1. 1) ¿Katiyejua kualneskayot okachi kiixnextia Dios? 2) ¿Keniuj timomachiliaj keman tikmatij ke Dios yejuatsin netasojtalis?

BIBLIA kijtoua ke “Dios yejuatsin netasojtalis” (1 Juan 4:8, TNM). Nejin kijtosneki ke maski Dios kipia miak kualneskayomej, netasojtalis yejua tein okachi kiixnextia. Yejuatsin amo sayoj kimachilia netasojtalis, ta yejuatsin netasojtalis. Nochi tein kichiua, netasojtalis kiolinia maj kichiua. Semi tiktasojkamatij maj nejin kualneskayot kioliniani maj kichijchiuani nochi tein onkak iluikak uan taltikpak.

2. ¿Toni tikyekmatij ke kichiuas Dios porin techtasojta? (Xikonita taixkopin ipeujyan tamachtilis.)

² Tikmatij ke Jiova kitasojta nochi tein kichijchiuak. Yejua ika tikyekmatij ke kichiuas nochi tein motenkauak. Kemej neskayot, kemej techtasojta, “kitalij ya se tonal kuak Yejuatsin kinixkomakas in taltikpakuani ika ne ajsikataixejekolis”, oso ika melaujkayot, itechkopa iKonetsin, Jesucristo (Hech. 17:31). Tikyekmatij ke Jesús ijkon kichiuas. Ompa, nochin taltikpakneminij tatakamatinij nochipaya kipiaskej yekmelauj yolpakilis uan se tel kualtsin nemilis.

3. ¿Keniuj yeskia tonemilis satepan komo Jiova amo techtasojtaskia?

³ Komo Jiova amo techtasojtaskia, ¿keniuj yeskia tonemilis satepan? Taltikpakneminij kisentokaskiaj kinixyekanaskiaj oksekin ika ichikaualis Satanás, inindios akin amo yolkuali (2 Cor. 4:4; 1 Juan 5:19; xikonixtajtolti Apocalipsis 12:9, 12). ¡Tonemilis satepan semi tetayokoltij yeskia!

4. ¿Keyej kikauak Jiova maj Satanás kiixnamikini?

⁴ Keman Satanás kiixnamikik Jiova, no kichiuak maj Adán uan Eva kiixnamikinij. Taomeyolotij ox Dios kinamiki kiixyekanas nochi tein onkak. Uan no, kiyekijtoj ke yejua okachi kuali taixyekankej ke Dios (Gén. 3:1-5). Kemej Jiova se Dios tel tamatkej, kikauak maj panouanij xiujmej uan ijkon Satanás kinextiskia ox melauak tein kijtojka. Sayoj ke senkis moitani ke nion Satanás nion taltikpakneminij kuali taixyekanaj.

5. ¿Toni kinextiani tein kichiuanij taltikpakneminij itech xiujmej tein panouanij?

⁵ Itech totonaluan, nikan taltikpak okachi motaouijkantalia. Itech 100 xiujmej tein panouanij, panoua 100 millones taltikpakneminij momikilijkej itech neteuilismej. Biblia kijtoua ke itech itamian tonalmej, taltikpakneminij okachi yeskiaj amo yolkualmej (2 Tim. 3:1, 13). No kijtoua ke taltikpaknenkej “amo iaxka iojtokalis. Amo iaxka taltikpaknenkej akin nejnentok nion kiyekanas itaksalis” (Jer. 10:23). Semi melaujkej nejin tajtolmej. Tein kichiuanij taltikpakneminij itech xiujmej tein panouanij kinextiani ke Jiova amo techchijchiuak kemej tejuan toselti uelis timoixyekanaskej oso maj technamiki ijkon tikchiuaskej, ta moneki maj yejuatsin techpaleui.

6. ¿Keyej kinkaua Dios maj kisentokakan nemikan akin amo yolkualmej?

⁶ ¿Keyej kinkaua Jiova maj kisentokakan nemikan akin amo yolkualmej? Porin ijkon monextiani ke sayoj iTekiuajyo Dios okachi kuali taixyekana. Amo uejkaua, Dios kinixpolos nochin akin amo yolkualmej. Satepan ke kichiuas nejon, komo aksa oksepa taomeyolotia ox yejuatsin kinamiki taixyekanas, yejuatsin niman kichiuas tein monekis. Uelis kikuis tein kichiuanij taltikpakneminij itech xiujmej tein panouanij uan ijkon kinextis ke taixnamikinij moneki ixpoliuiskej. Amo keman oksepa kikauas maj nemikan akin amo yolkualmej.

7, 8. ¿Keniuj kinextia Jiova ke techtasojta?

⁷ Jiova technextilia inetasojtalis ika miak taman. Kemej neskayot, xikonnemili keniuj tel ueyi uan tel kualtsin chijchiujtok iluikak uan taltikpak. Itech iluikak onkak tel miak planetas uan sitalimej. Semej nejon sitalimej yejua Tonaltsin. Komo amo yetoskia, amo onkaskia nemilis nikan taltikpak. Kemej kijtoua Romanos 1:20, nochi tein onkak kinextia ke Jiova toTachijchiujkauj uan ke kipia kualneskayomej kemej chikaujkauelilis, tamatilis uan netasojtalis.

⁸ Jiova kichijchiuak taltikpak uan ijkon nochi tein yoltok ueliskia ompa nemis ika yolpakilis uan kintalij taltikpakneminij itech se  kualtsin xochital. No kinmakak se tanemilil tein yektik uan kinchijchiuak kemej ueliskiaj nemiskej nochipaya (xikonixtajtolti Apocalipsis 4:11). Uan no, Salmo 136:25 kijtoua ke Jiova kitamaka nochi tein yoltok, porin inetasojtalis uejkaua nochipaya.

9. Maski Jiova semi tetasojtakej, ¿toni kitauelita?

⁹ Maski Jiova yejuatsin Dios tetasojtakej, kitauelita nochi tein amo kuali. Yejua ika Salmo 5:4-6 kijtoua ke Jiova amo kiyolpaktia tein amo kuali uan ke kintauelita taltikpakneminij akin amo yolkualmej, akin tateuiaj uan akin takajkayauaj.

10, 11. 1) ¿Toni kinpanos amo uejkaua akin amo yolkualmej? 2) ¿Keniuj kintatiochiuis Jiova akin kitakamatij?

¹⁰ Kemej tikitakejya, Jiova yejuatsin Dios tetasojtakej uan kitauelita nochi tein amo kuali. Yejua ika, keman kiixtalis, kijkuanis nochi tein amo kuali itech nochi tein kichijchiuak. Itech Biblia motenkaua ke akin amo yolkualmej ixpoliuiskej, “sayoj ke akin mochiaj itech Jiova, yejuan ininaxkatis taltikpak”. Uan no motenkaua ke amo uejkaua ixpoliuiskej akin kiixnamikij (Sal. 37:9, 10, 20).

¹¹ ¿Keniuj kintatiochiuis Jiova akin kitakamatij uan kitasojkamatij inetasojtalis? Kinmakas se tel kualtsin nemilis satepan. Itech Biblia motenkaua ke “akin yolmelaujkej ininaxkatis taltikpak” uan nemiskej ompa nochipaya (Sal. 37:29). Taltikpakneminij akin amo kikauaskej Dios semi yolpakiskej uan kipiaskej ueyi yolseuilis (Sal. 37:11). ¿Keyej? Porin toDios tetasojtakej nochipa kichiua tein okachi kuali ininka itekitikauan akin amo kikauaj. Biblia kijtoua ke yejuatsin “kinelkaualtis de ninchokilisuan de nochi itaneltokakauan. Uan amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok”. Nochi tein amo kuali amo onkasok (Apoc. 21:4).

12. ¿Toni moneki tikchiuaskej komo tiknekij maj Jiova techita kemej akin amo kinamiki maj se kitajtakolti teisa?

¹² Salmo 37:37, 38 kijtoua ke akin Jiova kiitas ke “amo motajtakolmakani”, oso ke amo kinamiki maj se kitajtakolti teisa, kipias se kualtsin nemilis ika yolseuilis satepan. No kijtoua ke Dios kinixpolos nochin akin amo yolkualmej uan amo tatakamatij. Komo tiknekij maj Jiova techita kemej akin amo kinamiki maj se kitajtakolti teisa, moneki tikixmatiskej yejuatsin uan iKonetsin, uan tiktakamatiskej nochi tein Jiova kijtoua (xikonixtajtolti Juan 17:3). Moneki titakuaujtamatiskej ke amo uejkaua ixpoliuis nochi tein amo kuali, sayoj ke akin kichiua tein Dios kiyolpaktia nemis nochipaya (1 Juan 2:17). Kemej amo uejkaua ixpoliuiti nochi tein amo kuali, motelneki maj tiktakamatikan nejin tayolmajxitilis: “Xikchia Jiova uan xiksentoka itech ojti tein iaxka” (Sal. 37:34).

13. ¿Toni okachi kinextia ke Dios techtasojta?

¹³ Maski titajtakolejkej, ueli tiktakamatij Dios. No ueli timochiuaj tiitasojikniuan porin Jesús kitemakak inemilis. Nejin yejua tein okachi kinextia ke Jiova techtasojta. Yejuatsin kiualtitanik iKonetsin maj momikiliki uan  ijkon taltikpakneminij akin tatakamatij uelis amo kipiaskejok tajtakol nion momikiliskej (xikonixtajtolti Romanos 5:12 uan 6:23). Jiova kiyekmatia ke Jesús nochipa kitakamatiskia keman yetoskia nikan taltikpak, porin tel miak xiujmej ijkon kichiuak ompa iluikak. Jiova semi kiyolkokoj kiitas keniuj taltikpakneminij kitajyouiltijkej iKonetsin akin kiteltasojta. Sayoj ke Jesús nochipa kinextij ke Dios kinamiki maj techixyekana. Uan no, kinextij ke se taltikpaknenkej akin amo tajtakolej uelis nochipa kitakamatis maski kipanos uejueyi ouijkayomej.

14, 15. ¿Keniuj techpaleuia tinochin imikilis Jesús?

¹⁴ Jesús semi tajyouij, sayoj ke hasta keman kimiktijkej amo kikauak Dios uan kinextij ke sayoj iPopaj kinamiki techixyekanas. ¿Keniuj techpaleuia tinochin imikilis Jesús? Techpaleuia maj ueli tikselikan nemilis nochipaya itech Xochital. Tatitanil Pablo kimelauak ke inemilis Jesús tein kitemakak kinextia ueyi netasojtalis tein Jiova uan Jesús techpialiaj. Pablo kijtoj ke semi amo akin moajsiskia maj ika momikili se “tagat ten yolchipauak” uan ke xa moajsiskiaj sekin akin ika momikiliskiaj se “tagat ten melau yolkuali”. Sayoj ke kijtoj ke Dios kinextij ke semi techtasojta keman kiualtitanik iKonetsin maj toka momikiliki maski “tikatkaj semi titajtakolejke” (Rom. 5:6-8). Uan tatitanil Juan kijkuiloj: “Dios technextilij ya ne itetasojtalistsin ijkuin: Dios techualtitanilij ya ne iyojtsin Konetsin nikan taltikpak para maj tejuan tikpiakan ne nachipa nemilis ika ne chikaualis de Cristo. In tetasojtalis de Dios monextijtinemi ijkuin, ke amo tejuan achtopa tiktasojtakke Totajtsin Dios. Ta, achto Yejuatsin techtasojtak tejuan. Uan Yejuatsin techualtitanilij Nikonetsin yojtsin para ma Yejuatsin technekixtiltiki ka in mikilis den totajtakoluan” (1 Juan 4:9, 10).

¹⁵ Uan no, Jesús kijtoj ke Dios semi kintasojta taltikpakneminij uan yejua ika kitemakak inemilis iKonetsin akin sayoj se uan ijkon “nochi ne ten iuantsin takuautamatiske,  yejuan nojonkes ma amo ixpoliuikan. Ta, ma kipiakan ne yek nemilis nachipa” (Juan 3:16). Maski semi kiyolkokoj, Jiova kikauak maj iKonetsin toka momikiliani. Nejin kinextia ke techteltasojta, uan nejon amo keman mopatas. Yejua ika Pablo kijkuiloj: “Nikyekajsikaneltoka ke itech nijin itetasojtalistsin de Dios amo aken uelis techtsinkixtis, maski timikiske uan maski tiyoltinemiske. Uan amo no in ángeles, nion in amokuali ejekame, nion in uejueyi tamatinime [...,] tajyouilis ten axkan tikpanotokke [...,] tajyouilis ten topan uetsikiu mosta oso uipta [...,] tayekanani ten ualpantemoske den ajko [...] nion no nekes ten ualpankisaske den tani. Uan amo ongak okse taman ten Dios itachijchiu ten uelis techtsinkixtis itech in tetasojtalistsin de Totajtsin Dios, porin tipoutinemij iuan Totekotsin Cristo Jesús” (Rom. 8:38, 39).

16. 1) ¿Toni Tekiuajyot tein moajsi imako Mesías? 2) ¿Akoni kiixtalij Dios maj taixyekana itech nejon Tekiuajyot?

¹⁶ Okse taman tein kinextia ke Jiova techtasojta yejua Tekiuajyot tein moajsi imako Mesías. Nejin Tekiuajyot se taixyekanalis tein kiixtalij Dios, uan yejuatsin kiixtalij se tekiuaj akin kintasojta taltikpakneminij uan kuali kimati keniuj kinixyekanas (Prov. 8:31). Nejin tekiuaj yejua Mesías, Jesucristo. Uan no, Dios kinixpejpenak 144,000 taltikpakneminij maj tekiuajtikan iuan Cristo ompa iluikak. Tein kinpanok itech ininnemilis nikan taltikpak kinpaleuis keman taixyekanaskej maj kinajsikamatikan taltikpakneminij (Apoc. 14:1). Keman Jesús nemik nikan taltikpak, okachi ika tanojnotsak iTekiuajyo Dios. Yejua kinnextilij imomachtijkauan maj ijkon kitataujtikan Dios: “ToTajtsin akin tiyetok iluikak, maj moueyitali motokay. Maj uiki motekiuajyo. Maj mochiua motanejnekilis, kemej iluikak, no ijkon nikan taltikpak” (Mat. 6:9, 10, TNM). Semi tikchiaj maj mochiua tein moijtoua itech nejin netataujtil uan maj Tekiuajyot kinualkuili tatiochiualismej nochin taltikpakneminij.

17. ¿Keniuj semi taman kemej taixyekana Jesús uan kemej taixyekanaj taltikpakneminij?

¹⁷ Semi taman kemej Jesús taixyekana uan kemej taltikpakneminij taixyekanaj. Taltikpakneminij kichiuanij maj onka neteuilismej uan maj tel miakej momikilikan. Sayoj ke Jesús techtasojta uan no kipia kualtsitsin kualneskayomej tein kipia Jiova, okachi netasojtalis (Apoc. 7:10, 16, 17). Jesús motenkauak: “Xiualakan nouan, nochi namejuan naken nanmotekitiltijtokke uan nantamamatokke [...] uan Nejuatsin namechmakas ne yolseuilis. Uan nikneki xikselikan notamachilis itech namonemilispan, keme se yugo ten uelis namechyekantinemis tech moojpan. Uan ika kuali ximomachtikan de nejua, porin Nejuatsin niyolyemankatagat; uan niyolkualtagat uan ijkon nankajsiske ne yolseuilis tech namoyolojuan. Porin in yugo de namechtalilis, yejua ne semi amo etik. Uan in tamamal ten Nejuatsin namechmakas, yejua ne semi amo no tesiouti” (Mat. 11:28-30). ¡Jesús semi techtasojta!

18. 1) ¿Toni panouani itech xiuit 1914 uan hasta axkan? 2) ¿Toni tikitaskej itech okse tamachtilis?

¹⁸ Biblia tamachtia ke iTekiuajyo Dios peuak taixyekana ompa iluikak itech xiuit 1914. Itech nejon xiuit uan hasta axkan mosentilianij akin nemijok nikan taltikpak uan pouiskej iniuan 144,000 akin tekiuajtiskej iuan Cristo ompa iluikak. No mosentilianij seki oloch taltikpakneminij akin makisaskej keman ixpoliuis nochi tein amo kuali uan nemiskej itech Xochital. Nejin oloch taltikpakneminij moixmatij kemej “uel miak tagayot” (Apoc. 7:9, 13, 14). ¿Kanachi taltikpakneminij pouij ompa? ¿Toni kichia Dios maj kichiuakan? Tikitaskej itech okse tamachtilis.