1. Vilinga muka vyavilemu chikuma vize atwama navyo Kalunga, kahechi cheji kutwivwisanga ngachilihi mutu himutu?

MBIMBILIYA yatulweza ngwayo, “Kalunga ikiye zangi.” (WaYowano 1, 4:8) Uno echi chalumbununa ika? Zangi yapwa yayilemu chikuma havilinga vyamwaza vyosena vize atwama navyo Yehova. Katwama kaha nazangiko, oloze ikiye vene zangi. Kaha eji kulinganga vyuma vyosena muzangi. Chikupu vene, tweji kusakwililanga Yehova hakutenga vyuma vyosena mwomwo yazangi yenyi hali etu.

2. Kalunga atufwelelesa vyuma muka mwomwo yazangi yenyi? (Talenu muvwimbimbi wakulivanga.)

² Yehova apwa walikoji, kaha nawa eji kutetelanga vyuma atenga. Hakuwana nge atuzanga, ngocho twafwelela ngwetu mwakatesamo chikupu vyuma vyosena ajina kukatulingila. Vatu vaze veji kumwononokanga navakawahilila chikuma. Chakutalilaho, mwomwo yazangi yenyi, Yehova “nasakula lyehi likumbi lize najinyi kukasopesa vatu hamavu hosena mukwoloka, kuhichila muli lunga uze  atongola,” Yesu Kulishitu. (Vilinga 17:31) Twafwelela ngwetu kusopesa kanechi nachikapwako. Vaka-kwononoka navakayoya haya myaka yosena kulutwe.

3. Nge Kalunga katuzangileko, kachi chiyoyelo chavatu nachikapwa ngachilihi kulutwe?

³ Kachi nge Kalunga kapwile nazangiko, kachi chiyoyelo chavatu nachikapwa ngachilihi kulutwe? Kachi vatu navaliyulanga lika vavene nakuvahungumwisa kuli Satana uze apwa kalunga wamupi wakuhona zangi. (Wavaka-Kolinde 2, 4:4; WaYowano 1, 5:19; tangenu Kusoloka 12:9, 12.) Nge Yehova katuzangileko, kachi chiyoyelo chetu chakulutwe nachikapihya.

4. Mwomwo ika Yehova etavishilile Satana afumbukile chiyulo chenyi?

⁴ Omu Satana afumbukilile chiyulo chaKalunga, ahungumwishile navisemi jetu vatete valikange. Afumbukilile wata waKalunga nachiyulo chenyi chakwoloka. Satana ambile ngwenyi, chiyulo chenyi nachipwa chakwoloka kuhambakana chaKalunga. (Kuputuka 3:1-5) Yehova etavishile Satana ayule vatu hakatando kakandende kaha. Oloze vyuma vinasolokanga vinasolola hatoma nge, vatu chipwe Satana kaveshi kuhasa kupwa vaka-kuyula vamwazako.

5. Mijimbu yavatu kushikulu yinasolola vyuma muka?

⁵ Makumbi ano kaye kali nakupihilako lika. Kaha vatu vakuzomboka jimiliyoni 100 vanafu kujijita mumyaka 100 yinahichimo. Mbimbiliya yamba ngwayo, “hamakumbi akukuminyina,” “vatu vakuhuka navaka-kuhungumwisa vakwavo navayanga nakupihilako lika.” (WaChimoteu 2, 3:1, 13) Mbimbiliya yahanjika nawa ngwayo: “Ove Yehova, ngunatachikiza ngwami mutu katwama nangolo jakusakula jila yenyiko. Mutu katwama nangolo jakulitwaminyina iveneko.” (Yelemiya 10:23) Mijimbu yakushikulu yinasolola hatoma nge awa mazu amuchano. Yehova katengele vatu nauhashi wakuliyula vavane chakuhona kuvatwaminyina kuli ikiyeko.

6. Mwomwo ika Kalunga netavishila vilinga vyavipi vitwaleho lika?

⁶ Hakwitavisa vilinga vyavatu vyavipi vitwaleho lika, Yehova nasolola nawa nge chiyulo chenyi chikiko kaha chinahase kufukila. Kulutwe Kalunga mwakanongesa vatu vavapi vosena. Kufumaho, weshowo mwakafumbukila chiyulo chenyi, mwakamunongesa hahaze vene. Ngocho, mwakazachisa mijimbu yakushikulu kupwa hiunjiho wakusolola nge vaka-kufumbukila chiyulo chenyi vatela kuvanongesa. Kaha vilinga vyavipi kavyeshi kukapwako chekako.

7, 8. Mujila muka Yehova nasolwelamo zangi yenyi?

⁷ Yehova nasolola zangi yenyi mujijila jajivulu. Achishinganyekenu hakutohwa nakuwaha chavyuma vatenga mumelu nahamavu. Mumelu mwatwama jimbiliyoni jamilalaji, kaha mulalaji himulalaji watwama navatanganyika vavavulu chikuma najipulaneti jajivulu. Mumulalaji wetu uze vavuluka ngwavo Milky Way, mwatwama vatanganyika vavavulu, kuhakilako vene nalikumbi. Kaha nge kakwapwile likumbiko,  kachi hano hamavu kaheshi kuyoyako. Vyuma vyosenevi vyakutenga vyapwa hiunjiho wakusolola nge Yehova apwa Tengi, kaha nawa vyasolola vilinga vyenyi vyakufwana nge ngolo, namangana, nazangi. Eyo, “vilinga [vyaKalunga] evi vahona kumona, nangolo jenyi jahaya myaka yosena nauKalunga wenyi, vyasoloka hatoma kufuma vene kukutenga chakaye nakuya kulutwe, mwomwo vavimwena kuvyuma atenga.”—Wavaka-Loma 1:20.

⁸ Yehova atengele mavu mangana hatwamenga vyuma vyakuyoya. Vyuma vyosena hano hamavu vyeji kunganyalisanga tunyama navatu. Kalunga atengelele vatu milemba yamwaza mangana vayoyelengamo. Avatengele nawa namijimba navishinganyeka vyakukupuka mwosena mangana vayoyenga haya myaka yosena. (Tangenu Kusoloka 4:11.) Kaha nawa “eji kuhananga kulya kuvyuma vyakuyoya vyosena, mwomwo zangi yenyi yakwilila kuyatwama haya myaka yosena.”—Samu 136:25.

9. Hakuwana nge Yehova apwa Kalunga wazangi, vyuma muka ahunga?

⁹ Yehova apwa Kalunga wazangi, kaha ahunga vyuma vyavipi. Chakutalilaho, mukanda waSamu 5:4-6 wahanjika hali Yehova ngwawo: “Ove kawapwa uKalunga uze eji kwivwilanga kuwaha vilinga vyakuhukako . . . Wahunga vosena vaze veji kulinganga vyuma vyavipi.” Kalunga nawa ahunga “vaka-ulyanyi navaka-kutangisa.”

10, 11. (a) Vyuma muka navikasoloka kuli vaka-kuhuka? (b) Yehova mwakanganyalisa ngachilihi vatu vaze veji kumwononokanga?

¹⁰ Yehova mwakafumisako vilinga vyakuhuka vyosena muno mukaye halwola luze atongola, mwomwo apwa Kalunga wazangi, kaha nawa ahunga vyuma vyavipi. Mazu aKalunga atufwelelesa ngwawo: “Vatu vavapi navakavafumisako, oloze vaze vatalilila kuli Yehova navakaheta mavu. Kunasale kashimbu kakandende kaha, vaka-kuhuka kaveshi kupwako chekako.” Vaka-kole jaYehova “navakalelangana nge wishi.”—Samu 37:9, 10, 20.

¹¹ Mazu aKalunga atufwelelesa nawa ngwawo: “Vaka-kwoloka navakaheta mavu, kaha navakatwamangaho haya myaka yosena.” (Samu 37:29) Vatu vakushishika “navakalivwisa kuwaha kuunda chamwenemwene.” (Samu 37:11) Mwomwo ika? Mwomwo Kalunga wazangi eji kulinganga vyuma vyamwaza kuli vangamba jenyi vakushishika. Mbimbiliya yatulweza ngwayo: “Mwakahunda masoji osena kumeso avo, kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako. Vyuma vyakulivanga vinafumuko lyehi.” (Kusoloka 21:4) Ocho kuwaha kana navakevwa vatu vakwononoka vaze veji kusakwililanga Kalunga hazangi yenyi!

12. Uno “mutu wakuzeneka mulonga” apwa iya?

¹² Mbimbiliya yatulweza ngwayo: “Nyingilila mutu wakuzeneka mulonga, shishika mutu wakusungama, mwomwo mutu kana mwakatwamanga mukuunda kulutwe. Oloze vaka-kuzombwojoka jishimbi vosena navakavanongesa. Vaka-kuhuka navakavatetako.” (Samu 37:37, 38) “Mutu wakuzeneka mulonga” eji kutachikizanga Yehova naMwanenyi, kaha eji kwononokanga nakulinga mwaya muchima waKalunga. (Tangenu Yowano 17:3.) Eji kufwelelanga  ngwenyi, “kaye kali nakuhita hamwe nakufwila chako, oloze ou eji kulinganga mwaya muchima waKalunga mwatwamanga haya myaka yosena.” (WaYowano 1, 2:17) Hakuwana nge kukuma chakaye chinapandama, ngocho twatela ‘kutalilila kuli Yehova, nakukavangiza jila yenyi.’—Samu 37:34.

13. Zangi muka yayinene yize atusolwela Kalunga?

¹³ Numba tuhu katwakupukako, oloze tunahase kwononoka Kalunga. Tunahase nawa kutunga usoko wamwaza naYehova mwomwo yandando yakusokola yaYesu, yize yasolola zangi yayinene atusolwela Kalunga. Yehova atuhana ndando yakusokola mangana vatu vaze navononoka valihehwe kushili nakukufwa. (Tangenu Wavaka-Loma 5:12; 6:23.) Yesu ononokele Kalunga hamyaka yayivulu mwilu, kahechi chalingishile Yehova afwelele ngwenyi, Mwanenyi mwakapwa wakushishika hamavu. Hakupwa chisemi wazangi, Yehova evwile kupihya chikuma omu vatu vayanjishilenga Mwanenyi. Chipwe ngocho, Yesu ashishikile lika nakukundwiza chiyulo chaKalunga chakwoloka nakusolola nge mutu wakukupuka mwosena nahase kupwa lika wakushishika kuli Kalunga, numba vene nge ali nakumona ukalu waunene.

14, 15. Uno kufwa chaYesu changanyalisa ngachilihi vatu?

¹⁴ Numba tuhu Yesu ahichile muvyeseko vyavivulu, oloze ashishikile lika nakukundwiza chiyulo chaYehova chakwoloka. Twatela kusakwilila Yesu hakuhana kuyoya chenyi mwandando yakusokola, mwomwo ndando kana yalingisa vatu vakahase kukayoya haya myaka yosena mukaye kakahya kaKalunga. Kaposetolo Paulu alumbunwine zangi yize Yehova naYesu vasolwele kuhichila mundando yakusokola. Ambile ngwenyi: “Shimbu twapwile tuvakuhehela, Kulishitu afwilile vaka-kuzamukila Kalunga halwola luze vatongola. Mwomwo chapwa chachikalu kufwila mutu wakwoloka, oloze mutu nahase pamo kuhamuka nakufwila mutu wamwaza. Oloze Kalunga asolola lyehi zangi yenyi kuli etu, mwomwo shimbu twapwilenga tuvaka-shili, Kulishitu atufwilile.” (Wavaka-Loma 5:6-8) Kaha kaposetolo Yowano asonekele ngwenyi: “Omu mukiko Kalunga  asolwelele zangi yenyi kuli etu hakutuma Mwanenyi umwe kaha wakulipwila mukaye mangana tukahase kupwa nakuyoya kuhichila muli ikiye. Eyi zangi yalumbununa nge, Kalunga ikiye atuzangile etu nakututumina Mwanenyi kupwa wana wakufwika hajishili jetu, keshi nge etu yetu twazangile Kalungako.”—WaYowano 1, 4:9, 10.

¹⁵ Yesu ambile ngwenyi, “Kalunga azangile chikuma kaye ngocho ahanyine Mwanenyi umwe kaha wakulipwila, mangana ngwenyi weshowo mwamufwelela vakahone kumunongesa, oloze akapwe nakuyoya chahaya myaka yosena.” (Yowano 3:16) Numba tuhu chuma kana chevwishile Yehova kukola kumuchima, oloze ahanyine Mwanenyi kupwa ndando yakusokola. Echi chasolola omu Kalunga azanga vatu. Kaha zangi kana nayikelila haya myaka yosena. Paulu asonekele ngwenyi: “Ngunenjikiza chikupu ngwami, chipwe kufwa, chipwe kuyoya, chipwe vangelo, chipwe jifulumende, chipwe vyuma viliko, chipwe vyuma navikeza kulutwe, chipwe jingolo, chipwe kujindama helu, chipwe kukunama, chipwe chuma cheka chakutenga, kavyeshi kuhasa kutuhandununa kuzangi yaKalunga eyi yili muli Kulishitu Yesu Mwata wetuko.”—Wavaka-Loma 8:38, 39.

16. Wangana wauMeshiya wapwa uka, kaha Yehova atongola iya kupwa Muka-kuuyula?

¹⁶ Fulumende yaKalunga yize yapwa Wangana wauMeshiya, nayikiko yapwa hiunjiho wakusolola nge Yehova azanga vatu. Mujila muka? Yehova atongola lyehi Muka-kuyula Yesu Kulishitu uze azanga vatu, uze nawa atamo kuyula. (Vishimo 8:31) Kalunga asakula vatu 144,000 mangana vakayulenga hamwe naKulishitu mwilu. Omu veji kusangukanga, veji kwanukanga lika omu chapwa chiyoyelo chavatu. (Kusoloka 14:1) Omu Yesu apwile hano hamavu, anangwilenga vatu vyaWangana waKalunga, kaha anangwile tumbaji twenyi valombenga ngwavo: “Ove Setu uli mwilu, lijina lyove lipwenga lyajila. Wangana wove wizenga. Mwaya muchima wove mulingiwe mwilu, nahamavu nawa.” (Mateu 6:9, 10) Tweji kutalililanga kutesamo chakulomba kanechi omu Kalunga mwakakisula chikuma vatu kuhichila muWangana wenyi.

17. Chihandwa muka chatwama hachiyulo chaYesu nachechi chavatu?

¹⁷ Chiyulo chaYesu chazangi chalihandununa nachiyulo chavatu. Chiyulo chavatu chinanehe jijita jajivulu jize jinajihi jimiliyoni javatu. Oloze Muka-kuyula wetu Yesu atuzanga chikuma, kaha nawa eji kukavangizanga vilinga vyaKalunga vyamwaza, chikumanyi zangi. (Kusoloka 7:10, 16, 17) Yesu ambile ngwenyi: “Twayenu kuli ami enu muvosena muli nakufulyangila nakulemuwa naviteli, kaha ami nangumihizumuna. Mbatenu toka yami nakulinangula kuli ami, mwomwo ami ngumuvwovu, nguwakulikehesa mumuchima, kaha namupwa vakuhizumuka. Mwomwo toka yami yayashi kumbata, kaha chiteli chami chachilelu.” (Mateu 11:28-30) Chikupu vene lushiko kana lwasolola nge atuzanga chikuma.

18. (a) Vyuma muka vinasolokanga kufuma vene mu 1914? (b) Vyuma muka natushimutwila muchihande chinakavangizaho?

¹⁸ Mbimbiliya yasolola ngwayo Wangana waKalunga waputukile kuyula mwilu mu 1914. Kufuma vene mumwaka uze, kunapunga mulimo wakukungulula vatu vamakumishilo vaze navakayula naYesu mwilu, nakukungulula nawa “liyongomena lyalinene” lyavatu vaze navakayovoka kukuma chakatwamino kamyaka yino nakukengila mukaye kakahya. (Kusoloka 7:9, 13, 14) Uno liyongomena lyalinene linatoho ngachilihi makumbi ano? Vyuma muka Kalunga asaka kuli vakiko? Chihande chinakavangizaho nachikumbulula vihula kanevi.