1, 2. 1) ¿Kani kiueyichiuayaj itekitikauan Dios ne uejkauj? 2) ¿Keniuj kiitaya Jesús templo tein moajsia Jerusalén? 3) ¿Toni tikitaskej itech nejin tamachtilis?

 ITEKITIKAUAN Dios nochipa kipianij kani kiueyichiuaskej yejuatsin. Kemej neskayot, Abel xa kimaktiliaya netetayokolilmej Jiova itech se altar (Gén. 4:3, 4). Noé, Abrahán, Isaac, Jacob uan Moisés no kichijchiujkej altares (Gén. 8:20; 12:7; 26:25; 35:1; Éx. 17:15). Uan no, Jiova kinnauatij israelitas maj kichijchiuanij se takenkal kampa kiueyichiuaskiaj (Éx. 25:8). Uan okachi satepan kinnauatij maj kichijchiuanij se templo (1 Rey. 8:27, 29). Keman israelitas kiskej Babilonia, peujkej monechikouaj itech sinagogas (Mar. 6:2; Juan 18:20; Hech. 15:21). Uan yekinika itatojtokakauan Cristo monechikouayaj ininchan tokniuan (Hech. 12:12; 1 Cor. 16:19). Itech nejin tonalmej, tiitaixpantijkauan Jiova tikueyichiuaj Dios itech tel miak Kalmej kampa tiMosentiliaj tein moajsij noyampa taltikpak.

² Jesús semi kipoujkaitaya templo tein moajsia Jerusalén. Keman imomachtijkauan kiitakej ke Jesús semi kitasojtaya templo, kielnamikkej tein kijtouaya se tajkuilol itech Biblia: “Ueyi yoltanejnekilis tein nikpialia mochan nechyoltatijya” (Sal. 69:9; Juan  2:17). Tein melauj, se Kali kampa tiMosentiliaj amo “ichan Jiova”, kemej katka templo (2 Crón. 5:13; 33:4). Sayoj ke moneki tikpoujkaitaskej porin ompa tikueyichiuaj Jiova. Itech nejin tamachtilis tikitaskej toni kijtoua Biblia ke moneki tikchiuaskej itech Kali kampa tiMosentiliaj, keniuj tikyekpiaskej uan keniuj uelis titapaleuiskej maj mochijchiuakan okachi. *

3-5. 1) ¿Toni tikchiuaj itech Kali kampa tiMosentiliaj? 2) ¿Keniuj moneki tikitaskej nechikolmej?

³ Itech Kali kampa tiMosentiliaj, ompa kampa okachi tikueyichiuaj Dios. Tejuan tikitaj nechikolmej kemej se netetayokolil tein yejuatsin techmaka. ¿Keyej? Porin techpaleuia maj okachi kuali timouikakan iuan. Uan no, inechikol Jiova techmaka yolchikaualis uan tamachtilis tein moneki ika nechikolmej. Tamachtilis tein ompa tikseliaj tamati kemej takual tein Jiova uan Jesús techmakaj sejse semana. Se ueyi tatiochiualis maj yejuan techyoleuakan itech ‘ininmesa’ (1 Cor. 10:21, TNM).

⁴ Jiova techiluia itech Biblia ke motelneki maj tikueyichiuatij itech nechikolmej uan maj timoyolchikauatij iniuan oksekin (xikonixtajtolti Hebreos 10:24, 25). Kemej tikpoujkaitaj Jiova, amo tiknekij timopolouiliskej nechikolmej; maski kemansa yekmelauj amo uelis tiyaskej. Tiknextiaj ke tikpoujkaitaj nechikolmej keman timomachtiaj achto uan ijkon uelis titanankiliskej (Sal. 22:22).

⁵ Komo tikakij nochi tamachtilis tein motemaka itech nechikolmej uan tikyekpiaj Kali kampa tiMosentiliaj tiknextiskej ke tikpoujkaitaj Dios. Tiknekij maj nochi tein tikchiuaj tapaleui maj oksekin kuali ika tajtokan itokay Jiova, tein ixnesi kalixpan itech miak Kalmej kampa tiMosentiliaj (no xikonita 1 Reyes 8:17).

6. ¿Toni kijtouanij seki taltikpakneminij keman yanij itech Kalmej kampa tiMosentiliaj? (Xikonita taixkopin ipeujyan tamachtilis.)

⁶ Taltikpakneminij kiitaj ke semi tikpoujkaitaj Kali kampa tiMosentiliaj. Kemej neskayot, se takat kayot Turquía kijtoj ke kimoujkaitak maj tachipaualaj uan maj nochi tayekyeto itech Kali kampa tiMosentiliaj. No kimoujkaitak porin nochin kuali takentoyaj uan kiixuetskiliayaj keman kitajpalouayaj. Nejin takat peuak youi nochi nechikolmej uan moauij tepitsin satepan. Itech se xolal ompa Indonesia mochijchiuak se yankuik Kali kampa tiMosentiliaj. Tokniuan kinyoleujkej akin ompakauin nemij, tekiuaj uan oksekin akin iuan tekitij maj kiitatij kali. Tekiuaj kimoujkaitak keniuj tel kuali chijchiujtoya kali uan keniuj kualtsin tatojtokkej kalixpan. Yejua kijtoj ke kemej itech Kali kampa tiMosentiliaj tel tachipaualaj, kinextia ke yekmelauj tikchiuaj tein titamachtiaj.

7, 8. ¿Keniuj tiknextiaj itech Kali kampa tiMosentiliaj ke tikpoujkaitaj Jiova?

⁷ Jiova yejuatsin akin techyoleua maj tiyakan nechikolmej. Uan yejuatsin kiita keniuj timotakentiaj keman tiyouij uan tein tikchiuaj ompa. Yejua ika tiknekij tikchiuaskej nochi tein taixejekol. Moneki maj amo senkis tiktalikan tanauatilmej ika tein uelis oso amo uelis se kichiuas itech Kali kampa tiMosentiliaj. Sayoj ke amo no moneki tikchiuaskej kemej ijkuak tiyetokej tokalijtik. Jiova kineki maj tejuan uan akin tikinyoleuaj kualtsin timomachilikan itech Kali kampa tiMosentiliaj. Sayoj ke amo tiknekij tikchiuaskej teisa tein kinextis ke amo tikpoujkaitaj nechikolmej. Yejua ika amo titakentiyouij kemej ijkuak tipaxalotij oso timauiltitij. Amo no timotajkuilouilijtokej iuan aksa, nion titajtojtokej iniuan oksekin,  nion titakuajtokej nion titatayitokej keman mochiujtok nechikol. Uan no, tetatmej kinmachtiaj ininkoneuan ke amo kuali yetok maj tsitsikuintokan nion mauiltijtokan itech Kali kampa tiMosentiliaj (Ecl. 3:1).

⁸ Itech Kali kampa tiMosentiliaj tikueyichiuatij Jiova uan timomachtitij keniuj tamati yejuatsin. Yejua ika, ompa amo ika titajtouaj tanamakalis oso ika tein nion tepitsin mouika ika itekiyo Dios (no xikonita Nehemías 13:7, 8). Maj tikelnamikikan ke keman Jesús kinitak seki taltikpakneminij tanamakatoyaj itech templo, tel kualanik uan kinkalantokak (Juan 2:13-17).

9, 10. 1) ¿Keniuj tapaleuiaj itaixpantijkauan Jiova maj mochijchiuakan Kalmej kampa tiMosentiliaj? 2) ¿Toni mochiuani ika nochi nejin? 3) ¿Keniuj inechikol Jiova kinpaleuiani nechikolmej akin amo kiajxitiaj tomin tein ika kiixtauaskej kalchiualis?

⁹ Miakej itaixpantijkauan Jiova chikauak tekitij keman kichijchiuaj Kalmej kampa tiMosentiliaj noyampa taltikpak. Yejuan kiixtaliaj keniuj moitas kali, kichijchiuaj uan no kiyekchijchiuaj, uan amo kintaxtauiaj. Ijkon, itech 1 metsti noviembre xiuit 1999 uan hasta axkan mochijchiuanij noyampa taltikpak 28,000 kualtsitsin Kalmej kampa tiMosentiliaj, oso kemej makuil kalmej mojmostaj.

¹⁰ Biblia kijtoua ke akin kipiaj miak moneki kinpaleuiskej akin amo semi kipiaj (xikonixtajtolti 2 Corintios 8:13-15). Yejua ika, itech inechikol Jiova mokui nepaleuil tein kitemakaj tokniuan akin amo tajtanij maj kintaxtauikan uan tomin tein tinochin titemakaj tein ika mochijchiuaskej Kalmej kampa tiMosentiliaj kampa okachi monekis. Ika nejin nepaleuil mochijchiuanij miak kalmej kampa mosentiliaj tokniuan akin amo kiajxitiayaj tomin tein ika kiixtauaskej kalchiualis.

11. 1) ¿Keniuj momachiliaj seki tokniuan keman kipiaj se kali kampa mosentiliaj? 2) ¿Keniuj tionmomachilia tejuatsin keman tiontanemilia itech nejin tokniuan?

¹¹ Itech ueyi altepet Costa Rica kichijchiujkej se Kali kampa tiMosentiliaj itech sayoj chikueyi tonalmej. Tokniuan kijtouaj ke amo kinemiliayaj ke ueliskiaj kiitaskej nejin yankuik kali. Kitasojkamatiliaj Jiova, inechikol uan tokniuan. Semi kitasojkamatij uan yolpakij kipiaskej nejin kali tein Jiova kintayokolij. Tinochin techyolpaktia tikitaskej keniuj tokniuan kitasojkamatiliaj Jiova nochi tein yejuatsin ika kinpaleuia. Uan techyolpaktia maj tokniuan noyampa taltikpak kipiakan se kali kampa mosentiliskej. Moyekita ke Jiova kitiochiua nochi tein moixtalijtok uan ijkon mochijchiuaskej Kalmej kampa tiMosentiliaj. ¿Keyej? Porin keman mochijchiua se yankuik kali, okachi taltikpakneminij peuaj youij nechikolmej uan kiixmatij Jiova (Sal. 127:1).

12. ¿Keniuj uelis titapaleuiskej maj mochijchiuakan okachi Kalmej kampa tiMosentiliaj?

¹² ¿Keniuj uelis titapaleuiskej maj mochijchiuakan  okachi Kalmej kampa tiMosentiliaj? Sekin uelis tiyaskej titapaleuitiuij kampa mochijchiujtokej. Uan tinochin uelis titapaleuiskej ika tomin. Komo tikchiuaj nochi tein tiuelij uan titapaleuiaj, okachi tiyolpakiskej. Uan tein okachi moneki, tikueyitaliskej Dios. Tiknekij tikchiuaskej kemej itekitikauan Dios ne uejkauj. Yejuan kitemakakej tomin ika miak pakilis tein tapaleuij maj mochijchiuakan kalmej kampa kiueyichiuayaj Jiova (Éx. 25:2; 2 Cor. 9:7).

13, 14. ¿Keyej kijtoua Biblia ke moneki titachipauaskej uan titayektaliskej itech Kali kampa tiMosentiliaj?

¹³ Jiova yektik uan chipauak, uan kiuelita maj nochi kuali tayekyeto. Yejua ika moneki titapaleuiskej maj Kali kampa tiMosentiliaj moajsi chipauak uan maj tayekyeto (xikonixtajtolti 1 Corintios 14:33, 40). Komo tiknekij tiknextiskej nejin ikualneskayo Jiova, moneki titanemiliskej, timonejnemiltiskej uan tikueyichiuaskej ika chipaujkayot. Uan no, tonakayo no moneki maj chipauak moajsi (Apoc. 19:8).

¹⁴ Komo titapaleuiaj maj nochipa chipauak moajsi Kali kampa tiMosentiliaj, amo timopinaujmatiskej keman tikinyoleuaskej taltikpakneminij maj yakan nechikol. Uan yejuan kiitaskej ke yekmelauj tiknekij tinemiskej itech se yankuik taltikpak tein chipauak. No kiitaskej ke tikueyichiuaj se Dios yektik akin kichiuas nejin taltikpak se kualtsin xochital (Is. 6:1-3; Apoc. 11:18).

15, 16. 1) ¿Keyej kemansa ouij kisa tikpiaskej chipauak Kali kampa tiMosentiliaj? 2) ¿Keyej moneki tikpiaskej chipauak Kali kampa tiMosentiliaj? 3) ¿Keniuj moixtalijtok motachipauas itech kali kampa tionmosentilia? 4) ¿Toni tatiochiualis tikpiaj tinochin?

¹⁵ Kemansa ouij kisa maj nochipa chipauak moajsi Kali kampa tiMosentiliaj. ¿Keyej? Porin sekin kiitaj ke motelneki tachipaualis uan oksekin amo semi. Sekin nemij kampa onkak miak talnex uan sokit. Oksekin amo kipiaj miak at oso tein ika tachipauaskej. Uan ijkon kemej techiskaltijkej kichiua maj tataman tikitakan tachipaualis. Sayoj ke maski talnextaj oso sokitaj kampa tinemij oso taltikpakneminij amo kiitaj ke motelneki tachipaualis,  moneki tikchiuaskej maj chipauak moajsi Kali kampa tiMosentiliaj uan maj kuali tayekyeto. ¿Keyej? Porin ompa tikueyichiuaj Jiova (Deut. 23:14).

¹⁶ Komo tiknekij maj moajsi chipauak Kali kampa tiMosentiliaj, moneki tikchiuaskej tein moixtalis keniuj moneki motachipauas. Tayekananij kiixtaliaj nejin uan kiitaj maj onka tein ika se tachipauas. Uan no, kixejxelouaj tataman tekit tein kichiuas sejse tokniuj uan ijkon kuali motachipauas. Seki taman moneki se kichipauas satepan keman tami sejse nechikol, sayoj ke okseki amo nochipa. Tinochin tikpiaj tatiochiualis titapaleuiskej maj chipauak moajsi Kali kampa tiMosentiliaj.

17, 18. 1) ¿Toni techmachtia tein kichiujkej itekitikauan Jiova ne uejkauj? 2) ¿Keyej moneki titapaleuiskej maj kuali moajsi Kali kampa tiMosentiliaj?

¹⁷ Ne uejkauj, itekitikauan Jiova tapaleuiayaj maj templo kuali moajsini. Kemej neskayot, tekiuaj Jehoás kinnauatij tiopixkamej kayomej Judá maj kiyekchijchiuanij templo ika tomin tein kitemakakaj akin ompa nemiaj (2 Rey. 12:4, 5). Panoua 200 xiujmej satepan, tekiuaj Josías no kiyekchijchiuak templo ika tomin tein kitemakakaj akin nemiaj kampa taixyekanaya (2 Crón. 34:9-11). ¿Toni techmachtia nejin? Ke tejuan no moneki titapaleuiskej maj kuali moajsi Kali kampa tiMosentiliaj uan tikyektaliskej tein monekis.

¹⁸ Itech seki sucursales moitani ke itech seki altepemej taltikpakneminij amo kiitaj maj kuali moajsikan kalmej. Kemansa, nejin panoua porin amo miakej uelij kichiuaj tekit tein moneki. Uan kemansa porin amo kipiaj tomin tein ika kiyektaliskej. Sayoj ke komo amo tikyektaliaj Kali kampa tiMosentiliaj keman moneki, yolik ijtakaujtiyas. Uan taltikpakneminij akin kiitaskej amo kuali toka tajtoskej. Yejua ika moneki timochikauaskej titapaleuiskej maj kuali moajsi Kali kampa tiMosentiliaj. Ijkon tikueyitaliskej Jiova uan amo tikauilchiuaskej tomin tein kitemakaj tokniuan.

19. ¿Toni tikonchiuas tejuatsin uan ijkon tikonnextis ke tikonpoujkaita kali kampa tionmosentilia?

¹⁹ Tajkuilolmej itech Biblia tein tikitakej itech nejin tamachtilis techpaleuiaj maj tiknextikan ke tikpoujkaitaj Kalmej kampa tiMosentiliaj. Maj tikelnamikikan ke nochi nejin kalmej Jiova iaxka, amo iaxka se taltikpaknenkej oso se nechikol. Komo tikpoujkaitaj Jiova, tikpoujkaitaskej tonechikoluan uan Kali kampa tiMosentiliaj. No ika miak pakilis titemakaskej tomin tein ika mochijchiuaskej kalmej uan timochikauaskej titapaleuiskej maj chipaujkej uan maj kuali moajsikan. Yejua ika maj tikchiuakan kemej Jesús uan maj tiknextikan ke tikpoujkaitaj kali kampa tikueyichiuaj Jiova (Juan 2:17).