1. Ñanyi kyubilo kikatampe kya Lesa, kabiji kuyuka bino kwimulengela kumvwa byepi?

BAIBOLO witubuula’mba “Lesa butemwe.” (1 Yoano 4:8) Kino kilumbulula ka? Yehoba uji na byubilo byawama byavula. Bino butemwe kyo kyubilo kyanji kikatampe. Kechi ujitu na butemwe ne. Bino aye mwine ye butemwe. Butemwe bo bulengela’mba obe bintu byonse byo oba. Tusanta bingi na mambo a kuba butemwe bo bwalengejile Yehoba kulenga jiulu ne ntanda ne bilengwa byumi byonse!

2. Ñanyi luketekelo lo tuji nalo na mambo a butemwe bwa Lesa? (Monai kipikichala kitanshi.)

² Yehoba ubila lusa bilengwa byanji kabiji wibitemwa. Butemwe bo etutemwa bwitulengela kuketekela’mba ukobila bantu kyaswa muchima wanji mu jishinda jawama. Kino kikalengela aba bamukookela kwikala na lusekelo lukatampe. Kya kumwenako, na mambo a butemwe, Yehova “watongola juba jo akebachibilamo mambo ba pano pa ntanda mu bololoke kupichila mu muntu ye atongola,” aye Yesu Kilishitu. (Byubilo 17:31) Twaketekela kuba’mba buno bunchibamambo bukobiwa. Bantu ba lukookelo  bakekala bwikalo bwawama myaka ne myaka.

3. Bwikalo inge bwajinga byepi inge kya kuba Lesa kechi watemenwe bantu ne?

³ Bwikalo bwa bantu bwa kulutwe inge bwajinga byepi inge kya kuba butemwe kechi bwajinga kyubilo kikatampe kya Lesa ne? Bantu inge batwajijile kulama bakwabo ne kutangijilwa na lesa wakanama, aye Satana. (2 Kolinda 4:4; 1 Yoano 5:19; tangai Lumwekesho 12:9, 12.) Bwikalo bwa kulutwe inge bwatamine inge kya kuba Yehoba kechi witutemenwe ne!

4. Mambo ka Yehoba o aswishishe bansatuki kulama pa kimye kicheche?

⁴ Satana byo asatukijile bukalama bwa Lesa, walengejile ne bansemi betu batanshi kusatuka. Wazhinaukile luusa lwa Lesa lwa kwikala Mfumu wa Bilengwa Byonse. Satana waambile’mba bukalama bwanji bukawama kukila bwa Lesa. (Ntendekelo 3:1-5) Yehoba waswishishe Satana kulama pa kimye kicheche kumona inge byo aambile bya kine. Pano bino, byafumamo bimwesha’mba bantu nangwa Satana kechi bakonsha kwikala bakalama bawama ne.

5. Byamweka mu bwikalo bwa bantu kufumatu ne kala byamweshapo amba ka?

⁵ Lelo jino ntanda ibena kutaminakotu. Bantu kukila pa mamilyonyi 100 bebepaya mu makondo pa myaka 100 yapitapo. Baibolo waamba pa “moba a kupelako” amba: “Bantu babi ne ba bujimbijimbi bakataminangakotu.” (2 Timoti 3:1, 13) Kabiji Baibolo waamba ne kuba’mba: “Anweba Yehoba, amiwa nayukishatu bulongo namba muntu na maana anji mwine kechi wakonsha kusala jishinda jawama kuyamo ne. Muntu mwine kechi uji na luusa lwa kwitangijila mu jishinda jo afwainwa kuyamo ne.” (Yelemiya 10:23) Byamweka mu bwikalo bwa bantu kufumatu ne kala byamwesha’mba bino byambo bya kine. Yehoba kechi walengele bantu na bulume nangwa na luusa lwa kwilama abo bene kwa kubula lutangijilo lwanji ne.

6. Mambo ka Lesa o aswishisha bubi?

⁶ Byo aswisha bubi kutwajijila pa ka kimye kacheche, Yehoba wamwesha’mba ye yenkatu wafwainwa kulama bantu bulongo. Kulutwe na lwendo, Lesa ukonauna babi bonse. Panyuma ya kino, inge muntu akazhinauke bukalama bwanji, Lesa ukengijilapo ponkapotu. Byamweka mu bwikalo bwa bantu byo bikamulengela konauna bukiji bansatuki ba uno mutundu. Kechi ukaswisha bubi kwikalako jibiji ne.

7, 8. Yehoba wamwesha byepi butemwe bwanji?

⁷ Yehoba wamwesha butemwe bwanji mu mashinda apusana pusana. Akilangulukai pa kubaya ne buya bwa jiulu ne ntanda. Muji myala ya nshansha yavula bingi, kabiji mu ino myala ya nshansha yonse muji tubangabanga twavula bingi ne mapulaneti. Mu mwala wa nshansha umo ye batela’mba Milky Way, mo muji ne kabangabanga kamo katelwa amba juba. Kwa kubula juba, pano pa ntanda kechi pakonsha kwikala bilengwa byumi ne.  Abye bilengwa byonse bishiina’mba Yehoba ye Mulenga wetu, kabiji bimwesha byubilo byanji nabiji bulume, maana ne butemwe. Kine, “byubilo” bya Lesa “bibula kumweka byamweka patoka kufumatu kimye kyo alengele ntanda, mambo bimwekela mu bintu byo alenga, ko kuba’mba bulume bwanji bwa myaka ne kuba’mba ye Lesa.”—Loma 1:20.

⁸ Yehoba walengele ntanda kuba’mba mwikalenga bilengwa byumi. Bintu byonse biji mu ntanda bilengela banyama ne bantu kumwenamo. Lesa wajimine bujimi bwawama mwa kwikala bantu ne kwibapa milanguluko ne mibiji yalumbuluka kuba’mba bakekalenga myaka ne myaka. (Tangai Lumwekesho 4:11.) Kabiji “upana kajo ku bilengwa byonse byumi, mambo butemwe bwanji bubula kwaluka bo bwa myaka ne myaka.”—Salamo 136:25.

9. Nangwa kya kuba Yehoba ke Lesa wa butemwe, ñanyi bintu byo ashikwa?

⁹ Yehoba ye Lesa wa butemwe, pano bino, washikwa byatama. Kya kumwenako, Salamo 5:4-6 waamba pe Yehoba amba: “Anweba kechi mwi Lesa usekela mu bubi ne . . . Mwashikwa bantu bonse boba bubi.” Kabiji washikwa ne “bambanzhi ne bajimbijimbi.”

10, 11. (a) Ki ka kikamwekela bantu babi? (b) Yehoba ukafweta byepi bantu ba lukookelo?

¹⁰ Pa kimye kyafwainwa, Yehoba ukafumyapo bubi pano pa ntanda ponse mambo ke Lesa wa butemwe kabiji washikwa byatama. Mambo a Lesa alaya’mba: “Bantu babi bakebonauna, bino aba baketekela mwi Yehoba bakaswana ntanda. Kwashalatu pacheche, babi kechi bakekalako ne.” Balwanyi ba Yehoba “bakazhimañanatu nobe bwishi.”—Salamo 37:9, 10, 20.

¹¹ Kabiji Mambo a Lesa alaya’mba: “Baoloka bakaswana ntanda, kabiji bakekalangamo myaka ne myaka.” (Salamo 37:29) Bantu ba kishinka “bakasangalelanga mu kuvula kwa mutende.” (Salamo 37:11) Mambo ka? Mambo Lesa wetu wa butemwe kimye kyonse ubila bakalume banji byawama. Baibolo witubuula’mba: “Ukashimuna mipolo yonse ku meso abo, ne lufu, mabingo, kujila ne misongo kechi bikekalako jibiji ne. Bintu bya kala byapichijila.” (Lumwekesho 21:4) Buno bukekala ke bwikalo bwawama bingi ku bantu ba lukookelo bayuka butemwe bwa Lesa.

12. Muntu “wabula kaneneno” ye ñanyi?

¹² Baibolo witubuula’mba: “Tai muchima muntu wabula kaneneno, ne kutalanga pa muntu waoloka, mambo bwikalo bwanji bwa kulutwe bukekala bwa mutende. Bino bantu bonse ba mizhilulwila bakebonauna; babi bakebepaya.” (Salamo 37:37, 38) “Muntu wabula kaneneno” wayuka Yehoba ne Mwananji kabiji ukookela ne kuba kyaswa muchima wa Lesa. (Tangai Yoano 17:3.) Waketekela’mba “pano pa ntanda pabena kupita ne bya kusakasaka bijipo, pakuba awa uba kyaswa muchima wa Lesa ukekala myaka ne myaka.” (1 Yoano 2:17) Na mambo a kuba mpelo ya  ino ntanda iji pepi, twafwainwa kupelawizha ‘kuketekela mwi Yehoba ne kulondela jishinda janji.’—Salamo 37:34.

13. Ñanyi jishinda jikatampe Lesa jo amwesheshamo butemwe bwanji?

¹³ Nangwa kya kuba twi bambulwa kulumbuluka, twakonsha kukookela Lesa. Kabiji twakonsha kwikala balunda na Yehoba na mambo a kitapisho kya bukuzhi bwa kwa Yesu, jishinda jikatampe Lesa jo amwesheshamo butemwe bwanji. Yehoba wapaine bukuzhi pa kuba’mba bantu ba lukookelo bekale na jishuko ja kukasululwa ku bundengamambo ne lufu. (Tangai Loma 5:12; 6:23.) Yesu wajinga wa kishinka kwi Lesa pa myaka yavula mwiulu, onkao mambo, Yehoba waketekejile’mba Mwananji ukekala wa kishinka pa ntanda. Byo aji Shetu wa butemwe, Yehoba kyamukolele bingi pa kumona bantu byo bamanyikile Mwananji. Pano bino, Yesu watundaikile luusa lwa bukalama bwa Lesa mu bukishinka ne kumwesha’mba muntu walumbuluka wakonsha kwikala wa kishinka kwi Lesa nangwatu mu bimye byakatazha.

14, 15. Lufu lwa kwa Yesu lwalengela bantu kumwenamo ka?

¹⁴ Nangwa kya kuba wapichile mu meseko akatazha, Yesu watwajijile kwikala wa kishinka ne kutundaika luusa lwa Yehoba lwa bukalama. Twafwainwa kumusanchila bingi mambo kupichila mu lufu lwanji, Yesu wapaine bukuzhi bwalengela bantu kwikala na jishuko ja kwikala myaka ne myaka mu ntanda ipya ya Lesa. Mutumwa Paulo walumbulwile butemwe bwamwesheshe Yehoba ne Yesu kupichila mu bukuzhi. Waambile’mba: “Byo twakijinga babula kukosa, Kilishitu wafwijile bantu babula kwakamwa Lesa pa kimye kyatongwelwe. Mambo kechi kyapela muntu kufwila waoloka ne; pakuba muntu wawama, kampe umo wakonsha kwipana kumufwila. Bino Lesa witumwesha butemwe bwanji, mambo byo twakijinga bandengamambo, Kilishitu witufwijile.” (Loma 5:6-8) Mutumwa Yoano wanembele’mba: “Monka muno mo mwamwekela butemwe bwa Lesa kwi atweba,  kuba’mba Lesa watumine Mwananji yenkawa umotu pano pa ntanda pa kuba’mba tukekale na bumi kupichila mwi aye. Buno butemwe kechi bulumbulula’mba atweba yetu twamutemenwe Lesa ne, bino aye ye witutemenwe ne kutuma Mwananji kwikala kitapisho kya mambo etu kuba’mba tupwane ne Lesa.”—1 Yoano 4:9, 10.

¹⁵ Yesu waambile’mba: “Lesa watemenwe bingi ba pano pa ntanda kya kuba wapaine Mwananji yenkawa umotu, kuba’mba bonse bamwitabila kechi bakonaike ne, poso bakekale na bumi bwa myaka ne myaka.” (Yoano 3:16) Nangwa kya kuba Yehoba kyamukolele bingi, wapaine Mwananji kwikala ke bukuzhi. Kino kimwesha byo atemwa bantu. Kabiji buno butemwe bwa myaka ne myaka. Paulo wanembele’mba: “Nashiinwa kuba’mba lufu nangwa bumi nangwa bamalaika nangwa makafulumende nangwa bintu bijipo luno nangwa bintu bikeya nangwa bintu biji na bulume, nangwa bula bwa mwiulu nangwa bwa panshi nangwatu kilengwa kikwabo, kechi byakonsha kwitwabanya na butemwe bwa Lesa buji mwi Kilishitu Yesu Nkambo yetu ne.”—Loma 8:38, 39.

16. Bufumu bwa Bumesiasa bo bu ka, kabiji ñanyi Yehoba ye atongola kwikala Kalama?

¹⁶ Kafulumende wa Lesa, ko kuba’mba Bufumu bwa Bumesiasa, ke kishiino kikwabo kimwesha’mba Yehoba watemwa bantu. Mu ñanyi jishinda? Yehoba watongola kala Kalama watemwa bantu kabiji wafikilamo kulama, aye Yesu Kilishitu. (Byambo bya Maana 8:31) Lesa wasala bantu 144,000 ba kulama ne Kilishitu mwiulu. Inge bebasangula, kechi balubamo byo kilumbulula kwikala muntu ne. (Lumwekesho 14:1) Yesu byo ajinga pano pa ntanda, Bufumu bo bwajinga mutwe mukatampe ye asapwilangapo, kabiji wafunjishe baana banji ba bwanga kulomba’mba: “Tata wetu wa mwiulu, jizhina jenu jizhile. Bufumu bwenu bwiye. Kyaswa muchima wenu kyubiwe pano pa ntanda, byonka byo kibena kubiwa mwiulu.” (Mateo 6:9, 10) Tutengela kufika kwa milombelo ya uno mutundu, kimye Bufumu bwa Lesa kyo bukaletela bantu mapesho avula!

17. Lumbululai mwapusena bukalama bwa kwa Yesu ne bwa bantu.

¹⁷ Paji lupusano lukatampe pa bukalama bwa kwa Yesu bwa butemwe ne bukalama bwa bantu. Bukalama bwa bantu bwaleta makondo aipaya bantu bavula bingi. Pakuba Kalama wetu aye Yesu, witutemwa bingi kabiji ulondela byubilo byawama bya Lesa, kikatakata butemwe. (Lumwekesho 7:10, 16, 17) Yesu waambile’mba: “Iyai ko nji, anweba bonse bakooka ne kunemenwa, ne amiwa nkemukokolosha. Sendai kikonkoji kyami ne kufunda kwi amiwa, mambo nekimote kabiji nakooka muchima, ne anweba mukakokoloka. Mambo kikonkoji kyami kyapeela, ne kipe kyami kyapeela.” (Mateo 11:28-30) Uno ke mulaye wawama wa butemwe!

18. (a) Ñanyi bintu byaubiwa kutendeka mu 1914? (b) Ñanyi bintu byo tukesambapo mu mutwe walondelapo?

¹⁸ Baibolo umwesha’mba Bufumu bwa Lesa bwatendekele kulama mwiulu mu 1914. Kufuma kyokya kimye, mwingilo watendekele wa kukonkanya bashalapo mu boba bakalama ne Yesu mwiulu, kubikapotu ne kukonkanya “jibumba jikatampe” ja bantu bakapuluka mpelo ya buno bwikalo ne kutwela mu ntanda ipya. (Lumwekesho 7:9, 13, 14) Jibumba jikatampe jabaya byepi lelo jino? Lesa ukeba’mba bantu baji mu jino jibumba bobenga ka? Mutwe walondelapo ukakumbula ano mepuzho.