1. Un fasi Gadu abi möön gaanfa, nöö unfa i ko ta pakisei u Gadu di i ko sabi di soni aki?

DI BËIBEL ta piki u taa „Masa Gadu, hën hatiböö da lobi” (1 Johanisi 4:8). Andi di soni aki kë taki? Lobi an dë wan u dee fasi di Jehovah abi nöö, ma a dë di fasi di a abi möön gaanfa. Hën da na abi nöö Gadu abi lobi, ma hën da lobi. Ku lobi a ta du hii soni. U dë ku tangi a hati seei taa lobi hën mbei Jehovah mbei hii di mundu, ku hii libilibi soni di dë nëën!

2. Fuun pei soni di lobi di Gadu lobi u ta mbei u dë seiki? (Luku di peentje a bigi u di woto.)

² Jehovah ta fii da dee soni dee a mbei. Di lobi di a lobi u ta mbei u dë seiki taa a o du dee soni dee a taki taa a o du da libisëmbë. Di soni aki o mbei taa dee sëmbë dee ta piki ën buka o ko dë waiwai seei. U di Jehovah lobi u mbei a „buta daka kaa faa kuutu a libisëmbë liba kumafa a fiti. Hën a tei wan Sëmbë buta faa dë fesima u di kuutu”. Di sëmbë dë da Jesosi Keesitu (Tjabukama 17:31). U dë seiki taa di kuutu di a o kuutu libisëmbë o pasa tuutuu. Dee sëmbë dee ta piki ën buka o abi wan bunu libi di o dë u nöömö.

3. Unfa di libi bi o dë ee Jehovah an bi lobi libisëmbë?

³ Unfa di libi bi o dë da libisëmbë a di ten di ta ko, ee lobi an bi dë di fasi di Gadu abi möön gaanfa? Libisëmbë bi o ta tii deseei go dou, nöö de bi o dë a di tii u Saatan basu, di gadu di an lobi sëmbë (2 Kolenti 4:4; 1 Johanisi 5:19; lesi Akoalimbo 12:9, 12). Di libi bi o hogi pasa maaka a di ten di ta ko ee Jehovah an bi lobi u!

4. Faandi mbei Jehovah da Saatan pasi faa hopo fia ku di tii fëën?

⁴ Di Saatan hopo fia ku di tii u Gadu, nöö a bi mbei di fosu mama ku di fosu tata fuu hopo fia ku Gadu tu. Saatan bi taki taa Gadu an abi di leti u tii liba ala ku goonliba aki. A taki tu taa di tii fëën o bunu möön di u Gadu (Kenesesi 3:1-5). Jehovah bi du wan köni soni, u di a da Saatan wan sati ten faa lei ee a sa du di soni di a bi taki. Ma a dë gbelingbelin u si taa Saatan ku libisëmbë an sa tii a wan bunu fasi.

5. Andi dee soni dee pasa a fesiten ta lei u gbelingbelin?

⁵ Nöunöu di goonliba ta ko möön hogi. Möön leki 100 milion sëmbë dëdë a dee gaan feti dee bi feti a dee 100 jaa dee pasa. Di Bëibel ta taki u dee „lasiti daka” taa: „Dee takusëmbëma ku dee sëmbë ta ganjan sëmbë taa de dë leima dë, nöö de o ta hogi nango fesi nöömö” (2 Timoteo 3:1, 13). Di Bëibel ta taki tu taa: „Ke Jehovah o, mi sabi bumbuu taa libisëmbë an tjika u sabi ka de musu waka. Na wan libisëmbë seei di ta waka sa taki naasë a musu tuwë futu” (Jelemia 10:23). Dee soni dee pasa a fesiten ta lei taa di soni aki dë sö tuu. Jehovah an bi mbei libisëmbë u de sa tii deseei, söseei de an abi di leti u du sö tu.

6. Faandi mbei Gadu da pasi taa hogi soni ta pasa?

⁶ Di disa di Jehovah ta disa hogi soni u de pasa jeti, ta lei tu taa di tii fëën nöö da di möön bunu wan. A di ten di ta ko, Gadu o kii hii dee hogihati sëmbë tuu. Baka di dë, ee wan sëmbë toona hopo fia ku di lobihati fasi fa Gadu ta tii, nöö a o hopo du wan soni wantewante. Jehovah sa tei dee soni dee pasa a fesiten u lei taa a musu puu dee sëmbë dee ta hopo fia ku ën wantewante. Nöiti a o disa sëmbë u de du hogi soni möön.

7, 8. Unfa Jehovah lei taa a lobi u?

⁷ Sömëni fasi dë fa Jehovah lei taa a lobi u. Pakisei fa di mundu bigi, söseei fa a hanse. Di mundu abi milionmilion kulupu teeja ku palanëti. U ta libi a wan u dee kulupu teeja, de kai Melkwegstelsel, ka di sonu dë. Ee di sonu an bi dë, na wan soni bi o sa libi a di goonliba. Hii dee soni aki ta lei taa Jehovah hën mbei hii soni, nöö dee soni a mbei ta lei u dee fasi dee a abi. Dee fasi aki da kaakiti, köni, ku lobi. „Te i luku dee wooko fëën te i kaba, nöö i sa si di kaakiti fëën di dë u teego, ku di Gadu fasi fëën di a abi.”​—Loomë 1:20.

⁸ Jehovah mbei di goonliba a sö wan fasi taa soni sa libi nëën. Libisëmbë ku mbeti tuu ta feni wini u hii soni di dë a goonliba aki. Gadu bi mbei wan hanse tan kamian da libisëmbë u de libi, nöö a da de telutelu fusutan ku telutelu sinkii u de sa libi u teego. (Lesi Akoalimbo 4:11.) Boiti di dë, „hën da di sëmbë di ta da hiniwan soni di ta libi, soni u njan. Di bunuhati fëën dë u teego”.​—Psalöm 136:25.

9. Hii fa Jehovah da di Gadu u lobi, ma andi da di soni di an lobi?

⁹ Jehovah da di Gadu u lobi, ma an lobi hogidu seepiseepi. Psalöm 5:4-6 ta taki u Jehovah taa: „Ja dë wan Gadu di lobi hogidu. . . . Ja lobi na wan sëmbë di ta du hogi ku wotowan.” Söseei i ta „buuse sëmbë di ta kii wotowan, ku sëmbë di ta ganjan wotowan”.

10, 11. (a) Andi o pasa ku dee hogihati sëmbë? (b) Un gaan bunu Jehovah o da dee sëmbë dee ta piki ën buka?

¹⁰ Jehovah o puu hogidu a goonliba a wan ten di fiti. U di a dë wan Gadu u lobi, mbei a ta buuse soni di an bunu. Di Wöutu u Gadu ta paamusi u taa: „Gadu o kii dee hogidu sëmbë puu, ma dee sëmbë dee abi biibi a Jehovah, de o feni di goonliba. Wan sati pisiten nöö fika, nöö hogi sëmbë an  o dë möön.” Dee felantima u Jehovah „o dëdë kaba”.​—Psalöm 37:9, 10, 20.

¹¹ Di Wöutu u Gadu ta paamusi u tu taa: „Dee sëmbë dee ta libi a wan leti fasi, de o feni di goonliba, nöö naandë de o ta libi u teego” (Psalöm 37:29). Dee sëmbë dee ta hoi deseei a Gadu „o piizii seei biga bööböö libi o dë pasa maaka” (Psalöm 37:11). Faandi mbei u sa taki sö? Biga hii juu di lobihati Gadu fuu ta du di möön bunu soni da dee dinima fëën dee ta hoi deseei nëën. Di Bëibel ta piki u taa: „A o feki hiniwan u de wojowata puu. Këë an o ta kisi de möön. Dëdë ku tjali ku kusumi an o dë a de dendu möön tu. Söseei sinkii hati an o dë möön seei, kwetikweti, biga dee awoo soni dee bi dë tuu pasa go kaa” (Akoalimbo 21:4). Dee sëmbë dee ta piki Gadu buka, söseei dee ta tei di lobi di a abi u bigi, o abi wan bunu libi!

12. Ambë da „dee sëmbë dee ta du bunu soni”?

¹² Di Bëibel ta piki u taa: „Hoi dee sëmbë dee ta du bunu soni a pakisei, nöö luku andi dee limbohati sëmbë ta du, biga soni o waka bunu da de a di ten di ta ko. Ma dee sëmbë dee ta du zöndu o poi kaba a sösö. Te u kaba fëën hogi sëmbë o poi kaba a sösö” (Psalöm 37:37, 38). „Dee sëmbë dee ta du bunu soni”, de ko sabi Jehovah ku di Womi Mii fëën, nöö ku hii de hati de ta du di kë u Gadu. (Lesi Johanisi 17:3.) De ta biibi seei taa „wan daka di goonliba aki o kaba ku hii dee lö libi dë tuu fia. Ma dee sëmbë dee ta piki Masa Gadu buka, de, de an o kaba möönsö, ma de o dë u teego” (1 Johanisi 2:17). U di di kaba u di goonliba aki zuntu, mbei a dë fanöudu seei taa u musu buta „futoou a Jehovah, nöö u musu ta waka a di pasi fëën nöömö”​—Psalöm 37:34.

13. Andi da di möön gaan soni di Gadu du u lei taa a lobi u?

¹³ Hii fa u da zöndu libisëmbë, tökuseei u sa piki Gadu buka. U sa ko dë gaan mati ku Jehovah tu, u di a manda Jesosi ko dëdë da u kuma wan lusupaima. Di soni dë da di möön gaan soni di Gadu du u lei u taa a lobi u. Jehovah seeka di lusupaima, sö taa dee sëmbë dee ta piki hën buka sa feni di okasi u kumutu a zöndu ku dëdë basu. (Lesi Loomë 5:12; 6:23.) Jesosi bi hoi ënseei a Gadu hii di pisiten di a bi dë a Gadu Köndë ala, nöö fëën mbei Jehovah bi dë seiki taa di Womi Mii fëën bi o hoi ënseei nëën a goonliba aki tu. U di Jehovah da wan lobihati Tata, mbei a bi hati ën seei di a bi si fa sëmbë bi du hogihati soni ku di Womi Mii fëën. Tökuseei Jesosi hoi ënseei a di tii u Gadu. A sö wan fasi a lei taa Gadu hën abi di leti u tii, söseei a bi lei taa wan sëmbë di an abi zöndu sa hoi ënseei a Gadu hii fa soni ta taanga dëën.

14, 15. Andi di dëdë u Jesosi du da libisëmbë?

¹⁴ Hii fa sömëni hogi soni bi miti Jesosi, tökuseei a bi hoi ënseei a Gadu, söseei a bi tei di së u di tii u Jehovah. U musu dë ku tangi a hati taa Jesosi bi ko dëdë paka di lusupaima da u, u di di lusupaima ta da libisëmbë di okasi u libi u teego a di njunjun goonliba u Gadu! Apösutu Paulosu bi taki soni u di lobi di Jehovah ku Jesosi bi lei taa de lobi u, di de bi seeka di lusupaima da u. A bi taki taa: „A di ten dë wa bi a’ kaakiti u du na wan kodo soni di bunu nëën wojo. Gaan takulibima u bi dë, ma tökuseei Masa Jesosi dëdë da u e. Wë nöö un pakisei ën bunu. Ee wan sëmbë i ta libi leti seei, ma a sa taanga fu wan oto sëmbë musu mëni faa dëdë da i. Na sö nö? Ee i abi bunuhati, nöö a kandë de sa kë dëdë da i fu di i abi bunuhati hedi. Ma nöö Gadu lei u taa di lobi fëën pasa di dë gaanduwe. Biga na bumbuu sëmbë a manda Masa Jesosi Keesitu ko dëdë da e, ma u dee takulibima aki wë” (Loomë 5:6-8). Apösutu Johanisi bi sikifi taa: „Nöö u si taa Masa Gadu lobi u tuu. Biga a tei di wan kodo Womi Mii fëën tö di a abi, manda ko a di goonliba aki fuu sa feni di teego libi u Masa Gadu. Dee sëmbë o, ee i kë saandi da lobi, nöö ja musu luku a di fa u lobi Gadu e, ma i musu luku a di fa Gadu lobi u. Biga a tei di wan kodo Womi Mii fëën manda ko a di goonliba aki ko tei di dëdë fuu dëdë fu an hoi dee hogidu fuu nëën bëë möön.”​—1 Johanisi 4:9, 10.

 ¹⁵ Jesosi bi taki taa „Masa Gadu lobi libisëmbë sö tee a da de di wan kodo Womi Mii fëën di a abi. Nöö ee wan sëmbë i ta biibi a di Mii fëën aki liba, nöö ja o lasi go kaba a sösö möönsö, ma i abi di libi u teego kaa” (Johanisi 3:16). Hii fa a bi hati Jehovah gaanfa seei, tökuseei a bi da u di Womi Mii fëën kuma wan lusupaima. Di soni aki ta lei fa a lobi libisëmbë tjika. Nöö di lobi aki an o kaba möönsö. Paulosu bi sikifi taa: „Mi ko sabi gbelin taa na wan soni dë di sa paati u ku di fa Gadu lobi u tjika aki e. Na dëdë, na libi, na wan basia u Gadu Köndë ee nasö dee u didibi köndë, na wan soni u di ten u dë aki, na wan soni u bakaten tu, na wan makiti sa paati u puu a di lobi u Gadu aki. Na wan soni a liba ala, na wan soni a basu aki tu. Na wan kodo soni seei a hii di mundu di Gadu mbei aki abi di kaakiti u sa paati u ku di lobi di Gadu lobi u aki e, dee sëmbë, fu di u nama ku Jesosi Keesitu di Masa fuu”​—Loomë 8:38, 39.

16. Andi da di Mësiasi Könuköndë, nöö ambë Jehovah buta kuma tiima u di Könuköndë aki?

¹⁶ Di tii u Gadu nasö di Mësiasi Könuköndë da wan woto soni di ta lei taa Jehovah lobi libisëmbë. Unfa sö? Wë Jehovah buta wan Tiima kaa, di lobi libisëmbë, söseei a o sa tii a wan bunu fasi tu. Di tiima aki da Jesosi Keesitu (Nöngö 8:31). Gadu tei 144.000 libisëmbë u tii makandi ku Keesitu a liba ala. Te de weki kumutu a dëdë u go ta tii makandi ku Jesosi, nöö de o sabi unfa de musu wooko ku dee soni di de bi sabi di de bi dë kuma libisëmbë a goonliba aki (Akoalimbo 14:1). Di Jesosi bi dë a goonliba, nöö di Könuköndë bi dë di möön fanöudu soni di a bi ta konda da sëmbë. A bi lei dee bakama fëën u begi taa: „U Tata di dë a liba ala, be di në fii ko santa e. Be di Könuköndë fii ko. Be di kë fii pasa a goonliba aki leti kumafa a ta pasa a liba ala” (Mateosi 6:9, 10, NW). Te u ta begi a sö wan fasi, nöö woo ta wakiti di ten dë seei te dee soni aki o pasa tuutuu, te di Könuköndë u Gadu o mbei libisëmbë feni gaan bunu seei!

17. Unfa di tii u Jesosi tooka ku di tii u libisëmbë?

¹⁷ Di lobihati fasi fa Jesosi ta tii tooka gaanfa ku di tii u libisëmbë. Di tii u libisëmbë mbei taa milionmilion sëmbë dëdë a gaan feti. Ma Jesosi di tiima fuu lobi u, nöö a ta djeesi Gadu a dee fasi dee a abi, möönmöön a di lobi fëën (Akoalimbo 7:10, 16, 17). Jesosi bi taki taa: „Ee wan sëmbë i dë fukafuka, i ko wei u dee lai dee i ta tja, nöö be i ko a mi e. Nöö mi o mbei i ko dë bööböö. Dee sëmbë, un saka unu seei da mi o, be mi ta tii unu ta lei unu soni. Biga fa mi dë aki, mi abi tjalihati, mi a saka fasi, nöö ee wan sëmbë i ko a mi nöö joo feni böö te dou a i hati. Biga di tii u mi an taanga e, nöö dee lai dee mi o da unu fuun tjai, de dë fukëfukë” (Mateosi 11:28-30). Di soni di Jesosi paamusi u aki ta lei taa a lobi u!

18. (a) Andi bi pasa sensi di jaa 1914? (b) Andi woo luku a di woto di ta ko?

¹⁸ Di Bëibel ta lei taa di Könuköndë u Gadu bigi tii a liba ala, a di jaa 1914. Sensi di ten dë de bigi pii dee lasiti sëmbë dee o go tii makandi ku Jesosi a liba ala, söseei dee „gaan hia sëmbë” dee o pasa di kaba u di goonliba aki libilibi u go libi a di njunjun goonliba (Akoalimbo 7:9, 13, 14). Un mëni sëmbë dë a dee gaan hia sëmbë aki dendu? Andi Gadu kë taa de musu du? Woo luku dee hakisi aki a di woto di ta ko.