1, 2. (1) ¿Maypim Diosta yupaychaqku ñawpaq tiempopi serviqninkunaqa? (2) ¿Imatam Jesus piensarqa Jerusalen templomanta? (3) ¿Imamantam kay yachachikuypi qawasunchik?

JEHOVA DIOSPA serviqninkunapaqqa kaqmi maypi yupaychananku. Abelqa yaqapaschá altarta ruwarqa Jehova Diosman ofrendata qunanpaq (Gen. 4:3, 4). Noey, Abraham, Isaac hinaspa Moisespas altarkunatam ruwarqaku (Gen. 8:20; 12:7; 26:25; 35:1; Ex. 17:15). Jehova Diosqa kamachirqataqmi Israel runakunata yupaychananpaq huk karpata ruwanankupaq (Ex. 25:8). Watakuna pasaytapas kamachirqam templota ruwanankupaq (1 Rey. 8:27, 29). Babilonia nacionmanta Israel runakuna lluqsiruspankum, huñunakuyta qallaykurqaku huñunakunanku wasikunapi (Mar. 6:2; Juan 18:20; Hech. 15:21). Punta pachak watapipas wasikunapim huñunakurqaku (Hech. 12:12; 1 Cor. 16:19). Kunanpas, Jehova Diospa testigonkunaqa enteron pachapim huñunakunchik Diosta yupaychanapaq wasikunapi.

² Jesusqa anchatam chanincharqa Jerusalen templotaqa. Qatiqninkuna chayta qawaspankum yuyarirqaku salmo qillqaqpa kayna nisqanta: “Wasikita ancha kuyasqaymi rawrachkaq nina  hinaraq sunquypi kanqa”, nispa (Sal. 69:9; Juan 2:17, NM). Arí, huñunakunanchik wasikunaqa manam ñawpaqpi templo hinachu Diospa wasin (2 Cron. 5:13; 33:4). Ichaqa chaninchananchikmi, chaypim huñunakunchik Diosta yupaychananchikpaq. Kay yachachikuypim qawasunchik huñunakuna wasipi imayna kananchikmanta, imayna allichanamanta hinaspa hinalla hatarichinankupaq imayna yanapakunamantapas. *

3-5. (1) ¿Imapaqtaq huñunakunanchik wasiqa? (2) ¿Imaynatam huñunakuyninchikta qawananchik?

³ Huñunakunanchik wasiqa Diosta yupaychananchikpaqmi. Huñunakuykunaqa Diospa regalo quwasqanchikmi. ¿Imanasqa? Yanapawanchikmi Dioswan amistadninchik aswan allin kananpaq. Chaymantapas, Diospa llaqtantakamam kallpanchawanchik hinaspa yachachiwanchik. Huñunakuypi yachachikuykuna chaskisqanchikqa sapa semana Jehova Diospawan Jesuspa mikuy quwasqanchik hinam. Chayqa ancha kusikunapaqmi, anchatayá chaninchasun (1 Cor. 10:21).

⁴ Jehova Diosqa palabranpim niwanchik payta yupaychanapaq huñunakuykunaman rinapaq hinaspa kallpanchanakunapaqpas (leey Hebreos 10:24, 25). Jehova Diosta respetasqanchikraykum, mana saqinanchikchu huñunakuykunaman riytaqa. Huñunakuykunamanta agradecesqa kasqanchiktam qawachinchik rimarinanchikpaq allinta preparakuspanchik (Sal. 22:22).

⁵ Huñunakuykunapi hawkalla kaspaqa hinaspa huñunakunanchik wasita allinta qawaspaqa, Dios respetasqanchiktam qawachisunchik. Munanchikmi imayna kawsakuyninchikwan Jehova Diospa sutinmanta allinta rimanankuta, Diospa sutinqa yaqa llapallan huñunakunanchik wasikunapim kachkan (1 Rey. 8:17).

6. ¿Imatam wakin runakuna nirqaku huñunakunanchik wasita qawaspanku? (Qaway 22 kaq paginapi dibujota).

⁶ Runakunaqa musyakunkum huñunakunanchik wasita respetasqanchikta. Turquía nacionpi huk runam nirqa: “Anchatam admirakurqani chuya hinaspa sumaq allichasqa kasqanta qawaspay. Runakunapas sumaq allichasqa hinaspa kusisqam allinta chaskiykuwarqaku”, nispa. Chay runaqa lliw huñunakuykunaman riytam qallaykurqa hinaspam pisi tiempollamanta bautizakururqa. Indonesia nacionpa huk kaqnin llaqtanpim, musuq huñunakuna wasita hatarichirqaku. Chaypi iñiqmasinchikkunam wasi hatarichiyta tukuruspanku vecinonkunata hinaspa wakin autoridadkunatapas nirqaku qawanankupaq. Alcaldem nirqa sumaq hatarichisqa kasqanmanta hinaspa huertankupas sumaq kasqanmanta. Nirqataqmi yachachisqanchikman hina huñunakunanchik wasi chuya kasqanta.

7, 8. ¿Imaynatam Jehova Dios respetasqanchikta qawachinchik huñunakunanchik wasipi?

⁷ Jehova Diosmi niwanchik huñunakuykunam rinanchikpaq. Payqa kusisqataqmi tarikun imayna pachasqa hinaspa imayna chaypi kasqanchikwan. Ichaqa manam huñunakuykunapi imayna kanapaq kamachikuykunataqa churananchikchu. Manataqmi mana kaqpaq hinataqa qawananchikchu. Diosqa munanmi huñunakuyman rispa allinlla kananchikta. Ichaqa, manamá munanchikchu imapas ruwasqanchikwan Diospa sunqunta nanachiytaqa. Chaymi huñunakuykunaman riptinchikqa pachanchikpas cuerponchikpas chuya kanan. Manataqmi  huñunakuypiqa celularnintakama mensajekunata apachinakunchikchu, hukkunawan rimanchikchu, mikunchikchu nitaq tomanchikchu. Tayta-mamakunapas warmankutam yachachinanku huñunakuypi mana pukllanankupaq (Ecl. 3:1).

⁸ Huñunakunanchik wasimanqa Jehova Diosta yupaychanapaq hinaspa paymanta yachanapaqmi rinchik. Chaymi huñunakuypiqa mana rimanchikchu negociokunamantaqa (tupachiy Neh. 13:7, 8). Yuyarisunchik, Jesusqa templopi rantikuq runakunata rikuruspanmi anchata piñakuspan qarqururqa (Juan 2:13-17).

9, 10. (1) ¿Imatam Jehova Diospa testigonkuna ruwanku huñunakunanchik wasikuna hatarichiypi yanapakunankupaq? (2) ¿Imapim chay ruwasqanku tukurqa? (3) ¿Imaynatam Diospa llaqtanqa wakcha nacionkunapi huñunakunanchik wasikunata hatarichinankupaq yanaparqa?

⁹ Jehova Diospa achka testigonkunam enteron pachapi anchata llamkanku huñunakunanchik wasikunata hatarichinankupaq. Paykunaqa mana imallapaqmi wasi imayna kananpaq dibujanku, hatarichinku hinaspa allichankupas. Chaynapim pasaq 15 watakunapi yaqa pichqa huñunakuna wasikunata sapa punchaw hatarichinku. Llapanpiqa 28.000 masnin huñunakunanchik wasikunatam hatarichirqaku.

¹⁰ Bibliam niwanchik kapuqniyuqkuna mana kapuqniyuqkunata yanapanankupaq (leey 2 Corintios 8:13-15). Chaymi Diospa llaqtanqa allinta servichikun qullqi qusqanchikta hinaspa yanapakuy munaqkunatapas. Chay yanapakuykuna kasqanraykum, achka huñunakunanchik wasikunata hatarichirqaku wakcha nacionkunapi.

11. (1) ¿Imatam wakin iñiqmasinchikkuna ninku musuq huñunakuna wasimanta? (2) ¿Imaynam tarikunki chay iñiqmasinchikkunapi piensaspa?

¹¹ Costa Rica nacionpim 8 punchawllapi huñunakunanchik wasita hatarichirqaku. Chay lawpi iñiqmasinchikkunam ninku chay ruwasqankuwan musquypi hina tarikusqankumanta. Ancha kusisqam tarikunku chay wasita hatarichinankupaq Dios yanapasqanmanta. Llapanchikpas kusisqam tarikunchik paykunata Jehova Dios yanapaptin agradecesqa tarikusqankumanta. Kusisqataqmi tarikunchik enteron pachapi iñiqmasinchikkunapa huñunakunanku wasi kasqanmanta. Jehova Diosqa sutillatam yanapawachkanchik huñunakunapaq wasikuna hatarichiypi. Huk musuq huñunakuna wasita hatarichiptinchikqa, achka runakunam huñunakuykunaman riyta qallarinku Jehova Diosmanta yachanankupaq (Sal. 127:1).

12. ¿Imaynatam astawan yanapakuchwan huñunakuna wasikuna hatarichiypi?

¹² ¿Imaynatam astawan yanapakuchwan huñunakunapaq wasikunata hatarichiypi? Wakiqninchikqa hatarichiypim yanapakuchwan.  Llapanchiktaqmi yanapakuchwan qullqita quspanchik. Yanapakunanchikpaq tukuy imata ruwaspanchikqa kusisqam tarikusunchik. Chaymantapas astawanmi Jehova Diosta hatunchasunchik. Munanchiktaqmi qatipakuyta ñawpaq tiempopi Diospa serviqninkunata. Paykunaqa sunqumantam qullqinkuta qurqaku Jehova Diosta yupaychanapaq wasikunata hatarichinankupaq (Ex. 25:2; 2 Cor. 9:7).

13, 14. Bibliapa nisqanman hinaqa, ¿imanasqataq huñunakunanchik wasiqa chuya hinaspa sumaq allichasqa kanan?

¹³ Jehova Diosqa chuyam, hinaspapas manam chaqwapi kawsananchiktaqa munanchu. Chaymi huñunakunanchik wasiqa chuya hinaspa sumaq allichasqa kanan (leey 1 Corintios 14:33, 40). Jehova Dios hina chuya kanapaqqa, piensayninchikpi, ruwayninchikpi hinaspa yupaychayninchikpipas chuyam kananchik. Chaymantapas cuerponchikqa limpiom kanan (Apoc. 19:8).

¹⁴ Huñunakunanchik wasi chuya kaptinqa, mana iskayrayaspam runakuna hamunankupaq nisunchik. Chaynapim paykunapas qawanqaku musuq pachapi chuya kawsakuyta munasqanchikta. Chaymantapas chuya Diosta yupaychasqanchiktam qawanqaku, payqa kay allpa pachatam sumaq huertaman tikranqa (Is. 6:1-3; Apoc. 11:18).

15, 16. (1) ¿Imanasqam wakinpiqa sasachakunchik huñunakunanchik wasi haykapipas chuya kananpaq? (2) ¿Imanasqam huñunakunanchik wasiqa chuya kanan? (3) ¿Imaynatam yachanchik chuyanchanapaq tupawasqanchikta? (4) ¿Ima ruwaytam llapanchik atichwan?

¹⁵ Wakinpiqa sasachakunchikmi huñunakunanchik wasi haykapipas chuya kananpaq. ¿Imanasqa? Manam llapanchikchu chaynallata piensanchik chuya kaymantaqa. Wakinkum yachanku mitupi utaq allpallaña kasqan lawpi. Wakinkupañataq mana ancha kanchu yakunku utaq chuyanchakunankupaq kaqkunapas. Wakinpiqa imayna uywasqa kasqanchikpas sasachawachwanmi chuya kanapaq. Ichaqa maypi yachaspanchikpas utaq runakuna imata piensaptinkupas, huñunakunanchik wasitaqa chuyanchananchikmi hinaspa sumaqtam allichananchik. ¿Imanasqa?  Chaypi Jehova Diosta yupaychasqanchikraykum (Deut. 23:14).

¹⁶ Huñunakunanchik wasi sumaq chuyanchasqa kananta munaspanchikqa, tupawasqanchikman hinam ruwananchik. Chaypaqmi ancianokuna tanteanku pikuna hinaspa haykapi chuyanchanankupaq, chaypaqqa kanantaqmi chuyanchanapaq kaqkunapas. Chaymantapas, sumaq chuyanchasqa kananpaqmi sapakamata niwanchik imata ruwananchikpaq. Wakintaqa sapa huñunakuy tukuytam chuyanchana, wakintañataq mana sapa kutichu. Chaynaqa llapanchikmi atichwan yanapakuyta huñunakunanchik wasi chuya kananpaq.

17, 18. (1) ¿Imatam ñawpaq tiempopi Diospa serviqninkunamanta yachachwan? (2) ¿Imanasqam huñunakunanchik wasiqa sumaq allichasqa kanan?

¹⁷ Ñawpaq tiempopi Jehova Diospa serviqninkunaqa sumaqtam allichaqku templotaqa. Kamachikuq Joasqa Juda nacionpi sacerdotekunatam kamachirqa runakunapa qusqan qullqiwan templota allichanankupaq (2 Rey. 12:4, 5). Kamachikuq Josiaspas 200 watakuna pasaytam, runakunapa qusqan qullqita servichikurqa templota allichachinanpaq (leey 2 Cronicas 34:9-11). ¿Imatam kayqa yachachiwanchik? Ñuqanchikpas huñunakunanchik wasitam sumaqta allichananchik.

¹⁸ Wakin betel wasikunam ninku, nacionninkupi huñunakuna wasikunata hinaspa chaypi kaqkunatapas mana sumaqta allichasqankumanta. Wakinpiqa manam lliwchu allichayta yachanku. Wakinpiñataq mana qullqi kanchu allichanankupaq. Chaylla mana imapas allichaptinchikqa, pisi-pisimantam astawan tukurunqa. Chayta runakuna qawaspankuqa manam allintachu ñuqanchikmanta rimanqaku. Chaymi kallpanchakunanchik huñunakunanchik wasita sumaqta allichanapaq. Chaynapim Jehova Diosta hatunchasunchik hinaspa iñiqmasinchikkunapa qullqi qusqankutapas allinta servichikusunchik.

19. Huñunakunanchik wasipi, ¿imata ruwaspayki yanapakunaykipaqmi tantearunki?

¹⁹ Kay yachachikuypi bibliapa nisqankunata qawamusqanchikmi yanapawanchik huñunakunanchik wasita allinta qawanapaq. Yuyarinanchikmi lliw huñunakunanchik wasikunaqa Jehova Diospa kasqanta, manam pi runapachu nitaq iñiqmasinchikpachu. Jehova Diosta respetaspanchikqa, huñunakuyninchikkunata hinaspa huñunakunanchik wasikunatapas allintam qawasunchik. Kusikuywantaqmi qullqinchiktapas qusunchik huñunakuna wasikunata hatarichinankupaq hinaspapas kallpanchakusunmi chuya chaynataq sumaq allichasqa kananpaq. Chaymi hinalla Jesusta qatipakunanchik hinaspa Jehova Diosta maypi yupaychananchik kaqkunatapas allinta qawananchik (Juan 2:17).