Tassa pallorfiginnittarfipput
“Illit illunnik ilungersuutiginninnerma nungutissavaanga.” – JOH 2:17.
1, 2. (a) Itsaq Jehovap kiffai sumi pallorfiginnittarpat? (b) Jerusalemimi Jehovap naalaffia Jiisusip qanoq isigaa? (c) Allaaserisami matumani suut sammissavavut?
GUUTIP kiffai Guutimik pallorfiginnittarfeqartuaannarsimapput. Assersuutigalugu Abeli Jehovamut pilliinialerami pilliivilioqqaarsimasinnaavoq. (1 Mos 4:3, 4) Noa, Aaperaat, Iisaaq, Jaaku Mosesilu tamarmik pilliiviliorsimapput. (1 Mos 8:20; 12:7; 26:25; 35:1; 2 Mos 17:15) Jehovap Israelikkut tupermik naapeqatigiittarfilioqquai. (2 Mos 25:8) Aamma kingusinnerusukkut naalaffilioqqusivoq. (1 Kng 8:27, 29) Guutip innuttai Babylonimi aallarussaaqqanermik kingorna synagogini katersuuttarput. (Mark 6:2; Joh 18:20; ApS 15:21) Aamma kristumiut siulliit illuminni katersuuttarput. (ApS 12:12; 1 Kor 16:19) Ullumikkut nunarsuaq tamakkerlugu Jehovap innuttai Jehova pillugu ilinniarniarlutik pallorfiginiarlugulu naalagaaffilersaarfinni tituusintilikkuutaani katersuuttarput.
2 Jiisusip naalaffik Jerusalemimiittoq pingaartingaarpaa. Taassuma naalaffimmik ataqqinningaarnera pissutigalugu ajoqersukkat tussiaasiortup oqaasii imaattut eqqaavaat: “Illit illunnik ilungersuutiginninnerma nungutilerpaanga.” (Tuss 69:10; Joh 2:17) Jerusalemimi itsaq naalaffik ‘Jehovap naalaffianik’ taaneqartarpoq, ullumikkulli naalagaaffilersaarfiit taama taaneqarneq ajorput. (2 Nal 5:13; 33:4) Taamaakkaluartorli pallorfiginnittarfivut illernartutut isigineqartariaqarput. Allaaserisami matumani naalagaaffilersaarfimmi qanoq pissusilersortariaqartugut, qanoq peqqissaarunneqarsinnaasoq qanorlu aningaasaliisoqarsinnaasoq paasiniarlugit Biibilimi najoqqutassiat sammissavavut. *
ATAQQINNINNERMIK ERSERSITSINEQ
3-5. Naalagaaffilersaarfik suua, ataatsimiittarnivullu qanoq isigisassavavut?
3 Naalagaaffilersaarfik tassaavoq illu inuit Jehovamik pallorfiginninniarlutik ataatsimoortarfiat. Ataatsimiittarnivut Jehovamit tunissutaapput, taassumunngalu attaveqarnitta nakussatsinnissaanut taakku iluaqutigisarpavut. Ataatsimiinnitsinni Jehovap peqatigiissortaasa kajumissaartarpaatigut pisariaqartitatsinnillu ilitsersorluta. Sapaatip-akunneri tamaasa Jehovamit taassumalu erneranit anersaakkut neriartoqqusaasarnerput immikkut pisinnaatitaaffiuvoq. (1 Kor 10:21) Qaaqquneqartarnitta immikkut ittuunera puiunngisaannassavarput.
4 Jehovap imminik pallorfiginnittarnerput immitsinnullu kajumissaaqatigiittarnerput pingaaruteqangaartutut isigigamigit kajumissaarpaatigut katersuuttaqqulluta. (Hebræerit 10:24, 25 atuakkit). Jehova ataqqigatsigu ataatsimiittarnivut pisariaqanngitsumik najuuffiginngitsoorusunngilavut. Ataatsimiinnissatsinnut piareersartarlutalu peqataanissatsinnut qilanaartarutta ataatsimiittarnitsinnik pingaartitsinerput ersersissavarput. – Tuss 22:23.
5 Ataatsimiinnitsinni pissuserissaarnitsigut naalagaaffilersaarfimmillu paarsilluarnitsigut Jehovamik ataqqinninnerput ersersissavarput. Jehovap aqqa, naalagaaffilersaarfiup silataani allaqqasoq, pissuserissaarnitsigut nersorneqaatissikkumavarput. – 1 Kunngit 8:17 naleqqiuguk.
6. Naalagaaffilersaarfiit ataatsimiigiartartullu pillugit inuit ilaat qanoq oqarsimappat? (Allaaserisap aallaqqaataani asseq takuuk).
6 Naalagaaffilersaarfimmik pingaartitsinerput inuit allat maluginiartarpaat. Assersuutigalugu angut Tyrkiamiu ima oqarpoq: “Naalagaaffilersaarfiup ipiitsuunera torersuuneralu ajasoorutigaakka. Inuit atisarissaarput, qungujulapput ilassiorlungalu. Tupigusoqaanga.” Taamanimiilli angut taanna ataatsimiigiartuaannalerpoq sivitsunngitsorlu kuisilluni. Indonesiami illoqarfiit ilaanni uppeqatitta eqqaamiutik, borgmesteri allallu pisortat naalagaaffilersaarfittaaminnut qaaqqusimavaat. Illorsuup sanalluagaanera, ilusilersorneqarnera naatsiiviullu kusanangaarnera borgmesterip tupigusuutigeqai. Ima oqarpoq: “Illorsuup kusanangaarnera upperluartuunissinnut takussutissaavoq.”
Pissusilukkutta Jehovamut ataqqinaataajunnaassaaq (Immikkoortut 7 aamma 8 takukkit)
7, 8. Naalagaaffilersaarfimmi Jehovamut ataqqinninnerput qanoq ersersittarparput?
7 Jehovap ataatsimiinnissamut qaaqqusisuusup ataatsimiinnerni qanoq isikkoqarnerput pissusilersornerpullu maluginiartarpai. Taassumunnga ataqqinnikkatta ingasattajaarnaveersaartarpugut. Tassa sukannerpallaarnatalu qasukkarsimaarpallaartanngilagut. Uagummi qaaqqusavullu naalagaaffilersaarfimmi iluarusunnissarput Jehovap kissaatigaa. Ataatsimiinnerup nalaani arlaannaatigulluunniit ataqqinninngitsuliorusunngilagut. Taamaattumik assuarluta ataatsimiigiartarpugut, ataatsimiinnittalu Oqal 3:1.
nalaani sms-ernaveersaarlutalu oqaloqatigiinnaveersaarlutalu nerinaveersaartarpugut. Aammattaaq angajoqqaat meerartatik naalagaaffilersaarfimmi arpattannginnissaannik pinnguartannginnissaannillu ilinniartinniartarpaat. –8 Jiisusip naalaffimmi inuit tuniniaasut takugamigit kamalerpoq aniatillugillu. (Joh 2:13-17) Taamaattumik naalagaaffilersaarfinni Jehova pallorfigisaratsigu taannalu pillugu ilinniartaratta tassani niuernermut tunngasunik sammisaqartarnissarput tulluartuunavianngilaq. – Nehemia 13:7, 8 naleqqiuguk.
TAPERSERSUINERPUT
9, 10. (a) Naalagaaffilersaarfiliortarneq qanoq aaqqissuunneqartarpa, sunalu kinguneraa? (b) Ilagiit naalagaaffilersaarfiliornissamut akissaqanngitsut qanoq ikiorneqartarpat?
9 Nunarsuarmi sumi tamani Jehovap innuttai naalagaaffilersaarfiliorlutik ulapputtarput. Kajumissutsiminnik sulisut titartaasarput, sanaartortarput iluarsartuussisarlutillu. Tamatuma kingunerisaanik ukiuni 15-ini kingullerni naalagaaffilersaarfiit kusanartut 28.000-nit amerlanerusut sananeqarsimapput, agguaqatigiissillugu ullormut tallimat.
10 Jehovap peqatigiissortaasa naalagaaffilersaarfinnik pisariaqartitsiffiusuni sanaartornissamut kajumissutsiminnik sulisussat aningaasaliisarnerlu isumagisarpaat. Taamaalilluta peqarnerusut amigaateqarnerusunut ikiorsiisarnissaannik najoqqutassiaq Biibilimeersoq maleruarparput. (2 Korinthimiut 8:13-15 atuakkit). Suna kinguneralugu? Naalagaaffilersaarfippassuit ilagiit pisariaqartitsisut namminneq akissaqartinngisaralui sananeqarsimapput.
11. Qatanngutit ilaat naalagaaffilersaarfittaartik pillugu qanoq oqarsimappat, tamatumalu illit qanoq misigilersippaatit?
11 Qatanngutit Costa Ricami ilagiit ilaanneersut ima oqarput: “Naalagaaffilersaarfiup saavani nikorfatilluta soorlu tassa sinnattuinnarluta! Upperisinnaanngingajapparput. Naalagaaffilersaarfittaarput kusanartoq ulluni arfineq-pingasuinnarni sananeqareerluni annikitsualuttortaanut allaat naammassineqarpoq! Jehovap pilluaqqusineratigut aamma peqatigiiffitta qatanngutittalu asanartut tapersersuinerisigut tamanna pisinnaasimavoq. Pallorfiginnittarfipput taanna tunissutaavoq erlinnartoq, kusanangaartoq Jehovap uagutsinnut tunissutaa. Taanna assut nuannaarutigingaarparput.” Qatanngutitta Jehovap iliuuserisimasaanut qujamasunnerat killitsissutigeqaarput. Qatanngutittalu namminerisaminnik nunarsuaq tamakkerlugu naalagaaffilersaarfeqalersinnaanerat nuannaarutigeqaarput. Ersarippoq naalagaaffilersaarfinnik sanaartorneq Jehovap Tuss 127:1.
pilluaqqugaa, naammassiniariartummi inuit suli amerlanerusut Jehova ilisarisimalerniarlugu ataatsimiinnernut najuutilersarmata. –12. Naalagaaffilersaarfinnik sanaartornermut qanoq ikiuutaasinnaavit?
12 Illit naalagaaffilersaarfinnik sanaartornermut qanoq ikiuutaasinnaavit? Immaqa sanaqataarusussinnaavutit. Aamma tamatta naalagaaffilersaarfimmut aningaasanik tapiissuteqartarsinnaavugut. Sulianut tamakkununnga sapinngisatsinnik tapersersuisarutta tunisinerup pilluarnartuunera misigissavarput, pingaarnerusumillu Jehova ataqqinartissavarput. Biibilip nalaani Guutip innuttaasa pallorfiginnittarfimminnut kajumillutik tuniserusussuseqarnerat malikkusupparput. – 2 Mos 25:2; 2 Kor 9:7.
EQQILUITSUUTITSINERPUT
13, 14. Naalagaaffilersaarfitta ipiitsuutinnissaannik torersuutinnissaannillu Biibilimi allassimasunit qanoq ilikkagaqarpugut?
13 Jehova Guutiuvoq minguitsoq illernartorlu. Aaqqissuussilluarnerup Guutigaa. Taamaattuminguna naalagaaffilersaarfivut ipiitsuutillugillu torersuutittarivut. (1 Korinthimiut 14:33, 40 atuakkit). Jehovamit iluarineqarumalluta guutisiornerput, eqqarsaativut iliuutsivullu kisiisa minguitsuutinnagit aammattaaq timitsigut eqqiluisaartuusariaqarpugut. – Saqq 19:8.
14 Naalagaaffilersaarfivut ipiitsuutillugillu torersuutikkutsigit ajukkunnata ataatsimiinnernut qaaqquserusuttassaagut. Inuit paasisinnaassavaat silarsuassaq nutaaq eqqiluitsoq oqaluussissutigisarput pimoorukkipput. Paasilissavaat Guuti illernartoq minguitsuusorlu nunarsuarmik nuanningaartumik paratiisinngortitsisussaq pallorfigigipput. – Es 6:1-3; Saqq 11:18.
15, 16. (a) Sooq naalagaaffilersaarfinnik ipiitsuutitsinissaq ilaannikkut ajornaatsuinnaaneq ajorpa, aamma sooq ipiitsuutinniartariaqarparput? (b) Eqqiaasarneq qanoq aaqqissugaava, aamma suna tamatta immikkut pisinnaatitaaffigaarput?
15 Eqqiluisaarneq pillugu inuit assigiinngitsunik isumaqartarput. Sooq? 5 Mos 23:15.
Qanoq peroriartorsimanerat tamatumunnga pissutaasinnaavoq. Aammami inuit ilaat eqqiluisaarfigiuminaatsumi, soorlu aqquserngup killingani ipertuuni maralluinnaasunilu, najugaqarput. Allat naammattumik imeqanngillat qaqorsaataateqaratilluunniit. Sumiluunniilli najugaqaraluarutta najukkatsinnilu inuit eqqiluisaarneq pillugu qanorluunniit isumaqaraluarpata uagut naalagaaffilersaarfipput ipiitsuutillugulu torersuutittariaqarparput. Tassanimi Jehova Guuterput minguitsoq pallorfigisaratsigu. –16 Naalagaaffilersaarfipput sapinngisamik ipiitsuutinniarutsigu isumagineqarnissaa aaqqissugaasariaqarpoq. Ilagiinni pilersaarusiortoqarnissaa naammattunillu qaqorsaateqarnissaa atortorissaaruteqarnissaalu utoqqaanertat isumagisarpaat. Aamma naalagaaffilersaarfiup eqqiarneqarsimanissaa utoqqaanertat qulakkeertarpaat. Eqqiagassat ilaat ataatsimiinnerit naagaangata tamatigut suliarineqartariaqartarput, allalli ilaatiguinnaq suliarineqartarlutik. Naalagaaffilersaarfinnik ipiitsuutitsinissaq tamatta immikkut pisinnaatitaaffigaarput.
PEQQISSAARUSSINERPUT
17, 18. (a) Itsaq Jehovap innuttai qanoq naalaffimmik aserfallatsaaliuisimappat? (b) Sooq naalagaaffilersaarfipput paarilluartariaqarparput?
17 Aamma iluarsisariallit iluarsaattarnerisigut naalagaaffilersaarfipput aserfallatsaaliortarparput. Itsaq Jehovap kiffai aamma taamaaliortarput. Assersuutigalugu kunngi Joaship Judami naalakkersuinerata nalaani inuit naalaffimmut aningaasanik tunissuteqartarput. Kunngip palasit peqquai ‘naalaffimmi iluarsaattariaqalersimasut tamaasa iluarsaattassagaat’. (2 Kng 12:5, 6) Ukiut 200-t sinnerlugit tamatuma kingorna kunngip Josijap aningaasat naalaffimmut tunissutaasut iluarsaattariaqartunut atorpai. – 2 Nalunaarsuutit 34:9-11 atuakkit.
18 Immikkoortortaqarfiit ataatsimiititaliaasa ilaasa maluginiarsimavaat inuit illuminnik atortorissaarutiminnilluunniit aserfallatsaaliuinermik pingaartitsivallaanngitsut. Imaassinnaavoq iluarsartuussinissamut akissaqarpianngitsut inuilluunniit ikittuinnaat tamakkuninnga suliaqarsinnaasut. Uagulli naalagaaffilersaarfipput aserfallatsaaliortanngikkutsigu kusanaalliartupallassinnaavoq, inuillu tamanna maluginialissavaat. Naalagaaffilersaarfippulli sapinngisarput tamaat peqqissaaruttarutsigu Jehovamut ataqqinaataassaaq, aningaasallu qatanngutitta tunissutaat atulussinnassanngilavut.
Naalagaaffilersaarfipput peqqissaaruttariaqarparput (Immikkoortut 16 aamma 18 takukkit)
19. Jehovamik pallorfiginnittarfitsinnik pingaartitsinerit ersersinniarlugu qanoq iliornissat aalajangiuppiuk?
19 Naalagaaffilersaarfik Jehovap pigaa. Inummit ilagiinnilluunniit pigineqanngilaq. Soorlu allaaserisami matumani sammigipput, Guutimik pallorfiginnittarfitsinnut eqqortumik isiginnittaaseqalernissatsinnut Biibilimi najoqqutassiat iluaqutigisinnaavavut. Jehova ataqqigatsigu ataatsimiittarnivut naalagaaffilersaarfiillu illernartutut isigaavut. Naalagaaffilersaarfinnik sanaartornissamut aningaasatigut tunissuteqarsinnaanerput nuannaarutigaarput, taakkualu paarilluarnissaat eqqiluitsuutinnissaallu ilungersuutigalugit. Jiisusi assigalugu Jehovamik pallorfiginnittarfitsinnik ataqqinnillutalu ilungersuutiginninnerput ersersittarparput. – Joh 2:17.
^ imm. 2 Allaaserisami matumani naalagaaffilersaarfiit pineqarput. Najoqqutassialli sammisassavut ataatsimeersuartarfinnut Jehovamillu pallorfiginnittarfinnut allanut aamma atuupput.