PANOUAYA doscientos xiujmej, nejin tajkuilojkej kijtoj ke amo uelia se kineltokaya nochi tein kijtouayaj periódicos. Axkan no ijkon panoua. Amo ueli tikneltokaj nochi tein moajsi itech Internet. Kemej kikixtiaj teposmej tein okachi yankuikej, mojmostaj miak taman ueli tikixtajtoltiaj. Miak taman melauak uan tapaleuia, sayoj ke miak tein moijtoua no amo melauak uan semi tamouilil. Yejua ika moneki timoyekpiaskej. Keman se taltikpaknenkej peua kikui Internet, xa kinemilis ke se taman tein motematiltia melauak sayoj porin moajsi itech Internet oso porin se itasojikniuj kititanilij. Xa hasta kineltokas miak taman tein motetapouia tein teouijmaka se kineltokas. Sayoj ke Biblia techiluia: “Akin amo yekyolmajsitok kineltoka nochi tajtolmej, sayoj ke akin tamatkej kiita sejse taksalis” (Prov. 14:15).

Taltikpaknenkej akin amo yekyolmajsitok kineltoka nochi tein kiluiaj, sayoj ke akin yekyolmajsitok sayoj kineltoka se teisa komo kiyekmati ke melauak. Itech Internet miak taman tein motematiltia uan motetapouia satepan motelixmati, sayoj ke amo melauak. ¿Toni uelis tikchiuaskej tein techpaleuis maj amo akin techkajkayaua? Maj timotajtanikan nejin: “¿Kani nikixtajtoltij nejin taman? ¿Nikixtajtoltij itech se página itech Internet kampa ueli se takuaujtamati, oso itech se página kampa akin yeski ueli kijkuiloua tein kineki? ¿Amo momati akoni kijkuiloj nejon? ¿Kinextianij itech se página kampa ueli se takuaujtamati ke nejon tein motetapouia amo melauak?”. * Maj tiknextikan kuali taixejekolis (Prov. 7:7). Komo tein tikixtajtoltiaj techouijmaka tikneltokaskej, nejon xa kijtosneki ke amo melauak. ¿Uan komo techtajkuilouiliaj uan techmatiltiaj teisa tein kijtouiliaj se taltikpaknenkej? Maj timotajtanikan: “¿Akoni kipaleuia kimatis nejon? ¿Keyej aksa kineki maj nochin kimatikan nejon?”.

Keman sekin kintajkuilouiliaj uan kinmatiltiaj seki taman, niman kintitaniliaj nochin inintasojikniuan.  Kichiuaj nejin maski amo kimatij ox tein kinmatiltijkej melauak uan nion kinemiliaj keniuj nejin uelis kinijtakos oksekin. Xa sayoj kinekij maj kiitakan ke kimatij miak taman oso kinekij yejuan achto kitematiltiskej teisa (2 Sam. 13:28-33). Sayoj ke moneki tiknextiskej kuali taixejekolis. Amo tiknekij tikchiuaskej maj amo kuali ika tajtokan aksa oso miakej taltikpakneminij.

¿Keyej seki taltikpakneminij kintitaniliaj oksekin tein kinmatiltijkej maski amo achto kiitaj ox melauak? Porin amo kinekij kitemoskej ox melauak. Xa kijtouaj: “Notasojikniuan uelis kiitaskej ox melauak nejin taman komo kinekij”. Sayoj ke itasojikniuan xa no amo uelij kiitaj ox melauak (Efes. 5:15, 16). Yejua ika, komo tionomeyoloua ox moneki tikontitanis tein mitsonijkuilouilijkej oso amo, okachi kuali amo xikontitani.

Kuali maj timotajtanikan: “¿Nochipa nikintitanilia oksekin tein nechijkuilouiliaj? ¿Kemansa monekik nitajtanis maj nechtapojpoluikan porin niktitanik se taman tein amo melauak? ¿Aksa nechtajtaniani maj amo niksentoka niktitanili tein nechijkuilouiliaj?”. Komo totasojikniuan kipiaj Internet, yejuan uelis kitemoskej tein kinekiskej kimatiskej. Amo moneki tikintitaniliskej miak taman kampa tikintapouiaj tein teuetskitij, taixkopimej oso videos. Uan no, moneki amo tiktitaniskej grabación tein tikchiujkej keman motemakak se tanojnots oso tein tikijkuilojkej ijkuak. * Okachi kuali maj tisejsemej tiktemokan seki taman komo tiknekij tikmatiskej okachi ika se tamachtilis, tiktemoskej tajkuilolmej oso timomachtiskej tein titanankiliskej itech nechikolmej.

¿Toni moneki tikchiuaskej komo tikitaj itech Internet teisa kampa kintakajkayauiliaj itaixpantijkauan Jiova? Maj amo tiksentokakan tikixtajtoltikan nion maj tikneltokakan tein kijtoua. Maj amo tikintitanilikan oksekin, porin ijkon sayoj okachi tikmoyaujtoskej nejon takajkayaualis. Uan komo techtekipachoua tein tikixtajtoltijkej, maj tiktajtanikan Jiova maj techmaka tamatilis uan maj ika titajtokan nejon iuan se tokniuj akin yekyolmajsitok (Sant. 1:5, 6; Jud. 22, 23). Moneki amo tikmoujkaitaskej maj techtakajkayauilikan. Jesús no kitakajkayauilijkej. Uan yejua kijtoj ke taltikpakneminij kintajyouiltiskiaj akin  kitojtokaskiaj uan kintakajkayauiliskiaj (Mat. 5:11; 11:19; Juan 10:19-21). Komo tiknextiaj kuali taixejekolis, tikmatiskej komo aksa techtakajkayauilijtok oso kitemojtok kinkajkayauas oksekin (Prov. 2:10-16).

No moneki timoyekpiaskej achto ke titetapouiskej tein tikakij ke kijtouaj ininka okseki tokniuan. Maski xa melauak nejon tein moijtoua, xa amo kuali yetok maj tikintapouikan oksekin (Mat. 7:12). Kemej neskayot, titetapouiskej tein amo melauak ininka oksekin kinextiskia ke amo tikintasojtaj uan amo akin kiyolchikauas (2 Tes. 3:11; 1 Tim. 5:13). Uan no, xa seki taman tein motetapouia amo moneki moijtos. Komo aksa kineki kitematiltis teisa tein kipanoua tein ayamo moneki momatis, moneki tikauaskej maj yejua kitetapoui keman yejua kinekis uan kemej kinekis. Komo achto tejuan tikijtouaj, tiknextiskej ke amo titapoujkaitaj uan uelis titelteijtakoskej.

Itech nejin tonalmej, semi ijsiujka motematiltia teisa. Seki melauak uan tapaleuia, sayoj ke okseki amo melauak uan semi tamouilil. Amo xikonelkaua ke komo tejuatsin tikontajkuilouilia sayoj se taltikpaknenkej, nejon tein tikonijkuilouilij uelis kintitanilis oksekin akin nemij noyampa taltikpak itech sayoj seki segundo. Yejua ika okachi kuali maj amo tikintitanilikan nochin totasojikniuan nochi tein techijkuilouiliaj. Biblia kijtoua ke akin “tetasojtatinemi, yejua ne amo kikaktinemi xolopijyot san. Ta, kineltokatinemi sayo ten kuali”, yejua ika moneki tiknextiskej kuali taixejekolis uan amo tiknemiliskej ke sejse taman tein techijkuilouiliaj melauak (1 Cor. 13:7). Moneki amo no tikneltokaskej tein kijtouiliaj inechikol Dios uan tokniuan. Maj tikelnamikikan ke akin kijtouaj uan kimoyauaj nejon takajkayaualis kichiujtokej kemej Satanás, “tetat den nochi nekes ten xolopijtijtinemij” (Juan 8:44). Yejua ika, moneki timoyekpiaskej ika nochi tein techijkuilouiliaj mojmostaj. Maj amo tikelkauakan tein kijtoua Biblia: “Akin amo yekyolmajsitokej amo kiseliskej tamatilis, sayoj ke akin kinextiaj tamatilis kiseliaj taixmatilis kemej se corona” (Prov. 14:18).