1, 2. (a) Esikhatsini lesendlulile, tikhonti Jehova betimkhontela kuphi? (b) Jesu abetiva njani ngelithempeli laJehova lebeliseJerusalema? (c) Sitawucoca ngani kulesihloko?

TIKHONTI taNkulunkulu tasesikhatsini lesendlulile netalamuhla, betisolo tinetindzawo tekukhontela Nkulunkulu. Sibonelo saloku kutsi kungenteka Abela wakha lilati ngesikhatsi entela Jehova umnikelo. (Genesisi 4:3, 4) BoNowa, Abrahama, Isaka, Jakobe naMosi bakha emalati. (Genesisi 8:20; 12:7; 26:25; 35:1; Eksodusi 17:15) Jehova watjela ema-Israyeli kutsi akhe lithende lekukhontela. (Eksodusi 25:8) Ngekuhamba kwesikhatsi, wawatjela kutsi akhe lithempeli. (1 Emakhosi 8:27, 29) Ngemuva kwekutsi bantfu baNkulunkulu babuyile ekutfunjweni eBhabhulona, bebavame kuhlangana emasinagogeni. (Makho 6:2; Johane 18:20; Imisebenti 15:21) EmaKhristu angelikhulu lekucala abehlanganela emakhaya ebazalwane. (Imisebenti 12:12; 1 Khorinte 16:19) Lamuhla, bantfu baJehova emhlabeni wonkhe bahlanganela emaHholweni eMbuso langaba ngemashumi etinkhulungwane, lapho bafundza khona ngaye futsi bamkhonte.

² Jesu abelihlonipha kakhulu lithempeli laJehova lebeliseJerusalema. Lutsandvo lwakhe ngelithempeli lakhumbuta bafundzi bakhe ngemavi lashiwo ngumhlabeli nakatsi: “Ngidliwa kushisekela indlu yakho.” (Tihlabelelo 69:9; Johane 2:17) LiHholwa  leMbuso alisiyo ‘indlu yaJehova’ ngendlela lefanana nelithempeli lebeliseJerusalema. (2 Tikhronike 5:13; 33:4, NW.) Kodvwa kufanele sitihloniphe kakhulu tindzawo tetfu tekukhontela. Kulesihloko, sitawucoca ngetimiso teliBhayibheli letisifundzisa ngendlela lokufanele sitiphatse ngayo nasiseHholweni leMbuso, ngendlela lokufanele silinakekele ngayo nangekutsi singatibhadala njani tindleko talo. *—Fundza umbhalo longentansi.

3-5. Liyini liHholwa leMbuso, futsi kufanele sitive njani ngemihlangano yetfu?

³ LiHholwa leMbuso liyindzawo leyinhloko lapho bantfu bangahlangana khona kute bakhonte Jehova. Imihlangano isipho lesivela kuNkulunkulu futsi isisita kutsi sicinise buhlobo betfu naye. Emihlanganweni yetfu, inhlangano yakhe isinika sikhutsato kanye neticondziso lesitidzingako. Kulilungelo kumenywa nguJehova neNdvodzana yakhe kutsi sidle “etafuleni laJehova” maviki onkhe. (1 Khorinte 10:21) Akukafaneli siyikhohlwe indlela lesimemo lesikhetseke ngayo.

⁴ Jehova usitjela ngalokucacile kutsi ufuna sibe khona emihlanganweni kute simkhonte futsi sikhutsatane. (Fundza Hebheru 10:24, 25.) Ngesizatfu sekutsi siyamhlonipha Jehova, ngeke silove emihlanganweni nangabe kute sizatfu lesivakalako sekwenta njalo. Sikhombisa kutsi siyayijabulela imihlangano yetfu nangabe siyilungiselela futsi sibuke phambili ekuhlanganyeleni kuyo.—Tihlabelelo 22:22.

⁵ Indlela lesitiphatsa ngayo nasisemihlanganweni nendlela lesinakekela ngayo emaHholwa etfu eMbuso, ikhombisa kutsi simhlonipha kangakanani Jehova. Kutiphatsa kwetfu sifuna kudvumise libito laJehova njengobe libonakala emabhodini lasemaHholweni eMbuso.—Catsanisa na-1 Emakhosi 8:17.

6. Yini bantfu labayishito ngemaHholwa etfu eMbuso kanye nangalabo lababakhona emihlanganweni yetfu? (Buka sitfombe lesisekucaleni kwalesihloko.)

⁶ Nangabe sikhombisa kutsi siyawahlonipha emaHholwa etfu eMbuso, labanye bantfu bayakubona loko. Nasi sibonelo: Lenye indvodza yaseTurkey yatsi: “Kuhloba nekuhleleka lengakubona eHholweni leMbuso, kwangijabulisa kakhulu. Labantfu bebagcoke kahle, bamoyitela futsi bangibingelela ngemusa. Loko kwangitsintsa kakhulu.” Lendvodza yacala kuta kuyo yonkhe imhlangano futsi ngekushesha yabhajatiswa. Kulelinye lidolobha lase-Indonesia, bazalwane bamema bomakhelwane, umphatsi welidolobha naletinye tiphatsimandla kutsi titewubona liHholwa labo leMbuso lelisha. Lomphatsi walelidolobha wajabula kakhulu ngendlela lesakhiwo besicine ngayo, ngendlela lebesakhiwe ngayo nangengadze yaso lenhle. Watsi: “Kuhloba kwalelihholwa kukhombisa kutsi niyinkholo yeliciniso.”

7, 8. Sikhombisa njani kutsi siyamhlonipha Jehova nasisemaHholweni eMbuso?

⁷ NguJehova losimemela emihlanganweni futsi unendzaba nendlela lesibukeka ngayo nalesitiphatsa ngayo nasikuyo. Ngako asecisi. Ngakulolunye luhlangotsi, akukafaneli sicinise sandla kakhulu nobe siyekelele. Kuliciniso kutsi Jehova ufuna kutsi tsine kanye nebantfu lesibamemile sitive sikhululekile nasiseHholweni leMbuso. Kodvwa  asifuni kukhombisa kungayihloniphi imihlangano yetfu nganobe nguyiphi indlela. Kungako singagcoki budlabha nobe sigcoke timphahla tasekhaya, futsi asibhalelani imilayeto, sicoce, nobe sidle futsi sinatse nakuchubeka imihlangano. Batali kufanele bafundzise bantfwana babo kutsi bangagijimi nobe badlale eHholweni leMbuso.—Umshumayeli 3:1.

⁸ Ngesikhatsi Jesu abona bantfu batsengisa ethempelini laNkulunkulu, watfukutsela futsi wabacosha. (Johane 2:13-17) EmaHholweni etfu eMbuso, sikhonta Jehova futsi sifundze ngaye. Ngako ngeke kube kuhle kuchuba emabhizinisi nasisemihlanganweni.—Catsanisa naNehemiya 13:7, 8.

9, 10. (a) Bantfu baJehova bawakha njani emaHholwa eMbuso, futsi ube yini umphumela? (b) Inhlangano yaJehova iwasita njani emabandla langakhoni kutakhela liHholwa leMbuso?

⁹ Bantfu baJehova emhlabeni wonkhe basebenta ngekutimisela kute bakhe emaHholwa eMbuso. Emavolontiya advweba emapulani alamaHholwa, awakhe aphindze awalungise. Umphumela waloko ube kutsi kuleminyaka lengu-15 leyendlulile, sakhe emaHholwa eMbuso lamahle langetulu kwa-28 000 emhlabeni wonkhe. Loko kusho kutsi lokungenani sakha emaHholwa eMbuso lasihlanu ngelilanga.

¹⁰ Inhlangano yaJehova yabela emavolontiya futsi isebentise iminikelo kute kwakhiwe emaHholwa eMbuso lapho adzingeka khona. Silandzela sicondziso seliBhayibheli sekutsi labo labanalokunyenti basite labete. (Fundza 2 Khorinte 8:13-15.) Ube yini umphumela? Ube kutsi kwakhiwe emaHholwa eMbuso lamanyenti, akhelwa emabandla langakhoni kutakhela.

11. Yini labanye bazalwane labayishoko ngemaHholwa abo lamasha eMbuso, futsi loko kukwenta utive njani?

¹¹ Bazalwane labakulelinye lemabandla laseCosta Rica babhala batsi: “Nasime embhikweliHholwa letfu lelisha kuba shengatsi siyabhudza! Asikukholwa loko. Lihholwa letfu lelihle lakhiwa ngemalanga lasiphohlongo nje kuphela! Labakhona ngenca yesibusiso saJehova, nangelilungiselelo lelentiwe yinhlangano yakhe kanye nekusekelwa bazalwane betfu labanelutsandvo. Lendzawo yekukhontela isipho lesiligugu sibili, ingumcebo lesiwuphiwe nguJehova. Sijabula kakhulu ngayo.” Kusijabulisa mbamba kuva bazalwane betfu nabodzadze babonga Jehova ngaloko labentele kona. Siyajabula nangekutsi bazalwane betfu emhlabeni wonkhe bangaba nemaHholwa abo eMbuso. Kuyacaca kutsi Jehova uyawubusisa umsebenti wekwakhiwa kwemaHholwa eMbuso, ngobe ngekushesha nje nasekakhiwe, kuba nebantfu labanyenti labacala kuta emihlanganweni kute bafundze ngaye.—Tihlabelelo 127:1.

12. Ungasita njani ekwakhiweni kwemaHholwa eMbuso?

 ¹² Ungasita njani ekwakhiweni kwemaHholwa eMbuso? Mhlawumbe ungavolontiya kulomsebenti wekwakha. Sonkhe singanikela ngemali kute kwakhiwe lamaHholwa. Nasenta konkhe lesingakwenta kute sisekele lomsebenti, sitfola injabulo ngekupha futsi lokubaluleke kakhulu kutsi sidvumisa Jehova. Silandzela sibonelo sebantfu baNkulunkulu bangesikhatsi sekubhalwa kweliBhayibheli, lebebatimisele kunikelela kwakhiwa kwetindzawo tabo tekukhontela.—Eksodusi 25:2; 2 Khorinte 9:7.

13, 14. Yini lesiyifundza eBhayibhelini lekhombisa kutsi kufanele sigcine emaHholwa etfu eMbuso ahlobile futsi acocekile?

¹³ Jehova nguNkulunkulu lohlantekile nalongcwele. UnguNkulunkulu lohlelekile. Kungaleso sizatfu kufanele sigcine emaHholwa etfu eMbuso ahlobile futsi acocekile. (Fundza 1 Khorinte 14:33, 40.) Kute sihlanteke futsi sibe ngcwele njengaJehova, asigcini nje kukhonta kwetfu, indlela lesicabanga ngayo kanye netento tetfu kuhlantekile, kodvwa sigcina nemitimba yetfu ihlobile.—Sembulo 19:8.

¹⁴ Nasigcina liHholwa letfu leMbuso lihlobile futsi licocekile, sitativa sikhululekile kumema bantfu kutsi babekhona emihlanganweni yetfu. Bantfu batawubona kutsi siyakwenta loko lesishumayela ngako lokumayelana nelive lelisha lelihlantekile. Batawubona kutsi sikhonta Nkulunkulu longcwele nalohlantekile lotawenta lomhlaba ube lipharadisi lelihle.—Isaya 6:1-3; Sembulo 11:18.

15, 16. (a) Kungani kungasimelula ngaso sonkhe sikhatsi kugcina liHholwa leMbuso lihlobile? Kungani kufanele siligcine lihlobile? (b) Kuhlelwe njani kuhlantwa kweliHholwa leMbuso lohlanganyela kulo, futsi nguliphi lilungelo sonkhe lesinalo?

¹⁵ Bantfu banemibono lengafani mayelana nekuhlanteka. Kungani? Kungenteka babangelwa yindlela labakhuliswe ngayo. Labanye bahlala endzaweni lenelutfuli nobe endzaweni lenemigwaco lengcolile nalegcwele ludzaka. Labanye bete emanti lenele nobe tintfo labangatisebentisa kute bahlante indzawo labahlala kuyo. Kodvwa ngisho nome sihlala kuphi futsi ngisho  nobe bantfu lesihlala nabo banesimo sengcondvo lesehlukile ngekuhlanteka, kufanele sigcine emaHholwa etfu eMbuso ahlobile futsi acocekile. Ayindzawo lapho sikhontela khona Jehova.—Dutheronomi 23:14.

¹⁶ Nasifuna emaHholwa etfu eMbuso ahlale ahlobile, kufanele sihleleke. Labadzala kufanele bentele libandla luhlelo lwekuhlanta futsi baciniseke kutsi tintfo tekuhlanta tihlala tikhona. Baphindze bawuhlele kahle lomsebenti kute wentiwe. Letinye tintfo tidzinga kuhlantwa njalo ngemuva kwemhlangano, kantsi letinye tingahlantwa ngemuva kwesikhashana. Sonkhe sinelilungelo lekuhlanganyela ekuhlanteni liHholwa leMbuso.

17, 18. (a) Yini lesingayifundza endleleni bantfu baNkulunkulu basendvulo labanakekela ngayo lithempeli? (b) Kungani kufanele sinakekele liHholwa letfu leMbuso?

¹⁷ Siphindze sigcine liHholwa letfu leMbuso lisesimeni lesikahle ngekutsi silungise tintfo letitsite letidzinga kulungiswa. Tinceku taNkulunkulu tasendvulo tenta lokufanako. Nasi sibonelo: Ngesikhatsi sekubusa kweNkhosi Jowashi yesive sakaJuda, bantfu banikelela lithempeli. Lenkhosi yayala baphristi kutsi basebentise lemali kute balungise lapho bekunemonakalo khona. (2 Emakhosi 12:4, 5) Ngemuva kweminyaka lengu-200, iNkhosi Josaya nayo yasebentisa iminikelo yasethempelini kute lilungiswe.—Fundza 2 Tikhronike 34:9-11.

¹⁸ Lamanye Emakomidi Eligatja abone kutsi bantfu emaveni abo abakakwetayeli kugcina takhiwo nobe emathulusi asesimeni lesikahle. Kungenteka kulamave bambalwa bantfu labakwati kwenta lomsebenti, nobe bete imali leyenele yekulungisa letakhiwo. Kodvwa nangabe singalilungisi liHholwa letfu leMbuso nakudzingeka, litawucala kuba libi futsi bantfu batakubona loko. Loko ngeke kubanike bufakazi lobuhle. Esikhundleni saloko, nasenta konkhe lesingakwenta kute sinakekele liHholwa letfu leMbuso, sitawube siyakhombisa kutsi sidvumisa Jehova futsi asiyidlabhatisi imali lenikelwe bazalwane.

19. Yini lotayenta kute ukhombise inhlonipho ngendzawo lokukhontelwa Jehova kuyo?

¹⁹ LiHholwa leMbuso lisakhiwo lesinikelwe kuJehova. Alisilo lemuntfu nobe lelibandla. Njengobe sibonile kulesihloko, timiso teliBhayibheli titasisita sibe nesimo sengcondvo lesikahle mayelana nendzawo lesikhontela kuyo Nkulunkulu. Ngesizatfu sekutsi siyamhlonipha Jehova, sikhombisa inhlonipho ngemihlangano yetfu nangeliHholwa leMbuso. Siyajabula ngekunikela ngemali kute kwakhiwe emaHholwa eMbuso, futsi sisebenta kamatima kute siwanakekele futsi siwagcine ahlobile. NjengaJesu, sikhombisa inkhutsalo nenhlonipho ngendzawo lesikhontela kuyo Jehova.—Johane 2:17.