1, 2. Lelo Bisonekwa bilombola namani mvubu ya buswe?

BUSWE i ngikadila mikatampe ya Yehova Leza. (1 Yoano 4:16) Yesu Kidishitu byadi kipangwa kyandi kibajinji wāpityije myakta midiyala ne midiyala momwa mūlu na Shandi kadi wēfundile mwikadile buswe bwa Yehova Leza. (Kolose 1:15) Yesu wālombwele buswe bwa uno muswelo mu būmi bwandi bonso momwa mūlu nansha ke pano pa ntanda pene. O mwanda tukulupile amba ba Yehova ne Yesu bakaludika nyeke na buswe.

² Muntu umo paāipangwile Yesu mbila mikatampe kutabuka, Yesu wāmulondolwele amba: “Sanswa Yehova Leza obe na mutyima obe onso ne na muya obe onso ne na ñeni yobe yonso. Ino’i yo mbila itabukile bukatampe kadi yo imbajinji. Ya bubidi, iifwene nayo, i ino: Sanswa mukwenu mowisanshilwe abe mwine.”​—Mateo 22:37-39.

3. Lelo “mukwetu” i ani?

 ³ I kya kamweno kusanswa bantu bonso botupwene nabo. Yesu wānene amba tufwaninwe kusanswa Yehova ne mukwetu. Penepa “mukwetu” i ani? Shi tudi mu busongi, mukwetu wa pabwipi i mwinē petu. Kadi mukwetu i batutu ne bakaka mu kipwilo ne bantu botwitananga nabo mu busapudi. Mu kino kishinte, tusa kwifunda’mo muswelo wa kuswa bakwetu.

4. Lelo i muswelo’ka otukokeja kulumbulula busongi nansha byotudi bampikwa kubwaninina?

⁴ Yehova wāpangile ba Adama ne Eva ne kwibatula pamo. Buno bo busongi bubajinji. Leza wādi usaka bekale mu busongi bwa nsangaji ne kuyuja ntanda na lutundu lwabo. (Ngalwilo 1:27, 28) Ino, yō abo’tu pa kupwa kutombokela Yehova, busongi bwabo bwaikala bwa makambakano, ebiya bubi ne lufu byasambakana ku batwe bonso. (Loma 5:12) Nansha nabya, dyalelo busongi bubwanya kwikala bulumbuluke. Yehova i mutelwe mu Bible bu Mushiludi wa busongi, kadi imupe balume ne bakaji madingi a kamweno kakatampe.​—Tanga 2 Temote 3:16, 17.

5. Lelo buswe budi na kamweno’ka mu busongi?

⁵ Bible unena amba buswe bwa kyanga kadi bwa kanye i bwa mvubu pa kwikala mu kipwano kya nsangaji. Ne kadi kino kidi na mvubu mu busongi. Mutumibwa Polo wēsambile pa buswe bwa bine paāsonekele amba: “Buswe kebudipo na mukao, kebwianyangapo, kebwitatulangapo, kebuloñangapo byampikwa kwendela’mo, kebukimbangapo tumweno twa abo bwine, kebukelwangapo bulobo. Kebubalangapo bibi bilongelwe. Kebusangelangapo bukondame, ino busangalanga pamo na bubine. Butyumwinanga byonso mu manwi, bwitabijanga byonso, bukulupilanga byonso, būmininanga byonso. Buswe kebukankalwangapo.” (1 Kodinda 13:4-8) Shi tulangulukile pa binenwa bya Polo ne kwibingidija, nabya busongi bwetu bukekala bwa nsangaji.

6, 7. (a) Lelo Bible unena bika pa mutwe wa kisaka? (b) Le i muswelo’ka mulume mwine Kidishitu wafwaninwe kumona wandi mukaji?

⁶ Yehova ulombwele muntu ufwaninwe kwikala bu mutwe wa kisaka. Polo unena amba: “Nsaka muyuke amba mutwe wa mwana-mulume ense i Kidishitu; ne mutwe wa mwana-mukaji i mwana-mulume; ne kadi mutwe wa Kidishitu i Leza.” (1 Kodinda 11:3) Ino Yehova usaka mulume engidije bu mutwe bwandi na buswe, ke na kamweno ka aye mwinepo nansha na bukalabale. Yehova wingidijanga bu mutwe bwandi na kanye ne kwampikwa kwisakila. O mwanda Yesu ulēmekele lupusa lwa Leza wa buswe. Wānene amba: “Nsenswe Tata.” (Yoano 14:31) Yesu kādipo wakunena namino shi Yehova wādi umususula.

⁷ Bible ulombola mulume amba nansha byadi mutwe ufwaninwe kulēmeka wandi mukaji. (1 Petelo 3:7) Le mulume ukamulēmeka namani? I na kuta mutyima ku bisakibwa bya wandi mukaji ne kulēmeka milangwe yandi. Bible unena amba: “Banwe balume, sanswai nyeke bakaji benu, monka mwasanshilwe Kidishitu kipwilo, wepāna ne kwipāna pa mwanda wakyo.” (Efisesa 5:25) Bine, Yesu wāpēne būmi bwandi pa mwanda wa balondi bandi. Shi mulume i mutwe wa kisaka wa buswe pamo bwa Yesu, kino kikapēlela mukaji kumuswa ne kumulēmeka ne kwitabija butyibi bwa kwata.​—Tanga Tetusa 2:3-5.

8. Le tumonanga batutu ne bakaka namani?

⁸ Dyalelo, midiyo ne midiyo ya bantu batōtanga Yehova pano pa ntanda ponso. Kudi batutu ne bakaka. Lelo twibamonanga namani? Bible unena amba: “Tulongelei bantu bonso biyampe, ino kutabukidila boba botubutulwa nabo mu lwitabijo.” (Ngalatea 6:10; tanga Loma 12:10.) Mutumibwa Petelo wāsonekele amba: “Kikōkeji kyomukōkele bubine” kifwaninwe kulombola “kisanso kya bu bana na bana” kya binebine. Kadi Petelo wāsapwidile banababo bene  Kidishitu amba: “Kutabukidila, mwisanswei bininge banwe bene na bene.”​—1 Petelo 1:22; 4:8.

9, 10. Mwanda waka bantu ba Leza badi mu bumo?

⁹ Bulongolodi bwetu bwa ntanda yonso i bwa pa bula. Mwanda waka? Mwanda tusenswe bya bine batutu ne bakaka. Kadi kintu kikwabo kya mvubu tusenswe Yehova ne tukōkele bijila byandi, mwanda witukwatakanyanga na bukomo butabukile bonso, mushipiditu wandi ujila. Mushipiditu wa Leza witukwashanga twikale mu bumo bwa bu bana na bana bwa ntanda yonso.​—Tanga 1 Yoano 4:20, 21.

¹⁰ Polo wānene ukoma pa kine kisakilwa buswe mu bukata bwa bene Kidishitu paāsonekele amba: “Vwalai kisanso kya mutyima wa lusalusa, kanye, kwityepeja, kutalala, ne kitūkijetyima. Endelelai kwitūkijija mityima banwe bene na bene ne kwilekela na mutyima umo nansha shi kudi udi na mwanda na mukwabo. Monka mwemulekēle Yehova na mutyima umo, nenu mufwaninwe kulongela monka. Ino, kutentekela pa bino byonso’bi, vwalai buswe, mwanda abo i kijimba kibwaninine kya bumo.” (Kolose 3:12-14) Bine, tufwijanga’ko bikatampe pa buno buswe, “kijimba kibwaninine kya bumo,” kidi mu bukata mwetu nansha byo tutambile ku bifuko bishileshile!

11. Lelo i bika biyukanyanga bulongolodi bwa Leza?

¹¹ Bumo ne buswe bwa binebine bwa bengidi ba Yehova bwibayukanyanga bu batōtyi ba bine. Yesu wānene amba: “Pa kino e pakayukila bonso amba mwi bami bana ba bwanga, shi mudi na buswe umbukata mwenu.” (Yoano 13:34, 35) Kadi mutumibwa Yoano wāsonekele amba: “Bana ba Leza ne bana ba Dyabola bayukenanga pa uno mwanda: Muntu ense kalongalongapo boloke katambilepo kwa Leza, ne yewa kasenswepo mwanabo mwine. Uno’u o mwanda otwaivwene tamba ku ngalwilo, amba twisanswei batwe bene na bene.” (1 Yoano 3:10, 11) Buswe ne bumo buyukanyanga  Batumoni ba Yehova bu balondi ba bine ba Kidishitu, bantu bengidijibwa na Leza mwanda wa kusapula myanda miyampe ya Bulopwe pano pa ntanda ponso.​—Mateo 24:14.

12, 13. Lelo i bika biloñanga ba mu “kibumbo kikatampe” dyalelo ne i bika byobasa kwimwena panopano?

¹² Dyalelo, bengidi bavule ba Yehova babadilwa mu “kibumbo kikatampe” kya bantu batambile mu bifuko palapala bya pano pa ntanda, kadi bakwatakanyanga Bulopwe. “Bano’ba i boba bapityile mu kyamalwa kikatampe, kadi i bakende minkukumba yabo ne kwiitōkeja mu mashi a Kana ka Mukōko” na kukulupila mu kitapwa kya kinkūlwa kya Yesu. Bano badi mu “kibumbo kikatampe” baswele Yehova ne wandi Mwana, kadi batōtanga Yehova “dyuba ne bufuku.”​—Kusokwelwa 7:9, 14, 15.

¹³ Panopano ponka Leza usa konakanya ino ntanda mibi ku “kyamalwa kikatampe.” (Mateo 24:21; tanga Yelemia 25:32, 33.) Ino Yehova ukakinga ne kuludika bengidi bandi mu ntanda mipya mwanda wibaswele. Enka na mwaēkilaile pano kepadi myaka 2000, “ukapampulanga impolo yonso ku meso abo, ne lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka.” Lelo usakanga kukela mu Paladisa pa katalulwa bintu bibi, masusu ne lufu?​—Kusokwelwa 21:4.

14. Lelo kibumbo kikatampe kibailanga’ko muswelo’ka?

¹⁴ Pashilwile mafuku a mfulo mu 1914, kwadi’tu maelefu abala anga a bengidi ba Leza. Batonwenwe na buswe bobadi baswele bakwabo ne na bukwashi bwa mushipiditu ujila wa Leza, kano kakibumbo katyetye ka batutu ne bakaka bashingwe māni basapwile myanda miyampe ya Bulopwe bwa Leza nansha byokwadi makambakano. Byafula kwepi? Dyalelo kibumbo kikatampe kya bantu badi na lukulupilo lwa kukekala’ko nyeke pano pa nshi kyakongakanibwe. Kudi kintu kya Batumoni 8 000 000 mu bipwilo 115 400 ne kupita pano pa ntanda ponso, kadi kino kibalwa kyendanga kivudila’ko. Kimfwa, mu mwaka wa mingilo wa 2014 kwabatyijibwe Batumoni bapya kintu kya 275 500 ne kupita. Ko kunena amba bantu 5 300 babatyijibwanga yenga ne yenga.

15. Lelo myanda miyampe ifikilanga bantu namani dyalelo?

¹⁵ Bine i kya nsangaji’po kashā pa kumona bantu bavule betabija myanda miyampe ya Bulopwe. Dyalelo mabuku etu adi mu ndimi 700 ne kupita. Kiteba kya Mulami i dipepala dyabanibwa pano pa ntanda ponso. Makopi 52 000 000 ne kupita atampwanga mu ndimi 247 kweji ne kweji. Kadi dibuku Lelo I Bika Bine Bifundija Bible? i dyalamunwe mu ndimi 250 ne kupita. Kadi ke kutampwe makopi 200 000 000 ne kupita.

16. Mwanda waka bulongolodi bwa Yehova bwendanga butantyila’ko?

¹⁶ Bulongolodi bwetu bwendanga butantyila’ko mwanda twitabije mudi Leza ne kumona Bible bu Kinenwa kya ku bukomo bwa mushipiditu wandi. (1 Tesalonika 2:13) Tusangelanga nyeke madyese a Yehova nansha bitushikilwe Satana kinkwa netu.​—2 Kodinda 4:4.

17, 18. Lelo Yehova usakanga tumone namani boba kebamutōtangapo?

¹⁷ Bantu bemvwananga musapu wetu mu miswelo mishileshile. Bantu bamo betutejanga bakwabo nabo kijila. Lelo Yehova usakanga tumone namani boba kebamutōtangapo? Bateje nansha kebatejejepo, batwe tulondanga madingi adi mu Bible. A amba: “Binenwa byenu bikale kyaba kyonso bya buntu, byelwe’mo mwepo, amba muyuke mwa kulondolwela muntu ne muntu.” (Kolose 4:6) Nansha byo tunenwe kubingija nkulupilo yetu, tusakanga kulonga namino na “butūkanye ne bulēme bukatampe.”​—1 Petelo 3:15.

 ¹⁸ Nansha shi bantu betukalabele ne kupela musapu wetu, tulombolanga buswe botuswele bakwetu na kwiula kimfwa kya Yesu. Yesu “pobadi bamutuka mutonko mubimubi, kadipo waluja mutonko. Paadi ususuka, kadipo ukanina muntu.” Bine, Yesu wādi ukulupile mudi Yehova. (1 Petelo 2:23) O mwanda kitatyi kyonso, twityepejanga ne kulonda madingi a amba: “Kemwakilubulai kibi ku kibi nansha mutonko na mutonko. Ino eselai dyese.”​—1 Petelo 3:8, 9.

19. Lelo tufwaninwe kumona namani balwana netu?

¹⁹ Kwityepeja kwitukwashanga tukōkele musoñanya wa mvubu wāletele Yesu. Wānene amba: “Mwaivwene mokyānenenwe amba sanswa mukwenu, shikwa walwana nobe. Ino ami nemunena’mba: Sanswai nyeke balwana nenu ne kulombelela boba bemupangapanga, amba mwikale bana ba Shenu udi mūlu, mwanda aye utambijanga dyuba dyandi ku babi ne ku bayampe kadi unokejanga mvula ku boloke ne ku bakondame bene.” (Mateo 5:43-45) Byotudi bengidi ba Leza, tufwaninwe kusanswa balwana netu nansha shi betususula namani.

20. Lelo tubayuka namani amba buswe bwa kuswa Leza ne mukwetu bukandabila pano pa ntanda ponso? (Tala kifwatulo ku ngalwilo.)

²⁰ Kyaba kyonso, tufwaninwe kusanswa Yehova ne mukwetu. Nansha shi bantu betulwa ne kulwa musapu wetu, tubwanya kwibakwasha shi bikokejika. Mutumibwa Polo wāsonekele amba: “Kemwakikalai na mapu a muntu nansha umo, poso enka a kwisanswa banwe bene na bene; mwanda yewa usenswe mukwabo wafikidija bijila. Mwanda mukanda wa bijila unena’mba, kokalonga makoji, kokepayañana, kokeba, kokakomwa meso, nansha shi kwikale mbila’ka, yonso i mikongelwe pamo mu bino binenwa’mba: Sanswa mukwenu mowisanshilwe abe mwine. Buswe kebuloñangapo mukwabo bibi; nanshi buswe ko kufikidila kwa bijila.” (Loma 13:8-10) Mu ino ntanda imbi ya kwiketaketa, ya bukalabale, iludikwa na Satana, bengidi ba Leza basenswe bakwabo bya binebine. (1 Yoano 5:19) Pa kupwa’tu Yehova konakanya Satana ne bademona bandi ne ntanda yandi imbi, buswe bukandabila pano pa ntanda ponso. Bine, i dyese ne dyese’po dikekala pano pa ntanda ponso buswe bwa kuswa Yehova ne mukwetu!