1. (1) ¿Jarat tü akuwaʼipaa alanaʼleekalia nünain Maleiwa? (2) ¿Jamüsü waaʼin sutuma watüjaain saaʼu aipüralin maʼin wayuu Maleiwa?

«AIPÜRAI maʼin wayuu Maleiwa» saashin tü Wiwüliakat (1 Juan 4:8, TNM). Tia, shia tü alanaʼleekalia sünain nukuwaʼipa Maleiwa. Jaʼyasü naaʼu sünain aipüralin maʼin nia saaʼujee süpüshuaʼa tü kasa naainjakat. Talatüsü maʼin waaʼin sutuma nukumajüin Maleiwa tü kasairua chakat iipünaa jee müsia tü kasairua yaakat mmapaʼa.

2. ¿Jamüsü watüjaaka saaʼu alin maʼin waya nüpüla Jeʼwaa? (Piirakaa sümüin tü ayaakuaakat.)

² Aisü nüpüla Jeʼwaa süpüshuaʼa tü kasa nukumajakat. Müsüjeseʼe nikeraajüinjatüin tü nümatüjütkalia paala sümaiwa. Jamüshijaʼa nia, nüneeküin Jesuu süpüla niainjachin aküjüin jaralin lotuin akuwaʼipa ooʼulaka jaralin nnojolin lotuin akuwaʼipa saʼakajee wayuu süpüshuaʼa (Aluw. 17:31, TNM). Weʼitaain waaʼin sünain aneerüin sukuwaʼipa tia nutuma Jesuu. Na wayuu oonookana sümaa nünüiki Maleiwa, talateena naya süpüla kaʼikat süpüshuaʼa jee aneena nayaʼyaasa.

3. ¿Kasaje alataka nnojoliire alin waya nüpüla Jeʼwaa?

³ Nnojoliire alin waya nüpüla Jeʼwaa, nuuʼulaainje nuluwataain Satanaa saaʼu tü wayuukalüirua süpüla kaʼikat süpüshuaʼa (2 Cor. 4:3, 4;  1 Juan 5:19; paashajeʼera Alateetkat Mapeena 12:9, 12). Müliaashiije waya müle wakuwaʼipa waneepia.

4. ¿Kasa atüjaanüitpaka aaʼu maaʼutpünaa yaa nüchiki Satanaa?

⁴ Eʼrüijaashi wayumüin Satanaa nümüin Jeʼwaa ooʼulaka nimeejüin Adán sümaa Eva süpüla neʼrüliinjanain wayumüin nümüin Jeʼwaa. Naashin Satanaa, nnojoishi anain Jeʼwaa süpüla nuluwataainjachin saaʼu kasakat süpüshuaʼa, aneerüinjaʼa niale aluwataain naashin (Gén. 3:1-5). Süka kekiin maʼin Jeʼwaa, nuuʼulaain niain Satanaa aluwataain saaʼu tü wayuukalüirua sainküin tü mmakat. Atüjaanüitpa aaʼu maaʼutpünaa yaa isain nüchiki Satanaa aluwatawaa jee isain nachiki na wayuukana naluwanaajiraain saaʼu nakuwaʼipa.

5. ¿Jamüsü mojuka maʼin sukuwaʼipa tü mmapaʼakat?

⁵ Keemaitpa maʼin tü mmapaʼakat maaʼulu yaa. Soʼu tü sien juya alatüitpakat, alatüsü suulia 100 miyoone wayuu ouktaka sutuma eein atkawaa. Saashin tü Wiwüliakat, mojulaainjatü maʼin wayuu «sülüʼütpa sükalia sajaʼttüinjatüin tü kasakat süpüshua» (2 Tim. 3:1, 13). Akaʼaya joo saashin tü Wiwüliakat, nnojoishi nukumajüin Jeʼwaa chi wayuukai süpüla nuluwanaajiraainjachin saaʼu nukuwaʼipa nümüiwaʼa (Jer. 10:23). Sutuma nnojolin niain Maleiwa aluwataain saaʼu tü wayuukalüirua, mojusü maʼin sukuwaʼipa tü mmapaʼakat; choʼujaashi maʼin niainjachin Maleiwa aluwataain waaʼu süpüla anainjanain waya.

6. ¿Jamüsü nnojotka najaʼlajeʼeramaatüin Jeʼwaa tü mojulaasükalüirua?

⁶ ¿Jamüsü nnojotka najaʼlajeʼeramaatüin Jeʼwaa tü mojulaasükalüirua? Shia süpüla sütüjaanüin aaʼu niain neʼe anakai süpüla aluwatawaa waaʼu. Soʼu palit kaʼi, najaʼttireerü Maleiwa tü mojulaasükalüirua. Shiasaʼa niʼrüijaale wayumüin wanee wayuu nümüin Maleiwa nuluwataapeena waaʼu, nuʼunaajaajeechi aaʼin. Nnojoleerü nuuʼulaain suluwanaajiraain wayuu saaʼu sukuwaʼipa süchikuaʼa süka sütüjaanüitpain aaʼu niain neʼe Maleiwa anakai süpüla aluwatawaa saaʼu kasakat süpüshuaʼa.

7, 8. ¿Kasa niiʼiyataka akajee Jeʼwaa sünain aipüralin nia?

⁷ Wainma kasa niiʼiyataka akajee Jeʼwaa sünain alin waya nüpüla. Anasü maʼin sukumajia nutuma Jeʼwaa tü universokot. Nukumajüin türa planetakalüirua, türa shüliwaikat, nukumajüin Chi Kaʼikai, shüliwai chi Kaʼikai. Nnojoireje chi Kaʼikai, nnojotsüje kasain katüin oʼu yaa Mmapaʼa. Sünainjee süpüshuaʼa tü kasa weʼrakat, watüjaa aaʼuchi niain Jeʼwaa chi Kakumalakai waya, pülashin maʼin nia, kekiin maʼin nia jee aipüralin nia wayuu (Roma 1:20).

⁸ Nukumajüin Jeʼwaa tü Mmakat süpüla tü mürütkalüirua, tü wüchiikalüirua jee napüla na wayuukana. Anashaatasü nakumajia na wayuukana nutuma Jeʼwaa süpüla eeinjanain naya süpüla kaʼikat süpüshuaʼa (paashajeʼera Alateetkat Mapeena 4:11). Saashin Salmo 136:25, nia Jeʼwaa keküinka atuma wayuu, wüchii jee mürüt, süka jamüin, aipüralin maʼin nia.

9. ¿Kasa üttaka anain naaʼin Jeʼwaa?

⁹ Shiimain aipüralin Jeʼwaa, üttapejeʼe maʼin naaʼin sünain tü kasa mojusükat. Niyouktashaatain Jeʼwaa tü kasa mojusükat, nüʼleejüin na mojulaashiikana otta na aküjakana alawaa (Sal. 5:4-6).

10, 11. (1) ¿Kasa alateetka sümüin tü mojulaasükalüirua soʼu palit kaʼi? (2) ¿Kasa naapeetka Jeʼwaa namüin na oonookana sümaa nünüiki?

¹⁰ Wekirajaaitpa anain sünain aipüralin maʼin Jeʼwaa jee üttüin naaʼin sünain tü kasa mojusükat. Najaʼlajeʼereerü Jeʼwaa süpüshuaʼa tü kasa mojusükat, nüneeküitpa tü kaʼi naainjainjatkalü oʼu shia. Najaʼttireerü Jeʼwaa tü mojulaasükalüirua saashin tü Wiwüliakat, akanasaʼa na eʼitaakana naaʼin nünain Jeʼwaa naapeerü namüin tü mmakat. Soʼu palit kaʼi, najaʼttireena Jeʼwaa na niʼipolokana (Sal. 37:9, 10, 20).

 ¹¹ ¿Kasa naapeetka Jeʼwaa namüin na oonookana sümaa nünüiki? Naapeerü namüin tü mmakat jee kepieena naya suluʼu süpüla kaʼikat süpüshuaʼa (Sal. 37:29). Na wayuu waneepiakana nümaa Maleiwa, talateena maʼin naya jee aneena maʼin naya süpüla kaʼikat süpüshuaʼa (Sal. 37:11). Naainjeerü tia Jeʼwaa napüleerua süka alin naya nüpüla. Saashin tü Wiwüliakat, «müiria nnojolüin ouktaa, mojuu aaʼin, aʼyalajaa, je saalii ayuulii». Müiria nnojoluin eein tü mojulawaakat süchikuaʼa (Alat. Map. 21:4).

12. ¿Kasa waaʼinrüinjatka anamieere waya noʼuluʼu Jeʼwaa?

¹² Soʼu palitchon kaʼi, aneechi nutuma Jeʼwaa chi eekai anamiain. Jee müsia najaʼttireena na mojulaashiikana otta na eʼrüliikana wayumüin nümüin (Sal. 37:37, 38). Anamieere waya noʼuluʼu Jeʼwaa, wekirajaainjatü anain süchiki tü nukuwaʼipakat ooʼulaka süchiki nukuwaʼipa chi Nüchonkai otta woonooinjatü amaa nünüiki Jeʼwaa (paashajeʼera Juan 17:3, TNM *). Jülüja waaʼin pejechoin maʼin tü kaʼi sajaʼttinnüinjatkalü oʼu tü mojulaasükalüirua, «aluʼujasaʼa chi wayuu aaʼinrakai tü nuluwataakat anain Maleiwa, ayateechi nümaa süpüla kaʼikat süpüshua» (1 Juan 2:17). Süka sülüʼülaain nükalia Jeʼwaa, «piʼitaa paaʼin nünain Jeʼwaa otta poonoo sümaa tü nümakat pümüin» (Sal. 37:34, TNM).

13. ¿Kasa naainjaka Jeʼwaa süpüla niiʼiyatüin sünain alin maʼin waya nüpüla?

¹³ Shiimain nnojoluin lotuin sukuwaʼipa wayuu, eepejeʼe süpüla noonooin wanee wayuu sümaa nünüiki Maleiwa. Eeshii süpüla naʼaleewain waya Maleiwa saaʼujee ouktüin Jesuu saaʼu waainjala. Nüjütüin Maleiwa chi Nüchonkai süpüla naakajirüin na wayuu oonookana sümaa nünüiki suulia naainjala jee ouktaa (paashajeʼera Roma 5:12 otta Roma 6:23, TNM *). Nütüjaatüjülia aaʼu Jeʼwaa sünain noonooinjachin Jesuu sümaa nünüiki yaapa nia Mmapaʼa maʼaka naainjain shia chaa iipünaa. Aishaatasü nümüin Jeʼwaa wanaa sümaa niʼrüin müliain Jesuu atumawaa. Niiʼiyatapejeʼe Jesuu sükajee tü naainjakat niain neʼe Jeʼwaa anakai süpüla aluwatawaa waaʼu otta eein süpüla noonooin sümaa nünüiki Maleiwa wanee wayuu eekai lotuin nukuwaʼipa jaʼitairü kasain alatüin nümüin.

14, 15. ¿Kasa anasü weʼraka sutuma ouktüin Jesuu waaʼu?

¹⁴ Müliashi maʼin atumawaa Jesuu jee oʼutüna aaʼinchi nia, ayatapejeʼe nia waneepiain nümaa Maleiwa otta nüküjüin weinshi niain Jeʼwaa anaka süpüla aluwatawaa waaʼu. Sutuma ouktüin Jesuu waaʼu, eesü süpüla katüin woʼu waneepia Paʼaraiisüpa tü mmakat. Naashin Pablo, miyoʼu tü waalinkat nüpüla Jeʼwaa otta nüpüla Jesuu, müshiijeseʼe naakajirüin waya suulia ouktaa. Naashin Pablo, nnojorüleejaʼa süpüla naapajiraainjachin nikii wanee wayuu nüpüleerua wanee eekai lotuin akuwaʼipa, eepajaʼa süpüla naapajiraain nikii wanee wayuu naaʼu wanee eekai anamiain (Roma 5:6-8). Anuu nünüiki Juan: «¿Jamüsü watüjaakaʼa saaʼu alin waya nüpüla Maleiwa? Shia süka nuluwataain chi waneeshikai Nüchon yaa mmoluʼumüin süpüla niiʼiratüinjatüin waaʼin [...]. ¿Washatüin tü aijirawaakat saaʼujee alin maʼi chi Maleiwakai wapüla? Nnojo. Washatüin saaʼujee alin maʼi neʼe waya nüpüla chi Maleiwakai. Nuluwataainjese chi Nüchonkai süpüla ouktüinjachin saaʼu waainjala süpüla nülaʼajaainjatüin woulia» (1 Juan 4:9, 10).

¹⁵ Anuu nünüiki Jesuu: «Süka alin maʼin nüpüla Maleiwa na wayuukana, naapüin chi waneeshikai Nüchon süpüla nnojoliinjanain ouktüin na eʼitaakana naaʼin nünain otta süpüla katüinjatüin noʼu waneepia» (Juan 3:16, TNM). Aishaatashi waya nüpüla Jeʼwaa, müshijeseʼe nuluwataain  chi Nüchonkai süpüla ouktajachin nia saaʼu waainjala. Aipejeʼe maʼin nümüin nuʼutünüin aaʼin chi Nüchonkai. Nnojoleerü ashakajaain waalii nüpüla Jeʼwaa. Anuujeseʼe nünüiki Pablo: «Jaʼitaina ouktüin waya, ayateena waya alin nüpüla [Maleiwa]. Jaʼitakaja nooʼuleʼereein chi Maleiwakai [...] na aapiee chakana iipünaa suulia alin waya nüpüla, ayateena alin waya nüpüla. Jaʼitakaja tü alatakat wamüin jooluʼu je mapeena, jaʼitakaja tü naaʼinreekat na sülaülashiikana mma, jaʼitakaja tü alatakat chaa sirumatuʼupünaa je shiinaluʼupünaa mmakat, jaʼitakaja tü süchekakat wapüleerua süpüshua tü akumajuushikalüirua, nnojotsü suuʼuleʼerüinjachin chi Maleiwakai suulia alin waya nüpüla» (Roma 8:38, 39).

16. (1) ¿Kasa wayuu tü Nuluwataayakat chi Mesiiakai? (2) ¿Jarai chi nüneekakai Maleiwa süpüla shikiipüʼüin tü Nuluwataayakat?

¹⁶ Wanee kasa niiʼiyataka akajee Jeʼwaa sünain alin waya nüpüla, shia sükajee Nuluwataaya chi Mesiiakai. Nia aikkaleʼeraka Jeʼwaa tia aluwataayakat otta nüneeküin Jesuu süpüla shikiipüʼüin nia tia aluwataayakat, aisü wayuu nüpüla jee atüjashi nia aluwatawaa saaʼu wayuu (Prov. 8:31). Aneekünüshii 144.000 anoujashii aluwataainjanakana wanaa nümaa Jesuu chaa iipünaa. Naya anoujashiikana natüjaa aaʼu sümüliala wayuu jee kasain choʼujaain sümüin süpüla anain shia (Alat. Map. 14:1). Soʼu yaajachinkain Jesuu Mmapaʼa, aküjüshi maʼin nia tü süchikikat Nuluwataaya Maleiwa. Anuu tü nachuntajatkat na nikirajüinkana naashin Jesuu: «Taata Maleiwa chakai sirumatuʼu, wule putuma tü pünüliakat. Püntira tü puluwataayakat. Saainjüna tü keeʼireekat paaʼin yaa mmapaʼa maʼaka saainjünüin chaa iipünaa» (Mat. 6:9, 10, TNM). Kasataalejeseʼe shikeraajüin maalü tia achuntünakat süpüla anainjanain na wayuukana.

17. ¿Jamüshi niaka anain Jesuu süpüla aluwatawaa waaʼu noulia na sülaülashiikana mma?

¹⁷ Atüjashi Jesuu aluwatawaa saaʼu wayuu noulia na sülaülashiikana mma. Sutuma naluwataain na sülaülashiikana mma, eesü atkawaa jee watta saalii wayuu ouktaka. Aipejeʼe waya nüpüla Jesuu maʼaka alin waya nüpüla Jeʼwaa (Alat. Map. 7:10, 16, 17). Anuujeseʼe nünüiki Jesuu: «Maa aka mapüsain wane wayuu süchiki aʼyatawaa [...], anakaja müleka jüüjüüle jia tamüin taapaiwa jümüin eemerawaa [...]. Mapüleejeerü jümüin aluwataanaa tatüma, mapüleejeerü jümüin tü tachekakat jüpüleerua. Müleka jüüjüüle jia tamüin, taapeerü jümüin tü eemerawaakat süka anamiain maʼi taya» (Mat. 11:28-30). Aitaʼaleeshiijaʼa maʼin waya nüpüla Jesuu.

18. (1) ¿Kasa alataka soʼujee 1914? (2) ¿Kasa wekirajaajeetka anain sünain tü wanee ekirajaayakat?

¹⁸ Saashin tü Wiwüliakat, aikkalaasü nuluwataaya Maleiwa chaa iipünaa soʼujee 1914. Alüʼütshii süpüla kottüin na anoujashii aluwataainjanakana wanaa nümaa Kürisüto chaa iipünaa, 144.000 naya napüshuaʼa. Jee müsia, akatajünüshii na wayuu oʼttaainjanakana suʼunnaa sajaʼttinnüin tü kasakat süpüshuaʼa jee kepieena naya suluʼu tü Paʼaraiisükat. Nnojoishii yaawain naya wayuukana, watta naalii (Alat. Map. 7:9, 13, 14). ¿Kasa nuchuntaka Maleiwa namüin naya wayuukana? Wekirajaajeerü anain tia sünain tü wanee ekirajaayakat.