1. Inki kele kikalulu ya ntete ya Nzambi, mpi kuzaba yo ke pusa nge na kutadila yandi nki mutindu?

BIBLIA ke tuba nde “Nzambi kele zola.” (1 Yoane 4:8) Kansi, bangogo yai ke tendula nki kibeni? Zola kele ve kaka mosi na kati ya bikalulu ya kitoko ya Nzambi. Yo kele kikalulu na yandi ya ntete. Yandi kele ti zola kaka ve, kansi yandi mosi kele zola. Zola ke twadisaka mambu yonso yina yandi ke salaka. Beto ke tonda Yehowa mingi na mutindu zola pusaka yandi na kuganga luyalanganu mpi bima yonso yina ke zingaka!

2. Inki kivuvu zola ya Nzambi ke pesaka beto? (Tala kifwanisu yina kele na luyantiku ya disolo.)

² Yehowa ke zolaka mingi bima yina yandi me gangaka. Zola na yandi sambu na beto ke ndimisaka beto nde yandi ta lungisa lukanu na yandi sambu na bantu na mutindu ya kuluta mbote. Ebuna, bantu yina ke lemfukilaka yandi ta zinga na ngemba ya kieleka. Mu mbandu, zola ya Yehowa me pusaka yandi na ‘kutula kilumbu yina yandi ta sambisa ntoto ya mvimba na lunungu, na nzila ya muntu yina yandi me tulaka,’ disongidila Yezu Kristu. (Bisalu 17:31) Beto ke ndima nde lusambisu yai ta salama. Sambu  na bantu ya bulemfu, lusambisu yai ta tendula luzingu ya kitoko mpi ya mvula na mvula na bilumbu ke kwisa.

3. Luzingu zolaka kuvanda nki mutindu kana Nzambi vandaka ve ti zola ya bantu?

³ Luzingu ya bantu na bilumbu ke kwisa zolaka kuvanda nki mutindu kana zola vandaka ve kikalulu ya ntete ya Nzambi? Bantu zolaka kulanda kuyala bankaka mpi kubikala na nsi ya bupusi ya Satana, nzambi ya kukonda zola yina ke mengaka bantu. (2 Bakorinto 4:4; 1 Yoane 5:19; tanga Kusonga 12:9, 12.) Kana Yehowa vandaka ve ti zola ya bantu, luzingu na bilumbu ke kwisa zolaka kuvanda mbi kibeni!

4. Sambu na nki Yehowa pesaka nzila nde Satana kutelamina luyalu na yandi?

⁴ Ntangu Satana telaminaka luyalu ya Nzambi, yandi pusaka mpi bibuti na beto ya ntete na kukolama na Nzambi. Yandi tulaka ntembe na nswa ya Nzambi ya kuvanda Mfumu ya Luyalanganu. Satana monisaka nde luyalu na yandi ta vanda mbote kuluta ya Nzambi. (Kuyantika 3:1-5) Na mayele yonso, Yehowa me bikilaka Satana ntangu ya nkufi sambu Satana kumonisa kana yandi lenda yala bantu mbote. Kansi, disolo ya luzingu ya bantu ke monisa nde bantu to Satana lenda yala ve na mutindu ya mbote.

5. Inki kieleka disolo ya luzingu ya bantu me monisaka pwelele?

⁵ Bubu yai mambu ya nsi-ntoto ke kuma kaka mbi kuluta. Bantu kuluta bamilio 100 me fwaka na bamvita yina bo me nwana na bamvula 100 yai ya me katuka kuluta. Biblia ke tuba sambu na “bilumbu ya nsuka” nde: “Bantu ya mbi mpi bantu ya luvunu ta salaka diaka mbi kuluta.” (2 Timoteo 3:1, 13) Biblia ke tuba diaka nde: “O Yehowa, mono me zaba mbote nde nzila ya muntu kele ve ya yandi. Muntu yina ke tambula kele ve ti kiyeka ya kutwadisa kitambi na yandi mosi.” (Yeremia 10:23) Disolo ya luzingu ya bantu me monisaka kieleka ya bangogo yai. Yehowa gangaka ve bantu ti mayele to nswa ya kudiyala kukonda lutwadisu na yandi.

6. Sambu na nki Nzambi me pesaka nzila nde mambu ya mbi kusalama?

⁶ Sambu Yehowa me pesaka nzila nde mambu ya mbi kusalama na nsungi mosi buna, yo me sadisaka bantu na kubakisa nde yandi mpamba me fwana na kuyala bantu na mutindu ya mbote. Na bilumbu ke kwisa, Nzambi ta fwa bantu yonso ya mbi. Na nima, kana muntu mosi kutula diaka ntembe na luyalu ya zola ya Nzambi, Nzambi ta sungika diambu yango kukonda kusukinina. Yandi lenda sadila disolo ya luzingu ya bantu sambu na kumonisa nde bantu yina ta kolama fwete fwa nswalu. Yandi ta pesa diaka ve nzila nde mambi kusalama.

7, 8. Inki mutindu Yehowa me monisaka zola na yandi?

⁷ Yehowa me monisaka zola na yandi ya mingi na mitindu ya kuswaswana. Yindula nene mpi kitoko ya luyalanganu. Yo kele ti bamiliare ya bagalaksi mpi konso galaksi kele ti bamiliare ya bambwetete mpi baplanete. Ntangu kele mosi na kati ya bambwetete ya galaksi na beto (Voie lactée). Kana ntangu  vandaka ve, luzingu zolaka ve kuvanda na ntoto. Bima yai yonso ya Yehowa me gangaka ke monisa nde yandi kele Ngangi, mpi yo ke monisa bikalulu na yandi, mu mbandu, ngolo, mayele mpi zola. Ya kieleka, “bikalulu [ya Nzambi] ya ke monikaka ve ke monanaka pwelele tuka lugangu ya nsi-ntoto, sambu yo ke monanaka na bima yina yandi salaka, disongidila ngolo na yandi ya kukonda nsuka mpi Kinzambi na yandi.”​—Baroma 1:20.

⁸ Yehowa salaka ntoto sambu bigangwa na yandi yina ke zingaka kuvanda na kati. Yandi gangaka bima yonso yina kele na ntoto sambu na mambote ya bantu mpi bambisi. Nzambi salaka kilanga ya kitoko sambu bantu kuzinga na kati mpi yandi pesaka bo mabanza mpi nitu ya kukuka sambu bo zinga mvula na mvula. (Tanga Kusonga 4:11.) Diaka, “yandi ke pesaka madia na bima yonso ya kele na moyo, sambu zola na yandi ya kwikama ke zingaka kimakulu.”​—Nkunga 136:25.

9. Ata Yehowa kele Nzambi ya zola, inki yandi ke mengaka?

⁹ Yehowa kele Nzambi ya zola, kansi yandi ke mengaka bantu yina ke salaka mambu ya mbi. Mu mbandu, Nkunga 5:4-6 ke tuba sambu na Yehowa nde: “Nge kele ve Nzambi yina ke waka kiese na mambu ya mbi . . . Nge ke mengaka bantu yonso yina ke salaka mambu ya mbi.” Yehowa ke mengaka mpi “muntu ya mubulu mpi ya ke kusaka.”

10, 11. (a) Inki ta kumina bantu ya mbi? (b) Inki lufutu Yehowa ta pesa bantu ya bulemfu?

¹⁰ Na ntangu ya me fwana, Yehowa ta katula mambi yonso na luyalanganu ya mvimba sambu yandi kele Nzambi ya zola mpi Nzambi yina ke mengaka mambi. Ndinga ya Nzambi ke sila nde: “Bo ta fwa bantu ya mbi, kansi bantu yina ke tulaka kivuvu na Yehowa ta baka ntoto. Kubika kaka fioti, mpi bantu ya mbi ta vanda diaka ve.” Bambeni ya Yehowa “ta vila bonso midinga.”​—Nkunga 37:9, 10, 20.

¹¹ Ndinga ya Nzambi ke sila mpi nde: “Bantu ya lunungu ta baka ntoto, mpi bo ta zinga kimakulu na zulu na yo.” (Nkunga 37:29) Bantu ya kwikama “ta wa kiese mingi kibeni” mpi ta zinga “na ngemba ya mingi.” (Nkunga 37:11) Sambu na nki? Sambu ntangu yonso Nzambi ya zola ke sadilaka bansadi na yandi mambu ya mbote. Biblia ke tuba nde: “Yandi ta kusula mansanga yonso na meso na bo, lufwa ta vandaka diaka ve; mawa, bidilu, mpi mpasi ta vandaka diaka ve. Mambu ya ntama me vila.” (Kusonga 21:4) Bantu ya bulemfu yina ke monisaka ntonda sambu na zola ya Nzambi ta vanda ti luzingu ya kiese na bilumbu ke kwisa!

12. Nani beto lenda binga “muntu ya kukonda kifu”?

¹² Biblia ke tuba nde: “Tala muntu ya kukonda kifu, mpi landa kutala muntu ya mbote, sambu makwisa ya muntu yina ta vanda ya ngemba. Kansi bo ta fwa bantu yonso ya ke fwaka nsiku; bo ta fwa bantu ya mbi.” (Nkunga 37:37, 38) “Muntu ya kukonda kifu” ke zabaka Yehowa mpi Mwana na yandi mpi yandi ke salaka luzolo ya Nzambi na bulemfu yonso. (Tanga Yoane 17:3.) Yandi ke ndimaka na ntima ya mvimba nde “nsi-ntoto ke luta, nzala na yo mpi ke luta, kansi muntu yina ke salaka luzolo ya Nzambi ke bikalaka  kimakulu.” (1 Yoane 2:17) Sambu nsuka ya ngidika yai me finama, beto fwete “tula kivuvu na Yehowa mpi [kulanda] nzila na yandi” kukonda kusukinina.​—Nkunga 37:34.

13. Inki kele nzikisa ya kuluta nene ya zola ya Nzambi?

¹³ Beto lenda lemfukila Nzambi ata beto kele bantu ya kukonda kukuka. Beto lenda vanda mpi ti bangwisana ya mbote ti Yehowa na nsadisa ya nkudulu ya Yezu, yina kele nzikisa ya kuluta nene ya zola ya Nzambi. Yehowa pesaka nkudulu sambu bantu ya bulemfu kukatuka na kimpika ya disumu mpi ya lufwa. (Tanga Baroma 5:12; 6:23.) Na zulu, na nsungi ya bamvula mingi Yezu bikalaka ya kwikama na Nzambi, yo yina Yehowa ndimaka nde Mwana na yandi ta bikala mpi ya kwikama ntangu yandi ta kwisa awa na ntoto. Yehowa, tata ya zola, waka mpasi mingi na mutindu bantu vandaka kuniokula Mwana na yandi. Kansi, Yezu nwaninaka na kwikama yonso nswa ya Nzambi ya kuyala mpi yandi monisaka nde muntu ya kukuka lenda bikala ya kwikama na Nzambi ata yandi me kutana ti mambu ya kuluta mpasi.

14, 15. Inki mambote lufwa ya Yezu me natilaka bantu?

¹⁴ Ata Yezu kutanaka ti mambu ya kuluta mpasi, yandi bikalaka ya kwikama mpi yandi nwaninaka nswa ya Yehowa ya kuyala. Beto fwete tonda Yezu sambu na nzila ya lufwa na yandi, yandi futaka nkudulu sambu bantu kubaka dibaku ya kuzinga mvula na mvula na ntoto ya mpa ya Nzambi! Ntumwa Polo tendulaka zola yina Yehowa mpi Yezu monisaka na mutindu bo futaka nkudulu. Polo tubaka nde: “Ntangu beto vandaka ntete ngolo ve, Kristu fwaka sambu na bantu yina ke vwezaka Nzambi, na ntangu ya bo me tulaka. Yo kele mpasi nde muntu kundima kufwa sambu na muntu mosi ya lunungu; ata mbala ya nkaka muntu lenda ndima kufwa sambu na muntu mosi ya mbote. Kansi Nzambi ke monisa zola na yandi sambu na beto na mutindu yai: Ntangu beto vandaka ntete bansumuki, Kristu fwaka sambu na beto.” (Baroma 5:6-8) Ntumwa Yoane sonikaka nde: “Yina mutindu zola ya Nzambi monanaka sambu na beto,  nde Nzambi tindaka Mwana na yandi mosi kaka ya kubutuka na nsi-ntoto sambu beto baka luzingu na nzila na yandi. Zola yina kele mutindu yai: yo kele ve nde beto me zolaka Nzambi, kansi nde yandi muntu zolaka beto mpi yandi tindaka Mwana na yandi bonso kimenga ya kuwakanisa beto ti yandi sambu na masumu na beto.”​—1 Yoane 4:9, 10.

¹⁵ Yezu tubaka nde “Nzambi zolaka nsi-ntoto mingi kibeni yo yina yandi pesaka Mwana na yandi mosi kaka ya kubutuka, sambu konso muntu yina ke monisa lukwikilu na Mwana kufwa ve kansi kubaka luzingu ya mvula na mvula.” (Yoane 3:16) Yehowa ndimaka kupesa luzingu ya mwana na yandi bonso nkudulu, ata diambu yango pesaka yandi mpasi mingi. Yo ke monisa kibeni zola ya mingi ya Yehowa sambu na bantu, mpi zola yango ta manaka ve. Polo sonikaka nde: “Mono ke ndima nde yo vanda lufwa to luzingu to bawanzio to baluyalu to bima ya ntangu yai to bima yina ta kwisa to bangolo to bima yina kele na zulu to bima yina kele na nsi to konso kima ya nkaka yina Nzambi salaka, ata kima mosi ve ta kuka kukabula beto na zola ya Nzambi yina kele na Mfumu na beto Kristu Yezu.”​—Baroma 8:38, 39.

16. Kimfumu ya Mesia kele nki, mpi nani Yehowa me ponaka na kuvanda Ntotila?

¹⁶ Kimfumu ya Mesia, yina kele Luyalu ya Nzambi, kele nzikisa ya nkaka ya zola yina Nzambi ke monisilaka bantu. Yo kele mutindu yina sambu Yehowa me ponaka dezia Ntotila, Yezu Kristu, yina ke zolaka bantu mpi me fwana na kuyala bo. (Bingana 8:31) Nzambi me ponaka mpi bantu 144 000 yina ta yala ti Yezu na zulu. Na nima ya lufutumuku ya bantu yai, bo ke yibukaka mambu ya luzingu ya bantu. (Kusonga 14:1) Ntangu Yezu vandaka na ntoto, Kimfumu vandaka ntu-diambu ya ntete ya malongi na yandi, mpi yandi longaka balongoki na yandi na kusamba nde: “Tata na beto yina kele na zulu, zina na nge kuvanda ya santu. Kimfumu na nge kukwisa. Luzolo na nge kusalama na ntoto, bonso na zulu.” (Matayo 6:9, 10) Beto ke vingila kulungana ya kisambu yai na kiese yonso, disongidila, ntangu Kimfumu ya Nzambi ta natila bantu balusakumunu mingi!

17. Inki luswaswanu kele na kati ya luyalu ya Yezu ti baluyalu ya bantu?

¹⁷ Luyalu ya zola ya Yezu me swaswana mingi ti luyalu ya bantu. Luyalu ya bantu me basisaka bamvita yina me fwaka bamilio ya bantu. Kansi, Ntotila Yezu ke zolaka beto mingi mpi yandi ke fululaka bikalulu ya kitoko ya Nzambi, mingi-mingi zola. (Kusonga 7:10, 16, 17) Yezu tubaka nde: “Beno kwisa na mono, beno yonso ya ke mona mpasi mpi ya ke nata kilo ya mingi, ebuna mono ta pesa beno kikesa. Beno baka vangu na mono na mapeka na beno, mpi beno longuka na mono, sambu mono kele mawete mpi ya kudikulumusa na ntima, ebuna beno ta baka kikesa sambu na beno mosi. Sambu vangu na mono kele mpasi ve na kunata mpi kizitu na mono kele kilo ve.” (Matayo 11:28-30) Yai kele lusilu ya zola kibeni!

18. (a) Inki Yehowa ke salaka banda na 1914? (b) Inki beto ta tadila na disolo yina ke landa?

¹⁸ Biblia ke monisa nde Kimfumu ya Nzambi yantikaka kuyala na zulu na 1914. Banda mvula yina, Yehowa ke vukisaka Bakristu yina me bikalaka na ntoto yina ta yala ti Yezu na zulu mpi yandi ke vukisaka “kimvuka mosi ya nene ya bantu” yina ta guluka na nsuka ya ngidika yai sambu na kukota na nsi-ntoto ya mpa. (Kusonga 7:9, 13, 14) Bubu yai, kimvuka ya nene me yela na nki kiteso? Inki Nzambi ke lombaka bantu ya kimvuka yai? Disolo yina ke landa ta pesa bamvutu na bangiufula yai?