EKʼELXA mas ja 200 jabʼili, ja tsʼijbʼanum it yala mini xbʼobʼ kʼuʼaxuk spetsanil ja jasa wa xyala ajyi ja peryodikoʼiki. Cha junxtani wa x-ekʼ ja bʼa jtyempotiki. Mini xbʼobʼ kʼuʼaxuk spetsanil ja jasa wa xyala ja Internet. Stsʼakatal ja aparatoʼik masto ajkʼach wan eleli, kʼakʼu kʼakʼu wani xkʼumantik jitsan jastik junuk. Sok jitsan ja bʼa jastik junuk jaw merani ja jasa wa xyala sok wa xmakuni, pe jitsan cha toj abʼalik jel xiwelaʼik sbʼaj. Ja yuj tʼilani oj talna jbʼajtik. Yajni jun ixuk winik wa xkʼe ya makunuk ja Internet, bʼobʼta oj spensaraʼuk bʼa jun notisya meran ja jasa wa xyala jaʼita yuja tey bʼa Internet ma jekjiyi yuj jun yamigo. Bʼobʼta ja weʼni wani xa cha kʼuʼan ja loʼilik bʼa jel wokol skʼuʼajeli. Pe ja Biblia wa xyala: «Ja maʼ mi snaʼa kʼinali wa skʼuʼan bʼa jujune ja yaljeliki, pe ja maʼ wa snaʼa kʼinali wa spensaraʼan jujune ja xeteʼik wa xyayiʼi» (Proverbios 14:15).

Ja ixuk winik bʼa mi snaʼa kʼinali, wa skʼuʼan spetsanil ja jasa wa x-alji yabʼi, pe ja maʼ wa skʼela kʼinali kechan wa skʼuʼan bʼa jun jasunuk ta wa snaʼa meraniʼi. Ja bʼa Interneti ay jitsan loʼilik sok notisyaʼik bʼa jel naʼubʼal sbʼaj, pe mini naka meranuk. ¿Jasa oj bʼobʼ jkʼuluktik bʼa mi maʼ oj sloʼlayotik? La kaʼ jbʼajtik ja sjobʼjelik it: «¿Bʼa jkʼuman ekʼ sbʼaja loʼil it? ¿Ti maʼ jkʼuman bʼa jun sitio bʼa kʼulubʼal aprobar sok wa xbʼobʼ jipjkʼujoltik, ma bʼa jun página bʼa chikan maʼ oj stsʼijbʼuk ja jasa wa skʼana? ¿Ti maʼ jakel ja loʼili bʼa jun lugar mi xnaxi sbʼaj? ¿Ayxa maʼ bʼa chijkajita bʼa jun página wa xbʼobʼ jipjkʼujoltisok bʼa wa sjeʼa ja loʼil it mi meranuk?». * Ja yuj, la ajyukotik «qʼuelan jacan» (1 Pedro 5:8). Ta ja jasa wa xkʼumantiki jel wokol skʼuʼajel, bʼobʼta yujni mini meranuka. ¿Jaxa ta xjul jbʼajtik jun loʼil mi stojoliluk sbʼaja tuki? La jobʼ jbʼajtik: ¿Jasa slekil oj yawe eluk sbʼaja loʼil it ta pukxi ekʼi sok jas yujil ay maʼ wa skʼana oj spuk ekʼ?

Yajni jujuntik ixuk winik wa xjul sbʼaje correoʼik ma mensajeʼik bʼa ayiʼojan notisyaʼik, wego wa xcha sjektalanyi ja yamigoʼiki. Wa skʼulane sok mini wa spaklaye ta meran ja jasa jekji yileʼi sok mini wa spensarane jasa oj ekʼuk ja ta sjekaweʼi. Bʼobʼta wa skʼulane kechanta bʼa oj spay ja ixuk winiki sok bʼa yeʼnto bʼajtan oj yal ja loʼili (2 Samuel 13:28-33). Pe tʼilani la jkʼeltik kʼinal. Mini wa xkʼanatik yajel kuxbʼuk ja jastal wa xtax jun ixuk winik sok mini bʼa jun kʼole ixuk winik.

¿Jas yuj jujuntik ixuk winik wa xcha sjekawe ja mensajeʼik jach mi wa spaklaye ta meran ja jasa jekji yileʼi? Pes yujni mi skʼana oj spaklaye. Bʼobʼta wa xyalawe: «Ojxa bʼobʼ spaklaye ja kamigoʼik ta meran ja jasa wa xyala ja mensaje». Pe bʼobʼta ja yeʼnleʼi mini cha ay styempoʼe bʼa oj spaklaye (Efesios 5:15, 16). Ja yuj, ta ja weʼn mixa naʼa lek ta oja cha jek jun mensaje ma miyuk, ajuluka kʼujol ja yaljel it: «Ta mixa naʼa ta meran lek, mas lek moka wale».

Jelni lek ja oj jobʼ jbʼajtiki: «¿Kʼajyel maʼ wa xjekayi ja tuk ja mensajeʼik wa xjekjikiʼi? ¿Ay maʼ bʼa jkʼanunej perdon yuja jeka jun mensaje bʼa mi meranuk ja jasa wa xyala? ¿Ayma maʼ yalunejkabʼ mokxa cha jek ja mensajeʼik wa xjekjikiʼi?». Ta ja kamigotiki wa xbʼobʼ ochuke bʼa Internet, wani xbʼobʼ sleʼe yeʼnle ja jasa wa skʼana oj snaʼeʼi. Mini tʼilanuk sjekjel yile correo bʼa ayiʼoj loʼilik bʼa wa xyaʼa tseʼej, potoʼik sok bideoʼik. Pe chomajkil, mokni cha jektikyi loʼilik [discursos] jach grabadoʼay ma notaʼik atsʼijbʼunej ja jastal chʼak cholxuk jun loʼil elel bʼa Biblia. * Ajuluka kʼujol, ta jun ixuk winik yeʼn wa spaklay, sleʼa jun bersikulo bʼa Biblia, sleʼa yeʼna ja sjakʼjel ja sjobʼjel wa x-axi ja bʼa tsomjeliki, masni oj ya el slekilal yuja weʼn oja jekyiʼi.

¿Jasa oj bʼobʼ jkʼuluktik ta kilatik ja bʼa Internet jun jasunuk wa xyala abʼalik sbʼaja taʼumantiʼik bʼa Jyoba? La jiptikan skʼumajel sok mok jkʼuʼuktik ja jasa wa xyala. Mokni cha jektikyi  tuk ixuk winik, pes ta jkʼulantik jach wa xpukutik ekʼ abʼalik bʼa mi meranuk. Pe ta wa xcham jkʼujoltik ja jasa jkʼumantiki, la jkʼantikyi ja Jyoba ayakitik biboʼil sok la kaltik yabʼ jun jmoj-aljeltik bʼa takʼanxa (Santiago 1:5, 6; Judas 22, 23). Mokni chamjkʼujoltik ta alji abʼalik sbʼaja keʼntiki. Pes jachni cha alji sbʼaja Jesús. Soka yeʼn cha yala ja ixuk winiki ixta oj yil-e ja snebʼumanik ja Jesús sok oj yal-e abʼalik sbʼaja yeʼnleʼi (Mateo 5:11; 11:19; Juan 10:19-21). Ta wa xkʼelatik lek kʼinal, ojni jnatik ta ay maʼ wan slejel abʼal sbʼaja keʼntiki ma slejel modo bʼa oj sloʼlayotik (Proverbios 2:10-16).

Chomajkil, tʼilani oj kaʼ jkwidadotik bʼajtanto yuj oj jcholtik jun jasunuk kabʼunejtik sbʼa jun jmoj-aljeltik. Anima ja jaw meraniʼa, bʼobʼta mini lekuk ja oj jcholtik yabʼ ja tuki (Mateo 7:12). Jun sjejel, spukjel jun jasunuk mi stojoliluk bʼa kabʼunejtik sbʼaja tuki wa xjeʼatik mey syajal jkʼujoltik sok mini maʼ oj stsatsankʼujoluk (2 Tesalonicenses 3:11; 1 Timoteo 5:13). Chomajkil, bʼobʼta jujuntik loʼilik wa xbʼobʼ jipjkʼujoltik. Ta ay maʼ wa skʼana oj xcholkabʼtik jun jasunuk sbʼaja yeʼn bʼa mi xbʼobʼ alxuk ekʼ, tʼilani oj jkistik ja derecho yiʼoj bʼa yeʼn oj ya chiknajuk ja jas tyempo wa skʼana sok jastal oj skʼuluk. Ta keʼn jcholotik bʼajtan, wa xjeʼatik mi wa xkisatik sok jelni oj bʼobʼ jyajbʼestik.

Ja bʼa jtyempotiki, ja notisyaʼiki wegoxta wa xpukxi ekʼ. Jujuntik smeranilniʼa sok wa xmakuni, pe jujuntik naka abʼalik jel xiwelaʼik sbʼaj. Mok chʼayuka kʼujol, ta ja weʼn ajekayi jun mensaje kechanta jun ixuk winik, ja yeʼn wego oj bʼobʼ sjekyi bʼa yibʼanal ja ixuk winiki. Ja yuj, masni lek mok jektikyi spetsanil ja kamigotik ja jastik wa xjekjikitiki. Anima ja Biblia wa xyala ja yajal kʼujoli wa skʼuʼan spetsanil jastik junuk, pe tʼilani oj jkʼeltik kʼinal sok mok kaltik spetsanil ja mensajeʼik wa xjekjikitiki naka smeranil (1 Corintios 13:7). Chomajkil, mokni jkʼuʼuktik ja abʼalik wa x-alji sbʼaja xchonabʼil ja Dyosi sok sbʼaja jmoj-aljeltiki. Ajuluk jkʼujoltik, ja matik wa xyawe eljan sok wa spukuwe ekʼ abʼaliki jani wane snochjel ja «statalil ja mentira», ja Satanás (Juan 8:44). Ja yuj, la jtalnay jbʼajtik lek soka jasa wa xjekjikitik ma wa xkabʼtik kʼakʼu kʼakʼu. Mok chʼay jkʼujoltik ja jasa wa xyala ja Biblia: «Ja maʼ mi snaʼa kʼinali oj paxuke sonsoʼil, pe ja maʼ wa snaʼa kʼinali oj ajyuk yujile snajel jastal corona ja bʼa yolomeʼi» (Proverbios 14:18).