1, 2. Aweyi Nkand’a Nzambi usongelanga o mfunu a zola?

ZOLA i fu kia Yave wa Nzambi kisundidi. (1 Yoane 4:16) Yesu Kristu wa vangwa kiandi kiantete, wazinga mvu miayingi kumosi yo Se diandi kuna zulu yo longoka una Yave wa Nzambi kesongelanga o zola. (Kolosai 1:15) Yesu mpe osonganga o zola, kiakala muna zingu kiandi kuna zulu yovo vava kakala ova ntoto. Muna kuma kiaki, tuna ye ziku vo Yave yo Yesu bekwamanana yadila kuna zola.

² Vava muntu mosi kayuvula Yesu kana nkia nkanikinu usundidi, Yesu wavutula vo: “Zola Yave wa Nzambi aku yamuna nsi a ntim’aku yawonso, yo muna fulumwinu kiaku kiawonso, yo muna nyindu aku wawonso. I wau wuwu o nkanikinu anene, wantete mpe. Una wezole ufwananini, i wau wuwu, zola nkw’aku, konso un’okuzolela.”—Matai 22:37-39.

3. Nani i ‘nkw’eto’?

 ³ Diamfunu twasonganga o zola kwa wantu awonso. Yesu wavova vo tufwete zola Yave yo zola mpe nkw’eto. Kansi, nani i ‘nkw’eto’ yovo mfinangani eto? Avo twasompa, o muntu antete tufwete badikila vo mfinangani i nkaz’eto. Mpangi zeto mpe muna nkutakani tufwete kubabidikilanga vo mfinangani zeto, kumosi y’awana tusilanga umbangi. Mu longi diadi, tulongoka una tulenda songela o zola kwa mfinangani zeto.

4. Aweyi longo lulenda kadila lwakiese kana una vo tu wantu alembi lunga?

⁴ Yave wavanga Adami yo Eva yo kubayikakesa muna longo. Lwalu i longo lwantete. Nzambi wazola vo bakala ye longo lwakiese, bawuta o wana yo zadisa o ntoto. (Etuku 1:27, 28) Kansi, vava bakolamena Yave, e mpasi zakota muna longo lwau, e sumu ye lufwa lwamwangana kwa yeto awonso. (Roma 5:12) Kana una vo i wau, wantu balenda kala ye longo lwakiese o unu. Muna Nkand’a Nzambi, Yave wa Tuku dia longo, ovananga luludiku lwambote kw’akala ye akento.—Tanga 2 Timoteo 3:16, 17.

5. O zola nkia mfunu kwina muna longo?

⁵ Nkand’a Nzambi usonganga vo o zola yo walakazi mfunu kwina muna kala ye yikundi yambote. Ediadi dialudi mpe muna longo. Paulu wa ntumwa wayika zola kwakieleka vava kavova vo: ‘O zola kuna yo luzindalalu yo walakazi. O zola ke kwina ye kimpala ko. Ke kukuyisana ko, ke kukuyitundidika ko, ke kuvanga mambu malembi songa ko, ke kuvava wete wa yandi kibeni ko, ke kufunga makasi mu nzaki ko. O zola ke kubadikanga mbi ko. Ke kumwena vilwa kiese ko, kansi kumwena ludi e kiese. Kuzizidila mawonso, kukwikila mawonso, kusila mawonso e vuvu, kuzindalela mawonso. O zola ke kusuka nkutu ko.’ (1 Korinto 13:4-8) Avo tubadikidi mvovo mia Paulu yo sadila mio, tulenda kala ye longo lwakiese.

6, 7. (a) Adieyi Nkand’a Nzambi uvovanga mu kuma kia vita o ntu? (b) Aweyi yakala una vo Nkristu kafwete kadilanga yo nkaz’andi?

⁶ Yave wasola ndiona ofwete vita o ntu muna nzo. Paulu wavova vo: “Nzolele nwazaya wo, ovo, o ntu akal’awonso, i Kristu: o ntu a nkento, i’yakala; o ntu a Kristu, i Nzambi.” (1 Korinto 11:3) Kansi, Yave ovavanga vo yakala kavitang’o ntu kuna zola, lembi kala nkwa ntim’a mbadi yovo nkwa nsoki. Yave osadilanga e wisa kiandi kuna ngemba yo zola. Muna kuma kiaki, Yesu ozitisanga wisa kia Nzambi. Wavova vo: “Nzolele Se.” (Yoane 14:31) Yesu kadi vova mvovo miami ko kele vo Yave kakala nkwa ntim’ambâdi.

⁷ Kana una vo yakala i ntu a nkento andi, Nkand’a Nzambi ukumvovesanga vo kanzitisa. (1 Petelo 3:7) Aweyi yakala kalenda wo vangila? Muna vavang’o zaya e  nsatu za nkaz’andi yo zitisa e zolela yandi. Nkand’a Nzambi uvovanga vo: “Akala, nuzolang’akazi eno, waun’o Kristu wazola dibundu, yo kuyekwela dio.” (Efeso 5:25) Kieleka, Yesu wavana nkutu moyo andi mu kuma kia alandi andi. Vava yakala kevitang’o ntu kuna zola nze Yesu, ke dikala diampasi ko kwa nkento mu kunzola, kunzitisa yo lemvokela nzengo zandi.—Tanga Tito 2:3-5.

8. Aweyi tufwete kadilanga ye mpangi zeto?

⁸ O unu, mazunda ye mazunda ma wantu besambilanga Yave ova ntoto. Yau awonso mpangi zeto. Aweyi tufwete kadilanga yau? Nkand’a Nzambi uvovanga vo: “Mbula twavang’owu wambote kwa wantu awonso, musungula kw’esi kilukwikilu.” (Ngalatia 6:10; tanga Roma 12:10.) Petelo wa ntumwa wasoneka vo o “lemvokel’e ludi” difwete kutufila mu songaziana “nzolani a ungudi.” Petelo wavovesa mpe mpangi zandi Akristu vo: “Vana ntandu a mambu mawonso nusiamanen’o zolana.”—1 Petelo 1:22; 4:8.

9, 10. Ekuma nkangu a Nzambi bayikakiana?

⁹ E nkubik’eto mu nz’amvimba yasivi  kikilu. Ekuma? Mu kuma kia zola kwa nsi a ntima tusonganga kwa mpangi zeto. Wau vo Yave tuzolanga yo lemvokela nsiku miandi, okutuvananga mwand’andi avelela una vo i nkuma unsundidi mu nsema wawonso. Mwand’a Nzambi ukutusadisanga mu songa o zola kwa mpangi zeto mu nz’amvimba.—Tanga 1 Yoane 4:20, 21.

¹⁰ Paulu wayika o mfunu wa songa o zola vana vena Akristu vava kasoneka vo: ‘Nuvwata ntim’a nkenda, walakazi, lusakalalu lua ntima, lembama, nlandu a lutantu; nuvezananga mambu yo yambuziana, ovo muntu obakidi nkw’andi diambu; wauna kanuyambulwila o Mfumu, i una mpe nuyambulwila: vana ntandu a mambu mama mawonso, nuvwata zola, kwina vo i kangwa kia zikuka.’ (Kolosai 3:12-14) O zola kuyikakesanga o wantu. Tuvutulanga kikilu matondo wau tusongaziananga o zola, kiakala nkia fulu twatuka.

11. Aweyi tulenda zayila nkubik’a Nzambi?

¹¹ O zola kwakieleka ye kintwadi vana vena selo ya Yave kisonganga vo mu nsambil’aludi bena. Yesu wavova vo: “Muna wau i bezayil’o wantu awonso vo nu alongoki ame, ovo nzolani nuna yau.” (Yoane 13:34, 35) Yoane wa ntumwa wasoneka vo: “Muna wau i besengomoken’o wan’a Nzambi, yo wana a Nkadi ampemba mpe: konso on’olembi vangang’owu wansongi ke wa Nzambi ko, ngatu ndion’olembi zolanga mbunzi andi. Kadi, i wau wuwu o nsamu una nwawa tuka kuna lubantiku, ovo, tuzolaziana.” (1 Yoane 3:10, 11) O zola ye kintwadi kia Mbangi za Yave kisonganga vo yau i alandi akieleka a Kristu, nkangu una Nzambi kesadilanga mu samuna e nsangu zambote za Kintinu mu nza yawonso.—Matai 24:14.

12, 13. Adieyi bevanganga o unu awana bena muna buka kia “ndong’ayingi”? Nkia nsambu bevua ke kolo ko?

¹² Ayingi muna selo ya Yave o unu, mu buka kia “ndong’ayingi” bena, betukanga mu nsi zayingi yo yikama e Kintinu. “I yau yana batuka muna mpasi zayingi, basukwila mpe e mvwatu miau yo pembesela mio muna menga ma Mwan’ememe” muna kwikilanga muna kimenga kia Yesu kia lukûlu. Awana bena mu buka kia “ndong’ayingi” bezolanga Yave yo Mwan’andi yo sambila Yave “fuku yo mwini.”—Lusengomono 7:9, 14, 15.

¹³ Ke kolo ko Nzambi ofwasa e nza yayi yambi muna ‘mpasi zayingi.’ (Matai 24:21; tanga Yeremiya 25:32, 33.) Kansi, Yave  otanina yo fila selo yandi muna nz’ampa, kadi zola kekubazolanga. Nze una kasia nsilu se vioka 2.000 ma mvu, Yave ‘okunguna mansanga mawonso muna meso mau; o lufwa, ke lukala diaka ko; musungula kala diaka dilu, yovo kazu, ngatu mpasi.’ Nga ozolele zingila muna Paradiso vava e mbi, mpasi ye lufwa lufokoka?—Lusengomono 21:4.

14. O lutangu lwa ndong’ayingi yamu nkia tezo luwokelelanga?

¹⁴ Vava lumbu yambaninu yayantika muna mvu wa 1914, selo ya Nzambi akete kaka bakala ova nza. Mu kuma kia zola kwau muna mfinangani zau ye muna lusadisu lwa mwand’avelela a Nzambi, buka kiakiete kia mpangi zakuswa kiasamunanga e nsangu zambote za Kintinu kana una vo banwananga ye mpasi. Nkia nluta diatwasa? O unu, ndong’ayingi ya wantu ana bena ye vuvu kia zinga yakwele mvu ova ntoto bekutakeswanga. Vena ye tezo kia 8.000.000 ma Mbangi za Yave muna vioka 115.400 za nkutakani mu nza yawonso. Lutangu lwalu mu wokela kaka lwina. Kasikil’owu, vioka 275.500 za mpangi bavubwa muna mvu wa salu kia 2014. Ediadi disongele vo konso lumingu wantu 5.300 bevubwanga.

15. Aweyi ulolo wa wantu bewilanga e nsangu zambote o unu?

¹⁵ Diakiese kikilu mu mona ulolo wa wantu bewanga e nsangu zambote za Kintinu. O unu e nkanda mieto misekolwanga mu vioka 700 za ndinga. Eyingidilu i finkanda fisundidi kayaneswa omu nza yawonso. Vioka 52.000.000 ma yinkanda-nkanda inietekwanga konso ngonde. Finkanda-nkanda fiafi fivaikiswanga mu 247 za ndinga. O Nkand’a Nzambi Adieyi Kieleka Kelonganga? owu tusadilanga muna longoka Nkand’a Nzambi yo wantu, wasekwelo kala mu vioka 250 ma ndinga. Vioka 200.000.000 ma nkanda wau mianietekelo kala.

16. Ekuma nkubik’a Yave inungunukinanga?

¹⁶ E nkubik’a Yave mu nungunuka kaka ina kadi tukwikilanga muna Nzambi yo kwikila vo Nkand’a Nzambi wasonekwa muna lusadisu lwa mwand’avelela. (1 Tesalonika 2:13) Tusambulwanga kwa Yave kana una vo Satana okutumenganga yo kutubangika.—2 Korinto 4:4.

17, 18. Aweyi Yave kezolanga vo twabadikila awana ke bekunsambilanga ko?

¹⁷ Wantu mu mpila zayingi bebadikilanga e nsangu zeto. Akaka bekutuwanga, kansi akaka ke bezolanga wá nsangu tusamunanga ko. Aweyi Yave kezolanga vo twabadikila awana ke bekunsambilanga ko? Wantu batambulwila e nsangu tusamunanga yovo ve, tulandanga luludiku lwa Nkand’a Nzambi luvovanga vo: “E mpov’eno yangemb’e lumbu yawonso, yasiw’o mungwa, nwazay’e mputula nufwete vutula konso muntu.” (Kolosai 4:6) Vava tusonganga kwa wantu mana tukwikilanga, tufwete wo vangila “kuna lembama yo vumi” kadi mfinangani zeto tuzolanga.—1 Petelo 3:15.

¹⁸ Kana nkutu vava wantu befunganga makasi yo lembi wá e nsangu tusamunanga, tusonganga o zola kwa mfinangani zeto yo tanginina mbandu a Yesu. Vava Yesu ‘kalevolwa, kavutula malevo ko; una  kamon’e mpasi, kavumisa ko.’ Kansi, Yesu wabund’e vuvu kwa Yave. (1 Petelo 2:23) Muna kuma kiaki, tusonganga lulembamu yo lemvokela luludiku olu: “Ke nuvutula mbi muna mbi ko, ngatu malevo muna malevo; deke nwasambula kaka.”—1 Petelo 3:8, 9.

19. Aweyi tufwete kadilanga ye mbeni zeto?

¹⁹ O lulembamu lukutusadisanga mu lemvokela nkanikinu wamfunu kavana Yesu. Wavova: “Nwawidi wo wavovoka vo, ozola nkw’aku, osaula ntantu aku: kansi omono inusamunwini vo, nuzol’atantu eno, nubasambil’ana bekunubangika; nwakala nu wan’Es’eno wina kun’ezulu: e kuma kadi, odungumunanga ntangw’andi vana vena wantu ambi yo wantu ambote, yo nokesanga mvula vana ven’asongi, y’ana balembi songa.” (Matai 5:43-45) Wau vo tu selo ya Nzambi, tufwete zolanga mbeni zeto kana nkutu vava bekutuvanganga e mbi.

20. Aweyi tuzayidi wo vo kuna sentu wantu awonso bezola Nzambi ye mfinangani zau? (Tala fwaniswa kuna lubantiku lwa longi.)

²⁰ Ntangwa zawonso tufwete songanga vo tuzolanga Yave ye mfinangani zeto. Kana nkutu vo wantu batusidi kitantu yo lembi wa nsangu zeto, tukubasadisa avo lusadisu bavuidi o mfunu. Paulu wa ntumwa wasoneka vo: “Ke nudia muntu mfuka ko, nangu zolana kaka: kadi on’ozolele nkw’andi olunganisi o nsiku. Ediadi, kute zumba ko, kuvondi ko, kuyiyi ko. kulokokela ko, ovo vena mpe yo nkanikinu akaka, wasonga muna diambu diadi, ovo, zola nkw’aku nze nge kibeni. Zola ke kuvanga nkw’andi mbi ko: dianu vo, zola i lulungisu lua nsiku.” (Roma 13:8-10) E selo ya Nzambi besonganga o zola kwa mfinangani zau mu nza yayi iyalwanga kwa Satana, yazala ye mpambani, nsoki ye umpumbulu. (1 Yoane 5:19) Vava Yave kefwasa Satana ye nkuya miandi kumosi ye nza yayi yambi, o wantu va nza yawonso besongaziana o zola kwakieleka. Ekwe kiese tukala kiau vava wantu awonso ova ntoto bezola Yave ye mfinangani zau!