E TERE atu i te 200 mataiti i topa, kare te au tangata e irinaki ana i te au mea pouroa tei tataia i roto i te nutipepa. I teia tuatau kare tatou e irinaki ua atu i te au mea ta tatou e tatau ra me kore e kite ra i runga i te Initaneti. Te vaira te au akakiteanga e manganui i runga i te Initaneti, e e māmā ua i te kite i te reira no te au apinga uira ou. Tetai au akakiteanga e tika, e puapinga, e te kino kore, inara te maata anga e pikikaa, e puapinga kore, e te kino. No reira rai tatou ka tau ei kia iki meitaki i ta tatou ka tatau. Me akamata tetai pae i te taangaanga i te Initaneti, penei ka manako ratou e e tika tetai ripoti ou no te mea ua nei e tei runga i te Initaneti me kore kua tuku mai tetai oa na roto i tetai i-mere. Penei ka irinaki ratou i tetai tua noatu e e akaraanga kare e tano ana te reira. Inara te akamatakite maira te Pipiria kia tatou e: “Te akarongo ra te kite kore i te au tuatua katoa ra: te akara meitaki ra te tangata akono ra i tona takainga.”​—Maseli 14:15.

Tetai tua o te kite kore, me kore te irinaki ma te kamakura i te au mea pouroa ta tatou ka rongo, koia oki ko te tu akono me kore te tu akara meitaki. Me akara meitaki tatou, ka matakite e ka irinaki anake ua i ta tatou i kite ei mea tika. Kare tatou e akavareia e te irinaki ua i te au tua pikikaa ta tatou i tatau i runga i te Initaneti, noatu e rongonui te reira. Eaa te ka tauturu ia koe kia akara meitaki? Te mea mua, e ui kia koe uaorai: ‘No roto mai ainei teia tua i tetai website irinakiia e te papu? Me kore no roto mai ainei i tetai website ka rauka i tetai ua atu i te tata i tona manako, me kore no roto mai ainei i tetai ngai kitea koreia? Kua akakite mai ainei tetai website irinakiia e e pikikaa teia tua?’ * (Akara i te tataanga rikiriki i raro.) No reira e taangaanga i te “manako” meitaki. (Maseli 7:7) Me e akaraanga irinaki koreia tetai nuti, penei koia ïa. Pera katoa, me tatau koe i te nuti tau kore no tetai ke, akamanako ana e koai te ka puapingaia me totoa teia tua e eaa ra tetai ka inangaro ei i te akatotoa i te reira.

Penei ka tuku tetai aronga i te au nuti ki to ratou au oa e kare i akara ana me e tika rai teia tua me  kore kare i manako ana i te ka tupu me tuku i te reira kia ratou. Penei te inangaro ua ra ratou kia kiteaia mai, e ka inangaro e ko ratou na mua i te akatotoa i te nuti. (2 Samuela 13:28-33) Inara ka akamanako tetai tangata akara meitaki i te kino ta teia ka akatupu. Ei akaraanga, penei ka akakinoia te turanga o te reira tangata me kore akaaereanga.

Penei te tangata tei tuku i te nuti kare aia i akapapu e kua tano te reira no te mea e āka taime e te maroiroi ka pou i te rave i te reira. Manako ua aia e na te reira aronga tei tae atu te karere e rave i te reira. Inara e mea akaperepere katoaia to ratou taime. (Ephesia 5:15, 16) I te mea ka tuku i te au karere kare i papu ia tatou, e meitaki atu i te akamanako, “Me te ekoko ra au, e titiri i te reira ki vao!”

E ui kia koe uaorai: ‘E tuku ua ana ainei au i te au i-mere ki tetai ke? Kua tataraapa ainei au ki toku au oa no tei tuku atu i te au akakiteanga tarevake e te au akakiteanga pikikaa kia ratou? Kua pati mai ainei tetai iaku kia akamutu i te tuku atu i te au i-mere?’ E akamaara me e i-mere ta toou au oa, ka rauka katoa ia ratou i te taangaanga i te Initaneti e kare toou tauturu e anoanoia kia kimikimi i te au mea ta ratou i reka. Kare ratou e inangaro kia tae atu tetai putunga i-mere tua kangakanga, te au vitio, e te au tutu. E mea tau kore katoa kia tuku atu i te au rekotianga me kore te au tataanga no te au ako Pipiria. * (Akara i te tataanga rikiriki i raro.) E akamaara me rave tetai tangata i tana uaorai kimikimianga, te akara i te au irava Pipiria, me kore te akapapa ra i tana uaorai au pauanga no te au uipaanga, ka puapinga maata atu aia me kare koe e tuku atu i tetai ua atu akakiteanga kiaia.

Eaa taau ka rave me kite koe i tetai mea i runga i te Initaneti tei akakite i te au pikikaa kino no runga i te akaaerenga a Iehova? E kopae viviki i teia au pikikaa! Auraka e irinaki i te reira. Kare i te mea tau kia tuʼa i taau e tatau ra ki tetai ke e kia ui atu i to ratou manako no te mea ka totoa maata atu te reira akakiteanga kino. Me manata koe i tetai apinga taau i kite mai i runga i te Initaneti, e pati kia Iehova no te pakari e kia tuatua atu ki te au taeake pakari. (Iakobo 1:5, 6; Iuda 22, 23) Auraka tatou e poitirere me tuatua pikikaa mai te tangata no runga ia tatou. Kua tuatua pikikaa te tangata no runga ia Iesu, e kua akamatakite aia i tana au pipi e ka takinokinoia ratou e to ratou au enemi e ka “tapepe pikikaa ua mai te tangata ia  kotou i te au kino katoa nei.” (Mataio 5:11; 11:19; Ioane 10:19-21) No reira me e tu pakari toou e kia akamanako meitaki, ka kite koe me tuatua pikikaa mai e te akavare ra tetai i tetai ke.​—Maseli 2:10-16.

Kia matakite katoa tatou i te akakite i te au nuti no runga i to tatou au taeake me kore te akakite i te au tupuanga ta tatou i rongo ana. Te vaira tetai taime kare i te mea tau e kare i te mea meitaki kia akatotoa i te akakiteanga noatu e tika te reira. (Mataio 7:12) Ei akaraanga, kare i te mea meitaki e kare i te mea akamaroiroi kia tuku atu i te au akakiteanga kino ki tetai ke. (2 Tesalonia 3:11; 1 Timoteo 5:13) Penei e au mea muna tetai au nuti. Penei ka inangaro tetai aronga i te akakite i te reira i muri mai e na roto i tetai ravenga ke. E tau i reira kia akangateitei i to ratou tikaanga kia iki aea e akapeea i te akakite i te reira. Te tika, me akakite tatou i teia nuti ki tetai ke i mua ake i te tuatau tau, ka akatupu tatou i te kino maata.

I teia tuatau, ka rauka te nuti i te totoa viviki, noatu e tika te reira me e pikikaa, e puapinga me e puapinga kore, e kino me e kino kore. Noatu me ka tuku koe i tetai karere ki tetai tangata, penei ka tuku atu te reira tangata i te karere ki te au tangata takapini i teianei ao i roto i nga tekoni. No reira e patoi i te timata anga kia tuku viviki atu i te akakiteanga ki te katoatoa taau i kite. Noatu “e akarongo [te aroa] i te au mea katoa” e kare e tarotokaka, auraka e kite kore ua e auraka e irinaki ua i tetai tua ou e te reka. (1 Korinetia 13:7) Auraka rava tatou e irinaki i te au pikikaa me kore te au mea rikarika no runga i te akaaerenga a Iehova e to tatou au taeake, ta tatou e inangaro ra. E akamaara e ko te aronga tei akamata e tei akatotoa i teia au pikikaa te akamareka ra i te Tiaporo ko Satani, “e metua oki no te pikikaa.” (Ioane 8:44) No reira kia akara meitaki tatou e kia akamanako meitaki ua rai i te taangaanga i te au akakiteanga te putunga ua ra i te au rā ravarai. Mei ta te Pipiria e karanga ra, “te rave nei te kite kore i te mea neneva ei tuanga: kareka te tangata akono ra, kua akakoronaia ïa ki te kite.”​—Maseli 14:18.