1. Pathian i a lang bikmi sining cu zeidah a si, mah sining kha na hngalh tikah Pathian he aa tlaiin zeitindah na um?

“PATHIAN cu dawtnak a si” tiah Baibal nih a ti. (1 Johan 4:8) Mah cu zei sullam dah a si? Dawtnak cu Jehovah ngeihmi sining tampi lakah aa tel sawhsawhmi lawng a si lo. Jehovah i a lang bikmi sining a si. Pathian nih dawtnak a ngeih lawng a si lo. Amah theng hi dawtnak a si. Van le vawlei le thilnung vialte ser awkah dawtnak nih Jehovah kha a forh. A tuahmi kip cu dawtnak ah hram aa bunh caah zeitluk lung lawmh awk dah a si.

2. Pathian dawtnak nih zeidah a kan zumhter? (A hramthawknak hmanthlak zoh.)

² Jehovah cu a sermi hna cungah dawtnak le zaangfahnak a ngei. Minung ca i aa tinhnak kha a ṭha bikmi lam in a tlinter lai ti kha a dawtnak nih a kan zumhter. Pathian nawl a ngaimi hna nih nuamhnak taktak an hmuh lai. Tahchunhnak ah, Jehovah nih dawtnak ruangah “a thimmipa [Jesuh Khrih] thawngin vawleicung dihlak hi dinnak in biaceih awkah ni a khiah cang.” (Lam. 17:31) Mah biaceihnak ni cu a ra hrimhrim lai tiah kan zumh. A  nawl a ngaimi hna cu zungzal a hmunmi a ṭha tukmi hmailei ruahchannak an ngei lai.

3. Pathian nih minung hi rak kan daw hlah sehlaw kan hmailei hi zeidah a lawh lai?

³ Dawtnak hi Pathian ngeihmi sining lakah a lang bikmi si hlah sehlaw minung kan hmailei hi zeidah a lawh hnga? Minung nih anmahle anmah an i uk lengmang lai. Cun dawtnak a ngei lo i huatnak in a khatmi pathian, Satan huham tangah an um lai. (2 Kor. 4:4; 1 Johan 5:19; Biathlam 12:9, 12 rel.) Jehovah nih rak kan daw hlah sehlaw minung kan hmailei cu ṭih a nung tuk lai.

4. Jehovah nih a uknak an ralchanhmi kha zeicah a awnh?

⁴ Satan nih Pathian uknak a doh lioah Adam le Evi zong kha Pathian doh ve awkah a lem hna. Pathian nih Van le Vawlei uknak nawl a ngeihmi kongah lunghrinnak a chuahter. Amah uknak cu Pathian uknak nakin a ṭha deuh lai tiah Satan nih a ti. (Gen. 3:1-5) Satan chimmi a hmaan, hmaanlo ti langhternak caah Jehovah nih Satan kha caan caankhat chung umnak nawl a awnh. Asinain minung an si ah, Satan a si ah uktu ṭha an si kho lo ti kha minung tuanbia nih fiang tein a langhter.

5. Minung tuanbia nih zeidah fiang tein a langhter?

⁵ Tuchan ah vawlei cu a chia chin thluahmah. A luancia kum 100 chungah raltuknak ruangah a thimi hi nuai 100 leng an si. “Ni hmanung bik” he aa tlaiin Baibal nih hitin a chim: “Miṭhalo le chungthu lengnal pawl cu a ṭha lo chin lengmang khan an um lai.” (2 Tim. 3:1, 13) Baibal nih hiti zongin a ti rih: “Maw BAWIPA, minung nih a zulhmi a lam hi amah nih aa thimmi an si lo i a nunchung i a kalnak lam zong hi amah nih aa ser khawhmi an si lo ti kha ka hngalh.” (Jer. 10:23) Mah bia a hmaan kha minung tuanbia nih fiang tein a langhter. Jehovah nih minung kha amah lamhruainak tel loin i uknak nawl a ngeimi asiloah aa uk khomi in a kan ser lo.

6. Pathian nih ṭhatlonak hi zeicah umnak nawl a awnh?

⁶ Jehovah nih caan caankhat chung ṭhatlonak umnak nawl a awnhmi nih Jehovah uknak lawng hi a ṭha bikmi a si ti zong a langhter. Hmailei ah Pathian nih ṭhatlonak vialte hi a hrawh dih cang lai. Mah hnuah cun a uknak a ralchanhmi paohpaoh kha a hrawh colh cang hna lai. Dotu pawl hrawh colh awk a si kha langhternak caah minung tuanbia hi a hman lai. Zeitikhmanh ah ṭhatlonak kha umnak nawl a awnh ti lai lo.

7, 8. Jehovah nih a dawtnak kha zeitindah a langhter?

⁷ Jehovah nih a liannganmi a dawtnak kha lam tampi in a langhter. Van le vawlei a hmetngan le aa dawhning hi ruathmanh. Mah ah galaxy billion tampi a um i galaxy pakhat cio ah arfi le vawlei (Jo) billion in an um.  Minung kan umnak Milky Way galaxy ah a ummi arfi pakhat cu nika hi a si. Nika a um lo ahcun vawleicung ah thilnung zeihmanh a um kho lai lo. Mah sermi thil hna nih Jehovah cu Sertu a si ti le a ṭhawnnak, a fimnak le a dawtnak ti bantuk a sining hna kha an langhter. “Vawlei a ser hramthawk te khan Pathian nih cun hmuh khawh a si lomi a sining kha fiang tein a langhter ko; cucu zungzal in a hmunmi a ṭhawnnak le Pathian a sinak kha an si. Cucu minung nih khan Pathian thil sermi ah hin an hmuh khawh ko hna.”—Rom 1:20.

⁸ Jehovah nih vawlei hi thilnung pawl umnak caah a hleiin a ser. Vawleicung thil vialte nih saram le minung kha ṭhatnak an pek. Pathian nih minung umnak caah aa dawh tukmi dum pakhat a ser i zungzal in an nun khawh nakhnga a tlingmi lungthin le pum a pek hna. (Biathlam 4:11 rel.) Mah lengah “minung le saram kha rawl a pek dih hna, a dawtnak cu zungzal in a hmun.”—Salm 136:25.

9. Jehovah cu dawtnak a si ko nain zeidah a huat?

⁹ Jehovah cu dawtnak a si ko nain ṭhatlonak kha a huat. Tahchunhnak ah, Salm 5:4-6 nih Jehovah he aa tlaiin hitin a chim: “Nang cu ṭhatlonak tuahnak ah aa lawmmi Pathian na si lo i . . . miṭhalo cu na huat hna. . . . Mi puarhrang le mi hlenhmang cu na nautat hna.”

10, 11. (a) Miṭhalo nih zeidah an ton lai? (b) Jehovah nih nawlngaimi hna kha zei laksawng dah a pek hna lai?

¹⁰ Jehovah nih van le vawlei ah a ummi ṭhatlonak vialte hi aa tlakmi caan ah a hloh dih cang lai. Zeicatiah Pathian cu dawtnak a si i ṭhatlonak kha a huat. Baibal nih hitin bia a kan kamh: “BAWIPA aa bochanmi cu him tein ram [vawlei, NW] chungah hin an um ko lai; sihmanhselaw miṭhalo cu ṭhawl an si lai. Luklak ah miṭhalo cu an lo ko lai.” Jehovah i a ral pawl cu “meikhu bantukin an ṭian lai.”—Salm 37:9, 10, 20.

¹¹ Baibal nih hiti zongin bia a kan kamh: “A dingmi cu ram [vawlei, NW] chungah him tein an um lai i ram cu zungzal in anmah ta a si lai.” (Salm 37:29) Zumhfekmi hna cu “him tein an um lai i daihnak kha tlamtling tein an hmuh lai.” (Salm 37:11) Zeicah? Dawtnak a ngeimi Pathian nih zumhfekmi a salle caah a ṭha bikmi thil kha a tuah zungzal lai caah a si. Baibal nih hitin a chim: “An mitthli vialte kha a hnawh dih hna lai. Thihnak a um ti lai lo, ngaihchiatnak le ṭahnak le fahnak zong a um ti lai lo. Thil hlun vialte cu an lo dih cang.” (Biat. 21:4) Pathian dawtnak a sunsakmi, nawlngaimi hna i hmailei ruahchannak cu a ṭha tuk hringhran.

12. “Miṭha” timi cu ahote dah an si?

¹² Baibal nih hitin a chim: “Miṭha khi zohhmanh u, miding khi zohhmanh u; daihnak mi cu tefa an ngei; sihmanhselaw misual cu hrawh an si dih, an tefa cu hloh an si.” (Salm 37:37, 38) “Miṭha” mi nih cun Jehovah le a Fapa hngalh awkah an i zuam i Pathian duhnak kha nawlngai tein an tuah. (Johan  17:3 rel.) “Vawlei le a chung i a ummi thil minung nih an duhmi hna hi an lo cuahmah cang; sihmanhsehlaw Pathian duhnak a tuahmi cu zungzal in an nung” lai ti kha lungtak tein an zumh. (1 Johan 2:17) Hi vawlei donghnak a naih tuk cang caah ‘BAWIPA i bochan in a nawl zulh’ cu a biapi tuk.—Salm 37:34.

13. Pathian dawtnak a langhter bikmi cu zeidah a si?

¹³ Kannih cu mitlinglo kan si nain Pathian nawl kan ngaih khawh. Pathian dawtnak a langhter bikmi, Jesuh tlanhnak man thawngin Jehovah he a ṭhami pehtlaihnak kan ngei kho. Nawlngai mi hna nih sualnak le thihnak in luatnak an hmuh khawh nakhnga Jehovah nih tlanhnak man a kan timhpiak. (Rom 5:12; 6:23 rel.) Jesuh cu vancung ah kum tampi chung Pathian cung zumhfek tein a um. Cucaah vawleicung zongah zumhfek tein a um lai ti kha Jehovah nih a zumh. A Fapa kha mi nih puarhrangpi in an pehtlaihmi a hmuh tikah dawtnak a ngeimi Pa, Jehovah cu a lung a fak tuk. Pathian nih uknak nawl a ngeihmi kha Jesuh nih zumhfek tein a bawmh. Cuticun a har bikmi thil sining hmanhah a tlingmi minung pakhat nih Pathian cungah zumhawktlak tein um khawh a si ko ti kha a langhter.

14, 15. Jesuh thihnak nih minung caah zei ṭhatnak dah a chuahter?

¹⁴ Jesuh cu a fak bikmi hneksaknak a tong ko nain zumhfek tein a um i Jehovah nih uknak nawl a ngeihmi kha a bawmh. Vawlei thar ah zungzal in kan nun khawh nakhnga Jesuh nih a nunnak pek in a kan tlanh caah kan i lawmh tuk awk a si. Tlanhnak man thawngin Jehovah le Jesuh nih an langhtermi dawtnak kong kha lamkaltu Paul nih hitin a rak chim: “Zeihmanh a tuah kho lomi kan si ko lioah khan, cu caan thengte ah cun miṭhalo mi kan caah Khirh kha a thi. Miṭha caah cun thih ngamh zong an um phum hnga nain a dingmi ca i thih cu a harmi thil a si. Asinain Pathian nih cun zeitluk in dah a kan dawt kha hitihin a langhter: kannih cu misual kan si ko rih lioah hin Khrih cu kan  caah a thi.” (Rom 5:6-8) Lamkaltu Johan nih hitin a ṭial: “Pathian nih a kan dawtnak a langhterning cu hitihin a si: A Fapa ngeihchun kha vawlei ah hin a run thlah i amah thawngin nunnak kan ngei lai. Dawtnak ka timi cu Pathian kan rak dawt hi a si lo, amah nih a kan dawt i kan sualnak ngaihthiamnak ding caah a Fapa kan sinah a run thlah hi a si.”—1 Johan 4:9, 10.

¹⁵ “Pathian nih vawlei hi a dawt hringhran caah a Fapa ngeihchunte kha a pek, cucaah amah a zummi paoh cu an thi lai lo, zungzal nunnak an ngei lai” tiah Jesuh nih a ti. (Johan 3:16) Mah cu Jehovah caah a fak tuk ko nain a Fapa kha tlanhnak man caah a pek. Mah nih Pathian nih minung zeitluk in dah a kan dawt ti kha a langhter. Jehovah dawtnak cu zungzal in a hmun. Paul nih hitin a ṭial: “A kan dawtnak he cun zeihmanh nih a kan ṭhen kho lo ti kha fiang tein ka hngalh: thihnak nih siseh, nunnak nih siseh, vancung i a ummi vanmi nih si hna seh, uktu le ṭhawnnak nih si hna seh, atu caan nih siseh, hmailei caan nih siseh, cunglei vawlei nih siseh, tanglei vawlei nih hin siseh, an kan ṭhen kho lai lo, kan Bawipa Khrih Jesuh thawngin kan ta a simi Pathian dawtnak he a kan ṭhen khotu ding cu sermi thil dihlak ah hin zeihmanh a um lo.”—Rom 8:38, 39.

16. Messiah Pennak cu zeidah a si, Jehovah nih ahodah Siangpahrang ah a thim?

¹⁶ Pathian dawtnak a langhtertu pakhat cu Messiah Pennak hi a si. Minung a daw i uktu si awkah sining a tlinhmi Jesuh Khrih kha Jehovah nih Siangpahrang in rian a pek. (Ptb. 8:31) Vancung ah Khrih he uktu a ṭuanṭi hngami minung 144,000 kha Pathian nih a thim hna. Vancung ah an thawhṭhan tikah minung pakhat in an hmuhtonnak kha minung ṭhatnak caah an hman lai. (Biat. 14:1) Jesuh vawleicung a um lioah Pennak kong hi a bikin a cawnpiak hna. A zultu hna kha hitin thlacam awkah a cawnpiak hna: “Vancung khua i a um kan Pa, na min thiang cu upat si ko seh; Na Pennak cu rung tlung ko seh, vancung khua ah na duhnak an tuah bangin vawleicung ah hin tuah si ve ko seh.” (Matt. 6:9, 10) Mah thlacamnak a tlin lai caan, Pathian Pennak thawngin minung nih thluachuah an hmuh lai caan kha kan i ngaih tuk.

17. Jesuh uknak le minung uknak aa dannak kha tahchunh.

¹⁷ Jesuh uknak le minung uknak cu aa dang tuk. Minung uknak ruangah mi nuai tampi cu raltuknak ah an thi. Asinain kan Siangpahrang a simi Jesuh nih cun a kan dawt taktak. Cun Pathian i a sining hna, a hleiin a dawtnak kha aa zohchunh. (Biat. 7:10, 16, 17) Jesuh nih hitin a chim: “Re a theimi le thil a ritmi vialte hna ka sinah ra tuah u, dinhnak kha kaan pek hna lai. Ka seihnam kha i bei u, kei cu nunnem le toidornak lungthin a ngeimi ka si caah ka nawl hi i cawn ve u; cun dinhnak kha nan hmuh ko lai. Ka seihnam cu a bei a nuam i ka thil cu a zaang.” (Matt. 11:28-30) Mah cu dawtnak aa telmi biakamnak a si.

18. (a) 1914 thawkin zei thil dah a cang? (b) A hnu capar ah zei kong dah kan i ruah hna lai?

¹⁸ Pathian Pennak cu 1914 thawkin van ah dirh a si cang ti kha Baibal chimchungbia hna nih an langhter. Mah caan thawkin vancung ah Jesuh he uktu a ṭuanṭi hngami lakin a taangmi hna cu pumh an si, cun hi chan donghnak in a luat i vawlei thar ah a lut hngami “mibu nganpi” zong pumh an si. (Biat. 7:9, 13, 14) Tuchan ah mibu nganpi cu zeitluk in dah an karh? Pathian nih zeidah a hal hna? Mah kong kha a hnu capar ah kan i ruah hna lai.