1. Ko e heigoa e matapatu mahani he Atua, ti taute fēfē he mena nei a koe ke logona hifo hagaao ki a ia?

KUA talahau he Tohi Tapu ki a tautolu ko e “Atua ko e fakaalofa a ia.” (1 Ioane 4:8) Ka ko e heigoa e kakano mooli he mena nei? Ko e fakaalofa kua nakai ni ko e taha he tau mahani ofoofogia loga ha Iehova. Ko e mahani mua ue atu haana a ia. Nakai ni ha ha ia Ia e fakaalofa. Ko e fakaalofa a ia. Takitaki he fakaalofa e tau mena oti ne taute e ia. Ko e fakaaue ha ia ha tautolu kua omoomoi he fakaalofa a Iehova ke tufuga e lagi mo e lalolagi katoatoa mo e tau mena momoui oti kana!

2. Ko e heigoa e mauokafua kua foaki he fakaalofa he Atua ki a tautolu? (Kikite fakatino he kamataaga.)

² Ha ha ia Iehova e tau logonaaga totonu mo e hofihofi ke he tufugatia haana. Foaki he fakaalofa haana ki a tautolu e mauokafua ko e finagalo haana ma e tau tagata to fakamooli ke he puhala mitaki lahi mahaki. To fiafia mooli e fua ma lautolu kua omaoma ki a ia. Ma e fakatai, ha ko e fakaalofa, “kua kotofa e [Iehova] e aho ke fakafili ai e lalolagi mo e tututonu he tagata kua kotofa ne ia,” ko Iesu Keriso. (Gahua 17:31) Kua mauokafua  a tautolu to hoko e fakafiliaga nei. Ma e tau tagata omaoma, to kakano ai ko e vahā homo ue atu anoiha ka tumau tukulagi.

3. To fēfē la e moui kaeke ke nakai fakaalofa e Atua ke he tau tagata?

³ To fēfē e vahā anoiha he tau tagata kaeke ke nakai ko e fakaalofa e mahani mua ue atu he Atua? To matutaki e tau tagata ke pule ke he taha mo e taha ti fakaohooho ai he atua nakai fakaalofa mo e fakavihia ko Satani. (2 Korinito 4:4; 1 Ioane 5:19; totou Fakakiteaga 12:9, 12.) To kelea ue atu e vahā anoiha kaeke ke nakai fakaalofa a Iehova ki a tautolu!

4. Ko e ha ne fakaatā e Iehova e totokoaga ke he pule haana?

⁴ He magaaho ne totoko e Satani e tuaga pule he Atua, kua fakaohooho foki e ia e tau matua fakamua ha tautolu ke totoko. Ne hūhū toko e ia e tonuhia he Atua ke eke mo Pule he Lagi mo e Lalolagi Katoatoa. Talahau e Satani to mitaki atu e pule haana ke he pule he Atua. (Kenese 3:1-5) Pulotu ai, ne fakaatā e Iehova e magaaho kū ma Satani ke lali ke fakamooli e talahauaga haana. Ka ko e tau fua ne fakakite fakamaaliali kua nakai maeke he tau tagata po ko Satani ke eke mo tau pule mitaki.

5. Ko e heigoa kua fakamooli fakamaaliali he fakamauaga tuai he tau tagata?

⁵ He vahā nei kua tolomaki atu e kelea he lalolagi. Molea 100 miliona tagata ne mamate he tau felakutaki ke he 100 tau kua mole. Talahau he Tohi Tapu hagaao ke he “tau aho fakamui”: “Ko e tau tagata mahani kelea mo e tau tagata kua fakavai, to tolomaki atu a lautolu ke au atu he kelea.” (2 Timoteo 3:1, 13) Talahau foki he Tohi Tapu: “Iehova na e, kua iloa e au, kua nakai ha i ai ke he tagata hana puhala, nakai ha ha he tagata kua fano ke fakatonu e mena ke fano a ia ki ai.” (Ieremia 10:23) Kua fakamooli fakamaaliali he fakamauaga tuai e tau kupu ia. Nakai tufuga e Iehova e tau tagata aki e lotomatala po ke tonuhia ke pule ki a lautolu ni ka e nakai ha ha ia lautolu e takitakiaga Haana.

6. Ko e ha kua fakaatā he Atua e mahani kelea?

⁶ He fakaatā e mahani kelea ke fai magaaho ai, ne fakamooli foki e Iehova ko e pule ni haana ka kautū. He vahā anoiha, to moumou he Atua e tau mahani kelea oti kana. Mole ia, ka hūhū toko he ha tagata e puhala fakaalofa haana he pule, to fai mena ka taute agataha he Atua. Maeke a ia ke fakaaoga e fakamauaga tuai he tau tagata mo fakamooliaga ko e tau tagata totoko pihia kua lata ke utakehe fakamafiti. To nakai liu foki ke fai mahani kelea.

7, 8. Fakakite fēfē e Iehova e fakaalofa haana?

⁷ Kua fakakite e Iehova e fakaalofa lahi haana ke he tau puhala loga. Manamanatu ke he lahi mo e ofoofogia he ha tautolu a lagi mo e lalolagi katoatoa. Kua tufuga ai ke he  tau piliona he tau fuhifuhi fetū, ti igatia e fuhifuhi fetū mo e tau piliona fetū mo e tau palaneta. He ha tautolu a fuhifuhi fetū, ko e Milky Way, taha he tau fetū ko e laā. Ka nakai fai laā, to nakai fai mena kua moui he lalolagi. Ko e tau tufugatiaaga oti nei kua hagaao ki a Iehova ko e ha tautolu a Tufuga ti fakakite e tau mahani haana, tuga e malolō, pulotu, mo e fakaalofa. Ē, ko e “hana [Atua] tau mena kua nakai kitia, tali mai he vaha ne eke e lalolagi, kua kitia ia he manamanatu e tau mena ne eke, ko e hana mana haia kua tukulagi, mo e hana Atua.”​—Roma 1:20.

⁸ Ne taute e Iehova e lalolagi mua atu ke moui. Ko e tau mena oti he lalolagi kua aoga ai ke he tau manu mo e tau tagata. Tufuga he Atua e kaina fulufuluola ma e tau tagata ke nonofo ai ti foaki ki a lautolu e tau manamanatuaga mo e tau tino mitaki katoatoa ne talaga ke momoui tukulagi. (Totou Fakakiteaga 4:11.) Lafi ki ai, “ko ia ne foaki mena kai ke he tau mena momoui oti kana; ha ko e mena tukulagi ni hana fakaalofa.”​—Salamo 136:25.

9. Pete ko Iehova ko e Atua he fakaalofa, ko e heigoa ne vihiatia e ia?

⁹ Ko Iehova ko e Atua he fakaalofa, ka e vihiatia e ia e mena kua kelea. Ma e fakatai, talahau he Salamo 5:4-6 hagaao ki a Iehova: “Ha ko koe, nakai ko e Atua ke fiafia ke he mahani kelea . . . kua vihiatia e koe a lautolu oti kua mahani hepehepe.” Vihiatia foki e ia e ‘tau tagata lima toto mo e fakavai.’

10, 11. (a) Ko e heigoa ka tupu ke he tau tagata kelea? (e) To palepale fēfē e Iehova e tau tagata omaoma?

¹⁰ He magaaho tonu, to utakehe e Iehova e mahani kelea mai he lagi mo e lalolagi katoatoa ha ko ia ko e Atua he fakaalofa mo e vihiatia e ia e mena kua kelea. Mavehe mai he Kupu he Atua: “Ko e mena fakaotioti a lautolu kua mahani kelea; ka ko lautolu kua talifaki kia Iehova, to eke ma lautolu e motu. Toe tote, ti nakai ha i ai e tagata mahani kelea.” Ko e tau fī ha Iehova “to mole atu a lautolu, tuga ne ahua.”​—Salamo 37:9, 10, 20.

¹¹ Mavehe mai foki e Kupu he Atua: “To eke ni e motu ma e tau tagata tututonu, to nonofo muatua ai a lautolu.” (Salamo 37:29) Ko e tau tagata mahani fakamooli to “fakafiafia foki e lautolu a lautolu ha ko e monuina kua lahi.” (Salamo 37:11) Ko e ha? Ha ko e ha tautolu a Atua fakaalofa kua taute tumau e tau mena kua mitaki lahi mahaki ma e tau fekafekau fakamooli haana. Talahau he Tohi Tapu ki a tautolu: “To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.” (Fakakiteaga 21:4) Ko e vahā homo ue atu mooli anoiha ma e tau tagata omaoma kua loto fakaaue ke he fakaalofa he Atua!

12. Ko hai a ia “kua mahani hakohako”?

¹² Talahau he Tohi Tapu ki a tautolu: “Kia manamanatu kia ia kua mahani hakohako, mo e kitekite kia ia kua mahani tonu; ha ko e fakahikuaga he tagata ia ko e monuina haia. Ka e mahaikava fakalataha e tau holifono; ko e fakahikuaga foki he tau tagata mahani kelea ko e malaia haia.” (Salamo 37:37, 38) Ko “ia kua mahani hakohako” kua iloa a Iehova mo e haana Tama ti omaoma ai he taute e finagalo he Atua. (Totou Ioane 17:3.) Ne talitonu mooli a ia “ha ne mole atu foki e lalolagi katoa mo e hana tau manako lahi; ka ko e tagata kua eke e finagalo he Atua to tumau a ia tukulagi.” (1 Ioane 2:17) Ha kua tata mai e moumouaga he lalolagi, kua mafiti  a tautolu ke “talifaki . . . kia Iehova, mo e tumau ke he hana puhala.”​—Salamo 37:34.

13. Ko e heigoa e fakakiteaga mua ue atu he fakaalofa he Atua?

¹³ Pete he nakai mitaki katoatoa a tautolu, maeke a tautolu ke omaoma ke he Atua. Maeke foki a tautolu ke moua e fakafetuiaga tata mo Iehova ha ko e poa lukutoto ha Iesu, ko e fakakiteaga mua ue atu he fakaalofa he Atua. Foaki e Iehova e lukutoto ke maeke he tau tagata omaoma ke moua e magaaho ke tokanoa mai he agahala mo e mate. (Totou Roma 5:12; 6:23.) Ne leva e fakamooli ha Iesu ke he Atua he nofo a ia he lagi, ti mauokafua a Iehova to fakatumau e fakamooli he Tama haana he lalolagi. Ha ko e Matua fakaalofa, ne hukia lahi mahaki a ia he mogo ne kitia e ia e kelea ne taute he tau tagata ke he Tama haana. Ka e lalago fakamooli e Iesu e tonuhia he Atua ke pule ti fakakite ko e tagata mitaki katoatoa kua maeke ke fakamooli tumau ke he Atua pete ni he tau tuaga uka lahi.

14, 15. Ko e heigoa ne taute he mate ha Iesu ma e tau tagata?

¹⁴ Pete ne tau kamatamata mamahi lahi mahaki, ne fakamooli mo e lalago tumau e Iesu e tonuhia ha Iehova ke pule. Kua lata ia tautolu ke fakaaue ha ko e puhala he mate ha Iesu, ne totogi e ia e palepale he lukutoto ha kua foaki ai ke he tau tagata e magaaho ke momoui tukulagi he lalolagi foou he Atua! Fakamaama he aposetolo ko Paulo e fakaalofa kua fakakite e Iehova mo Iesu puhala he lukutoto. Pehē a ia: “Ha ko e mena ne matulei a Keriso ke he vaha ne lata ai, ka kua lolelole gaia a tautolu, ko e hukui he tau tagata matahavala. Ha kua nakai ligaliga maeke ia taha ke mate ke hukui aki e tagata tututonu; ka ko e tagata mahani mitaki, na kua fakamalolo taha ke mate ke hukui aki a ia heute he pihia; Ka kua fakakite mai he Atua hana fakaalofa kia tautolu he matulei a Keriso ke hukui aki a tautolu, ka ko e tau tagata hala agaia a tautolu.” (Roma 5:6-8) Ne tohi he aposetolo ko Ioane: “Ko e mena foki hanai ne fakakite mai ai e fakaalofa he Atua kia tautolu, he fakafano mai he Atua hana  Tama fuataha ke he lalolagi, kia momoui a tautolu kia ia. Ko e fakaalofa hanai, nakai ko e fakaalofa ha tautolu ke he Atua, ka kua fakaalofa mai a ia kia tautolu; ne fakafano mai foki e ia hana Tama ko e lukutoto mo e tau hala ha tautolu.”​—1 Ioane 4:9, 10.

¹⁵ Pehē a Iesu “nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.” (Ioane 3:16) Pete he fakamamahi lahi ki a Iehova, ne foaki e ia e Tama haana mo lukutoto. Fakakite he mena nei e fakaalofa lahi mahaki haana ke he tau tagata. Mo e to tumau tukulagi e fakaalofa ia. Tohi e Paulo: “Kua iloa tonuhia e au nakai maeke ke he mate, po ke moui, po ke tau agelu, po ke tau iki, po ke tau toa, po ke tau mena ha i ai nai, po ke tau mena ne tatali, Po ke tokoluga, po ke hokulo, po ke taha mena kua eke, nakai maeke ke he tau mena ia ke fakamavehe a tautolu mo e fakaalofa he Atua, ha ia Keriso Iesu ha tautolu a Iki.”​—Roma 8:38, 39.

16. Ko e heigoa e Kautu faka-Mesia, ti ko hai ne fifili e Iehova ke eke mo Pule i ai?

¹⁶ Ko e fakatufono he Atua, ko e Kautu faka-Mesia ko e fakamooliaga foki he fakaalofa ha Iehova ma e tau tagata. Puhala fe? Fitā he fifili e Iehova e Pule kua fakaalofa ke he tau tagata ti kua latatonu ke pule, ko Iesu Keriso haia. (Tau Fakatai 8:31) Lafi ki ai, ko e 144,000 ne fifili mai he tau tagata ke pule mo Keriso he lagi. Ka fakaliu tu mai a lautolu, to fakaaoga e lautolu e iloaaga ha lautolu he mogo ne eke a lautolu mo tau tagata. (Fakakiteaga 14:1) He nofo a Iesu he lalolagi, ko e Kautu e matapatu kupu he fakaakoaga haana, ti fakaako e ia e tau tutaki haana ke liogi: “Ha mautolu a Matua na e, ha ha he lagi, kia tapu hau a higoa. Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.” (Mataio 6:9, 10) Amanaki lahi atu a tautolu ke he fakamooliaga he tau liogi pihia ka tamai he Kautu he Atua e tau monuina loga ke he tau tagata!

17. Fakatatai e pule ha Iesu ke he pule he tau tagata.

¹⁷ Ha ha i ai e kehekeheaga lahi mahaki he pule totonu ha Iesu mo e pule he tau tagata. Ko e pule he tagata ne takitaki ke he tau felakutaki ne kelipopo e tau miliona tagata. Ka ko e ha tautolu a Pule ko Iesu ne fakaalofa mooli ki a tautolu mo e fifitaki e tau mahani mitaki he Atua, mua atu ke he fakaalofa haana. (Fakakiteaga 7:10, 16, 17) Pehē a Iesu: “Kia o mai a mutolu kia au, ko mutolu oti ne matematekelea mo e pehia he tau kavega; ko au foki ke okioki ai a mutolu. Kia hahamo e mutolu e lakau hahamo haku, mo e fifitaki mai a mutolu kia au; ha ko au ni ko e totonu mo e loto holoilalo; ti moua ai e mutolu e okiokiaga mo e tau agaga ha mutolu. Ha ko e mena maeke vave haku a lakau hahamo he uta, ko e haku a kavega foki, ko e mena mama a ia.” (Mataio 11:28-30) Ko e maveheaga mafanatia mooli!

18. (a) Ko e heigoa ne tupu tali mai he 1914? (e) Ko e heigoa ka fakatutala a tautolu he vala tala ka mui mai?

¹⁸ Ne fakakite he Tohi Tapu kua kamata e Kautu he Atua ke pule he lagi he 1914. Tali mai ai, ha ha i ai e fakapotopotoaga he tau tagata fakahiku ka pule mo Iesu he lagi, pihia mo e fakapotopoto he “moto tagata tokologa” ka hao he moumouaga he fakatokaaga nei mo e huhū atu ke he lalolagi foou. (Fakakiteaga 7:9, 13, 14) Lahi fēfē e moto tagata tokologa he vahā nei? Ko e heigoa e manako he Atua ma lautolu? Ko e vala tala ne mui mai ka kumikumi e tau hūhū nei.