1. Eaa to te Atua tu maata rava atu, e eaa toou manako iaia te kite anga i teia?

TE AKAKITE maira te Pipiria kia tatou e “ko te Atua oki te aroa.” (1 Ioane 4:8) Inara eaa tikai te aiteanga o teia? Kare te aroa i tetai o te au tu manea ua o Iehova. Mari ra ko tona tu maata rava atu ïa. Kare tei iaia te aroa. Mari ra koia te aroa. Te arataki ra te aroa i tana au mea pouroa ravarai e rave ra. Mei teaa atura to tatou rekareka e na te aroa i akakeu ia Iehova kia anga i te ao katoa e pini ua ake e te au mea ora ravarai!

2. Eaa te akapapu anga ta te aroa o te Atua e oronga maira kia tatou? (Akara i te tutu mua o teia atikara.)

² E tu takinga meitaki to Iehova e te maru no tana au mea i anga. Te riro ra tona aroa no tatou ei akapapu e ka tupu tona akakoroanga no te tangata na roto i te mataara meitaki roa atu. Ka tupu te mataora tikai ki te aronga tei akarongo iaia. Ei akaraanga, no to Iehova aroa “kua akonoia e ia te ra e akava mai ei aia i to te ao katoa nei ma te tuatua-tika, na te tangata i akonoia e ia ra” ko Iesu Karaiti. (Angaanga 17:31) Te papu ra ia tatou  e ka tupu teia akava anga. Te aiteanga no te aronga tei akarongo, ka rauka ia ratou te mataora e tuatau ua atu.

3. Mei teaa te tu o te oraanga naringa kare te Atua i aroa mai i te tangata?

³ Mei teaa te tu o te tuatau ki mua no te tangata naringa kare te aroa i te tu maata rava no te Atua? Ka tutara ua atu te tangata iaia uaorai e ka akanauruia e tetai atua aroa kore e te makitakita ko Satani. (2 Korinetia 4:4; 1 Ioane 5:19; e tatau ia Apokalupo 12:9, 12.) E mea rikarika te tuatau ki mua naringa kare a Iehova e aroa mai ia tatou!

4. No teaa ra a Iehova i akatika ai kia tupu te meameaau ki tana tutara anga?

⁴ Te meameaau anga a Satani i te tutara anga a te Atua, kua akanauru katoa aia i to tatou nga metua mua kia meameau. Kua patoi aia i te tika anga o te Atua Tei Ngateitei i te Ao Katoa e Pini ua Ake. Karanga a Satani e e meitaki atu tana tutara i ta te Atua. (Genese 3:1-5) Ma te tu pakari, kua tuku a Iehova i tetai tuatau poto ua no Satani kia tauta i te akapapu i tona akakoro anga. Inara te akaari pu ua maira te au tupuanga e kare te tangata e Satani katoa e riro ei tutara meitaki.

5. Eaa ta te tuatua enua o te tangata i akapapu meitaki?

⁵ I teia tuatau, te kino ua atura teianei ao. E tere atu i te 100 mirioni tangata tei matemate i roto i te au tamaki i te 100 mataiti i topa. Te karanga ra te Pipiria e “i taua tuatau openga ra,” “ko te au tangata kikino e te aronga pikikaa ra, e tupu rai to ratou kino, e e maata atu.” (2 Timoteo 3:1, 13) Te karanga katoa ra te Pipiria e: “Kua kite oki au, e Iehova e, e kare tei te tangata uaorai tona aerenga: kare tei te tangata e aere nei, i te akono i tona uaorai takainga tapuae.” (Ieremia 10:23) Te akapapu maira te tuatua enua i taua au tuatua ra. Kare a Iehova i anga i te tangata ma te ravenga e te tika anga kia tutara ia ratou uaorai ma te kore tana arataki anga.

6. No teaa te Atua i akatika ua ai i te kino?

⁶ Na te akatika anga i te kino kia tupu ua atu no tetai tuatau, kua akapapu katoa mai a Iehova e nana anake te tutara anga ka autu. I te tuatau ki mua, ka takore te Atua i te aronga kino ravarai. I muri akera, me patoi tetai ua atu i tana tutaraanga aroa, ka viviki aia i te akatikatika atu i te reira. Mei te tuatua enua o te tangata, ka rauka iaia i te akapapu e ka tau te reira aronga meameaau kia akaatea vivikiia. Kare rava te tu kino e akatikaia kia tupu akaou.

7, 8. Akapeea a Iehova te akaari anga mai i tona aroa?

⁷ Kua akaari mai te Atua i tona aroa maata na roto i te au mataara e manganui. Ka akamanako ana i te maata e te manea o to tatou ao e pini ua ake. E pirioni ua atu vananga etu i roto, okotai vananga e manotini ua atu etu e te paraneta. I roto i to tatou vananga etu,  te Tarava, tetai etu ko te rā. Naringa kare e rā, kare e ora i te enua nei. Te akapapu maira teia au mea angaia e ko Iehova Tei Anga mai ia tatou e te akaari maira i tona au tu, mei te mana ririnui, te tu pakari, e te aroa. Ae, to te Atua “au mea oki nona tei kore e tau kia akara ra, tei kitea puia nei ïa, i te au mea katoa i angaia nei, mei te maani anga mai i teianei ao; koia oki, tona ra mana mutu kore anga, e te Atua anga.”​—Roma 1:20.

⁸ Kua anga a Iehova i te enua nei no te au mea ora. Te riro ra te au mea ravarai no te enua nei ei puapinga ki te au manu e te tangata. Kua anga te Atua i tetai kainga manea no te tangata e kua oronga i te au manako e te kopapa apa kore kia ora ratou e tuatau ua atu. (E tatau ia Apokalupo 4:11.) Tei kapiti atu, “nana i oronga mai i te kai ki te au mea katoa nei: ka tu oki tona aroa e rimua.”​—Salamo 136:25.

9. Noatu e e Atua aroa a Iehova, eaa tana i makitakita?

⁹ Ko Iehova te Atua aroa, inara te makitakita ra aia i te kino. Ei akaraanga, te karanga ra a Salamo 5:4-6 no Iehova e: “Kare oki koe i te Atua e mareka mai i te kino; . . . te riri ra koe i te aronga katoa i rave i te mea tika kore ra.” Te makitakita katoa ra aia i te aronga “ta tangata ra, e te tangata pikikaa ra.”

10, 11. (a) Eaa te ka tupu ki te aronga kino? (e) Akapeea a Iehova te akameitaki anga i te aronga akarongo?

¹⁰ I te tuatau tau, ka akaatea a Iehova i te kino mei te ao katoa e pini ua ake no te mea e Atua aroa aia e te makitakita ra i te kino. Te taputou maira te Tuatua na te Atua e: “Ka riro oki te aronga i rave i te kino ra i te tipu keia; ko te aronga ra i tapapa ia Iehova ra, ko ratou te ka noo i te enua. E roa poto ake, e kare ua te tangata kino ra.” Ka riro te au enemi o Iehova “mei te auai ka peke ei ratou.”​—Salamo 37:9, 10, 20.

¹¹ Te taputou katoa maira te Tuatua na te Atua e: “Ka riro te enua no te aronga tuatua-tika, ka noo tamou rai ratou i reira.” (Salamo 37:29) Ko te aronga tiratiratu, “ka rekareka ratou i te maata o te au.” (Salamo 37:11) No teaa ra? No te mea e rave ua ana to tatou Atua aroa i te mea meitaki rava no tona au tavini tiratiratu. Te akakite ra te Pipiria: “E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.” (Apokalupo 21:4) Mei teaa atura te tuatau mataora ki mua no te aronga akarongo tei āriki i te aroa o te Atua!

12. Koai te aronga “apa kore”?

¹² Te akakite maira te Pipiria kia tatou: “E akairo ana i te apa kore, ka akara oki i te tiratiratu; e au oki te openga o te reira tangata; Kareka te aronga tatipake ra, ka pou anake ïa; ko te openga o te aronga kino ra ko te tipu keia.” (Salamo 37:37, 38) Ka kite te aronga “apa kore” ia Iehova e tana Tamaiti e ka akarongo kia rave i te anoano o te Atua. (E tatau ia Ioane 17:3.) Te irinaki pu tikai ra aia e “te ngaro ke nei teianei ao, ma ta to  reira katoa e anoano nei: ko tei akono ra i to te Atua ra anoano, e tika ïa i te ora anga e tuatau ua atu.” (1 Ioane 2:17) No te mea te vaitata maira te openga o teianei ao, e mea rapurapu no tatou kia “tiaki atu ia Iehova, e akono tikai i tona arataa.”​—Salamo 37:34.

13. Eaa to te Atua aroa maata rava atu tei akaariia?

¹³ Noatu e aronga apa ua tatou, ka rauka kia akarongo tatou i te Atua. Ka rauka katoa tetai pirianga vaitata kia Iehova no te atinga oko o Iesu, koia oki to te Atua aroa maata rava atu tei akaariia. Kua oronga mai a Iehova i te atinga oko e rauka ai i te aronga akarongo kia matara mai mei te ara e te mate. (E tatau ia Roma 5:12; 6:23.) Kua vai tiratiratu a Iesu ki te Atua no tetai tuatau roa i te rangi, no reira kua papu ia Iehova e ka vai tiratiratu tana tamaiti i te enua nei. Ei Metua aroa, kua mamae tikai a Iehova te kite anga i tana Tamaiti i te takinokino angaia e te tangata. Inara, kua turu tiratiratu ua a Iesu i te tika anga o te Atua kia tutara e kua akaari e ka rauka i tetai tangata apa kore i te akono mou i te Atua noatu te au turanga ngata.

14, 15. Eaa ta te matenga o Iesu i akatupu no te tangata?

¹⁴ Noatu te au timata anga pakari roa atu kua vai tiratiratu a Iesu e kua turuturu i to Iehova tika anga kia tutara. Ka tau tatou kia rekareka no te mea na roto i tona matenga, kua tutaki a Iesu i te atinga oko e kua oronga i te tuatau no te tangata kia noo e tuatau ua atu i roto i te ao ou o te Atua! Kua akataka te apotetoro ko Paulo i te aroa ta Iesu raua ko Iehova i akaari na roto i te atinga oko. Karanga aia e: “I to tatou oki vai paruparu anga i mate ei te Mesia i te tuatau tika ra, no te aronga akono kore i te Atua ra. Kare paa e tika i tetai kia mate no tetai tangata tuatua-tika, e akakoromaki ra paa tetai tangata atu i te mate no te tangata meitaki. Kua akamaata ua maira te Atua i tona aroa ia tatou nei, i te mea te vai tangata ara ua nei rai tatou, i mate ei te Mesia no tatou nei.” (Roma 5:6-8) Kua  tata te apotetoro ko Ioane: “Kua kitea to te Atua aroa ia tatou nei, koia i tono mai i tana Tamaiti anau tai ki te ao nei, kia ora tatou iaia. Ko te aroa mou teia, kare ïa na tatou i aroa atu i te Atua, koia ra tei aroa mai ia tatou nei, e kua tono mai i tana Tamaiti ei tarangaara i ta tatou nei ara.”​—1 Ioane 4:9, 10.

¹⁵ Karanga a Iesu e “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioane 3:16) Noatu to Iehova mamae oonu, kua oronga aia i tana Tamaiti ei atinga oko. Te akaari maira teia i tona aroa maata no te tangata. E ka vai te reira aroa e tuatau ua atu. Tata a Paulo e: “Kua kite tikai oki au e, kare te mate, kare oki te ora, kare oki te au angela, kare oki te ui ariki, kare oki te au mea mana, kare oki te au mea e vai nei, kare oki te au mea e ka tupu a muri atu, Kare oki te teitei, kare oki te akaaka, e kare katoa te au mea i angaia nei, e tika kia akataka ke ia tatou i te aroa o te Atua i roto i to tatou Atu ia Iesu Mesia ra.”​—Roma 8:38, 39.

16. Eaa te Patireia na te Mesia, e koai ta Iehova i akataoonga ei Tutara?

¹⁶ Te riro katoa ra te kavamani a te Atua, koia te Patireia na te Mesia, ei akapapu anga i to Iehova aroa no te tangata. Akapeea? Kua akataoonga takere a Iehova i tetai Tutara tei akaperepere i te tangata e kua tau kia tutara, koia a Iesu Karaiti. (Maseli 8:31) Pera katoa, e 144,000 tangata tei ikiia mei te tangata ka tutara ma Karaiti i te rangi. Me akatuia mai ratou, ka apai ratou i ta ratou i kite te noo anga ei tangata. (Apokalupo 14:1) Ia Iesu i te enua nei, ko te Patireia tana tumu manako maata roa atu i tana apiianga, e kua apii aia i tana au pipi kia pure: “E to matou Metua i te ao ra, Kia tapu toou ingoa. Kia tae toou basileia. Kia akonoia toou anoano i te enua nei, mei tei te ao katoa na.” (Mataio 6:9, 10) Te tapapa atu nei tatou me akatupuia teia pure, me apai mai te Patireia o te Atua i te au akameitakianga e manganui ki te tangata nei.

17. Akaaite i te tutara anga a Iesu ki ta te tangata.

¹⁷ E tuke maata te tutara anga i rotopu i ta Iesu tutara aroa e ta te tangata. Kua akatupu te tutara anga a te tangata i te au tamaki tei matemate e mirioni ua atu tangata. Inara te akaperepere tikai ra to tatou Tutara ko Iesu ia tatou e te aru ra i te au tu manea o te Atua, ko te aroa tikai. (Apokalupo 7:10, 16, 17) Karanga a Iesu: “E aere mai kotou kiaku nei, ko te aronga katoa i roiroi, e te aronga teiaa i te apainga, naku e akaanga i to kotou roi. Ka rave mai i taku amo ki rungao ia kotou, e kia apiiia kotou e au; te maru nei au, e ngakau akaaka toku, e rauka oki ia kotou te akaangaroianga i to kotou vaerua. Te maru nei taku amo, e te māmā nei taku apainga.” (Mataio 11:28-30) Mei teaa atura teia taputou aroa!

18. (a) Eaa tei tupu ana mei te 1914 mai? (e) Eaa ta tatou ka uriuri i roto i te atikara ka aru mai?

¹⁸ Te akaari maira te Pipiria e kua akamata te Patireia o te Atua i te tutara i te rangi i te 1914. Mei reira mai e nei, kua akaputuputuia mai te au mema openga o te aronga te ka tutara ma Iesu i te rangi e kua akaputuputuia te “aronga maata rava” te ka ora i te openga o teia akatereanga e ka tomo atu ki roto i te ao ou. (Apokalupo 7:9, 13, 14) Eaa te maata o teia aronga maata rava i teia rā? Eaa ta te Atua e umuumu maira ia ratou? Na te atikara ka aru mai e akara matatio i teia au uianga?