaalee. Washata nukuwaʼipa Jesuu suluʼu kojutüin wamüin tü Piichi eere waʼwaajüin Jeʼwaa (Juan 2:17).