1, 2. Fa Beibel e soi taki lobi a wan pelensipali sani?

LOBI na a moo pelensipali fasi fu Yehofa Gadu (1 Yohanisi 4:16). Yesesi Kelestesi, a fosi sama di Yehofa meke, tan miliyunmiliyun yali anga en Dda a hemel. Neen meke a sabi taki Yehofa a wan Gadu di lobi sama (Kolosesama 1:15). Di Yesesi be de a hemel anga di a be de a goontapu, a soi taki a lobi libisama enke fa Yehofa lobi den. Neen meke wi e biibi taki Yehofa anga Yesesi o tii hemel anga goontapu a wan bun fasi fu di den lobi u.

² Di wan sama be akisi Yesesi san na a moo gaan weiti, neen Yesesi taigi en taki: „’I mu lobi i Gadu Yehofa anga i hii ati, i hii libi anga ala i fusutan.’ A disi na a fosi anga a moo gaan weiti. Du fu tu weiti de enke a fosi wan, dati na: ’I mu lobi taa sama enke fa i lobi iseefi.’”​—Mateyesi 22:37-39.

3. Sama a den „taa sama” di u mu lobi?

 ³ U mu lobi ala sama. Yesesi be taki u mu lobi Yehofa anga taa sama. Ma sama a den „taa sama” di u mu lobi? Efi i toow, da i toowpaa na a moo pelensipali sama di i mu lobi. I mu lobi den baala anga sisa aini a kemeente tu. Boiti dati, u mu lobi den sama di wi e miti aini a peleikiwooko. Aini a artikel ya wi o luku san u mu du fu soi taki u lobi taawan tuutuu.

4. San o yeepi toowpaa fu den toowlibi waka bun, winsi fa den abi sondu?

⁴ Di Yehofa meke Adan anga Efa, neen a tyai den kon a wan. A disi na a fosi toow. Gadu be wani den abi wan toowlibi di e gi den piisii. Boiti dati, den be mu meke pikin fuu a goontapu tu (Genesesi 1:27, 28). Ma baka di den taangayesi Yehofa, a toowlibi fu den poli. Ala den pikin di den be meke be e dede fu di den be abi sondu (Romesama 5:12). Ma tokuso u poi abi wan bun toowlibi, winsi fa wi abi sondu. Fu di Yehofa na a sama di sete a toowlibi, meke ai soi wi aini Beibel san u mu du fu u toowlibi waka bun.​—Leisi 2 Timotiyesi 3:16, 17.

5. Saide lobi de fanowdu aini a toowlibi?

⁵ Beibel taki tuutuu lobi de fanowdu efu u wani libi bun anga taawan, moomoo te u wani libi bun anga u toowpaa. A apostel Pawlesi be soi san a tuutuu lobi. A sikiifi taki: „Lobi abi pasensi anga bun manii. A nai dyalusu. A nai meke bigi. A ná abi heimembee tu. A nai tyai enseefi a wan fa ná fiti fasi. Lobi nai suku wini fi en wawan. En ati nai boon gaw. A nai holi taawan na ati. A nai piisii anga sani di á bun, ma ai piisii anga sani di tuu. A abi boo anga ala sani. Ai biibi ala sani, ai howpu ala sani, ai holidoo winsi san e pasa. Lobi e tan fu teego” (1 Korentesama 13:4-8). Efu wi e sidon pakisei den sani di Pawlesi taki da u du den, u toowlibi o waka bun.

6, 7. (a) Fa Beibel taki a ede fu a osufamii mu tyai enseefi? (b) Fa wan Kelesten mu libi anga en uman?

⁶ Yehofa taki sama na a ede fu a osufamii. Pawlesi taki: „Mi wani u sabi taki a Kelestesi na a ede fu ala manengee. A man na a ede fu a uman. Ma a ede fu Kelestesi a Gadu” (1 Korentesama 11:3). Ma Yehofa wani den man libi bun anga den uman. Den á mu libi ogii anga den. Den á mu du hati sani anga den tu. Yehofa seefi a wan Edeman di abi bun fasi. A nai denki enseefi namo. Neen meke Yesesi be e lesipeki Yehofa. Yesesi be taki: „Mi lobi Nda” (Yohanisi 14:31). Efu Yehofa be abi ogii-ati Yesesi á be o lesipeki en.

⁷ Winsi fa a man na a ede fu a uman, tokuso Beibel taki a man mu lesipeki en uman (1 Peitilisi 3:7). Fa wan man sa lesipeki en uman? A mu poti pakisei a den sani di a abi fanowdu anga den sani di a lobi. Beibel taki: „Manengee, i mu lobi yu uman, enke fa Kelestesi lobi a kemeente, te a dede fi en ede” (Efeisesama 5:25). Yesesi dede gi den bakaman fi en. Te wan man lobi en uman enke fa Yesesi be lobi den bakaman fi en, a o moo makiliki gi en uman fu lobi en anga fu lesipeki en. A uman o holibaka gi en tu.​—Leisi Titesi 2:3-5.

8. Fa u mu libi anga u baala anga sisa?

⁸ Aini a ten ya, a omen miliyun sama e dini Yehofa. Ala den sama ya a u baala anga u sisa. Fa u mu libi anga den? Beibel taki: „U mu du bun gi taawan, moomoo den sama di wi anga den de na aseefi biibi” (Galasiyasama 6:10; leisi Romesama 12:10.) A apostel Peitilisi be sikiifi taki te wi e „aliki a tuu leli” da wi o „lobi useefi”. Peitilisi be taigi den Kelesten tu taki: „A sani di de moo taanga fanowdu, na a lobi di u mu lobi useefi anga u hii ati, bika lobi e meke u wai ede gi omen sondu di taawan e du.”​—1 Peitilisi 1:22; 4:8.

9, 10. Saide a foluku fu Gadu e libi na a wan?

⁹ Nawan olikanisâsi de enke du fu Yehofa. Fu saide? A fu di u lobi u baala anga u sisa anga u hii ati. Ma a moo pelensipali sani, na a lobi di u lobi Yehofa anga den weiti fi en. Boiti dati, Yehofa e holibaka gi u anga a santa yeye fi en. A santa yeye na a moo taanga kaakiti di de. A yeye fu Gadu e yeepi u fu libi na a wan anga ala den baala anga sisa fu u a hii goontapu.​—Leisi 1 Yohanisi 4:20, 21.

¹⁰ Pawlesi soi taki Kelesten mu lobi denseefi tuutuu. A sikiifi taki: „Neen ede meke u mu abi tyali ati anga taawan. U mu abi switifasi, sakafasi, safu-ati anga pasensi. Wei den fasi ya enke wan koosi a u sikin. U mu abi boo anga taawan. Gi taawan paadon anga u hii ati tu. Ma boiti den fasi ya, u mu wei lobi enke wan koosi a u sikin tu, bika a lobi e meke sama e libi na a wan” (Kolosesama 3: 12-14). Ai bigi gi u taki u lobi useefi, winsi sowtu kondee wi e tan!

11. San e yeepi sama fu sabi a olikanisâsi fu Yehofa?

¹¹ Fu di a foluku fu Yehofa lobi denseefi anga fu di den e libi na a wan meke taa sama e si taki a den abi a tuu biibi. Yesesi taki: „A so ala sama o sabi taki wi a mi bakaman, te u lobi makandii” (Yohanisi 13:34, 35). A apostel Yohanisi sikiifi taki: „A so sama o sabi sama a den pikin fu Didibii, anga sama a den pikin fu Gadu: Efu wan sama nai libi a wan leti fasi, da a sama de a ná fu Gadu. Na aseefi sani e teli gi wan sama di á lobi en baala. Fanafu a bigin u be yee taki u mu lobi useefi” (1 Yohanisi 3:10, 11). Fu di Yehofa Kotoigi lobi denseefi anga fu di den e libi na a wan, meke sama sabi den enke bakaman fu Yesesi. A den Yehofa gi a wooko fu paati a bun nyunsu fu a Kownukondee a hii goontapu.​—Mateyesi 24:14.

12, 13. San a „gaan kulu” sama e du aini a ten ya? San den o fende aini a ten di e kon?

¹² Gaanse fu a foluku fu Yehofa de aini a „gaan kulu” sama di komoto na ala se fu goontapu. Den e holibaka gi a Kownukondee fu Yehofa anga den hii ati. A den „komoto aini a gaan banowtu. Den wasi den langa koosi aini a buulu fu a pikin sikapu te enke a weti”, fu di den e biibi taki a dede fu Yesesi o tyai wini gi den. A „gaan kulu” sama ya lobi Yehofa anga en manpikin. Den sama ya e dini Yehofa „dei anga neti”.​—Openbaring 7:9, 14, 15.

¹³ Dyonson Gadu o poli a ogii goontapu ya na a „gaan banowtu” (Mateyesi 24:21; leisi Yelemiya 25:32, 33.) Ma Yehofa o kibii den sama di e dini en. A o tyai den go aini a nyun goontapu fu di a lobi den. Enke fa a paamisi u 2000 yali pasa „a o dee den wataa ain fu den. Da dede, tyali, kee anga pen ná o de moo”. Yu e angii fu libi aini a paladeisi te angii, pina anga dede ná o de moo?​—Openbaring 21:4

14. Omen sama de aini a gaan kulu?

¹⁴ Di den lasiti dei bigin aini 1914, a wan sani fu 5000 salufu Kelesten namo be de. Winsi fa tesi be e miti den, tokuso den paati a bun nyunsu fu a Kownukondee gi taawan fu di den lobi sama, anga fu di a santa yeye be e yeepi den. Fa sani waka di den paati a bun nyunsu? Wan gaan kulu sama di o libi fu teego a goontapu e kon aini a tuu biibi. Nownow a moo enke 8.000.000 Kotoigi de a hii goontapu aini moo enke 115.400 kemeente. Dei fu dei den e moo ipi. Aini a diniwooko yali fu 2014 a moo enke 275.500 sama dopu. A sani ya e soi taki ala wiki wan sani fu 5300 sama e dopu.

15. Fa omen sama e yee a bun nyunsu?

¹⁵ Wi e piisii te wi e si fa omen sama yee a bun nyunsu fu a kownukondee. Nownow den buku fu u de aini moo enke 700 tongo. A Wakititolen paati moo ala taa buku a goontapu. Ala mun a moo enke 52.000.000 fu A Wakititolen den e doloki aini 247 tongo. Anga a buku di den e kai San Bijbel e leri wi trutru? wi e sutudeli anga sama. A buku ya de aini 250 tongo. Te enke now a  200.000.000 fu a buku ya den doloki kaba.

16. Fa a du kon taki a olikanisâsi fu Yehofa e bigi namo?

¹⁶ Wi e biibi Gadu. Wi e si a Beibel enke en Wowtu tu. Neen meke a olikanisâsi fu wi e bigi namo (1 Tesalonikasama 2:13). Saatan e du ala san a poi fu tapu u fu di ai buuse u, tokuso Yehofa e belesi u.​—2 Korentesama 4:4.

17, 18. Fa Yehofa wani u si den sama di nai dini en?

¹⁷ Na ala sowtu sama wi e miti te wi e peleiki. Son wan fu den e aliki, ma taawan e buuse a bosikopu di wi e paati. Fa Yehofa wani u si den sama di nai dini en? Winsi san wan sama du te wi e peleiki gi en, u mu du san Beibel taki. A taki: „Ala yuu u mu taki a wan switifasi. Den sani di wi e taki mu abi sawtu. Te wi e taki so, da wi o sabi fa u mu piki iniiwan sama” (Kolosesama 4:6). Te wi e taigi sama den sani di wi e biibi noiti u mu taki „anga boon ati, ma anga ala lesipeki”.​—1 Peitilisi 3:15.

¹⁸ Winsi fa sama ati e boon a wi, winsi fa den á wani aliki a bosikopu di wi e paati, tokuso wi e puubei fu waka a Yesesi baka. Wi e soi den taki u lobi den. „Te sama be e kosi en, a á be e kosi baka. Te den be e pina en, a á be e paamisi den fu du ogii anga den baka” (1 Peitilisi 2:23). Neen meke u mu soi taki wi abi sakafasi, da u du san Beibel taki. Beibel taki: „Ná pai ogii fu ogii. Te sama kosi i, yu á mu kosi baka, ma taki switi anga den.”​—1 Peitilisi 3:8, 9.

19. Fa u mu libi anga u feyanti?

¹⁹ Te wi abi sakafasi, da wi o du a sani di Yesesi be taki. A taki: „U yee den e taki: ’U mu lobi taa sama, ma u mu buuse u feyanti.’ Ma mi e taigi u taki: U mu lobi u feyanti, u mu begi gi den sama di e tesi u tu. Te u du so, da wi e soi taki u de enke u Dda a hemel. Bika ai meke a san pii gi den ogii sama anga den bun sama. Ai meke alen kai gi den sama di e libi a wan leti fasi anga den sama di nai libi a wan leti fasi” (Mateyesi 5:43-45). Fu di wi e dini Gadu, meke u mu lobi u feyanti winsi san den e du anga u.

20. Fa u du sabi taki ala sama di o libi a goontapu o lobi Yehofa anga taa sama? (Luku a fowtow na a bigin.)

²⁰ Ala yuu u mu soi taki u lobi Yehofa anga taa sama. Winsi son sama wani du ogii anga u, efuso den á wani aliki a bosikopu di wi e paati, tokuso wi e yeepi den te den de a nowtu. A apostel Pawlesi be sikiifi taki: „Wi á mu abi paiman a nawan sama, boiti a lobi di u mu lobi useefi. A sama di lobi taawan e du san a weiti taki. Den weiti di taki ’wi á mu e hulu, wi á mu kii sama, wi á mu fufuu, wi á mu giili, anga ala den taa weiti, de aini a weiti ya: „U mu lobi taa sama enke fa u lobi useefi. Efu u lobi taa sama, da u ná o du ogii anga den. Neen meke te u lobi taa sama, wi e du san a weiti e taki” (Romesama 13:8-10). Aini a ogii goontapu fu Saatan sama á lobi denseefi. Ma den sama di e dini Gadu lobi taawan (1 Yohanisi 5:19). Di Yehofa o kii Saatan anga den ogii yeye, di a o poli a ogii goontapu ya, da lobi o de na ala se fu goontapu. A o de wan moin ten tuutuu te ala sama a goontapu o lobi Yehofa anga taa sama!