1. (1) Vajtswv qhov yeeb yam loj tshaj yog dabtsi? (2) Koj puas zoo siab tias Vajtswv yog txojkev hlub?

PHAU Vajlugkub qhia tias “Vajtswv yog txojkev hlub.” (1 Yauhas 4:8) Tiamsis qhov no txhais li cas tiag? Yehauvas muaj ntau qhov yeeb yam zoo tiamsis kev hlub yog yam loj tshaj. Tsis yog nws muaj kev hlub xwb, tiamsis nws yog txojkev hlub ntag. Txhua yam nws ua yeej qhia tias nws yog txojkev hlub tiag. Vajtswv tsim ib puas tsav yam tsis hais tej uas nyob saum nruab ntug thiab hauv ntiajteb no. Peb yeej zoo siab kawg li uas Yehauvas yog txojkev hlub!

2. Vajtswv hlub peb kawg li, peb thiaj tso siab li cas? (Saib daim duab ntawm sab no.)

² Yehauvas khuvleej thiab hlub tshua tej uas nws tau tsim. Peb thiaj tso siab tias nws tej lus cog tseg rau noob neej yuav muaj tiav. Cov uas mloog Vajtswv lus yuav muaj kev zoo siab tiag tiag. Yehauvas “twb teem ib hnub cia lawm mas hnub ntawd nws yuav kom tus uas nws twb teem cia lawd txiav txim ncaj ncees rau lub  ntiajteb,” tus ntawd yog Yexus Khetos. (Tubtxib Tes Haujlwm 17:31) Hnub txiav txim yeej yuav los xwb xwb li. Cov uas mloog Vajtswv lus yuav tau lub neej kaj siab lug nyob mus ib txhis.

3. Yog Vajtswv tsis hlub noob neej ces yuav zoo li cas xwb?

³ Yog tias Vajtswv tsis yog txojkev hlub ces noob neej yuav zoo li cas? Peb twb pom tias tibneeg txojkev kav zoo li cas lawm. Xatas yog tus txuam yuaj lawv txojkev kav. Nws yog ib tug vajtswv limhiam uas tsis hlub tshua leejtwg li. (2 Khaulee 4:4; 1 Yauhas 5:19; nyeem Qhia Tshwm 12:9, 12.) Yog Yehauvas tsis hlub noob neej ces lub neej yav tom hauv ntej tsuas yuav nyob tsaus ntuj nti xwb!

4. Vim li cas Yehauvas thiaj ncua sijhawm rau Xatas?

⁴ Thaum Xatas sawv tawm tsam Vajtswv txojkev kav, nws kuj yaum tau thawj nkawm niam txiv sawv tawm tsam Vajtswv thiab. Nws liam tias Vajtswv tsis muaj cai kav. Xatas khav tias nws txojkev kav zoo dua Vajtswv txoj. (Chiv Keeb 3:1-5) Yehauvas thiaj ncua sijhawm seb Xatas yuav kav li cas. Thaum kawg pom tseeb tias noob neej thiab Xatas kav tsis tau zoo.

5. Tej keeb kwm qhia meej li cas?

⁵ Niaj hnub no lub ntiajteb tsuas phem zuj zus tuaj xwb. Txij xyoo 1914 los muaj tshaj li 100 plhom tus neeg raug kev ploj kev tuag vim kev tsov kev rog. Phau Vajlugkub qhia tias nyob rau “tiam kawg . . . cov neeg phem thiab cov neeg txawj dag yuav phem heev zuj zus.” (2 Timaute 3:1, 13) Phau Vajlugkub hais ntxiv tias: “Au [Yehauvas], kuv paub tias neeg lub neej tsis yog nyob ntawm nws tus kheej, thiab paub tias tsis yog neeg coj tau neeg tshais kauj ruam.” (Yelemi 10:23) Tej keeb kwm qhia meej li ntawd tiag. Vajtswv tsis tau tsim kom noob neej rov kav lawv tus kheej, lawv thiaj kav tsis tau zoo. Lawv yuav tsum vam khom Vajtswv lub tswvyim.

6. Vim li cas nimno Vajtswv ho cia muaj kev limhiam?

⁶ Qhov uas Yehauvas cia muaj kev phem nyob ib ntus pab kom txhua tus pom tias Yehauvas txojkev kav yog txoj zoo tshaj. Yav tom hauv ntej Vajtswv yuav rhuav tshem tag nrho cov neeg limhiam. Yog muaj leejtwg rov liam tias Vajtswv txojkev kav tsis zoo, Vajtswv yuav tsis ncua sijhawm rau nws li nimno lawm. Thaum ntawd cov uas sawv tawm tsam Vajtswv txojkev kav yuav raug rhuav tshem tamsid. Vajtswv yuav tsis cia muaj kev limhiam ib zaug ntxiv li lawm.

7, 8. Yehauvas qhia li cas tias nws hlub noob neej?

⁷ Yehauvas tau ua ntau tsav ntau yam los qhia tias nws hlub noob neej. Xav txog lub qab ntuj khwb no seb zoo nkauj npaum li cas. Muaj qas txhiab qas vam ntsaus hnub qub, suav tsis txheeb li. Cov hnub qub ntawd nyob ua tej ntsau tej pawg zoo li kab lig ntuj. Lub ntiajteb no nyob hauv ib ntsau hnub qub hu ua Milky Way [mi·yau·kis vem]. Luag suav tias lub hnub los yog ib lub hnub qub thiab. Twb yog muaj lub hnub thiaj yug tau ib puas tsav yam ciaj sia hauv ntiajteb no. Yog tsis muaj lub hnub ces yuav tsis muaj ib yam dabtsi ciaj taus li. Tej no qhia tias Yehauvas yog tus Tswv Tsim uas muaj hwjchim, muaj tswvyim, thiab muaj kev hlub. Muaj tseeb li phau Vajlugkub tau hais: “Qhov uas nws yog Vajtswv kuj tshwm meej rau hauv txhua yam uas tsim los lawd.”—Loos 1:20.

⁸ Yehauvas tsim lub ntiajteb kom yug tau txhua yam ciaj sia. Txhua yam hauv ntiajteb  yog tsim los pab tibneeg thiab tsiaj txhu. Vajtswv tsim ib lub vaj zoo nkauj heev rau tibneeg nyob. Nws tsim tibneeg muaj lub cim xeeb thiab lub cev uas zoo tiav log kom nyob tau mus ib txhis. (Nyeem Qhia Tshwm 4:11.) Tsis tas li ntawd xwb, “nws pub zaub pub mov rau txhua yam uas ciaj sia tau noj. Vim nws txojkev hlub uas ruaj khov nyob mus ib txhis.”—Ntawv Nkauj 136:25.

9. Yehauvas yog txojkev hlub tiamsis nws ntxub dabtsi?

⁹ Yehauvas yog tus Vajtswv uas muaj kev hlub tiamsis nws kuj txawj ntxub kev phem thiab. Phau Vajlugkub qhia tias Yehauvas tsis yog “tus Vajtswv uas zoo siab rau txojkev limhiam . . . [nws] ntxub txhua tus uas ua phem.” Vajtswv kuj ntxub cov neeg “noj [nyoos] thiab cov uas dag ntxias.”—Ntawv Nkauj 5:4-6.

10, 11. (1) Yuav ua li cas rau cov limhiam? (2) Cov mloog lus yuav tau Yehauvas tej koob hmoov twg?

¹⁰ Vajtswv yog txojkev hlub, nws ntxub txojkev limhiam. Yog li ntawd, thaum txog nws lub sijhawm nws yuav tshem tawm txhua txojkev limhiam hauv lub qab ntuj no. Vajtswv Txojlus qhia tias: “Cov neeg limhiam yuav raug muab txiav tawm mus, tiamsis cov uas tos rawv [Yehauvas] yuav tau lub tebchaws ua lawv teej lawv tug. Tshuav tsis ntev cov neeg limhiam yuav tsis muaj nyob lawm.” Yehauvas cov yeeb ncuab yuav “ploj mus yam li tej pa ncho.”—Ntawv Nkauj 37:9, 10, 20.

¹¹ Vajtswv Txojlus cog tseg tias: “Cov ncaj ncees yuav tau lub [ntiajteb] ua lawv teej lawv tug, thiab tau nyob rau hauv mus ib txhis.” (Ntawv Nkauj 37:29) Cov uas muab siab npuab Vajtswv yuav “zoo siab xyiv fab rau qhov uas lawv vam meej nplua mias.” (Ntawv Nkauj 37:11) Vim li cas? Vim tias Vajtswv xav kom nws cov tub qhe tau zoo xwb. Phau Vajlugkub hais tias: “Nws yuav so txhua ncos kua muag ntawm lawv qhov muag, txojkev tuag yuav tsis muaj dua li lawm, txojkev quaj ntsuag txojkev quaj thiab kev mob yuav tsis muaj dua li lawm, vim tej qub twb dua tag lawm.” (Qhia Tshwm 21:4) Cov uas mloog Vajtswv lus thiab nco nws txiaj ntsig yuav tau lub neej vam meej ntxhias yav tom hauv ntej!

12. Cov uas “tsis muaj chaw thuam” yog cov twg?

¹² Phau Vajlugkub hais tias: “Cia li tshuaj saib tus uas tsis muaj chaw thuam, thiab ntsia ntsoov tus uas lub siab ncaj, vim tus uas nyob siab tus yees muaj caj ces. Tiamsis tus uas fav xeeb yuav raug puam tsuaj huvsi. Cov uas limhiam caj ces yuav raug muab txiav pov tseg.” (Ntawv Nkauj 37:37, 38) Cov uas “tsis muaj chaw thuam” yog cov uas kawm paub Yehauvas, nws tus Tub, thiab ua raws li Vajtswv lub siab nyiam. (Nyeem Yauhas 17:3.) Lawv ntseeg ruaj nreeg tias “lub ntiajteb thiab tej uas lub ntiajteb ntshaw yuav dua mus, tiamsis tus uas ua raws li Vajtswv lub siab nyiam yuav nyob mus ib txhis.” (1 Yauhas 2:17) Hnub kawg twb los ze heev lawm, yuav kom peb dim tau txojsia, peb yuav tsum “tos rawv [Yehauvas] thiab tuav rawv nws txojkev.”—Ntawv Nkauj 37:34.

13. Vajtswv muaj kev hlub loj tshaj plaws, nws thiaj npaj dabtsi?

¹³ Txawm peb yog neeg txhaum xwb los peb yeej mloog tau Vajtswv lus. Peb kuj nrog tau Vajtswv sib raug zoo vim Yexus tuag theej peb lub txhoj. Yehauvas muaj kev hlub loj tshaj plaws, nws thiaj npaj tus nqe txhiv los cawm noob neej dim kev txhaum thiab kev tuag. (Nyeem Loos 5:12; 6:23.) Yexus muab siab npuab Yehauvas tau qas txhiab qas vam xyoo saum ntuj ceeb tsheej. Yehauvas  thiaj tso siab plhuav tias thaum Yexus los hauv ntiajteb, nws yuav npuab siab rau Yehauvas tuag nthi. Mob Yehauvas siab kawg li thaum nws pom tibneeg muab nws tus tub tsim txom ua lwj ua liam. Txawm Yexus raug tsim txom hnyav npaum li cas los, nws yeej txhawb nqa Vajtswv txojkev kav. Nws tus qauv qhia tias tus neeg zoo tiav log muaj peevxwm npuab siab rau Vajtswv tuag nthi.

14, 15. Yexus txojkev tuag pab tau noob neej li cas?

¹⁴ Txawm tias Yexus raug tsim txom hnyav npaum li cas los nws npuab siab rau Vajtswv. Nws txhawb nqa Yehauvas txojkev kav mus txog thaum nws tu siav nrho. Tsim nyog peb nco Yexus txiaj ntsig uas nws tuag txhiv noob neej, kom peb thiaj tau txojsia nyob mus ib txhis hauv Vajtswv lub qab ntuj tshiab! Tus tubtxib Povlauj qhia meej tias Yehauvas thiab Yexus nkawd hlub tibneeg npaum li cas diam. Nws hais tias: “Thaum peb tseem qaug zog Khetos tuag this cov neeg phem raws li lub sijhawm uas teem tseg lawm. Qhov tseeb tsis tshua muaj leejtwg tuag this tus neeg ncaj ncees, tiamsis tej zaum yuav muaj ib tug yeem tuag this tus neeg zoo. Tiamsis Vajtswv ua nws txojkev hlub tshwm rau peb, yog qhov uas thaum peb tseem ua neeg muaj txim Khetos tuag this peb.” (Loos 5:6-8) Tus tubtxib Yauhas kuj sau tias: “Vajtswv txojkev hlub kuj tshwm rau peb pom li no, yog Vajtswv txib nws tib tug Tub los rau hauv lub ntiajteb kom peb thiaj muaj txojsia nyob  ntawm tus Tub ntawd. Txojkev hlub yog li no, tsis yog peb hlub Vajtswv tiamsis Vajtswv hlub peb thiab txib nws tus Tub los ua yam uas xyeem ntxuav peb lub txim.”—1 Yauhas 4:9, 10.

¹⁵ Yexus hais ntxiv tias: “Vajtswv hlub ntiajteb kawg li nws thiaj pub nws tib leej Tub los kom txhua tus uas ntseeg leej Tub ntawd thiaj tsis puam tsuaj tiamsis yuav tau txojsia ib txhis tsis kawg.” (Yauhas 3:16) Txawm tias mob Yehauvas siab npaum li cas los, nws muab nws Leej Tub ua tus nqe txhiv noob neej. Qhov uas Yehauvas ua no qhia tseeb tias nws hlub tibneeg kawg li tiag. Nws txojkev hlub yuav nyob mus ib txhis. Povlauj sau tias: “Rau qhov kuv ruaj siab tias txawm yog kev tuag lossis txojsia lossis cov tubtxib saum ntuj lossis tej timtswv lossis tej xwm txheej tiam no lossis tiam tom ntej lossis tej hwjchim, lossis qhov uas siab kawg lossis qhov uas tob kawg lossis ib yam dabtsi uas tau tsim los no yuav cais tsis tau peb ntawm Vajtswv txojkev hlub uas muaj hauv peb tus Tswv Yexus Khetos kiag li.”—Loos 8:38, 39.

16. (1) Lub Nceeg Vaj yog dabtsi? (2) Yehauvas tsa leejtwg ua Vajntxwv kav?

¹⁶ Yehauvas hlub noob neej kawg li, nws thiaj npaj lub Nceeg Vaj rau peb. Yehauvas tsa Yexus Khetos, uas yog tus Mexiyas los kav lub Nceeg Vaj ntawd lawm. Yexus hlub noob neej kawg li thiab nws muaj peevxwm kav tau zoo. (Paj Lug 8:31) Yuav muaj 144,000 leej hauv ntiajteb no mus nrog Khetos kav saum ntuj thiab. Lawv paub zoo txog noob neej tej kev nyuaj siab, lawv thiaj kav tau zoo. (Qhia Tshwm 14:1) Thaum Yexus los hauv ntiajteb nws niaj hnub tshaj tawm txog lub Nceeg Vaj. Nws thiaj qhia kom nws cov thwjtim thov li no: “Peb leej Txiv uas nyob saum ntuj, thov sawvdaws hwm koj lub npe kom dawb huv. Thov cia koj lub [Nceeg Vaj] los. Thov cia muaj raws li koj lub siab nyiam rau hauv ntiajteb ib yam li muaj saum ntuj ceeb tsheej.” (Mathai 6:9, 10) Peb yeej tos ntsoov lub sijhawm uas yuav muaj tiav raws li cov lus no. Thaum ntawd, lub Nceeg Vaj yuav coj koob hmoov laub lug los rau txhua leej txhua tus!

17. Yexus txojkev kav txawv ntawm tibneeg txoj li cas?

¹⁷ Yexus txojkev kav tsis thooj li neeg txoj. Tibneeg txojkev kav tsuas tsim kev tsov kev rog, ua rau tsheej plhom leej raug ploj raug tuag xwb. Tiamsis peb tus Vajntxwv Yexus hlub peb kawg li. Nws hlub peb ib yam li Vajtswv hlub peb ntag. (Qhia Tshwm 7:10, 16, 17) Yexus hais tias: “Txhua tus uas ua haujlwm khwv thiab ris lub nra hnyav, cia li los cuag kuv, kuv yuav pub nej tau so los siav. Cia li muab kuv rab quab los kwv thiab kawm ntawm kuv, rau qhov kuv siab mos siab muag tsis muab hlob, mas nej lub siab thiaj tau so. Rau qhov kuv rab quab kuj yoojyim kwv, thiab kuv lub nra kuj sib.” (Mathai 11:28-30) Nws hlub peb kawg nkaus li, nws thiaj cog lus li no!

18. (1) Txij xyoo 1914 los tau muaj li cas lawm? (2) Peb yuav kawm txog dabtsi rau zaj tom ntej?

¹⁸ Phau Vajlugkub qhia tias txij xyoo 1914 los Vajtswv lub Nceeg Vaj twb pib kav saum ntuj lawm. Txij thaum ntawd los Vajtswv sau cov xaiv tseg uas tseem nyob hauv ntiajteb no, los rau hauv nws lub koom haum. Vajtswv kuj sau ib “pab neeg coob coob” los thiab. Cov xaiv tseg yuav kav saum ntuj nrog Yexus. Pab neeg coob coob yuav dim hnub kawg, mus nyob hauv lub qab ntuj tshiab. (Qhia Tshwm 7:9, 13, 14) Pab neeg coob coob ntawd, coob npaum li cas lawd? Vajtswv xav kom lawv coj li cas xwb? Zaj tom ntej yuav teb cov lus nug no.