1, 2. a) ¿Maypin ñawpa tiempopi Diosta adoraqku? b) ¿Imaynatan Jesús qhawariq Jerusalén templota? c) ¿Imatan kay estudiopi yachasun?

RUNAKUNAQA ñawpa tiempomantapachan huk lugarpi Diosta adoraqku. Abelqa huk altarpichá sacrificiota Diosman haywarqan (Gén. 4:3, 4). Noé, Abraham, Isaac, Jacob, Moisespas altarkunatan ruwarqanku (Gén. 8:20; 12:7; 26:25; 35:1; Éx. 17:15). Tiempowanmi Jehová Dios Israel llaqtata kamachirqan huk karpata ruwanankupaq (Éx. 25:8). Unay watakuna qhepamanmi kamachillarqantaq templota hatarichinankupaq (1 Rey. 8:27, 29). Babilonia llaqtamanta kacharichisqa kasqanku qhepamanpas sinagogakunapin huñunakuqku (Mar. 6:2; Juan 18:20; Hech. 15:21). Ñawpa cristianokunapas wasikunapin huñunakuqku (Hech. 12:12; 1 Cor. 16:19). Kay tiemponchispipas wasikunapin huñunakunchis Diosta adorananchispaq.

² Jesusqa anchatan respetarqan munakurqantaq Jerusalén templota. Chayta reparaspan qatikuqninkuna yuyarirqanku Bibliaq nisqanta, ninmi: “Wasiykitan sinchitapuni munakuni”, nispa (Sal. 69:9; Juan 2:17). Kunanqa manan chay templota hinachu huñunakunanchis wasita ‘Diospa  wasin’ nisunman. Ichaqa anchatan respetananchis chay wasipi Diosta adorasqanchisrayku (2 Crón. 5:13; 33:4, NM). Kay estudiopin yachasun huñunakuna wasipi imayna portakunamanta, huñunakuna wasikuna astawan hatarichikunanpaq imayna yanapanamanta, imayna cuidanamantawan. *

3-5. a) ¿Imapaqmi huñunakunanchis wasi? b) ¿Imaynatan huñunakuykunata qhawarinanchis?

³ Huñunakuna wasikunaqa Diosta adoranapaqmi. Chay wasikunapi ruwakusqan huñunakuykunaqa Diospa ancha sumaq regalonmi, chaypi chaskisqanchis yachachikuykunan yanapawanchis Diosman astawan achhuykunanchispaq. Chaymantapas kallpachawanchis yanapawanchis iman. Sapa huñunakuymi Jehová Diospa Jesuspa sumaq preparasqanku mikhuna hina, ¡ñoqanchistaqmi ‘mesanpi’ mikhunanchispaq invitadokuna kanchis! (1 Cor. 10:21.)

⁴ Jehová Diosmi munan huñunakuykunaman rispa payta adorananchista, ñoqanchis pura kallpachanakunanchistawan (leey Hebreos 10:24, 25). Chaymi Jehová Dios respetasqanchista rikuchinapaq mana imaraykupas huñunakuykunaman faltakunachu, hatun sasachakuykuna kallaqtinñachá faltakusunman. Hinaspapas agradecido kasqanchista rikuchinapaqqa allin preparasqan rinanchis comentaspa yanapakunanchispaq (Sal. 22:22).

⁵ Chaymantapas Dios respetasqanchista rikuchinapaqqa, huñunakunanchis wasipin allinta portakunanchis allintataqmi cuidananchispas. Mana chayqa Diospa sutinmi pisichasqa kanman. Manan qonqananchischu hawa letreronchispi Diospa sutin qelqasqa kasqanta (tupachiy 1 Reyes 8:17).

6. ¿Ima nirqankun wakin runakuna huñunakunanchis wasita visitaspa? (22 paginapi fotota qhaway.)

⁶ Wakin runakunaqa reparankun huñunakunanchis wasita ancha respetasqanchista. Turquía nacionmanta runan nirqan: “Anchatan admirachiwarqan huñunakunanku wasi limpio allin allichasqa kasqan, chaypi huñukuqkuna allin p’achasqa kusisqallaña kasqankupas. Llapankun sumaqta chaskiwarqanku, chaymi astawanqa admirachiwarqan”, nispa. Chay runaqa huñunakuykunamanmi riyta qallarirqan, pisi tiempomantataq bautizakapurqan. Indonesia nacionpin huk llaqtapi huñunakuna wasita hatarichirqanku. Chaymi invitarqanku vecinokunata, autoridadkunata, alcaldetapas. Alcaldeqa ancha admirasqan kasharqan allin materialkunawan hatarichisqankumanta, munay huertanmantapas. Chaymi nirqan: “Chay wasiq limpio kasqanmi rikuchin predicasqankuman hina kawsasqankuta”, nispa.

7, 8. ¿Imaynatan huñunakuypi rikuchisunman Jehová Dios respetasqanchista?

⁷ Huñunakuykunamanqa Jehová Diosmi invitawanchis. Chaymi allin p’achasqa rinanchis allintataq portakunanchispas. Manan pipas kamachikuykunata churananchu huñunakuypi imayna portakunamanta, ichaqa manataqmi wasinkupi  kashankuman hinachu portakunanku. Jehová Diosmi munan visitanchiskunapas ñoqanchispas huñunakuypi kusisqa kananchista, ichaqa manan chayraykuchu comunta portakunanchis. Hinaspapas allin hap’iq p’achawanmi rinanchis. Manataqmi huñunakunanchis horaspi piwanpas parlashanachu, celularpi mensajeta apachishanachu, mikhushanachu nitaq tomashanachu. Tayta-mamakunapas wawankutan yachachinanku huñunakuypi pukllaypas phawaykachaypas mana allin kasqanta (Ecl. 3:1).

⁸ Chaymantapas huñunakuna wasipiqa manan ima negociotapas ruwanachu. Jesuspa tiemponpin wakin runakuna templopi vendesharqanku, chayta rikuspan Jesusqa anchata phiñakuspa vendeqkunata wikch’umurqan (Juan 2:13-17). Huñunakuna wasimanqa rinchis Diosta adorananchispaqmi, paymanta astawan yachananchispaqwan, chaymi mana imatapas vendeshanachu nitaq huk ruwaykunapipas kashanachu (tupachiy Nehemías 13:7, 8).

9, 10. a) ¿Imaynatan huñunakuna wasikuna hatarichikun? b) ¿Hayk’a wasikunatan hatarichikurqan 1999 watamantapacha? c) ¿Imaynapin pisi qolqeyoq iñiq t’aqakuna huñunakuna wasiyoq kanku?

⁹ Askha testigokunan yanapakunku huñunakuna wasikunata hatarichiypi. Gratisllan planokunata ruwanku, wasita hatarichinku, allichankupas. 1999 watamantapachan 28.000 más huñunakuna wasikunata pachantinpi ruwakurqan. Chayqa sapa p’unchaypas phisqa wasita hatarichinkuman hinan.

¹⁰ Diospa llaqtanqa necesitakusqan ladokunapin huñunakuna wasikunata hatarichin. Chaytan ruwakun iñiqmasikunaq yanapayninwan, donacionkuna churasqanchiswan ima. Biblian nin askha kaqniyoqkuna pisichikuqkunata yanapaykunankuta. Chayta kasukusqanchisraykun pisi qolqeyoq iñiq t’aqakunapas huñunakuna wasiyoq kanku (leey 2 Corintios 8:13-15).

11. a) ¿Ima ninkun wakin iñiqmasikuna huñunakunanku wasita rikuspa? b) ¿Imaynatan sientekunchis rimasqankuta uyarispa?

¹¹ Costa Rica nacionpin huk iñiq t’aqamanta iñiqmasikuna nirqanku: “Ancha kusisqan kashayku huñunakunayku wasi ruwakusqanmanta. ¡Pusaq p’unchayllapin tukurqayku! Maytan agradecekuyku Jehová Diosta, llaqtanta, iñiqmasikunatapas kay munay wasita ruwapuwasqankumanta, sapallaykuqa manan atiykumanchu karqan. Kay wasiqa Diospa regalonmi”,  nispa. Ñoqanchispas anchatan kusikunchis chay iñiqmasikunaq kusikusqankuwan, pachantinpi iñiqmasikunapaq huñunakuna wasikuna ruwakusqanmantapas. Chaymantapas huñunakuna wasikuna hatarichikusqanman hinan aswan askha runakuna huñunakuykunaman hamushanku, chaykunan rikuchiwanchis Jehová Dios bendeciwasqanchista (Sal. 127:1).

12. ¿Imaynatan yanapakusunman huñunakuna wasikuna astawan hatarichikunanpaq?

¹² ¿Imaynatan yanapakusunman huñunakuna wasikuna astawan hatarichikunanpaq? Wasita hatarichiypi yanapakuspa, gastokuna pagakunanpaq donacionkunata churaspan. Chaykunapi tukuy atisqanchista yanapakusun chayqa kusisqan kasun, astawanqa Jehová Diostan hatunchasunchis. Ñawpa tiempopi Diosta serviqkunaq ruwasqanta hinan ruwananchis. Paykunaqa sonqomantan qolqeta churarqanku huñunakuna wasikunata ruwakunanpaq (Éx. 25:2; 2 Cor. 9:7).

13, 14. ¿Ima textokunan yanapawanchis huñunakunanchis wasita limpiota ordenpi hap’inanchispaq?

¹³ Jehová Diosqa ch’uya Diosmi, tukuy imatapas ordenpi ruwaq. Chaymi huñunakunanchis wasi limpio kanan, tukuy imapas ordenpi kanan (leey 1 Corintios 14:40). Ñoqanchispas ch’uyan kananchis piensayninchispi, ruwayninchispi, Diosta adorasqanchispi, cuerponchispipas (Apo. 19:8).

¹⁴ Sichus huñunakunanchis wasi limpiolla kanqa chayqa, mana p’enqakuspan runakunata invitamusun. Hinaspapas kay pachata sumaq paraisoman Dios tukuchinanmantan runakunaman willamunchis, chay willasqanchisman hinan huñunakunanchis wasipas limpio sumaq kanan. Chayta qhawarispan runakuna reparanqaku willasqanchisman hina kawsasqanchista, ch’uya Diosta adorasqanchistapas (Is. 6:1-3; Apo. 11:18).

15, 16. a) ¿Imaraykun kallpachakuna huñunakunanchis wasi limpio kananpaq? b) ¿Imaraykun limpiota hap’inanchis? c) ¿Imaynatan huñunakunaykichis wasipi limpiezata ruwankichis? d) ¿Imapin llapallanchis yanapakusunman?

 ¹⁵ Ichaqa huñunakunanchis wasi limpio kananpaqqa kallpachakunanchismi. ¿Imarayku? Sapanka runa hukniray uywasqa kasqanchisrayku. Wakinqa llaqtapi wiñasqankuraykun yachanku tukuy imaymana productokunawan limpieza ruwayta. Wakintaq ichaqa campopi wiñarqanku, pisi unuq kasqanpi, t’uruq kasqanpi ima. Ichaqa maypiña otaq imaynataña uywasqa karqanchis chaypas, huñunakunanchis wasitaqa limpiotan ordenpi hap’inanchis, chaypi Jehová Diosta adorasqanchisrayku (Deut. 23:14).

¹⁶ Chaypaqmi umallikuna allin programata ruwananku, limpianapaq productokunatapas rantinanku. Chaymantapas iñiqmasikunatan yachachinanku imakunata sapa huñunakuypi limpianankuta, imakunatataq sapa killa otaq sapa wata. Llapanchismi yanapakunanchis huñunakunanchis wasi limpiolla kananpaq.

17, 18. a) ¿Imatan yachasunman ñawpa tiempopi Dios serviqkunamanta? b) ¿Imaraykun huñunakunanchis wasi allin allichasqalla kanan?

¹⁷ Ñawpa tiempopi Diosta serviqkunaqa templotan allichashallaqku. Huk kutinmi rey Joás sacerdotekunata kamachirqan llapa runakunaq contribución churasqankuwan templota allichanankupaq (2 Rey. 12:4, 5). Unay watakuna qhepamanmi rey Josiaspas templota allichachirqan contribución qolqewan (leey 2 Crónicas 34:9-11). Chaymi yachachiwanchis huñunakuna wasi allichaypi yanapakunanchista.

¹⁸ Wakin sucursalkunan willakunku nacionninkupi runakuna wasinkuta mana allichasqankuta, allichay yachaqkuna pisi kasqanrayku otaq qolqe mana kasqanrayku. Chaywanpas allichananchispunin huñunakunanchis wasita, mana chayqa astawanmi malograkapunman, runakunataq ñoqanchismanta mana allinta rimankuman. Allichaspaqa Jehová Diostan hatunchasun, iñiqmasikunaq contribución churasqankupas manan usunqachu.

19. ¿Imatan ruwananchis huñunakunanchis wasita respetanapaq?

¹⁹ Kay estudion yanapawanchis huñunakunanchis wasita respetananchispaq. Chay wasiqa Jehová Diospan, manan ñoqanchispachu nitaq iñiq t’aqaqchu. Sichus Jehová Diosta respetasun chayqa, respetallasuntaqmi huñunakuykunata huñunakunanchis wasitapas. Hinaspapas yanapakusunmanmi contribucionkunata churaspa, chay wasita limpiaspa, allichaspa ima. Chhaynaqa Jesús hina huñunakunanchis wasita respetasun (Juan 2:17).