1. Pathian mize bulpui ber chu eng nge ni a, chumi hriatna chuan amah chu engtin nge a ngaihtîr che?

Bible chuan “Pathian chu hmangaihna a ni,” tiin a sawi a. (1 Johana 4:8) Chumi awmzia dik tak chu eng nge? Hmangaihna chu Jehova mize duhawm tam tak zînga pakhat mai a ni lo va. A mize bulpui ber a ni. Hmangaihna a nei mai ni lovin, ani chu hmangaihna a ni. Hmangaihna chuan a thiltih engkim a kaihruai a. Chu chuan Jehova chu lei leh vân, leh thil nung zawng zawng siam tûra a chêttîr avângin kan va lâwm tak êm!

2. Pathian min hmangaihna chuan eng rin tlatna nge min neihtîr? (A thupui chunga milem en rawh.)

² Jehova chuan a thilsiamte chungah ngilneihna leh lainatna a nei a. Min hmangaih avângin mihringte tâna a thiltum chu a ṭha thei ang berin a thlentîr dâwn tih kan ring tlat a ni. Chu chuan a thuâwihtute chungah hlimna dik tak a thlen ang. Entîr nân, hmangaihna avângin Jehova chuan “chu mi niah chuan a mi ruata,” Isua Krista “chu, leia mite fel takin a ngaihtuahtîr ang.” (Tirhkohte 17:31) Chu rorêlna chu a lo thleng ngei ang tih kan ring tlat a ni. Chu chuan a thuâwih mihringte  tân chatuan daih hma lam hun duhawm tak a thlen ang.

3. Pathianin mihringte min hmangaih lo ta se, nun chu eng ang nge a nih ang?

³ Hmangaihna chu Pathian mize bulpui ber ni lo ta se, mihringte hma lam hun tûr chu engtin nge ni ang? Mihringte’n ro an inrêl chhunzawm zêl ang a, hmangaihna nei lo leh mi huat hmang pathian, Setana thununna hnuaiah an awm reng ang. (2 Korinth 4:4; 1 Johana 5:19; Thu Puan 12:9, 12 chhiar rawh.) Jehova’n min hmangaih lo ta se, kan hma lam hun chu a va râpthlâk dâwn tak êm!

4. Engvângin nge Jehova’n a rorêlna laka helna awm a phal?

⁴ Pathian rorêlna laka Setana a hel khân, kan nu leh pa hmasa berte pawh hel tûrin a thunun a. Pathianin Lei leh Vâna Lalchungnungber ni tûra dikna a neih chu an ringhlel a ni. Setana chuan a rorêlna chu Pathian rorêlna aia ṭha zâwk tûr angin a sawi a. (Genesis 3:1-5) Fing takin, Jehova chuan Setana thusawi finfiahna atân hun rei lotê a pe a ni. Mahse, mihringte chanchina thil thlengte chuan mihringte leh Setana chu rorêltu ṭha an ni lo ve ve tih chiang takin a târ lang.

5. Mihringte chanchina thil thlengin eng nge chiang taka a târ lan?

⁵ Tûn laiah hian khawvêl hi a chhe zual zêl a. Kum 100 kal ta khân indona avângin mi maktaduai 100 aia tam an thi a ni. Bible chuan ‘ni hnuhnûng’: ‘Mi sual leh tihdertu, mi bum leh buma awma sual zual deuh deuh,’ an awm hun tûr chungchâng a sawi a. (2 Timothea 3:1, 13) “Aw LALPA, mihring awm dân chu, mahni thu mai a ni lo tih ka hre ta: Tungchhova kal mihringah hian, a pheikhai hruai tûr a awm lo,” tiin a sawi bawk a ni. (Jeremia 10:23) Thil thleng chanchin chuan hêng thute hi a dik tih a târ lang chiang hle. Jehova chuan mihringte chu a kaihhruaina tel lova rorêl tûra theihna emaw, dikna emaw neiin a siam lo.

6. Engvângin nge Pathianin suahsualna awm a phal?

⁶ Hun engemaw chen chu suahsualna a awm zawm zêl phalin, Jehova chuan a rorêlna chauh a hlawhtling thei tih a finfiah bawk a. Nakinah chuan Pathianin mi suaksualte a tiboral vek dâwn a. Chu mi hnuah chuan, hmangaih taka a rorêlna ringhleltute chu chawp leh chilhin a tiboral nghâl tawh ang. Ani chuan chutianga hel hmangte chu tihboral nghâl an ni ang tih finfiah nân mihringte chanchina thilthleng chu a hmang thei a ni. Suahsualnate awm a phal tawh ngai lo vang.

7, 8. Engtin nge Jehova’n a hmangaihna a lantîr?

⁷ Jehova chuan a hmangaihna ropui tak chu kawng tam takin a lantîr a. Lei leh vân zau tak leh mawi tak chu han ngaihtuah teh. Arsi hlâwm tlûklehdingâwn tam tak a siam a, Arsi hlâwm tinah chuan arsi leh planet tlûklehdingâwn tam tak a awm bawk a ni. Kan Thlasik Kawnga arsi hlâwm zînga pakhat chu nî khi a ni a. Nî tel lo chuan leiah hian nunna a awm thei lo. Hêng thilsiam zawng zawngte hian Jehova chu min Siamtu a nihzia a târ lang a, a thiltihtheihna, a finna, leh a hmangaihna ang chi a miziate chu a târ lang bawk. Ni e, “a thil hmuh theih loh (a chatuan thiltihtheihna leh a Pathianzia chu) khawvêl siam tirh ata fiah taka hmuhin a awm a, thil siamah chuan a lang a ni.”—Rom 1:20.

⁸ Jehova chuan lei hi a bîk takin nunna neite tân a duang a. Chu chu leia awm zawng zawng, ramsa leh mihringte’n an hlâwkpui a ni. Pathian chuan mihringte chên nân hmun nuam tak a pe a, chatuana nung thei tûrin rilru leh taksa ṭha famkim a pe a ni. (Thu Puan 4:10, 11 chhiar rawh.) Chu bâkah, “ani chuan tisa zawng zawng hnênah ei tûr a pe ṭhîn a: a ngilneihna chu kumkhuain a awm dâwn si a.”—Sâm 136:25.

9. Jehova chu hmangaihna Pathian ni mah se, eng nge a huat?

⁹ Jehova chu hmangaihna Pathian a ni a, thil sual erawh a hua a ni. Entîr nân, Sâm 5:4-6  chuan Jehova chungchâng chu heti hian a sawi: “Suahsualnaa lâwm ṭhîn Pathian i ni si lo va . . . Thil tisualtute zawng zawng chu i haw ṭhîn,” tiin. Ani chuan “thisen chhuah hmang leh bum hmang,” chu a haw bawk a ni.

10, 11. (a) Mi suaksualte chungah eng thil nge thleng ang? (b) Engtin nge Jehova’n thuâwih mihringte chu mal a sâwm ang?

¹⁰ Hmangaihna Pathian a nih avâng leh thil ṭha lo a huat avângin Jehova chuan a hun takah suahsualna a titâwp ang. Pathian Thu chuan: “Thil ṭha lo titute chu tihboralin an awm dâwn si a: LALPA nghâktute erawh chuan ram hi an luah ang. Rei lo tê achinah mi suaksual chu a awm tawh dâwn si lo,” tiin min tiam a. Jehova hmêlmate chu “meikhuah an zâm ral ang.”—Sâm 37:9, 10, 20.

¹¹ Pathian Thu chuan: “Mi felte chuan ram hi an luah ang a, a chhûngah hian kumkhuain an awm ang,” tiin a tiam bawk a. (Sâm 37:29) Mi rinawmte chu “remna chênin an hmuingîl ang.” (Sâm 37:11) Engvângin nge? Min hmangaihtu kan Pathian chuan a chhiahhlawh rinawmte tân englai pawhin thil ṭha ber tûr a tih ziah vâng a ni. Bible chuan: “An mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,” tiin min hrilh a. (Thu Puan 21:4) Pathian hmangaihna ngaihlutu thuâwih mihringte tân hma lam hun ropui tak a va ni êm!

12. ‘Sawisêlbote’ chu tute nge ni?

¹² Bible chuan heti hian min hrilh a ni: “Mi sawisêlbo chhinchhiah la, mi dik tak chu en rawh, chutiang mi tâwpna tûr chu thlamuanna a ni dâwn si a. Bawhchhetute erawh chu aruala tihchhiatin an awm hlawm ang a, mi suaksualte tâwpna chu boralna a ni ang,” tiin. (Sâm 37:37, 38) ‘Sawisêlbote’ chuan Jehova leh a Fapa an hria a, thuâwih takin Pathian duhzâwng an ti a. (Johana 17:3 chhiar rawh.) “Khawvêl hi a châknate chawpin a boral mêk a ni, Pathian duhzâwng titu erawh chu kumkhuain a awm reng ang,” tih an ring tlat a ni. (1 Johana 2:17) Khawvêl tâwpna a hnaih tawh avângin, ‘LALPA chu nghâk a, a kawng kan zawh’ a hmanhmawhthlâk a ni.—Sâm 37:34.

13. Pathian hmangaihna thiltih ropui ber chu eng nge?

¹³ Ṭha famkim ni lo mah ila, Pathian thu kan âwih thei a. Pathian hmangaihna thiltih ropui ber, Isua tlanna inthawina avângin Jehova nên inlaichînna hnai tak kan nei thei bawk. Thuâwih mihringte sual leh thihna lak ata chhuah zalên theihna hun remchâng an neih nân Jehova chuan tlanna a ruahman a. (Rom 5:12; 6:23 chhiar rawh.) Isua chu vânah Pathian tâna hun rei tak chhûng a lo rinawm tawh avângin Jehova chuan a Fapa chu leiah pawh a rinawm chhunzawm zêl dawn tih a ring tlat a ni. Hmangaihna ngah tak Pa a nih angin, a fapa chu mite’n ṭha lo taka an cheibâwl a hmuh chuan a rilru a na hle a. Mahse, Pathianin rorêl tûra dikna a neih chu Isua’n rinawm takin a thlâwp a, dinhmun harsa berah pawh mihring ṭha famkim chu Pathian lakah a rinawm reng thei tih a lantîr a ni.

14, 15. Isua thihna chuan mihringte tân eng nge a hlen chhuah?

¹⁴ Fiahna nasa ber a tâwk chung pawhin, Isua chuan Jehova’n rorêl tûra dikna a neih chu rinawm takin a thlâwp tlat a ni. A thihna hmanga Isua’n tlanna man a pêk avângin kan lâwm hle tûr a ni, chu chuan mihringte tân Pathian khawvêl thara nun theihna hun remchâng a siam si a! Tirhkoh Paula chuan tlanna hmanga Jehova leh Isua hmangaihna chu a hrilhfiah a. “Kan la chak loh lai khân, a hun têin Krista chu mi sualte ai chuan a lo thi ta si. Mi fel aia thih miin a duh âwm lo hle si a, mi ṭha ai erawh chuan mi tu emaw tal chuan thih a ngam mial mahna. Nimahsela Pathian chuan a mi hmangaihna chu faktlâkin a lantîr a, mi sualte kan la nih laia Krista kan aia a thih avâng khân,” tiin a sawi a ni. (Rom 5:6-8) Tirhkoh Johana pawhin heti hian a ziak bawk: “He miah hian Pathian hmangaihna  kan chungah a lo lang ta, amah avânga kan nun theihna tûrin Pathianin a Fapa neih chhun khawvêla a rawn tirhah hian. He miah hian hmangaihna a awm, keimahnin Pathian kan hmangaih ka ti a ni lo va, amahin min hmangaih a, kan sualte thupha chawina ni tûrin a Fapa a rawn tîr ka ti a ni zâwk e,” tiin.—1 Johana 4:9, 10.

¹⁵ Isua chuan, “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân,” tiin a sawi a. (Johana 3:16) Jehova tân chuan na hle mah se, tlan nân a Fapa a pe a ni. Chu chuan mihringte a hmangaihzia a târ lang a. Chu hmangaihna chu a chuai ngai lo vang. Paula chuan heti hian a ziak a ni: “Thihna te, nunna te, vântirhkoh te, lalna te, thil awm sa te, thil lo la awm tûr te, thiltihtheihna te, sânna te, thûkna te, thilsiam dang rêng rêngte pawhin, kan Lalpa Krista Isuaa awm Pathian hmangaihna ata chu mi ṭhen thei lovang tih dik takin ka hre si a,” tiin.—Rom 8:38, 39.

16. Messia Lalram chu eng nge ni a, chuta Rorêltu tûra Jehova ruat chu tute nge an nih?

¹⁶ Jehova’n mihringte a hmangaihna târ lanna dang leh chu Pathian sawrkârna, Messia Lalram a ni a. Chu chu engtin nge a nih? Jehova chuan mihringte hmangaihtu leh rorêl tûra tling tak, Isua Krista chu Rorêltu tûr atân a lo ruat sa tawh a ni. (Thufingte 8:31) Pathian chuan Krista nêna vâna rorêltu tûr mi 144,000-te chu a thlang a. An thawhleh hunah mihring an nih laia an thiltawnte chu vânah an chhawm dâwn a ni. (Thu Puan 14:1) Isua leia a awm lai khân, Lalram chu a thu zirtîr ber a ni a, a zirtîrte hnênah: “Kan Pa vâna mi, i hming zahawm rawh se. I ram lo thleng rawh se. I duhzâwng vâna an tih angin leia mi’n ti rawh se,” tia ṭawngṭai tûrin a hrilh a ni. (Matthaia 6:9, 10) Pathian Ramin mihringte tâna malsâwmna tam tak a rawn thlen hun, chutiang ṭawngṭaina thlen famkimna chu kan va nghâkhlel tak êm!

17. Isua rorêlna leh mihring rorêlna khaikhin rawh.

¹⁷ Isua’n hmangaih taka a rorêlna leh mihringte rorêlna chu a inang lo hle a. Mihring rorêlna chuan mi maktaduai tam takte thihna thlentu indona a tichhuak a. Mahse, kan chunga Rorêltu Isua chuan min hmangaih tak zet a, Pathian mize duhawm tak tak, a bîk takin a hmangaihna chu a entawn a ni. (Thu Puan 7:10, 16, 17) Isua chuan: “Nangni thawk rim leh phurrit phur zawng zawngte u, ka hnênah lo kal ula, keiman ka chawlhtîr ang che u. Ka nghâwngkawl bât ula, ka hnênah zir rawh u; thuhnuairawlh leh rilrua inngaitlâwm tak ka nih hi: tichuan, in thlarau tân chawlhna in hmu ang. Ka nghâwngkawl chu a nuam a, ka phur pawh a zâng a ni,” tiin a sawi a ni. (Matthaia 11:28-30) Thutiam duhawm tak a va ni êm!

18. (a) Kum 1914 aṭang khân eng thil nge thleng? (b) A dawta thuziakah eng nge kan sawiho vang?

¹⁸ Pathian Ramin kum 1914 khân vânah ro a rêl ṭan tawh tih Bible chuan a târ lang a. Chuta ṭang chuan, vâna Isua rorêlpui tûr a la bângte leh he khawvêl tâwpa dam khawchhuak a, khawvêl thara lût tûr “mipui tam tak” pawh lâk khâwm an ni. (Thu Puan 7:9, 13, 14) Tûn laiah hian mipui tam tak chu eng anga tam nge an nih? An lakah Pathianin eng nge a beisei? A dawta thuziakah hêng zawhnate hi bih chian a ni ang. (ws15-E 11/15)