1. Chililwinyi chaNzambi chabadika, nawa mwatiyaña ñahi kwiluka mwenimu?

 BAYIBOLU yatulejaña nawu “Nzambi diyi kukeña.” (1 Yowanu 4:8) Awa mazu atalisha mudihi? Bayi neyi kukeña kwekala hohu hakachi kayililu yaYehova yayiwahuku. Ilaña dichililu chidi chabadika. Wekala hohu nakukeña wanyi. Ilaña diyi kukeña. Kukeña dikwamusañumunaña kwila yuma yejima yelañayi. Twamusakililaña Yehova chaleñeliyi mawulu niiseki kushilahu niyuma yejima yonaña muloña wakukeña kwindi!

2. Kukeña kwaNzambi kwatukwashaña kukuhweleladi? (Talenu mwevulu wakutachikilahu.)

² Yehova watiyilaña luwi yileñaleña yindi. Twakuhwelela netu nkeñelu yindi kutalisha hadi antu yikashikijewa hampinji yatelela muloña watukeña. Dichi antu amwovwahilaña akashakamaña chiwahi. Chakutalilahu, muloña wakukeña, Yehova ‘nashumu dehi ifuku damba kasompeshayi matuña mwaloña, neyala anatondiyi dehi,’ Yesu Kristu. (Yililu 17:31) Tunakuhweleli netu iku kusompesha kwakamwekena.  Antu amwovwahilaña, akatambwila nkisu yikadiluñishañawu haya nyaka.

3. Chihandilu chadi kwikala ñahi neyi Nzambi wakeñeli wanyi antu?

³ Chihandilu chawantu chadikwikala ñahi neyi Nzambi wadiña wanyi nakukeña? Antu adi kutwalekahu kudiyuula aweni nikuyiluwañesha kudi nzambi watama, Satana. (2 Akorinda 4:4; 1 Yowanu 5:19; tañenu Chimwekeshu 12:9, 12.) Kaayi kadi kutaminaku neyi Yehova watukeñeli wanyi.

4. Muloñadi Yehova chamwitejeleliyi Satana kuyuula?

⁴ Satana chadikañiliyi nachiyuulu chaNzambi, waletesheli anvwali jetu atachi niwena kudikaña. Wajinokeli wuswa waNzambi Wakuyuula. Satana wahosheli nindi nateli kuyuula chiwahi kubadika Nzambi. (Kutachika 3:1-5) Yehova wamwitejeli Satana kuyuula kulonda yamwekeshi neyi mwahosheliyi mwalala. Ilaña yuma yafumamu yamwekesha nawu antu hela Satana hiyanateli kwikala ayuuli amawahuku.

5. Yuma yamwekanaña yamwekeshañadi?

⁵ Makonu kaayi kanakutaminaku hohu. Yaaka 100 yinahitihu antu kubadika ha 100 miliyoni anayijahi munjita. Bayibolu yahosha ‘hamafuku akukuminina’ nawu: “Antu atama niakwakutwamba akuya nakusweja.” (2 Timotewu 3:1, 13) Bayibolu yahosha cheñi nawu: “Eyi Yehova, neluki nami njila yamuntu hiyekala mudi yomwenuku, mudi muntu wendaña himwekala yakuyula nyendu yinduku.” (Yeremiya 10:23) Yuma yamwekanaña yamwekeshaña hatooka nawu awa mazu alala. Yehova waleñeli wanyi antu nawuswa wakudiyuula aweni.

6. Muloñadi Nzambi chetejelayi kutama?

⁶ Yehova chetejeliyi yuma yatama kutwalekahu, wamwekesha nindi yena hohu diyi wunateli kuyuula chiwahi. Yehova wakajilumuna antu atama ejima. Hanyima yakuyijilumuna, muntu wejima wakajinooka chiyuulu chaNzambi, wakamujilumuna hohenohu. Nateli kuzatisha yuma yinakumwekana hakumwekesha nindi antu amuchidiwu atelela kuyijilumuna. Waketeja cheñi wanyi kutama.

7, 8. Yehova wamwekesha ñahi kukeña kwindi?

⁷ Yehova wamwekesha kukeña kwindi munjila jashiyashana. Toñojokenu hayuma yekala mwiwulu. Mwekala mabiliyoni anyilalanji, nawa mumulalanji wumu mwekala mabiliyoni atutumbwa nimapulaneti. Hakachi katutumbwa twekala mumulalanji watenañawu nawu Milky Way hitena. Neyi kwadi kwosi itena, kachi yuma yonaña hamaseki yekalaku wanyi. Yuma yejimiyi yamwekeshaña nawu Yehova diyi Nleñi yetu, nawa yamwekeshaña yililu yindi, chidi neyi ñovu, maana nikukeña. Mwalala, ‘yililu yaNzambi  yakamonewaña yamwekanaña chikupu kufumisha tuhu haleñeluwu mpata yamunu mwishina, muloña ayilukilaña kuyuma yaleñeliyi, joju ñovu jindi jahaya nyaka niwuNzambi windi.’—Aroma 1:20.

⁸ Yehova waleñeli iseki kulonda dikwasheña yuma yonaña. Yuma yejima hamaseki yakwashaña atunyama niantu. Nzambi wadimini itempa dadiwahi mwakushakama antu nawa waleñeli antu awanina kulonda ashakameña haya nyaka. (Tañenu Chimwekeshu 4:11.) Nawa, “Wadiishaña ejima; luwi lwindi lwahaya nyaka.”—Masamu 136:25.

9. Hela Yehova hiNzambi wakukeña, waheladi?

⁹ Yehova hiNzambi wakukeña, ilaña wahela yuma yatama. Chakutalilahu, Masamu 5:4-6 yahosha hadi Yehova nawu: “eyi wuNzambi wabulaña kutiya kutama kuwaha . . . Eyi wahelaña ejima akoñaña kuluwa.” Wahela cheñi “muntu wawubanji wadimbanaña.”

10, 11. (a) Yumanyi yikayimwekena antu atama? (b) Yehova wakakiswila ñahi antu ashinshika?

¹⁰ Chineli Yehova hiNzambi wakukeña nawa wahela yuma yatama, wakafumishahu yuma yatama hamaseki. Izu daNzambi dakana nawu: “Antu elaña yuma yatama akayifumishamu; ilaña akumuchiñeja Yehova akaswana ituña. Hakuleha chanti muntu watama hakekala nawa mwokuku.” Ayilumbu jaYehova “akanoña zo-o kwawishi hohu.”—Masamu 37:9, 10, 20.

¹¹ Izu daNzambi dakana cheñi nawu: “Akwakuloña akaswana ituña, akashakamamu haya nyaka.” (Masamu 37:29) Antu ashinshika “akatiya kuwaha nankashi nakushakama chachiwahi chamwena.” (Masamu 37:11) Muloñadi? Muloña Nzambi yetu wukweti kukeña wenkaña ambuñindi ashinshika yuma yayiwahi. Bayibolu yahosha nawu: “Wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku. Yuma yakusambila yinahiti dehi.” (Chimwekeshu 21:4) Antu ovwahilaña Nzambi nawa amusakililaña muloña wakukeña kwindi akadiluñisha wumi waha nyaka!

12. “Muntu walala” himuntu wamuchidinyi?

¹² Bayibolu yahosha nawu: “Mutali chachiwahi muntu walala, mushinshiki muntu woloka; ona muntu kwakakuminayi wakamona kwawunda. Akwakuputola akayijilumwina hamu; kwakakuminawu antu atama akamona kuyifumishamu.” (Masamu 37:37, 38) “Muntu walala” wamwiluka Yehova niMwanindi nawa welaña nkeñelu yaNzambi. (Tañenu Yowanu 17:3.) Wakuhwelela nindi “mpata yamunu mwishina yikuhita, nikufwila kwayu kwatama, hakwinza muntu welaña muchima waNzambi washakamaña haya nyaka.” (1 Yowanu 2:17) Chineli kukuma kwakaayi kudi kwakwihi,  “muchiñeji Yehova, wulami munjila yindi” yoyinu mpinji—Masamu 37:34.

13. Nzambi wamwekesheli ñahi kukeña kwabadika?

¹³ Hela twawanina wanyi, tunateli kumwovwahila Nzambi. Tunateli kwikala cheñi nawubwambu wakola naYehova muloña wefutu danyiloña daYesu, kukeña kwabadika kwamwekesheliyi Nzambi. Yehova wahanini ifutu kulonda antu ovwahilaña akakuulewi kunshindi nikufwa. (Tañenu Aroma 5:12; 6:23.) Yesu wadiña washinshika hadiñayi mwiwulu, dichi Yehova welukili nindi Mwanindi wakatwalekahu kwikala washinshika nihamaseki. Chineli Yehova hiNvwali wakukeña, watiyili kutama nankashi chamweniyi Mwanindi anakumukabisha kudi antu. Hela chochu, Yesu wahakwililuku wuswa waNzambi wakuyuula nawa wamwekesheli nindi muntu wawanina nateli kutwalekahu kwikala washinshika kudi Nzambi nimumpinji yakala.

14, 15. Kukoolekanyi kutukweti muloña wakufwa kwaYesu?

¹⁴ Hela chakwila Yesu wahitili mukukala kwasweja, wadiña washinshika nawa wahakwililuku wuswa waYehova wakuyuula. Twatela kumusakililaña chineli ifutu daYesu dahaniniyi datwinka kukooleka kwakushakama haya nyaka mwituña dadiha daNzambi. Kapostolu Pawulu wahosheli hakukeña kwaYehova niYesu kwamwekesheluwu kuhitila mwifutu. Wahosheli nindi: “Hitwachidiñi twabula ñovu, Kristu wafwilili asekesha Nzambi, hashikili mwaka. Kufwila muntu waloña chakala, ilaña muntu wamuwahi, kwiji kukumwekana wumu wukubula woma wakumufwila. Ilaña Nzambi wamwekeshaña kukeña kwindi yomweni kudetu, hohitwachidiñi akwanshidi Kristu watufwilili.” (Aroma 5:6-8) Kapostolu Yowanu wahosheli nindi: “Kukeña  kwatukeñayi Nzambi kwamwekeni hatemesheliyi Nzambi Mwanindi wumu hohu mumpata yamunu mwishina, kulonda tuhandili mudi yena. Kweniku diku kukeña; hiyetu twakeñeli Nzambuku, yena diyi watukeñeletu, hakutemesha Mwanindi ekali ifutu danyiloña yetu.”—1 Yowanu 4:9, 10.

¹⁵ Yesu wahosheli nindi “Chaswejeliyi Nzambi kukeña mpata yamunu mwishina, waheni Mwanindi wumu hohu, kulonda muntu wukumukuhwelela aheti wumi wahaya nyaka, akabuli kunoña.” (Yowanu 3:16) Hela chamukatili Yehova, wahanini Mwanindi kwikala ifutu damuloña. Chumichi chamwekeshaña chakeñayi antu. Nawa wakatwalekahu kuyikeña. Pawulu wasonekeli nindi: “Neluki chikupu nami hela kufwa, hela wumi, hela añelu, hela mawanta, hela yuma yakatataka, hela yuma yamba kenza, hela yuma yikweti ñovu, hela kuleha kwakwiwulu, hela kukunama, hela chuma chacheñi chaleñeluwu chimu, hiyikutwesha kutwambula kukukeña kwaNzambi kwekala mudi Kristu Yesu, Mwanta wetuku.”—Aroma 8:38, 39.

16. Wanta wawuMesiya hiwantanyi, nawa hinyi atondawu kudi Yehova kwikala Nyuuli?

¹⁶ Yehova wamwekeshaña cheñi nindi wakeña antu hakushaku nfulumendi yindi yaWanta wawuMesiya. Munjilanyi? Yehova watonda dehi Nyuuli wakeña antu nawa washikilamu kuyuula, Yesu Kristu. (Yishimu 8:31) Nzambi watonda antu 144,000 kuyuula hamu naKristu mwiwulu. Chayisañulawu, alalamenaña wanyi yuma yahitilumu hiyadiñawu antu. (Chimwekeshu 14:1) Yesu hadiñayi hamaseki, wahosheleña nankashi haWanta nawa walejeli atumbanji twindi kulomba nawu: “Tata yetu wekala mwiwulu, ijina deyi dijili. Wanta weyi winzi. Muchima weyi awili hamaseki neyi chawilañawu mwiwulu.” (Matewu 6:9, 10) Tunakutalila chikashikijewa kuna kulomba, hiyakadiluñishawu antu nkisu yikaleta Wanta!

17. Esekejenu chiyuulu chaYesu nachawantu.

¹⁷ Chiyuulu chaYesu chambuka chikupu nachiyuulu chawantu. Anyuuli awantu analeti majita anajahi yihita yawantu. Ilaña Nyuuli yetu, Yesu, watukeña nankashi nawa wembujolaña yililu yekala naNzambi, sweje-e chililu chakukeña. (Chimwekeshu 7:10, 16, 17) Yesu wahosheli nindi: “Inzenu kudami enu ejima mudi nakukabakana, mwasenda yalema, ami nukuyinookesha. Ditwikenu mpanda yami, mudizili kudami muloña ami nawunda, nadizoza mumuchima, ninenu mukumona kunooka munyichima yenu. Muloña mpanda yami yaswayi, nichisenda chami chapepela.” (Matewu 11:28-30) Awa mazu atukundejaña hama!

18. (a) Yumanyi yinakumwekana kufuma tuhu mu 1914? (b) Tukahanjekadi muchibaaba chinalondeluhu?

¹⁸ Bayibolu yamwekeshaña nawu Wanta waNzambi watachikili kuyuula mwiwulu mu 1914. Kufuma tuhu yina mpinji, ashalahu akayuula naYesu mwiwulu ayipompeshaña, “izaza deneni” dawantu akapuluka hakukuma kwanyaaka yinu nakwiñila mwituña dadiha nidena anakudipompesha. (Chimwekeshu 7:9, 13, 14) Mwizaza deneni mudi antu añahi makonu? Nzambi wakeñaña nindi ekali antu amuchidinyi? Chibaaba chinalondeluhu chikakula awa malwihu.