1. a) ¿Ngöbö töi meden bäri ütiäte? b) ¿Ngöbö abokän ja tare ye gare nie yebätä jata nemen ruin ño nie?

BIBLIA tä niere “Ngöbö abokän ja tare” (1 Juan 4:8, TNM). Ne tä mike gare ja tare ye bäri ütiäte Ngöbö töi mada mada kwin yebiti ta meden gärätä. Niara ñaka töita jerekäbe ja tarebätä, ñakare aune niara abokän ja tare. Jondron jökrä nuainta kwe, ye tä nuainne ja tare yebiti. Niarakwe ja tare, ye käkwe töi mikani ni aune jondron jökrä sribere yebätä nita debe bien krubäte ie.

2. Jehovata ni tarere gare nie, ¿yebätä drei nita tö ngwen metre? (Üai bämikani kena mikadre ñärärä.)

² Jondron jökrä sribebare Jehovakwe ye tare kwe ye gare nie. Ye medenbätä niara dre käbämikani nie ye mikai nemen bare kwe yei nita tö ngwen metre. Ñodre, niarakwe ni tare yebätä, “köbö kitanina [kwe] kukwe ükatekäre kuin era metre ni jökräbe” Ngobo Jesukristo yebiti (Hechos 17:31). Jesús kukwe ükaite metre ni kräke ye gare nie. Ye ngwane, nitre jökrä tä Ngöbö kukwei mike täte ye käkwe ja känenkäre nünain erametre kä jutobiti.

3. Ni ñaka tare Jehovakwe, ¿akräke dre tädre ja känenkäre ni kräke?

³ Ni ñaka tare Jehovakwe, ¿akräke dre tädre ja känenkäre ni kräke? Satana ngöbö käme krubäte ye köböite ni kä tibienbätä tädre ja gobraine jankunu kwärikwäri (2 Corintios 4:4; 1 Juan 5:19; ñäkädre Apocalipsis 12:9, 12 yebätä). ¡Jondron kwin ñaka tädre jire ni kräke!

4. ¿Ñobätä Jehovakwe Satana tuanimetre ja mike niara rüere?

⁴ Satana ja mikani Jehová rüere ye ngwane, Adán aune Eva mikani siba kwe ja mike Jehová rüere. Ngöbö ñan raba Gobrane kwin jondron jökrä sribebare kwe yebiti mikani gare kwe. Ne madakäre, niara bäri gobranka kwin Ngöbö ngwä mikani gare kwe (Génesis 3:1-5). Jehová ye abokän Ngöbö töbätä krubäte, yebätä Satana tuanimetre kwe ne kwe Satana gobranka kwin niebare kwe ye metre o ñakare ye bämikadre kwe. Akwa Satana aune nitre kä tibienbätä ñaka gobrane kwin ye namanina gare metre.

5. ¿Kirabe nükebe kä nengwane ni kä tibienbätä tä nüne ño ye tä dre bämike?

⁵ Kä nengwane, nitre tä ja ngwen bäri käme. Kä nikani 100 bitinkä ta yete, nitre millón 100 biti bäri murie ketani rübätä. Biblia tä niere “kä krüte yete”, nitre rabai ja ngwen bäri käme (2 Timoteo 3:1, 13, TNM). Arato tä niere ni kä nebätä ie “ja jie ngwan ñaka gare. Ni kä nebätä ie ja jie ngwandre ño ye ñaka gare jire” (Jeremías 10:23). Kukwe nieta ye metre. Kirabe nükebe kä nengwane ni kä tibienbätä tä nüne ño ye tä bämike metre Jehovakwe ñaka ni sribebare ja gobrainkäre akwle.

6. ¿Ñobätä Jehová tä nitre töi käme ye tuenmetre nüne jankunu?

⁶ ¿Ñobätä Jehová tä nitre töi käme ye tuenmetre nüne jankunu? Ñobätä ñan aune yebiti tä bämike gobran iti aibe raba gobrane kwin ye abokän gobran Ngöbökwe. Ja känenkäre, Ngöbökwe nitre töi käme ye jökrä gaite. Ye bitikäre, ni ruäre käkwe ja mikai gobran kwe ye rüere ye ngwane jötrö ngwarbe kukwe ye ükaite kwe. Ni kä tibienbätä tä nüne ño yebiti mikai gare metre kwe nitre bikaka kri ye gadrete. Nitre töi käme ye ñaka tuainmetre nünenta jire bobukäre kwe.

7, 8. ¿Ni tare Jehovakwe ye tä bämike ño nie?

⁷ Ni tare Jehovakwe ye tä bämike nie kukwe keta kabrebiti. Ñodre, kä kwinta ye kri aune bä nuäre krubäte yebätä mä raba töbike. Kä kwinbätä planeta aune muke millón kwati krubäte tä. Muke kwati ye abokän Ñänä. Kä tibienbätä Ñänä ye ñaka tädre akräke ni aune jondron nire ñaka tädre jire. Romanos 1:20 tä niere ye erere, jondron jökrä sribebare kwe ye tä mike gare nie Jehová ye ni Sribekä aune töi kwin keta kabre ye abokän niara dite, töbätä aune ja tare kwe.

⁸ Jehová Kä tibien sribebare ne kwe ni aune jondron nire ye nünandre kä jutobiti te aune jardín bä nuäre yete ni mikani nüne kwe. Arato ni töi mikani metre kwe aune ni sribebare kwe nünankäre kärekäre (ñäkädre  Apocalipsis 4:11 yebätä). Ne madakäre, Salmo 136:25 tä niere Jehová tä ni aune jondron nire ye jökrä buke, ñobätä ñan aune ja tare ye tä kärekäre kwe.

9. Jehová ye Ngöbö ja tarekä, ¿akwa dre tuin käme ie?

⁹ Jehová ye Ngöbö ja tarekä, akwa kukwe blo ye jökrä tuin käme ie. Yebätä, Salmo 5:4-6 tä niere kukwe käme, nitre töi käme, nitre tä ni mada nuainne tare aune nitre ni ngökö ye tuin käme Jehovai.

10, 11. a) ¿Gwäune dre rabai bare nitre töi käme yebätä? b) ¿Nitre tä Jehová kukwei mike täte ye kräke dre kwin mikai nemen bare kwe?

¹⁰ Nibira gare nie ye erere, Jehová ye Ngöbö ja tarekä aune nitre töi blo ye jökrä tuin käme ie. Ye medenbätä, niara ja töi mikai ye ngwane nitre töi käme ye jökrä diainkä kwe. Biblia tä käbämike nitre töi käme ye gaite, “akwa nitre tä Jehová ngübarebätä yekwe kä tibien rabai”. Aune gwäune nitre tä ja mike Jehová rüere ye ñaka rabaira tä käbämike arato (Salmo 37:9, 10, 20).

¹¹ ¿Nitre tä Jehová kukwei mike täte aune niara tä ni tarere yebätä nitre tä debe bien ie ye kräke dre kwin mikai nemen bare kwe? Kukwe kwin mikai nemen bare kwe kä ja känenkäre yete nitre ye kräke. Biblia tä käbämike “nitre kukwe metre nuainkä yekwe kä tibien rabai” aune rabai nüne kärekäre te (Salmo 37:29). Nitre ja ngwanka metre ye nünain kä jutobiti aune kä jäme krubäte yete (Salmo 37:11). ¿Ñobätä? Ñobätä ñan aune Ngöbö ni tarekä ye käre tä kukwe kwin mike nemen bare ni niara mikaka täte tä ja ngwen metre ie ye kräke. Biblia tä niere niarakwe “niaratre okwä ñöi sökadite jökrä ietre amne ni ñan krütadre jire iti mda amne ñan ja müaidre jire chi mda amne ñan ja müaidre ja tare nikabtä”. Nitre töi käme ye ñaka rabaira jire (Apocalipsis 21:4).

12. Ni ñaka ja mike ngite ye kwrere Jehová ni mikadre tuin jai, ¿yekäre nikwe dre nuaindre?

¹² Salmo 37:37, 38 tä niere Jehová kräke “ni ñaka ja mike ngite” ye jökrä käkwe nünain jäme kä ja känenkäre yete. Ngöbökwe nitre töi käme aune ñaka Ngöbö kukwei mike täte ye jökrä gaite mikata gare kwe arato. Ni ñaka ja mike ngite ye kwrere Jehová ni mikadre tuin jai, yekäre ni rabadre niara aune Ngobo ye mike gare jai bätä dre dre nieta Jehovakwe ye jökrä nikwe mikadre täte (ñäkädre Juan 17:3 yebätä). Gwäune nitre kä nebätä gaite, “akwa Ngöbö tö dreye, erere nire nire tä mike täte, ni ye abko käkwe nünandi kärekäre” ye tädre gare metre nie (1 Juan 2:17). Kä krüte nibira ja ken krubäte, yebätä kukwe nieta mäträkäre nibätä ne nikwe mikadre täte: “Mäkwe Jehová ngüba ngäbiti aune kukwe kwe mika täte” (Salmo 37:34).

13. ¿Ni tare Ngöbökwe ye bämikani drebiti kwe?

¹³ Ni ngite, akwa ni raba Ngöbö mike täte. Arato ni raba nemen ja ketamuko kwe Jesús ja nire biani ni ütiäre ye köböire. Ngöbökwe  ni tare krubäte ye bämikani kwe nie kukwe yebiti. Niarakwe Ngobo kwe juani ja bien murie ketadre ni niara mikaka täte ye kräke ne kwe ni rabadre kwäre ngite aune gata yebätä (ñäkädre Romanos 5:12 aune 6:23 yebätä). Jesús ja ngwain metre Kä tibienbätä ye nämene gare kwin Jehová ie, ñobätä ñan aune niara nämene kä kwinbiti ye ngwane ja ngwani metre kwe ie kä kwati krubäte te. Nitre namani Jesús mike ja tare nike ye namani tare krubäte Jehovai. Akwa Ngöbö aibe raba ni gobraine yekri Jesukwe käre ja mikani. Ne madakäre, ni ngite akwa ni raba ja ngwen metre Ngöböi kukwe tare yete ta ye bämikani kwe.

14, 15. ¿Jesús ja nire biani murie ketadre ni jökrä ütiäre ye köböire dre kwin tä nemen nikwe?

¹⁴ Jesús ja tare nikabare krubäte, akwa ja ngwani metre kwe Ngöböi nememe murie ketani ye ngwane aune Rün kwe aibe raba ni gobraine yekri ja mikani kwe. ¿Jesús ja nire biani murie ketadre ni jökrä ütiäre ye köböire dre kwin tä nemen nikwe? Ye köböire ni raba nüne kärekäre Kä Bä Nuäre yete. Apóstol Pablo mikani gare Jesús ja nire biani ni ütiäre yebiti ni tare krubäte Jehovakwe aune Jesukwe ye bämikani kwetre. Pablo niebare ni ñaka jire iti raba ja bien murie ketadre “ni kwin diäre” akwa nitre ruäre abokän raba ja bien murie ketadre “ni bäri kwin diäre”. Akwa niarakwe niebare Ngöbökwe ni tare krubäte ye bämikani kwe Ngobo kwe juani ja bien murie ketadre kwe ni kräke yebiti “ni nämene ngite ngwane” (Romanos 5:6-8, Ngöbö Täräe [NGT], tärä okwä ükaninte). Aune apóstol Juan tikabare: “Ja tarekrä Ngöbökwe ni kräke, ne niarakwe mikani tuadre krörö: Niarakwe ja monsoi itibe juani kä tibienbätä, abokän kwe nikwe nünandre niara monsoi köböire gäre. Ni tarekrä abrä dre ne: Ñan nikwe Ngöbö tarebare, akwa Ngöbökwe ni tarebare, angwane ja Monsoi juani kwe” ja bien murie ketadre ni ngite ütiäre (1 Juan 4:9, 10, NGT).

¹⁵ Ne madakäre, Jesús niebare ni kä tibienbätä tare krubäte Ngöbökwe yebätä Ngobo itibe kwe ye juani kwe ja nire bien murie  ketadre “ne kwe ni jökrä käkwe tödekadre ie ye ñaka gadrete, ñakare aune ja nire käre ye rabadre kwe” (Juan 3:16, TNM). Namani tare krubäte Jehovai akwa ja töi mikani kwatibe kwe Ngobo tuenmetre ja bien murie ketadre ni kräke. Yebiti tä bämike nie ni tare krubäte kwe, aune ñaka ja töi kwitai jire kwe kukwe yebätä. Ye medenbätä Pablo tikabare: “Gare metre tie, gata, ja nire, angeletre, ji dokwäte krikri, gobran krikri, jondron nengwane, jondron tä rakakakä, jondron mente kwin, jondron mente nguse, jondron bätäkä ngwarbe mada tä sribebare, ne jökrä ñan tärä nun ötaka ja tarekrä Ngöbökwebätä; ne medendre tä Jesús Gobran kri, Ji dokwäte nunkwebiti” (Romanos 8:38, 39, NGT).

16. a) ¿Monso dianinkä Gobrankäre ye dre gärätä? b) ¿Ngöbökwe nire dianinkä ne kwe rabadre Gobrane?

¹⁶ Jehovakwe ni tare tä bämike nie kukwe madabiti ye abokän monso dianinkä Gobrankäre kwe. Gobran ne tä mikani Ngöbö köböire, aune gobran kädekani iti kwe yekwe ni kä tibienbätä tare aune töbätä ni kä tibienbätä gobrainkäre (Proverbios 8:31). Gobran ye abokän Mesías, Jesukristo. Ne madakäre, nitre 144,000 dianinkä nitre kä nebätä ngätäite ye gobraindi Kristobe kä kwinbätä. Niaratre gakröta ye ngwane, nünanta ño Kä tibienbätä namani gare ietre ye tä niken ngwena ja töite kä kwinbätä (Apocalipsis 14:1). Jesús nünanbare Kä tibienbätä ye ngwane, nämene kukwe driere metrere Gobran yebätä. Nitre ja tötikaka kwe ye oradre krörö driebare kwe ietre: “Nun Rün kä käinbti, ma aibe kä raba mikani ütiäte ni jökräkwe. Jakwe gobrane nun ngätäite nete. Erere arato, ma töta nebe dre dre nuein kä käinbti, erere tä nebe bare täte jökrä, ye kwrere raba nebe bare täte jökrä kä nebtä arato” (Mateo 6:9, 10). Gobran yekwe kukwe kwin mikadre nemen bare ni kä tibienbätä jökrä kräke nita ribere orasionte ye erere rabai bare metre yei nita tö ngwen krubäte.

17. ¿Jesús tä gobrane aune nitre kä tibienbätä tä gobrane ye ñobätä ñaka ja erebe?

¹⁷ Jesús tä gobrane ye ñaka ja erebe nitre kä tibienbätä tä gobrane yebe. Nitre kä tibienbätä yekwe rü mikanina nakainkä krubäte aune nitre millón kwati krubäte murie ketanina kwetre. Akwa Jesús yekwe ni tare aune niara töi keta kabre kwin Jehová ye erere, metre ja tare kwe (Apocalipsis 7:10, 16, 17). Jesús käbämikani: “Mun nain, sribi kisete, angwane jondron doboko ngwan kisete, jakwre tie, angwane tikwe mun mikai jadüke. Yugo tikwe jänrika munkwe jabätä, angwane munkwe ja tötika tibätä, ñobätä ñan angwane ti abrä jäme aune bobre; ne kwrere munkwe nuaindi ngwane, ja dükakrä mun ie ye kwaintari mun ie, ñobätä ñan angwane yugo tikwe nebrä nuäre ngwandre, erere arato tribe tikwe abrä juto” (Mateo 11:28-30, NGT). ¡Ni tare krubäte Jesukwe!

18. a) ¿Kä 1914 yete ja känenkäre dre dre tä nemen bare? b) ¿Kukwe ja tötikara ja känenkäre yekänti nikwe ja tötikai drebätä?

¹⁸ Biblia tä driere Gobran Ngöbökwe ye jatani gobrane kä kwinbiti kä 1914 yete. Ye ngwane ja känenkäre nitre 144,000 ükakröta mrä gobrankäre kä kwinbätä Kristo ben. Nitre käme gaite ye ngwane nitre rabaite nire ye ükakröta nünankäre Kä Bä Nuäre yete arato. Nitre ye abokän “nitre [...] kwati krübäte” meden gärätä (Apocalipsis 7:9, 13, 14). ¿Nitre nibe tä nitre ye ngätäite? ¿Ngöbö tö niaratre tuai dre nuainne? Ye nikwe mikai gare jai kukwe ja tötikara ja känenkäre yekänti.