1, 2. a) ¿Nitre kristiano kirabe ye nämene medente Ngöbö mike täte? b) ¿Templo nämene Jerusalén ye Jesús nämene mike tuin ño jai? c) ¿Nibike kukwe meden mike gare jai kukwe ja tötikara nekänti?

NITRE Ngöbö mikaka täte yekwe kä tärä käre Ngöbö mikakäre täte. Ñodre, Abel jondron nire kukwani Jehová kräke kä jondron kukwakäre yebiti raba ruin nie (Génesis 4:3, 4). Noé, Abrahán, Isaac, Jacob aune Moisés käkwe kä jondron kukwakäre ye sribebare arato (Génesis 8:20; 12:7; 26:25; 35:1; Éxodo 17:15). Ne madakäre, Jehovakwe niebare nitre israelita ie niaratre rabadre ju sribere niara mikakäre täte (Éxodo 25:8). Aune ye bitikäre niaratre rabadre templo sribere niebare kwe ietre (1 Reyes 8:27, 29). Nitre israelita kämikaninkä Babilonia ye ngwane, jatanintre ja ükökrö kä jene jene kädeka nämene sinagoga yekänti (Marcos 6:2; Juan 18:20; Hechos 15:21). Aune nitre kristiano kena nämene ja ükökrö ju jene jene kwetre yete (Hechos 12:12; 1 Corintios 16:19). Kä nengwane, ni testiko Jehovakwe tä ja ükökrö Ngöbö mikakäre täte Ju Ja Ükarakrö tä kwati krubäte kä jökräbiti tibien yete.

² Templo nämene Jerusalén ye Jesús nämene mike ütiäte krubäte jai. Jesús nämene templo tarere ye namani gare nitre ja tötikaka kwe yei angwane, ni salmo tikaka kukwe niebare ne nükaninta törö ietre: “Tita ju mäkwe tarere ye tä ñukwä kwrere tibätä” (Salmo 69:9; Juan 2:17). Erametre, Ju Ja Ükarakrö ye ñaka “ju Jehovakwe”,  templo ye erere (2 Crónicas 5:13; 33:4). Akwa nikwe mikadre ütiäte jai, ñobätä ñan aune yete ja ükakröta Ngöbö mikakäre täte. Nikwe ja ngwandre ño Ju Ja Ükarakrö yete, ngübadre ño aune nikwe dre nuaindre ne kwe ju ye kwrere sribedre bäri nieta Bibliakwe ye nibike mike gare jai kukwe ja tötikara nekänti. * (Ñäkädre nota yebätä.)

3-5. a) ¿Ju Ja Ükarakrö ye abokän dre? b) ¿Nikwe gätä ye mikadre tuin ño jai?

³ Ju Ja Ükarakrö yekänti metrere nita Ngöbö mike täte. Ni kräke, gätä ye jondron ütiäte bianta Ngöbökwe nie. ¿Ñobätä? Ñobätä ñan aune ye tä ni dimike ja mäke bäri kwin niarabe. Ne madakäre, gätä ye köböire juta ükaninte Jehovakwe ye tä ni dimike aune tä ni tötike ribeta nikwe jai ye ererebätä. Kukwe mikata gare nie gätäte ye mrö kwrere abokän Jehová aune Jesús tä bien nie bämän kratire kratire te. Niaratre tä ni nübaire “mröre [jabe] [...] gwaire” ye ütiäte krubäte (1 Corintios 10:21).

⁴ Bibliabätä Jehová tä niere nie ni rabadre niken gätäbätä niara mikakäre täte aune ja dimikakäre kwärikwäri (ñäkädre Hebreos 10:24, 25 yebätä). Nita Jehová mike ütiäte jai yebätä ni ñaka tö gätä ye juain jire ja bäre, akwa kukwe mada ütiäte aibe ngwane ni raba juen ja bäre. Nita ja ükete blitakäre gätäte ye ngwane nita bämike nita debe bien gätä yebätä (Salmo 22:22).

⁵ Nita ja ngwen kwin gätäte aune nita Ju Ja Ükarakrö ye ngübare kwin ye ngwane, nita Ngöbö mike ütiäte jai ye nikwe bämikai. Jehová kä tä tikani Ju Ja Ükarakrö jökrä känti yebätä nitre mada blitadre kwin yekäre ni tö ja ngwain kwin nitre okwäkänti (kukwe ye erere bäsi kwain mäi 1 Reyes 8:17 yekänti).

6. ¿Nitre ruäre käkwe Ju Ja Ükarakrö nie tuaninbiti ye ngwane dre niebare kwetre? (Üai bämikani kena mikadre ñärärä.)

⁶ Nita Ju Ja Ükarakrö mike ütiäte krubäte jai ye nüke gare nitre ie. Ñodre, ni iti käi Turquía käkwe niebare niara töi namani ñan krütare ñobätä ñan aune Ju Ja Ükarakrö ye nämene ükaninte kwin aune merebe. Nitre jökrä nämene ja ngwäkitani kwin aune namanintre kä mike kötare ja ngwärebätä kise ngökakäre niarai yebätä töi namani ñan krütare niebare kwe arato. Ni ye jatani niken gätä nuain nämene ye jökräbätä aune ye bitikäre kä nikani braibe ta yete ja ngökani ñöte kwe. Kä keteiti juta Indonesia yekänti Ju Ja Ükarakrö sribebare mrä. Ja mräkätre käkwe nitre nünanka kä yekänti, ni sribikä alcalde aune nitre mada mada sribikä gobranbe ye nübaibare ju ye mikakäre ñärärä. Ju sribebare kwin krubäte aune kä ju bäre ye nämene ükaninte bä nuäre krubäte yebätä ni sribikä alcalde töi namani ñan krütare. Ju Ja Ükarakrö tä merebe ye tä mike gare nita kukwe driere ye ererebätä nita nüne.

7, 8. ¿Nita Jehová mike ütiäte jai ye nita bämike ño Ju Ja Ükarakrö yete?

⁷ Jehová tä ni nübaire metrere gätäbätä. Aune nita ja ngwäkite aune nita ja ngwen ño gätäte ye ütiäte niara kräke. Ye medenbätä nikwe töbikadre kwin käne. Dre nuaindre aune dre abokän ñaka nuaindre ye kräke nikwe ñaka kukwe ribi ükadrete nuaindre. Akwa nikwe ñaka ja ngwandre nita ja gwirete ye kwrere. Ni aune nitre tä nüke gätäbätä nibe yei ja rabadre ruin kwin Ju Ja Ükarakrö yete ie Jehová tö. Akwa Ju Ja Ükarakrö yete nikwe ñaka kukwe nuaindre jire Ngöbö mikakäre ñaka ütiäte jai. Ye medenbätä, ni ñaka rikadre ja ngwäkitani nita niken kä madakänti ye kwrere o ñaka ja ükaninte kwin. Ni ñaka rabadre kukwe juen jai  kwärikwäri celular yete, blite ni madabe, mröre aune tomana ñain gätä nuainta ye ngwane. Ne madakäre, nitre rüne tä monsotre kia kwe ye tötike ne kwe ñaka rabadre ja kaintari aune ja denkä Ju Ja Ükarakrö yete (Eclesiastés 3:1).

⁸ Nita niken Ju Ja Ükarakrö yete Jehová mikakäre täte aune kukwe mikakäre gare jai niarabätä. Ye medenbätä, Ju Ja Ükarakrö yete ni ñaka tädre blite sribi nikwe yebätä (kukwe ye erere bäsi kwain mäi Nehemías 13:7, 8 yekänti). Nitre ruäre nämene jondron rürübäine templote jutuabare Jesús ie ye ngwane, namani rubun krubäte aune nitre ye juanintari mento kwe ye nikwe ngwandre törö jai (Juan 2:13-17).

9, 10. a) ¿Nitre testiko Jehovakwe tätre dre nuainne Ju Ja Ükarakrö sribekäre? b) ¿Niaratre tä ja di ngwen sribikäre ye köböire dre dre namanina bare? c) ¿Konkrekasion kwe ngwian ñaka krubäte ye juta ükaninte Jehovakwe tä dimike ño Ju Ja Ükarakrö sribekäre?

⁹ Nitre testiko Jehovakwe kwati krubäte tätre sribire ja dibiti Ju Ja Ükarakrö sribekäre kä jökräbiti tibien. Ju Ja Ükarakrö sribei ño ye tätre üai sribere, tätre ju ye sribere aune üketeta ye niaratre ñaka ütiä kärere. Ye köböire Ju Ja Ükarakrö sribebarera kwärike köbö kwatire kwatire te kä 15 nikanina ta yete. Täte jökrä Ju Ja Ükarakrö ye sribebarera 28,000 biti bäri.

¹⁰ Biblia tä niere nirekwe jondron tärä bäri ye rabadre nitre mada kwe jondron ñaka krubäte ye dimike (ñäkädre 2 Corintios 8:13-15 yebätä). Ye medenbätä, juta ükaninte Jehovakwe ye tä Ju Ja Ükarakrö sribere ribeta medente yekänti, nitre Testiko tä ja töi jeñebiti sribire aune ni jökrä tä ngwian bien ja töi jeñebiti ye köböire sribeta. Aune ye köböire, Ju Ja Ükarakrö sribebare kwati krubäte konkrekasion kwe ngwian ñaka nämene krubäte ye kräke.

11. a) ¿Ja mräkätre aune ja ngwaitre ruäre tätre dre niere Ju Ja Ükarakrö sribeta mrä kräketre ye ngwane? b) ¿Mätä töbike ja mräkätre yebätä angwane jata nemen ruin ño mäi?

¹¹ Köbö nikani krä kwä ta ye aibe te Ju Ja Ükarakrö sribebare kwati juta Costa Rica yekänti. Ja mräkätre aune ja ngwaitre tätre niere niaratre tö nämene Ju Ja Ükarakrö ie ja kräke ye erere sribebare mrä kräketre. Tätre debe bien Jehovai aune juta ükaninte kwe yei bätä ja mräkätre aune ja ngwaitre yei. Jondron ütiäte Jehovakwe biani ietre yebätä tätre debe bien krubäte aune käita juto bätätre. Jehová tä jondron nuainne ja mräkätre aune ja ngwaitre kräke yebätä tätre debe bien ie ye käi juto ni jökräbätä. Aune ja mräkätre kä jökräbiti tibien yekwe Ju Ja Ükarakrö tädre yei ni tö. Erametre Jehová köböire Ju Ja Ükarakrö ye sribeta bäri. ¿Ñobätä? Ñobätä ñan aune Ju Ja Ükarakrö sribeta mrä ye ngwane, nitre tä nemen bäri gätäbätä kukwe mikakäre gare jai Jehovabätä (Salmo 127:1).

12. ¿Nikwe dre nuaindre ja mräkätre dimikakäre Ju Ja Ükarakrö sribere bäri?

¹² ¿Nikwe dre nuaindre ja mräkätre dimikakäre  Ju Ja Ükarakrö sribere bäri? Ni ruäre raba niken ja töi jeñebiti ju ye sribere. Aune ni jökrä raba ngwian bien ju ye ütiä biankäre. Nikwe ja di ngwain ja mräkätre dimikakäre Ju Ja Ükarakrö sribere ye ngwane, kä rabai bäri juto nibätä. Aune bäri ütiäte nikwe Ngöbö käikitaikä. Nitre kirabe Ngöbö mikani täte ye erere ni tö ja ngwain. Niaratre ngwian biani töi kwinbiti ne kwe Ju Ja Ükarakrö sribedre Jehová mikakäre täte (Éxodo 25:2; 2 Corintios 9:7).

13, 14. Biblia tä niere ye erere, ¿ñobätä nikwe Ju Ja Ükarakrö ye ükadrete kwin aune merebe?

¹³ Jehová ye deme aune kukwe nuainta jabiti ta ye ñaka nemen kwin kräke. Ye medenbätä nikwe Ju Ja Ükarakrö ye ükadrete kwin aune merebe (ñäkädre 1 Corintios 14:33, 40 yebätä). Nikwe ja ngwandre deme Jehová erere, yekäre nikwe töbikadre kwin, ja ngwandre kwin aune mikadre täte töi merebebiti. Ne madakäre, nikwe jübadre kwin arato (Apocalipsis 19:7, 8).

¹⁴ Nikwe Ju Ja Ükarakrö nie ye ükaite merebe angwane, töi jämebiti nikwe nitre nübaidi gätäbätä. Aune nitre yei rükai gare erametre ni tö nünain kä mrä kwin yete. Rükai gare ietre arato nita Ngöbö deme mike täte abokän käkwe Kä tibien kwitai bä nuäre (Isaías 6:1-3; Apocalipsis 11:18).

15, 16. a) ¿Käre Ju Ja Ükarakrö ükadrete merebe ye ñobätä ñaka nuäre? b) ¿Ñobätä nikwe Ju Ja Ükarakrö ükadrete merebe? c) ¿Kukweta ükaninte ño Ju Ja Ükarakrö ükatekäre merebe? d) ¿Sribi meden ütiäte tä ni kisete?

¹⁵ Käre Ju Ja Ükarakrö ükadrete merebe ye ñaka nuäre. ¿Ñobätä? Ñobätä ñan aune ju ükateta merebe yebätä nitre tä kukwe ñaka ja erere niere. Nitre ruäre tä nüne kä münü aune dobrokwä krubäte yekänti. Nitre mada abokän kwe ñö aune jondron kä bätäräte ye ñaka krubäte. Aune ni ngübabare ño ye ererebätä ni töi ñaka raba nemen kä ükatebätä merebe. Kä medenkänti ni tädre nüne o nitre nünanka ni bäre ye töita ño känti ni tädre nüne, akwa nikwe Ju Ja Ükarakrö ye ükadrete kwin aune merebe. ¿Ñobätä? Ñobätä ñan aune yete nita Jehová mike täte (Deuteronomio 23:14).

¹⁶ Ju Ja Ükarakrö nie ye tädre ükaninte kwin aune merebe, yekäre nikwe kukwe ükadrete kwin kä ükatekäre merebe. Nitre umbre ji  ngwanka konkrekasionte tätre kukwe ükete kä ükatekäre merebe aune jondron kä bätäräte ye tädre debe näre ye niaratre tä mike ñärärä. Ne madakäre, tätre ja mräkätre denkä ne kwe kä jökrä ye ükadrete kwin merebe. Gätä nuainta batire batire ye bitikäre jondron ruäre ye bätäteta, akwa jondron mada abokän bätäteta nane nane. Ni jökrä käkwe Ju Ja Ükarakrö nie ükadrete merebe ye sribi ütiäte tä ni kisete.

17, 18. a) ¿Nitre kirabe Jehová mikaka täte yebätä ni raba dre mike gare jai? b) ¿Ñobätä nikwe Ju Ja Ükarakrö nie ye ükadrete kwin?

¹⁷ Nitre kirabe Jehová mikaka täte ye nämene templo ükete kwin. Ñodre, rei Jehoás käkwe nitre sacerdote kä Judá yekänti ie templo ükate manabare nitre ngwian biani yebiti (2 Reyes 12:4, 5). Kä nikani 200 biti bäri ta ye bitikäre, nitre ngwian biani yebiti rei Josías käkwe templo ükaninte arato (ñäkädre 2 Crónicas 34:9-11 yebätä). * ¿Kukwe ye tä dre mike gare nie? Tä mike gare nie, nikwe Ju Ja Ükarakrö ükadrete kwin aune dre tä ükadrete ju yete ye nikwe ükadrete arato.

¹⁸ Sukursal ruäre ie tä nemen gare juta kwetre yekänti Ju Ja Ükarakrö aune jondron tä ju yete ye ñaka ükateta kwin. Kukwe ye tä nemen bare ruäre ngwane ñobätä ñan aune nitre braibe ie jondron ye ükate gare. Aune ruäre ngwane ngwian ñaka Ju Ja Ükarakrö ükatekäre yebätä tä nemen bare. Akwa nikwe ñaka Ju Ja Ükarakrö nie ye ükadrete angwane, bätärekä bätärekä raba niken ngwarbe. Aune nitre Ju Ja Ükarakrö tuai ye käkwe blitai blo nibätä. Ye medenbätä, nikwe ja di ngwandre Ju Ja Ükarakrö nie ye ükete kwin. Ye erere nuaindi angwane, nikwe Jehová käikitaikä aune ja mräkätre bätä ja ngwaitre tä ngwian bien ye nikwe ñaka kitaikä ngwarbe.

19. ¿Ju Ja Ükarakrö mäi ye ütiäte mä kräke ye bämikakäre mäkwe dre nuaindi?

¹⁹ Kukwe ja tötikara nekänti nikwe texto keta kabre miri gare jai ye raba ni dimike nita Ju Ja Ükarakrö mike ütiäte jai ye bämike. Ju Ja Ükarakrö ye jökrä Jehovakwe aune ñaka nitre ruäre o konkrekasion yekwe ye nikwe ngwandre törö jai. Nita Jehová mike ütiäte jai angwane, gätä nuainta nikwe aune Ju Ja Ükarakrö ye nikwe mikai ütiäte jai. Arato nikwe ngwian biain töi bökänbiti Ju Ja Ükarakrö ye sribekäre aune nikwe ja di ngwain ükatekäre kwin aune merebe. Ye medenbätä, nikwe ja ngwandre jankunu Jesús erere aune kä Jehová mikakäre täte nie ye nita mike ütiäte jai ye nikwe bämikadre (Juan 2:17).