1. (1) ¿Diospa imayna kaynintaq aswan allinqa? (2) ¿Imaynam tarikunchik Jehova Diosqa kuyakuqllaña kasqanmanta yachaspanchik?

BIBLIAQA ninmi Jehova ‘Diosqa kuyakuqllaña’ kasqanmanta (1 Juan 4:8). Kaywanqa nichkanmi allin kayninkunamanta Jehova Diospa kuyakuynin aswan allin kasqanmanta. Manam ni pipas Dios hina kuyakuqqa kanchu. Tukuy imatam payqa ruwan kuyakuqllaña kasqanrayku. Chaymi anchata agradecekunchik kuyakuq kasqanrayku unanchawasqanchikmanta hinaspa tukuy ima unanchasqanmantapas.

2. Jehova Dios kuyawasqanchikta yachaspanchikqa, ¿imamantam mana iskayrayanchikchu? (Qaway 16 kaq paginapi dibujota).

² Jehova Diosqa tukuy ima unanchasqankunatam kuyan. Chayta yachasqanchikraykum mana iskayrayanchikchu imapas niwasqanchikkuna ruwananmantaqa. Paymi niwarqanchik churin Jesucristowan kamachimuspan ‘akllasqan punchawpi allin arregloman hina kay pachata juzgananpaq’ (Hech. 17:31). Manam iskayrayanchikchu pimanpas mana sayapakuspan Jesucristo juzgawananchikmantaqa. Chaynapim Diosta kasukuq  lliw runakunaqa kay pacha sumaqyachisqa kaptin wiñaypaq hinaspa kusisqa kawsakunqaku.

3. Jehova Dios mana kuyawaptinchikqa, ¿imaynaraq hamuq tiempopi kawsakuchwan?

³ ¿Imaynataq kanman hamuq tiempopi kawsakuyninchik Jehova Dios mana kuyawaptinchikqa? Mana allin satanaspa munaychakusqanpich runakunaqa hinalla kamachinakunmanku (2 Cor. 4:4; 1 Juan 5:19; leey Apocalipsis 12:9, 12). Chaynaqa, ¡mayna llakikunapaqchá kawsakuyninchikqa kanman!

4. ¿Imanasqam Jehova Diosqa saqirqa satanas qipanchananta?

⁴ Jehova Diosta satanas qipancharuspanmi Adantawan Evatapas qipancharachirqa. Satanasmi allin kamachiq kasqanpaq hapikuspan Jehova Diospa kamachiyninta iskayrayarachirqa (Gen. 3:1-5). Jehova Diosqa imapipas allin yachaysapa kasqanraykum satanasta saqirqa kay pachata kamachinanpaq, chaynapi satanaspa piensasqan allin utaq mana allin kasqan qawakunanpaq. Kunanmi ichaqa yachanchik satanaspas nitaq runakunapas allin kamachiytaqa mana atisqankumanta.

5. ¿Imatam qawachin runakunapa kunankama imayna kawsakusqankuqa?

⁵ Kay punchawkunapiqa runakunam aswan mana allinllaña kachkanku, chayraykum pasaq pachak watakunapiqa guerrakunapi pachak wara-waranqantin runakuna wañurqaku. Bibliapim niwanchik “tukupay tiempokunapiqa” runakuna astawan mana allinmanraq chayanankumanta (2 Tim. 3:1, 13). Bibliaqa nintaqmi, ‘runaqa mana kikillanmanta kawsasqanta hinaspa mana kikillanmanta purisqantapas’ (Jer. 10:23). Kayna nisqanqa chaynapunim. Runakunaqa manam kikinkupura kamachinakunankupaqchu unanchasqaqa karqaku. Chaymi qawakun kunankama imayna kawsasqankupi.

6. ¿Imaynanpim Jehova Diosqa saqirqa mana allin runakuna hinalla kawsanankuta?

⁶ ¿Imaynanpim Jehova Diosqa saqirqa mana allin runakuna hinalla kawsanankuta? Saqirqaqa kamachikuynillan allin kasqanta qawachinanpaqmi. Hamuq tiempopiqa mana allin ruwaq runakunataqa chinkachinqam. Chaymanta qipamanqa pipas Jehova Diosta qipanchaqqa chaypunillam chinkachisqa kanqa. Kay tiempopi runakuna mana allin kawsakusqanchikraykum Diosqa manaña munanqañachu chay tiempopi mana allin ruwaq runakuna hinalla kawsanankutaqa.

¿IMAYNATAM JEHOVA DIOSQA KUYAKUYNINTA QAWACHIWANCHIK?

7, 8. ¿Imaynatam Jehova Diosqa kuyawasqanchikta qawachiwanchik?

⁷ Tukuy imapim kuyakuynintaqa qawachiwanchik. Yuyaymanasun kay pachata hinaspa hanaq pachata suma-sumaq unanchasqanpi. Hanaq pachapim wara-waranqatin lucerokuna hinaspa planeta nisqankunapas kachkan. Chaykunamanta hukninmi achkimuwaqninchik inti. Chay inti mana kaptinqa manam atichwanchu kawsakuytaqa. Arí tukuy chaykunawanmi yachanchik Jehova Dios unanchawaqninchik kasqanta, yachanchiktaqmi atiyniyuq, yachayniyuq hinaspa kuyakuq kasqantapas (Rom. 1:20).

⁸ Jehova Diosmi kay pachata unancharqa  kusisqa kawsakunanchikpaq, chaymi sumaq huertapi Adantawan Evata churarqa. Paykunapaqa yuyayninkupas chuyam karqa, cuerponkupas wiña-wiñaypaq kawsanankupaq hinam karqa (leey Apocalipsis 4:11). Chaymantapas kuyakuynin mana tukuq kasqanraykum Jehova Diosqa lliw unanchasqankunataqa mikusqata kawsachiwanchik (Sal. 136:25).

9. ¿Imakunatam Jehova Diosqa kuyakuqllaña kaspanpas chiqnin?

⁹ Diosninchik kuyakuq kaspanpas mana allin ruwaykunataqa chiqninmi. Diosqa millakunmi llullakuqkunata, runamasin wañuchiqkunata hinaspa traicionaqkunatapas (Sal. 5:4-6).

10, 11. (1) ¿Imatam Jehova Dios ruwanqa mana allin runakunawan? (2) ¿Imatam Jehova Diosqa kasukuq runakunaman qunqa?

¹⁰ Qawamusqanchikman hinapas Jehova Diosqa kuyakuqllañam, ichaqa chiqninmi mana allin ruwaykunataqa. Chaymi payqa tanteasqanman hina kay pachapi mana allin ruwaykunata chinkachinqa. Bibliapim niwanchik mana allin runakuna chinkachisqa kanankumanta, ichaqa ninmi allin ruwaq runakuna ‘allpata dueñoyanankumanta’. Niwanchiktaqmi Jehova Diosta qipanchaqkunapas chinkachisqa kanankumanta (Sal. 37:9, 10, 20).

¹¹ ¿Kasukuqnin runakunamanqa imatam Jehova Diosqa qunqa? Kasukuqkunaqa suma-sumaq kawsakuytam chaskinqaku. Bibliam nin: ‘Allin ruwaq runakunam allpataqa dueñoyanqaku. Paykunaqa chaypimiki wiñaypaqraq kawsakunqaku’, nispa (Sal. 37:29). Diosta kasukuqkunaqa kusisqa hinaspa hawkallam kawsakunqaku (Sal. 37:11). Diosninchikqa kuyakuqllaña kasqanraykum pay kasukuqninkunapaq allin kaqkunata ruwanqa. Bibliam nin: ‘Diosmi pichanqa paykunapa wiqinta, manañam kanqachu wañuypas, [...] waqaypas nitaq nanaypas’, nispa (Apoc 21:4). Manañamá mana allinkunaqa kanqañachu.

12. Mana huchayuqpaqña Jehová Dios qawawananchikpaqqa, ¿imatam ruwananchik?

¹² Salmo 37:37, 38 nin mana huchayuqpaq Diospa hapisqan runakunaqa kay pacha sumaq huertayachisqa kaptin hawka kawsakunankumanta. Chaymantapas niwanchiktaqmi mana kasukuqkunatawan mana allin runakunata chinkachinanmanta. Mana huchayuqpaqña Jehova Dios qawawananchikta munaspaqa paytawan churintam allinta riqsinanchik hinaspam kamachiwasqanchikkunata kasukunanchik (leey Juan 17:3). Manam iskayrayananchikchu mana allin runakuna chinkachisqa kanankumantaqa nitaq ‘Diospa munasqanman hina ruwaqkuna wiñaypaq takyanankumantapas’ (1 Juan 2:17). Bibliapim niwanchik: “Tayta Diospi confiakuspa kasukuypuni payllata”, nispa (Sal. 37:34). Mana allin runakunapa chinkachisqa kanan tiempo kayllaña kasqanraykum chayna nisqanta kasukunanchik.

13. ¿Imatam Jehova Diosqa ruwarqa anchata kuyawasqanchikrayku?

¹³ Pantaq runakuna kaspanchikpas atichwanmi Jehova Diosninchik kasukuytaqa. Atichwantaqmi paypa amistadnin kaytapas, chaypaqmi Jehova Diosqa churinta kachamurqa ñuqanchikrayku wañunanpaq. Chayna  ruwasqanwanmi Jehova Diosqa ancha kuyawasqanchikta qawachiwanchik. Diosqa churintamá kachamurqa pipas kasukuqqa huchanmanta pampachasqa kananpaq hinaspa manaña wañunanpaq (leey Romanos 5:12; 6:23). Jehova Diosqa manam iskayrayarqachu churin kay allpapi kaspan kasukunanmantaqa. Diosqa qawarqañam hanaq pachapi una-unay watakuna kasukusqantaqa. Jehova Diosqa sinchitam llakikurqa kuyasqan churinta runakuna maqaptinku. Jesusqa sasachakuypiña kaspanpas Dioslla allin kamachiq kasqanmanmi sayapakurqa. Chayna sasachakuypi kasqanwantaqmi qawachirqa mana pantaq runapas Jehova Dios kasukuytaqa atisqanmanta.

14, 15. ¿Imapim yanapawanchik Jesuspa wañukusqanqa?

¹⁴ Anchata ñakarispanpas Jesusqa wañukunankamam Diosta kasukurqa hinaspam Dioslla allin kamachiq kasqanman sayapakurqa. ¿Imapim Jesuspa wañukusqanqa lliw runakunata yanapawanchik? Wañukusqanraykum kay allpa sumaq huertayachisqa kaptin wiñaypaq kawsakuyta atichwan. Apostol Pablopa nisqanman hinaqa Jesuspa wañukusqanwanmi yachanchik Jehova Dios hinaspa Jesuspas ancha kuyawasqanchikta. Pablom nirqa: ‘Sasatachá tarichwan pitapas runamasinpa rantinpi wañuqtaqa chay runamasin mana huchayuqña kachkaptinpas. Allin sunqu runapaqqa yaqachusmi huk kaqnin kallpanchakunman paypa rantinpi wañunanpaq. Ichaqa Diosmi kuyawasqanchikta qawachiwarqanchik huchasaparaq kachkaptinchikpas Cristo wañupuwasqanchikwan’, nispa (Rom. 5:6-8). Apostol Juanpas nirqam: ‘Diosninchikmi sapallan churinta kay pachaman kachamurqa payrayku wiñay kawsayniyuq kananchikpaq, chaynatamá Diosninchikqa kuyawasqanchikta qawachiwarqanchik. Kaymá chay kuyakuyqa: Manam ñuqanchikchu Diostaqa kuyarqanchik aswanqa paymi ñuqanchikta kuyawaspanchik churinta kachamurqa’, nispa (1 Juan 4:9, 10).

 ¹⁵ Jesuspas nirqam Diosqa runakunata anchata kuyawasqanchikrayku sapallan churinta kachamusqanta, chaynapi “pipas paypi iñiqqa manaña puchukaspa wiñaypaqña kawsananpaq” (Juan 3:16). Jehova Diospaq sasa kaptinpas hinatamá saqirqa ñuqanchikrayku churin wañukunanta. Chayna kuyawasqanchikqa wiñaypaqmi kanqa. Chaymi apostol Pablo nirqa: ‘Wañuptinchikpas, kawsaptinchikpas manam imapas Diospa kuyakuyninmantaqa rakiwachwanchu nitaq angelkunapas nitaq munaychakuqkunapas nitaq kunan kaqpas nitaq hamuq kaqpas nitaq mana rikusqanchik atiyniyuqkunapas. Puyupa altonkunapi kaqkunapas, uku-ukupi kaqkunapas chaynataq Diospa tukuy ima unanchasqankunapas manam rakiwachwanchu paypa kuyawasqanchikmantaqa. Chaytam riqsichiwarqanchik señorninchik Jesucristowan’, nispa (Rom. 8:38, 39).

16. ¿Pitam Jehova Diosqa akllarun kamachiwananchikpaq?

¹⁶ Jehova Diosqa kuyawaspanchiktaqmi churin Jesusta akllarqa kamachimuwananchikpaq. Jesusqa runakunata tukuy sunqunwan kuyaqmi hinaspapas allin kamachiqmi (Prov. 8:31). Jesuswan kuskataqmi 144.000 akllasqa runakuna hanaq pachamanta kamachimunqaku. Paykunaqa kay allpa pachapi kawsakusqankuraykum allinta yachanku runakunapa imayna ñakarisqanchikta (Apoc. 14:1). Jesucristoqa Diosmanta willakuspanmi astawanraq willakurqa imayna kamachimunanmanta, chaymi qatiqninkunatapas kayna mañakuyta yachachirqa: ‘Hanaq pachapi taytayku, sutiki yupaychasqa kachun, munaychakusqayki hamuchun. Munasqaykiyá ruwasqa kachun kay pachapipas hanaq pachapi hina’, nispa (Mat. 6:9, 10). Tukuy sunqunchikwanmi Jesucristo kamachimunantaña munachkanchik hinaspa lliw runakuna kusisqa kawsakunanchikpaq tukuy ima ruwanantapas.

17. ¿Imanasqataq Jesusqa mana runakuna hinachu kamachimuwasun?

¹⁷ Jesusqa manam runakuna hinachu kamachimunqa. Runakuna kamachispankuqa chiqninakuytawan wañuchinakuytam astawan mirarachinku. Jesusmi ichaqa taytan hina kuyakuqllaña chaymi ñuqanchiktapas kuyawanchik (Apoc. 7:10, 16, 17). Paymi nirqa: ‘Hamuychik ñuqaman llapallan pisipasqakuna hinaspa qipichkaq hina ñakariqkuna, ñuqam samachisqaykichik. Llasawaqniy yugoyta apaspayá ñuqamanta yachaychik, ñuqaqa kani llampu sunqu humillakuqmi, chaynata ruwaspaqa tarinkichikmi samayta. Yugoyqa facil apayllam, qipiypas sampallataqmi’, nispa (Mat. 11:28-30). ¡Jesusqa llumpa-llumpaytam kuyawanchik!

18. (1) ¿Imakunatam Jesucristoqa ruwachkan 1914 watamantapacha? (2) ¿Imakunamantam qatiqninpi yachasun?

¹⁸ Bibliam yachachiwanchik Jesusqa 1914 watamantapacha hanaq pachapi ña kamachiy qallaykusqanta. Chaymantapacham Jesusqa paywan kuska kamachimunankupaq 144.000 akllasqakunapa puchuqninta huñuyta qallaykurqa. Huñuchkantaqmi kay pacha sumaq huertayachisqa kaptin chaypi yachanankupaq kaq runakunatapas. Paykunatam bibliapi sutichan ‘achka-achkallaña runakuna’, nispa (Apoc. 7:9, 13, 14). ¿Haykataq chay achka-achkallaña runakunaqa kanku? ¿Imayna kawsakunankutam Diosqa munan? Chaykunamantam qatiqninpi yachasun.