1, 2. (a) He vahā i tuai, matakavi fe ne tapuaki e tau fekafekau a Iehova ki a ia? (e) Fēfē e logonaaga ha Iesu ke he faituga ha Iehova i Ierusalema? (i) Ko e heigoa ka fakatutala a tautolu he vala tala nei?

KO E tau fekafekau he Atua i tuai mo e he vahā nei ne ha ha i ai e tau matakavi kua tapuaki a lautolu ke he Atua. Ma e fakatai, he mogo ne foaki e Apelu e tau poa ki a Iehova, liga ati e ia e fatapoa. (Kenese 4:3, 4) Ko Noa, Aperahamo, Isaako, Iakopo, mo Mose ne taute oti e tau fatapoa. (Kenese 8:20; 12:7; 26:25; 35:1; Esoto 17:15) He haia e tau Isaraela he tutakale, ne tala age a Iehova ki a lautolu ke talaga e fale utafano po ke faituga. (Esoto 25:8) Fakamui, ne poaki a ia ki a lautolu ke talaga e faituga i Ierusalema. (1 Tau Patuiki 8:27, 29) He mole e liliu he tau tagata he Atua mai he fakapaea i Papelonia, ne fakapotopoto tumau a lautolu ke he tau sunako. (Mareko 6:2; Ioane 18:20; Gahua 15:21) Ko e tau Kerisiano fakamua ne fakapotopoto ke he tau kaina. (Gahua 12:12; 1 Korinito 16:19) He vahā nei, ne fakapotopoto e tau tagata ha Iehova he lalolagi katoa ke he tau Fale he Kautu ne totou afe, ko e matakavi ne fakaako a lautolu ki a Iehova mo e tapuaki ki a ia.

² Ne fakalilifu hokulo e Iesu e faituga ha Iehova i Ierusalema. Ko e fiafia ha Iesu ma e faituga kua fakamanatu ke he tau tutaki haana e tau kupu he salamo: “Ha kua kai ni au he manako lahi ke he hāu a fale.” (Salamo 69:9; Ioane 2:17) Ko e Fale he Kautu kua nakai  tatai mo e “fale a Iehova” ke he puhala he faituga i Ierusalema. (2 Nofoaga he Tau Patuiki 5:13; 33:4) Ka e lata ia tautolu ke hokulo e fakalilifu ma e tau matakavi tapuakiaga ha tautolu. He vala tala nei, to fakatutala a tautolu ke he tau matapatu fakaakoaga he Tohi Tapu ka fakaako a tautolu ke he puhala kua lata ia tautolu ke mahani ka haia a tautolu he tau Fale he Kautu, puhala kua lata ia tautolu ke leveki ai, mo e puhala ka lagomatai a tautolu ke totogi ai. *​—Kikite matahui tala.

3-5. Ko e heigoa e Fale he Kautu, ti kua lata ke fēfē e logonaaga ha tautolu ke he tau feleveiaaga ha tautolu?

³ Ko e Fale he Kautu ko e matakavi pauaki ka fakapotopoto e tau tagata ke tapuaki ki a Iehova. Ko e tau feleveiaaga ko e mena fakaalofa mai he Atua, ti lagomatai ai a tautolu ke fakamalolō e fakafetuiaga ha tautolu mo ia. He tau feleveiaaga ha tautolu, kua foaki mai he fakatokatokaaga haana ki a tautolu e fakamalolōaga mo e takitakiaga kua lata mo tautolu. Ko e lilifu ke uiina e Iehova mo e haana Tama ke kai he ‘laulau a Iehova’ he tau faahi tapu takitaha. (1 Korinito 10:21) Kia nakai lata ia tautolu ke nimo e uiina pauaki nei.

⁴ Talahau fakamaali e Iehova ki a tautolu kua manako a ia ki a tautolu ke fakalataha ke he tau feleveiaaga ke tapuaki ki a ia mo e ke fefakamafanaaki. (Totou Heperu 10:24, 25.) Ha kua fakalilifu e tautolu a Iehova, to nakai fakatonoa e tautolu e tau feleveiaaga ato latatonu mooli ai. Fakakite e tautolu e loto fakaaue ma e tau feleveiaaga ha tautolu ka mautauteute ai mo e amanaki ke fai vala ai.​—Salamo 22:22.

⁵ Ko e puhala kua mahani a tautolu he tau feleveiaaga mo e puhala kua leveki e tautolu e tau Fale he Kautu kua fakakite e lahi mahaki he fakalilifu ha tautolu ki a Iehova. Manako a tautolu ke he mahani ha tautolu ke fakaheke e higoa ha Iehova, ne fa kitia ke he lapa fakamailoga he Fale he Kautu.​—Fakatatai 1 Tau Patuiki 8:17.

6. Ko e heigoa ne talahau he tau tagata hagaao ke he ha tautolu a tau Fale he Kautu mo lautolu he tau feleveiaaga? (Kikite fakatino he kamataaga.)

⁶ Ka fakakite e tautolu e fakalilifu ma e ha tautolu a tau Fale he Kautu, mailoga he falu tagata e mena nei. Ma e fakatai, ko e tagata taane i Turkey ne pehē: “Nava lahi au he mailoga e meā mo e maopoopo he Fale he Kautu. Ko e tau tagata i ai ne lilifu e tau tauteuteaga, mamali, mo e fakafeleveia mafanatia a au. Nava lahi au ke he mena nei.” Ne kamata e tagata taane ke hau he tau feleveiaaga takitaha mo e nakai leva ti papatiso. He taha taone i Indonesia, ne uiina he tau matakainaga ha lautolu a tau katofia, ko e ekepule he taone, mo e falu takitaki ke kitia ha lautolu a Fale he Kautu ne foou. Ne nava lahi e ekepule ke he tuaga mitaki he fale, puhala ne talaga, mo e tau katene fulufuluola. Pehē a ia: “Ko e meā he fale nei kua fakaata e tua mooli ha mutolu.”

7, 8. Fakakite fēfē e tautolu kua fakalilifu e tautolu a Iehova ka haia a tautolu he Fale he Kautu?

⁷ Ko Iehova ne uiina a tautolu ke he tau feleveiaaga, ti fai logonaaga a ia ke he puhala tauteute mo e mahani ha tautolu i ai. Ti kalo kehe a tautolu mai he to molea. He taha faahi, nakai pāpā maō lahi a tautolu, ke he taha faahi foki, kua fakahanoa lahi a tautolu. Mooli kua manako a Iehova ki a tautolu mo e tau tagata ne uiina e tautolu ke he Fale he Kautu ke logona e totokaaga mitaki i ai. Ka e nakai manako a tautolu ke fakakite e nakai fakalilifu ma e tau feleveiaaga he ha puhala. Ko e mena ia ne nakai tui e tautolu e tau mena tui fulufagu po ke  nakai lilifu lahi, ti fakaeneene a tautolu ke nakai meli hila, tutala, po ke kai mo e inu ka hoko e feleveiaaga. Ti lata he tau matua ke fakaako e tau fanau ha lautolu ke nakai tafepoi viko po ke fefeua he Fale he Kautu.​—Fakamatalaaga 3:1.

⁸ He mogo ne kitia e Iesu e tau tagata ne fakafua e tau koloa he faituga he Atua, ne ita a ia ti vega a lautolu ki fafo. (Ioane 2:13-17) He ha tautolu a tau Fale he Kautu, tapuaki a tautolu ki a Iehova mo e fakaako ki a ia. Ti nakai tonu ke taute e tau matagahua pisinisi he haia agaia a tautolu i ai.​—Fakatatai Nehemia 13:7, 8.

9, 10. (a) Talaga fēfē he tau tagata ha Iehova e tau Fale he Kautu, ti ko e heigoa e tau fua? (e) Lagomatai fēfē he fakatokatokaaga ha Iehova e tau fakapotopotoaga ne nakai fahia ke totogi ha lautolu a tau Fale he Kautu?

⁹ Kua gahua malolō e tau tagata ha Iehova he lalolagi katoa ke talaga e tau Fale he Kautu. Ko lautolu ne foaki noa e tau magaaho ne nakai totogi kua palana, talaga, mo e fakafoou ai. Ti ko e fua, he 15 e tau kua mole, ne talaga e tautolu molea 28,000 e tau Fale he Kautu ne fulufuluola he lalolagi katoa, po ke kavi 5 e Fale he Kautu he tau aho takitaha.

¹⁰ Kotofa he fakatokatokaaga ha Iehova a lautolu ne foaki noa e tau magaaho mo e fakaaoga e tau mena fakaalofa ke lagomatai ke talaga e tau Fale he Kautu he tau matakavi ne manako ki ai. Muitua e tautolu e matapatu fakaakoaga he Tohi Tapu, ko lautolu ne muhumena ka lagomatai a lautolu ne nonofogati. (Totou 2 Korinito 8:13-15.) Ko e heigoa e tau fua? Loga e Fale he Kautu ne kua talaga ma e tau fakapotopotoaga ne nakai fahia ke totogi ai.

11. Ko e heigoa he falu matakainaga ne talahau hagaao ke he ha lautolu a Fale he Kautu ne foou, ti fēfē e logonaaga haau ke he mena nei?

¹¹ Ko e tau matakainaga mai he taha fakapotopotoaga i Costa Rica ne tohi: “Ka tutū a mautolu i mua he Fale he Kautu, tuga na logona e mautolu kua miti a mautolu! Nakai talitonu ai a mautolu. Valu ni e aho ti mau e tau vala oti he fale fulufuluola ha mautolu he talaga! Maeke ni ha ko e fakamonuina ha Iehova, tau fakaholoaga ne taute he fakatokatokaaga haana, mo e lalagoaga he tau matakainaga fakahele ha mautolu. Ko e matakavi nei he tapuakiaga ko e mena fakaalofa uho mooli, ko e makauho ne foaki mai e Iehova ki a mautolu. Kua fiafia lahi mahaki a mautolu ki ai.” Fiafia mooli a tautolu ke logona e fakaaue he tau matakainaga ha tautolu ki a Iehova ma e mena ne taute e ia ma lautolu. Ti fiafia lahi a tautolu ha kua moua he tau matakainaga he lalolagi katoa ha lautolu ni a Fale he Kautu. Maaliali ai kua fakamonuina e Iehova e gahua talaga he tau Fale he Kautu, ha ko e magaaho ni ka talaga ai, tokologa fakahaga e tagata kua kamata ke fakalataha mai ke he tau feleveiaaga ke fakaako hagaao ki a Iehova.​—Salamo 127:1.

12. Maeke fēfē a koe ke lagomatai ke talaga e tau Fale he Kautu?

 ¹² Maeke fēfē a koe ke lagomatai ke talaga e tau Fale he Kautu? Liga maeke ia koe ke foaki noa e magaaho ke lagomatai e gahua ia. Ti maeke ia tautolu oti ke foaki tupe ke totogi aki e talagaaga he tau Fale he Kautu. Ka taute e tautolu e tau mena oti ke lalago e gahua nei, logona e tautolu e fiafia he foaki, mo e mua atu ai kua fakaheke e tautolu a Iehova. Muitua e tautolu e fakafifitakiaga he tau tagata he Atua he vahā Tohi Tapu ne makai ke foaki ke lata mo e talagaaga he ha lautolu a tau fale he tapuakiaga.​—Esoto 25:2; 2 Korinito 9:7.

13, 14. Ko e heigoa nukua fakaako e tautolu he Tohi Tapu ne fakakite kua lata ia tautolu ke fakameā mo e fakamaopoopo tumau ha tautolu a Fale he Kautu?

¹³ Ko Iehova ko e Atua meā mo e tapu. Ko e Atua maopoopo a ia. Kakano haia ne lata ia tautolu ke fakameā mo e fakamaopoopo tumau ha tautolu a Fale he Kautu. (Totou 1 Korinito 14:33, 40.) He meā mo e tapu tuga a Iehova, nakai ni tumau a tautolu ke fakameā ha tautolu a tapuakiaga, manamanatuaga, mo e tau mahani, ka e fakameā tumau foki e tau tino ha tautolu.​—Fakakiteaga 19:8.

¹⁴ Ka tumau a tautolu ke fakameā mo e fakamaopoopo ha tautolu a Fale he Kautu, matalahi a tautolu ke uiina e tau tagata ke he tau feleveiaaga ha tautolu. To kitia ai he tau tagata kua taute mooli e tautolu e tau mena ne fakamatala e tautolu hagaao ke he lalolagi foou kua meā. To kitia e lautolu kua tapuaki a tautolu ke he Atua tapu mo e meā ka taute e lalolagi nei ke eke mo parataiso fulufuluola.​—Isaia 6:1-3; Fakakiteaga 11:18.

15, 16. (a) Ko e ha ne nakai ko e mena mukamuka ke fakameā tumau e Fale he Kautu? Ko e ha kua lata ia tautolu ke fakameā tumau ai? (e) Fakatokatoka fēfē ha mutolu a fakameā he Fale he Kautu, ti ko e heigoa e kotofaaga kua moua oti e tautolu?

¹⁵ Kehekehe e tau manatu he tau tagata hagaao ke he puhala fakameā. Ko e ha? Liga ha ko e puhala ne feaki hake a lautolu. Falu ne nonofo foki he matakavi efu po ke matakavi ne kiva mo e pelapela e tau puhalatū. Falu ne nakai lahi e vai po ke tau koloa fakameā. Ka ko e mena fe ni ne nonofo a tautolu mo e pete ne logonaaga he tau tagata he matakavi ha tautolu hagaao  ke he puhala fakameā, kua lata ia tautolu ke fakameā mo e fakamaopoopo tumau ha tautolu a Fale he Kautu. Ko e matakavi kua tapuaki ai a tautolu ki a Iehova.​—Teutaronome 23:14.

¹⁶ Ka manako a tautolu ke he ha tautolu a Fale he Kautu ke meā, kua lata ia tautolu ke fakatokatoka. Taute he tau motua e fakaholoaga ma e fakapotopotoaga ti mailoga kua lahi tumau e tau koloa mo e tau mena fakameā. Fakatokatoka foki he tau motua e gahua ke maeke ke taute ai. Falu mena kua lata ke fakameā ka oti e feleveiaaga takitaha, ka e nakai fakameā pihia falu mena. Igatia a tautolu oti mo e kotofaaga ke fakameā ha tautolu a Fale he Kautu.

17, 18. (a) Ko e heigoa ka fakaako e tautolu mai he puhala ne leveki he tau tagata ha Iehova he vahā i tuai e faituga? (e) Ko e ha kua lata ia tautolu ke leveki ha tautolu a Fale he Kautu?

¹⁷ Maeke foki ia tautolu ke tumau e tuaga mitaki he ha tautolu a Fale he Kautu he fakafoou e tau mena kua lata. Taute pihia foki he tau fekafekau ha Iehova he vahā i tuai. Ma e fakatai, he mogo ne pule e Patuiki ko Ioasa i Iuta, ne foaki tupe e tau tagata ke he faituga. Ne poaki he patuiki ke he tau ekepoa ke fakaaoga e tupe nei ke fakafoou aki e tau mena oti he faituga ne malona. (2 Tau Patuiki 12:4, 5) Molea 200 tau he mole, ne fakaaoga foki he Patuiki ko Iosia e tau mena foaki fakaalofa he faituga ke totogi aki e fakafoouaga.​—Totou 2 Nofoaga he Tau Patuiki 34:9-11.

¹⁸ Falu he tau La Komiti ne mailoga kua nakai mahani e tau tagata he tau motu ha lautolu ke leveki fakamitaki e tau fale po ke tau koloa. Liga gahoa e tagata he tau motu nei ne iloa e puhala ke taute aki e gahua. Po ke liga nakai lahi e tupe ha lautolu ke totogi aki e tau fakafoouaga. Ka nakai fakafoou ha tautolu a Fale he Kautu he magaaho kua lata, to kamata ai ke fulufagu mo e to mailoga he tau tagata e mena nei. To nakai eke e mena ia mo fakamatala mitaki ki a lautolu. Ka e eketaha a tautolu oti ke leveki ha tautolu a Fale he Kautu, fakaheke e tautolu a Iehova ti nakai moumou e tautolu e tupe ne foaki he tau matakainaga ha tautolu.

19. Ko e heigoa haau ka taute ke fakakite e fakalilifu haau ma e matakavi kua tapuaki a koe ki a Iehova?

¹⁹ Ko e Fale he Kautu ne fakatapu ai ki a Iehova. Nakai pule ha tagata po ke fakapotopotoaga ki ai. He fakatutala a tautolu ke he vala tala nei, ko e tau matapatu fakaakoaga he Tohi Tapu to lagomatai a tautolu ke moua e aga hako ke he matakavi kua tapuaki a tautolu ke he Atua. Ha kua fakalilifu e tautolu a Iehova, fakakite e tautolu e fakalilifu ke he tau feleveiaaga ha tautolu ti pihia mo e Fale he Kautu. Fiafia a tautolu ke foaki e tau tupe ke talaga aki e tau Fale he Kautu, ti eketaha a tautolu ke leveki ai mo e tumau ai e meā. Tuga a Iesu, fakakite e tautolu e fakamakai mo e fakalilifu ke he matakavi kua tapuaki a tautolu ki a Iehova.​—Ioane 2:17.