1, 2. (a) Kupi vakareli vaJehova vanare ngava mu karere? (b) Ngapi ga lizuvhire Jesus kuhamena ntembeli zaJehova zomoJerusarema? (c) Yisinke natu ka zogera mosirongwa esi?

VAKARELI vaKarunga, vanare nava vanaina, va kara nomavango oku ava karere Karunga. Pasihonena, apa Abeli ga geve nzambo kwaJehova, age nampo kwa tungire sizambero. (Genesis 4:3, 4) Nowa naAbirahamu naIsaka naJakopo ntani Mosesa navenye kwa tungire yizambero. (Genesis 8:20; 12:7; 26:25; 35:1; Exodus 17:15) Jehova kwa tanterere Vaisraeli va tunge nkongoronzugo. (Exodus 25:8) Ano konyima, ga ya va pangerere va tunge ntembeli. (1 Vahompa 8:27, 29) Apa vantu vaKarunga va ka tengwire mounkwate moBabironi, awo ngava pongere monosinagoge. (Marukusa 6:2; Johanesa 18:20; Yirugana 15:21) Ntani Vakriste wokuhova ngava pongere momambo. (Yirugana 12:12; 1 Vakolinte 16:19) Naina, vantu vaJehova uzuni mudima kupongera moYinyanga yoUhompa, omu ava lirongo kuhamena Jehova ntani nokumukarera.

² Jesus kwa fumadekere unene ntembeli zaJehova zomoJerusarema. Eharo lyaJesus kontembeli kwa diworokesere varongwa vendi nonkango domuepisarome edi asi: “Mupampi morwantembeli zoge kuna kutwera mwange ngwendi mundiro.” (Episarome 69:9; Johanesa 2:17) Sinyanga soUhompa kapisi ‘nzugo’ zaJehova ngwendi moomu za  fene ntembeli ezi za kere moJerusarema. (2 Histoli 5:11-14; 33:4) Nye twa hepa kufumadeka mavango getu goukareli. Mosirongwa esi, tatu ka zogera nompango doBibeli edi nadi tu ronga omu natu kara nsene poSinyanga soUhompa tuna kara, nomu natu si pakera mbili ntani nokugava yigava yipo va si wapukurure. *

3-5. Yisinke Sinyanga soUhompa, ntani ngapi atu lizuvhu kuhamena mapongo getu?

³ Sinyanga soUhompa kuna kara evango oku vantu ava pongo mokukarera Jehova. Mapongo uhwi wokutunda kwaKarunga, ntani ago kutuvatera tu nkondopeke elikwatakano lyetu nendi. Komapongo getu, mbunga zendi kutupa makorangedo nomavyukiso aga twa hepa. Azo mfumwa mokutuzigida Jehova naMunwendi tu lye positafura sendi ndi tu “kare pompanda” zendi nkenye sivike. (1 Vakolinte 10:21) Ezigido eli, twa hepa kulitara asi mulyo.

⁴ Jehova kuna tu harere tu kare komapongo mokumukarera nokulikorangeda-korangeda. (Resa Vahebeli 10:24, 25.) Morwa twa fumadeka Jehova, kapi ngatu faura komapongo pwa hana konda zomulyo. Ose kulikida rupandu rwetu komapongo apa atu liwapaikire nawa nokukalihameka mo.—Episarome 22:22.

⁵ Monkedi omu atu kara komapongo nomu atu pakere mbili Yinyanga yetu kulikida omu twa fumadeka Jehova. Tuna hara nkareso zetu zi yererepeke edina Jehova, eli ali moneka poYinyanga yoUhompa.—Hetakanesa 1 Vahompa 8:17.

6. Yisinke va uyunga ko vantu kuhamena Yinyanga yetu ntani nava ava kara mo? (Tara efano pepenuno 22.)

⁶ Apa atu likida efumadeko koYinyanga yetu yoUhompa, wopeke kuyidimburura. Pasihonena, mugara gomoTurkia kwa tanta asi: “Ukuhuki newapaiko lyewa eyi na mwene poSinyanga soUhompa kwa kundamene nge. Vantu vamo kudwara nawa, kuzoragana ntani va tambwire nge nawa. Eyi kwa kundamene nge unene.” Mugara ogu yipo ga tamekere kuwiza komapongo nagenye ntani ga ya gwene ekuho. Mositata simwe moIndonesiya, vanavazinyetu kwa zigidire vamusinda zawo, nomukurona godoropa ntani novanamakuto vamwe va ya tare Sinyanga sosipe. Mukurona godoropa lya mu tetwire etungo lyewa lyekoli ntani nokapata kokawa. Age kwa tente asi: “Ukuhuki woSinyanga kulikida asi epuro lyeni lyosili.”

7, 8. Ngapi natu likida asi twa fumadeka Jehova apa atu kara koSinyanga?

⁷ Jehova yige atu zigida komapongo, ntani ga kara nosinka omu atu moneka nomu atu kara. Twa hepa kukara nonkareso zongwa. Komapongo twa hepa kumoneka nawa kapisi tu moneke ngwendi membo tuna kara. Jehova kuna hara tu lizuvhe emanguruko kumwe novantu ava atu zigida koSinyanga setu. Eyi yiyo tuna harere kufumadeka mapongo. Yipo nye, kapi nayi wapa kudwara umbondo ndi yokukwata korutu ndi tu litumine nombudi ndi tu zogere ndi tu  lye nokunwa posiruwo sepongo. Vakurona va hepa kuronga vana vawo mokudira kudukagana ndi kudanauka moSinyanga soUhompa.—Muudisi 3:1.

⁸ Apa Jesus ga mwene vantu kuna kurandesera montembeli zaKarunga, ta handuka nokuvatjida mo. (Johanesa 2:13-17) MoYinyanga yetu yoUhompa, yimo atu karere Jehova nokulironga kumuhamena. Yipo nye ya dilira kuwapa kuruganena ngesefa poSinyanga soUhompa mwankenye rupe.—Hetakanesa Nehemiya 13:7, 8.

9, 10. (a) Ngapi vantu vaJehova ava tungu Yinyanga yoUhompa, ntani yitundwamo musinke? (b) Ngapi mbunga zaJehova azi vatere nombungakriste edi da dira kukara noyimaliwa yokutungisa Yinyanga yadene?

⁹ Vantu vaJehova mouzuni mudima kurugana unene mokutunga Yinyanga. Valizambeli kufaneka omu ngayi kara nokuyikutunga ntani nokuyiwapukurura. Monomvhura 15 dina ka pita, ose kwa tunga Yinyanga yoUhompa yoyiwa yokupitakana 28 000 uzuni mudima, ano nkenye ezuva yokusika 5 ngoso.

¹⁰ Mbunga zaJehova kutuma valizambeli nokuruganesa yigava mokutunga Yinyanga yoUhompa oku vana yi hepa. Ose kukwama mpango zomoBibeli ezi asi ava va kara neyi yoyinzi kuvhura va kwafese ko vanaruhepo. (Resa 2 Vakolinte 8:13-15.) Yitundwamo? Yinyanga yoUhompa yoyinzi kwa yi tunga mokuvatera nombungakriste edi da dira kukara noyimaliwa yokutungisa Yinyanga yadene.

11. Yisinke va uyunga ko vanavazinyetu vamwe kuhamena Sinyanga sawo sosipe, ntani ngapi ono kulizuvha kweyi?

¹¹ Vanavazinyetu womombungakriste zaCosta Rica kwa tjenge asi: “Apa atu sikama komeho zoSinyanga soUhompa, ayo kukara ngwendi nzodi! Kapi atu yi pura asi usili. Sinyanga setu sosiwa kwa si mene kusidika momazuva ntantatu! Eyi kwa tompokerere morwa etungiko lyaJehova, newapaiko lyombunga zendi ntani nevatero lyovanavazinyetu. Evango eli lyoukareli kuna kara uhwi wouwa, ugawo ou ga tu pa Jehova. Ose kulizuvha ruhafo sili.” Ayo kutuhafesa mokuzuvha vanavazinyetu kuna kupandura Jehova koyininke eyi ga va ruganena. Ntani tuna hara vanavazinyetu uzuni mudima va kare noYinyanga yawo yoUhompa. Ayo kulikida asi Jehova yige ana kutungika sirugana sokutunga Yinyanga, morwa tupu nava mana kusidika, vantu wovanzi kutameka kuyaponga mokuyalironga kumuhamena.—Episarome 127:1.

12. Ngapi no vatera mokutunga Yinyanga yoUhompa?

 ¹² Ngapi no vatera mokutunga Yinyanga yoUhompa? Nampo kuvhura o lizambere mokuvatera kosirugana esi. Ntani natuvenye kuvhura kugava yimaliwa va tungise ko Yinyanga yoUhompa. Apa atu rugana unene mokukwatesa ko sirugana esi, ose kulizuvha ruhafo rokutunda kokugava, ano unene po, kuyerererepeka Jehova. Ose kukwama sihonena sovantu vaKarunga vanare ava va kere neharo lyokugava yipo va tungise ko mavango gawo goukareli.—Exodus 25:2; 2 Vakolinte 9:7.

13, 14. Yisinke atu lirongo moBibeli eyi ayi likida asi twa hepa kuzeresa Sinyanga setu?

¹³ Jehova Karunga kwa kuhuka ntani kwa pongoka. Age kapi ga hara epiyagano. Eyi yiyo twa hepera kuzeresa nokuwapaika nawa Sinyanga soUhompa. (Resa 1 Vakolinte 14:33, 40.) Ntani mokukara tuna kuhuka nokupongoka ngwendi Jehova, ukareli wetu nomagazaro getu noyirugana yetu ntani nomarutu getu ya hepa kukuhuka.—Ehororo 19:8.

¹⁴ Apa Sinyanga soUhompa asi kara sina zere, ose kuturerupira mokuzigida vantu komapongo getu. Ntani vantu ngava yi mona asi ose kusikisa mo eyi atu zuvhisa kuhamena uzuni woupe wokuzera. Ntani asi ose kukarera Karunga gokukuhuka ogu nga ka ninka evhu li kare paradisa zongwa.—Jesaya 6:1-3; Ehororo 11:18.

15, 16. (a) Morwasinke ya dilira kukara ureru kuzeresa nkenye apa Sinyanga? Morwasinke twa hepera kusizeresa? (b) Ngapi natu wapaika ezereso lyoSinyanga soUhompa, ntani situmbukira musinke twa kara naso natuvenye?

¹⁵ Vantu kwa kara nomagano gokulisiga kuhamena ukuhuki. Morwasinke? Eyi pamwe kuyiretesa po monkedi omu va va rera. Ano vamwe kwa tunga kevango ndi koyitaura yokunyata ndi yetata. Vamwe kapi va kara nomema gokugwanena  po ndi noyininke yokuzeresesa. Nye yi kare asi kupi twa tunga ndi omu ava lizuvhu vantu womomukunda gwetu kuhamena ukuhuki, ose twa hepa kuzeresa Sinyanga soUhompa. Alyo kuna kara evango eli atu karere Jehova.—Deuteronomium 23:14.

¹⁶ Nsene tuna hara Sinyanga setu si kare sina zere, twa hepa kukara nelikwamo lyewa. Vakuronambunga va rugane elikwamo lyombungakriste nokudivilisa asi vana kara nkenye apa noyiruganeso yokuzeresesa. Yimwe kuhepa kuyizeresa konyima zankenye epongo nye yimwe kapisi hepero. Natuvenye twa kara nositumbukira sokuzeresa Sinyanga soUhompa.

17, 18. (a) Yisinke natu lirongera ko omu vantu vaJehova vanare ngava pakere mbili ntembeli? (b) Morwasinke natu pakerera mbili Sinyanga soUhompa?

¹⁷ Ose kutura Sinyanga setu moukaro wouwa pokusiwapukurura. Vakareli vaJehova vanare nawo yimo ngava rugana. Pasihonena, mepangero lyahompa Jowasi gwaJuda, vantu kwa geve yimaliwa kontembeli. Hompa kwa pangerere vapristeli va ruganese yimaliwa oyo mokuwapukurura ntembeli. (2 Vahompa 12:4, 5) Konyima zonomvhura 200, hompa Josiya nage kwa ruganesere yigava yontembeli mokuziwapukurura.—Resa 2 Histoli 34:9-11.

¹⁸ Nobeteli dimwe kwa yi dimburura asi vantu womoyirongo yawo kapi va yika kupakera mbili ndi va zerese Yinyanga yawo. Kuvhura yi kare asi moyirongo oyo vantu wovasesu tupu va diva kuyirugana. Ndi nampo kapi va kara noyimaliwa yokuwapukurwisa. Nye nsene tu dira kuwapukurura Sinyanga setu, kapi ngasi moneka nawa makura vantu ngava yi dimburura. Ayo kapi ngayi gava umbangi wouwa. Nye, nsene tu rugana unene mokupakera mbili Sinyanga setu, ngatu yererepeka Jehova ntani kapi ngatu hepeka yimaliwa eyi ava gava vanavazinyetu.

19. Yisinke no rugana mokulikida efumadeko kevango eli atu karere Jehova?

¹⁹ Sinyanga soUhompa alyo etungo lyaJehova. Kapi sa hamena kwankenye muntu ndi kombungakriste zongandi. Ngomu tuna yi zogere, nompango doBibeli ngadi tu vatera tu kare nomutaro gouhunga kevango eli atu karere Karunga. Morwa twa fumadeka Jehova, ose ngatu fumadeka mapongo noSinyanga soUhompa. Ayo kutuhafesa pokugava yimaliwa yipo va tungise ko Yinyanga, ntani nokurugana unene mokuyipakera mbili nokuyizeresa. Ngwendi Jesus, ose kulikida upampi nefumadeko kevango eli atu karere Jehova.—Johanesa 2:17.