1. Sikara musinke saKarunga sosinene po, ntani ngapi asi tu ninkisa tu lizuvhe kumuhamena?

BIBELI kututantera asi “Karunga yige eharo.” (1 Johanesa 4:8) Yisinke ayi tanta eyi? Eharo kapisi simwe tupu soyikara yoyinzi yoyiwa yaJehova. Aso sikara sendi sosinene po. Age kapi tupu ga kara neharo. Age yige eharo. Eharo kumupitisira mwanayinye eyi a rugana. Ee, rupandu musi twa kara naro asi eharo yilyo lya tumangedere Jehova a site uzuni noyinamwenyo nayinye!

2. Ehuguvaro musinke ali tu pe eharo lyaKarunga? (Tara efano.)

² Jehova ga hara yisitwa yendi ntani kuyifira sinka. Eharo lyendi kwetu kutupa ehuguvaro asi sitambo sendi kovantu ngasi ka sika mo monkedi zongwa po. Eyi ngayi ka retera ruhafo ava ava mu limburukwa. Pasihonena, morwa eharo, Jehova “ga tokora ezuva eli nga pangwisisa uzuni mouhungami koMugara ogu ga horowora,” Jesus Kristusa. (Yirugana 17:31) Ose twa yi pura asi mpanguro ezi ngazi horoka sili. Kovantu wovalimburukwi,  ezi ngazi kara meho zongwa ezi ngazi karerera dogoro narunye.

3. Ngano Karunga kapi ga tu hara, ngapi ngano ngazi fana meho zovantu?

³ Ngapi ngano ngazi kara meho zovantu, ngano eharo kapi lya kere sikara saKarunga sosinene po? Vantu ngano ngorooro ngava lipangera vene ntani nokuvapukisa mupangeli gonyanya, Satana. (2 Vakolinte 4:4; 1 Johanesa 5:19; Resa Ehororo 12:9, 12.) Ngano Jehova kapi ga tu here, ngano meho ngazi donapa unene.

4. Morwasinke Jehova ga pulisilire murwanesi a pangere?

⁴ Apa Satana ga rwanesere upangeli waKarunga, age kwa pukisire vakurona vetu wokuhova va rwanese Karunga. Age kwa rwanesere uhunga waKarunga wokupangera uzuni mudima. Satana kwa tente asi upangeli wendi ngau wapa kupita waKarunga. (Genesis 3:1-5) Jehova yipo ga pulisilire Satana a pangere siruwogona mokulikida eyi ga uyungire. Nye yitundwamo ya lilikida asi Satana novantu, nokuvhura si kukara vapangeli wovawa.

5. Yisinke lya likida ehistoli lyovantu?

⁵ Ngesi uzuni kuna kudonapa unene. Vantu wokupitakana pomamiliyona 100 kwa va dipaga moyita monomvhura 100 da ka pita. Bibeli kuuyunga kuhamena “mazuva gopouhura” asi: “Vadinikarunga novakumbageli, udona wawo ngau vhuka.” (2 Timoteusa 3:1, 13) Azo kuuyunga hena asi: “HOMPA, ame na diva asi nzira zovantu kapi za kara mepangero lyamwene. Kutupu ogu a pangere kukara mwenyo kwamwene.” (Jeremiya 10:23) Ehistoli kwa likida usili wononkango odo. Jehova kapi ga sita vantu va lipangere vene pwa hana mavyukiso gokutunda kwendi.

6. Morwasinke Karunga ga pulisilira udona u twikire siruwo songandi?

⁶ Morwa kupulisira udona u twikire siruwo songandi, Jehova ga likida asi upangeli wendi welike wokuvhura kutompoka. Komeho, Karunga nga ka zonagura po vadinikarunga navenye. Ano konyima zoyo, nkenye ogu nga hetekera ko kurwanesa uhunga waKarunga wokupangera ngava mu zonagura po poopo. Age kuvhura nga ka ruganese ehistoli lyovantu ngoumbangi mokuzonagura po varwanesi vangoso. Ntani udona kapi ngau ka kara po hena.

7, 8. Ngapi Jehova ga likida eharo lyendi?

⁷ Jehova kwa likida eharo lyendi lyenene mononkedi dononzi. Gazara kuhamena unene nouwa wouzuni wetu. Pwa kara mabiliyona gonomuraravili, ntani nkenye muraravili kwa kara nonombungururu mabiliyona. Ntani pwa kara ezuva. Pwa hana ezuva eparu kapi tali vhuru kukara po pevhu. Unsitwe naunye ou kulikida asi Jehova yige Musiti gwetu, ntani kulikida yikara yendi ngwendi nonkondo, unongo ntani eharo. Ayo usili kuhamena Karunga asi “nkareso  zendi ezi azi dili kumoneka, nononkondo dendi danarunye noukarunga wendi, ha wa twa uzuni kuyimonena moyirugana yendi.”—Varoma 1:20.

⁸ Jehova kwa sitire evhu yipo yinamwenyo yi parukire po. Vantu noyikorama kugwanena mo uwa mwanayinye eyi ya kara pevhu. Karunga kwa rugene sikunino sosiwa si kare embo lyovantu nokuvapa nondunge ntani nomarutu gokusikilira mo yipo va paruke narunye. (Resa Ehororo 4:11.) Ntani age “kugava nondya kovantu noyikorama nayinye, yeeyi nkenda zendi zanarunye.”—Episarome 136:25.

9. Yisinke ga nyenga Jehova nampili ngomu ga kara Karunga geharo?

⁹ Jehova age Karunga geharo, nye ga nyenga udona. Pasihonena, Episarome 5:4-6 kutanta asi: “Yeeyi ove kapisi nyove Karunga ogu wa hara udinikarunga . . . ove kwa nyenga vanzoni navenye.” Age hena ga nyenga “mugara gomurudipagi goumbudi.”

10, 11. (a) Yisinke ngayi horokera vadinikarunga? (b) Ngapi Jehova nga futa vantu wovalimburukwi?

¹⁰ Jehova nga gusa po udona pevhu nalinye posiruwo souhunga morwa age Karunga geharo ntani ga nyenga udona. Nonkango daKarunga kwa tumbwidira asi: “Vadinikarunga ngava va mana po, ano ava va huguvara HOMPA ngava tunga sirongo mompora. Karuwogona tupu ko, mudinikarunga ta dongonoka po.” Nonkore daJehova “ngadi dongonoka po moomu agu dongonoka po musi.”—Episarome 37:9, 10, 20.

¹¹ Nonkango daKarunga kwa tumbwidira hena asi: “Muhungami nga gusa sirongo nga tunge mo narunye-narunye.” (Episarome 37:29) Vantu wovahungami “ngava hafera mpora zonene.” (Episarome 37:11) Morwasinke? Morwa Karunga gwetu geharo kuruganena yoyiwa vakareli vendi wovalimburukwi. Bibeli kututantera asi: “Karunga nga kokota mahodi nagenye komeho gawo. Nomfa kapi hena ngadi kara ko, neguwo si nomalirankali nokukora kapi ngayi kara ko hena, yeeyi yininke yomuhowo yina dimi po.” (Ehororo 21:4) Meho musi zongwa kovantu wovalimburukwi owo ava likida rupandu keharo lyaKarunga!

12. Yilye “muntu gomuwa”?

¹² Bibeli kututantera asi: “Konekesa muntu gomuwa, o tare muhungami; yeeyi mugara gwangoso, uhura wendi wombili. Nye vanzoni ngava dima po nu, ru kare ruvharo rwawo naro ngaru pwa po nu.” (Episarome 37:37, 38) “Muntu gomuwa” kudiva Jehova naMunwendi ntani kurugana mpango zaKarunga. (Resa Johanesa 17:3.) Age ga yi pura asi: “Uzuni ngau zonauka po kumwe nomadowo gawo nagenye, nye ogu a sikisa mo mpango zaKarunga, nga kara dogoro narunye.” (1 Johanesa 2:17) Uhura wouzuni ou pepi una kara, ano eyi yiyo twa hepera ‘kuhuguvara mwaHOMPA, nokulimburukwa konompangera dendi.’—Episarome 37:34.

13. Yisinke silikidiso sosinene po seharo lyaKarunga?

¹³ Ose kuvhura kulimburukwa Jehova nampili ngomu twa dira kusikilira mo. Kuvhura hena tu kare nelikwatakano lyewa nendi morwa nzambo zaJesus zosizoweseso, azo silikidiso sosinene po seharo lyendi. Jehova kwa geve sizoweseso yipo vantu wovalimburukwi va manguruke koupika wononzo nonomfa. (Resa Varoma 5:12; 6:23.) Jesus ga limburukwire Karunga siruwo sosire meguru, ano eyi yiyo Jehova ga huguvarere Munwendi asi nga ya mu limburukwa nepevhu. NgaGuhya geharo, Jehova ya mu guvisire pokumona omu vantu wovadona va tekwire Munwendi. Nampili ngoso, Jesus ga kwatesere ko uhunga waKarunga wokupangera ntani ga yi likidire asi muntu gokusikilira mo kuvhura kulimburukwa Karunga nampili moukaro woudigu.

14, 15. Yisinke nomfa daJesus da retera vantu?

¹⁴ Nampili momarwaneso gomanene, Jesus ga twikilire kulimburukwa ntani nokukwatesa ko upangeli waJehova. Twa hepa kulikida rupandu morwa kupitira monomfa dendi, Jesus kwa geve sizoweseso esi sa pa vantu mpito zokukaparuka narunye mouzuni waKarunga woupe! Mupositoli Paurusa kwa fatwilire eharo eli Jehova naJesus va likidire kupitira mosizoweseso. Age kwa tente asi: “Apa twa kere twa hana nonkondo, yipo ga fililire Kristusa vadinikarunga poruveze oru ga pangere Karunga. Yokufira muntu gomuhungami, yidigu komuntu. Kufira muntu gomuwa mpamwe kuvhura kukulitokwera. Nye Karunga kwa tu likida asi kwa tu hara unene mwangesi asi, apa twa kere tu vananzo, Kristusa yipo ga tu fililire.” (Varoma 5:6-8) Mupositoli Johanesa kwa tjenge asi: “Karunga omu ga tu horwera eharo lyendi, mokututumina Munwendi thi asi tu parukire mwendi.  Eharo lyeli asi, kapisi asi nyose twa here Karunga, hawe, Karunga yige ga tu hara, yiyo ga tuma Munwendi a ya kare nzambo zokugusisa po nonzo detu.”—1 Johanesa 4:9, 10.

¹⁵ Jesus kwa uyungire asi: “Yeeyi Karunga kwa here uzuni unene-nene, yiyo ga u pere Munwendi gelike a huru, asi nkenye ogu a mu pura a dire kuzonauka, nye a kare nomwenyo gwanarunye.” (Johanesa 3:16) Nampili ngomu ga lizuvhire kukora Jehova, ga geve Munwendi ngosizoweseso. Eyi kulikida eharo lyendi lyenene kovantu. Ntani eharo olyo ngali karerera narunye. Paurusa kwa tjenge asi: “Ame kwa yi diva nawa-nawa asi, nayimwe si yokutugusa mo meharo lyaKristusa: nonomfa si deedi nomwenyo si novaengeli si nomapangero si ndi nonkondo donompepo, noyininke si yantani neyi si yokomeho. Neyi si yekeguru neyi si yokonhi-nhi, nasimwe si poyisitwa nayinye esi sokutugusa mo meharo lyaKarunga eli twa kara nalyo mwaJesus Kristusa, Hompa gwetu.”—Varoma 8:38, 39.

16. Yisinke Uhompa woUmesiyasa, ntani yilye Jehova ga horowora a kare Mupangeli gwawo?

¹⁶ Epangero lyaKarunga ndi Uhompa woUmesiyasa, nawo kuna kara silikidiso seharo lyaJehova kovantu. Monkedi musinke? Jehova kwa horowora Jesus Kristusa, Mupangeli ogu ga hara vantu ntani ga wapera kupangera. (Yisewe 8:31) Ntani kwa horowora vantu 144 000 mokukapangera naKristusa meguru. Apa ava va vhumbura, awo simpe kukara nediwo lyeyi ayi tanta kukara muntu gopanyama. (Ehororo 14:1) Apa ga kere Jesus pevhu, Uhompa yiso sininke ga demenene unene kuronga vantu ntani kwa rongere varongwa vendi va kanderere asi: ‘Guhyetu gemeguru. Edina lyoge ava li pongore. Uhompa woge au wize. Mpango zoge ava zi sikise mo pevhu ngwendi meguru.’ (Mateusa 6:9, 10) Ose kuna kundindira esikiliromo lyekanderero olyo apa Uhompa waKarunga ngau ka retera vantu matungiko gomanzi!

17. Hetakanesa epangero lyaJesus neli lyovantu.

¹⁷ Pwa kara elisigo lyenene pokatji kepangero lyaJesus neli lyovantu. Epangero lyovantu kwa twaredesa koyita eyi ya dipagesa vantu wovanzi. Nye Mupangeli gwetu, Jesus, kwa tu hara unene ntani kuhonena yikara yoyiwa yaKarunga, unene po eharo lyendi. (Ehororo 7:10, 16, 17) Jesus kwa tente asi: “Wizeni kwange namuvenye, one ava wa rorora udigu, ni ya mu pwizumukise. Likambekeni ndjoko zange, mu lirongere nge po, yeeyi ame kwa gomoka, yiyo na linunupika momutjima, ngomu gwane rufuwo monomwenyo deni. Yeeyi ndjoko zange nderu, ano mudigo gwange kwa pepuka.” (Mateusa 11:28-30) Ee, etumbwidiro musi lyeharo!

18. (a) Yisinke ya horoka kutundilira mo-1914? (b) Yisinke ngatu ka zogera mosirongwa sokukwama ko?

¹⁸ Bibeli kulikida asi Uhompa waKarunga kwa tamekere kupangera meguru mo-1914. Kutunda opo, kwa horoka epongaiko lyokuhulilira lyava ngava ka pangera naJesus meguru ntani ‘lyemukurumbunga’ eli ngali ka paruka uhura wouzuni ou nokukahwilira mouzuni woupe. (Ehororo 7:9, 13, 14) Emukurumbunga lyokuhura kupi lina kara po ngesi? Yinke ana kundindira ko Karunga kwalyo? Sirongwa sokukwama ko ngasi ka zogera mapuro ogo.