1, 2. (a) I te tuatau i topa, e akamori ana te au tavini o Iehova kiea? (e) Eaa to Iesu manako no runga i te iero o Iehova i Ierusalema? (ng) Eaa ta tatou ka uriuri i roto i teia atikara?

I TE tuatau i topa e i teia tuatau, i vai ua ana te au ngai akamorianga no te au tavini o te Atua. Ei akaraanga, te oronga anga a Abela i te au atinga kia Iehova, penei kua patu aia i tetai atarau. (Genese 4:3, 4) Kua patu katoa a Noa, a Aberahama, a Isaaka, a Iakoba, e Mose i te au atarau. (Genese 8:20; 12:7; 26:25; 35:1; Exodo 17:15) Kua akakite a Iehova ki te ngati Iseraela kia akatu i te tapenakara. (Exodo 25:8) I muri mai, kua ikuiku aia ia ratou kia patu i tetai iero. (1 Ariki 8:27, 29) I te oki mai anga te iti tangata o te Atua mei te tuikaa i Babulonia, kua uipa putuputu ratou ki roto i te au sunago. (Mareko 6:2; Ioane 18:20; Angaanga 15:21) Kua putuputu mai te au Kerititiano mua ki roto i te au ngutuare. (Angaanga 12:12; 1 Korinetia 16:19) I teia tuatau, te aravei ra te iti tangata o Iehova takapini i teianei ao ki roto i te ngauru ua atu tauatini Are Uipaanga Patireia, te ngai e apii ra tatou no runga ia Iehova e te akamori iaia.

² E akangateitei anga oonu tikai to Iesu no te iero o Iehova i Ierusalema. Kua riro to Iesu inangaro no te iero ei akamaara anga ki tana au pipi te au tuatua a te tata taramo e: “Kua riro roa au i te maroiroi i to are.” (Salamo 69:9; Ioane 2:17) Kare te Are Uipaanga  Patireia koia oki “te are o Iehova” e aiteite ana ki te iero i Ierusalema. (2 Paraleipomeno 5:13; 33:4) Inara ka tau tatou kia akangateitei oonu tikai i to tatou au ngai akamorianga. I roto i teia atikara, ka uriuri tatou i te au kaveinga Pipiria te ka apii mai ia tatou e mei teaa to tatou tu me putuputu mai ki to tatou au Are Uipaanga Patireia, e akapeea me akono i te reira, e akapeea me tauturu i te tutaki atu i te reira. *​—Akara i te tataanga rikiriki i raro ake.

3-5. Eaa te Are Uipaanga Patireia, e eaa ta tatou ka tau kia manako no runga i ta tatou au uipaanga?

³ Ko te Are Uipaanga Patireia te ngai tikai ka putuputu mai te au tangata no te akamori ia Iehova. E apinga aroa te au uipaanga no ko mai i te Atua, e ka riro te reira ei tauturu e te akaketaketa i to tatou pirianga kiaia. I ta tatou au uipaanga, te oronga maira tana akaaerenga i te akamaroiroi anga e te arataki anga ta tatou e anoano ra. E tika anga ngateitei teia kia patiia mai e Iehova e tana Tamaiti kia kaikai ki runga i “te kaingakai a te Atu [a Iehova]” i te au epetoma ravarai. (1 Korinetia 10:21) Auraka rava tatou e akangaropoina e mei teaa atura te puapinga i teia patianga.

⁴ Te akataka maira a Iehova kia tatou e te inangaro ra aia ia tatou kia aere ki te au uipaanga kia akamori iaia e kia akamaroiroi i tetai e tetai. (E tatau ia Ebera 10:24, 25) No to tatou tu akangateitei ia Iehova, kare tatou e akatau ua i te au uipaanga mari ua me ka anoano tikaiia te reira. Ka akaari tatou e te mareka tikai ra tatou i te au uipaanga me akapapa tatou no te reira e kia aruaru i te piri atu ki roto.​—Salamo 22:22.

⁵ To tatou tu i te au uipaanga e ta tatou akono anga i te au Are Uipaanga Patireia te akaari maira i to tatou tu akangateitei ia Iehova. Ka inangaroia kia akapaapaa i te ingoa o Iehova, tei kite matauia i runga i te patu o te Are Uipaanga Patireia.​—Akaaite ia 1 Ariki 8:17.

6. Eaa ta te au tangata i tuatua no to tatou Are Uipaanga Patireia pera katoa te aronga i te au uipaanga? (Akara i te tutu mua o teia atikara.)

⁶ Me e tu akangateitei to tatou i to tatou Are Uipaanga Patireia, ka kite mai te tangata i teia. Ei akaraanga, kua akakite tetai tangata i Turkey e: “Te tu mā e te mako taku i kite i ko i te Are Uipaanga Patireia kua umere tikai au. E manea tikai te akamanea anga o te au tangata i reira, mā te au mata katakata, e kua aravei mai ratou iaku ma te oaoa. Kua umere tikai au i teia.” Kua akamata teia tangata i te aere ki te au uipaanga pouroa e kare i roa i muri mai kua papetitoia. I tetai oire i Indonesia, kua pati te au taeake i to ratou au tangata tupu, te pu o te oire, e tetai atu au opita kia akarakara i to ratou Are Uipaanga Patireia ou. Kua umere tikai te pu o te oire i te tu mako o te are, te parani akatu anga, e te manea o te au aua tiare. Kua karanga aia e: “Te riro ra te tu mā o teia are uipaanga ei akaata i to kotou akarongo mou.”

7, 8. Akapeea tatou i te akangateitei anga ia Iehova i ko i to tatou Are Uipaanga Patireia?

⁷ Ko Iehova te pati maira ia tatou ki te au uipaanga, e te manako maira aia i to tatou akamanea anga e to tatou tu. No reira ka kopae tatou i te au tu tau kore. I tetai tua, kare tatou e maro e eaa te tu tau ka anoanoia no ta tatou au uipaanga, e i tetai tua, kare tatou e rave ua i ta tatou ka inangaro. E tika te inangaro ra a Iehova ia tatou e te aronga ta tatou e pati ra ki te Are Uipaanga Patireia kia mataora i te aere ki reira. Inara kare tatou e inangaro i te akaari i te tu akangateitei kore no te au uipaanga. Te tumu te reira kare tatou e aao i te au kakau  mako kore e te paarua, e kare tatou e tuku karere, e tuatua, me kore kia kaikai e kia inu vai i te tuatau o te au uipaanga. E ka tau te au metua kia apii i ta ratou au tamariki kia kore e orooro aere me kore e kanga i ko i te Are Uipaanga Patireia.​—Koheleta 3:1.

⁸ I to Iesu kite anga i te tangata e okooko apinga ra i ko i te iero o te Atua, kua riri aia e kua tuaru ia ratou ki vao. (Ioane 2:13-17) I roto i to tatou Are Uipaanga Patireia, e akamori ana tatou ia Iehova e te apii no runga iaia. No reira kare i te mea tau kia rave i te au angaanga pitiniti ia tatou i reira.​—Akaaite ia Nehemia 13:7, 8.

9, 10 (a) Akapeea te iti tangata o Iehova me akatu i te au Are Uipaanga Patireia, e eaa te au tupuanga tei rauka mai? (e) Akapeea ta Iehova akaaerenga te tauturu anga i te au putuputuanga kare e peke ia ratou i te akatu i to ratou uaorai Are Uipaanga Patireia?

⁹ Te angaanga pakari nei te iti tangata o Iehova takapini i teianei ao i te akatu i te au Are Uipaanga Patireia. Na te aronga tauturu kare e tutakiia ana e parani, e akatu, e te akaou i te reira. Tei tupu mai, i te 15 mataiti i topa, kua akatuia e 28,000 tuma Are Uipaanga Patireia manea i te ao katoa, koia oki mei tetai rima Are Uipaanga Patireia i te au rā ravarai.

¹⁰ Te tuku ra te akaaerenga a Iehova i te aronga tauturu e te taangaanga ra i te au tauturu oronga ua no te akatu anga i te au Are Uipaanga Patireia i te au ngai e anoanoia ra. Te aru ra tatou i te kaveinga Pipiria ko te aronga e maata ta ratou apinga, ka rauka i te tauturu i te aronga kare e rava ana ta ratou. (E tatau ia 2 Korinetia 8:13-15.) Eaa te au tupuanga tei rauka mai? E maata te au Are Uipaanga Patireia manea tei akatuia no te au putuputuanga kare e rava ana ta ratou moni no te tutaki i te reira.

11. Eaa ta tetai au taeake e karanga ra no runga i to ratou Are Uipaanga Patireia, e eaa toou manako no te reira?

¹¹ Kua tata te au taeake no roto mai i tetai putuputuanga i Costa Rica e: “Me tu matou ki vao i te Are Uipaanga Patireia, ka manako matou e te moemoea nei matou! Poitirere tikai matou. I roto i nga rā e varu kua oti takiri to matou are uipaanga manea i te akatuia! Kua rauka te reira na roto i te akameitakianga a Iehova, te au akanoonooanga a tona akaaerenga, e te turuturu anga a to tatou au taeake akaperepereia. E apinga aroa akaperepere tikai teia ngai akamorianga, e apinga akaperepereia tei orongaia mai e Iehova. Te rekareka tikai nei matou i te reira.” Te mataora tikai nei tatou i te akarongo i te au taeake e te au tuaine e akameitaki ra ia Iehova no tana i rave no ratou. E te mareka nei tatou no te au taeake pouroa takapini i teianei ao e kua rauka mai to ratou uaorai Are Uipaanga Patireia. Te taka ua ra e te akameitaki nei a Iehova i te angaanga akatuanga Are Uipaanga Patireia, i te mea me oti mai te reira i te akatu, te maata ua atura te tangata e putuputu maira ki te au uipaanga no te apii no runga ia Iehova.​—Salamo 127:1.

12. Akapeea koe te tauturu anga atu i te akatu i te au Are Uipaanga Patireia?

 ¹² Akapeea koe te tauturu anga atu i te akatu i te au Are Uipaanga Patireia? Penei ka oronga koe ia koe uaorai no te tauturu i te reira angaanga. Ka rauka ia tatou katoatoa i te oronga moni no te tutaki i te akatu i te au Are Uipaanga Patireia. Me rave tatou i te ka rauka ia tatou kia turuturu i teia angaanga, ka kite tatou i te mataora o te oronga ua, e tei puapinga rava atu, ka akapaapaa tatou ia Iehova. Te aru ra tatou i te akaraanga o te iti tangata o te Atua i te tuatau Pipiria tei aruaru i te oronga tauturu no te akatu anga i to ratou au ngai akamorianga.​—Exodo 25:2; 2 Korinetia 9:7.

13, 14 Eaa ta tatou i apii mai i roto i te Pipiria tei akaari mai e kia akono tatou i to tatou Are Uipaanga Patireia kia mā ua e te mako?

¹³ E Atua mā e te tapu a Iehova. E Atua mako katoa aia. Ko te tumu teia kia vai mā ua to tatou Are Uipaanga Patireia e te mako. (E tatau ia 1 Korinetia 14:33, 40) E vai mā ei e kia tapu mei ia Iehova rai, kare e kia mā anake ua ta tatou akamori anga, to tatou manako, e ta tatou e rave ra, mari ra ka akono katoa tatou i to tatou au kopapa kia ma.​—Apokalupo 19:8.

¹⁴ Me akono tatou i to tatou Are Uipaanga Patireia kia mā e te mako, ka ngakau parau tatou i te pati atu i te tangata ki ta tatou au uipaanga. E ka kite te tangata e te akono tikai ra tatou i ta tatou e tutu aere ra no runga i tetai ao ou e te ma. Ka kite ratou e te akamori nei tatou i tetai Atua tapu e te mā te ka akariro i te enua ei parataito manea.​—Isaia 6:1-3; Apokalupo 11:18.

15, 16 (a) No teaa ra kare i te mea māmā ua i te akono i te Are Uipaanga Patireia kia ma? Eaa ra tatou ka akono ei i te reira kia mā? (e) Akapeea te tamā anga i to tatou Are Uipaanga Patireia te akaaereia anga, e eaa te akameitakianga ngateitei ka rauka pouroa ia tatou?

¹⁵ E tukeke to te tangata manako no runga i te tamā anga? Eaa ra? Penei no te tu o to ratou utuutu angaia mai. Pera katoa, te noo ra tetai pae i roto i tetai ngai repo me kore i tetai ngai e repo te mataara e te varivari. Tetai pae kare e rava ana te vai me kore te au vairakau tamā anga. Inara noatu te ngai e noo ra tatou e noatu eaa te manako o te tangata i to tatou  ngai no te tamāanga, ka tau tatou kia akono i to tatou Are Uipaanga Patireia kia mā ua e te mako. E ngai teia no te akamori anga ia Iehova.​—Deuteronomi 23:14.

¹⁶ Me ka inangaro tatou i to tatou Are Uipaanga Patieria kia mā tikai, ka anoanoia tatou kia mako te akaaere anga. Ka akanoo te aronga pakari i tetai akapapaanga na te putuputuanga e ka akapapu e te rava ua ra te au vairakau e te au apinga tamā. Ka akanoo katoa te aronga pakari i te angaanga kia raveia. Ka anoanoia tetai au ngai kia tamāia i muri ake i te au uipaanga ravarai, inara tetai au ngai, e takitai ua ake taime ka tamāia te reira. No tatou pouroa te akameitaki anga ngateitei kia piri ki roto i te tamā anga i to tatou Are Uipaanga Patireia.

17, 18 (a) Eaa ta tatou ka apii mai mei te tu i akono ei te iti tangata o Iehova i te iero i mua ana? (e) Eaa ra tatou ka akono ei i to tatou Are Uipaanga Patireia?

¹⁷ Ka akono meitaki katoa tatou i to tatou Are Uipaanga Patireia na te raveanga i te au ripea anga tei anoanoia. Kua rave katoa te au tavini o Iehova i te reira i mua ana. Ei akaraanga, i te tuatau i tutara ai te Ariki o Iuda ko Ioasa, kua oronga mai te iti tangata i te moni tauturu no te iero. Kua akaue te ariki i te au kau taunga kia taangaanga i teia moni no te ripea anga i te iero i te au ngai i kinokino. (2 Ariki 12:4, 5) E tere atu i te 200 mataiti i muri mai, kua taangaanga katoa te Ariki ko Iosia i te moni tauturu o te iero ei tutaki i te au ripea anga.​—E tatau ia 2 Paraleipomeno 34:9-11.

¹⁸ Kua kite mai tetai au Kumiti Manga e kare te au tangata i to ratou au enua e matau ana i te akono meitaki i te are me kore te au apinga. Penei e iti ua te aronga i te reira au enua tei kite i te rave i te angaanga. Me kore penei kare e rava ana te moni no te tutaki i te au ripea anga. Inara me kare tatou e ripea i tei anoanoia i to tatou Are Uipaanga Patireia, ka akara anga mako kore te reira e ka kite mai te tangata i te reira. Kare te reira e riro ei akakitekite anga meitaki. Inara, me rave tatou i te ka rauka ia tatou i te akono i to tatou Are Uipaanga Patireia, te akapaapaa ra tatou ia Iehova e kare tatou e kaimoumou i te moni tei oronga uaia mai e to tatou au taeake.

19. Eaa taau ka rave ei akangateitei i te ngai akamorianga ia Iehova?

¹⁹ E are akatapuia te Are Uipaanga Patireia kia Iehova. Kare na te tangata e kare na te putuputuanga te reira. Mei ta tatou i uriuri i roto i teia atikara, ka riro te au kaveinga Pipiria ei tauturu ia tatou kia rauka te tu tau no runga i te ngai akamorianga i te Atua. No to tatou akangateitei ia Iehova, te akangateitei ra tatou i ta tatou au uipaanga pera katoa te Are Uipaanga Patireia. Te mataora nei tatou i te oronga ua i te moni ei akatu i te au Are Uipaanga Patireia, e ka angaanga pakari tatou i te akono i te reira kia vai mā ua. Mei ia Iesu rai, ka akaari tatou i to tatou tu maroiroi e te akangateitei no to tatou ngai akamorianga ia Iehova.​—Ioane 2:17.