1. Ndi ifhio pfaneleo ya Mudzimu khulwane, nahone u ḓivha zwenezwi zwi ita uri ni ḓipfe hani nga hae?

BIVHILI i ri vhudza uri “Mudzimu ndi lufuno.” (1 Yohane 4:8) Fhedzi zwenezwi zwi amba mini? Lufuno a lu sokou vha iṅwe ya pfaneleo nnzhi dza Yehova. Ndi pfaneleo yawe khulwane. Ha sokou vha na lufuno fhedzi. Ndi lufuno. Lufuno lu livhisa tshiṅwe na tshiṅwe tshine a tshi ita. Ri livhuha lungafhani uri lufuno lwo ṱuṱuwedza Yehova uri a sike shango ḽoṱhe na zwithu zwoṱhe zwi tshilaho!

2. Lufuno lwa Mudzimu lu ri ṋea vhungoho vhufhio? (Sedzani tshifanyiso tsha u thoma.)

² Yehova u na vhuthu nahone u funa tsiko yawe. Nḓila ine a ri funa ngayo i ri ṋea vhungoho ha uri ndivho yawe kha vhathu i ḓo ḓadzea nga hu bvelelaho. Vhane vha mu thetshelesa vha ḓo wana dakalo ḽa vhukuma. Sa tsumbo, nga nṱhani ha lufuno, Yehova o “vhea ḓuvha ḽe a dzudzanya uri u ḓo haṱula ḽifhasi ḽoṱhe nga nḓila yo lugaho a tshi shumisa muthu we a mu nanga,” Yesu Kristo. (Mishumo 17:31) Ri na vhungoho ha uri yeneyi khaṱulo i ḓo itea. Kha vhathu vha thetshelesaho, zwi ḓo amba vhumatshelo havhuḓi ha lwa tshoṱhe.

3. Vhutshilo ho vha vhu tshi ḓo vha vhu hani arali Mudzimu o vha a sa funi vhathu?

³ Vhumatshelo ha vhathu ho vha vhu tshi ḓo vha vhu hani arali lufuno lwo vha lu si pfaneleo ya Mudzimu khulwane? Vhathu vho vha vha tshi ḓo bvela phanḓa vha tshi vhusana na u ṱuṱuwedzwa nga Sathane, mudzimu a si na lufuno na ane a vha na vengo. (2 Vhakorinta 4:4; 1 Yohane 5:19; vhalani Nzumbululo 12:9, 12.) Vhumatshelo ho vha vhu tshi ḓo vha vhu si havhuḓi arali Yehova o vha a sa ri funi!

4. Ndi ngani Yehova o tendela vhuvhusi hawe vhu tshi shandukelwa?

⁴ Musi Sathane a tshi shandukela vhuvhusi ha Mudzimu, o dovha a ṱuṱuwedza vhabebi vhashu vha u thoma uri vha vhe mashandukwa. O pikisa ndugelo ya Mudzimu ya u Vhusa Shango Ḽoṱhe. Sathane o vha a tshi humbula u nga a nga vhusa khwine u fhira Mudzimu. (Genesi 3:1-5) Nga vhuṱali, Yehova o ṋea Sathane tshifhinganyana tsha uri a lingedze u sumbedza vhuṱanzi ha zwe a mu pomoka zwone. Fhedzi mvelelo dzi sumbedza zwavhuḓi uri vhathu kana Sathane vha nga si vhe vhavhusi vhavhuḓi.

5. Ḓivhazwakale ya vhathu yo sumbedza mini?

⁵ Ṋamusi shango ḽi khou ṋaṋa u vha ḽivhi. Vhathu vha fhiraho milioni dza 100 vho vhulahwa nndwani miṅwahani ya 100 yo fhiraho. Bivhili i amba uri “maḓuvhani a vhufhelo”: “Vhathu vhavhi na vhadzia-vhufhura vha ḓo tou ṋaṋa u ita vhuvhi.” (2 Timotheo 3:1, 13) Bivhili i dovha ya ri: “Yehova! Ndi a zwi ḓivha, muthu dzinḓila dzawe ha dzi vhusi; munna hune a ya ha ḓi-isi na̗ u̗ kanda a khwaṱhisa.” (Yeremia 10:23) Ḓivhazwakale yo sumbedza uri eneo maipfi ndi a ngoho. Yehova ho ngo sika vhathu vhe na vhukoni kana ndugelo ya u ḓivhusa vha si na vhulivhisi hawe.

6. Ndi ngani Mudzimu o tendela vhuvhi?

⁶ Nga u tendela vhuvhi vhu tshi bvela phanḓa lwa tshifhinganyana, Yehova o dovha a sumbedza uri ndi vhuvhusi hawe fhedzi vhune ha ḓo bvelela. Tshifhingani tshi ḓaho, Mudzimu u ḓo fhelisa vhuvhi hoṱhe. Nga murahu ha zwenezwo, arali muthu a vhuya a pikisa vhuvhusi ha Mudzimu, u ḓo dzhia vhukando nga u ṱavhanya. A nga shumisa ḓivhazwakale ya vhathu sa vhuṱanzi ha uri honoho vhushandukwa vhu fanela u fheliswa nga u ṱavhanya. Vhuvhi vhu nga si tsha dovha ha vha hone.

7, 8. Yehova o sumbedza hani lufuno lwawe?

⁷ Yehova o sumbedza lufuno lwawe luhulwane nga nḓila nnzhi. Humbulani nga ha vhuhulwane na lunako lwa shango ḽashu ḽoṱhe. Ḽo itwa nga milalavhungu ya dzibilioni, nahone mulalavhungu muṅwe na muṅwe u na ṋaledzi na pulanete dza dzibilioni. Kha mulalavhungu washu wa Milky Way, ḓuvha ndi iṅwe ya dziṋaledzi. Arali ho vha hu si na ḓuvha, ho vha hu tshi ḓo vha hu si na vhutshilo kha ḽifhasi. Yeneyo tsiko yoṱhe i sumbedza uri Yehova ndi Musiki washu nahone i sumbedza pfaneleo dzawe, dzi nga ho maanḓa, vhuṱali na lufuno lwawe. Vhukuma, “pfaneleo  dza [Mudzimu] dzi sa vhonali, vhathu vha nga dzi vhona zwavhuḓi musi vha tshi sedza zwe a zwi sika u bva tshee shango ḽa sikwa, uri maanḓa awe a sa fheli na uri ndi Mudzimu ngangoho zwi ṱalukanyiwa nga zwe a zwi sika.”—Vharoma 1:20.

⁸ Yehova o sika ḽifhasi zwihuluhulu uri hu vhe na vhutshilo. Tshiṅwe na tshiṅwe kha ḽifhasi tshi vhuyedza zwipuka na vhathu. Mudzimu o ita haya havhuḓi ha vhathu uri vha dzule nahone a vha ṋea mihumbulo na mivhili yo fhelelaho u itela uri vha tshile tshoṱhe. (Vhalani Nzumbululo 4:11.) Zwiṅwe hafhu, “ndi Ene Mu-kanzwa-zwoṱhe-zwivhumbwa, ngauri vhuthu hawe ndi ha lini na lini.”—Psalme ya 136:25.

9. Naho Yehova e Mudzimu wa lufuno, ndi mini zwine a zwi vhenga?

⁹ Yehova ndi Mudzimu wa lufuno, fhedzi u vhenga vhuvhi. Sa tsumbo, Psalme ya 5:4-6 i amba zwi tevhelaho nga ha Yehova: “A u Mudzimu a tendaho vhutshinyi . . . Vhadzia-zwivhi U a vha sanda.” U dovha a vhenga “phondi na vhafhuri.”

10, 11. (a) Hu ḓo itea mini kha vhathu vhavhi? (b) Yehova u ḓo lambedza hani vhathu vha thetshelesaho?

¹⁰ Yehova u ḓo fhelisa vhuvhi hoṱhe shangoni ḽoṱhe nga tshifhinga tsho teaho ngauri ndi Mudzimu wa lufuno nahone u vhenga vhuvhi. Ipfi ḽa Mudzimu ḽi fulufhedzisa uri: “Vhadzia-u-tshinya vha ḓo lovha; vha lindelaho Yehova ndi vhone vhaṋe vha haya. Si fhele mbilu, muvhi ha lalami.” Maswina a Yehova a “ḓo ṱuwa sa vhutsi.”—Psalme ya 37:9, 10, 20.

¹¹ Ipfi ḽa Mudzimu ḽi dovha ḽa fulufhedzisa uri: “Vha u ḓo vha vhaṋe vha shango ndi vhavhuya, ndi vhone vha u ḓo dzula khaḽo’ lini na lini.” (Psalme ya 37:29) Vhathu vha fulufhedzeaho vha “ḓo takalela muḓalo wa mulalo.” (Psalme ya 37:11) Ndi ngani? Ngauri Mudzimu washu wa lufuno u dzula a tshi itela vhashumeli vhawe vha fulufhedzeaho zwa khwine. Bivhili i ri vhudza uri: “U ḓo phumula miṱodzi yoṱhe maṱoni avho, lufu a lu tsha ḓo vha hone, na u ṱungufhala na u lila na vhuṱungu a zwi tsha ḓo vha hone. Zwithu zwa kale zwo fhira.” (Nzumbululo 21:4) Ndi vhumatshelo havhuḓi lungafhani kha vhathu vha thetshelesaho na vhane vha dzhiela nṱha lufuno lwa Mudzimu!

12. Wa u “luga” ndi nnyi?

¹² Bivhili i ri vhudza uri: “Sedza uyo ané a luga, U vhone uyo wa zwivhuya; kha vhone maḓuvha a ḓaho ndi a mulalo. Vha-ita-zwivhi ndi vhone vha u ḓo tshinyala vhoṱhe; kha vhavhi maḓuvha a ḓaho ndi a u lovha.” (Psalme ya 37:37, 38) “Ané a luga” u ḓivha Yehova na Murwa wawe nahone u ita zwine Mudzimu a zwi funa. (Vhalani Yohane 17:3.) U tenda zwi tshi bva mbiluni uri “shango ḽi a fhira na nyemulo dzaḽo, fhedzi ane a ita zwine Mudzimu a zwi funa u ḓo dzula e hone lini na lini.” (1 Yohane 2:17) Nga nṱhani ha uri vhufhelo ha shango vhu tsini, zwo ṱavhanyiswa uri ri ‘lindele Yehova, ri fare nḓila yawe.’—Psalme ya 37:34.

13. Ndi ifhio nḓila khulwane ine Mudzimu a ri funa ngayo?

¹³ Ri nga thetshelesa Mudzimu naho ri songo fhelela. Ri nga dovha ra vha na vhushaka ha tsini na Yehova nga nṱhani ha tshiṱhavhelo tsha Yesu tshi rengululaho, nḓila khulwane ine Mudzimu a ri funa ngayo. Yehova o dzudzanya tshirengululi u itela uri vhathu vha thetshelesaho vha wane tshibuli tsha u vhofhololwa kha tshivhi na lufu. (Vhalani Vharoma 5:12; 6:23.) Yesu o vha a tshi fulufhedzea kha Mudzimu u bva musi a tshee ṱaḓulu, nga zwenezwo, Yehova o vha e na vhungoho ha uri Murwa wawe u ḓo dzula a tshi fulufhedzea kha ḽifhasi. Sa Khotsi a re na lufuno, Yehova o vha o vhaisala vhukuma musi a tshi vhona nḓila mmbi ye vhathu vha fara ngayo Murwa wawe. Naho zwo ralo, Yesu o tikedza ndugelo ya u vhusa ya Mudzimu nga u fulufhedzea nahone a sumbedza uri muthu o fhelelaho a nga dzula a tshi fulufhedzea kha Mudzimu naho o sedzana na zwiimo zwi konḓaho.

14, 15. Lufu lwa Yesu lwo itela mini vhathu?

¹⁴ Yesu o dzula a tshi fulufhedzea na u tikedza ndugelo ya Yehova ya u vhusa, hu sa londwi milingo i vhavhaho. Ri fanela u livhuha vhukuma uri nga nṱhani ha lufu lwawe, Yesu o lifha mutengo wa tshirengululi ngauri tshi ṋea vhathu tshibuli tsha u tshila lwa tshoṱhe shangoni ḽiswa ḽa Mudzimu! Muapostola Paulo o ṱalusa lufuno lwe Yehova na Yesu vha lu sumbedza nga tshirengululi. O ri: “Musi ri sa athu vha na nungo, Kristo o fela vhathu vha sa ofhi Mudzimu nga tshifhinga tsho vhewaho. A si kanzhi muthu a tshi nga fela muthu o lugaho; khamusi muthu o lugaho a nga ḓiimisela u fela muṅwe muthu. Fhedzi Mudzimu o ri sumbedza lufuno lwawe, ngauri musi ri tshi kha ḓi vha vhaitazwivhi, Kristo o ri fela.” (Vharoma 5:6-8) Muapostola Yohane o ṅwala uri: “Ro dzumbululelwa lufuno lwa Mudzimu nga yeneyi nḓila, ngauri Mudzimu o ruma Murwa wawe  mubebwa e eṱhe shangoni uri ri kone u wana vhutshilo ngae. Lufuno lu nga heyi nḓila, a si riṋe vhe ra funa Mudzimu, fhedzi ndi ene we a ri funa, a rumela Murwa wawe uri a vhe tshiṱhavhelo tshi pfumelelaho zwivhi zwashu.”—1 Yohane 4:9, 10.

¹⁵ Yesu o amba uri “Mudzimu o funa shango zwihuluhulu a vhuya a kumedza Murwa wawe mubebwa e eṱhe, uri muṅwe na muṅwe ane a vha na lutendo khae a si fheliswe, fhedzi a wane vhutshilo vhu sa fheli.” (Yohane 3:16) Naho zwo vha zwi tshi khou vhavha vhukuma kha Yehova, o ṋekedzela Murwa wawe sa tshirengululi. Zwenezwi zwi sumbedza nḓila ine a funa ngayo vhathu. Nahone lwonolo lufuno lu ḓo vha lwa tshoṱhe. Paulo o ṅwala uri: “Ndi a tenda uri lufu, vhutshilo, vharuṅwa, mivhuso, zwithu zwa zwino na zwa tshifhinga tshi ḓaho kana maanḓa vhulapfu, vhudzivha kana tsiko naho i ifhio zwi nga si kone u ri fhandekanya na lufuno lwa Mudzimu lu re kha Kristo Yesu Murena washu.”—Vharoma 8:38, 39.

16. Muvhuso wa Vhumessia ndi mini, nahone Yehova o nanga nnyi uri a vhe Muvhusi wawo?

¹⁶ Muvhuso wa Mudzimu une wa vha Muvhuso wa Vhumessia, u dovha wa sumbedza nḓila ine Yehova a funa ngayo vhathu. Nga nḓila-ḓe? Yehova o no nanga Yesu Kristo, Muvhusi ane a funa vhathu nahone o tewa nga u vhusa. (Mirero 8:31) Zwiṅwe hafhu, ho khethiwa vhathu vha 144 000 uri vha vhuse na Kristo ṱaḓulu. Musi vha tshi vuselwa ṱaḓulu, vha ṱuwa vhe na tshenzhelo ya uri zwi hani u vha muthu. (Nzumbululo 14:1) Musi Yesu a tshi kha ḓi vha kha ḽifhasi, Muvhuso wo vha u tshiṱoho tsha ndeme tsha pfunzo yawe, nahone o gudisa vhafunziwa vhawe u rabela uri: “Khotsi ashu wa ṱaḓulu, dzina ḽau nga ḽi itwe ḽikhethwa. Muvhuso wau nga u ḓe. Zwine wa funa nga zwi itwe fhano kha ḽifhasi vhunga zwi tshi itwa ngei ṱaḓulu.” (Mateo 6:9, 10) Ro lavhelela nga maṱo matswuku u ḓadzea ha yeneyo thabelo, musi Muvhuso wa Mudzimu u tshi ḓisela vhathu phaṱutshedzo nnzhi!

17. Vhambedzani u vhusa ha Yesu na u vhusa ha vhathu.

¹⁷ Hu na phambano khulwane vhukati ha vhuvhusi ha Yesu ha lufuno na vhuvhusi ha vhathu. Vhuvhusi ha vhathu ho ita uri hu vhe na dzinndwa dze dza ita uri hu fe vhathu vhanzhi. Fhedzi Muvhusi washu Yesu, u a ri funa vhukuma nahone u a edzisa pfaneleo dza Mudzimu, zwihuluhulu lufuno lwawe. (Nzumbululo 7:10, 16, 17) Yesu o ri: “Iḓani ha nṋe noṱhe no netaho ni lemelwaho, ndi ḓo ni homolosa. Hwalani dzhogo yanga, ni gude kha nṋe, ngauri ndo vuḓa nahone ndi a ḓiṱukufhadza mbiluni, mimuya yaṋu i ḓo homoloswa. Ngauri dzhogo yanga a i gogoni na muhwalo wanga u a leluwa.” (Mateo 11:28-30) Ḽeneḽo ndi fulufhedziso ḽa lufuno lungafhani!

18. (a) Ho itea mini u bva nga 1914? (b) Ri ḓo ṱolisisa mini kha thero i tevhelaho?

¹⁸ Bivhili i sumbedza uri Muvhuso wa Mudzimu wo thoma u vhusa ṱaḓulu nga 1914. U bva tsheetsho, ho kuvhanganywa masalela a vhane vha ḓo vhusa na Yesu ngei ṱaḓulu, u katela na u kuvhanganywa ha vha “gogo ḽihulu” vhane vha ḓo ponyoka vhufhelo ha ano maitele nahone vha dzhena shangoni ḽiswa. (Nzumbululo 7:9, 13, 14) Gogo ḽihulu ndi ḽi ngafhani ṋamusi? Mudzimu u lavhelela mini khaḽo? Thero i tevhelaho i ḓo ṱolisisa dzenedzo mbudziso.