1. a) ¿Alkye tmod Dios mas nim toklen at? b) ¿Tiʼ in qnaʼn tuʼnju kʼujlabʼil te Dios?

IN TZAJ tqʼamaʼn Tyol Dios jlu: «Ate Dios at tkʼujlalil» (1 Juan 4:8). Noqtzun tuʼnj, ¿tiʼ kyxilen yol lu? A t-xilen qa aju kʼujlabʼil, atzun jun tmod Dios mas nim toklen at kyxol txqantl. Kʼujlabʼil te Dios ex tuʼntzunju in bʼant nim tiʼchaq tuʼn. Bʼaʼn tuʼn txi qqʼoʼn chjonte te Jehová tuʼnju ten tkʼujlabʼil tej tkubʼ tbʼinchaʼn tkyaqilju at ex tzaj tqʼoʼn aju at tajbʼen qe tuʼn qanqʼin.

2. ¿Ti qʼuqbʼil qkʼuʼj in tzaj tqʼoʼn tkʼujlabʼil Jehová? (Qʼonka twitza tiʼj tnejel tilbʼilal.)

² In tzaj kyyekʼun qe tbʼinchbʼen Jehová qe qa tbʼanel Jehová qukʼil. Tuʼnju at tkʼujlabʼil, qʼuqli qkʼuʼj tiʼj qa ax tok kbʼantel tuʼn aju t-ximbʼetz at qiʼj. Jun techel, tuʼnju at tkʼujlabʼil Jehová o kyaj tqʼoʼn «jun qʼij tuʼn kyok kykyaqil xjal tuj xjel tuj tumelxix tuʼn jun xinaq, aju ma tzʼok tqʼoʼn Dios te jwes», a jlu, a Jesús (Hechos 17:31). Qʼuqli qkʼuʼj qa kbʼajel jlu. Te kye qeju xjal bʼaʼn che nimen, ok kʼokel te jun tbʼanil ambʼil te jumajx.

3. Noqwit mintiʼ kʼujlaʼn qo tuʼn Jehová, ¿tzeʼntzulo qanqʼibʼil jaku ten toj ambʼil tzul?

³ Noqwit mintiʼ kʼujlaʼn qo tuʼn Jehová, ¿tzeʼntzulo qanqʼibʼil jaku ten toj ambʼil tzul? Kukxlo che tel xjal tjaqʼ kykawbʼil junjuntl xjal ex tjaqʼ tkawbʼil jun dios aju mintiʼx chʼin tkʼujlabʼil at, aju Satanás (2 Corintios 4:4; 1 Juan 5:19; kjawil uʼjit Apocalipsis 12:9, 12). Noqwit mintiʼ kʼujlaʼn qo tuʼn Jehová, ¡bʼisbʼajilxixlo aju ambʼil tzul!

4. ¿Tiquʼn xi tqʼoʼn Jehová ambʼil te Satanás tuʼn tkawin?

⁴ Tej tel tpan tibʼ Satanás tiʼj toklen Jehová tuʼn tkawin, ax ikx ok ten sbʼul kyiʼj tnejel qtat tuʼn tel kypan kyibʼ tiʼj Dios. Tqʼama Satanás qa mintiʼ toklen Jehová tuʼn tkawin tibʼaj tkyaqil twitz Txʼotxʼ. Ex tqʼama qa aju te tkawbʼil mas tbʼanel twitz tkawbʼil Jehová (Génesis 3:1-5). Tuʼnju at nim tnabʼil Jehová, xi tqʼoʼn ambʼil tuʼn tkyaj toj qʼanchaʼl aju tqʼama Satanás. Noqtzun tuʼnj, aju in bʼaj twitz Txʼotxʼ, in tzaj tyekʼun qa mintiʼ jun xjal nix Satanás jaku bʼant kykawin.

5. ¿Tiʼ in tzaj tyekʼun aju in bʼaj twitz Txʼotxʼ tjaqʼ kykawbʼil xjal?

⁵ Toj ambʼil jaʼlo, xiʼni txi nya bʼaʼn at twitz Txʼotxʼ toj il. Kyojju 100 abʼqʼi ma che ikʼ, o che kyim mas te 100 millón xjal kyoj qʼoj. In tzaj tqʼamaʼn Tyol Dios qa kyoj «mankbʼil tqʼijlalil», moqa kyoj bʼajsbʼil tqʼijlalil che okel xjal mas te «mya bʼaʼn» (2 Timoteo 3:1, 13). Ax ikx in tzaj tqʼamaʼn Tyol Dios lu: «Mya ax te xjal tajaw tchwinqlal, ex mlay tzʼel tnikʼ xjal tiʼj alkye bʼe bʼaʼn tuʼn tbʼet tuj» (Jeremías 10:23). Aju in bʼaj twitz Txʼotxʼ in tzaj tyekʼun qa ax tok qeju yol lu. Mintiʼ o kubʼ tbʼinchaʼn Jehová qe xjal tuʼn kykawin kyibʼaj txqantl tuʼn kyex kyipumal.

6. ¿Tiquʼn kukx in tzaj tqʼoʼn Jehová ambʼil tuʼn kyanqʼin xjal nya bʼaʼn?

⁶ ¿Tiquʼn kukx in tzaj tqʼoʼn Jehová ambʼil tuʼn kyanqʼin xjal nya bʼaʼn? Tuʼn tkyaj toj qʼanchaʼl qa oʼkx Tkawbʼil Dios jaku tzʼok te jun tbʼanel kawbʼil. Toj ambʼil tzul, kbʼel t-xitin Jehová kykyaqil xjal nya bʼaʼn. Aj tbʼaj jlu, ya mlay txi tqʼoʼn ambʼil tuʼn tok ten jun xjal yolil nya bʼaʼn tiʼj toklen tuʼn tkawin. Kʼajbʼel tuʼn Jehová aju otoq tzikʼ kyiʼj xjal tuʼntzun tkubʼ tyekʼun qa il tiʼj tuʼn kykubʼ najset qeju xjal nya bʼaʼn, iktzun tten ya mlay tentl nya bʼaʼn.

7, 8. ¿Alkye tten in tzaj tyekʼun Jehová tkʼujlabʼil qiʼj?

⁷ O tzaj tyekʼun Jehová tkʼujlabʼil te nimku tten. Qa ma qo xime tiʼj tkyaqil tbʼanel tbʼinchbʼen Dios. O bʼaj bʼinchaʼn tukʼil nim mil millón galaxia ex toj junjun galaxia at nim mil millón cheʼw ex planeta toj. Toj qgalaxia, aju Vía Láctea, jun kyxol qe cheʼw aju qʼij. Noqwit mintiʼ qʼij, mlay ten qanqʼibʼil twitz Txʼotxʼ. Tkyaqil tbʼinchbʼen Jehová in tzaj tyekʼun qa a Bʼinchal qe ex qa at qe tmod ik tzeʼn ipumalj, nabʼil ex kʼujlabʼil. Ikju, «maske  mintiʼ qʼanchaʼl te Dios, pero jaku tzʼel qnikʼ tiʼj qa ma qo kubʼ ten ximal tiʼj tkyaqilju o tbʼincha» (Romanos 1:20).

⁸ Kubʼ tbʼinchaʼn Jehová aju Txʼotxʼ tuʼn qanqʼin twitz. Tkyaqilju at twitz Txʼotxʼ at tajbʼen kye xjal ex kye txkup, moqa jil. Bʼaj tbʼinchaʼn Jehová jun tbʼanel kynajbʼil xjal tuʼn kyanqʼin twitz, xi tqʼoʼn jun kyximbʼetz tzʼaqli ex xi tqʼoʼn jun kyxmilal tuʼn kyanqʼin te jumajx (kjawil uʼjit Apocalipsis 4:11). Ax ikx xi tqʼoʼn «kywa xjal ex kywa kykyaqil txkaj txkup, tuʼnju kukx» at kʼujlabʼil «te jumajx» (Salmo 136:25).

9. Ate Jehová jun Dios te kʼujlabʼil, noqtzun tuʼnj, ¿tiʼ in nel tikʼun?

⁹ A Jehová aju Dios te tkʼujlabʼil, ikju, in nel tikʼun aju nya bʼaʼn. Jun techel, in tzaj tqʼamaʼn Salmo 5:4-6 jlu tiʼj Jehová: «Aya jun Dios mintiʼ in tzalaja tiʼj ju mya bʼaʼn; [...] in che el tikʼuna qe xjal bʼinchal mya bʼaʼn». Ax ikx in che el tikʼun «qe xjal sbʼul ex qe bʼyol xjal».

10, 11. a) ¿Ti kbʼajel kyiʼj qeju xjal nya bʼaʼn toj chʼintl ambʼil? b) ¿Tiʼ oyaj tzul tqʼoʼn Jehová kye qeju in che ajbʼen te?

¹⁰ Ik tzeʼn ma tzʼel qnikʼ tiʼj qa tuʼnju a Jehová aju Dios te kʼujlabʼil, in nel tikʼun tkyaqil nya bʼaʼn. Tuʼntzunju, aj tkubʼ t-ximen, kʼelel tiʼn tkyaqil nya bʼaʼn at twitz Txʼotxʼ. In tzaj ttziyen Tyol Dios qa che kbʼel najsaʼn qe xjal nya bʼaʼn, «atzun qeju qʼuql kykʼuʼj tiʼj Qman che okel etzal teju txʼotxʼ». Ax ikx in tzaj ttziyen qa noq chʼintl ambʼil atx taj tuʼn kykubʼ naj qeju aj qʼoj tiʼj Jehová (Salmo 37:9, 10, 20).

¹¹ Ax ikx in tzaj ttziyen Tyol lu: «Qe xjal bʼaʼn ok che etzal tiʼj ju txʼotxʼ, ex ax che tel tuj te jumajx» (Salmo 37:29). Ex in tzaj tqʼamaʼn jlu: «Qe xjal mans che okel etzal teju txʼotxʼ, ex puro tuj txubʼtxaj che tel» (Salmo 37:11). ¿Tiquʼn? Tuʼnju toj tkyaqil ambʼil in tzaj tqʼoʼn Jehová aju tbʼanel kye qeju kukx in che ajbʼen te. In tzaj ttziyen Tyol Dios jlu qe: «Kʼelel t-suʼn Dios taʼl kywitz kykyaqil; ex mintiʼtl kamik, ex mintiʼtl bʼis, ex mintiʼtl oqʼel, ex mintiʼtl kʼixkʼoj» (Apocalipsis 21:4). ¡Tbʼanelxix aju ambʼil tzul qʼoʼn kye qeju in che nimen teju Dios te kʼujlabʼil!

12. ¿Alkye aju «xjal tzʼaqlixix»?

¹² Ax ikx in tzaj tqʼamaʼn Tyol Dios jlu: «Qʼoʼnka kwent tiʼj ju xjal tzʼaqlxix ex mintiʼ tpaltil; tuj tqʼijlalil tzul ktel xjal lu tuj txubʼtxaj. Atzun qeju mibʼan che niman, che najel te jumajx; tuj tqʼijlalil tzul che najel qe mya bʼaʼn» (Salmo 37:37, 38). Aju «xjal tzʼaqlxix» in nel tnikʼ tiʼj Jehová ex tiʼj Tkʼwaʼl ex in xi tbʼiʼn aju in tzaj tqʼamaʼn Jehová (kjawil uʼjit Juan 17:3). Nim toklen tuʼn tok qeʼ qkʼuʼj qa noq chʼintl ambʼil atx taj tuʼn kykubʼ najsaʼn qe xjal nya bʼaʼn. «Atzunju xjal in tbʼinchaʼn tajbʼil Dios kyjel ten te jumajx.» (1 Juan 2:17.) Tuʼnju chʼix tkubʼ najsaʼn aju nya bʼaʼn, nim toklen tuʼn t-xi qbʼiʼn aju kawbʼil lu: «Qeʼk tkʼuʼja tiʼj Qman ex nimanxa» (Salmo 37:34).

13. ¿Alkye yekʼbʼil at tiʼj qa nimxix kʼujlaʼn qo tuʼn Jehová?

¹³ Ax tok aj il qoʼ, noqtzun tuʼnj, jaku qo nimen te Dios. Ax ikx jaku qo ok te tamiw noq tuʼnju chojbʼil bʼant tuʼn Jesús. Aju chojbʼil, atzun yekʼbʼil at qa nimxix kʼujlaʼn qo tuʼn Jehová. Tzaj t-samaʼn Jehová Tkʼwaʼl tuʼn tkyim tuʼntzun kyetz tzoqpaj qeju xjal bʼaʼn che nimen te tjaqʼ il ex kyimen (Kjawil uʼjit Romanos 5:12; 6:23). Kukx ajbʼen Jesús te Jehová toj nimku ambʼil tej tten toj kyaʼj, tuʼntzunju, ok qʼuqeʼxix tkʼuʼj Jehová tiʼj qa kukx kʼajbʼel te tej tzaj t-samaʼn twitz Txʼotxʼ. Kubʼ tnaʼn Jehová kʼixkʼoj tej tok tqʼoʼn twitz tiʼj alkye tten ok kybʼinchaʼn xjal nya bʼaʼn tiʼj Tkʼwaʼl. Noqtzun tuʼnj, kukx kolin Jesús tiʼj toklen Jehová tuʼn tkawin ex kubʼ tyekʼun qa kukx jaku tzʼajbʼen jun xjal tzʼaqli te Dios, axpe ikx kyoj ambʼil mas kwest.

14, 15. ¿Tiʼ tbʼanel in tzaj tqʼoʼn tkyimlen Jesús kye kykyaqil xjal?

¹⁴ Kukx ajbʼen Jesús te Dios tejxi tkyim, maske ok weʼ twitz nim nya bʼaʼn. ¿Tiʼ tbʼanel in tzaj tqʼoʼn tkyimlen Jesús kye kykyaqil xjal? O tzaj tqʼoʼn ambʼil kye xjal tuʼn kyanqʼin te jumajx toj akʼaj twitz Txʼotxʼ. Tqʼama apóstol Pablo qa aju chojbʼil, atzun jun yekʼbʼil tiʼj nimxix tkʼujlabʼil Jehová ex Jesús at qiʼj tej tqʼama jlu: «Tej mintiʼtoq qipun tuʼn qklet quʼnx qibʼ, kyjaʼtzun kyim Crist tuʼn qlaj tujxix tqʼijlalil, porque aj il qoʼ. Porque mlaylo txi tqʼon tibʼ jun xjal tuʼn tkyim tuʼn tlaj jun xjal tzʼaqlxix; ex qatzunlo qa at jun xjal jaku taqʼ tibʼ tuʼn tkyim tuʼn tlaj jun xjal bʼaʼn. Pero in tzaj tyekʼun Dios qa at tkʼujlalil qiʼj, tuʼnju o kyim Crist te qxel tej aj ilxtoq qoʼ» (Romanos 5:6-8). Ax ikx kubʼ ttzʼibʼen apóstol Juan lu: «Tuʼn jlu ma tzaj tyekʼun Dios tkʼujlalil qiʼj; tuʼnju tzaj t-samaʼn Dios oʼkxku jun Tkʼwaʼl, ul tzalu twitz txʼotxʼ tuʼntzun tten qchwinqlal noq tuʼn. Tuʼntzun jlu nneʼl qnikʼ tiʼj ju tkʼujlalil:  Mya aqeqoʼ ma qo kʼujlante Dios, noq oʼkx ate Dios ma qo tkʼujla ex tzaj t-samaʼn aju Tkʼwaʼl tuʼn tok te chojbʼil qil» (1 Juan 4:9, 10).

¹⁵ Tuʼnju «nimxix tkʼujlalil Dios kyiʼj xjal, kyjaʼtzun ma chin tzaj samaʼne tuʼn, aqine oʼkxku jun Tkʼwaʼl, tuʼntzun miʼn kynaj kykyaqil qeju ma che okslan wiʼje, noq oʼkx tuʼn tten kychwinqlal te jumajx» chi Jesús (Juan 3:16). Maske kubʼ tnaʼn Jehová kʼixkʼoj tej ttzaj tqʼoʼn Tkʼwaʼl te chojbʼil, tuʼn jlu kubʼ tyekʼun qa kʼujlaʼnxix qe xjal tuʼn. Ex aju tkʼujlabʼil lu, kukx ktel te jumajx. Kubʼ ttzʼibʼin Pablo jlu: «Qʼuql nkʼuʼje tiʼj, mi aʼl jun bʼaʼn tel paʼnte qe tiʼj tkʼujlalil Dios; mi kamik, mi ju qchwinqlal tzalu twitz txʼotxʼ, mi qe anjel, mi qe nejenel mintiʼ qʼanchaʼl, mi qeju at kyipumal, mi ju at jaʼlo, mi ju tzul, mi qeju ateʼ twitz kyaʼj, mi qeju ateʼ tjaqʼxi txʼotxʼ, ex mi jun tchʼisbʼen Dios jaku qo el kypaʼn tiʼj tkʼujlalil Dios, aju ma tzaj qʼoʼn qe tuʼn Jesucrist aju Qajaw» (Romanos 8:38, 39).

16. ¿Tiʼ aju Tkawbʼil Mesías ex alqe o txi tqʼoʼn Jehová oklenj tuʼn tkawin toj Kawbʼil lu?

¹⁶ Aju Tkawbʼil Mesías, atzun juntl yekʼbʼil tiʼj qa kʼujlaʼn qo tuʼn Jehová. Aju Kawbʼil lu, jun kawbʼil o kubʼ tqʼoʼn Jehová ex o txi tqʼoʼn toklen Jesús tuʼn tkawin toj Kawbʼil lu, aju kʼujlaʼn qe xjal tuʼn ex jaku bʼant-xix tkawin kyibʼaj (Proverbios 8:31). Ax ikx, o che jaw skʼoʼn 144,000 xjal tuʼn kykawin toj kyaʼj. Aj kyjaw anqʼin tuʼn kyxiʼ toj kyaʼj, mlay tzikʼ tnaʼl kyuʼn aju ikʼ kyiʼj tej kyanqʼin tzalu twitz Txʼotxʼ (Apocalipsis 14:1). Tej tten Jesús twitz Txʼotxʼ, mas yolin tiʼj Tkawbʼil Dios toj tpakbʼabʼil ex xi tqʼamaʼn kye t-xnaqʼtzbʼen tuʼn t-xi kyqanin jlu toj kynaʼj Dios: «A Qman ata tuj kyaʼj, tenwt tchiylal tbʼiya qeye. E ttzaj ju tkawbʼila. Bʼant-xwit ju tajbʼila twitz txʼotxʼ ik tzaʼn in bʼant tuj kyaʼj» (Mateo 6: 9, 10). In qo yon tuʼn tjapun kywiʼ qeju yol e kyaj qʼamaʼn toj naʼj Dios lu, aj ttzaj tiʼn Tkawbʼil Dios nimxix kʼiwlabʼil kye xjal.

17. ¿Tiquʼn junxitl tkawbʼil Jesús twitz kykawil xjal?

¹⁷ In nel qnikʼ tiʼj qa kʼujlaʼn qe xjal tuʼn Jesús ex junxitl te tkawbʼil twitz kykawil xjal. Tuʼn kykawbʼil xjal o che kyim nim millón xjal kyoj qʼoj. Atzunte Jesús axix tok kʼujlaʼn qo tuʼn ex in nel tkanoʼn qe tbʼanel tmod Jehová, mas aju tkʼujlabʼil (Apocalipsis 7:10, 16, 17). Tqʼama Jesús lu: «Kytzaje wukʼile kykyaqile aqeye ma che sikte tuʼn aqʼuntl ex ma che sikte tjaqʼ iqtz, oktzun che ojlale wuʼne. Kyiqanxe nyuwiye, ex kyxnaqʼtzam kyibʼe wiʼje, porque mans qine ex mans wanmiye; oktzun knetel jun ojlabʼl kyuʼne te kyanmiye. Porque aju nyuwiye mya yajkux tiqanjtz, ex sasj wiqatze kxel kyiqane» (Mateo 11:28-30). ¡Nimxix kʼujlaʼn qo tuʼn Jesús!

18. a) ¿Tiʼ in bʼant atxix toj abʼqʼi 1914? b) ¿Ti qo xnaqʼtzal tiʼj toj juntl xnaqʼtzbʼil?

¹⁸ In tzaj t-xnaqʼtzaʼn Tyol Dios qa tzaj tzyet tuʼn tkawin Tkawbʼil Dios toj abʼqʼi 1914. Atxix toj ambʼil aju tzaj tzyet tuʼn kyjaw chmet qeju mankbʼil, moqa último, xjal tuʼn kykawin tukʼil Jesús toj kyaʼj. Ax ikx in bʼaj chmet jun kʼloj xjal aʼyeju che kjel anqʼil aj tkubʼ najsaʼn tkyaqil nya bʼaʼn ex che anqʼil toj Tbʼanel Najbʼil. Aju kʼloj xjal lu tok tbʼi te «nimxix kyajlal xjal» (Apocalipsis 7:9, 13, 14). ¿Jteʼ kybʼaj qeju «nimxix kyajlal xjal» at toj ambʼil jaʼlo? ¿Tiʼ tajbʼil Jehová tuʼn tbʼant kyuʼn? Toj juntl xnaqʼtzbʼil tzul qʼoʼn tzaqʼwebʼil kyiʼj xjel lu.