SÜGÜHALI lóugiñe 200 irumu lúmagiñe lariñagun abürühati le siñati lan lafiñerúniwa sun le tariñagubei periodiku. Ani ligiaméme asuseredubei uguñe weyu. Siñati wafiñeruni sun le ariñawagúbei lidan Internet. Gíbeti katei ñein le inarüniti ani huuti, gama lumoun, gíbeti giñe iyeeni ñein ani peliguruti. Ligía mosu lubéi duari wamá. Dan le lagumeserun aban gürigia ayusura Internet, gayarati lasaminarun inarüni lan somu ñunsu le larihibei ñein ladügarügü lídanñein lan Internet o ladüga lóunhan lan aban lumada lun. Gayarati giñe lafiñerun furumiñeguarügü iyeeni. Ariñagatu Bíbülia: “Afiñetiña ha mabuidunbaña ichügü luagu sun le ariñawagúbei houn; ánhaña ha buídubaña ichügü, ariha hamuti buidu halía lan héibuga” (Ariñawagúni 14:15).

Gürigia ha mabuidunbaña ichügü afiñe hamuti sun le ariñawagúti houn, ánheinti le chúbei aau afiñeti aban katei dánrügü le chouru lani inarüni lan. Gíbeti katei lidan Internet le aganbahóuati luagu lidan sun fulasu, ani iyeeniti. Ka gayarabei wadügüni lun meyeedúniwa wamá? Álügüdagua wamá woungua: “Halía san naliihei abahüdaguni le? Lidan san aban páhina le gayarati lafiñerúniwa luagu, o lidan aban páhina le ñein lubéi gayara lan habürüdüni gürigia le habusenrun? Ibidiñewati san halíagiñe lan liabin abahüdaguni ligía? Arufuda laali san somu páhina le gayarati lafiñerúniwa luagu iyeeni lan abahüdaguni ligía?”. * Duari wamá (Ariñawagúni 7:7). Anhein hénrengu lubéi lafiñerúniwa somu katei le waliihabei ñein, gayarati iyeeni lan. Ánheinti achülüra aban ariñahani woun ayanuha wuriba luagu somu gürigia? Álügüdagua wamá woungua: “Ka funa san busenbei lun laganbún katei le lidan sun ubóu? Ka uagu busén lubéi somu gürigia lun laburuchagun ñunsu le?”.

Añahein gürigia dan le hibihin somu ariñahani luagu Internet, aba hóunahani houn sun hamadagu lau lóufudagun. Aba hadügüni sin hachoururuni  anhein inarüni lubéi o kaba lan lani efekütu hawagu amu gürigia. Háfuga busenrügütiña hagía lan íchigei uganu furumiñe (2 Samueli 13:28-33). Lunti duari wamá. Mabuseruntiwa wawiyeduni liri aban gürigia o tiri aban óundaruni.

Ka uagu hóunaha gürigia ariñahani sin hachoururuni anhein inarüni lubéi? Ladüga mabusenrun hamá hakutihan libügürü. Háfuga hariñagun: “Anhein busén habéi numadagu, gayarati háluahan ariñahani lun hachoururuni houngua”. Gama lumoun, háfuga madaani hamá giñe hamadagu lun hakutihani (Éfesuna 5:15, 16). Anhein machouru hubalin anhein gayara lubéi hóunahani somu uganu, móunahagubei huméi.

Álügüdagua wamá woungua: “Héchutina san óunahei uganu le neresibirubei houn amu? Aniheinhali san dan mosu lan namuriahan ferudun ladüga nóunahan somu ariñahani le mama inarüniti? Amuriahaali san somu gürigia numa lun hebé lan nóunahan ariñahani lun?”. Anhein anihein lubéi Internet hama wamadagu, gayarati háluahani ariñahani le habusenrubei houngua. Memegeiruntiña heresibirun saragu koréu lau siñagei, iyawaü o bidéu. Ani moun lumuti giñe wóunahan yanu le gürawaruabei ni le abürühóuarügüti ni ka un. * Buítimati kada lan gürigia áluahei ariñahani le lemegeirubei, áluahei bérusu burí tídangiñeti Bíbülia le lídanbei somu arütíkulu o aransehei kaba lan lóunaba lidan adamuridaguni.

Ka lunbei wadügüni ánhawa ariha somu katei lidan Internet le ayanuhati wuriba hawagu gefentiña luagu Heowá? Masigira wamá aliiha ani mafiñera waméi le hariñagubei. Móunaha waméi houn amu gürigia, ladüga anhein wadüga wídehaña lun laburuchagun iyeeni ligía. Ani anhein nidiheri wabéi luagu somu katei le waliihabei, amuriaha wamá luma Heowá lun líchugun lichú aau woun ani ayanuha wamá luagu katei ligía luma somu íbiri le derebuguti lafiñen (Santiagu 1:5, 6; Húdasi 22, 23). Mama mosu taweiridun wanigi dan le hayanuhan amu wuriba wawagu. Susereti meha ligiaméme lun Hesusu. Ani ariñagati heibaahóuba lan kristiánugu ani hayanuhaba lan gürigia iyeeni hawagu (Matéu 5:11; 11:19; Huan 10:19-21). Ánhawa óusera lau lichú  aau, wasubudirubei anhein layanuhaña lubéi somu gürigia iyeeni wawagu o anhein lóuchuña lubéi leyeeduniña amu (Ariñawagúni 2:10-16).

Mosu giñe wóunigiragun woungua luéi werederun ayanuha katei burí le waganbun hawagu wíbirigu. Íbini anhein inarüni lubéi katei ligía, háfuga mabuidunbei wariñaguni houn amu (Matéu 7:12). Kei hénpulu, ánhawa aburuchaguagüda ariñahani le mabuidunti hawagu amu warufuduña mínsiñehabuni ani mama giñe wíchuguña gurasu (2 Tesalónikana 3:11; 1 Timotéu 5:13). Anihein giñe ñunsu le moun lumuti haganbuni amu. Anhein busén lubéi somu gürigia layanuhan somu katei luáguti libagari guánarügü, lunti wígirun lun ligía lan adügei danme le labusenrun ladügüni. Ánhawa éibaagua ariñagei ariñahani ligía, warufuduña minebenehabuni, ani gayarati wadügün dañu houn amu.

Uguñe weyu, fureseti laburuchagun ñunsu. Anihein fiú inarüniti ani huuti, ani anihein amu iyeeni ani peliguruti. Mabulieida huméi dan le lan hóunahan aban ñunsu lun aban gürigia, gayara lan lóunahani houn gürigia ha awinwandutiña lidan sun ubóu lidan murusun oura. Ligía moun lumuti lubéi wóunahani sun ariñahani le weresibirubei houn sun wamadagu. Íbini ariñaga tan Bíbülia afiñe lani le hínsiñehabubei sun katei, mosu duari wamá. Moun lumuti giñe wasaminarun inarüni lan sun ariñahani le ounahóubei woun (1 Korintuna 13:7). Moun lumuti giñe wafiñeruni iyeeni le ayanuhóubei tuagu wóundarun luma hawagu wíbirigu lidan afiñeni. Haritagua waméi háyeihañein lan gürigia hagía Mafia, “ani ligía lúguchibei iyeeni” (Huan 8:44). Duari wamá lau sun ariñahani le weresibirubei sagü weyu. Mabulieida waméi le tariñagubei Bíbülia: “Libidiounigan aau halagantebei ha ibidiouguabaña aau, ánhaña ha saminabaña, geyeguhaña lau subudi” (Ariñawagúni 14:18).